1. Ebɛnadze na ɔsɛ dɛ Christianfo a wɔabɔ esu no kɔ do yɛ?

ANA abɔ esu? Sɛ abɔ esu a, ada no edzi wɔ bagua mu dɛ ewɔ Jehovah no mu gyedzi na ewɔ ɔpɛ dɛ enye n’ahyehyɛdze * no bɔbɔ mu asom. Naaso, ɔsɛ dɛ gyedzi a ewɔ wɔ Jehovah mu no kɔ do yɛ kɛse. Nkyii so, ɔsɛ dɛ ekɔ do nya ahotodo dɛ Jehovah dze n’ahyehyɛdze no ridzi dwuma ndɛ.

2-3. Ebɛn kwan do na Jehovah rekyerɛ n’ahyehyɛdze no kwan ndɛ? Ma nhwɛdo ahorow a ɔkyerɛ dɛm.

² Ndɛ, Jehovah rekyerɛ n’ahyehyɛdze no kwan wɔ kwan bi do a ɔda no su, ne tsirmpɔw nye ne gyinapɛn ahorow edzi. Hom mma yɛnhwɛ Jehovah no su ebiasa bi a ɔda no edzi wɔ n’ahyehyɛdze no mu.

³ Odzi kan, “Nyankopɔn nnhwɛ nyimpa enyim.” (Andw. 10:34) Ɔdɔ na okenyaan Jehovah ma ɔdze ne Ba no maa dɛ “asatsir [werdam] maa nyimpa nyina.” (1 Tim. 2:6; John 3:16) Jehovah ama no nkorɔfo rekã asɛmpa no akyerɛ nyimpa a wɔwɔ ɔpɛ dɛ wobetsie no nyinara. Ɔnam dɛm kwan yi do roboa nyimpa pii ama woeenya werdam no do mfaso. Otsĩa ebien, Jehovah nnyɛ sakasaka Nyankopɔn, na mbom ɔyɛ asomdwee dze. (1 Cor. 14:33, 40) Dɛm ntsi, ɔwɔ dɛ yɛhwɛ kwan dɛ Jehovah n’asomfo dze nhyehyɛɛ a odzi mũ nye asomdwee bɔsom no dɛ kuw. Otsĩa ebiasa, Jehovah nye Ɔkyerɛkyerɛfo Kunyin no. (Isa. 30:20, 21) Iyi ntsi, Jehovah n’ahyehyɛdze no bɔ mbɔdzen dɛ ɔdze n’Asɛm a ofi no sunsum mu no bɛkyerɛkyerɛ wɔ asafo no mu nye asɛnka mu. Ebɛn kwan do na Jehovah no su ebiasa yi daa edzi wɔ tsetse Christianfo asafo no mu? Ebɛn kwan do na ɔda edzi wɔ hɛn aber yi do? Ber a enye Jehovah n’ahyehyɛdze no abɔ mu rosom no, ebɛn kwan do na sunsum krɔnkrɔn botum aboa wo?

4. Dɛ mbrɛ wɔakã wɔ Asomafo Ndwuma 1:8 no, ebɛnadze na Jesus hyɛɛ n’ekyirdzifo no dɛ wɔnyɛ, nna ebɛn mboa na hɔn nsa bɛka?

⁴ Tsetse Christianfo hɔn aber do. Jesus ne nsɛm a ɔkãe no maa adasamba nyina nyaa enyidado. (Luke 4:43) Ɔhyɛɛ n’ekyirdzifo no dɛ wɔntoa edwuma a nna ɔahyɛ ase no do na wondzi dase ‘nkodu asaase ano noho.’ (Kenkan Asomafo Ndwuma 1:8.) Naaso, nna worunntum mmfa hɔnankasa hɔn ahoɔdzen nnyɛ dɛm edwuma yi. Nna wobehia sunsum krɔnkrɔn​—“okyigyinafo no” a Jesus dze bɔɔ hɔn anohoba no.​—John 14:26; Zech. 4:6.

5-6. Ebɛn akwan do na sunsum krɔnkrɔn boaa Jesus n’ekyirdzifo no?

