1. Na cava mera cakava tiko ga na lotu vaKarisito papitaiso?

O SA papitaiso? Ni o papitaiso, o vakaraitaka e matanalevu nomu vakabauti Jiova, o vinakata tale ga mo qaravi koya ena nona isoqosoqo. * E vinakati me vaqaqacotaki tiko ga na nomu vakabauta. E bibi tale ga mo vakadeitaka ni vakayagataka tiko o Jiova na nona isoqosoqo ena gauna qo.

2-3. Na sala cava e veidusimaki kina o Jiova ena nona isoqosoqo nikua? Tukuna eso na ivakaraitaki.

² Eda raica ena sala e dusimaka kina o Jiova na nona isoqosoqo nikua na nona itovo, inaki, kei na ivakatagedegede. Meda veivosakitaka mada e tolu na itovo i Jiova eda raica ena nona isoqosoqo.

³ Kena imatai, e “sega ni dau veivakaduiduitaki na Kalou.” (Caka. 10:34) Na levu ni loloma i Jiova, e solia kina na Luvena me “keda ivoli na . . .  tamata kece.” (1 Tim. 2:6; Joni 3:16) E lesi ira na nona tamata mera vunautaka na itukutuku vinaka vei ira kece na vakarorogo, me rawa ni yaga na ivoli vei ira e levu. Kena ikarua, o Jiova e sega ni Kalou ni yakusurasura, ia e Kalou ni vakacegu. (1 Kor. 14:33, 40) Meda namaka gona nira na tuvanaki vinaka na nona dauveiqaravi nira sokaloutaki koya ena duavata. Kena ikatolu, o Jiova na “Dauniveivakavulici Levu.” (Aisea 30:20, 21) Sa rauta me vakabibitaka na nona isoqosoqo na veivakavulici ena iVolatabu, ya ena ivavakoso kei na cakacaka vakavunau. Era vakatotomuria vakacava na ivavakoso vaKarisito ena imatai ni senitiuri na tolu na itovo i Jiova qori? Era vakaraitaka vakacava qori na nona tamata nikua? Ena vukei iko vakacava na yalo tabu ni o  qaravi Jiova tiko ena nona isoqosoqo ena gauna qo?

4. Me vaka e tukuni ena Cakacaka 1:8, na cava e vakarota o Jisu vei ratou na nona imuri? Cava ena vukei ratou?

⁴ Ena imatai ni senitiuri. Na itukutuku e vunautaka o Jisu e vakaceguya na kawatamata. (Luke 4:43) E vakaroti ira na nona imuri mera tomana na cakacaka a tekivuna, ya mera vunau ena “veivanua yawa sara kei vuravura.” (Wilika Cakacaka 1:8.) E macala ni ratou sega ni rawata qori ena nodratou kaukaua ga. Eratou na nuitaka na yalo tabu, “na dauveivuke” a yalataka vei ratou o Jisu.—Joni 14:26; Saka. 4:6.

5-6. E vukei ira vakacava na imuri i Jisu na yalo tabu?

⁵ E sobuti ira na imuri i Jisu na yalo tabu ena Penitiko 33 G.V. Ena veivuke ni yalo tabu qori era tekivu vunau sara. Ena gauna lekaleka ya era ciqoma kina e vica na udolu na itukutuku vinaka. (Caka. 2:41; 4:4) Nira saqati na tisaipeli, era sega ni rere mera vunau tiko ga nira vakanuinui vua na Kalou me vukei ira. Era masulaka: “Ni vakadoudoutaki keimami na nomuni dauveiqaravi me keimami tukuna na nomuni vosa.” E sobuti ira gona na yalo tabu ra qai ‘tukuna tiko ga na Vosa ni Kalou ena doudou.’—Caka. 4:18-20, 29, 31.

⁶ E levu tale na ka dredre era sotava na tisaipeli i Jisu. Kena ivakaraitaki, e vica ga na ilavelave ni iVolatabu e sa tiko ena gauna ya. E sega na ivukevuke ni vakekeli me vaka sa tu nikua. Era vunau tale ga vei ira e duidui na nodra vosa. Ia era cakava rawa na tisaipeli gugumatua qori na ka e nanumi ni dredre. Na cava ya? Ena loma ga ni vicasagavulu na yabaki, era vunautaka na itukutuku vinaka “vei ira na kabuli kece e ruku i lomalagi.”—Kolo. 1:6, 23.

