1. Met a lamot án ekkewe Chón Kraist mi papatais repwe sópweló le féri?

KA FEN papatais? Ika ewer, iwe ka fen pwári mwen mesen aramas pwe ka lúkú Jiowa me mochen angang ngeni lón an we mwicheich. * Ewer, a lamot pwe óm lúkú Jiowa epwe péppéchékúleló. A pwal lamot óm kopwe akkapéchékkúla óm lúkúlúk pwe Jiowa a kan ákkáeá an we mwicheich lón ei fansoun le apwénúetá minne a mochen.

2-3. Ifa usun Jiowa a emmweni an we mwicheich lón ei fansoun? Áweweei.

² Lón ei fansoun Jiowa a emmweni an we mwicheich lón ewe napanap mi pwári ika i met sókkun Kot, minne a mochen apwénúetá, me an ekiek wóón met mi pwúng me met mi mwáál. Sipwe pwóróus wóón úlúngát napanapen Jiowa kewe sia tongeni kúna seni an we mwicheich.

³ Áeúin, “Kot esap lifilifil aramas.” (Föf. 10:34) Tong a amwékútú Jiowa le fangóló Néún we pwe epwe “angasala aramas meinisin seni tipis.” (1 Tim. 2:6; Joh. 3:16) Jiowa a néúnéú néún kewe aramas le afalafala ewe pwóróus allim ngeni meinisin mi mochen aúseling, iwe ra álisi chómmóng le kúna feiéch seni ewe méén kepich. Oruuan, Jiowa i ewe Koten kókkótéch me kinamwe. (1 Kor. 14:33, 40) Ina minne, sia lúkú pwe ekkewe chón fel ngeni repwe angang ngeni lón eú mwicheich mi kókkótéch me kinamwe. Aúlúngátin, Jiowa i ewe “Soukait.” (Ais. 30:20, 21) Ina minne an we mwicheich a fókkun angang weires le asukula an we Kapas, ewe Paipel lón ewe mwichefel me lón ewe angangen afalafal. Ifa usun chón ewe mwichefelin Chón Kraist lón fansoun ekkewe aposel ra áppirú napanapen Jiowa kana úlúngát? Ifa usun néún Jiowa kewe aramas ra áppirú ekkena napanap lón ei fansoun? Me ifa usun ewe ngún mi fel a tongeni  álisuk lón óm angang ngeni Jiowa lón an we mwicheich lón ei fansoun?

4. Me ren Föför 1:8, met Jesus a allúkú ngeni néún kewe chón káé ar repwe féri, me ifa ewe álillis repwe angei?

⁴ Lón fansoun ekkewe popun Chón Kraist. Ewe pwóróus Jesus a afalafala a awora ngeni aramas meinisin ápilúkúlúk. (Luk. 4:43) A allúkú ngeni néún kewe chón káé ar repwe sópweló ewe angang i a poputááni, ar repwe afalafal “tori lon unusen fanüfan.” (Álleani Föför 1:8.) Ewer, rese tongeni féri ena angang ren pwisin ar péchékkúl. A lamot ngeniir ewe ngún mi fel, ina ‘ewe soualilis,’ Jesus a fen pwonei ngeniir.​—Joh. 14:26; Sek. 4:6.

5-6. Ifa usun ewe ngún mi fel a álisi néún Jesus kewe chón káé?

⁵ Lón ewe Pentikost ier 33, néún Jesus kewe chón káé ra angei ewe ngún mi fel. Ren álillisin ena ngún mi fel, ra mwittir poputá le afalafal, me mwirin chék ekis fansoun, a wor fitu ngeréú ra etiwa ewe pwóróus allim. (Föf. 2:41; 4:4) Iwe, atun ekkena chón káé ra kúna riáfféúmwáál, rese fangetá nge ra fen tingor án Kot álillis. Iei ar iótek: “Atufichi noumw kei chon angang pwe repwe afalafala om kapas fän pwora.” Iwe mwirin, ra uroló ren ewe ngún mi fel me ra chék sópweló le “asilefeili än Kot kapas fän pwora.”​—Föf. 4:18-20, 29, 31.

⁶ Néún Jesus kewe chón káé ra kúna pwal ekkóch weires. Áwewe chék, ese kon chómmóng kapiin ewe Taropwe mi Pin. Ese pwal wor néúr ekkewe puken álillisin Paipel usun lón ach ei fansoun. Me ra pwal afalafal ngeni aramas mi eáni sókkopaten fós. Inaamwo ika a wor ekkena weires, nge ekkena chón káé mi tinikken ra féri ewe angang usun itá ese tufich ngeniir ar repwe féri, iwe ren chék úkúkún 30 ier, ra afalafala ewe pwóróus allim “ngeni aramas meinisin won fanüfan.”​—Kol. 1:6, 23.

