1. Nemene la nyine tro sa kuca thupene la easa bapataiso?

 HAPEU, ka bapataiso hë epun? Maine eje hi, hnei epuni hna amamane koi nöjei atr la lapaun me aja i epun troa nyihlue i Iehova me sajuëne la organizasio i Nyidrë. * Ngo nyipiewekë tro palahi epuni a acatrene la lapaune i epun koi Iehova ke, Nyidrëti la ka xomiujine la organizasio i Nyidrë.

2-3. Nemene la aqane xomiujine Iehova la organizasio i Nyidrë enehila, nge nemene la köni thiina i Nyidrë ka mama?

² Iehova a eatrongëne la organizasio i Nyidrë thenge la itre thiina i Nyidrë me mekuna i Nyidrë me itre trepene meköti Nyidrë. Tro sa ce wang la köni thiina i Iehova ka mama ngöne la organizasio i Nyidrë.

³ Ame la hnapan, “tha ka ië hna hnime kö Akötresie.” (Itre hu. 10:34) Hnei Iehova hna hnimi së, matre hnei Nyidrëti hna nue la Neköi Nyidrë troa ‘nyine thupene mele thatraqane la nöjei atr asë.’ (1 Tim. 2:6; Ioane 3:16) Ketre, Iehova a upe la itre hlue i Nyidrë troa cainöj koi nöjei atr, matre tro fe angatr a hane kepe thangane qa ngöne la thupene mel. Ame la hnaaluen, tha Akötresie ne zikoziko kö Iehova ngo Akötresie ne tingeting. (1 Kor. 14:33, 40) Celë hi matre, tha ka zikoziko kö la itre hlue i Nyidrë, ngo angatre pe a thele tingeting. Ame la hnaakönin ke, Iehova la “Atre Ini Ka Tru.” (Is. 30:20, 21) Celë hi matre, kola nue trengecatr hnene la organizasio i Iehova matre troa inine la Trengewekë i Nyidrë e hnine la ekalesia me ngöne la hna cainöj. Nemene la aqane amamane la itre pane Keresiano ekö la köni thiina i Iehova cili? Nemene la aqane amamane  la itre hlue i Iehova enehila la köni thiina cili? Nge nemene la aqane tro la uati hmitrötr a xatua së troa sajuëne la organizasio i Iehova?

4. Thenge la Itre Huliwa 1:8, nemene la hnëqa ne la itretre drei Iesu, nge nemene la ixatua hna hamën koi angatr?

⁴ Hneijine la itre pane Keresiano. Hnei Iesu ekö hna tro fë la maca ne mejiun. (Luka 4:43) Celë hi matre, hnei nyidrëti hna upe la itretre drei nyidrë troa sisedrëne la huliwa cili “uti hë la cane la fene hnengödrai.” (E jë la Itre Huliwa 1:8.) Eje hi, tha tro kö angatr a eatrëne la huliwa cili hnene la sipu trengecatre i angatr. Loi e tro angatr a sipone la uati hmitrötr, ene la “ixatua” hna thingehnaean hnei Iesu.—Ioane 14:26; Zaka. 4:6.

5-6. Nemene la aqane xatuane la itretre drei Iesu hnene la uati hmitrötr?

⁵ Hnene la itretre drei Iesu hna kapa la uati hmitrötr ngöne lo Penetekos macatre 33. Jëne la ixatua cili, hnei angatr hna catre cainöj nge alanyimu la itre atr ka kapa la maca ka loi. (Itre hu. 2:41; 4:4) Ketre, tha hnei angatre kö hna xou ngöne la kola icilekeu. Hnei angatre pe hna sipo ixatua koi Iehova, me hape: “Aijijëne jë la itre hlue i nyipë troa catre cainöjëne la itre trengewekë i nyipë.” Eje hi, hnene la uati hmitrötre i Akötresie hna upi angatr troa “catre cainöjëne la trengewekë i Akötresie.”—Itre hu. 4:18-20, 29, 31.

⁶ Nyimutre la itre jol hna cile kowe hnene la itretre drei Iesu. Eje hi, hna upi angatr troa cainöj kowe la nöjei atr, ngo xalaithe hi la Itre Hna Cinyihan hna fejan. Ketre, pë fe kö itusi nyine inin tune enehila. Nge angatr a cainöj kowe la itre atr ka qaja la nyimu qene hlapa. Ame pe, hnei angatr hna eatrëne la hna thatreine kuca hnene la trengecatre i atr. Itre macatre hi e thupen, hnei angatr hna cainöjëne la maca ka loi “kowe la nöjei atr e cailo fene hnengödrai.”—Kol. 1:6, 23.