⁵ Pentecost afe 33 H.B. no, Jesus n’ekyirdzifo no nyaa sunsum krɔnkrɔn no. Sunsum krɔnkrɔn no boaa hɔn ma wɔhyɛɛ ase kãa asɛmpa no, na wɔ ber tsiabaa bi mu no, nyimpa mpempem pii gyee asɛmpa no. (Andw. 2:41; 4:4) Aber a esuafo no hyiaa ɔsoɛrtsia no wɔammbɔ hũ, mbom wɔhwehwɛɛ Nyankopɔn hɔ mboa. Wɔbɔɔ mpaa kãa dɛ: “Ma wo nkowaa mfa ndam nyina nkã w’asɛm.” Ɔno ekyir no, sunsum krɔnkrɔn no hyɛɛ hɔn mã na wɔkɔr do dze “ndam kãa Nyankopɔn asɛm” no.​—Andw. 4:18-20, 29, 31.

⁶ Jesus n’esuafo no sanee hyiaa nsɛndzendzen afofor. Dɛ nhwɛdo no, dɛm aber no nna Kyerɛwnsɛm a ɔwɔ hɔ no dodow suar. Nna wonnyi nwoma ahorow a wɔdze sũa Bible no dɛ mbrɛ ndɛ yɛwɔ no. Afei so, nna ɔsɛ dɛ esuafo no kã asɛmpa no kyerɛ nyimpa ahorow a ɔsor hɔn kasaa. Ɔmmfa ho dɛm nsɛndzendzen yi nyina no, dɛm esuafo yi dze nsi yɛɛ dza nna ɔtse dɛ wonnkotum ayɛ no. Wɔdze bɛyɛ mfe 30 kãa asɛmpa no kyerɛɛ “abɔdze nyina.”​—Col. 1:6, 23.

7. Bɔbor mfe 100 a etwa mu no, Jehovah n’asomfo yɛɛ dɛn hun dza ɔhwehwɛ fi hɔn hɔ, na ebɛnadze na wɔyɛe?

⁷ Hɛn aber yi do. Jehovah kɔ do ara kyerɛ no nkorɔfo kwan na ɔhyɛ hɔn dzen. Mpɛn pii no ɔnam Bible a wɔnam no sunsum do kyerɛwee no do na ɔkyerɛ hɛn kwan. Bible no ma yehu Jesus no som edwuma nye ahyɛdze a ɔdze maa dɛ n’ekyirdzifo ntoa edwuma a ɔhyɛɛ ase no do no. (Matt. 28:19, 20) Wɔ July afe 1881 mu tɔnn na Ɔweɔn-Aban no kãa dɛ: “Jehovah ammpaw hɛn anaa ɔannsera hɛn dɛ nyimpa nhyɛ hɛn enyimnyam anaa dɛ yɛnyɛ ahonyafo, mbom dɛ yɛmfa dza yɛwɔ biara mboa nkã asɛmpa no.” Nwomaba bi a wɔato dzin To Whom the Work Is Entrusted a wotsintsimii wɔ afe 1919 no kãa dɛ: “Ɔtse dɛ mbrɛ edwuma no sõ dze, naaso ɔyɛ Ewuradze n’edwuma, ntsi ɔbɛma hɛn ahoɔdzen ma yɛdze ayɛ.” Dɛ mbrɛ tsetse Christianfo no yɛe no, dɛm enuanom yi so daa akokodur edzi na wɔyɛɛ edwumadzen osiandɛ nna wɔwɔ awerɛhyɛmu dɛ sunsum krɔnkrɔn no bɔboa hɔn ma wɔaakã asɛm no akyerɛ nyimpa nyina. Ndɛ so, yɛwɔ awerɛhyɛmu a ɔtse dɛmara dɛ sunsum krɔnkrɔn bɔboa hɛn.

8-9. Ebɛn akwan ahorow na Jehovah n’ahyehyɛdze no afa do atserɛw asɛnka edwuma no mu?