7. Ena 100 vakacaca na yabaki sa oti, era kila vakacava na tamata i Jiova na ka e vinakata? Cava era cakava?

⁷ Ena noda gauna. E sega ni cegu nona dusimaki ira tiko ga na nona tamata o Jiova. E vakayaloqaqataki ira tale ga mera cakava na lomana. E veidusimaki vakacava? Ni vakayagataka na nona Vosa uqeti vaKalou. Eda wilika kina na itukutuku ni nona cakacaka vakaitalatala o Jisu kei na nona vakaroti ira na nona imuri mera tomana na cakacaka a tekivuna. (Maciu 28:19, 20) A tabaki ena Vale ni Vakatawa ni Julai 1881: “Eda sega ni digitaki se lumuti meda dokai se vutuniyau kina, ia meda vakayagataka na ka kece e tu vei keda meda vunautaka na itukutuku vinaka.” E tabaki ena 1919 e dua na ivola lailai To Whom the Work Is Entrusted (E Tataunaki Vei Ira na Cakacaka), e tukuni kina: “E levu sara na cakacaka e tu me qaravi, ia e cakacaka ni Turaga, ena solia vei keda o koya na kaukaua meda qarava kina.” Io, era yaloqaqa na tacida qori me vakataki ira ga na lotu vaKarisito taumada, era gumatua tale ga mera vunau vei ira na tamata kece ga. Na vuna? Era nuitaka na veivuke ni yalo tabu. Qori tale ga na ka eda nuitaka nikua.

8-9. Na iwalewale cava tale e vakayagataka na isoqosoqo i Jiova me vunautaki kina na itukutuku vinaka?

⁸ E vakayagataka na isoqosoqo i Jiova eso na ivukevuke vinaka sara me vunautaki kina na itukutuku vinaka. Na cava ya? Na ivola, na iyaloyalo veicavuyaki na “Photo-Drama of Creation,” qaramavoni, motoka vagusunivosa, walesi, kei na iyaya vakalivaliva ena gauna qo. E vakaitavi tale ga na isoqosoqo i Jiova ena vakadewa levu duadua ena ivolatukutuku ni gauna. Na vuna? Mera rogoca e levu na itukutuku vinaka ena nodra vosa. E sega ni veivakaduiduitaki o Jiova, e parofisaitaka ni na vunautaki na itukutuku vinaka “vei ira na veimatanitu, na veiyavusa, na duivosavosa, kei na tamata kece.” (Vkta. 14: 6, 7) E vinakata mera rogoca na tamata kece na itukutuku vinaka ni Matanitu ni Kalou.

⁹ Vakacava o ira e dredre meda sotavi ira, de dua era tiko ena tabavale e yadravi tu, se sogo tu na kena matamata? Me rawa nida vunau vei ira qori, e vakayagataka na isoqosoqo i Jiova na iwalewale ni vunau e matanalevu. Kena ivakaraitaki ena 2001, e vakadonuya na iLawalawa Dauvakatulewa mera vakayagataka na tacida mai Varanise na qiqi ni ivola kei na teveli, toso na gauna era sa vakayagataka tale ga qori na tacida ena veivanua. Vakacava e yaga na iwalewale qo? Ena 2011, e tekivutaki e Merika e dua na ituvatuva ni vunau ena dua na vanua osooso ena siti o Niu Yoka. Ena imatai ga ni yabaki, e soli kina e 102,129 na ivola kei na 68,911 na mekesini. E 4,701 era kerea mera vuli iVolatabu. E matata ni tokona tiko na yalo tabu na cakacaka qo! E vakadonuya gona na iLawalawa Dauvakatulewa me vakayagataki e veiyasa i vuravura na qiqi kei na teveli ni ivola.

10. Eda na vakavinakataka vakacava na noda vunau kei na veivakavulici?

¹⁰ Na ka mo cakava. Mo vakayagataka vinaka na ka e vakavulici keda kina o Jiova ena veisoqoni vaKarisito. Mo vunau wasoma kei na nomu iwasewase lailai ni vunau. Era na vukei iko na mataveitacini mo vakavinakataka na nomu vunau kei na veivakavulici, ena vakayaloqaqataki iko tale ga na nodra ivakaraitaki vinaka. Mo vunau tiko ga ke dredre mada ga na ituvaki. Me vaka e vakabibitaki ena tikinivolatabu e yavutaki kina na ulutaga qo, eda na vakayacora na inaki ni Kalou ena kaukaua ni yalo tabu, sega ni noda kaukaua. (Saka. 4:6) Io, nida cakava tiko na nona cakacaka.