7. Lap seni 100 ier a ló, ifa usun néún Jiowa kewe chón angang ra silei minne a mochen ar repwe féri, me met ra féri?

⁷ Lón ach ei fansoun. Jiowa a sópweló le emmweni me apéchékkúla néún kewe aramas pwe repwe féri letipan. A kan emmweni néún kewe aramas me ren an we Kapas mi mak fán emmwenien an we ngún mi fel. Me ikena ie, sia álleani pwóróusen án Jesus angangen afalafal me an allúk ngeni néún kewe chón káé ar repwe sópweló ewe angang i a poputááni. (Mat. 28:19, 20) Seni me lóóm, lón ewe July 1881, ewe Watch Tower a apasa: “Sise kefil me ren Jiowa ren ach sipwe kúna ling me ren aramas are pisekisekiló, nge sia kefil pwe sipwe áeá mettóch meinisin met mi wor rech pwe sipwe afalafala ewe pwóróus allim.” Iei met eú kúkkún puk mi katowu lón ewe 1919 itelapan To Whom the Work Is Entrusted, a erá: “A fókkun watte ach angang, nge iei án ewe Samol angang, me epwe ngenikich ewe péchékkúl ren ach sipwe tongeni féri.” Ewer, pwiich kana ra usun ekkewe popun Chón Kraist ren ar angang weires fán pwora pokiten ra lúkú pwe ewe ngún mi fel epwe álisiir le afalafal ngeni sókkun aramas meinisin. Sia sópweló le eáni ena esin lúkúlúk lón ei fansoun.

8-9. Ikkefa ekkewe alen afalafal án Jiowa we mwicheich a áeá le alapaaló ewe angangen afalafal?

⁸ Án Jiowa we mwicheich a fen áeá ekkewe minen álillis mi fókkun múrinné mi kawor ren an epwe achéúfetálei ewe pwóróus allim. Áwewe chék ren ekkewe puk mi peres, ewe “Photo-Drama of Creation,” chikongki, ekkewe waa mi apioni ekkewe afalafal, afalafal wóón reitio, me kukkuto chék ra néúnéú ekkewe pekin computer me Internet. Án Kot we mwicheich a pwal wisen emmweni eú angang mi fókkun lap lón uruwoon aramas, ina ewe angangen afféúni ekkewe pwóróus lón sókkopaten fósun fénúfan! Pwata? Pwe sókkun aramas meinisin repwe tongeni rong ewe pwóróus allim lón pwisin  ar fós. Jiowa ese lifilifil aramas. A fen oesini pwe ewe pwóróus allim epwe esilefeil “ngeni sokun mwich me ainang, kapas me mwü meinisin.” (Pwär. 14:6, 7) A mochen pwe pwóróusen an we Mwú epwe kawor ngeni aramas meinisin.

⁹ Nge ifa usun ren chókkewe a weires ach sipwe tikeriir, eli pokiten ra nóm lón ekkewe imw mi allúk án aramas repwe tolong ie? Ren ach sipwe tikeri ekkena esin aramas, án Jiowa we mwicheich a poputá le ekieki pwal ekkóch alen afalafal ikewe mi chómmóng aramas ie. Áwewe chék, lón ewe ier 2001, ewe Mwichen Soupwúngúpwúng a apwúngaló áeáán ekkewe cart me cheepel mi ékúna ngeni aramas néúch kewe puk lón France me mwirin lón pwal ekkóch leeni. A sópwéch ena kókkót. Lón ewe 2011, a poputá eú minefé napanapen angangen afalafal lón Merika lón eú leeni lón New York City, ikewe mi fókkun tarangarang aramas ie. Lón ewe ewin ier, ra anéúnéú 102,129 puk me 68,911 Leenien Mas me Awake! Me 4,701 aramas ra tingor ar repwe káé Paipel! Sia kúna pwe Jiowa a ákkáeá an we ngún mi fel le álillis lón ena angang. Ina minne ewe Mwichen Soupwúngúpwúng a apwúngaló áeáán ekkewe cart me cheepel mi ékúna ngeni aramas néúch kewe puk wóón unusen fénúfan.

10. Met sia tongeni féri pwe sipwe lipwákéchúló lón ewe angangen afalafal?

¹⁰ Minne ka tongeni féri. Alamotaéchú ewe káit Jiowa a awora lón ach kewe mwich. Kopwe fiffiti óm we kúmiin afalafal le akkafalafal. Chienom kewe lón óm na kúmi ra tongeni álisuk le lipwákéchúló lón ewe angangen afalafal me asukul, me ra pwal tongeni apéchékkúlok ren ar kewe leenien áppirú mi múrinné. Sópweló chék lón óm fiti ewe angangen afalafal pwal mwo nge fán weires. Ewe wokisin ach ei lesen a lóngólóng wóón, a áchema ngenikich pwe sia tufichin apwénúetá letipen Kot ren an we ngún mi fel, nge esap ren pwisin ach péchékkúl. (Sek. 4:6) Pokiten sia féri án Kot angang, iwe sia tongeni lúkúlúk pwe epwe apéchékkúlakich le féri an angang.

