1. Ngu tihi a ti Mkristu wu a nga bhabhatiswa a fanelako kusimama e ti maha?

INA awe u muhuweleli awu a nga bhabhatiswa? I di toneto u ti kombisile ha kubasani ti to u na ni likholo ka Jehovha ni ti to u tiemisete ku mu thumela u di ka sengeletano yakwe. * Ngu toneto likholo lako ka Jehovha li fanete ku li kula. U fanete kutshumela u kulisa kutsaniseka kwako ka ti to Jehovha ngene a kongomisako sengeletano yakwe nyamsi.

2-3. Nzila yi Jehovha a kongomisako ngu sengeletano yakwe nyamsi yi kombisa txani? Womba sikombiso.

² Nzila yi Jehovha a kongomisako ngu yona sengeletano yakwe yi kombisa ati a ku ngu tona, ati a lavako kumaha ni ti milayo yakwe yi ku ngu tona. Konkuwa he bhule ngu tifanelo tiraru a ti ti wonekako ka sengeletano yakwe.

³ Txo khata “Txizimu kha txi khedhi m’thu.” (Mith. 10:34) Lirando li susumetete Jehovha ku e ningela mwanana wakwe kasi “kutirula votshe vathu.” (1 Tim. 2:6; Joh. 3:16) Jehovha a thumisa vathu vakwe ti to ve txhumayela mahungu a manene ka votshe va engisako, ngu nzila yoneyo hi vhuna vathu vo tala ku ve wuyelwa ngu mtirulo. Txa wumbidi, Jehovha Njizimu txa kudikha txo mbi na vhilinganya. (1 Vak. 14:33, 40) Ngu toneto vathu va va khozelako va fanete kuva ni kudikha ni kupfana. Txa wuraru, Jehovha i ‘M’gondisi’ wa Hombe. (Isaya 30:20, 21) Se sengeletano yakwe yi thuma ngutu ti to yi gondisa vathu Bhiblia dibanzani ni kutxhumayelani. Dibanza da Makristu o khata di ti tekelelisile kutxani tifanelo tiya ta Jehovha? Vathu va Jehovha va nyamsi va ti tekelelisa kutxani tifanelo toneto? Moya wo sawuleka wu nga kuvhunisa kutxani ti to u thumela Jehovha u di ka sengeletano yakwe nyamsi?

4. Ngu kuya ngu Mithumo 1:8, ngu tihi ti Jesu a nga ruma valondeteli vakwe. Ni ku ngu tihi ti a nga ti va thembisile?

⁴ Ka mbimo ya Makristu o khata. Didungula a di Jesu a nga txi txhumayela di txi ninga themba ka votshe vathu. (Luka 4:43) Jesu a rumile valondeteli vakwe ku ve maha mthumo wu a nga ti wu khatile, wo ningela wufakazi “kala magemeta-mitshi ka ditiko.” (Lera Mithumo 1:8.) Ngu toneto vona va si na kumaha mthumo wuwa ngu mtamo wawe. Vona va ndi na lava txivhuno txa moya wo sawuleka i ku “M’thaveleli” awu Jesu a nga ti va thembisile.—Joh. 14:26; Zak. 4:6.

5-6. Moya wo sawuleka wu vhunisile kutxani vagondiswa va Jesu?

⁵ Vagondiswa va Jesu va amukete moya wo sawuleka ngu dilembe da 33. Ngu kuvhunwa ngu moya wo sawuleka va khatile kutxhumayela se ngu mbimonyana vathu vo tala va amukete mahungu a manene. (Mith. 2:41; 4:4) Mbimo yi va nga khata kuxaniswa kha va thava kambe va kombete kuvhunwa ngu Jehovha. Vona va kombete ka Jehovha va txi: “Ninga sithumi sako kuwomba dipswi dako, na va si thavi txilo.” Se vona va tate ngu moya wo sawuleka “ve womba dipswi da Txizimu ngu kutsana.”—Mith. 4:18-20, 29, 31.

⁶ Vagondiswa va Jesu va tshumete va txi manana ni sikarato simwani. Ngu txikombiso, hi nga votshe vathu va nga ti ni mibhalo yo Sawuleka. Va si nga ni mabhuku a titxhamuselo ta Bhiblia o fana ni ya hi ku nawo nyamsi. Ni ku vagondiswa ti txi lava ve txhumayela vathu va va nga txi womba-womba tidimi to hambana-hambana. Ti si nga ni mhaka ni sikarato si vanga ti manana naso, vagondiswa vonevo va mahile timhaka ti ti nga txi woneka nga ti si na kukoteka. Ngu malembenyana a madotho, vona va txhumayete “ka sotshe sivangwa si si ku hahatshi ka nzuma.”—Vakl. 1:6, 23.

