1. Ka katei lunbei hasigirun adüga kristiánugu ha badiseihaña?

ANHEIN badiseihadiwa lubéi mini lan le ariñaga wamaali lan hagibugiñe sun gürigia afiñe wamá luagu Heowá ani aranseediwa lan lun weseriwidun lun úara tuma lóundarun. * Inarüni luagu megei wamá lun ítarameme wamá ederebudagüdei wafiñen luma wafiñerun luagu layusuruñoun lan Heowá lóundarun uguñe weyu lun lagunfuliruni lugundan.

2, 3. Ka ligaburi Heowá arihúabei lidan ligaburi ladundehanu lóundarun?

² Lidan ligaburi ladundehanu Heowá lóundarun uguñe weyu arihúati ligaburi, lisuuni luma lilurudun. Ariha wamá ǘrüwa lídangiñe ligaburi Heowá le arihubei tidan lóundarun.

³ Furumiñe, “úati [...] himei lan Bungiu aban gürigia luéi aban” (Adü. 10:34). Ínchaha lumuti línsiñehabu lun lederegeruni lisaani lun hesefurun sun gürigia (Huan 3:16; 1 Tim. 2:6). Lun gayara lan líderagun Heowá saragu gürigia lun hasagarun buiti lídangiñe esefuruni le, yusu lumutiña lubúeingu lun houdin lau uganu buiti houn sun ha busenbaña haganbuni. Libiaman, lugundun Heowá aban Bungiu lánina darangilaü, mama lánina chagaguaü (1 Ko. 14:33, 40). Ligíati, agurabati Heowá heseriwidun lumutuniña lun lau darangilaü ani mama lau chagaguaü. Lǘrüwan, aban Máisturu Heowá (Isa. 30:20, 21). Ligíati tetenirubei lóundarun arufudahei Lererun, dandu lidan damuriguaü kei lidan apurichihani. Ida liña larufuduni ǘrüwa katei le ligaburi Heowá lidan damuriguaü kristiánu lidan furumiñeti sígulu? Ida liña harufuduni lumutuniña uguñe weyu? Ani ida liña líderaguniwa sífiri sandu wagía le eseriwidubei lun Heowá úara tuma lóundarun uguñe weyu?

4. Según dimurei le lídanbei Adügaü 1:8, ka gumadi líchugubei Hesusu houn lani disipulugu, ani kaba meha íderaguaña?

⁴ Lidan furumiñeti sígulu. Uganu le meha lapurichihabei Hesusu ruti emenigini houn sun gürigia (Luk. 4:43). Aba lariñagun houn lani disipulugu lun hasigiruni dasi le lagumeserubei luma lun hapurichiha “chülǘ lumoun lidise-agei fulasu ubouagu” (aliiha huméi Adügaü 1:8). Inarüni siñá habéi lan hamuga dasi le agunfulira lau habafu guánarügü. Megei hamuti meha sífiri sandu le füramase lubéi Hesusu houn, ‘lun líderaguniña’ (Huan 14:26; Sak. 4:6).

5, 6. Ida liña líderaguniña sífiri sandu lani Hesusu disipulugu?

⁵ Resibi hamuti meha lani Hesusu disipulugu sífiri sandu lidan Pentekosutesi irumu 33 lidaaniwagu Hesusu. Lau lídehan sífiri le, aba hagumeserun apurichiha lau lóufudagun, ani lidan murusun dan aba hánharun saragu milu gürigia lun uganu buiti (Adü. 2:41; 4:4). Manufudeduntiña dan le lagumeserubei éibaahouni. Le hadügübei aba hamuriahan ídemuei luma Bungiu ani aba hafurieidun lun, hariñaga: “Ruba anigi woun, wagía le bubúeingu, lun wadimurehan buagu manufudeuga”. Ábati habuinchun lau lubafu sífiri sandu, aba “hapurichihani lererun Bungiu manufudeuga” (Adü 4:18-20, 29, 31).

⁶ Gagibuguatiña meha giñe lani Hesusu disipulugu luma amu lénrengunga. Kéiburi, lóuguatu meha Lererun Bungiu hama ani úati burí meha katei libe le wámabei uguñe weyu lidan dan lügüra. Ani mosu meha hapurichihan houn gürigia ha ayanuhabaña saragu amu iñeñein. Íbini laganagua sun le, ibiha hamuti disipulugu ha apurichihabaña lau saragu ubebeni le genegebei hénrengu lan: lídanrügü átiri irumu, lau sun lénrengunga apurichiha hamaali meha uganu buiti “lidan sun ubóu” dan meha ligía (Kol. 1:6, 23).

7. Kei burí lóugiñe san irumu guentó, ida liña meha hasubudiruni lubúeingu Heowá le lagurabubei hámagiñe, ani ida liña hóunabun?

