1. Kerecɛn batizeninw ka ɲi ka to ka mun lo kɛ?

YALA i batizera wa? N’o lo, i y’a yira jama ɲɛɛ na ko i limaniyanin lo Jehova la ani ko i b’a fɛ ka jɛn ka baara kɛ n’a ka ɔriganisasiyɔn ye. * I bele ka ɲi ka to k’i ka limaniya sabati. I ka ɲi ka la a la kosɔbɛ fana ko bi tile la, Jehova be tɛmɛna a ka ɔriganisasiyɔn lo fɛ k’a ka baara kɛ.

2-3. Jehova b’a ka ɔriganisasiyɔn ɲɛminɛna cogo di bi? A yira a b’o kɛ cogo tigitigi minw na.

² Bi, Jehova b’a ka ɔriganisasiyɔn ɲɛminɛna cogo dɔ la min b’a yira a ye Ala sugu min ye ani a sagonata n’a ka sariyaw ye minw ye. An ka Jehova ka jogo saba lajɛ minw be ye a ka ɔriganisasiyɔn kɔnɔ.

³ A fɔlɔ, “Ala te mɔgɔ bɔ mɔgɔ la.” (Kɛw. 10:34). Kanuya ye Jehova lasun a y’a Dencɛ “saraka mɔgɔ bɛɛ kunmabɔli kosɔn.” (1 Tim. 2:6; Zan 3:16). Minw b’a fɛ ka kibaro diiman lamɛn, Jehova be tɛmɛna a sagokɛlaw fɛ k’a lase u bɛɛ ma. O cogo la, a be mɔgɔ caamanba dɛmɛna u ka nafa sɔrɔ kunmabɔsara la. A filanan, Jehova ye hɛɛrɛtigi Ala ye ani a be koow kɛ cogo bɛnnin na (1 Kor. 14:33, 40). O kama, a sagokɛlaw ka koow labɛnnin lo koɲuman ani u be hɛɛrɛ la. A sabanan, Jehova y’an “Kalanbaga” wala Karamɔgɔba ye (Ezayi 30:20, 21). O kama, a ka ɔriganisasiyɔn be jijalibaw kɛ ka mɔgɔw kalan kafo kɔnɔ ani waajuli la. Saan kɛmɛkulu fɔlɔ kerecɛnw tun be Jehova ka jogo  saba nunu ladegi cogo di? Jehova sagokɛlaw b’o jogow ladegi cogo di an ka wagati la? Hakili senu be se ka ele dɛmɛ cogo di i ka jɛn ka baara kɛ ni Jehova ka ɔriganisasiyɔn ye?

4. Ka kɛɲɛ ni Kɛwaliw 1:8 ye, Yezu ye cii juman lo di a ka kalandenw ma? U tun bena dɛmɛ juman lo sɔrɔ?

⁴ Saan kɛmɛkulu fɔlɔ la. Yezu tun be kibaro diiman min fɔ, o be jigiya di adamadenw bɛɛ ma (Luka 4:43). A ye baara min daminɛ, a ko a ka kalandenw ka to k’o kɛ, o kɔrɔ, ka waajuli kɛ “fɔɔ ka taga se diɲɛ faan bɛɛ la.” (Kɛwaliw 1:8 kalan). U tun tɛna se k’o baara kɛ u yɛrɛ ka fanga barika la. U mako tun bena kɛ hakili senu na, o min ye “dɛmɛbaga” ye Yezu tun ko a bena min di u ma.—Zan 14:26; Zak. 4:6.

5-6. Hakili senu ye Yezu ka kalandenw dɛmɛ ka mun ni mun lo kɛ?

⁵ Saan 33 Pantekɔte loon na, hakili senu jigira Yezu ka kalandenw kan. Hakili senu ka dɛmɛ barika la, u sinna ka waajuli daminɛ. Wagati damanin dɔrɔn o kɔ, mɔgɔ waa caaman sɔnna kibaro diiman ma (Kɛw. 2:41; 4:4). Tuma min na mɔgɔw y’a daminɛ ka Yezu ka kalandenw tɔɔrɔ, u ma waajuli dabila siranya kosɔn. Nka, u ye dɛmɛ ɲini Ala fɛ deli la ko: “A to i ka baarakɛlaw k’i ka kuma fɔ mɔgɔw ye ni jagwɛlɛya ye.” O kɔ, u bɛɛ fara hakili senu na ani u tora ka “Ala ka kuma fɔ ni jagwɛlɛya ye.”—Kɛw. 4:18-20, 29, 31.

