1. Nge ô dubaneya, jé wo yiane ke ôsu a bo?

NGE a ne na ô dubaneya, yeme na ô nga jô bôt été na wo buni Yéhôva a na wo kômbô nye bo ésaé ékôane jé été. * Ve mbunane wôé wo yiane ke ôsu a yaé. Wo yiane fe tu’a yemete ndi nleme jôé na Yéhôva a ke ôsu a belan ékôane jé den.

2-3. Mefulu me Yéhôva mevé ma yené ékôane jé den?

² Éyoñ bia yen avale Yéhôva a wulu ékôane jé den, bia tu’a yem avale môt a né a fatan ényiñ a yi na bi nyiñ, bi ne fe tu’a wô’ô nsôñane wé. Mefulu me Yéhôva mevé ma yené ékôane jé?

³ Jam ôsu, “Zambe a nji nye’e ngumba môt.” (Mam. 10:34) Nye’ane ñwô ô nga tindi Yéhôva na a ve Mone wé ane “ntañe ya bôte bese.” (1 Tim. 2:6; Jean 3:16) Yéhôva a nga belane bebo bisaé bé na be kañete mbamba foé si se. Nalé a bo na ba bese be bili mbamba été nsisime be bi ényiñ a zene ya ntañ. Jame baa, “Yéhôva a nji bo Zambe ya ne zametazametan, ve nyô ya mvo’é.” (1 Bec. 14:33, 40) Ajô te, bebo bisaé bé be’efe ba yiane nye kañe be too nta’an, be nyiñe’ mvo’é été. Jame lale, Yéhôva a ne “Beta Ñye’ele” wongan. (És. 30:20, 21) Jôm ete nje ékôane jé ja ve ngul ése na é ye’ele bia Mejô me Zambe, sa ke ve bia étam, to’o bôte be nji bo Bekristen. Aval avé Bekristene ya ntete mimbu ôsu be nga vu mefulu me Yéhôva mete melal? Aval avé bebo bisaé be Yéhôva ya melu ma fe ba vu me? A aval avé mbamba nsisim a ne su’u wo nté wo ke ôsu a bo Yéhôva ésaé ékôane jé été?

4. Ésaé évé Yésus a nga ve beyé’é bé kalate Mam Minlôman 1:8, a jé é nga ye be volô na be bo ésaé éte?

⁴ Ntete mimbu ôsu. Foé Yésus a mbe a kañete’ é mbe é va’a bôte meval mese ndi nlem. (Luc 4:43) A nga jô beyé’é bé na be kee ésaé nkañete ôsu “akekui mfa’a si nyô ja dañ ôyap.” (Lañe’e Mam Minlôman 1:8.) Be nji be ve bo ésaé éte a ngule jaba bebien. E mbe e sili’i na Yésus a lôme be “mvolô” a nga ka’ale be, nnye ate a ne mbamba nsisim.​—Jean 14:26; Zac. 4:6.

5-6. Aval avé mbamba nsisim a nga volô beyé’é be Yésus?

⁵ Beyé’é be Yésus be nga vebane mbamba nsisime Pentecôte ya mbu 33 É.J. Ve nné ane be nga jaé a mbamba nsisim, be taté ki na ba kañete été été, ane betoyini be bôte be nga kañese mbamba foé. (Mam. 2:41; 4:4) Étibela’a be nga tôbane je mvuse ya valé é nji bo na be ko woñ. Be nga viane ye’elane Yéhôva na a volô be be jô’ô na: “Va’a bebo bisaé bôé ngule ya kobô ajô dôé a biasé mise me bôt.” Ane mbamba nsisim a nga mane jaé be menyule ne lut, a volô be na be ke ôsu a “kobô mejô me Zambe, te[ke] ko woñ.”​—Mam. 4:18-20, 29, 31.

⁶ Ve sa ke abime minju’u ete étame nde be nga tôbane de. Melu map, mimvulekane bekalate mi nji be abui. A nde fe na be nji be be bili bekalate be ne timine be Mejô me Zambe ane bia den. Ane ô vaa nalé, be mbe fe be yiane’ kañete bôte ba kobô aka’ abui minkobô. Akusa bo minju’u mite mise, biwôlô bekañete mbamba foé bite bi nga bo jame ya semé: Fo’o ve mvuse jôm ane mimbu 30, be mbe be kañeteya mbamba foé “vôme mintéane mi biôm mise” ya éyoñe jap mi mbe.​— Beco. 1:6, 23.

