1. Nso ke ana mbon emi ẹma ẹkena baptism ẹka iso ẹnam?

NDI ama ana baptism? Ekpedi ntre, ọwọrọ ama anam ediwak owo ẹdiọn̄ọ ke ọmọbuọt idem ye Jehovah, ke omonyụn̄ enyịme ndidu ke esop esie nnam n̄kpọ esie. * Ọmọdiọn̄ọ ke akpana edi eyo esiere, afo enen̄ede ọbuọt idem ye Jehovah akan nte ọkọbuọtde. Ana onyụn̄ aka iso enịm ke esop emi ke Jehovah ada anam se enye oyomde ndinam.

2-3. Nte Jehovah adade esop esie usụn̄ mfịn anam idiọn̄ọ nso n̄kpọ ita iban̄a enye?

² Ama ese nte Jehovah adade esop esie usụn̄ mfịn, oyokụt utọ Abasi emi enye edide, se enye oyomde ndinam, ye nte enye oyomde idu uwem. Nte Jehovah adade esop esie usụn̄ anam idiọn̄ọ n̄kpọ ita iban̄a enye. Ẹyak ise n̄kpọ ita oro.

³ Akpa, Jehovah “Abasi inamke asari.” (Utom 10:34) Ima akanam Jehovah ọnọ Eyen esie edikpa ‘afak kpukpru owo.’ (1 Tim. 2:6; John 3:16) Jehovah oyom ẹnyan̄a kpukpru owo emi ẹbuọtde idem ke ufak. Oro anam enye anam ikọt esie ẹkwọrọ eti mbụk ẹnọ kpukpru owo emi ẹmade ndikop. Ọyọhọ iba, Jehovah edi Abasi emi esinamde n̄kpọ ke nde ke nde, onyụn̄ edi Abasi emem. (1 Cor. 14:33, 40) Imosụk ise nte ikọt esie ẹsinamde n̄kpọ ke nde ke nde ẹnyụn̄ ẹtie emem emem. Ọyọhọ ita, Jehovah edi Akakan Andikpep. (Isa. 30:20, 21) Oro anam esop esie ẹsịn idem ẹkpep mme owo Ikọ esie ke mbono esop ye ke ukwọrọikọ. Didie ke ẹkekụt n̄kpọ ita emi idiọn̄ọde iban̄a Jehovah mi ke esop esie ke eyo mme apostle? Didie ke ikụt mmọ ke esop esie mfịn? Didie ke edisana spirit ekeme ndin̄wam fi nte osụk odude ke esop Jehovah anam n̄kpọ esie?

4. Utom 1:8 ọdọhọ ke nso ke Jesus ọkọdọhọ mme mbet esie ẹnam? Nso idin̄wam mmọ ẹnam oro?

⁴ Ke eyo mme apostle. Etop emi Jesus ọkọkwọrọde ama ọnọ ofụri ubonowo idotenyịn. (Luke 4:43) Enye ama ọdọhọ mme mbet esie ẹka iso ẹkwọrọ eti mbụk emi “tutu esịm ata utịt ikpehe isọn̄.” (Kot Utom 1:8.) Edi mmọ idikemeke ndinam utom emi ke odudu idemmọ. Se idin̄wamde mmọ edi edisana spirit emi Jesus ọkọn̄wọn̄ọde.—John 14:26; Zech. 4:6.

5-6. Tịn̄ nsio nsio usụn̄ emi edisana spirit akan̄wamde mme mbet Jesus.

⁵ Mme mbet Jesus ẹma ẹbọ edisana spirit ke Pentecost isua 33 eyo mme apostle. Edisana spirit oro ama an̄wam mmọ ẹdaha wap ẹtọn̄ọ ukwọrọikọ, ndien ke ekpri ini, ediwak tọsịn owo ẹma ẹkabade ẹdi mme mbet Jesus. (Utom 2:41; 4:4) Ini ẹketọn̄ọde ndikọbọ mmọ, mmọ ikenyekke idem itre ukwọrọikọ, edi ẹma ẹdọhọ Jehovah an̄wam mmimọ. Mmọ ẹma ẹbọn̄ akam ẹte: “Nọ ifịn fo ukeme ndika iso ntịn̄ ikọ fo uko uko.” Jehovah ama ọnọ mmọ edisana spirit, mmọ ẹma ẹnyụn̄ ẹka iso “ẹtịn̄ ikọ Abasi uko uko.”—Utom 4:18-20, 29, 31.