7. Vathu va Jehovha va ti zivisile kutxani a ti a nga txi ti lava kwawe? Va mahile txani?

⁷ Ka timbimo ta ngweno. Jehovha wa simama e kongomisa ni kuninga mtamo vathu vakwe. Kutala ka mkongomiso wu ta ngu mu ka Bhiblia a yi yi nga bhalwa ngu kuthumisa moya wakwe wo sawuleka. Ka yona hi mana matimu a mthumo wa Jesu ni txirumo txi a nga ninga valondeteli vakwe wo maha mthumo awu ene a nga wu khata. (Mat. 28:19, 20) Ngu txikombiso, direvhista da Julho wa 1881 di wombile tiya: “Kha ha dhanelwa mwendo kusawulelwa ku ta mana sikhunja mwendo ku ta mana tithomba, kambe hi dhanetwe ku ta tiningela ni kutxhumayela mahungu a Mfumo.” Dibhuku di di nga humeswa ngu 1919 adi di ku: Ava va nga avelwa mthumo, (ngu Txingiza) di wombile tiya: “Mthumo wu woneka i di wungi, kambe mthumo wa Mkoma, se ngu mtamo wakwe hi na wu kota.” Kufana ni Makristu o khata vanathu va txhumayete ngu kutsana va txi themba to moya wo sawuleka wu na va vhuna kutxhumayela vathu va tixaka totshe. Ni nathu nyamsi, hi nako kuthemba ku ku fanako.

8-9. Ngu tihi tinzila ati sengeletano yi ti thumisako kasi kutxhamayela ha mafuni kotshe?

⁸ Sengeletano ya Jehovha yi thumisa sithumiswa sa sinene sa kona ti to yi txhumayela mahungu a mfumo. Sithumiswa soneso si pata Foto-Drama da Criação, fonógrafo mimovha ya wutxenje, radio ni internet. Sengeletano ya Jehovha yi tshumela yi maha mthumo wo hunduxela ngu tidimi to tala ha mafuni kotshe! Ngu kutxani? Nguko vathu votshe va fanete kuengisa mahungu a manene ngu lidimi lawe. Jehovha kha khedhi m’thu ene a profetile ti to mahungu a manene ka “yotshe mifumo, totshe tixaka, totshe tidimi ni votshe  vathu.” (Mtu. 14:6, 7) Ene a lava ti to Mahungu a manene me engiswa ngu votshe.

⁹ Vathu vamwani va hanya ka tinyumba ti ku karatako kubela, to fana ni mapredio ni timwani, se vathu vonevo va ndi na pfisa kutxani mahungu a Mfumo. Aku txikongomelo txathu i ku txhumayela vathu va tixaka totshe sengeletano ya Jehovha yi mahile malulamiselo o txhumayela ngu tinzila to hambana-hambana. Ngu txikombiso ngu 2001, Mmidi wu wu Fumako wu tumelete ku kuthumiswa txikarinyana ni timeza to kombisa mabhuku khe França ni matiko mamwani. Ngu 2011 ka didhoropa da Nova York kukhatilwe mamahelo a maphya o txhumayela ngu nzila yo sawuleka ngu kuthumisa txikarinyana ka makhalo ya kutalako ngutu vathu. Ka dilembe do khata kuningetwe 102.129 wa mabhuku ni 68.911 wa marevhista ni ku 4.701 wa vathu va kombete kugondelwa Bhiblia! Ti ha kubasani ti to Jehovha a vhunetile ka mthumo wuwa ngu kuthumisa moya wakwe wo sawuleka. Se Mmidi wu wu Fumako wu tumelete ti to mamahelo awa me thuma ha mafuni kotshe.

10. Hi nga maha txani ti to hi tshukwatisa matxhumayelelo athu?

¹⁰ Awe u nga maha txani. Londola gondo yi Jehovha a yi ningako ngu kuthumisa mitshangano ya Wukristu. Mbimo yotshe txhumayela ni mtxawa wako wa thembwe. Vanathu va mtxawa wako va nga kuvhuna u tshukwatisa nzila yi u txhumayelako ngu yona ni kugondisa ngu yona ni ku txikombiso txawe txi nga ku tsanisa. Simama u txhumayela ti si nga ni mhaka ni sikarato. Nga ha wu wombako ngu kona m’bhalo wu wu nga ñola msungo mhaka wa gondo yiya, hi hetisisa kudhunda ka Txizimu i si nga ngu mtamo wathu kambe ngu moya wo sawuleka. (Zak. 4:6) Aku mthumo wu hi wu mahako i ku wa Txizimu, txona txi na hi ninga mtamo wu hi wu lavako ti to hi wu hetisisa.