11. Ifa usun ewe mwichen soupwúngúpwúng a angang fán tipeeú pwe epwe chék wokkor kókkótéch lein néún Kot kewe aramas?

¹¹ Lón fansoun ekkewe popun Chón Kraist. Ewe mwichen soupwúngúpwúng lón  Jerusalem, a angang fán tipeeú pwe epwe chék wokkor kókkótéch me kinamwe lein néún Kot kewe aramas. (Föf. 2:42) Áwewe chék, ina epwe lón ewe ier 49, chómmóng Chón Kraist ra tipefesen wóón ewe mettóch sirkumsais, iwe fán emmwenien ewe ngún mi fel, ewe mwichen soupwúngúpwúng a pwúngúpwúng wóón ena mettóch. Ika chón ewe mwichefel ra chék tipefesen wóón ena mettóch, iwe esap sópwéch ewe angangen afalafal. Inaamwo ika ekkewe aposel me ekkewe souemmwen iir chón Jus, nge rese tipetipeló ren eérenien chón Jus are ren chókkewe mi apéchékkúla ena eéreni. Nge ra fen kútta emmwen seni án Kot we Kapas me an we ngún mi fel. (Föf. 15:1, 2, 5-20, 28) Met mwirilóón? Jiowa a efeiéchú minne ra apwúngaló, me chón ewe mwichefel ra kinamwe me tipeeú, iwe ewe angangen afalafal a lallapóló.​—Föf. 15:30, 31; 16:4, 5.

12. Met a pwári pwe án Jiowa we mwicheich lón ei fansoun a kókkótéch me kinamwe?

¹² Lón ach ei fansoun. Án Jiowa we mwicheich a angang weires pwe epwe chék wokkor kókkótéch me kinamwe lein néún kewe aramas. Seni me lóóm lón ewe 1895, lón ewe Zion’s Watch Tower and Herald of Christ’s Presence minen November 15, a katowu ewe lesen itelapan “Decently and in Order,” mi lóngólóng wóón 1 Korint 14:40. Iei met ena lesen a erá: “Ekkewe aposel ra makkeei chómmóng mettóch ngeni ewe popun mwichefelin Chón Kraist usun kókkótéch . . . A lamot ach sipwe fókkun ákkálleasochisi ‘mine a mak lon ekewe Toropwe mi Pin a mak fän iten ach sipwe kaiö seni.’” (Rom 15:4) Ewer, án Jiowa mwicheich lón ei fansoun a angang weires pwe epwe chék wokkor kókkótéch me kinamwe lón ekkewe mwichefelin Chón Kraist usun lón fansoun ekkewe popun Chón Kraist. Áwewe chék: Ika kopwe fiti eú Káéén Leenien Mas lón pwal eú mwichefel pwal mwo nge lón eú fénú, kopwe fen silei kókkótun ewe káé me menni lesen repwe káé. Iwe kopwe meefi kinamwe! Itá met epwe tongeni efisi ena esin tipeeúfengen mi aúchea me lúkún chék án Kot we ngún mi fel?​—Sef. 3:9.

13. Ikkefa ekkewe kapas eis sipwe eisini pwisinkich seni ach álleani James 3:17?

¹³ Minne ka tongeni féri. Jiowa a mochen án néún kewe aramas repwe ‘tümwünü ar tipeeufengen lon ewe Ngünmifel ren ewe  kinamwe mi rifengeniir.’ (Ef. 4:1-3) Pwisin eisinuk: ‘Ua kan álisatá tipeeú me kinamwe lón ewe mwichefel? Ua kan álleasochisi chókkewe mi wisen emmwen? Ekkewe ekkóch ra tongeni lúkúlúk wóói ákkáeúin ika a wor wisei lón ewe mwichefel? Ua kan álilliséch, tipemecheres le angang fán iten ekkewe ekkóch me use kan soun mmang?’ (Álleani James 3:17.) Ika ka kúna pwe mi wor met ka tongeni émúrinnéló, iwe iótek fán iten ewe ngún mi fel. Lapólóón óm mut ngeni ewe ngún mi fel an epwe émúrinnéló napanapom kewe me emmweni óm kewe féffér, epwe pwal ina lapólóón án chienom kewe Chón Kraist tongeok me aúcheani met ka féri lón ewe mwichefel.

