1. ¿Chuqui yom mi lac bej mel jiñi xñoptʼañonbʌla tsaʼix bʌ lac chʼʌmʌ jaʼ?

MI TSAʼIX lac chʼʌmʌ jaʼ, yom i yʌl, chaʼan tsaʼix la cʌcʼʌ ti cʌñol jiñi lac ñopoñel ti Jehová yicʼot chaʼan la com lac melben i yeʼtel (troñel) yicʼot i yorganización. * Pero yomʌch mi lac bej pʼʌtʼesan lac ñopoñel ti Jehová chaʼan jiñʌch woli (choncol) i cʼʌn i yorganización ti ili ora chaʼan miʼ tsʼʌctesan chuqui jiñi yom.

2, 3. ¿Baqui tac bʌ i melbal Jehová mi lac taj laj qʼuel chaʼan bajcheʼ miʼ coltan i yorganización?

² Ti ili ora, cheʼ bajcheʼ woliʼ cʌntan Jehová jiñi i yorganización miʼ yʌcʼ ti cʌñol bajcheʼ yilal bʌ Dios, jiñi ñaʼtʌbil bʌ i chaʼan yicʼot jiñi i mandar tac. Laʼ laj qʼuel uxchajp i melbal (chaʼlibal) Jehová muʼ bʌ lac taj laj qʼuel tiʼ yorganización.

³ Ñaxam bʌ, Dios «junlajal miʼ qʼuel winicob» (Hch. 10:34). Come tsiʼ cʼuxbiyonla Jehová tsiʼ yʌcʼʌ i Yalobil bajcheʼ i tojol laj coltʌntel (Jn. 3:16; 1 Ti. 2:6). Chaʼan miʼ coltʌntelob jiñi wiñicob xʼixicob (quixtañujob), Jehová woliʼ cʼʌn jiñi i tejclum chaʼan miʼ subeñob jiñi wen tan pejtelelob yomoʼ bʌ i ñʌchʼtan. I chaʼpʼejlel, Jehová jiñʌch juntiquil Dios chajpʌbil bʌ chuqui miʼ mel yicʼot muʼ bʌ i mulan jiñi ñʌchʼtʌlel (1 Co. 14:33, 40, TNM). Jin chaʼan, jiñi i tejclum yom chajpʌbil miʼ melbeñob i yeʼtel yicʼot tiʼ ñʌchʼtʌlel. I yuxpʼejlel, Jehová jiñʌch ‹la caj cʌntesa› (Is. 30:20, 21). Jin chaʼan, jiñi i yorganización miʼ yʌcʼ ti cʌñol jiñi i Tʼan yaʼ ti congregación yicʼot ti subtʼan. ¿Bajcheʼ tsiʼ pʌsʌyob jiñi xñoptʼañob ti wajali ili uxchajp i melbal Jehová? ¿Bajcheʼ miʼ pʌsob jiñi melbalʌl i tejclum ili ora? ¿Bajcheʼ miʼ coltañonla jiñi muʼ bʌ lac  chaʼlen eʼtel yicʼot i yorganización Jehová ili ora jiñi chʼujul bʌ espíritu?

4. Cheʼ bajcheʼ miʼ yʌl Hechos 1:8, ¿chuqui tsiʼ yʌlʌ Jesús yom bʌ chaʼan miʼ melob jiñi xcʌntʼañob i chaʼan, i chuqui mi caj i yʌqʼueñob chaʼan miʼ coltañob?

⁴ Ti wajali. Jiñi tsaʼ bʌ i yʌlʌ Jesús tiʼ subtʼan tsiʼ yʌqʼue i pijtaya jiñi quixtañujob (Lc. 4:43). Tiʼ sube jiñi xcʌntʼañob i chaʼan chaʼan miʼ bej chaʼleñob subtʼan «cʼʌlʌl ti ñajt bʌ pañimil» (pejcan Hechos 1:8). Pero maʼañic mi caj i bajñel mejlel i melob. Yom miʼ coltʌntelob ti chʼujul bʌ espíritu, jiñi tsaʼ bʌ i subeyob Jesús chaʼan mi caj i yʌqʼueñob (Jn. 14:26; Zac. 4:6).

5, 6. ¿Bajcheʼ tac tsaʼ coltʌntiyob jiñi xcʌntʼañob i chaʼan Jesús ti jiñi chʼujul bʌ espíritu?

