1. Kai si arus terus ilakoken kalak si enggo iperidiken?

ENGGO nge kam iperidiken? Adi enggo, sanga kam iperidiken icidahkenndu man jelma si enterem maka erkiniteken kam man Jahwe janah ilayanindu atendu Ia ras organisasiNa. * Kinitekenndu man Jahwe arus terus reh belinna

2-3. Sipat-sipat Jahwe si apai si teridah bas organisasiNa gundari? Bereken contohna.

² Arah cara Jahwe ngaturken organisasiNa gundari, teridah uga sipat-sipat Jahwe e, kai ateNa si idungiNa, janah uga patoken-patokenNa. Mari sibahas telu sipat Jahwe si teridah bas organisasiNa.

³ Pertama, “Dibata la erpilihen.” (Perb. 10:34) Perban keleng ate Jahwe kerina manusia, iberekenNa anakNa jadi “tebusen.” (1 Tim. 2:6; Joh. 3:16) Gelah kerina kalak banci dat manpaat arah tebusen e, igunaken Jahwe umatNa guna mberitaken berita si meriah man kerina kalak si nggit megiken. Peduaken, Jahwe e Dibata si teratur ras dame. (1 Kor. 14:33, 40) Emaka, kalak si nembah Ia arus iorganisasi alu teratur ras dame. Peteluken, ‘Jahwe e Guru si Mulia.’ (Jes. 30:20, 21, NW) Emaka iusahaken organisasiNa kel ngajari kalak kerna Kata Dibata bas runggun bage pe bas erberita. Uga nge sipat Jahwe si telu enda teridah bas runggun abad pertama? Uga nge sipat-sipat e teridah gundari? Janah uga kesah si badia nampati kam sanga erdahin ras organisasi Jahwe?

4. Menurut Perbahanen Rasul-Rasul 1:8, perentah kai si ibereken Jesus man murid-muridna, janah penampat kai si ialoken kalak e?

⁴ Bas abad pertama. Berita si meriah si iberitaken Jesus mereken arapen man kerina manusia. (Luk. 4:43) Iperentahken Jesus murid-muridna gelah nerusken pendahin si enggo imulaina eme mberitaken berita si meriah “seh ku ujung doni.” (Baca Perbahanen Rasul-Rasul 1:8.) Tapi iteh kalak e maka pendahin e la banci ilakokenna alu gegehna sendiri. Emaka perlu kalak e “penampat” si ijanjiken Jesus eme kesah si badia.​—Joh. 14:26; Sak. 4:6, NW.

5-6. Alu cara kai saja kesah si badia nampati murid-murid Jesus?

⁵ Bas Pentakosta tahun 33 Masehi, ialoken murid-murid Jesus kesah si badia. Alu penampat kesah si badia, mis kalak e mulai erberita, janah asilna lit ribun kalak si ngaloken berita si meriah. (Perb. 2:41; 4:4) Sanga kalak e mulai ianiaya, la kalak e mbiar janah tetap erberita perban pindo kalak e penampat Jahwe. Ertoto kalak e man Jahwe, nina, “Banlah kami selaku budak-budakNdu pang meritaken kataNdu.” Asilna, dem me kalak e alu kesah si badia janah terus “iberitaken kalak e kata Dibata alu pang.”​—Perb. 4:18-20, 29, 31.

⁶ Lit ka tentangen si deban si iadapi murid-murid Jesus. Contohna, paksa si e lenga melala Kitap si Badia, la lit buku-buku si banci njelasken isi Kitap si Badia bagi si lit gundari, janah murid-murid arus erberita man kalak i bas erbage-bage bahasa. Perban kerina tentangen e, tempa-tempa pendahin erberita la banci ilakoken. Tapi bas kira-kira 30 tahun saja, berita si meriah enggo iberitaken “ku kerina ciptan si lit i teruh langit.”​—Kol. 1:6, 23.

7. Lebih 100 tahun si lewat, janari iteh umat Jahwe kai peraten Dibata man kalak e janah uga tanggapenna?

⁷ Bas jaman modern. Terus iaturken Jahwe umatNa janah iberekenNa gegeh man kalak e guna ngelakoken peratenNa. Terutama pengaturen e iberekenNa arah Pustaka. Bas Pustaka banci sibaca kerna pelayanen Jesus bage pe kerna perentah si iberekenna man murid-muridna guna nerusken dahin si enggo imulaina. (Mat. 28:19, 20) Bas The Watchtower Juli 1881 ikataken, “Ilebuh ntah ipilih Jahwe kami labo gelah iergai kalak ntah pe gelah bayak. Tapi igunaken kami ate kami kai si lit bas kami guna erberita.” Selain si e, buku si iterbitken bas tahun 1919 si erjudul Whom the Work Is Entrusted ngataken, “Melala pendahin si arus ilakoken, tapi kerina enda pendahin Dibata. Emaka pasti iberekenNa gegeh guna ngelakokenca.” Bagi kalak Kristen abad pertama, turang seninata enda tek maka pasti isampati kesah si badia kalak e erberita man kerina kalak. Emaka pang kalak e erberita janah tutus kel atena ngelakokenca. Gundari pe, tek kita maka kesah si badia pasti terus nampati kita.