11. E cakacaka vata vakacava ena duavata na ilawalawa dauvakatulewa mera veiyaloni kina na tamata ni Kalou?

¹¹ Ena imatai ni senitiuri. Era cakacaka vata na lewe ni ilawalawa dauvakatulewa e Jerusalemi mera duavata tiko ga na tamata ni Kalou qai tuvanaki matau na ka kece. (Caka. 2:42) Kena ivakaraitaki, ena rauta na 49 G.V., e duidui nodra rai na lotu vaKarisito me baleta na cili, e mani veivosakitaka qori na ilawalawa dauvakatulewa ena veidusimaki ni yalo tabu. Ke ra sega ni duavata na lewe ni ivavakoso ena vuku ni tikina qori, era na sega  ni vunautaka rawa na itukutuku vinaka. Era Jiu e levu na yapositolo kei na qase, ia era sega ni rawai ena nodra ivakarau na Jiu, se muri ira na vakavuvulitaka. Era nuitaka ga na veidusimaki ni Vosa ni Kalou kei na yalo tabu. (Caka. 15:1, 2, 5-20, 28) Na cava e yaco? E vakalougatataka o Jiova na nodra vakatulewa, era veiyaloni tiko ga, era vakila na vakacegu, era vunautaka tale ga na itukutuku vinaka.—Caka. 15:30, 31; 16:4, 5.

12. Eda kila vakacava ni laurai tale ga ena isoqosoqo i Jiova nikua na tuvatuvanaki vinaka kei na veiyaloni?

¹² Ena gauna qo. E gumatua na isoqosoqo i Jiova mera tuvanaki vinaka tiko ga nona tamata, mera veiyaloni tale ga. Ena 1895, e tabaki ena mekesini na Zion’s Watch Tower and Herald of Christ’s Presence ni Noveba 15 na ulutaga “Rakorako Qai Tuvanaki Vinaka,” e yavutaki ena 1 Korinica 14:40. E tukuni kina: “Eratou vakabibitaka na yapositolo ena ivavakoso taumada na tuvatuvanaki vinaka . . . E bibi meda talairawarawa tiko ga ena ‘ka kece e volai e liu meda vakavulici kina.’” (Roma 15:4) Io, e sasagataka tale ga na isoqosoqo i Jiova nikua na tuvatuvanaki vinaka kei na veiyaloni era guta na lotu vaKarisito taumada. Kena ivakaraitaki: Ke o lai tiko ena vuli ni Vale ni Vakatawa ena dua tale na ivavakoso se vanua, o na kila na ivakarau ni vuli kei na ulutaga me vulici. O na sega ni galili! Na yalo tabu ga e rawa ni vakavuna na duavata qori!—Saka. 3:9.

13. Nida vakasamataka na Jemesa 3:17, na cava meda taroga?

¹³ Na ka mo cakava. E vinakata o Jiova mera “maroroya na nona tamata na duavata e vakavuna na yalo tabu, era vauci vata kina ena veiyaloni.” (Efeso 4:1-3) Mo taroga: ‘Vakacava au uqeta na veiyaloni kei na duavata ena ivavakoso? Au dau talairawarawa vei ira na liutaki keda? Era nuitaki au eso tale, vakabibi keu lesi ena itavi ni ivavakoso? Au dauveivuke qai lomaqu meu veiqaravi, au sega tale ga ni dau lokuyara?’ (Wilika Jemesa 3:17.) Ke o raica eso na ka mo vakavinakataka, kerea na veivuke ni yalo tabu. Ni o veisautaka nomu itovo kei na ka o cakava mo muria na kena veidusimaki, era na lomani iko vakalevu na mataveitacini, o na mareqeti tale ga.

