1. San dopu Kotoigi mu tan du?

YU A wan dopu Kotoigi? A dei di i dopu, i soi ala sama taki i wani dini Yehofa makandaa anga den taa sama di de aini a olikanisâsi fi en, fu di yu e biibi en. * I mu tan meke moiti fi i biibi taanga. I mu e biibi tu taki Yehofa e tii a olikanisâsi fi en aini a ten ya.

2-3. Sowtu manii fu Yehofa wi e si te u luku a olikanisâsi fi en?

² A fasi fa Yehofa e tii a olikanisâsi fi en aini a ten ya e soi den manii fi en, anga san a abi a pakisei gi libisama. Ai soi tu san Yehofa lobi anga san a á lobi. Meke u poti pakisei a dii manii fu Yehofa di wi e si, te u luku fa sani e waka aini a olikanisâsi fi en.

³ A fosi sani, ‘Gadu á lobi a wan sama moo a taawan’ (Toli 10:34). Yehofa lobi u, neen meke a sende en ‘Manpikin kon dede gi ala sama’ (1 Tim. 2:6; Yoh. 3:16). A foluku fu Yehofa e paati a bun nyunsu gi ala sama di wani aliki. Den sama ya sa fende wini fu a dede di Yesesi dede gi u. Du fu tu sani, Yehofa lobi te sani e waka a wan letifasi, a á lobi te sani e go buuyabuuya (1 Kor. 14:33, 40). Neen meke den sama di e dini en nai du sani buuyabuuya tu. Du fu dii sani, a taki a Yehofa na a moo ‘Gaan Leliman’ (Yes. 30:20, 21). A olikanisâsi fi en e du ala san den man fu leli taawan san sikiifi aini a Wowtu fu Gadu. Fa den fosi Kelesten be soi taki den e du sani enke Yehofa? Fa a foluku fu Yehofa aini a ten ya e soi taki den e du sani enke en? Fa a santa yeye sa yeepi i fu du sani enke Yehofa?

4. Enke fa Toli fu den apostel 1:8 e soi, da sowtu wooko Yesesi be gi den bakaman fi en? Fa Yesesi be o yeepi den fu du a wooko ya?

⁴ Aini a ten fu den fosi Kelesten. Na ala sowtu sama be sa fende wini fu a bosikopu di Yesesi be e paati (Luk. 4:43). A be taigi den bakaman fi en taki den be mu peleiki ‘te doo den moo faawe peesi a goontapu’. (Leisi Toli fu den apostel 1:8.) Den á be o man du a wooko ya anga den eigi kaakiti efuso koni. Den be abi a santa yeye fanowdu. Yesesi be paamisi den taki a be o gi den a santa yeye fu yeepi den fu du a wooko ya.​—Yoh. 14:26; Sak. 4:6.

5-6. Fa a santa yeye be yeepi den bakaman fu Yesesi?

⁵ Den bakaman fu Yesesi fende a santa yeye na a Pinksterfesa fu a yali 33. A santa yeye be gi den kaakiti fu peleiki fayafaya. A sani ya meke omen dunsu sama toon Yesesi bakaman (Toli 2:41; 4:4). Di sama bigin du ogii anga den Kelesten, den á tapu anga a peleikiwooko, ma den begi Gadu fu a yeepi den. Den taigi Gadu taki: ‘Gaantangi yeepi den saafu fi i fu den á feele te den e paati a wowtu.’ Di den begi, Yehofa gi den a santa yeye. Den á be e feele moo fu paati a wowtu fu Gadu.​—Toli 4:18-20, 29, 31.

⁶ Den fosi Kelesten be abi taa booko-ede tu. Den bukulolo di den be abi á be ipi. Den á be abi taa buku di be e yeepi den fu fusutan a Beibel moo bun tu. Boiti dati, den be mu peleiki gi sama di be e taki taa tongo. Winsi fa den sani ya be meke a wooko fu den moo taanga, toku den tan peleiki fayafaya. Aini wan sani fu 30 yali namo, den ‘peleiki gi ala sama a goontapu’.​—Kol. 1:6, 23.