8-9. Cara kai saja si igunaken organisasi Jahwe guna erberita?

⁸ Igunaken organisasi Jahwe alat-alat si mehulina guna erberita. Contohna, publikasi tercetak, “Drama-Foto Penciptaan,” fonograf, motor si lit pengeras sorana, acara radio, janah mbaru-mbaru enda komputer ras Internet. Organisasi Jahwe pe sibuk nerjemahken publikasi ku erbage-bage bahasa. Janah enda pendahin si luar biasa perban lenga pernah ilakoken bagenda sebelumna! Enda ilakoken gelah kerina kalak banci megi berita si meriah bas bahasana sendiri. Jelas me  Jahwe la erpilihen. InubuatkenNa maka berita si meriah e iberitaken “man tiap bangsa, suku, bahasa ras umat.” (Ket. 14:6, 7) AteNa gelah kerina kalak megi berita si meriah kerna Kerajan Dibata.

⁹ Uga carana erberita man kalak si mesera njumpaisa, misalna kalak si tading bas ingan si ijaga ketat? Gelah banci erberita man kalak si bage, isampati Jahwe organisasiNa gelah mulai erberita bas ingan si enterem jelma. Contohna, isetujui Badan Pinpinen nggunaken gerai bage pe lektur si ipajang bas ingan si enterem jelma. Enda tangtangna ilakoken bas tahun 2001 i Prancis. Janah bas pudi wari ilakoken ka bas ingan-ingan si deban. Mejile kel asilna. Bas tahun 2011, iban program khusus erberita bas ingan si enterem jelma. Tangtangna e ilakoken bas kota New York, salah sada kota si sibukna si lit i Amerika Serikat. Bas tahun pertama lit 102.129 buku ras 68.911 majalah si ibereken man kalak. Janah lit 4.701 kalak si mindo erlajar Pustaka! Jelas me, idukung kesah si badia pendahin enda. Emaka, isetujui Badan Pinpinen me turang senina erberita alu nggunaken gerai ras lektur si ipajang.

10. Uga carana gelah reh beluhna kita erberita ras ngajar?

¹⁰ Si banci ilakokenndu. Bas perpulungen, iajari Jahwe carana erberita. Gunakenlah kerina si ipelajarindu e. Raturlah kam erberita ras kelompok dinasndu. Turang senina bas kelompokndu e banci nampati kam gelah reh beluhna erberita ras ngajar. Janah banci ka kam terpegegehi arah usihenna si mehuli. Teruslah kam erberita aminna pe lit tentangen. Enda pendahin arah Jahwe nari, emaka pasti iberekenNa gegeh man banta. Bagi ayat tema artikel enda, banci silakoken peraten Dibata labo perban gegehta tapi perban penampat kesah si badia.​—Sak. 4:6, NW.

11. Kai si ilakoken badan pinpinen bas abad pertama gelah umat Dibata tetap ersada?

¹¹ Bas abad pertama. Badan pinpinen  bas Jerusalem ersada ngaturken umat Dibata gelah teratur ras dame. (Perb. 2:42) Contohna, kira-kira bas tahun 49 Masehi, lit masalah kerna sunat. Adi la idungi masalah e, dahin erberita banci terganggu. Emaka, icakapken badan pinpinen si termasuk rasul-rasul ras pertua-pertua me masalah e. Aminna pe kalak e kalak Jahudi, tapi la kalak e ipengaruhi kebiasan Jahudi ras kai pe si lit hubungenna ras si e. Emaka gelah banci iban kalak e keputusen si mehuli, idarami kalak e petunjuk arah Kitap si Badia ras penampat kesah si badia. (Perb. 15:1, 2, 5-20, 28) Asilna, ipasu-pasu Jahwe keputusen kalak e, runggun jadi dame ras ersada, janah pendahin erberita terus ilakoken.​—Perb. 15:30, 31; 16:4, 5.

12. Kai buktina organisasi Jahwe e teratur ras dame?

¹² Bas jaman modern. Isampati organisasi Jahwe gelah umat Dibata tetap teratur ras erdame. Bas tahun 1895, i Zion’s Watch Tower and Herald of Christ’s Presence 15 November lit artikel si erjudul “Alu Sopan ras Teratur,” si ibuat arah 1 Korinti 14:40. Nina artikel e, “Melala si iceritaken rasul-rasul kerna runggun abad pertama si teratur. . . . Penting kel terus ngikutken kerinana perban kerina ‘si enggo itulis mbarenda itulis guna ngajar kita.’” (Rom. 15:4) Gundari pe iusahaken organisasi Jahwe gelah runggun tetap teratur ras dame, bali bagi runggun Kristen i bas abad pertama mbarenda. Misalna, sanga pulung kam bas runggun si deban ntah pe bas negeri si deban, pasti itehndu artikel si apai bas Sora Ermomo si man bahasen janah uga e ibahas. Mis meriah iakapndu i je. Kesah si badia ngenca si banci erbanca lit persadan si bage.​—Sep. 3:9.

