1. Mɛni esa akɛ Kristofoi fɛɛ ni abaptisi amɛ lɛ afee?

ANI abaptisi bo? Kɛ́ nakai lɛ, ojaje yɛ faŋŋ akɛ oheɔ Yehowa nɔ oyeɔ, ni oyɛ he miishɛɛ akɛ okɛ esafo lɛ baafee ekome kɛsɔmɔ. * Shi esa akɛ ofee nibii ni baahã hemɔkɛyeli ni oyɔɔ yɛ Yehowa mli, kɛ hemɔkɛyeli ni oyɔɔ akɛ ekɛ asafo nɛɛ miitsu eyiŋtoi ahe nii lɛ mli awa.

2-3. Mɛɛ Yehowa sui etɛ wɔnaa yɛ esafo lɛ he? Okɛ enɛ he nɔkwɛmɔnii ahã.

² Ŋmɛnɛ lɛ, bɔ ni Yehowa kudɔɔ esafo lɛ ehãa lɛ hãa anaa mɔ ni eji, nibii ni eto eyiŋ akɛ ebaafee, kɛ bɔ ni eesumɔ ni wɔhi shi wɔhã. Nyɛhãa wɔkwɛa Yehowa sui etɛ komɛi ni wɔnaa yɛ esafo lɛ hu he.

³ Klɛŋklɛŋ nɔ lɛ ji, “Nyɔŋmɔ kwɛɛɛ mɛi ahiɛiaŋ.” (Bɔf. 10:34) Akɛ nɔkwɛmɔnɔ lɛ, suɔmɔ tsirɛ lɛ ni ehã e-Bi lɛ bagbo akɛ kpɔmɔnɔ “ehã mɛi fɛɛ.” (1 Tim. 2:6; Yoh. 3:16) Yehowa hãa ewebii lɛ shiɛɔ sane kpakpa lɛ amɛhãa mɛi fɛɛ ni baabo toi, koni kɛtsɔ no nɔ lɛ, eye ebua mɛi pii ni amɛná kpɔmɔnɔ lɛ he sɛɛ. Nɔ ni ji enyɔ lɛ, Yehowa lɛ, “ejeee basabasafeemɔ Nyɔŋmɔ, shi moŋ toiŋjɔlɛ Nyɔŋmɔ ni.” (1 Kor. 14:33, 40) No hewɔ lɛ, ato mɛi ni jáa lɛ lɛ ahe gbɛjianɔ jogbaŋŋ, ni toiŋjɔlɛ yɛ amɛteŋ. Nɔ ni ji etɛ lɛ, Yehowa lɛ, lɛ ji ‘Tsɔɔlɔ Kpele lɛ.’ (Yes. 30:20, 21) No hewɔ lɛ, esafo lɛ tsɔɔ mɛi Nyɔŋmɔ Wiemɔ lɛ yɛ asafo lɛ mli kɛ esɛɛ fɛɛ, ni amɛkɛ nitsumɔ nɛɛ shwɛɛɛ kwraa. Mɛɛ gbɛ nɔ wɔnaa sui etɛ nɛɛ yɛ blema Kristofoi asafo lɛ he? Mɛɛ gbɛ nɔ wɔnaa yɛ Kristofoi asafo ni yɔɔ ŋmɛnɛ lɛ he? Ni mɛɛ gbɛ nɔ mumɔ krɔŋkrɔŋ  lɛ baanyɛ aye abua bo ni okɛ Yehowa asafo lɛ aya nɔ afee ekome kɛsɔmɔ?

4. Tamɔ bɔ ni wɔnaa yɛ Bɔfoi 1:8 lɛ, mɛni Yesu fã esɛɛnyiɛlɔi lɛ akɛ amɛfee? Ni mɛni ewo shi akɛ ekɛbaahã amɛ koni eye ebua amɛ?