⁶ Idịghe ukọbọ kpọt ekedi mfịna emi mme mbet Jesus ẹkenyenede. Mfịna en̄wen edi ke mmọ ikenyeneke N̄wed Abasi ekem owo ubọk, ikonyụn̄ inyeneke mme n̄wed emi ẹn̄wamde mmọ ẹkpep Ikọ Abasi nte emi inyenede mfịn. Okonyụn̄ ana mmọ ẹkwọrọ ikọ ẹnọ mme owo emi ẹkesemde nsio nsio usem. Kpa ye kpukpru oro, mme mbet Jesus ẹma ẹnam se iketiede nte mmọ idikemeke-keme ndinam; mmọ ẹma ẹsịn ifịk ẹkwọrọ ikọ ẹnọ “kpukpru edibotn̄kpọ ke idak ikpaenyọn̄” ke ufan̄ isua 30 kpọt.—Col. 1:6, 23.

7. Ke se ibede isua 100 ko ke edem, ikọt Jehovah ẹkesan̄a didie ẹdiọn̄ọ se Jehovah okoyomde mmọ ẹnam? Nso ke mmọ ẹkenam ini mmọ ẹkediọn̄ọde?

⁷ Ke eyo nnyịn. Jehovah ke aka iso ada ikọt esie usụn̄ mfịn onyụn̄ an̄wam mmọ. Ikọ esie emi ẹkedade edisana spirit ẹwet ke enye enen̄ede ada anam mmọ ẹdiọn̄ọ se ẹkpenamde. Ikọ esie oro ke ikụt mbụk utom ukwọrọikọ Jesus, ye nte enye ọkọdọhọde mme mbet esie ẹka iso ẹnam utom emi enye ọkọtọn̄ọde. (Matt. 28:19, 20) Ko ke 1881, Enyọn̄-Ukpeme July isua oro ama ọdọhọ ete: “Jehovah ikemekke nnyịn m̀mê ndiyet nnyịn aran man mme owo ẹkpokpono nnyịn m̀mê man ididi imọ owo, edi okoyom nnyịn ida kpukpru se inyenede ikwọrọ eti mbụk.” N̄wed emi ẹkekotde To Whom the Work Is Entrusted, emi ẹkesiode ke 1919, ọkọdọhọ ete: “Utom emi okpon etieti, edi edi utom Ọbọn̄, ntre enye ọyọnọ nnyịn odudu ida inam enye.” Ukem nte mme mbet Jesus ke eyo mme apostle ẹkesịnde idem ẹkwọrọ ikọ, nditọete emi ẹma ẹsịn idem ẹkwọrọ ikọ ẹnyụn̄ ẹnịm ke edisana spirit ayan̄wam mmimọ ikwọrọ ikọ inọ kpukpru orụk owo. Se nnyịn inyụn̄ inịmde mfịn edi oro.

8-9. Tịn̄ nsio nsio usụn̄ emi esop Jehovah ẹdade ẹnam mme owo ẹkop eti mbụk.

⁸ Esop Jehovah ẹsida mfọnn̄kan n̄kpọ ẹkwọrọ eti mbụk kpukpru ini. Mme n̄kpọ emi ẹsịne mme n̄wed, “Photo-Drama of Creation,” n̄kpọ ubre usanikwọ, ubomisọn̄ usuanetop, radio, ndien ke ndondo emi, mmọ ẹda kọmputa ye Intanet ẹkwọrọ ikọ. Esop Jehovah ẹnyụn̄ ẹkabade mme n̄kpọ Ikọ Abasi ke nsio nsio usem. Akananam owo ikabakede n̄kpọ Ikọ Abasi ke ediwak usem ntem! Mmọ ẹnam emi man kpukpru orụk owo ẹkop eti mbụk ke usem emana mmọ. Jehovah inamke asari. Enye ama etetịn̄ ke ẹyekwọrọ eti mbụk ẹnọ mme owo ke “kpukpru mme idụt ye esien ye usem ye obio.” (Edi. 14:6, 7) Enye oyom kpukpru owo ẹkop eti mbụk Obio Ubọn̄ esie.