⁵ Jiñi xcʌntʼañob i chaʼan Jesús tsaʼ aqʼuentiyob jiñi chʼujul bʌ espíritu ti Pentecostés cheʼ ti jabil 33. Orajach tsiʼ techeyob subtʼan tiʼ coltaya ili chʼujul bʌ espíritu, i mach jalic tsaʼ ñumi cabʌl tsiʼ jacʼʌyob i chʼʌm jiñi wen tʼan (Hch. 2:41; 4:4). I cheʼ bʌ tsaʼ tejchi jiñi ticʼlʌntel, maʼañic tsiʼ chaʼleyob bʌqʼuen. Tsiʼ cʼajtibeyob i coltaya Dios i tsiʼ melbeyob oración chaʼan miʼ bej ‹aqʼueñob i chʼejlel i pusicʼal chaʼan miʼ subob i tʼan› (Hch. 4:29). I cheʼ jiñi, tsaʼ bujtʼiyob ti chʼujul bʌ espíritu i tsiʼ bej subuyob ‹i tʼan Dios tiʼ chʼejlel i pusicʼalob› (Hch. 4:18-20, 29, 31).

⁶ Pero ili xucʼul bʌ xñoptʼañob tsiʼ ñusayob yambʌ wocol tac. Jumpʼejl ejemplo, maxto wen añic i copiajlel jiñi Tsʼijbujel tac i maxto añobic i chaʼan jiñi jun tac am bʌ lac chaʼan ili ora muʼ bʌ i ñumen tsictesan jiñi Biblia. I yom miʼ subob jiñi wen tʼan ti cabʌl tʼan. Anquese cabʌlʌch chuqui tsiʼ ñusayob, mach jalic tsaʼ ñumi i tsaʼʌch mejli i subob jiñi wen tʼan «tiʼ pejtelel pañimil ti yebal panchan» (Col. 1:6, 23).

7. Ti jiñi ñumen bʌ 100 jab tsaʼ ñumi, ¿bajcheʼ yujilob jiñi i wiñicob Jehová chuqui jiñi muʼ bʌ i pijtan tiʼ tojlelob, i chuqui tsiʼ meleyob?

⁷ Ti ili ora. Jehová woliʼ bej coltan i tejclum yicʼot woliʼ bej aqʼuen i pʼʌtʌlel. I jiñi coltaya yaʼ loqʼuem ti chʼujul bʌ i Tʼan. Jiñi Biblia miʼ taj ti tʼan i subtʼan Jesús yicʼot jiñi mandar tsaʼ bʌ i yʌqʼue jiñi xcʌntʼañob i chaʼan chaʼan yom miʼ bej chaʼleñob subtʼan (Mt. 28:19, 20). I cheʼ ti julio i chaʼan 1881, jiñi Lac Tsictesʌbentel tsiʼ yʌlʌ: «Maʼañic tsaʼ pʌjyiyonla yicʼot tsaʼ yajcʌntiyonla chaʼan mi la cʌqʼuentel lac ñuclel i chaʼan mi lac tempan lac chubʌʼan, tsaʼ pʌjyiyonla chaʼan mi laj cʼʌn chuqui an lac chaʼan yicʼot mi lac chaʼlen subtʼan». Jiñi folleto To Whom the Work Is Entrusted (Jiñi muʼ bʌ i yʌqʼuentelob tiʼ wenta jiñi eʼtel), tsaʼ bʌ loqʼui ti 1919, tsiʼ yʌlʌ: «Cʌlʌxix jiñi la queʼtel, pero i chaʼan lac Yum i mi caj i coltañonla lac mel». Cheʼ bajcheʼ jiñi xñoptʼañob ti wajali, ili hermanojob maʼañic tsiʼ bʌcʼñayob i melbeñob i yeʼtel Jehová, yujilob chaʼan jiñi chʼujul bʌ espíritu mi caj i coltañob chaʼan miʼ subeñob jiñi wen tʼan majqui jach bʌ lac piʼʌlob. I jiñʌch la cujil bʌ jaʼel ili ora.

8, 9. ¿Chuqui tac an i cʼʌñʌ i yorganización Jehová chaʼan miʼ sujbel jiñi wen tʼan?