⁷ Lidan dan le. Anihagua Heowá adundehaña lumutuniña luma íchiga erei houn. Inarüni, tídangiñetima lan Lererun to labürügüdüboun liabin adundehani le. Ani tidan, dariwati lani Hesusu ministeriu luma gumadi le líchugubei houn lani disipulugu lun hasigiruni dasi le lagumeserubei (Mat. 28:19, 20). Lidan sedü-hati irumu 1881 ariñagatu garüdia to: “Maguaruati woun ani manuádirun wagía lun weresibirun uéiriguni ni lun wóundaragun irisini, wáwati woun ani anuadirúa wagía lun wagastaruni wámati luma wabagari, luma lun wapurichihani uganu buiti”. Ariñagatu garüdia To Whom the Work Is Entrusted (Ha únbaña líchugua dasi), to áfuriduboun lidan irumu 1919: “Genegeti gíbeya lan dasi le, gama lumoun, luadigimari Wabureme le ani lau lídehan wadügübei”. Ítara liña, ítara kei kristiánugu ha lánina furumiñeti sígulu, deregeguatiña íbirigu ha houngua lau ganigi lun dasi le, chóuruti líderagubaña lan sífiri sandu lun hapurichiha houn sun hawuyeri gürigia. Ani anihein giñe ligiaméme ichouruni wawagu.

8, 9. Ka amu luwuyeri katei tayusurubei lóundarun Heowá lun lapurichihóun uganu buiti?

⁸ Lun gayara lan laburuchagun uganu buiti ubouagu, yusuhaaru lóundarun Heowá ani anuhagua ayusura ámuñegueinarügü katei le buídutimabei. Ani lidan le gayaraabei wíridun agumeiraguagüdüni to imprimíruarügütu, “Foto Drama de la Creación”, gramófonos, karü lau amuri, programa tídangiñeti radiu, luma buriti teknolohía le uguñebei. Ani úagiña ni aban ásügüragüdütiña lidoun saragu iñeñein kei tadügüni lóundarun Bungiu. Ani ka uagu wadügei? Lun haganbuni sun hawuyeri gürigia uganu buiti lidan hererun guánarügü. Úati himei lan Heowá aban gürigia luéi aban ani ariñagati lapurichihóuba lan uganu buiti houn sun “rasa, luwuyerigu dimurei luma  sun fulasu” (Aruf. 14:6, 7). Busenti Heowá lun lachülürün uganu lánina Larúeihan houn sun gürigia.

⁹ Kaba wariñaga hawagu gürigia ha hénrengubei lachülürǘniwa hábiñoun, másiñati ladüga lan hawinwanduña lan tidan muna to lautu saragu fuló? Lun gayaraabei lan lachülürǘn hamoun, íderagua laaru Heowá lóundarun lun tagumeserun oucha ámuñegueinarügü ligaburi lapurichihóun lidan guririguaü. Kéiburi lidan irumu 2001 aba líchugun Musu Úaraguati üma ageiraü Francia lun layusurún tarufudaagüle agumeiraguagüdüni luma amu burí katei libe lira, ani ruti giñe üma lun layusurún lidan amu burí ageiraü. Buiti lidin houn íbirigu lau hayusuruni umegeguni burí le. Lidan irumu 2011, aba lagumeserun aban programa lidan aban fulasu le ñein habéi burí saragu gürigia lidan uburugu Newayóru (Meriga). Lidan furumiñeti irumu, ragütiña gürigia 102,129 líburu, 68,911 garüdia, ani amuriahatiña 701 gürigia aturiahani tídangiñeti Bíbülia. Menefánti anihein lan sífiri sandu lidan dasi le. Ligía líchugubei Musu Úaraguati üma lun layusurún tarufudaagüle agumeiraguagüdüni lidan sun ubóu.

10. Ka gayaraabei wadügüni lun wabuiduragüdüni wani ministeriu?

¹⁰ Le gayaraabei wadügüni. Sagá wamá saragu buiti lídangiñe arufudahani le líchugubei Heowá woun lidan adamuridaguni. Furí wamá súnwandan apurichiha úara luma sétanu le ñein wabéi. Anhein megei wabéi lun wabuiduragüdüni somu ligaburi wapurichiha, gayaraati híderaguniwa íbirigu lau lubuidun burí hani hénpulu. Sigí wama apurichiha íbini anihein lan lénrengunga. Ítara kei laritaguagüdüniwa bérusu le ídangiñebei lasagarúa arütíkulu le, wadügübei lugundan Bungiu lau lídehan sífiri sandu, mama lau wabafu guánarügü (Sak. 4:6). Le linarün katei, dasi le, lúmagiñeti Bungiu.