7. Fa a foluku fu Yehofa aini a pisiten fu 1919 be sabi san Yehofa wani den du? San den du di den fusutan a sani ya?

⁷ Aini a ten ya. Yehofa e tii a foluku fi en aini a ten ya ete, ai yeepi den fu dini en enke fa a wani tu. Den sani di sikiifi aini en Wowtu Beibel, e soi u fa Yehofa wani u du sani. Na a santa yeye fu Gadu tii den sama di sikiifi a Beibel. Aini a Beibel wi e leisi fa Yesesi be e du a wooko fi en a goontapu ya. Wi e leisi tu taki a be gi ala den bakaman fi en a wooko fu peleiki (Mat. 28:19, 20). A Wakititolen fu yuli 1881 be taki: ‘Yehofa á hali u kon aini en olikanisâsi fu kon gudu, efuso fu sama gi u gaandi, ma a kai u fu gi ala san wi abi fu meke a peleikiwooko go a fesi.’ Aini a yali 1919 den baala be sikiifi wan bolosilo di den e kai ‘Gi den sama di mu du a wooko’. Wan pisi aini a bolosilo ya e taki: ‘Ná pikin wooko de fu du, ma a Masaa abi a wooko, neen meke a o gi u kaakiti fu kaba a wooko ya.’ Leti enke den Kelesten fu a ten fu den apostel, den baala ya be e wooko taanga, fu di den be e biibi taki a santa yeye be o yeepi den fu peleiki gi ala sama. Useefi e biibi taki a santa yeye o yeepi wi aini a ten ya fu du a wooko di Yehofa gi u.

8-9. Sowtu taa fasi a olikanisâsi fu Yehofa suku fu peleiki gi moo sama?

⁸ A foluku fu Yehofa e wooko anga den moo bun sani di den sa fende fu paati a bun nyunsu. Den e doloki buku, wan pisiten u be e wooko anga a fowtow dalaama di e soi fa Gadu meke sani (‘Photo-Drama of Creation’), u be e peleiki anga wagi di abi bokusu. U be e peleiki anga laadiyow tu. Nownow wi e wooko anga computer anga internet fu paati a bun nyunsu. A foluku fu Yehofa e poti buku aini omen ondoo tongo tu, fu di den wani ala sama yee  a bun nyunsu aini den mamabee tongo. Yehofa nai paati bee. A senten a be taki ‘sama fu ala nasi, lo anga tongo’ be o yee a bun nyunsu (Openb. 14:6, 7). Yehofa wani ala sama yee a Kownukondee bosikopu.

⁹ Fa den sama di e tan a peesi pe wi á poi miti den a osu e yee a bun nyunsu? We, aini den ten di pasa, a foluku fu Yehofa suku taa fasi fu peleiki gi den sama ya, neen meke wi e peleiki a peesi pe tyaipi sama e waka pasa. Aini 2001, den baala di e tii a wooko a hii goontapu gi den baala anga sisa fu Faansikondee pasi fu peleiki anga den pikin wagi. Bakaten taa kondee be sa peleiki na a fasi ya tu. A sani ya meke a wooko moo go a fesi. Aini 2011 den bigin peleiki anga a pikin wagi tu aini New York, wan fu den moo doloki foto fu Ameekankondee. Aini a fosi yali, den paati 102.129 buku anga 68.911 Ontwaakt! anga Wakititolen. A wan sani fu 4701 sama akisi wan Beibelsutudi. A sani ya e soi kiin taki a santa yeye fu Yehofa e holibaka gi a wooko ya. Neen meke den baala di e tii a wooko gi pasi fu peleiki na a fasi ya a hii goontapu.

10. San o yeepi u fu toon wan moo bun leliman?

¹⁰ San i mu du? Te u go a komakandaa, Yehofa e leli u fa u mu peleiki. Wooko anga den sani di yu e leli. I mu abi a gwenti fu e wooko makandaa anga den baala anga sisa di de aini a peleikiwooko kulu fi i. Te yu e wooko makandaa anga den, yu o leli omen sani di o yeepi i fu toon wan moo bun peleikiman. Tan peleiki winsi a á makiliki. Enke fa a tekisi di e holibaka gi a artikel ya e soi u, da a ná fu di u taanga so meke u poi du a wooko di Yehofa gi u, ma na a santa yeye fi en e yeepi u (Sak. 4:6). A Yehofa wi e wooko gi, neen meke ala yuu a o holibaka gi u.

