1. Tipil a ing cangmi Khrihfa hna nih zeidah an tuah peng awk a si?

TIPIL na ing cang maw? Tipil a ing cangmi na si ahcun mah nih zapi hmaiah Jehovah na zumh le a bupi he rianṭuan na duh kha na langhtermi a si. * Jehovah cungah na zumhnak kha fehter peng a hau. Tuchan ah Jehovah nih a bupi a hman ti kha na zumh peng a hau.

2-3. Jehovah nih tuchan ah a bupi kha zeiti lam in dah lam a hruai? Tahchunhnak pe.

² Tuchan ah Jehovah nih a bupi lam a hruai ning nih pumpak a sining, a hmuitinh le a phunglam kha kha a langhter. A bupi ah kan hmuhmi Jehovah sining pathum kong kha i ruah hna u sih.

³ Pakhatnak, “Pathian cu duhdanhnak a ngei lo.” (Lam. 10:34, NW) Dawtnak nih Jehovah kha “mi vialte tlanhnak caah” a Fapa pek dingin a forh. (1 Tim. 2:6; Johan 3:16) Jehovah nih thawngṭha ngaih a duhmi hna sinah phungchim dingin a miphun kha a hman hna. Cuticun tlanhnak man in ṭhathnemhnak le khamhnak hmuh a duhmi hna kip kha a bawmh hna. Pahnihnak, Jehovah cu ningcang tein le dai tein a ummi Pathian a si. (1 Kor. 14:33, 40) Cucaah amah a biami hna cu dai tein a ummi phu an si lai tiah kan i ruahchan. Pathumnak, Jehovah cu “Lianngan Bik Cawnpiaktu” a si. (Isa. 30:20, NW; Isa. 30:21) Cucaah Khrihfabu le zapi sinah Baibal kong chim awkah a bupi cu fakpi in an i zuam. Mah Jehovah sining pathum kha a hmasa Khrihfa hna nih zeitindah an rak i zohchunh? Tuchan ah tah Jehovah miphun nih mah sining kha zeitindah an i zohchunh? Cun tuchan ah Jehovah bupi he rian ṭuanṭi awkah thiang thlarau nih zeitindah aan bawmh khawh?

4. Lamkaltu 1:8 ah Jesuh nih a zultu pawl kha zei tuah dingin dah nawl a pek hna, zei bawmhnak dah an hmuh lai?

⁴ Kumzabu pakhatnak ah. Jesuh chimmi thawngṭha nih mi vialte kha ruahchannak a pek hna. (Luka 4:43) Jesuh nih a zultu pawl kha amah nih a rak thawkmi rian kha ṭuan peng dingin nawl a pek hna, cun “vawleicung khuazakip ah” tehte va khang u tiah a ti hna. (Lamkaltu 1:8 rel.) Mah rian cu anmah thazaang in ṭuan khawh a si lo ti cu a hmaan ko. Jesuh nih bia a kamhmi hna “bawmtu” thiang thlarau kha an herh lai.—Johan 14:26; Zek. 4:6.

5-6. Thiang thlarau nih zeiti lam in dah Jesuh zultu pawl kha a bawmh hna?

⁵ Jesuh zultu pawl cu AD 33, Pentekos ni ah thiang thlarau an rak hmu. Thiang thlarau bawmhnak thawngin phung an hun chim colh i caan tawite chungah mi thong tampi nih thawngṭha kha an rak cohlan. (Lam. 2:41; 4:4) An hrem hna tikah a zultu pawl cu ṭihnak an ngei lo i phungchim rian zong an ngol lo. Mah canah Pathian sinah bawmhnak tu an rak hal. Hitin thla an cam: “Na sal rual nih hin na bia cu ralṭha chinchin in kan chim nakhnga a nawl kan pe ko.” Mah tikah thiang thlarau in an khat i “Pathian bia cu ralṭha ngaiin an chim.”—Lam. 4:18-20, 29, 31.

⁶ Jesuh zultu pawl cu a dang zuamcawhnak hna zong an rak tong. Tahchunhnak ah, Baibal cauk tlawmpal lawng a rak um. Tuchan bantukin Baibal hrilhfiahmi cauk zong an rak ngei lo. Cun zultu pawl cu holh a phunphun a hmangmi hna sin zongah phung an rak chim. Cu bantuk zuamcawhnak an tong ko nain mah lungthawhnak a ngeimi zultu hna nih tuah khawh ding a lo lomi thil kha an rak tuah khawh. Kum 30 chung hrawngah thawngṭha kha “van rang tang khuazakip ah sermi thil vialte sinah” an rak chim.—Kol. 1:6, 23.