⁸ Jiñi i yorganización Jehová an i cʼʌñʌ tilel wem bʌ eʼtijib tac chaʼan miʼ bej sujbel jiñi wen tʼan: Jiñi jun tac muʼ bʌ i chaʼlentel ti imprimir, jiñi «Foto-Drama de la Creación», jiñi gramófono tac, jiñi carro an tac bʌ i bocinajlel, jiñi radio i ti ili ora jiñi an tac bʌ ti Internet. Cheʼ jaʼel, cojach jiñi i yorganización Jehová an i chaʼle ti traducir jiñi lac jun tac ti cabʌl tʼan. ¿Chucoch? Come la com chaʼan majqui jach bʌ quixtañu miʼ cʼotel i ñʌchʼtan jiñi wen tʼan ti jiñi tʼan yujil bʌ. Jehová junlajal miʼ qʼuel jiñi quixtañujob i tsiʼ yʌlʌ chaʼan jiñi wen tʼan mi caj i sujbel «tiʼ pejtelel tejclum tac» yicʼot ti pejtelel «winicob xʼixicob yujiloʼ bʌ tʼan ti chajp ti chajp» (Ap. 14:6, 7). Yom chaʼan jiñi wen tʼan chaʼan i Yumʌntel Dios miʼ ñʌchʼtan pejtelel jiñi quixtañujob.

⁹ ¿Ixcu jiñi chumuloʼ bʌ baʼ wen cʌntʌbil? Chaʼan mi lac subeñob jiñi wen tʼan, Jehová tsiʼ  colta jiñi i yorganización chaʼan an tac chuqui miʼ tech i cʼʌn chaʼan miʼ yujtel jiñi subtʼan yaʼ baqui miʼ ñumel cabʌl quixtañujob. Jumpʼejl ejemplo, cheʼ ti 2001 jiñi Junmojt muʼ bʌ i pʌsob bij tsiʼ yʌlʌyob chaʼan jiñi hermanojob añoʼ bʌ ti Francia miʼ mejlel i cʼʌñob jiñi alʌ carro tac yicʼot yan tac bʌ baqui miʼ mejlel ti ajqʼuel jiñi lac jun tac, i ti wiʼil jiñi hermanojob ti yambʌ tejclum tac tsaʼ caji i cʼʌñob ti subtʼan jaʼel. I cabʌl chuqui wem bʌ tsaʼ ujti. Cheʼ ti 2011, tsaʼ tejchi jumpʼejl programa yaʼ ti Nueva York (Estados Unidos) lʌcʼʌ lajal bʌ bajcheʼ tsaʼ tejchi yaʼ ti Francia. Cheʼ ti ñaxam bʌ jabil cheʼ tsaʼ tejchi jiñi subtʼan tsaʼ pujqui 102,129 libro yicʼot 68,911 revista, i 4,701 quixtañujob tsiʼ cʼajtiyob estudio loqʼuem bʌ ti Biblia. Ili tsiʼ pʌsʌ chaʼan jiñi chʼujul bʌ i yespíritu Jehová yaʼan yicʼotob ti ili eʼtel. Jin chaʼan, jiñi Junmojt muʼ bʌ i pʌsob bij tsiʼ yʌlʌyob chaʼan miʼ mejlel ti cʼʌjñel jiñi alʌ carro tac tiʼ pejtelel pañimil.

10. ¿Chuqui yom mi lac mel chaʼan mi lac ñumen weñʼesan jiñi lac subtʼan?

¹⁰ Yom bʌ mi lac mel joñonla. Yaʼ ti tempa bʌ tac Jehová miʼ cʌntesañonla bajcheʼ yom mi lac chaʼlen subtʼan, jin chaʼan laʼ lac mel muʼ bʌ laj cʌn yaʼi. Laʼ lac chaʼlen subtʼan yicʼot jiñi lac grupo. Mi anto baqui yom mi lac ñumen weñʼesan lac subtʼan, jiñi hermanojob miʼ mejlel i coltañoñobla yicʼot i yʌqʼueñoñobla wem bʌ ejemplo. Laʼ lac chʌn chaʼlen subtʼan anquese an wocol tac. Cheʼ bajcheʼ miʼ yʌl jiñi texto am bʌ tiʼ tejchibal ili estudio, mi lac mel chuqui yom Dios tiʼ coltaya jiñi chʼujul bʌ espíritu, mach ti lac bajñel pʼʌtʼʌlelic (Zac. 4:6). Jin chaʼan, miʼ mejlel lac ñop chaʼan Dios mi caj i yʌqʼueñonla lac pʼʌtʌlel come woli lac melben i yeʼtel.