11. Mmidi wu wu fumako wa khe Jerusalema wu thumisanisile kutxani ti to ku va ni kudikha hagari ka vathu va Txizimu?

¹¹ Ka mbimo ya Makristu o khata. Mmidi wu wu fumako khe Jerusalema wu txi thuma  ngu wumwewo ti to ku va ni kudikha ni kupfana hagari ka vathu va Txizimu. (Mith. 2:42) Ngu txikombiso mbimo ku nga wuka txinvunye mayelano ni timhaka ta wukwera ngu dilembe da 49, mmidi wu wu fumako ngu kukongomiswa ngu moya wo sawuleka wu khalahatshile wu xuxa mhaka yiya. I ti ku dibanza di sa va ni kupfana ka mhaka yiya, mthumo wo txhumayela wu ti emile. Hambiku vapostoli ni madhota mamwani i nga ti Majudha vona kha va lunzwa ngu txihena txa txijudha, kambe va tumelete moya wo sawuleka wu va kongomisa. (Mith. 15:1, 2, 5-20, 28) Ngu yihi wuyelo yi nga vaho? Jehovha a katekisile txisungo txawe, se kudikha ni wumwewo ku simamile ni ku mthumo wo txhumayela wu yite masoni.—Mith. 15:30, 31; 16:4, 5.

12. Nji txani txi kombisako ti to sengeletano ya Jehovha yi ni kudikha ni kupfana nyamsi?

¹² Ka timbimo ta ngweno. Sengeletano ya Jehovha yi thuma ngutu ti to ku va ni kudikha hagari ka vathu va Jehovha. Ngu txikombiso direvhista da Torre de Vigia da 1895, di ti ni msungo mhaka awu wu nga ti seketetwe ka 1 Vakorinto 14:40, awu wu nga ti khene: “Fanelo ni kupfana” (ngu txingiza). Msungo mhaka wonewo wu wombile tiya: “Vapostoli va txi kuzete ngutu Makristu kulowe ti to me va ni kupfana . . . Se nathu ti lava hi khumbula ti to a ti ti ‘nga bhalwa kale, ti bhaletwe ku ti txi hi gondisa.’” (Var. 15:4) Sengeletano ya Jehovha yi thuma ngutu ti to mabanza me va ni kudikha ni kupfana kufana ni Makristu o khata. Ngu txikombiso, ngako u txi xalela gondo ya Muwoneleli ka ditiko dimwani u na ya wona to ku gondwa msungo wona wu wa wumwewo, ni ku mamahelo ngu ona ya a mamwewo. Se u na tipfa u di mtini. Kupfana kuwa ku ngo mahwa ngu moya wa Txizimu dwe.—Zef. 3:9.

13. Ati ti ku ka Jakobe 3:17 ti hi maha hi ti wotisa txani?

¹³ U nga maha txani. Jehovha a lava ti to vathu vakwe ve ‘veketa mpatano wa Moya, ngu kupfana ko dikha.’ (Vaef. 4:1-3) Se ti wotise tiya: ‘Ina na maha totshe ti ni ti kotako ti to ku va ni kudikha dibanzani? Ina na engisa mkongomiso wa va va thangelako? Ina na tiha mbimo yo vhuna vanathu hambi ni di ni wutixamuleli  wa hombe dibanzani? Ina na veketa mbimo, na ti dhunda kuvhuneta ni kutiningetela ko thuma?’ (Lera Jakobe 3:17.) Ngako ku di mu u lavako kutshukwatisa kombela moya wo sawuleka wu kuvhuna. Mbimo yi u lekako moya wo sawuleka wu tshukwatisa wuthu wako ni simaho sako, vanathu va na kudhunda ni ku u na va wa lisima dibanzani.