⁸ Jehovah n’ahyehyɛdze no dze edwindadze ahorow a mfaso wɔ do edzi dwuma dze atserɛw asɛmpa no mu. Dɛm edwindadze ahorow no mu bi nye: Hɛn nwoma a wotsintsim, “Photo-Drama of Creation,” gramafon, kaar a akasamu sisi do, radio do dwumadzi, nye kɔmpiwta na intanɛt a ndaansa yi yɛdze dzi dwuma no. Afei so, Nyankopɔn n’ahyehyɛdze no robɔ mbɔdzen dɛ ɔbɛkyerɛ no nwoma ahorow no ase akɔ kasa pii mu. Iyi bi nnsii da wɔ nyimpa abakɔsɛm mu! Ebɛnadze ntsi a? Osiandɛ ahyehyɛdze no pɛ dɛ nyimpa ahorow nyina tse asɛmpa no wɔ hɔnankasa hɔn kasaa mu. Jehovah nnhwɛ nyimpa enyim, dɛm ntsi ɔkãa dɛ wɔbɛkã asɛmpa no akyerɛ “aman nye mbusuakuw nye kasa nye nkorɔfo.” (Nyi. 14:6, 7) Ɔpɛ dɛ Ahendzi asɛm no du nyimpa nyina nkyɛn.

⁹ Nyimpa binom wɔ hɔ a osian beebi a wɔtse ntsi ɔyɛ dzen dɛ yɛdze asɛmpa no bodu hɔn nkyɛn. Bi a wɔtse beebi a bambɔ mu yɛ dzen papaapa. Yɛbɛyɛ dɛn dze asɛmpa no edu hɔn nkyɛn? Mbrɛ ɔbɛyɛ a yɛdze asɛmpa no bodu nyimpa a wɔtse dɛm no mu piinara nkyɛn  no, Jehovah n’ahyehyɛdze no susuu akwan ahorow a yebotum afa do ayɛ bagua mu adasedzi ho. Dɛ nhwɛdo no, wɔ afe 2001 no, Akwankyerɛ Kuw no peen do dɛ wɔmfa trɔk nye apon a wɔhyehyɛ nwoma wɔ do ndzi dwuma wɔ France. Ɔno ekyir no, wɔsɔɔ iyi hwɛe wɔ mbea ahorow so. Ndzɛmba pa pii fii mu bae. Afe 2011 no wɔsɔɔ bagua mu adasedzi fofor bi hwɛe wɔ United States kurow bi do; ɔyɛ New York City nkurow a adagyer nnyi mu no mu kor. Afe a odzi kan mu no, wɔmaa nwoma 102,129 nye magazine 68,911. Afei nyimpa 4,701 kãa dɛ wɔnye hɔn mbosũa Bible no! Ɔda edzi kofee dɛ nna sunsum krɔnkrɔn taa edwuma a ɔtse dɛm ekyir. Iyi ntsi, Akwankyerɛ Kuw no peen do dɛ wɔmfa trɔk nye apon a wɔhyehyɛ nwoma wɔ do no nyɛ asɛnka edwuma no wɔ wiadze nyinara.

10. Ebɛnadze na yebotum ayɛ ama yeetu mpon wɔ asɛnka edwuma no mu?

¹⁰ Dza ibotum ayɛ. Mbrɛ ɔbɛyɛ a yebotum akã asɛm no, Jehovah ma hɛn ntsetsee wɔ Christianfo nhyiamu ase. Fa dza isũa wɔ nhyiamu a ɔtse dɛm ase no yɛ edwuma. Dabaa enye w’asɛnka kuw mufo mbɔ mu nkɔ asɛnka. Sɛ eyɛ dɛm a, enuanom mbarimba na mbaa a wɔwɔ asɛnka kuw no mu no botum aboa wo ma eetu mpon wɔ wo nkyerɛkyerɛ nye asɛnka edwuma no mu. Nkyii so hɔn nhwɛdo pa no botum ahyɛ wo nkuran. Ɔmmfa ho nsɛndzendzen biara a ibehyia no, kɔ do yɛ asɛnka edwuma no. Dɛ mbrɛ kyerɛwsɛm a adzesua yi gyina do kyerɛ no, yebotum ewie dza Jehovah pɛ dɛ yɛyɛ no, naaso yerunntum mmfa hɛnankasa hɛn ahoɔdzen nnyɛ gyedɛ sunsum krɔnkrɔn boa hɛn. (Zech. 4:6) Adze yi, yɛreyɛ Nyankopɔn n’edwuma.