⁹ Edi esisọn̄ ndikwọrọ ikọ nnọ ndusụk  owo sia mbon emi ẹkpemede ufọk mmọ isiyakke ikụt mmọ, ndien ndusụk ufọk ọkọkọn̄ akak, owo iberekede usụn̄. Oro akanam esop Jehovah ẹtọn̄ọ nsio nsio usụn̄ ukwọrọikọ ke ebiet emi mme owo ẹsiwakde m̀mê oyoto do utọ mme owo emi ẹkop eti mbụk. Ke 2001, Otu Emi Ẹsede Ẹban̄a Utom Nnyịn ẹma ẹnyịme yak nditọete ke France ẹsidọn̄ n̄wed ke ukpatn̄kpọ ye ke mme n̄kpọ ntre ẹkwọrọ ikọ ke ebiet emi mme owo ẹsiwakde. Nte ini akakade, nditọete ke mme idụt en̄wen ẹma ẹtiene ẹnam ntre. Oro ama anam ediwak owo ẹkop eti mbụk. Ke 2011, ẹma ẹtọn̄ọ obufa usụn̄ ukwọrọikọ ke kiet ke otu itie emi mme owo ẹsiwakde ẹkan ke New York City ke United States. Ke akpa isua oro, ẹma ẹnọ mme owo n̄wed 102,129, ẹnọ Enyọn̄-Ukpeme ye Ẹdemede! 68,911. Owo 4,701 ẹma ẹnyụn̄ ẹdọhọ ẹdikpep mmimọ Bible! Anie akpafan̄a ke idịghe edisana spirit akan̄wam ẹnam utom emi? Ntre Otu Emi Ẹsede Ẹban̄a Utom Nnyịn ẹma ẹdọhọ yak nditọete ke ofụri ererimbot ẹsidọn̄ n̄wed ke ukpatn̄kpọ ẹkwọrọ ikọ ke ebiet emi mme owo ẹsiwakde.

10. Nso idin̄wam nnyịn inen̄ede idiọn̄ọ ndikwọrọ ikọ nnyụn̄ n̄kpep mme owo n̄kpọ?

¹⁰ Se akpanamde. Ke mbono esop ke Jehovah esikpep nnyịn ndikwọrọ ikọ ọfọn. Sida se ekpepde do kwọrọ ikọ. Siwak ndisan̄a ye nditọete ke otu an̄wautom mbufo n̄kwọrọ ikọ. Mmọ ẹkeme ndin̄wam fi ọdiọn̄ọ ndikwọrọ ikọ nnyụn̄ n̄kpep owo n̄kpọ ọfọn. Nti uwụtn̄kpọ mmọ ẹkeme ndisọn̄ọ fi idem n̄ko. Ka iso kwọrọ ikọ inamke n̄kpọ m̀mê nso itịbe. Itie N̄wed Abasi emi ẹdade ibuotikọ emi ẹto eti nnyịn ke nnyịn idaha odudu idem nnyịn inam n̄kpọ Abasi, ke edisana spirit an̄wam nnyịn inam. (Zech. 4:6) N̄kọ utom emi idịghe utom nnyịn, utom Abasi ke edi.

11. Didie ke nditọete emi ẹkesede ẹban̄a utom Abasi ke eyo mme apostle ẹkediana kiet ẹnam n̄kpọ man emem odu ke esop Abasi?

¹¹ Ke eyo mme apostle. Nditọete emi ẹkesede ẹban̄a utom Abasi ke eyo mme apostle ẹkedu ke Jerusalem. Mmọ ẹma ẹdiana kiet ẹnam n̄kpọ man n̄kpọ asan̄a ke nde ke nde, emem onyụn̄ odu ke otu ikọt Abasi. (Utom  2:42) Ke n̄kpọ nte isua 49 eyo mme apostle, ndusụk nditọete ẹma ẹdọhọ ke akpana mme Christian ẹna mbobi, ndusụk ẹdọhọ ke ikpanaha ẹna. Edisana spirit ama an̄wam otu emi ẹkesede ẹban̄a utom Abasi ini oro ẹse ẹban̄a n̄kpọ oro. Ekpedi ẹma ẹyak yak edi enye emi ọkọn̄ ada ke esie, enye oko ọkọn̄ ada ke esie, ọkpọkọsọn̄ ndikwọrọ ikọ. Kpa ye emi mme apostle ye mbiowo oro ẹkedide mme Jew, mmọ ikebiereke n̄kpọ oro itiene usụn̄ unam n̄kpọ mme Jew, ikonyụn̄ itieneke mbon emi ẹkekọn̄de ẹyịre ẹte ẹtiene usụn̄ unam n̄kpọ mme Jew. Mmọ ẹma ẹdụn̄ọde ẹse se N̄wed Abasi etịn̄de ẹnyụn̄ ẹben̄e Abasi edisana spirit an̄wam mmọ. (Utom 15:1, 2, 5-20, 28) Nso ikedi ufọn? Jehovah ama ọdiọn̄ se mmọ ẹkebierede oro, nditọete ẹma ẹdiana kiet emem onyụn̄ odu ke esop, mmọ ẹma ẹnyụn̄ ẹka iso ẹkwọrọ ikọ.—Utom 15:30, 31; 16:4, 5.