⁶ Gwɛlɛya wɛrɛw tun be Yezu ka kalandenw kan. Ɲɛyirali fɛ, kitabuw tun sɔrɔ man di. Gafew tun tɛ yen minw be Ala ka Kuma ɲɛfɔ i ko bi. Kalandenw tun ka ɲi ka waajuli kɛ kaan caaman na fana. A tun be mɔgɔw ɲɛɛ na ko koo min tun tɛ se ka kɛ, Yezu ka kalandenw y’o kɛ gwɛlɛyaw bɛɛ n’a ta. Saan 30 ɲɔgɔn kɔnɔ, u ye kibaro diiman fɔ ni kisɛya ye “danfɛnw bɛɛ ye diɲɛ kɔnɔ.”—Kɔlɔs. 1:6, 23.

7. A saan kɛmɛ ni kɔ ye nin ye, Jehova sagokɛlaw y’a lɔn cogo di a be min ɲini u fɛ ani u y’o koo ta cogo di?

⁷ An ka wagati la. Jehova bele b’a sagokɛlaw ɲɛminɛna ani ka fanga di u ma. O dɛmɛ fanba be bɔ Bibulu kɔnɔ, o min sɛbɛra hakili senu barika la. Bibulu b’a yira Yezu ye min kɛ a ka cidenya baara la. A ye cii di a ka kalandenw ma ko ale ye baara min daminɛ, u ka to k’o kɛ. O cii fana be sɔrɔ Bibulu kɔnɔ (Mat. 28:19, 20). Kabi saan 1881 zuwekalo la, a tun sɛbɛra Kɔrɔsili Sangaso kɔnɔ ko: “An ma weele wala ka mɔ ni hakili senu ye walisa ka tandoli sɔrɔ ani ka kɛ nafolotigiw ye. Nka, o kɛra walisa an ka baara kɛ n’an bololafɛnw bɛɛ ye ka kibaro diiman fɔ mɔgɔw ye.” Saan 1919, gafenin dɔ bɔra min kuun ko: “À qui l’œuvre est confiée.” A fɔra a kɔnɔ ko: “Baara ka ca. Nka komi Matigi ka baara lo, a bena fanga di an ma an ka se k’o kɛ.” I ko kerecɛn fɔlɔw, o balimaw jaa tun ka gwɛlɛ ani u y’u yɛrɛ di ka baara kɛ kosɔbɛ. U tun lanin b’a la ko hakili senu bena u dɛmɛ ka mɔgɔ sugu bɛɛ waaju. Bi, an fana lanin b’o la.

8-9. Jehova ka ɔriganisasiyɔn ye baara kɛ ni fɛɛrɛ jumanw lo ye walisa ka kibaro diiman jɛnsɛn?

⁸ Jehova ka ɔriganisasiyɔn ye baara kɛ ni baarakɛminanw bɛɛ la fisamanw ye walisa ka kibaro diiman jɛnsɛn. U dɔw ye nunu ye: sɛbɛw, “Photo-Drame de la Création,” turnediskiw, kunnafoni jɛnsɛn mobiliw, arajo ani kɔsa la, ɔridinatɛri ni ɛntɛrɛnɛti. Ala ka ɔriganisasiyɔn be bayɛlɛmani baaraba dɔ kɛra fana min ɲɔgɔn ma deli ka kɛ! U b’o  kɛra walisa mɔgɔ sifa bɛɛ ka se ka kibaro diiman mɛn u ka kaan na. Jehova tɛ mɔgɔ bɔ mɔgɔ la. A tun kɔnna k’a fɔ ko kibaro diiman bena lase “jamanaw kɔnɔ siyaw bɛɛ ma.” (Yir. 14:6, 7). A b’a fɛ bɛɛ ka se ka Masaya kibaro diiman mɛn.