11. ¿Chuqui tsiʼ mele jiñi Junmojt muʼ bʌ i pʌsob bij ti wajali chaʼan an ñʌchʼtʌlel tiʼ tejclum Dios?

¹¹ Ti wajali. Jiñi Junmojt muʼ bʌ i pʌsob bij añoʼ bʌ ti Jerusalén, juntemel tsiʼ chaʼleyob eʼtel chaʼan chajpʌbil chuqui miʼ mejlel yicʼot chaʼan an ñʌchʼtʌlel tiʼ tejclum Dios (Hch. 2:42). Jumpʼejl ejemplo, cheʼ ti jabil 49 tsaʼ ujti jiñi wocol chaʼan tsep pʌchʌlel, jiñi Junmojt muʼ bʌ i pʌsob bij tsiʼ qʼueleyob jiñi wocol tiʼ coltaya jiñi chʼujul bʌ espíritu. Cheʼ tsaʼic i tʼoxo i bʌ jiñi congregación maʼañic tsaʼ mejli jiñi subtʼan yubil.  Anquese judíojob jiñi apóstolob yicʼot jiñi ancianojob, maʼañic tsiʼ chʼʌmʌyob ti ñuc jiñi muʼ bʌ i melob jiñi i ñojteʼelob ti wajali chaʼan miʼ tojʼesañob jiñi wocol i maʼañic tsiʼ jacʼbeyob i tʼan jiñi woli bʌ i yʌlob jiñi cʌntesa tac. Tsiʼ sʌclayob i coltaya ti jiñi Tsʼijbujel yicʼot tiʼ yespíritu Dios (Hch. 15:1, 2, 5-20, 28). Jin chaʼan, Jehová tsiʼ yʌqʼueyob i bendición chaʼan jiñi tsaʼ bʌ i ñaʼtayob i mel, jiñi congregación temel yicʼot an ñʌchʼtʌlel tsaʼ ajñi, i tsaʼ bej caji jiñi subtʼan (Hch. 15:30, 31; 16:4, 5).

12. ¿Chucoch mi la cʌl chaʼan tiʼ yorganización Jehová ili ora chajpʌbil chuqui miʼ mejlel yicʼot an ñʌchʼtʌlel?

¹² Ti ili ora. Jiñi i yorganización Jehová an i chaʼle wersa chaʼan chajpʌbil chuqui miʼ mejlel yicʼot chaʼan an ñʌchʼtʌlel tiʼ tejclum Dios. I cheʼ ti 1895 tsaʼ loqʼui jumpʼejl artículo baqui chucul ti 1 Corintios 14:40 am bʌ i temajlel: «Decentemente y con orden» ti jiñi Lac Tsictesʌbentel am bʌ ti inglés 15 i chaʼan noviembre. Tsiʼ yʌlʌ: «Jiñi apóstolob tsiʼ yʌqʼueyob cabʌl ticʼojel jiñi ñaxam bʌ congregación chaʼan chajpʌbil chuqui yom miʼ mejlel [...]. Yom mi lac bej chʼʌm ti ñuc jiñi tsʼijbubil bʌ ti wajali chaʼan laj cʌntesʌntel» (Ro. 15:4). Ili ora jiñi i yorganización Jehová miʼ chaʼlen wersa chaʼan yaʼ ti congregación tac chajpʌbil chuqui miʼ mejlel yicʼot an ñʌchʼtʌlel cheʼ bajcheʼ tsiʼ mele jiñi xñoptʼañob ti wajali. Jumpʼejl ejemplo, cheʼ muqʼuic lac majlel ti tempa bʌ ti yambʌ congregación o ti yambʌ país i woliʼ ñusʌntel jiñi Lac Tsictesʌbentel, la cujil chuqui ti estudio woliʼ qʼuejlel yicʼot bajcheʼ miʼ ñusʌntel. I mi caj la cubin chaʼan lajalʌch bajcheʼ añonla ti laj congregación. Juntemel añonla wocolix i yʌlʌ jiñi chʼujul bʌ i yespíritu Dios (Sof. 3:9).