11. Fa den baala di be e tii a wooko aini a ten fu den apostel yeepi a foluku fu Gadu fu libi na a wan?

¹¹ Aini a ten fu den fosi Kelesten. Den baala di be e tii a wooko a ten de be de a Yelusalem. Den baala ya be e yeepi den kemeente fu libi na a wan (Toli 2:42).  Aini a pisiten fu a yali 49, son Kelesten be fende namonamo taki ala Kelesten mu besnei. A sani ya be tyai paati fasi kon aini a kemeente. Neen meke den baala di be e tii a wooko a ten de begi Yehofa en santa yeye, neen den luku a toli moo fini. Efu ala den baala fu a ten de á be e denki go na a wan se, a sani ya be o meke a peleikiwooko go a baka. Den apostel anga den taa owluman di be e teke fesi a be Dyu, toku den meke a santa yeye tii den di den be e luku a toli ya. Den á meke den gwenti di den be abi enke Dyu tapu den fu si sani enke fa Yehofa be wani (Toli 15:1, 2, 5-20, 28). San a be a bakapisi? We, Yehofa belesi a bosoloiti di den teke. A kemeente be e libi na a wan baka, neen meke den be bigin peleiki fayafaya baka.​—Toli 15:30, 31; 16:4, 5.

12. San e soi taki a olikanisâsi fu Yehofa nai du sani buuyabuuya?

¹² Aini a ten ya. A olikanisâsi fu Yehofa e yeepi a foluku fi en fu libi na a wan, neen meke sani nai waka buuyabuuya. Wan artikel (Decently and in Order) be kon aini a Ingiisi Wakititolen fu 15 november 1895. Na a tekisi fu 1 Korentesama 14:40 be e holibaka gi a artikel ya. Wan pisi fu a artikel be taki: ‘A omen leisi den apostel be sikiifi biifi gi den Kelesten fu a ten de fu soi den taki sani á be mu e waka buuyabuuya. Ala san sama sikiifi a fositen, be sikiifi fu leli u wan sani, neen meke u mu e meke moiti fu wooko anga den sani ya’ (Rom. 15:4). Aini a ten ya, a olikanisâsi fu Yehofa e seeka sani tu fu u sa libi na a wan. Meke u taki i go a wan taa kondee, neen i go a komakandaa sataa efuso sonde. Yu á be o buuya, bika i sabi pilisisi sowtu Wakititolen den o luku anga fa den e holi A Wakititolen-sutudi. Na a yeye fu Gadu e meke sani waka so a hii goontapu.​—Sef. 3:9.

13. Te i luku Yakowbesi 3:17, da san u mu akisi useefi?

¹³ San i mu du? Yehofa wani u ‘libi na a wan’. A santa yeye fi en e yeepi u fu du a sani ya (Efe. 4:1-3). Neen meke a bun fu akisi iseefi taki: ‘Mi e du ala san mi poi fu libi na a wan anga ala sama aini a  kemeente? Mi e aliki den baala di e teke fesi? Sama poi fitoow mi te mi fende wan wooko fu du aini a kemeente? Mi e doo na a yuu efuso mi gwenti lati? Mi lobi yeepi taawan?’ (Leisi Yakowbesi 3:17.) Efi i si enke i sa meke moo moiti anga son wan fu den sani ya, begi Yehofa fu a gi yu en santa yeye. Efi yu e meke a santa yeye fu Yehofa yeepi i fu kengi den manii fi i, den baala anga sisa aini a kemeente o moo lobi i.