⁹ An tɛ se ka dɔw waaju sabu u be boon minw kɔnɔ, garadiw be yen wala o boonw datugunin lo. Walisa ka se k’o mɔgɔw fanba waaju, Jehova y’a ka ɔriganisasiyɔn dɛmɛ janko waajuli ka se ka kɛ jamayɔrɔw la cogo caaman na. Saan 2001, Koow Ɲɛnabɔla Jɛnkulu ye sira di walisa baara ka kɛ ni waajulikɛ wotorow ni tabaliw ye Faransi. Kɔfɛ, u ye sira di walisa o ɲɔgɔn ka kɛ yɔrɔ wɛrɛw la. Nafa sɔrɔla o la. Saan 2011, balimaw ye waajuli kɛcogo kura dɔ daminɛ Etazini, Niyɔriki dugu ka jamayɔrɔ dɔ la. Saan kelen kɔnɔ, u ye gafe 102 129 ani zurunali 68 911 di mɔgɔw ma. Mɔgɔ 4 701 y’a ɲini ka bibulukalan kɛ! Siga t’a la, hakili senu ye balimaw dɛmɛ o baara la. O kama, Koow Ɲɛnabɔla Jɛnkulu ye sira di walisa baara ka kɛ ni waajulikɛ wotorow ni tabaliw ye duniɲa kuru bɛɛ kɔnɔ.

10. An be se k’an ka waajuli kɛcogo fisaya cogo di?

¹⁰ I be se ka min kɛ. Jehova be fɔrɔmasɔn di an ma lajɛnw na waajuli kama. I ye kalan min sɔrɔ, baara kɛ n’o ye. Waajuli kɛ tuma o tuma n’i ka waajuli jɛnkulu ye. I mako be dɛmɛ min na, i bena o sɔrɔ yen ani tɔɔw ka ɲɛyirali ɲumanw bena i jija. To ka waajuli kɛ gwɛlɛyaw bɛɛ n’a ta. I ko barokun ka vɛrise jɔnjɔn b’a yira cogo min na, an be sera ka Ala sago kɛ a ka hakili senu barika lo la, an yɛrɛ fanga tɛ (Zak. 4:6). A bena fanga di an ma sabu an be ale sago lo kɛra.

11. Saan kɛmɛkulu fɔlɔ la, koow ɲɛnabɔla jɛnkulu mɔgɔw jɛnna ka baara kɛ cogo di walisa koow ka kɛ cogo bɛnnin na Ala sagokɛlaw cɛ?

¹¹ Saan kɛmɛkulu fɔlɔ la. Koow ɲɛnabɔla jɛnkulu mɔgɔw jɛnna ka baara kɛ Zeruzalɛmu walisa koow ka kɛ cogo bɛnnin na ani hɛɛrɛ ka to Ala sagokɛlaw cɛ (Kɛw. 2:42). Ɲɛyirali fɛ, tuma min na sɔsɔli tun be kɛra kɛnɛkɛnɛli koo la saan 49 Krista tile la, hakili senu ye  koow ɲɛnabɔla jɛnkulu mɔgɔw ɲɛminɛ u y’o koo lajɛ. Ni kafo faranfarannin tun tora o sɔsɔli kosɔn, waajuli tun tɛna se ka kɛ bɛrɛbɛrɛ. Cidenw ni cɛkɔrɔbaw bɛɛ tun ye Yahutuw ye. Nka, u m’a to Yahutuw ka landako ani minw be mɔgɔw kalan o koo la, olu ka nɔɔ to u kan. U y’a to Ala ka Kuma ani hakili senu k’u ɲɛminɛ (Kɛw. 15:1, 2, 5-20, 28). Mun lo sɔrɔla o la? Jehova ye u duga u ka desizɔn kosɔn. Kafo tora hɛɛrɛ ni kelenya la ani u tora ka kibaro diiman jɛnsɛn.—Kɛw. 15:30, 31; 16:4, 5.