13. Cheʼ mi lac ñaʼtan muʼ bʌ i yʌl Santiago 3:17 (TNM), ¿chuqui ti cʼajtiya tac yom mi lac melben lac bʌ?

¹³ Yom bʌ mi lac mel joñonla. Jehová yom chaʼan ñʌchʼʌl mi la cajñel ‹ti jumpʼejl jach lac pusicʼal ti jiñi Espíritu› (Ef. 4:1-3). Jin chaʼan, laʼ laj cʼajtiben lac bʌ: «¿Muʼ ba c chaʼlen wersa chaʼan an ñʌchʼtʌlel yicʼot chaʼan juntemel miʼ yajñel jiñi congregación? ¿Muʼ ba c jacʼben i tʼan jiñi hermanojob añoʼ bʌ tiʼ wenta i cʌntan jiñi congregación? ¿Mejl ba mejlel i subeñoñob jiñi hermanojob chuqui woliʼ ñusañob ñumento cheʼ an queʼtel yaʼ ti congregación? ¿Seb ba mij cʼotel chaʼan mic tsʼʌctesan jiñi eʼtel yicʼot comʌch ba j coltan jiñi yambʌlob?»  (pejcan Santiago 3:17, TNM). * Mi añʌch chuqui yom mi laj qʼuextan ti lac tojlel, laʼ laj cʼajtiben Jehová jiñi chʼujul bʌ i yespíritu. Mi tsaʼ lac bej acʼʌ chaʼan jiñi chʼujul bʌ espíritu miʼ coltañonla lac tojʼesan lac melbal, ñumento mi caj i cʼuxbiñonla jiñi hermanojob yicʼot mi caj i qʼueloñobla ti ñuc.

14. Cheʼ bajcheʼ miʼ yʌl Colosenses 1:9, 10, ¿bajcheʼ tsiʼ colta Jehová jiñi i wiñicob ti wajali chaʼan miʼ ‹bujtʼelob ti wen bʌ i ñaʼtʌbal›?

¹⁴ Ti wajali. Jehová miʼ wen mulan i cʌntesan i yalobilob (Sal. 32:8). Yom chaʼan jiñi cʼuxbibil bʌ i yalobilob miʼ cʌñob, miʼ cʼuxbiñob yicʼot miʼ chumtʌlob tiʼ pejtelel ora. Mucʼʌch i mejlel lac mel pejtelel iliyi come Jehová miʼ cʌntesañonla (Jn. 17:3). Ti wajali, tsiʼ cʼʌñʌ jiñi congregación chaʼan miʼ cʌntesan jiñi i yalobilob (pejcan Colosenses 1:9, 10). I Jehová tsaʼʌch i wen coltayob cheʼ bʌ tsiʼ cʼʌñʌ jiñi chʼujul bʌ i yespíritu, i yaj coltayob tsaʼ bʌ i wʌn alʌ Jesús chaʼan mi caj i chocbeñob cʼotel (Jn. 14:16). Ili tsaʼʌch i coltayob jiñi xcʌntʼañob chaʼan miʼ chʼʌmbeñob i sujm jiñi i Tʼan Dios i tsiʼ cʼajtesʌbeyob pejtelel tsaʼ bʌ i mele Jesús yicʼot tsaʼ bʌ i yʌlʌ, ti wiʼil tsaʼ tsʼijbunti cʌlel yaʼ ti Evangelio tac. Jiñi tsaʼ bʌ tsʼijbunti cʌlel tsiʼ pʼʌtʼesʌbeyob i ñopoñel jiñi xñoptʼañob, jiñi i cʼuxbiyajob ti Dios, tiʼ Yalobil yicʼot ti jiñi hermanojob.

15. ¿Bajcheʼ an a qʼuele jatet chaʼan an tsʼʌctiyi jiñi tsaʼ bʌ i yʌlʌ Jehová yaʼ ti Isaías 2:2, 3?