7. Bebo bisaé be Yéhôva be nga nyiñe den a nto mimbu ntet a mvuk be nga yeme nkômbane Yéhôva a zene fé, a be nga bo aya éyoñe be nga yeme wô?

⁷ Melu ma. Yéhôva a ke ôsu a wulu bebo bisaé bé, a ve fe be ngule ya bo nkômbane wé. A dañe bo de a zene ya Mejô mé me ne Kalate Zambe été. Été, bia yen aval avé Yésus a nga bo ésaé nkañete jé, a lañ abendé a nga ve beyé’é bé na be kee ésaé éte ôsu. (Mt. 28:19, 20) Nkume mmombô a bete ya Ngone zangbwale ya mbu 1881 a mbe a jô’ô na: “Bi nji bo mintoban nge ke miñwo’an asu na bi jeñe duma, nge ke na bi kôan akum. Ve Zambe a yi na bi belane jôm ése bi bili asu bôte befe, a na bi kañete mbamba foé.” Nsoé kalate ôfe ô nga kui mbu 1919 ô too nlô ajô na À qui l’œuvre est confiée; bi mbe ve lañ été na: “Bi bili fo’o abui ésaé, ve mbôl a ne ésaé Tate, bia yeme na é ve bia ngule ya bo je.” Ôwé, fo’o ve ane Bekristene ya ntete mimbu ôsu, bobejañe bete be nga saé a nlem ôse, be yeme’e na mbamba nsisim a ye volô be na be kañete bôte mevale mese. Bia fe bi too ndi na nsisime Yéhôva wo ye volô bia aval ete da da den.

8-9. Fatane nkañete évé ékôane Yéhôva é nga bôndé asu na mbamba foé a miaseban?

⁸ Ékôane Yéhôva é jaéya zu ja belan aka’a mbamba bikpwelé asu na mbamba foé a yandane si se. Ataté melu mvus azukui den, bi nga belane biôm ane bekalate a minsoé bekalate, « Photo-Drame de la Création », bephonographe, bemetua be bili éko mezik, beradio, a beminsini bese mia yeme den. Ane ô vaa nalé, ye ékôan éfe ja kôñelane bekalate si nyi ane ékôane Yéhôva nga? Amu jé bia wu abime nju’  ete? Amu bia yi na môt ase a wô’ô mbamba foé nkobô wé. Yéhôva a nye’e bôte mevale mese, jôm ete nje a nga jô na mbamba foé a ye katebane meyoñe mese, a menda me bôte mese, a minkobô mise. (Nli. 14:6, 7) Yéhôva a yi fo’o na môt ase a bo ngule ya wô’ô mbamba foé ya Éjôé.

⁹ Nge a ne ke na môt a too avale nda e nji bo tyi’ibi ya nyiin, éko éziñ amu é bili beta nka’ale a beba’ale? Ékôane Yéhôva é nga fase befatane be nkañete be ne volô abui bôt e too avale menda ete. Mbu 2001, Tin Ékôan é nga kañese na bobejañe ya France be belane meta’a bekalate, a mvuse ya valé, bobejañe ya mesi mefe be nga taté fe na ba bo de. Fatane nkañete éte é nga wume mbamba bibuma. Mbu 2011, ékôane Yéhôva é nga jô na be taté na ba telé meta’a bekalate New York, bevôm bôte ba lôt abui. Mbu ôte, bi nga kabe bekalate 102 129 a minsoé mi kalate 68 911. Wônaa bôte 4 701 be nga sili ayé’é Bible! Teke vaa nge beté, mbamba nsisime Yéhôva nnye a nga wulu ésaé éte! Ane ékôane Yéhôva é nga yene na bebo bisaé be Yéhôva ya si se ba yiane belane fatane nkañete éte.

10. Jé é ne volô bia na bi tu’a bo atyeñ ésaé nkañete?

¹⁰ Jam ô ne bo. Tôñe’e melebe Yéhôva a ve wo bisulan asu na ô tu’a bo atyeñ ésaé nkañete. Bo’o ô su’u nta’ane mame ya angôse nkañete dôé. Mbamba éve’ela bobejañe ya angôse nkañete dôé a ne ve wo ngule nyul a volô wo na ô ke wo sôane bone be mam béziñ éyoñe wo kañete. Te bili atek to’o wo tôbane minju’ miziñ ésaé éte. Aval éfuse ja su’u nlô ajô wu ja jô, bia bo ésaé éte amu Yéhôva a ve bia nsisime wé, sa ke amu ngule jangane biabebien. (Zac. 4:6) Yéhôva a ne bo te ve ve bia ngule jé aya, a too ke na ésaé bia bo é ne énjé?