14. Ngu kuya ngu Vakolosa 1:9, 10, Jehovha a thumisile txani ti to e gondisa vathu vakwe ka mbimo ya Makristu o khata?

¹⁴ Ka mbimo ya Makristu o khata. Jehovha wa ti dhunda kugondisa vathu vakwe. (Mas. 32:8) Ene a lava ku hi mu ziva, hi mu randa ni ku hi hanya ngu ha ku singako ni magwito kota vanana vakwe vo dhundeka. Totshe tiya ti si na kukoteka i si nga ku Jehovha a hi dhundako. (Joh. 17:3) Jehovha a thumisile dibanza do khata ti to e gondisa vathu vakwe. (Lera Vakolosa 1:9, 10.) Moya wo sawuleka i ku “M’thaveleli” awu Jesu a nga va thembisa wu va vhunile ngutu. (Johani 14:16) Wona wu va vhunile kupfisisa Mibhalo ni ku va vhuna ku khumbula a ti Jesu a nga womba ni kumaha ati ngu kutsimbila ka mbimo ti nga bhalwa ka Tievhangeli. Wuzivi wonewo wu tsanisile likholo la Makristu o khata, ati ti nga maha ti to ve randa Jehovha, ve randa Jesu ni kutshumela ve randana ngu txawe.

15. Wuprofeti wu ku ka Isaya 2:2, 3, wu hetiseka ngu nzila yihi nyamsi?

¹⁵ Ka timbimo ta ngweno. Jehovha a profetile ti to ka “masiku o gwitisa” vathu va tixaka totshe va ndi na tala ka mmango wo fanekisela ti to ve gondiswa tinzila takwe. (Lera Isaya 2:2, 3.) Athu ha kuwona kuhetiseka ka wuprofeti wonewo. Wukhozeli wa ditshuri wu gulekile txitimwi ka wukhozeli wu wu nga tala wa makuhu. Ngu ditshuri Jehovha wa hi ninga m’buso wa sakudya sa moya! (Isaya 25:6) Ngu kuthumisa ‘txithumi txo thembeka na txi di ni  wutxhari’, ene kha hi ningi sakudya so tala dwe, kambe a hi ninga sakudya so hambana-hambana, i ku timhaka to tala ati hi nga ti gondako ka site, miwomba-wombo, mavhidhiyo ni sivhidhiywana. (Mat. 24:45) Athu hi tipfa kufana ni Elihu awu a nga khene: “I mani a gondisako kufana ni [Txizimu]?”—Jobe 36:22.

16. U nga maha txani ti to u wuyelwa ngu gondo yi Jehovha a yi ningelako?

¹⁶ U nga maha txani. Moya wo sawuleka wa Txizimu wu nga kuvhuna u thumisa ati u ti gondako amu ka dipswi da Txizimu. Khongela kufana ni m’bhali wa Masalmo awu a nga khene: “Ni gondise, MKOMA, nzila yako, kasiku ni yi londisa ngu yotshe mbilu. Maha ti to mbilu yangu yi dhumisa ditina dako.” (Mas. 86:11) Simama u tidila ngu sakudya sa moya asi Jehovha a ku ningako ngu kuthumisa Bhiblia ni sengeletano yakwe. Txikongomelo txako txi nga ve txi txo mana wuzivi dwe. Kambe a ti u ti gondako ti fanete kugwesa mbilu yakwe ni ku ti thumisa ka wutomi wako. Moya wo sawuleka wu nga kuvhuna kumaha toneto. U fanete kutshumela u tsanisa vanathu. (Vaheb. 10:24, 25) Ngu kutxani? Nguko vona va lumba mwaya wako wa moya. Kombela moya wo sawuleka ti to u ningela tixamulo ti ti akako u di mitshanganoni ni kumaha totshe ti u nga ti kotako ti to u maha kwati sienge si u ningwako. U txi maha toneto u na komba Jehovha ni Mwanana wakwe ti to wa ti randa “tinvuta” tawe ta lisima.—Joh. 21:15-17.

17. U nga ti kombisisa kutxani ti to wa seketela sengeletano ya Jehovha?

¹⁷ I si nga kale ha mafuni ku no sala sengeletano yimweyo dwe ayi yi kongomiswako ngu moya wo sawuleka. Se simama u thumela Jehovha u di ka sengeletano yakwe. Kufana ni Jehovha kombisa lirando ka votshe vathu ngu kutxhumayela votshe vathu. Kombisa ti to wa randa kudikha ni kupfana ngu kusakulela wumwewo dibanzani. Ni ku riya nzeve ka M’gondisi wako wa Hombe ngu kulondola sotshe sakudya si a hi ningako. Mbimo yi mafu a Sathani ma no guma i si nga kale, khu na mbi ta dhukiswa ngu txilo. Hahanze keto u na ema u tsana kumweko ni va va thumelako Jehovha ka sengeletano yakwe.