13. Sanga siukuri Jakup 3:17, penungkunen kai si arus sisungkuni banta?

¹³ Si banci ilakokenndu. Jahwe ersura-sura gelah umatNa ‘njaga persadan si ibereken kesah si badia bage pe nggeluh alu dame.’ (Ep. 4:1-3) Emaka sungkunlah bandu, ‘Kuusahaken nge gelah runggun ersada ras dame? Patuh nge aku man pertua-pertua? Banci nge aku iandalken  khususna adi lit tanggung jawapku bas runggun? Tepat waktu nge aku rusur? Nggit nge aku nampati janah semangat ngelayani?’ (Baca Jakup 3:17.) Adi lit akapndu si man perubahen, pindolah penampat kesah si badia. Adi pediatndu kesah si badia erban sipat ras perbahanenndu reh ulina, reh kelengna me ate turang senina kam janah ngata bujur kalak e bandu.

14. Menurut Kolose 1:9, 10, kai si ilakoken Jahwe guna ngajar umatNa bas abad pertama?

¹⁴ Bas abad pertama. Meriah ukur Jahwe ngajari umatNa. (Msm. 32:8) AteNa itandai kalak e min Ia, ikelengi kalak e Ia, janah banci kalak e nggeluh si rasa lalap. Kerinana enda banci terjadi perban iajari Jahwe kita. (Joh. 17:3) Igunaken Jahwe runggun Kristen abad pertama guna ngajari umatNa. (Baca Kolose 1:9, 10.) Ibereken Jesus “penampat” si ijanjikenna eme kesah si badia guna nampati murid-murid. (Joh. 14:16) Isampati kesah si badia murid-murid ngangkai Kata Dibata janah nginget kerina si ikataken ras si ilakoken Jesus, si bas pudi wari icatat i bas Injil. Pemeteh enda mpegegehi kiniteken kalak Kristen abad pertama janah mpebages kekelengenna man Dibata, man anakNa, bage pe man sada ras si debanna.

15. Uga nubuat Jahwe si lit bas Jesaya 2:2, 3 terjadi gundari?

¹⁵ Bas jaman modern. Inubuatken Jahwe maka “i bas wari-wari si arah pudi pagin,” enterem kalak arah erbage bangsa nangkih ku gunung Jahwe guna iajar kerna dalan-dalan Jahwe. (Baca Jesaya 2:2, 3.) Nubuat e sangana terjadi gundari. Siidah sendiri uga agama si benar ndauh ulin asangken kerina agama si lit gundari. Melala kel pemeteh i bas Pustaka  nari si ibereken Jahwe man umatNa! (Jes. 25:6) Igunaken Jahwe “budak si setia janah pentar” guna mereken pemeteh e ndai kerina alu erbage-bage cara. Misalna, arah baca-bacan, khotbah-khotbah, bage pe arah video kartun ras video-video si debanna. (Mat. 24:45) Perasanta bali bagi Elihu teman Jop, nina, “I ja kin lit guru bagi Ia beluhna?”​—Jop 36:22.

16. Kai si banci ilakokenndu gelah erguna pengajaren Jahwe bandu?

¹⁶ Si banci ilakokenndu. Banci isampati kesah si badia kam ndalanken kai si enggo ibacandu ras si ipelajarindu bas Kata Dibata. Ertotolah kam bagi kalak si nulisken Masmur, nina, “Ajari aku nehken peratenNdu, [Jahwe], gelah kulakoken e alu tutus. Ajari aku ngendesken diri man baNdu alu bulat ukurku.” (Msm. 86:11) Teruslah baca ras pelajari Pustaka bage pe publikasi-publikasi si isediaken organisasi Jahwe. Tujunndu erlajar labo ngenca nambahi pemeteh, tapi gelah kebenaren e kena ku pusuhndu janah banci idalankenndu. Banci isampati kesah si badia kam ngelakokenca. Selain si e, ipegegehindu ka atendu turang senina arah pemeteh si enggo idatndu. (Heb. 10:24, 25) Engkai? Perban kalak e keluargandu. Pindolah penampat kesah si badia gelah banci arah ukurndu mereken komentar janah gelah banci berekenndu si mehulina sanga dat bagin kam bas perpulungen. Alu bage, ibuktikenndu man Jahwe bage pe anakNa maka keleng atendu ‘biri-biriNa’ si meherga.​—Joh. 21:15-17.

17. Uga kam mbuktiken maka setia kam ndukung organisasi Jahwe?

¹⁷ Lanai ndekah sada nari ngenca tading organisasi bas doni enda, eme organisasi si itegu-tegu kesah si badia. Emaka, semangatlah kam ndukung organisasi Jahwe. Usihlah kekelengen Jahwe si la erpilihen alu erberita man kerina kalak si ijumpaindu. Usihlah Jahwe si teratur ras dame alu ngusahaken persadan bas runggun. Begikenlah Guru si Mulia alu mpelajari kerina pemeteh si enggo iberekenNa. Aminna pe doni Setan enda enggo nandangi ikernepken, la kam mbiar. Sebalikna, banci kam jadi kalak si perpang radu ras kalak si setia ngelayani Jahwe bas organisasiNa.