11. Mbrɛ ɔbɛyɛ a asomdwee bɛtsena Nyankopɔn no nkorɔfo mu no, ebɛn kwan do na akwankyerɛ kuw a nna ɔwɔ tsetse Christianfo no hɔn aber do no dze koryɛ bɔɔ mu yɛɛ edwuma?

¹¹ Tsetse Christianfo hɔn aber do. Akwankyerɛ kuw a nna ɔwɔ Jerusalem no dze koryɛ bɔɔ mu yɛɛ edwuma ama asomdwee aatsena Nyankopɔn no nkorɔfo mu, na biribiara aakɔ do kamakama. (Andw. 2:42) Dɛ nhwɛdo no, ber a twatsiatwa ho asɛm soɛree wɔ afe 49 H.B. no, sunsum krɔnkrɔn boaa akwankyerɛ kuw no ma wosusuu asɛm no ho. Sɛ mpaapaamu a dɛm asɛm yi dze baa asafo no mu no kɔr do a, nkyɛ wonnkotum  ayɛ asɛnka edwuma no. Ɔwɔ mu dɛ nna asomafo no nye mpanyimfo no yɛ Jewfo dze, naaso wɔamma Jewfo hɔn amambra anaa hɔn a nna wɔagye twatsiatwa nkyerɛkyerɛ no egyina mu no ennya hɔn do nkantando. Mbom no wɔyɛɛ Nyankopɔn n’Asɛm no mu nhwehwɛmu na wɔserɛɛ sunsum krɔnkrɔn no mboa ama woeetum esi gyinae pa wɔ asɛm no ho. (Andw. 15:1, 2, 5-20, 28) Ebɛnadze na ofii iyi mu bae? Jehovah hyiraa gyinae a wosii no do na asomdwee nye koryɛ baa asafo no mu, afei wɔkɔr do kãa asɛm no.​—Andw. 15:30, 31; 16:4, 5.

12. Ebɛnadze na ɔma yehu dɛ ndɛ asomdwee wɔ Jehovah n’ahyehyɛdze no mu na biribiara kɔ do kamakama?

¹² Hɛn aber yi do. Jehovah n’ahyehyɛdze no abɔ mbɔdzen dɛ ɔbɛma asomdwee atsena Jehovah no nkorɔfo mu na biribiara aakɔ do kamakama. Afe 1895 mu tɔnn na Zion’s Watch Tower and Herald of Christ’s Presence a ɔbaa November 15 no kãa asɛm yi wɔ adzesua asɛm bi mu. Nna adzesua asɛm no asɛntsir nye dɛ, “Wɔnyɛ Adze Nyina Fɛfɛɛfɛw Esiado Esiado.” Nna kyerɛwsɛm a adzesua no gyina do nye 1 Corinthfo 14:40. Adzesua asɛm no kãa dɛ: “Asomafo no kyerɛɛw dza nna ɔbɛma biribiara akɔ do kamakama ho nsɛm pii kɛmaa tsetse Christianfo no . . . ‘Biribiara a wɔkyerɛɛw no nkan no, wɔkyerɛwee maa hɛn nkyerɛkyerɛ,’ ntsi ohia dɛ yedzi ekyir pɛpɛɛpɛr.” (Rom. 15:4) Nokwasɛm nye dɛ, ndɛ so, Jehovah n’ahyehyɛdze no robɔ mbɔdzen dɛ ɔbɛma asomdwee atsena Christianfo asafo no mu na biribiara aakɔ do kamakama dɛ mbrɛ nna ɔtse wɔ tsetse Christianfo hɔn aber do no. Hom mma yɛnyɛ mfatoho yi: Fa no dɛ akɔ asafo fofor bi mu anaa mpo dɛ etu kwan akɔ ɔman fofor mu na akɔ Ɔweɔn-Aban Adzesua ase. Adzesua asɛm a wobosusu ho nye mbrɛ wobesi ayɛ adzesua no, inyim ne nyinara. Hɔ no ara ebɛtse nka dɛ ewɔ fie! Sɛ nnyɛ Nyankopɔn no sunsum no na ɔama yeenya koryɛ a ɔsom bo dɛm yi a, nkyɛ ebɛnadze bio a?​—Zeph. 3:9.