11. Aval avé bobejañe ya tin ékôane ya ntete mimbu ôsu be nga saé a nleme wua asu na bebo bisaé be Yéhôva ya éyoñ éte be bo nta’an?

¹¹ Ntete mimbu ôsu. Bobejañe ya tin ékôane ya ntete mimbu ôsu be nga saé  a nleme wua asu na mvo’é é yené zañe bebo bisaé be Yéhôva. (Mam. 2:42) Éyoñ ajô ntyi’iban atyel e nga bômbô bebé mbu 49 É.J., mbamba nsisim a nga wulu bobejañe bete asu na be yeme kobô de. E mbe mfi na be kôm ajô te, amu e mbe ve ndeñele ésaé nkañete. Minlômane a bemvendé bete be mbe fo’o fe Bejuif, ve be nji kañese na metume Bejuif mme me bo mbôka’a ya ñye’elane wop. Be nga lañe Mejô me Zambe a ye’elane Yéhôva na a ve be mbamba nsisim asu na be nyoñe ntyi’an ô ne zôsôô. (Mam. 15:1, 2, 5-20, 28) Nde ajô te e nga su’ulan aya? Yéhôva a nga botane ntyi’ane be nga nyoñ, ane mvo’é é nga beta yené, a ésaé nkañete é nga ke ve ôsu.​—Mam. 15:30, 31; 16:4, 5.

12. Jé ja liti na ékôane Yéhôva ya den é ne nta’an a nlatan?

¹² Melu ma. Ékôane Yéhôva é nga jaé saé asu na bebo bisaé be Yéhôva be tabe nta’an a nlatane jôme jia. Nge bia bulane ve mbu 1895, Phare de la Tour de Sion et Messager de la Présence de Christ ya Ngon awôm a jia é too melu 15 a mbe a bili nlô ajô éziñ ô too na: “Ane da yian a nta’an.” Kalate 1 Becorinthien 14:40 nnye a mbe a su’u nlô ajô ôte. Bi mbe ve lañ été na: “Minlômane mi nga ye’ele akônda ya ntete mimbu ôsu abui mam a lat a mfi ya bo nta’an . . . E ne mfi na bia fe bi ke ôsu a tôñe melebe mete amu ‘me nga tilibane mfa’a ya ñyé’ane wongan.’” (Bero. 15:4) Fo’o ve ane ntete mimbu ôsu, ékôane Yéhôva ja saé a ngul ése melu ma asu na mekônda me bo nta’an a nlatan. Tame yene ve na, vôm ase ô ne ke tabe ésulane ya memane me sondô, wo tyelé ke nleme yôp, amu wo yeme Nkume mmombô a bete wo yiane kee nye, a nlô ajô bé yé’é. Nsisime Zambe étame ñwô wo bo na bi bo nlatan a bobejañe ya si se aval ete. Sa nalé?​—Soph. 3:9.

13. Minsili mivé ô ne sili womien éyoñ ô maneya lañe kalate Jacques 3:17?

¹³ Jam ô ne bo. Yéhôva a yi na bebo bisaé bé be “ba’ale ntabane nleme wua ya nsisim,” a “nlatane ya ñbwa été.” (Beép. 4:1-3) Sili’i ñhe womiene na: ‘Ye me ne  fo’o avale môte da ve ngule na akônda e tabe mvo’é a nlatan? Ye ma bo fo’o ba be tele ôsu mewôk? Ye bôte ba yeme na be ne sili ma mvolan, e dañe dañ nge me be’e mimbe’e akônda? Ye ma semé fo’o awolo a ye ma nye’e me saane bôte bevok?’ (Lañe’e Jacques 3:17.) Nge ô yene na ô ngenan ô yiane sôane bone be mam béziñ, ye’elane Yéhôva na a ve wo mbamba nsisime wé. Éyoñe bobejañe bé yene na wo jô’é na nsisime Zambe ô bo ésaé be wo, ba ye tu’a nye’e wo a semé wo.