12. Nso iwụt ke n̄kpọ asan̄a ke nde ke nde ke esop Abasi mfịn, emem onyụn̄ odu?

¹² Ke eyo nnyịn. Esop Jehovah ẹn̄wam ikọt Abasi ẹka iso ẹnam n̄kpọ ke nde ke nde ẹnyụn̄ ẹdu ke emem. Ko ke 1895, ẹma ẹwet ibuotikọ emi, “Ẹnam N̄kpọ ke Ido Nte Eyede ye ke Nde ke Nde” ke Zion’s Watch Tower and Herald of Christ’s Presence eke November 15 isua oro. Ẹkeda ibuotikọ oro ẹto 1 Corinth 14:40. Ibuotikọ oro ọkọdọhọ ete: ‘Mme apostle ẹma ẹwet ediwak n̄kpọ ẹnọ ikọt Abasi ẹban̄a nte mmọ ẹkpenamde n̄kpọ ke nde ke nde. Enen̄ede ọfọn itịn̄ enyịn inam mme n̄kpọ oro ẹkewetde ke ini edem ndida nteme nnyịn.’ (Rome 15:4) Esop Jehovah ẹsịn idem ẹnam n̄kpọ man n̄kpọ asan̄a ke nde ke nde ke esop Abasi, emem onyụn̄ odu nte ekedide ke eyo mme apostle. Ke uwụtn̄kpọ, okpodụk Ukpepn̄kpọ Enyọn̄-Ukpeme ke esop en̄wen, ekpededi ke idụt en̄wen, ọyọdiọn̄ọ nte ẹdikpepde ukpepn̄kpọ oro onyụn̄ ọdiọn̄ọ ibuotikọ emi ẹdikpepde. N̄kpọ iditiehe fi esen esen! Nso en̄wen ikpanam idiana kiet ntem mîkpedịghe spirit Abasi?—Zeph. 3:9.

13. Nso ke James 3:17 akpanam ibụp idem nnyịn?

¹³ Se akpanamde. Jehovah oyom ikọt esie ẹka iso ẹdiana kiet, ẹnyụn̄ ẹdu ke emem. (Eph. 4:1-3) Bụp idemfo: ‘Ndi nte nsitịn̄de ikọ nnyụn̄ nnamde n̄kpọ esinam nditọete ẹdiana kiet, emem onyụn̄ odu ke esop? Ndi  mmesinam se mbon emi ẹdade usụn̄ ke esop ẹdọhọde ẹnam? Ndi mbon en̄wen ẹdiọn̄ọ mi nte owo emi mîsitọhọ owo edem ke isọn̄, akpan akpan ekpedi mmenyene ifetutom? Ndi mmesika n̄kpọ ke ini, nnyụn̄ mbiatke ini ndinam se ẹdọhọde mi nnam? Ndi esinyụn̄ ọdọn̄ mi ndin̄wam mbon efen?’ (Kot James 3:17.) Okpokụt ebiet emi mûnamke ọfọn, dọhọ Jehovah ọnọ fi spirit esie an̄wam fi. Ama ayak edisana spirit ada fi usụn̄ onyụn̄ anam fi enen̄ede okpụhọde, nditọete ẹyenen̄ede ẹma fi, oyonyụn̄ enem mmọ ndidu ye afo.

14. (Colossae 1:9, 10) Didie ke Jehovah akan̄wam ikọt esie ke eyo mme apostle ẹnyene “nnennen ifiọk uduak” esie?

¹⁴ Ke eyo mme apostle. Esinenem Jehovah ndikpep ikọt esie n̄kpọ. (Ps. 32:8) Enye oyom mmọ ẹdiọn̄ọ imọ, ẹma imọ, ẹnyụn̄ ẹdi ndima nditọ imọ ke nsinsi nsinsi. Kpukpru emi ikpetịbeke ekpedi Jehovah ikpepke nnyịn n̄kpọ. (John 17:3) Jehovah akada esop esie ekpep ikọt esie n̄kpọ ke eyo mme apostle. (Kot Colossae 1:9, 10.) Edisana spirit ama onyụn̄ enen̄ede an̄wam mmọ nte Jesus ọkọn̄wọn̄ọde. (John 14:16) Edisana spirit ama anam Ikọ Abasi enen̄ede an̄wan̄a mmọ onyụn̄ anam mmọ ẹti ediwak n̄kpọ emi Jesus eketịn̄de onyụn̄ anamde, emi ẹkediwetde ke mme Gospel. Se mmọ ẹkediọn̄ọde oro anam mmọ ẹnen̄ede ẹbuọt idem ye Jehovah, ẹdọdiọn̄ ẹma enye, ẹma Eyen esie, ẹnyụn̄ ẹma idemmọ.