13. Ber a James 3:17 wɔ hɛn adwen mu no, ebɛn nsɛm na ɔwɔ dɛ yebisa hɛnho?

¹³ Dza ibotum ayɛ. Jehovah pɛ dɛ no nkorɔfo kura “sunsum koryɛ mu wɔ asomdwee homa mu.” (Eph. 4:1-3) Ntsi, bisa woho dɛ: ‘Aso mema asomdwee na koryɛ tsena asafo no mu? Ana meyɛ setsie ma hɔn a wodzi ndzɛmba enyim no? Ana afofor tum dze hɔnho to mo do, nkanka sɛ mowɔ asodzi ahorow wɔ asafo no mu a? Ana  midzi me mber do, moboa afofor na mowɔ ɔpɛ dɛ mobɔsom hɔn?’ (Kenkan James 3:17.) Sɛ ihu dɛ ɔsɛ dɛ ebɔ woho mbɔdzen a, bɔ mpaa serɛ Nyankopɔn no sunsum krɔnkrɔn ma ɔmboa wo. Mpɛn dodow a ema kwan ma sunsum krɔnkrɔn no nya wo nyimpasu nye wo ndzeyɛɛ do tum no, mpɛn dodow no ara na wo nuanom mbarimba na mbaa no bɛda ɔdɔ edzi akyerɛ wo na woeehu dɛ woho hia.

14. Dɛ mbrɛ Colossaefo 1:9, 10 kyerɛ no, ebɛn kwan do na Jehovah kyerɛkyerɛɛ no nkorɔfo wɔ tsetse Christianfo no hɔn aber do?

¹⁴ Tsetse Christianfo hɔn aber do. Jehovah n’enyi gye ho papaapa dɛ ɔbɛkyerɛkyerɛ no nkorɔfo. (Ndw. 32:8) Ɔpɛ dɛ no nkorɔfo hu no, wɔdɔ no, na wɔtsena ase daa dɛ ne mba a ɔdɔ hɔn. Sɛ ɔannkyerɛkyerɛ hɛn a, iyi nyina nnkotum ayɛ yie. (John 17:3) Jehovah nam tsetse Christianfo asafo no do kyerɛkyerɛɛ no nkorɔfo. (Kenkan Colossaefo 1:9, 10.) Sunsum krɔnkrɔn a ɔyɛ “okyigyinafo” a Jesus hyɛɛ ho bɔ no boaa papaapa wɔ iyi mu. (John 14:16) Sunsum krɔnkrɔn boaa esuafo no ma wɔtsee Nyankopɔn n’Asɛm no ase yie. Nkyii so, nsɛm pii a Jesus kãe nye dza ɔyɛe nyina sunsum krɔnkrɔn no boaa hɔn ma wɔkaakaae, dɛm nsɛm yi na ekyir yi wɔkyerɛwee wɔ Nsɛmpa Nwoma anan no mu no. Dɛm nyimdzee yi a tsetse Christianfo no nyae no hyɛɛ hɔn gyedzi dzen. Bio so, ɔmaa ɔdɔ a nna wɔwɔ ma Jehovah, ne Ba no nye hɔnho no yɛɛ kɛse.

15. Ebɛn akwan do na ehu dɛ Jehovah ridzi bɔ a ɔahyɛ wɔ Isaiah 2:2, 3 no do?

¹⁵ Hɛn aber yi do. Jehovah kãe too hɔ dɛ wɔ “nda a odzi ekyir no mu no,” nyimpa a wofi aman nyina mu bɛpem aba n’asɛnkyerɛdze kwan do bepɔw no ho na ɔaakyerɛkyerɛ hɔn n’akwan. (Kenkan Isaiah 2:2, 3.) Yehu dɛ dɛm nkɔnhyɛ no rinya ne mbamu. Wɔama nokwar som do koraa asen ator som nyina. Hwɛ sunsum afamu edziban ara a Jehovah ma hɛn nsa ka! (Isa. 25:6) Ɔnam “akowaa nokwafo nye nyansafo” no do ma hɛn edziban ma obu do. Edziban a ɔdze  ma hɛn no so gu ahorow, bi nye nsɛm a yɛkenkan, ɔkasa, sene a wɔdorɔw nye video ahorow. (Matt. 24:45) Dɛ mbrɛ Job ne nyɛnko Elihu tsee nka no, dɛmara na hɛn so yɛtse nka. Ɔkãa dɛm nokwasɛm yi: “Woana na ɔyɛ kyerɛkyerɛfo tse dɛ [Nyankopɔn]?”​—Job 36:22.