14. Me ren Kolose 1:9, 10, ifa usun Jiowa a asukula néún kewe aramas lón fansoun ekkewe aposel?

¹⁴ Lón fansoun ekkewe popun Chón Kraist. Jiowa a fókkun pwapwa le akkasukula néún kewe aramas. (Kölf. 32:8) A mochen ar repwe silei i, tongei, me manaw tori feilfeiló pwe iir néún kewe a tongeer. Ika esap pwúlún ewe asukul a awora, esap tufich ekkena mettóch. (Joh. 17:3) Jiowa a áeá ewe mwichefelin Chón Kraist lón fansoun ekkewe aposel le asukula néún kewe aramas. (Álleani Kolose 1:9, 10.) Ewe ngún mi fel, ina ‘ewe soualilis’ Jesus a pwonei usun, a pwal álisi ekkewe chón káé. (Joh. 14:16) Ewe ngún mi fel a álisi ekkewe chón káé le weweiti án Kot Kapas me chemeni meinisin met Jesus a apasa me féri, ekkewe ra makketiw mwirin lón ekkewe Puken Kapas Allim. Ekkena sile ra apéchékkúla án ekkena popun Chón Kraist lúkú me pwal ar tongei Kot, Néún we, me ar tong lefiler.

15. Ifa usun ka kúna pwe Jiowa a apwénúetá an pwon lón Aisea 2:2, 3?

¹⁵ Lón ach ei fansoun. Jiowa a fen oesini pwe “lon fansoun sopolan,” aramas seni mwú meinisin repwe feitá wóón chukun we lón kapas áwewe pwe repwe káé usun an kewe allúk. (Álleani Aisea 2:2, 3.) Sia kúkkúna pwénúetáán  ena oesini iei. Ewe fel mi enlet a fókkun múrinné seni meinisin ekkewe sókkun fel mi chofona. A ifa me watteen ewe kametip lón pekin ngún Jiowa a akkawora! (Ais. 25:6) Ren álillisin “ewe chon angang mi allükülük o tipachem,” Jiowa ese chék awora chómmóng mwéngé lón pekin ngún, nge a pwal sókkopat minne a awora, áwewe chék ren ekkewe lesen, afalafal, kachito me video. (Mat. 24:45) Sia meefieni meefien Elihu chienen Hiop we, ewe mi erá: “Iö a eman chon kait usun [Kot]?”​—Hiop 36:22.

16. Met ka tongeni féri pwe kopwe kúna álillisin án Jiowa emmwen?

¹⁶ Minne ka tongeni féri. Án Kot we ngún mi fel epwe álisuk le apwénúetá lón manawom minne ka álleani me káé seni án Kot we Kapas. Kopwe eáni án ewe soumakken kélfel ei iótek: “Ai Samol mi Lapalap, kopwe aiti ngeniei mine ka mochen pwe üpwe föri. Iwe, üpwe aleasochis ngonuk fän allükülük. Kopwe fang ngeniei eu leluk esap tipekinikin, pwe üpwe niuokusiti itom.” (Kölf. 86:11) Kopwe sópweló le alamota ekkewe mwéngé lón pekin ngún Jiowa a awora me ren an we Kapas me an we mwicheich. Ewer, kosap chék mochen alapaaló sileom, nge kopwe pwal mochen lechúni ewe enlet lón letipom me apwénúetá lón manawom. Án Jiowa we ngún mi fel a tongeni álisuk le féri ena. Kopwe pwal mochen apéchékkúla chienom kewe lón ewe mwichefel. (Ipru 10:24, 25) Pwata? Pún iir chón óm famili lón pekin ngún. Tingorei Kot an we ngún mi fel pwe epwe álisuk le memmeef seni enletin letipom lón ekkewe mwich me féréchú óm kinikin. Óm féri ekkena mettóch epwe ina alen óm pwári ngeni Jiowa me Néún we pwe ka tongei néúr kewe “sip” mi aúchea.​—Joh. 21:15-17.

17. Ifa usun kopwe pwári pwe ka tuppwél le álisatá án Jiowa we mwicheich?

¹⁷ Ekiseló chék, ewe chék mwicheich epwe nóm wóón fénúfan, ina ewe mi nóm fán emmwenien án Kot we ngún mi fel. Iwe kopwe tinikken le angangfengen me án Jiowa we mwicheich. Pwári pwe ka tongei aramas meinisin usun chék Kot ren óm esilei ewe pwóróus allim ngeni meinisin ié ka chuuri. Áppirú án Kot aúcheani kókkótéch me kinamwe ren óm álisatá tipeeúin ewe mwichefel. Me aúseling ngeni noum we Soukáit mi Lap ren óm unusen alamota ewe kametip lón pekin ngún a awora. Iwe atun án Satan ei ótót epwe muchúló, kosap niwokkus. Nge kopwe fen pwora le útá lein chókkewe mi tuppwél le angangfengen me án Jiowa we mwicheich.