⁴ Yɛ blema Kristofoi lɛ abeiaŋ. Sane ni Yesu shiɛ lɛ hã ana akɛ hiɛnɔkamɔ yɛ kɛhã adesai fɛɛ. (Luka 4:43) Yesu fã esɛɛnyiɛlɔi lɛ akɛ amɛtsa nitsumɔ ni eje shishi lɛ nɔ, ni amɛshiɛ kɛyashi shikpɔŋ lɛ nɔ hei ni jekɛ waa lɛ. (Kanemɔ Bɔfoi 1:8.) Shi ani esɛɛnyiɛlɔi lɛ baanyɛ atsu nitsumɔ nɛɛ yɛ amɛ diɛŋtsɛ amɛhewalɛ naa? Dabi, yelikɛbuamɔ he baahia amɛ. No hewɔ lɛ, Yesu wo amɛ shi akɛ ebaahã amɛ “yelikɛbualɔ,” ni ji mumɔ krɔŋkrɔŋ lɛ.​—Yoh. 14:26; Zak. 4:6.

5-6. Mɛɛ gbɛi anɔ mumɔ krɔŋkrɔŋ lɛ ye ebua Yesu sɛɛnyiɛlɔi lɛ?

⁵ Yɛ afi 33 Ŋ.B. Pentekoste gbi lɛ nɔ lɛ, mumɔ krɔŋkrɔŋ lɛ ba Yesu sɛɛnyiɛlɔi lɛ anɔ. Enɛ ye ebua amɛ ni amɛbɔi shiɛmɔ amrɔ nɔŋŋ, ni yɛ be kukuoo pɛ mli lɛ, mɛi akpei abɔ he amɛye ni amɛbatsɔmɔ Kristo sɛɛnyiɛlɔi. (Bɔf. 2:41; 4:4) Be ni ate shi awo kaselɔi lɛ, amɛhãaa ŋmiŋmi amɔ amɛ. Moŋ lɛ, amɛkpa Nyɔŋmɔ fai ni eye ebua amɛ. Amɛsɔle amɛkɛɛ lɛ akɛ, ehã amɛ, ni ji enyɔji lɛ, ‘aya nɔ awie ewiemɔ lɛ kɛ ekãa babaoo.’ Mɛni jɛ mli kɛba? Mumɔ krɔŋkrɔŋ lɛ yimɔ amɛ obɔbɔ, ni amɛtee nɔ “amɛwie Nyɔŋmɔ wiemɔ lɛ kɛ ekãa.”​—Bɔf. 4:18-20, 29, 31.

⁶ Nibii krokomɛi hu yɛ ni hãaa Yesu kaselɔi lɛ aná shiɛmɔ nitsumɔ lɛ mlɛo. Akɛ nɔkwɛmɔnɔ lɛ, yɛ amɛbeiaŋ lɛ, mɛi pii bɛ Ŋmalɛ lɛ eko. Agbɛnɛ hu, no mli lɛ, woji bɛ ni gbálaa Ŋmalɛ lɛ mli tamɔ bɔ ni wɔyɔɔ ŋmɛnɛ lɛ. Kɛfata he lɛ, ehe bahia ni amɛshiɛ yɛ wiemɔi srɔtoi pii amli. Kɛ̃lɛ, kaselɔi ni yɔɔ ekãa nɛɛ fee nɔ ko ni sa kadimɔ waa; yɛ aaafee afii 30 pɛ mli lɛ, amɛshiɛ sane kpakpa lɛ “yɛ bɔɔ nii ni yɔɔ ŋwɛi shishi lɛ fɛɛ ateŋ.”​—Kol. 1:6, 23.

7. Nɔ ni fe afii 100 ni eho nɛ lɛ, te Yehowa tsuji fee tɛŋŋ amɛle nɔ ni Nyɔŋmɔ kpaa gbɛ yɛ amɛdɛŋ? Ni be ni amɛná amɛle lɛ, mɛni amɛfee yɛ he?