7. A luancia kum 100 leng lioah Pathian nih a halmi hna kha Jehovah salle nih zeitindah an rak hngalh, mah kha zeitindah an lehrulh?

⁷ Tuchan ah. Jehovah nih a miphun kha lam a hruai hna i a duhnak tuah khawh awkah thazaang a pek hna. Thawchuah hnawhmi a Bia, Baibal thawngin Pathian nih a miphun kha lam a hruai hna. Baibal ah Jesuh phungchim rian a ṭuannak kong le amah nih a rak thawkmi rian kha a zultu pawl nih ṭuan peng dingin nawl a pekmi hna kong kha kan hmuh. (Matt. 28:19, 20) 1881, July ah chuahmi mekazin pakhat nih hitin a ti: “Jehovah nih midang sinin thangṭhatnak hmuh awk asiloah mirum si awkah chiti a kan thuhmi a si lo, asinain kan ngeihmi zei thil paoh kha thawngṭha chimnak caah kan hman awk a si.” 1919 ah chuahmi Aho Sinah Ah Dah Rian Pek A Si timi cauk hmemi nih hitin a ti: “Ṭuan awk rian tampi a um, asinain mah cu Bawipa rian a si i ṭuan khawh awkah thazaang a kan pek lai.” A hmasa Khrihfa hna bantukin mah unau hna cu ralṭhatnak an ngei i fakpi in rian an rak ṭuan. Zeicahtiah miphun kip sinah phungchim dingin thiang thlarau nih a kan bawmh lai tiah an zumh caah a si. Tuchan zongah thiang thlarau nih a kan bawmh lai tiah kan zumh.

8-9. Thawngṭha a karh nakhnga Jehovah bupi nih zei lam dah a hman?

⁸ Jehovah bupi nih thawngṭha a karh nakhnga a ṭha tukmi hriamnam hna kha an hman. Mah hriamnam hna ah nammi cauk, “Sernak Kong Hmanthlak Drama,” awkhumhmi kuang, loudspeaker bunhmi mawṭaw, radio in thawngthanhnak le Internet ah taarmi kong hna zong aa tel. Cun Pathian bupi nih hlan nakin holhphun tam deuh in an leh. Zeicah? Cutin an leh caah miphun dihlak nih anmahle holh tein thawngṭha kha an theih khawh. Jehovah cu duhdanhnak a ngeih lo caah thawngṭha cu “vawleicung mi vialte, phun kip, ram kip, holh kip le mi kip” sinah thanh a si lai  tiah a rak chimchung. (Biat. 14:6, 7) Pathian nih Pennak kong kha mi vialte nih thei dih hna seh ti a duh.

⁹ An inn ah kan va len khawh lomi mi pawl kong he aa tlaiin tah zeitin? Annih cu kutka hrenhmi asiloah cawngtu a ummi ṭaih khaan ah an um caah a si men lai. Cu bantuk hmun ah a ummi hna sinah thawngṭha a phanh nakhnga Jehovah nih a bupi hmangin zapi lak phungchimnak a phunphun kha a hman. Tahchunhnak ah, 2001 ah Uktu Bupi nih France ah a ummi unau pawl kha a dang lam in kan cauk pawl hmuhsak awk le nam khawhmi leng hman dingin nawl an pek hmasa hna. Mah hnuah a dang hmun ah a ummi unau pawl zong nih mah lam kha hmangin phung an hun chim ve. A phichuak cu a ṭha tuk. 2011 ah United States, New York City i minung a tam biknak hmun ah program thar kha an hun thawk. Mah kum ah cauk 102,129 le mekazin 68,911 kha an pekṭhenh khawh hna. Minung 4,701 nih Baibal cawn dingin an hal hna. Thiang thlarau nih a umpi hna ti cu a fiang ko. Cucaah Uktu Bu nih vawleicung pumpi ah mah cauk hna hmuhsak dingin an hna a tla.

10. Phungchimnak le cawnpiaknak ah a thiam deuhmi kan si khawh nakhnga zeidah kan tuah khawh?

¹⁰ Na tuah khawhmi. Jehovah nih a kan timhtuah piakmi pumhnak in ṭhatnak hmuh dingin i zuam. Lohmun rianṭuannak phu he hmaan tein rianṭuanṭi. Phungchimnak le cawnpiaknak ah a thiam deuhmi na si khawh nakhnga na phu chung i unau pawl nih an in bawmh khawh i a ṭhami an nunning nih thazaang an in pek khawh. Phungchimnak ah inkhawhnak ngei. Hi capar i a bikin lakmi Baibal caang nih Pathian duhnak kan tuah khawhmi cu kanmah thazaang in si loin thiang thlarau bawmhnak thawngin a si ti kha a kan hngalhter ṭhan. (Zek. 4:6) Pathian nih a rian kan ṭuan caah kan herhmi thazaang a kan pek lai ti kha kan zumh khawh.