7. Nemene la ka amamane kowe la itre hlue i Akötresie ekö la aja i Nyidrë, nge nemene la hnei angatr hna kuca?

⁷ Hneijine së enehila. Iehova palahi a xomiujine me hamë trengecatr kowe la nöje i Nyidrë. Jëne la uati hmitrötr, hnei Nyidrëti hna aijijëne la itre atr troa cinyihane la Tusi Hmitrötr matre troa xatua së. Ej a qaja la huliwa ne cainöje i Iesu memine la hnei nyidrëti hna amekötin, ene la troa cainöjëne la maca ka loi. (Mat. 28:19, 20) Kola qaja ngöne la Ita Ne Thup ne Julai 1881, ka hape: “Tha hna ië huni kö me nenge koi huni la uati hmitrötr matre troa atrunyi hun me trenamo, ngo matre tro huni a nue trengecatr troa cainöjëne la maca ka loi.” Kolo fe a qaja ngöne la boroshür qene papale, “À qui l’œuvre est confiée” hna fejane lo 1919 ka hape: “Kösë tru catre palaha la huliwa, ngo huliwa i Joxu. Jëne la mene i Nyidrë, tro kö huni a eatrën.” Tune la itre pane Keresiano, hnene la itre trejin hna catre cainöj. Xecie koi angatr laka, tro la uati hmitrötr a xatua angatr troa cainöj koi nöjei atr. Ketre tu së fe enehila.

8-9. Nemene la itre jiane huliwa hna xom hnene la organizasio i Iehova matre troa cainöj?

⁸ Nyimutre la itre jiane huliwa hna xom hnene la organizasio i Iehova, matre troa cainöjëne la maca ka loi e cailo fen. Kola qaja la itre itusi hna fejan, memine la “Photo-Drame de la Création,” me ipatefon, me ikaho hune la loto, me ipos, me Ëternet. Ketre, hna ujëne fe la itre itus ngöne la nyimu qene hlapa! Pine nemen? Matre tro la nöjei atr a dreng la maca ka loi ne la  Baselaia ngöne la sipu qene hlapa i angatr. Eje hi, tha ka ië hna hnime kö Iehova. Nyidrëti a ajane troa cainöjëne la maca ka loi “koi nöjei nöj, me nöjei tribu, me nöjei qene hlapa, me nöjei atr.” (Hna ama. 14:6, 7) Iehova a ajane tro la nöjei atr a dreng la maca i Nyidrë.

⁹ Ngo nemene la aqane tro sa cainöj kowe la itre atr ka lapa ngöne la itre hnalapa hna thing me thupën hnyawa? Hnene la organizasio i Iehova hna thele la aqane troa cainöj ngöne la gaa tru atr. Ame lo 2001, hnene la Lapa Ne Xomi Meköt hna nue troa huliwane la itre présentoir me itre xaa jiane huliwa e France me ngöne la itre xaa nöj. Nge ka hetre thangane catr. Ame lo macatre 2011, hetre ketre aqane cainöj ka hnyipixe hna kuca e Neweyok. Ame ngöne la pane macatre, traqa koi 102 129 lao tusi me 68 911 lao zonal hna hamën hnene la itre trejin. Nge 4 701 lao atr ka sipone troa ini tus! Eje hi, hnene la ixatua ne la uati hmitrötre i Iehova matre hetre thangane la aqane cainöje celë. E cili, hnene la Lapa Ne Xomi Meköti hna nue troa huliwane la itre présentoir me itre xaa aqane troa cainöj ngöne la gaa tru atr.

10. Nemene la aqane tro sa maca ngöne la huliwa ne cainöj?

¹⁰ Itre nyine tro sa kuca. Loi e tro sa trongëne la itre ini hnei Iehova hna hamën ngöne la itre icasikeu. Loi e tro sa ce cainöj memine la itre trejin ngöne la gurupe së. Tro angatr a amamai tulu me xatua së troa maca ngöne la huliwa ne cainöj. Ketre, loi e tro palahi sa cainöj ngacama kola traqa la itre jol. Tune la hna qaja ngöne la xötr ka nyi tane la tane mekun celë, easa atreine kuca la aja i Akötresie ke, hnene la ixatua ne la uati hmitrötr, ngo tha hnene kö la sipu trengecatre së. (Zaka. 4:6) Eje hi, huliwa i Akötresie la hne së hna kuca.