14. Bela’ane Becolossien 1:9, 10 na ô liti avale Yéhôva a nga ye’ele bebo bisaé bé ya ntete mimbu ôsu?

¹⁴ Ntete mimbu ôsu. Yéhôva a nye’e a ye’ele bebo bisaé bé. (Bs. 32:8) A bo de amu a yi na be yeme nye a nye’e nye, a na be bu’ubane mbamba élat a nye nnôm éto. Mam mete mese me vo’o bobane nge bi nji bi ñye’elane wo so be Ésaa wongane ya nye’an. (Jean 17:3) Yéhôva a nga belan akônda ya ntete mimbu ôsu asu na e ye’ele bebo bisaé bé. (Lañe’e Becolossien 1:9, 10.) Mbamba nsisim a nga volô fe beyé’é nya abuii avale Yésus a nga ka’ale be. (Jean 14:16) A nga volô be na be tu’a yeme Mejô me Zambe, na be beta simesan abui mame Yésus a nga jô a bo, a na be tili me. Ñyeman ôte ô nga yemete mbunane Bekristene ya ntete mimbu ôsu a volô be na be tu’a nye’e Yéhôva ba Mone wé, a na be nye’esane fe be be.

15. Aval avé wo yen ane nkulan ajô ya kalate Ésaïe 2:2, 3 wo tôéban?

¹⁵ Melu ma. Yéhôva a nga jô na “melu ya asu’ulan,” bôte ya meyoñ mese ba ye zu nkôle wé, nalé a ne na, ba ye zu fulan a bebo bisaé bé asu na a ye’ele be. (Lañe’ Ésaïe 2:2, 3.) Bia kôme yen ane nkulan ajô ôte wo tôébane den. Da kôme yené na  nya ékaña’a nnye a tele évus ékaña’a ôsu melu ma. Yéhôva a kôme fe ve bebo bisaé bé bidi ya nsisime nya mveane! (És. 25:6) Bidi a ve bia a zene ya ôlo ô ne mewôk a fek bi nji bo ve abui, bi ne fe mevale meval: a bekalate, a bevidéo, bia bia kôme fo’o bu’uban! (Mt. 24:45) Bia wô’ô amu jé Élihu, mvôé Job, a nga jô na: “Za a ne ñye’ele aval ane [Zambe]?”​—Job 36:22.

16. Jé é ne volô wo na ô bu’ubane ñye’elane Yéhôva?

¹⁶ Jam ô ne bo. Mbamba nsisime Yéhôva a ye volô wo na ô bo mame wo lañ a yé’é Kalate Zambe. Ane ntili besam éziñ, wo fe ye’elane Yéhôva ô jô’ô na: “Ye’ele’e me zene jôé, a Yéhôva; ma ye wulu benya mejôô môé été: Yemete’e nleme wom ô ko jôé dôé woñ.” (Bs. 86:11) Kele’e fe ôsu a lañ a bindi Kalate Zambe a bekalate bese ékôane Yéhôva ja kuli. Nsôñane wôé ô nji yiane bo na ô bi ve ñyeman. Ve wo yi fe na benya mejôô me nambe wo nlem asu na ô tôñe me ényiñe jôé. Nsisime Yéhôva ô ne volô wo na ô tôé nsôñan ôte. Ve wo yiane fe ve bobejañ a besita ya akônda ngule nyul. (Beh. 10:24, 25) Amu jé? Amu be ne bibu’a ya nda bôte jôé. Ajô te, ye’elane Yéhôva na a volô wo na ô ve mbamba biyalan ésulan, a na ô kôme kômesan éyoñ ô bili ésaé ya bo. Mam mete mme ma ye liti Yéhôva ba Mone wé na wo nye’e bone “mintômba” miap.​—Jean 21:15-17.

17. Aval avé ô ne liti na wo su’u ékôane Yéhôva?

¹⁷ Ana’ana, ékôane Yéhôva étam nje ja ye wulu bôte ya si se. Ajô te, taté’é na wo su’u je den a nlem ôse. Ane Yéhôva, nyeke’e avale môt ese, a kañete’e bôte mevale meval benya mejôô. Mbôle Yéhôva a nye’e mvo’é a nta’ane mam, jeñe’ a ngul ése na ô tôñesane mvo’é akônda dôé. Jeñe’e fe na ô di bidi bise ya nsisime Yéhôva, Beta ñye’ele wongan, a ve bia. Nge ô bo mam mete mese, wo ye yange asu’ulane ya émo ji nlem ô bôô wo si, a wo ye tebe ne bip fefele bebo bisaé be Yéhôva bevok.