11. Kumzabu pakhatnak i uktu bu hna cu Pathian miphun lakah daihnak a um nakhnga zeitindah rian an rak ṭuan?

¹¹ Kumzabu pakhatnak ah. Jerusalem i uktu bu hna cu Pathian miphun lakah ningcang tein le dai tein thil a um khawh nakhnga lungrual  tein rian an rak ṭuan. (Lam. 2:42) Tahchunhnak ah, AD 49 hrawngah unau tampi cu cuarpar tannak kong he aa tlaiin lung i khah lonak a chuah tikah uktu bu nih thiang thlarau lamhruainak thawngin mah kong kha an rak i ruah. Khrihfabu ah mah buaibainak ruangah an i ṭhen cheu a si ahcun phungchimnak rian kha hmualngei tein an rak ṭuan kho lai lo. Judah mi an si ko nain lamkaltu pawl le kum upa pawl nih Judah phunglam asiloah mah a ṭhawngmi cawnpiaknak kha an i iapter lo. Mah canah Baibal le thiang thlarau lamhruainak tu kha an rak kawl. (Lam. 15:1, 2, 5-20, 28) A phichuak cu zeidah a si? An biakhiahnak kong he aa tlaiin Jehovah nih thluachuah a pek hna i Khrihfabu ah lungrualnak le daihnak a rak um. Mah lengah thawngṭha zong kha an rak karhter chinchin.—Lam. 15:30, 31; 16:4, 5.

12. Tuchan i Jehovah bupi cu dai tein le ningcang tein a um ti kha zeinihdah a langhter?

¹² Tuchan ah. Jehovah bupi cu Jehovah miphun lakah daihnak le ningcang tein thil a um nakhnga rian an ṭuan. A luancia 1895, November 15 chuahmi Zion Vennak Innsang le Khrih A Phanh Thanhtu timi cauk a biatlangpi cu 1 Korin 14:40 in lakmi “Dawhte le Ningcang tein Tuah” timi a si. Mah capar ah hitin a ti: “A hmasa Khrihfa hna nih ningcang tein thil an tuahmi kong he aa tlaiin lamkaltu pawl nih tampi an ṭial . . . Cucaah ‘kanmah cawnpiaknak caah cathiang chung i aa ṭialmi’ ningin zulh cu a biapi tukmi a si.” (Rom 15:4) Tuchan i Jehovah bupi zong kumzabu pakhatnak i Khrihfa hna bantukin Khrihfabu chungah daihnak le ningcang tein thil a um khawh nakhnga fakpi in rian an ṭuan peng. Tahchunhnak ah: A dang Khrihfabu ah Cawn Awk Vennak Innsang pumhnak ah i pumh dingin na kal hei ti u sih, nan ram asiloah a dang ram a si hmanhah zei capar dah cawn a si lai ti kha na hngalh. Mah tikah na inn bantukin na ruah colh ko lai. Cu bantuk lungrualnak cu Pathian thiang thlarau lawng nih a chuahter khawhmi a si.—Zef. 3:9.

13. Jeim 3:17 ruah buin kanmah le kanmah zei biahalnak dah kan i hal awk a si?

¹³ Na tuah khawhmi. Jehovah nih a mi pawl kha ‘pumkhat sinak, thlarau nih a pekmi hna kha ngeih peng awkah a funtu hna daihnak hri khan fek tein i ṭem’ hna seh ti a duh. (Efe. 4:1-3) Cucaah hitin i hal: ‘Khrihfabu ah daihnak  le lungrualnak a um nakhnga kaa zuam maw? Hruaitu pawl i an bia kha ka ngai maw? A hleiin Khrihfabu ah rian ka ngeih tikah midang nih an ka bochan maw? A caan a hmaanmi, midang bawmh a duhmi le rianṭuan a duhmi ka si maw?’ (Jeim 3:17 rel.) Pakhatkhat kong he aa tlaiin ṭhancho ka hau ti na hngalh ahcun thiang thlarau bawmhnak hmuh awkah thlacam. Na ziaza le na tuahsernak cungah thiang thlarau kha lam naa hruaiter ahcun unau pawl nih an in dawt deuh lai i an in sunsak deuh lai.