11. Nemene la hna kuca hnene la Lapa Ne Xomi Meköti ekö matre troa tro loi me tingeting la nöje i Akötresie?

¹¹ Hneijine la itre pane Keresiano. Hnene la itre atrene la Lapa Ne Xomi Meköti ekö e Ierusalema, hna ce huliwa matre troa  tro loi me tingeting la nöje i Akötresie. (Itre hu. 2:42) Ame lo macatre 49 M.K., hnei angatr hna sipone la uati hmitrötr matre troa ce ithanatane la mekun göi troa xötrehatren. Maine tha canga nyinyine ju angatr la jole cili, tro ha ajolëne la huliwa ne cainöj. Ngacama itretre Iudra la itre aposetolo me itre qatre ne Ierusalema, ngo tha hna ajojezi angatre kö hnene la itre hna majemine kuca hnei angetre Iudra. Hnei angatre pe hna nue la Trengewekë i Akötresie memine la uati hmitrötr troa eatrongë angatr. (Itre hu. 15:1, 2, 5-20, 28) Nemene hë la thangan? Hnei Iehova hna amanathithine la mekun hnei angatr hna axeciën. Ketre, kola tingeting me caas la ekalesia, nge kolo palahi a kökötre la huliwa ne cainöj.—Itre hu. 15:30, 31; 16:4, 5.

12. Nemene la ka amamane laka, kola caas me tingeting la organizasio i Iehova?

¹² Hneijine së enehila. Kolo palahi a thel hnene la organizasio i Iehova troa caas me tingeting la itre trejin. Ame ngöne la zonal ne 15 Nofeba 1895 hna hape, Phare de la Tour de Sion et Messager de la Présence de Christ, hetrenyi la ketre tane mekun hna nyitrepen hnei 1 Korinito 14:40. Ame la tane ke, “Avec bienséance et ordre.” Kola hape: “Nyimutre la itre ithuemacany hna hamën hnene la itre aposetolo kowe la pane ekalesia göne la hna amekötin . . . Nyipiewekë troa metrötrëne ‘la nöjei ewekë hna cinyihan ekö ke, hna cinyihan göi troa ini së.’ ” (Rom. 15:4) Tune la itre pane Keresiano, easa ajane troa tingeting me tro loi la organizasio. Eje hi, maine easa sine la Ita Ne Thup ngöne la ketre ekalesia maine ngöne la ketre nöj, atre hi së la aqane troa cile fë la ini cili memine la tane mekun hna troa wang. Tro ha mama laka, tha trenyiwa kö së. Nyipici, hnene la uati hmitrötr matre kola caasi la nöje i Iehova!—Zef. 3:9.

13. Thenge la Iakobo 3:17, nemene la itre hnying nyine tro sa isa mekun?

¹³ Itre nyine tro sa kuca. Iehova a ajane tro la itre hlue i Nyidrëti a ‘acatrene la caas me mele tingeting.’ (Efe. 4:1-3) Haawe, loi e tro sa isa hnying ka hape:  “Hapeu, eni kö a acatrene la caas me thele tingeting e hnine la ekalesia? Eni kö a drengethenge la itre ka elemekene la ekalesia? Maine hetre hnëqang, itre xane kö a mejiune koi ni? Eni kö a xatua itre xan me canga traqa ngöne la hna icasikeu?” (E jë la Iakobo 3:17.) Maine easa öhn laka, hetre nyine tro palakö sa saze, loi e tro sa sipone la uati hmitrötre koi Iehova. Maine tro sa nue la uati hmitrötr troa saze la itre thiina së me aqane ujë së, tro ha hnimi së hnene la itre trejin me hetre hni ne ole kowe la itre hne së kuca.