11. Ida liña lawadigimaridun Musu Úaraguati le lánina furumiñeti sígulu lun lasigirun katei lidan lubudubu hadan lumutuniña Bungiu?

¹¹ Lidan furumiñeti sígulu. Nadagimeinti meha Musu Úaraguati le meha Herusalénbei lidan aban lun ladügǘn katei kei lubudubu luma lun ñein lan darangilaü hadan lumutuniña Bungiu (Adü. 2:42). Kei hénpulu, kei burí lidan irumu  49 l. l. K. dan le lagagibudagunbei Musu Úaraguati luma aban turobuli luáguti lunti lan lichugún seini tuagu hóustarun wügüriña akutiha lumuti katei le lau lídehan sífiri sandu. Lun hamuga meha fánreinguañu liña lan damuriguaü dan ligía, siñabei hamuga hapurichihan buidu. Íbini huríu hamá meha apostolugu hama wéiyaaña lidan afiñeni, mígiraguagüdüntiña houngua lun échuni ni houn ha arufudahabalin. Le hadügübei aba háluahani tadundehan Lererun Bungiu luma lani sífiri sandu (Adü. 15:1, 2, 5-20, 28). Ibihatiña lun labiniruni Heowá le hanúadirubei, adügati lira lun meferidirun lan darangilaü ni úarani, ani sigimémetiña apurichiha (Adü. 15:30, 31; 16:4, 5).

12. Ka uagu wariñaga adügǘwa lan katei keisi lubudubu ani lau darangilaü tidan lóundarun Heowá uguñe weyu?

¹² Uguñe weyu. Áfaaguaru lóundarun Heowá lun ua lan chagaguaü luma lun ñein lan darangilaü hadan lumutuniña. Lidan irumu 1895 anihein meha aban arütíkulu tidan garüdia to, to lánina 15 lidan unsu-hati lidan inglesi ani sagawati arütíkulu ligía lídangiñe 1 Korintuna 14:40 ani “Adügarügü huméi sun katei lidan lubudubu” líribei. Ariñagatu garüdia to: “Rútiña apostolugu saragu adundehani houn tílana binadu ligilisi libügürü ladügǘn sun katei lidan lubudubu [...]. Súdiniti lichugún arigei lun burí katei le abürüdǘbei lun larufudahóun woun” (Rom. 15:4). Igaburi le lánina ladügǘn katei lidan lubudubu luma darangilaü le arufudubaliña kristiánugu ha lánina furumiñeti sígulu ligiamémegili, furanguti larihín tidan lóundarun Heowá uguñe weyu. Lúnrügü warihini, ánhawa ñüdün lidoun Taturiahoun Garüdia Awisahatu lidan amu damuriguaü, íbini lidan amu ageiraü subudi wabéi ida liña lan taturiahoun luma kaba lan arütíkulu akutihóua. Lau lóufudagun aba wasandiragun woungua wábiñeñadiwa lan. Lubuidun úarani le siñabei hamuga ítaraguarügü lan, seremei lani Bungiu sífiri (Sof. 3:9).

13. Lau gabaroun wamani le lariñagubei Santiagu 3:17, ka álügüdahani gayaraabei wadügüni wóuniwagua?

¹³ Le gayaraabei wadügüni. Busenti Heowá lun lidan wamá “aban súnwandan lau lídehan [s]ífiri, lidan darangilaü” (Efe. 4:1-3). Ligíati álügüdagua wamá woungua: “Adügatina san lidan damuriguaü lun ñein lan darangilaü luma lun lidan wamá aban? Gaganbaditina san houn íbirigu ha adundehabalin? Gayaraati san  hafiñerun amu nuagu dántima le anihein lan buligasion lun nagunfuliruni lidan damuriguaü? Aban san gürigia chülügiñeheiti au? Ganigitina san níderaguniña amu ani aransetina san lun nadügüni?” (aliiha huméi Santiagu 3:17). Anhein genege lubéi woun lunti lan wabuiduragüni aban lídangiñe igaburi le, amuriaha wamá sífiri sandu luma Heowá. Éibutima wígirun lun labuiduragüdüni sífiri sandu wagaburi ani ígira wagíame lun ladundehaniwa lidan sun wágararagun, éibutimame wínsiñedun houn wábirigu ani gebegitimabadiwa houn.