15. Tịn̄ nsio nsio n̄kpọ emi ẹnamde afo okụt ke Isaiah 2:2, 3 osu.

¹⁵ Ke eyo nnyịn. Jehovah ama etetịn̄ ke ama esịm ata utịt utịt “mme akpatre usen,” ke mme owo ke kpukpru idụt ẹyebụn̄ọ ẹka obot ufọk imọ, oro edi, ke ẹyedidiana ye mbon emi ẹtuakde ibuot ẹnọ imọ, man imọ ikpep mmọ usụn̄ imọ. (Kot Isaiah 2:2, 3.) Imokụt ke prọfesi emi ke osu. Idụhe nsunsu ido ukpono ndomokiet emi ekperede-kpere  nditie nte ido ukpono akpanikọ. Jehovah ke onyụn̄ anam nnyịn inen̄ede idiọn̄ọ Bible! (Isa. 25:6) “Ofụn emi anamde akpanikọ onyụn̄ enyenede ọniọn̄” ke enye ada ekpep nnyịn kpukpru emi. Ndien ofụn emi ada mme n̄wed, mme utịn̄ikọ, ye mme vidio anam emi. (Matt. 24:45) Onyụn̄ etie nnyịn ke idem nte eketiede Elihu ufan Job emi ọkọdọhọde ete: “Ewe anditeme ebiet [Abasi]?”—Job 36:22.

16. Nso ke akpanam man se Jehovah ekpepde nnyịn enyene ufọn ọnọ fi?

¹⁶ Se akpanamde. Spirit Abasi ayan̄wam fi ananam se afo okotde onyụn̄ ekpepde ke Bible. Bọn̄ utọ akam emi andiwet psalm kiet ọkọbọn̄de ete: “Teme mi usụn̄ fo, O Jehovah. Ami nyasan̄a ke akpanikọ fo. Nam ofụri esịt mi abak enyịn̄ fo.” (Ps. 86:11) N̄kpọ en̄wen edi ndika iso n̄kot nnyụn̄ n̄kpep Bible ye mme n̄wed eken emi esop Abasi ẹsion̄ode. Unamke kpukpru oro man ọdiọn̄ọ n̄kpọ kpọt, edi anam man Ikọ Abasi enen̄ede odụk fi esịt, onyụn̄ ananam se ekpepde oro. Spirit Jehovah ekeme ndin̄wam fi. Ọfọn ọsọn̄ọ nditọete fo idem n̄ko. (Heb. 10:24, 25) Ntak ọfọnde ọsọn̄ọ mmọ idem edi ke kpukpru mbufo ẹsịne ke ubon kiet. Ben̄e Abasi spirit esie yak an̄wam fi man mbụme emi afo esibọrọde ke mbono esop oto fi esịt, onyụn̄ an̄wam fi anam ofụri ukeme fo ẹma ẹnọ fi n̄kpọ anam ke mbono esop. Mme n̄kpọ emi ke edida owụt Jehovah ye Eyen esie ke imama ọsọn̄urua “erọn̄” mmọ.—John 21:15-17.

17. Nso ye nso ke akpanam owụt ke ada ye esop Jehovah?

¹⁷ Ekpri ini ayak, n̄kukụre otu emi edidude ke isọn̄ edidi esop emi spirit Abasi adade usụn̄. Ntre sịn idem nam se esop Jehovah ẹdọhọde. Kwọrọ ikọ nọ kpukpru owo emi osobode man owụt ke unamke asari ukem nte Jehovah. Nam mme n̄kpọ emi ẹdinamde nditọete ẹdiana kiet man owụt ke amama emem, onyụn̄ ama n̄kpọ asan̄a ke nde ke nde ukem nte Jehovah. Da kpukpru se Akakan Andikpep nnyịn ọnọde nnyịn ida ikpep n̄kpọ kpep n̄kpọ man akpan̄ utọn̄ ọnọ enye. Ama anam kpukpru emi, idem idinyekke fi nte ererimbot Satan emi ekperede utịt esie. Edi eyenyene uko ada ye mbon emi ẹsọn̄ọde ẹda ye esop Jehovah.