14. Thenge la Kolose 1:9, 10, nemene la aqane inine Iehova la itre pane Keresiano ekö?

¹⁴ Hneijine la itre pane Keresiano. Aja i Iehova troa inine la itre hlue i Nyidrë. (Sal. 32:8) Iehova a ajane tro sa atrepengöi Nyidrëti hnyawa, me hnimi Nyidrë, matre mel epine palua. Celë hi matre, nyipiewekë tro Nyidrëti a ini së. (Ioane 17:3) Ame ngöne la hneijine la itre pane Keresiano, hnei Iehova hna acile la itre ekalesia matre troa inine la nöje i Nyidrë. (E jë la Kolose 1:9, 10.) Ketre, hnene la uati hmitrötr, ene lo “ixatua” hna qaja hnei Iesu, hna xatuane la itretre dreng troa trotrohnine la Trengewekë i Akötresie. Hnene la uati hmitrötr hna amekunë angatr la itre hna qaja me kuca hnei Iesu, ngöne la itre Evangelia. (Ioane 14:16) Celë hi ka acatrene la lapaun me ihnimi angatr koi Akötresie me Iesu me koi itre xan.

15. Nemene la aqane eatr la hna perofetan ngöne Isaia 2:2, 3?

¹⁵ Hneijine së enehila. Hnei Iehova hna perofetan ka hape, ame “ngöne la ite drai hnapin,” nyimutre la itre atr ka troa traqa qa ngöne la nöjei nöj me elë hune la wetre i Nyidrë, ene la nöje i Nyidrë, matre troa kepe ini. (E jë la Isaia 2:2, 3.) Celë hi lai hne së hna öhn enehila. Eje hi, ka draië catre kö la nyipi hmi hune la nöjei hmi ka  thoi. Ketre, nyimutre la itre göxene hna hnëkën hnei Iehova koi së! (Is. 25:6) Jëne la “hlue ka nyipici me ka inamacan,” Nyidrëti a hamë së la nöjei pengöne xen, tune la itre itus, me itre cainöj, me video me film. (Mat. 24:45) Eje hi, caasi hi la mekuna së me Elihu, sinee i Iobu, lo kola hape: “E ka la ate ini tui [Akötresie]?”—Iobu 36:22.

16. Nemene la nyine tro sa kuca, matre troa kökötre ngöne la nyipici?

¹⁶ Itre nyine tro sa kuca. Uati hmitrötr la ka xatua së troa trongëne la itre hne së hna e me inin e hnine la Tusi Hmitrötr. Tune la atre cinyihane la Salamo, loi e tro sa thith me hape: “Iehova fe, ini ni jë la itre jë i nyipë. Tro ni a trongëne la nyipici nyipë. Apexejene ju la hning matre tro ni a xouene la ëje i nyipë.” (Sal. 86:11, MN) Ketre, loi e tro palahi sa xome la itre göxene hna hnëkën hnei Iehova jëne la Tusi Hmitrötr me organizasio i Nyidrë. Ngo tha easë kö a thele troa tiqa hnei atrehmekun. Easa ajane troa ketr la hni së hnene la nyipici matre tro sa saze. Nge ijije hi troa xatua së hnene la uati hmitrötr. Ketre, easa ajane troa ithuecatre kowe la itre trejin. (Heb. 10:24, 25) Pine nemen? Pine laka, easa sine la lapa ka cahae i Iehova. Sipone jë koi Iehova la uati hmitrötre i Nyidrë, matre tro sa hamë mekun qa kuhu hni së ngöne la hna icasikeu, me kuca hnyawa la itre iamacany me cainöj. E cili, easa amamane koi Iehova me Iesu laka, easa hnime la itre “mamoe” i nyidro.—Ioane 21:15-17.

17. Nemene la itre aqane tro sa sajuëne la organizasio i Iehova?

¹⁷ Easenyi hë matre troa musi la organizasio hna xomiujine hnene la uati hmitrötre i Iehova. Celë hi matre, loi e tro sa catre sajuëne ej. Tui Iehova, loi e tro sa hnim me cainöje kowe la nöjei atr asë. Loi e tro fe sa thele tingeting e hnine la ekalesia. Ketre, jëne la itre göxene hna hnëkën hnei Iehova, easa drengethenge Nyidrë, ene la Atre Hamë Ini Ka Tru. E cili, ngacama easenyi hë la pune la fene i Satana, ngo tha tro kö sa xou. Easë pe a catre nyihlue i Iehova me sajuëne la organizasio i Nyidrë.