12. Bi, mun lo b’a yira ko Jehova ka ɔriganisasiyɔn kɔnɔ, koow be kɛ cogo bɛnnin na ani hɛɛrɛ be yen?

¹² An ka wagati la bi. Jehova ka ɔriganisasiyɔn ye baara kɛ walisa koow ka kɛ cogo bɛnnin na ani hɛɛrɛ ka to Ala sagokɛlaw cɛma. Kabi saan 1895, barokun nin bɔra novanburu tile 15nan ka Kɔrɔsili Sangaso kɔnɔ: “Koow kɛ ka ɲa ani ka kɛɲɛ n’o kɛcogo ye.” A tun basiginin lo 1 Korɛntikaw 14:40 kan ani a tun fɔra a kɔnɔ ko: “Cidenw ye fɛɛn caaman fɔ kerecɛn fɔlɔw ye k’a yira ko u ka ɲi ka koow kɛ cogo bɛnnin na . . . ‘Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d’an ma.’ An ka ɲi ka to k’an janto o koow la koɲuman.” (Ɔrɔm. 15:4). Bi fana, Jehova ka ɔriganisasiyɔn be jijalibaw kɛ walisa koow ka kɛ cogo bɛnnin na ani hɛɛrɛ ka to kafow kɔnɔ. Ɲɛyirali fɛ, n’i ka ɲi ka taga Kɔrɔsili Sangaso kalan na kafo wɛrɛ la, hali ni jamana wɛrɛ lo, i b’a lɔn kalan bena kɛ cogo min na ani barokun min bena lajɛ. I bena sin k’a jati ko i b’i ka kafo lo kɔnɔ! O kelenya ɲɔgɔn be se ka sɔrɔ Ala ka hakili senu barika dɔrɔn lo la.—Sof. 3:9.

13. Ka kɛɲɛ ni Zaki 3:17 ye, an ka ɲi k’an yɛrɛ ɲininga mun lo la?

¹³ I be se ka min kɛ. “Bɛɛn min be sɔrɔ Nii Senuman fɛ,” Jehova b’a fɛ a sagokɛlaw ka “banba ka to o la hɛrɛ kosɔn.” (Efɛz. 4:1-3). O la, i yɛrɛ ɲininga ko: “Yala n’ be n’ jija walisa kafo ka hɛɛrɛ n’a ka kelenya ka sabati wa? N’ be mɛnni kɛ kafo ɲɛminɛbagaw fɛ wa?  Yala tɔɔw be se k’u jigi la n’ kan sanko ni kunkanbaaraw be n’ fɛ kafo kɔnɔ wa? A ka di n’ ye ka baara kɛ tɔɔw ye, k’u dɛmɛ ani ka koow kɛ a wagati la wa?” (Zaki 3:17 kalan). N’i ka ɲi ka yɛlɛmani don koo dɔw la, hakili senu deli Ala fɛ. N’i y’a to hakili senu tora ka nɔɔ to i jogow ani i ka kɛwalew kan, i be min kɛra kafo kɔnɔ, balimaw bena to k’i waleɲuman lɔn o kosɔn ani u bena i kanu.

14. Ka kɛɲɛ ni Kɔlɔsikaw 1:9, 10 ye, Jehova y’a sagokɛlaw kalan cogo di saan kɛmɛkulu fɔlɔ la?

¹⁴ Saan kɛmɛkulu fɔlɔ la. A ka di Jehova ye kosɔbɛ k’a ka mɔgɔw kalan (Zab. 32:8). A b’a fɛ u k’ale lɔn, k’a kanu ani ka ɲɛnamaya kɛ fɔɔ abada i ko a deen kanulenw. O tɛ ɲɛ kalan kɔ (Zan 17:3). Jehova tɛmɛna kerecɛn fɔlɔw ka kafo fɛ k’a sagokɛlaw kalan (Kɔlɔsikaw 1:9, 10 kalan). Yezu ye “dɛmɛbaga” min kofɔ, o min ye hakili senu ye, ale fana y’u dɛmɛ (Zan 14:16). A ye Yezu ka kalandenw dɛmɛ ka Ala ka Kuma faamu koɲuman ani k’u hakili jigi Yezu ka kumaw n’a ka kɛtaw la. Kɔfɛ, u y’o koow sɛbɛ Evanziliw kɔnɔ. O lɔnniya ye kerecɛn fɔlɔw ka limaniya sabati ani k’a to u ye Ala, a Dencɛ ani u balimaw kanu kosɔbɛ.