14. Me vaka e tukuni ena Kolosa 1:9, 10, e vakavulici ira vakacava nona tamata o Jiova ena imatai ni senitiuri?

¹⁴ Ena imatai ni senitiuri. E taleitaka o Jiova me vakavulici ira nona tamata. (Same 32:8) E vinakata mera kilai koya, ra lomani koya, mera bula tawamudu tale ga, ni okati ira mera luvena. Ena dredre me rawati qori ke sega ni vakavulici keda. (Joni 17:3) E vakayagataka o Jiova na ivavakoso ena imatai ni senitiuri me vakavulici ira nona tamata. (Wilika Kolosa 1:9, 10.) E veivuke tale ga vakalevu na yalo tabu, se na “dauveivuke” a yalataka o Jisu. (Joni 14:16) E vukei ira na tisaipeli mera kila vinaka na Vosa ni Kalou, mera nanuma tale ga e levu na ka e tukuna se cakava o Jisu e volatukutukutaki ena Kosipeli. Qori na ka e vaqaqacotaka nodra vakabauta na lotu vaKarisito taumada era lomana vakalevu na Kalou, na Luvena, era veilomani tale ga.

15. O vakadinadinataka vakacava ni sa vakayacori tiko na ka e yalataka o Jiova ena Aisea 2:2, 3?

¹⁵ Ena noda gauna. E tukuna o Jiova “ena veisiga mai muri,” era na tabili na lewe ni veivanua ena nona ulunivanua, mera vakavulici ena nona sala. (Wilika Aisea 2:2, 3.) Eda raica ni sa vakayacori tiko na parofisai qori, sa vakacerecerei na sokalou dina vei ira kece na lotu lasu. Eda qoroqoro ena kakana vakayalo e vakarautaka o Jiova! (Aisea 25:6) E vakayagataka “na dauveiqaravi yalodina e vuku,” me vakarautaka na itukutuku kece qori ena kena veimataqali, me vaka na veiulutaga, ivunau, na droini yavala kei na vidio. (Maciu 24:45) Eda duavata kei na ka e tukuna na itokani i Jope o Ilaiu: “Na dauveivakavulici cava e vakataki koya [na Kalou]?”—Jope 36:22.

16. Na cava mo cakava mo toso kina vakayalo?

¹⁶ Na ka mo cakava. Ena vukei iko na yalo tabu mo muria sara na ka o wilika se vulica ena Vosa ni Kalou. Mo masulaka me vaka na daunisame: “Vakavulici au, i Jiova  ena nomuni sala. Au na lako ena nomuni dina. Ni vakaduavatataka na lomaqu me rerevaka na yacamuni.” (Same 86:11) Me kua ni cegu nomu kania na kakana vakayalo e vakarautaka o Jiova ena nona Vosa, kei na nona isoqosoqo. E macala ni sega ni nomu inaki mo rawata ga na kilaka. O vinakata mo tugana e lomamu na ka dina qai muria. Ena vukei iko na yalo tabu i Jiova mo cakava qori. O vinakata tale ga mo vakayaloqaqataki ira na mataveitacini. (Iper. 10:24, 25) Na vuna? Nira lewe ni noda vuvale vakayalo. Kerea na yalo tabu me vukei iko mo vakamacala mai vu ni lomamu ena soqoni vaKarisito, mo cakava vinaka tale ga na nomu itavi ena soqoni. Ni o cakava qori, o vakaraitaka tiko vei Jiova kei Jisu, ni o lomani ira na nona “sipi” mareqeti.”—Joni 21:15-17.

17. Sala cava o na vakaraitaka kina ni o tokona ena yalodina na isoqosoqo i Jiova?

¹⁷ Sa voleka qo me vo duadua ga e vuravura na isoqosoqo e dusimaka tiko na yalo tabu ni Kalou. Mo gumatua gona ni cakacaka vata kei na isoqosoqo i Jiova. Mo vakatotomuria mada ga na loloma ni Kalou, kei na nona sega ni dau veivakaduiduitaki ni o vunautaka na itukutuku vinaka vei ira kece o sotava. Mo vakatotomuria nona tuvatuvanaki maqosa kei na nona vakacegu ni o uqeta na duavata ena ivavakoso. Mo vakarorogo tale ga vua na Dauniveivakavulici Levu ni o vakayagataka vinaka na kakana vakayalo e vakarautaka mai. Ni o cakava kece qori, o na sega ni rere ni sa vakarau vakarusai na vuravura i Setani. Ia o na nuidei mo maliwai ira na qaravi Jiova tiko ena yalodina ena nona isoqosoqo.