14. Según Kolosana 1:9, 10, ida liña larufudaha Heowá houn lumutuniña lidan furumiñeti sígulu?

¹⁴ Lidan furumiñeti sígulu. Hínsiñeti lun Heowá larufudahan houn lumutuniña (Sal. 32:8). Busenti lun hasubudiruni lisaanigu ha hínsiñebaña lun, luma lun hínsiñebei lan houn lun hawinwandun lun súnwandan. Gayaraati lasuseredun sun le seremei lun arufudahani le líchugubei woun (Huan 17:3). Lidan furumiñeti sígulu yusu lumuti meha Heowá damuriguaü lun larufudahan houn lumutuniña (aliiha huméi Kolosana 1:9, 10). Liibe-agei ídemuei le líchugubei houn ru lumuti lau lídehan sífiri sandu le meha füramase lubéi Hesusu (Huan 14:16). Íderagua lumutiña sífiri sandu disipulugu lun gunfuranda hamanu Lererun Bungiu ani adügati lun haritaguni sun katei le lariñagubei Hesusu luma le ladügübei, ani lárigiñe aba habürüdüni lidan burí Ewanhéliu. Derebugüda lumuti subudi le hafiñen binadu kristiánugu, ítara kei hínsiñehabu lun Bungiu, lun lisaani luma houn hábirigu.

15. Ida liña harihini lagunfuliruni Heowá profesía le lídanbei Isaíasi 2:2, 3?

¹⁵ Lidan wadaani. Ariñagati Heowá, “lidoun burime lagumuhóun dan”, hamudeiruba lan gürigia ha lídangiñetiña sun néchani lidoun luwübüri, mini lan le hóundaraguba lan gürigia hamoun lumutuniña lun larufudahóun houn (aliiha huméi Isaíasi 2:2, 3). Uguñe weyu warihiñein  lagunfulirun profesía le. Anihein áhuduraguni inarüniti lóugiñe sun áhuduraguni mama inarüniti. Ma lubuidun ariñahani le líchugubei Heowá woun tuáguti lererun! (Isa. 25:6). Lau lídehan Heowá ruti Musu Úaraguati saragu ariñahani woun, lidan ámuñegueinarügü igaburi kei burí arütíkulu, yanu burí luma bidéu, íbini pichingu houn irahüñü (Mat. 24:45). Sandiguatiwa woungua kei Eliú, le lumada Hobu, le ariñagubei luagu Bungiu: “Ka gayaraabei lagumadihan buidu kei ligía?” (Hobu 36:22).

16. Ka gayaraabei wadügüni lun wibihin buiti lídangiñe le larufudahabei Heowá woun?

¹⁶ Le gayaraabei wadügüni. Líderagubadiwa sífiri sandu lun wadügüni le waliihabei luma le waturiahabei tidan Lererun Bungiu. Amuriaha waméi ligiaméme le lamuriahabei abürühati sálumu luma Heowá, le ariñagubei: “Nabureme, arufudabéi bémeri nun, lun nafalaruni lau gúnfuli. Adügabá lun inebe lan biri tun nanigi” (Sal. 86:11). Ligíati ítarameme wamá asagara buiti lídangiñe ariñahani le líchugubei Heowá woun tídangiñe Lererun lau tídehan lóundarun. Inarüni, mabusenruntiwa lúnrügü wabuinchagüdüni wachügü lau ariñahani. Le wabusenrubei lun lachülürün tidoun wanigi luma lun wawinwanduni. Líderagubadiwa lani Heowá sífiri lun wadügüni. Ínchaha wamaaña giñe wíbirigu lun hadügüni ligiaméme lugundun ítara haña woun kei iduheñu (Ebü. 10:24, 25). Furíei wamá lun líderaguniwa lani Bungiu sífiri lun wíchugun óunabagülei tídangiñe sun wanigi lidan adamuridaguni luma lun wadügüni sun wayaraati dan le wibihin aban dasi lidan damuriguaü. Ánhawa adügei sun le, warufudubei lun Heowá luma lun Lisaani hínsiñe hamá lubúeingu ha gebegibaña houn woun (Huan 21:15-17).

17. Ida luba warufuduni wídehaña lan tuma lóundarun Heowá lau úaraguni?

¹⁷ Yarafa madise, óundaruni to labuguruboun Bungiu lau lani sífiri tuguyarügüba eredera lidan sun Ubóu. Ligíati, nadagimein wamá úara tuma lau ubebeni. Ítara kei Bungiu, arufuda waméi ínsiñeni ani úa ligíame himei wamá aban gürigia luéi aban lau wapurichihani uganu houn súngubei. Áyeiha waméi línsiñehabu luagu darangilaü luma ladügǘniwa katei lau lubudubu lau wadügün lun ñein lan úarani lidan damuriguaü. Ani aganba waméi Wamaisturun lau wafurendeirun lídangiñe sun ariñahani le ru laalibei woun. Ligíati danme le lagumuchun ubóu le lábugiñebei lubafu Satanási, manufudebadiwa. Lau ganigi haganaguabadiwa gürigia ha eseriwidubaña lun Heowá lau úaraguni úara tuma lóundarun.