15. Jehova ka layidu min be sɔrɔ Ezayi 2:2, 3 kɔnɔ, ele y’a ye a y’o dafa cogo di?

¹⁵ An ka wagati la. Jehova tun kɔnna k’a fɔ ko laban loonw na, siyaw bɛɛ mɔgɔw bena girin ka taga ale ka kuru kan walisa ale k’u kalan a ka siraw la (Ezayi 2:2, 3 kalan). O kiraya kuma be dafara bi. Tiɲɛn batoli ka ɲi ka tɛmɛ ngalon diinanw kan fɔɔ ka taga ka na. Jehova b’a sagokɛlaw kalan koo  caaman na Bibulu kɔnɔ! (Ezayi 25:6). A be tɛmɛ “jɔncɛ kantigiman hakiliman” fɛ k’o kɛ (Mat. 24:45, NW ). O kalanw fana be sɔrɔ cogo caaman na i n’a fɔ gafew, forobakalanw, desɛn animew ani videwow. An be ni Zɔbu tericɛ Eliyu ka miiriya ɲɔgɔn ye. Ale ko: “Jɔn be se ka mɔgɔ kalan ka se [Ala ma]?”—Zɔbu 36:22.

16. I be se ka mun lo kɛ walisa ka nafa sɔrɔ Jehova ka kalan na?

¹⁶ I be se ka min kɛ. I be min kalan Ala ka Kuma kɔnɔ, a ka hakili senu bena i dɛmɛ k’o sira tagama. I ko Zaburu sɛbɛbaga, Ala deli ko: “I ka sira yira ne la. Ne bena i ka tiɲɛko kɛ. Kɔnɔgwɛ di ne ma, n ka siran i ɲɛ.” (Zab. 86:11). O kama, to ka Bibulu ani Jehova ka ɔriganisasiyɔn ka gafew kalan ani k’u sɛgɛsɛgɛ. I man ɲi k’a ɲini dɔrɔn ka lɔnniya sɔrɔ. Nka, a ɲini ka la Bibulu ka tiɲɛnkalanw na kosɔbɛ ani k’u sira tagama. Jehova ka hakili senu be se k’i dɛmɛ k’o kɛ. A ɲini ka balimaw jija fana (Eburuw 10:24, 25). I ka ɲi k’o kɛ sabu aw bɛɛ ye denbaya kelen mɔgɔw ye Alako ta fan fɛ. Ala deli a ka hakili senu d’i ma walisa i ka lakalitaw kɛ n’i dusu bɛɛ ye lajɛnw na. I seko fisaman kɛ fana ni kalan b’i fɛ k’a kɛ. O la, i b’a yira Jehova n’a Dencɛ la ko u ka sagadenw koo ka gwɛlɛ u ma cogo min na, u koo ka di ele fana ye.—Zan 21:15-17.

17. I be se k’a yira cogo di ko i be Jehova ka ɔriganisasiyɔn dɛmɛna kantigiya la?

¹⁷ Hakili senu be ɔriganisasiyɔn min ɲɛminɛna, yanni dɔɔni, o dɔrɔn lo bena to dugukolo kan. O la, jɛn ka baara kɛ n’o ɔriganisasiyɔn ye ni kisɛya ye. Ala be bɛɛ kanu, a tɛ mɔgɔ bɔ mɔgɔ la. A ladegi i kɛtɔ ka mɔgɔ sifa bɛɛ waaju. Ni koow be kɛ cogo bɛnnin na ani hɛɛrɛ la, o ka di Jehova ye. I jija k’a ladegi, i kɛtɔ ka kafo ka kelenya sabati. An ka Karamɔgɔba b’an kalan koo minw bɛɛ la, i jija ka nafa sɔrɔ o la bɛrɛbɛrɛ. O la, i b’a yira ko i be mɛnni kɛ a fɛ. N’i y’o koow kɛ, i tɛna siran Sutana ka duniɲa juguman nin halaki tuma na. Nka, minw be baara kɛ kantigiya la ni Jehova ka ɔriganisasiyɔn ye, i bena i jaa gwɛlɛya ka to n’olu ye.