14. Enke fa Kolosesama 1:9, 10 e soi, da fa Yehofa be e leli a foluku fi en aini a ten fu den apostel?

¹⁴ Aini a ten fu den fosi Kelesten. Yehofa e leli a foluku fi en (Ps. 32:8). A wani den sama di e dini en sabi en bun, a wani den lobi en tu. Boiti dati, a wani den libi fu teego enke en pikin di a lobi. Efu Yehofa á be e leli u, wi á be o poi du nawan fu den sani ya (Yoh. 17:3). Aini a ten fu den fosi Kelesten, na a kemeente Yehofa be e koboloiki fu leli a foluku fi en. (Leisi Kolosesama 1:9, 10.) A santa yeye be e yeepi den disipel a ten de tu. Neen na a ‘yeepiman’ di Yesesi be paamisi den bakaman fi en taki a o be o sende gi den (Yoh. 14:16). A santa yeye be e yeepi den fu fusutan a Wowtu fu Gadu moo bun, anga fu membee den sani di Yesesi be leli den. A sani ya be taanga a biibi fu den Kelesten ya. A lobi di den be lobi Yehofa, Yesesi anga den taa baala anga sisa, be e taanga den biibi tu.

15. Fa a sani di Yehofa be taki a Yesaya 2:2, 3 e pasa aini a ten ya?

¹⁵ Aini a ten ya. Yehofa be taki ‘aini den lasiti dei’ sama fu ala nasi be o kon na a wan fu dini en. (Leisi Yesaya 2:2, 3.) Na a sani ya e pasa nownow. Wi e si kiin taki a tuu biibi á de enke den falisi keliki seefiseefi. A omen sani Yehofa e seeka gi a foluku fi en di e yeepi den fu fusutan  a Beibel moo bun (Yes. 25:6). Yehofa e meke a ‘koni saafu di u sa fitoow’ meke buku, felon, poku anga taa sani fu yeepi u fusutan en Wowtu moo bun (Mat. 24:45). Wi e fii enke Elihu, a mati fu Yopu di be taki: ‘Sama poi leli taawan enke Gadu?’​—Yopu 36:22.

16. San i mu du fu fende wini fu den sani di Yehofa e leli u?

¹⁶ San i mu du? A santa yeye fu Gadu o yeepi i fu du den sani di i leli aini Beibel. Leti enke a psalm sikiifiman, i sa begi en taki: ‘Yehofa, soi mi fa mi mu waka na a pasi fi i baa. Mi o waka na a bun pasi fi i. Meke mi lesipeki i nen anga mi hii ati’ (Ps. 86:11). Ala yuu i mu e leisi a Beibel anga den taa sani di a olikanisâsi fu Yehofa e sikiifi fu yeepi u fu fusutan a Beibel moo bun. Yu á mu e biibi den sani di yu e leli namo, ma i mu e du den tu. A yeye fu Yehofa o yeepi i fu du den sani di i leli. I mu e yeepi den baala anga sisa aini a kemeente tu (Heb. 10:24, 25). Saide? Bika den a yu famii. Neen meke i mu e akisi Yehofa en santa yeye fu a yeepi i fu gi piki di e gi taawan taanga-sikin. I mu e akisi en fu a yeepi i tu te i mu holi wan lezing efuso du wan taa sani aini a kemeente. Te yu e du den sani ya, da yu e soi Yehofa anga en Manpikin taki i lobi den sikapu fu den.​—Yoh. 21:15-17.

17. Fa i sa holibaka gi a olikanisâsi fu Yehofa?

¹⁷ Dyonson na a olikanisâsi fu Yehofa wawan o fika a goontapu. Neen meke i mu e peleiki fayafaya. Te yu e peleiki gi ala sama di yu e miti, yu e soi taki i lobi ala sama, leti enke fa Yehofa lobi ala sama. Du ala san i man fu e libi na a wan anga den baala anga sisa. Meke moiti fu leisi, aliki, efuso luku ala den sani di a olikanisâsi fu Yehofa e seeka gi u. Te yu e du den sani ya, i ná o buuya te a goontapu fu Saatan o booko, ma yu o abi deki-ati. Yu anga ala den taa sama di e dini Yehofa anga den hii ati o taampu gingin, u ná o feele.