14. Kolose 1:9, 10 ningin Jehovah nih kumzabu pakhatnak i a miphun pawl kha zeitindah a cawnpiak hna?

¹⁴ Kumzabu pakhatnak ah. Jehovah nih a mi pawl kha cawnpiak a duh hna. (Salm 32:8) A dawtmi a fale nih ka hngal hna seh, ka daw hna sehlaw zungzal in nung hna seh ti a duh. Amah nih a kan cawnpiak lo ahcun mah thil hna cu a si kho lai lo. (Johan 17:3) Jehovah nih kumzabu pakhatnak i Khrihfabu kha a miphun pawl cawnpiak awkah a hman hna. (Kolose 1:9, 10 rel.) Jesuh nih bia a kamhmi hna “bawmtu” thiang thlarau nih a zultu pawl zong kha a rak bawmh hna. (Johan 14:16) Thiang thlarau nih zultu pawl kha Pathian Bia hngalhtiam awk le Jesuh nih a chimmi le a tuahmi thil vialte i cinken awkah a bawmh hna. Cucaah mah kong kha a hnuah Thawngṭha cauk ah an rak ṭial khawh. Mah hngalhnak nih a hmasa Khrihfa hna kha Pathian le a Fapa dawt awk, cun pakhat le pakhat i dawt chin awkah tha a pek hna.

15. Isaiah 2:2, 3 i Jehovah biakam a tlinmi kha zeiti lam in dah na hmuh?

¹⁵ Tuchan ah. Jehovah nih “hmailei caanpi ahcun” miphun vialte cu a lamhruainak zulh awkah langhternak tlangah an ra lai tiah a chimchung. (Isaiah 2:2, 3 rel.) Mah chimchungbia a tlinmi kha kan hmuh. A hmaan lomi biaknak nakin a hmaanmi biaknak cu a ṭha deuh tukmi a si ti kha kan hmuh khawh. Cun Jehovah nih a miphun pawl kha Baibal  kong he aa tlaiin lamhruainak tampi a pek hna. (Isa. 25:6) Mah lamhruainak pek awkah “zumh awk a tlakmi le a fimmi sal” pawl kha lam tampi in a hman hna. Tahchunhnak ah, capar pawl kan rel khawh, phungchimnak kha kan ngaih khawh i muiṭawn video hna zong kan zoh khawh. (Matt. 24:45) Hitin a chimmi Job hawikom, Elihu bantukin kan ruah khawh ve: “[Pathian] bantukin ahodah cawnpiaktu a si?”—Job 36:22, NW.

16. Thlaraulei ah na ṭhancho nakhnga zeidah na tuah khawh?

¹⁶ Na tuah khawhmi. Pathian thlarau nih Baibal na relmi le na hlathlaimi ningin zulh awkah aan bawmh lai. Salm caṭialtu pa bantukin hitin thlacam: “BAWIPA, tuah seh ti na ka duhmi kha ka cawnpiak law na nawl kha fel tein ka zulh lai; ka lungthin a dih umnak in na rian ka ṭuan nakhnga ka cawnpiak ko.” (Salm 86:11) Baibal kha rel law hlathlai peng, cun Jehovah bupi nih a kan chuahpiakmi a dang cauk hna zong kha rel peng. Na hmuitinh cu hngalhnak ngeih men lawng a si lo ti cu a fiang ko. Biatak kha zumh in na nunnak ah hman na duh. Cutin tuah awkah Jehovah thlarau nih aan bawmh khawh. Unau pawl kha thazaang pek zong na duh hna. (Heb. 10:24, 25) Zeicah? Zeicahtiah annih cu thlaraulei na chungkhar an si caah a si. Pathian thlarau bawmhnak caah thla na cam ahcun pumhnak ah hmualngei tein a phi pek awk le rian pek na si tikah ṭha tein ṭuan khawh awkah aan bawmh lai. Cuticun Jehovah le a Fapa i a sunglawimi “tuu” pawl na dawt hna kha na langhter khawh.—Johan 21:15-17.

17. Zumhfek tein Jehovah bupi na bawmh kha zeiti lam in dah na langhter khawh?

¹⁷ A rauhlan ah, vawlei cungah Pathian thlarau nih lam a hruaimi phu pakhat lawng a um cang lai. Cucaah Jehovah bupi he lungtho tein rianṭuanṭi. Na hmuhmi hna sin paohah thawngṭha na chimnak thawngin Pathian bantukin mi kip cungah dawtnak na ngeih kha langhter. Khrihfabu ah lungrualnak a um nakhnga naa zuamnak thawngin dai tein le ningcang tein um a duhmi Pathian kha i zohchunh. Aan pekmi lamhruainak vialte na zulhnak thawngin Lianngan Bik Hruaitu bia kha ngai law Satan vawlei a dongh tikah ṭihnak na ngei lai lo. Cun Jehovah bupi he zumhfek tein rian a ṭuanmi hna sin zongah ralṭha tein naa tel kho ve lai.