16. Ebɛnadze na ibotum ayɛ ama eenya nkyerɛkyerɛ a Jehovah dze ma no do mfaso?

¹⁶ Dza ibotum ayɛ. Nyankopɔn no sunsum no bɔboa wo ma edze dza isũa na ekenkan fi Nyankopɔn n’Asɛm mu no aayɛ edwuma wɔ w’asetsena mu. Bɔ mpaa a ɔdwontofo no bɔe no bi. Ɔbɔɔ mpaa dɛ: ‘Jehovah, kyerɛkyerɛ me wo kwan; mebɛnantsew wo nokwar no mu: Kã m’akoma bɔ mu ma onsuro wo dzin.’ (Ndw. 86:11) Ntsi kɔ do kenkan na sũa Bible no nye nwoma ahorow a Jehovah nam n’ahyehyɛdze no do dze ma hɛn no. Naaso, nnyɛ nyimdzee kɛkɛ a ibenya ntsi na ereyɛ biribi a ɔtse dɛm. Mbom no, epɛ dɛ eyɛ dɛm ama nokwar no aaka w’akoma na eetum dze edzi dwuma wɔ w’asetsena mu. Jehovah no sunsum botum aboa wo ma aayɛ dɛm. Bio so, ɔsɛ dɛ ehyɛ wo nuanom mbarimba na mbaa nkuran. (Heb. 10:24, 25) Ebɛnadze ntsi a? Osiandɛ wɔyɛ wo sunsum afamu ebusuafo. Bɔ mpaa serɛ Nyankopɔn no sunsum no dɛ ɔmboa wo ama eetum efi w’akoma mu ama mbuae wɔ Christianfo nhyiamu ase. Afei so, sɛ ewɔ dwumadzi wɔ nhyiamu a ɔtse dɛm ase a, serɛ Nyankopɔn no sunsum no dɛ ɔmboa wo ama eetum ayɛ wo dwumadzi no yie. Sɛ eyɛ dɛm a, ebɛma Jehovah na ne Ba no ehu dɛ edɔ hɔn “nguan” a wɔsom bo no.​—John 21:15-17.

17. Ebɛn akwan ahorow do na ibotum ada no edzi dɛ edze nokwardzi taa Jehovah n’ahyehyɛdze no ekyir?

¹⁷ Ɔnnkɛkyɛr, wobeyi ahyehyɛdze a ɔwɔ wiadze yi mu nyina efi hɔ ma wɔaaka ahyehyɛdze a Nyankopɔn no sunsum kyerɛ no kwan no nkotsee. Ntsi, yer woho na enye Jehovah n’ahyehyɛdze no nyɛ edwuma. Kyerɛ dɛ edɔ nyimpa nyina dɛ mbrɛ Nyankopɔn so dɔ hɔn no. Ibotum ayɛ dɛm dze nam kã a ebɛkã asɛmpa no akyerɛ obiara a ibehyia no no do. Jehovah pɛ asomdwee na ɔma biribiara kɔ do kamakama. Ntsi sũasua no dze nam koryɛ a ɔwɔ asafo no mu a ebɔbɔ ho ban no do. Afei so, yɛ aso ma wo Kyerɛkyerɛfo Kunyin no; nya sunsum afamu edziban a ɔdze ma hɛn no do mfaso. Sɛ eyɛ dɛm a, ber a Satan no wiadze no aba n’ewiei no, ennkɔbɔ hũ. Mbom no, enye nyimpa a wofi nokwardzi mu nye Jehovah n’ahyehyɛdze no som nyina bɔbɔ mu dze akokodur asoɛr egyina.