⁷ Yɛ wɔbei nɛɛ amli. Yehowa kã he eekudɔ ewebii lɛ, ni eeye eebua amɛ koni amɛnyɛ amɛfee esuɔmɔnaa nii. Gbɛ titri ni etsɔɔ nɔ ekudɔɔ ewebii lɛ ji, kɛtsɔ e-Wiemɔ ni ajɛ mumɔŋ aŋma lɛ nɔ. Biblia lɛ gbaa wɔ Yesu shiɛmɔ nitsumɔ lɛ he sane, ni ehãa wɔleɔ famɔ ni ekɛhã esɛɛnyiɛlɔi lɛ akɛ amɛtsa nitsumɔ ni eje shishi lɛ nɔ lɛ. (Mat. 28:19, 20) July 1881 tɔ̃ɔ ni awie yɛ Buu-Mɔɔ lɛ mli akɛ: “Yehowa tsɛɛɛ wɔ loo efɔɔɔ wɔ mu koni adesai awo wɔhiɛ nyam, loo wɔbatsɔmɔ niiatsɛmɛi, shi moŋ, koni wɔkɛ nɔ fɛɛ nɔ ni wɔyɔɔ lɛ ashiɛ sane kpakpa lɛ.” Yɛ afi 1919 lɛ, awie yɛ wolo ni ji, To Whom the Work Is Entrusted (Mɛi Ni Atu Nitsumɔ Lɛ Awo Amɛdɛŋ) lɛ mli akɛ: “Nitsumɔ lɛ da waa, shi Nuŋtsɔ lɛ nitsumɔ ni, ni ebaahã wɔ hewalɛ lɛ ni wɔtsu.” Bɔ ni blema Kristofoi lɛ fee ekãa, ni amɛkɛ amɛtsui fɛɛ wo nitsumɔ lɛ mli, ni amɛhe amɛye akɛ mumɔ krɔŋkrɔŋ lɛ baaye abua amɛ ni amɛshiɛ amɛhã mɛi srɔtoi fɛɛ lɛ, nakai nyɛmimɛi nɛɛ fee, ni nakai wɔ hu wɔfeɔ ŋmɛnɛ.

8-9. Mɛɛ gbɛi srɔtoi anɔ Yehowa asafo lɛ etsɔ eshiɛ sane kpakpa lɛ?

⁸ Be fɛɛ be lɛ, Yehowa asafo lɛ kwɛɔ gbɛ ni hi fe fɛɛ ni ebaanyɛ etsɔ nɔ eshiɛ koni mɛi pii anu sane kpakpa lɛ. No hewɔ lɛ, wɔtsɔ woji, “Photo-Drama of Creation” lɛ, gramafon, tsɔji ni akɛ spikɛs emamɔ yiteŋ, kɛ redio nɔ wɔshiɛ sane kpakpa lɛ, ni nyɛsɛɛ nɛɛ, wɔmiitsɔ Intanɛt lɛ kɛ ilɛtrɔniki tsɔji anɔ wɔmiifee nakai. Agbɛnɛ hu, Yehowa asafo lɛ etsɔɔ woji, vidioi, kɛ nibii krokomɛi ashishi kɛtee wiemɔi pii amli bɔ ni anako enɔ pɛŋ yɛ yinɔsane mli. Mɛni hewɔ? Koni mɛi srɔtoi fɛɛ anu sane kpakpa lɛ yɛ amɛ diɛŋtsɛ amɛwiemɔ mli. Yehowa kwɛɛɛ mɛi ahiɛiaŋ, no hewɔ lɛ, egba akɛ  abaashiɛ sane kpakpa lɛ atsɔɔ “jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ.” (Kpo. 14:6, 7) Eesumɔ ni mɛi fɛɛ anu Maŋtsɛyeli lɛ he sane lɛ.