¹⁵ Ti ili ora. Jehová tsiʼ wʌn alʌ chaʼan cheʼ ti cojix bʌ qʼuin cabʌl quixtañujob mi caj i cʼʌjquelob tiʼ wits chaʼan miʼ cʌntesʌntelob (pejcan Isaías 2:2, 3). Ili ora woli laj qʼuel chaʼan wolix i tsʼʌctiyel ili profecía. Miʼ mejlel laj qʼuel chaʼan jiñi mach bʌ i sujmic chʼujutesaya maʼañic baqui ora miʼ mejlel i lajin jiñi i sujm bʌ chʼujutesaya. ¡I cabʌl chʼujul bʌ bʌlñʌcʼʌl miʼ yʌqʼueyonla  Jehová! (Is. 25:6). Jehová miʼ cʼʌn «jini xucʼul bʌ xʼeʼtel am bʌ cabʌl i ñaʼtʌbal» chaʼan miʼ yʌqʼueñonla cabʌl chʼujul bʌ i bʌl lac ñʌcʼ. Jumpʼejl ejemplo, miʼ mejlel lac pejcan artículo tac, lac ñʌchʼtan discurso tac yicʼot laj qʼuel cuxul bʌ dibujo tac (Mt. 24:45). Cheʼ mi la cubin lac bʌ bajcheʼ Elihú, jiñi i yamigo Job, tsaʼ bʌ i yʌlʌ iliyi tiʼ tojlel Dios: «¿Majqui yujil cʌntesa cheʼ bajcheʼ Dios?» (Job 36:22).

16. ¿Chuqui yom mi lac mel chaʼan mi laj colel majlel tiʼ chaʼan bʌ Dios?

¹⁶ Yom bʌ mi lac mel joñonla. Jiñi chʼujul bʌ espíritu mi caj i coltañonla chaʼan mi lac mel jiñi muʼ bʌ lac pejcan tiʼ Tʼan Dios. Laʼ laj cʼajtiben Jehová tsaʼ bʌ i cʼajtibe jiñi salmista: «C Yum, pʌsbeñon a bijlel chaʼan xucʼul mi cajñel a wicʼot. Laʼ cʌcʼ c pusicʼal chaʼan mic bʌcʼñañet» (Sal. 86:11). Cheʼ jaʼel, laʼ lac bej pejcan jiñi Biblia yicʼot lac jun tac muʼ bʌ i yʌqʼueñonla Jehová. Mach cojach la com lac taj lac ñaʼtʌbal, la com la cʌcʼ ti lac pusicʼal yicʼot mi lac mel ti laj cuxtʌlel. Jiñi i yespíritu Jehová mi caj i coltañonla lac mel. Laʼ lac ñuqʼuesʌbeñob i pusicʼal jaʼel jiñi la quermañujob come lac familiajobʌch (He. 10:24, 25). Laʼ lac mel oración chaʼan miʼ coltañonla jiñi chʼujul bʌ i yespíritu Dios chaʼan mi la cʌcʼ laj comentario loqʼuem ti lac pusicʼal yaʼ ti tempa bʌ tac yicʼot chaʼan weñʌch mi lac mel jiñi tsaʼ bʌ aqʼuentiyonla ti lac wenta lac ñusan yaʼ ti tempa bʌ. Mi mucʼʌch lac mel tiʼ pejtelel iliyi, mi caj lac pʌsben Jehová yicʼot i Yalobil chaʼan mi laj cʼuxbin jiñi hermanojob (Jn. 21:15-17).

17. ¿Bajcheʼ miʼ mejlel lac pʌs chaʼan mucʼʌch laj coltan i yorganización Jehová?

¹⁷ Tsʼitaʼ jachix yom chaʼan cojach jiñi i yorganización Dios muʼ bʌ i cʌntan yicʼot i yespíritu mi caj i cʌlel ila ti Pañimil. Jin chaʼan, laʼ lac chaʼlen eʼtel yicʼot lac tijicñʌyel. Laʼ lac pʌs chaʼan mi laj cʼuxbin pejtelel jiñi quixtañujob yicʼot chaʼan junlajal mi laj qʼuelob cheʼ bajcheʼ miʼ mel Dios cheʼ bʌ mi lac subeñob jiñi wen tʼan. Laʼ lac pʌs chaʼan mucʼʌch lac mulan jaʼel jiñi ñʌchʼtʌlel yicʼot cheʼ chajpʌbil chuqui miʼ mejlel cheʼ bʌ temel mi la cajñel la quicʼot jiñi hermanojob. Laʼ lac ñʌchʼtan jiñi la Caj cʌntesa cheʼ bʌ mi laj cʌn pejtelel jiñi chʼujul bʌ bʌlñʌcʼʌl muʼ bʌ i yʌqʼueñonla. Mi mucʼʌch lac mel, maʼañic mi caj lac bʌcʼñan cheʼ bʌ miʼ jisʌntel i pañimil (mulawil) Satanás. I mi caj lac pʌs lac chʼejlel cheʼ bʌ mucʼʌch lac bej melben i yeʼtel Jehová yicʼot i yorganización.