⁹ Mɛi komɛi yɛ ni he ni amɛyɔɔ lɛ, aŋmɛɛɛ mɔ fɛɛ mɔ kɛkɛ gbɛ ni eba jɛmɛ. Te wɔbaafee tɛŋŋ wɔshiɛ wɔhã mɛi ni tamɔ nakai lɛ? Yehowa asafo lɛ susu sane nɛɛ he, ni eto gbɛjianɔ koni nine ashɛ mɛi nɛɛ anɔ kɛtsɔ maŋ odaseyeli nɔ. Akɛ nɔkwɛmɔnɔ lɛ, yɛ afi 2001 lɛ, Gbɛtsɔɔmɔ Kuu lɛ kpɛlɛ ni akɛ odaseyeli shwiilii, kɛ nibii krokomɛi ni tamɔ nakai lɛ atsu nii yɛ France, ni sɛɛ mli lɛ, amɛkpɛlɛ ni akɛtsu nii yɛ hei krokomɛi hu. Ani gbɛjianɔtoo nɛɛ wo yibii kpakpai? Hɛɛ. Yɛ afi 2011 lɛ, ato odaseyeli gbɛ hee ko he gbɛjianɔ yɛ United States, yɛ he ko ni afɔɔ tsɔmɔ waa yɛ New York City. Yɛ afi kome pɛ mli lɛ, atsɔ gbɛjianɔtoo hee nɛɛ nɔ ahã woji 102,129, kɛ magazin 68,911, ni mɛi 4,701 bi ni akɛ amɛ abakase Biblia lɛ. Enɛ hã efee faŋŋ akɛ, Yehowa kɛ emumɔ krɔŋkrɔŋ lɛ miifi nitsumɔ nɛɛ sɛɛ. No hewɔ lɛ, Gbɛtsɔɔmɔ Kuu lɛ kpɛlɛ ni akɛ odaseyeli shwiilii atsu nii yɛ je lɛŋ fɛɛ.

10. Mɛni baaye abua wɔ ni wɔya wɔhiɛ yɛ shiɛmɔ kɛ nitsɔɔmɔ nitsumɔ lɛ mli?

¹⁰ Nɔ ni obaanyɛ ofee. Kɛ́ wɔtee asafoŋ kpeei lɛ, Yehowa tsɔseɔ wɔ yɛ shiɛmɔ nitsumɔ lɛ mli. No hewɔ lɛ, bɔɔ mɔdɛŋ ni okɛ nibii ni okaseɔ yɛ jɛmɛ lɛ atsu nii. Okɛ nyɛmimɛi ni yɔɔ oshiɛmɔyaa kuu lɛ mli lɛ afee ekome kɛya shiɛmɔ. Amɛbaaye amɛbua bo ni ohe asa yɛ shiɛmɔ kɛ nitsɔɔmɔ nitsumɔ lɛ mli, ni amɛnɔkwɛmɔnɔ kpakpa lɛ hu baawo bo hewalɛ. Shiɛmɔ daa ekɔɔɔ he eko naagbai ni okɛbaakpe. Hã ehi ojwɛŋmɔ mli be fɛɛ be akɛ, tamɔ bɔ ni awie yɛ ŋmalɛ ni nikasemɔ lɛ damɔ nɔ lɛ mli lɛ, jeee wɔ diɛŋtsɛ wɔhewalɛ naa wɔnyɛɔ wɔfeɔ Nyɔŋmɔ suɔmɔnaa nii, shi moŋ mumɔ krɔŋkrɔŋ lɛ hewalɛ naa. (Zak. 4:6) Nitsumɔ lɛ, jeee wɔnɔ ni, Nyɔŋmɔ nɔ ni.

11. Mɛɛ gbɛ nɔ gbɛtsɔɔmɔ kuu ni yɔɔ yɛ blema Kristofoi lɛ abeiaŋ lɛ fee ekome kɛtsu nii koni anyɛ ato nibii ahe gbɛjianɔ jogbaŋŋ yɛ Yehowa webii lɛ ateŋ?

¹¹ Yɛ blema Kristofoi lɛ abeiaŋ. Gbɛtsɔɔmɔ kuu ni yɔɔ Yerusalem lɛ fee ekome kɛtsu nii  koni ato nibii ahe gbɛjianɔ jogbaŋŋ ni toiŋjɔlɛ ahi Nyɔŋmɔ webii lɛ ateŋ. (Bɔf. 2:42) Akɛ nɔkwɛmɔnɔ lɛ, yɛ afi 49 Ŋ.B. be ni ketiafoo sane lɛ miihe aja asafo lɛ mli lɛ, mumɔ krɔŋkrɔŋ lɛ kudɔ gbɛtsɔɔmɔ kuu lɛ ni amɛtsu naagba lɛ he nii. Eji anyɛɛɛ atsu sane nɛɛ he nii kulɛ, ekomefeemɔ ehiŋ asafo lɛ mli, ni shiɛmɔ nitsumɔ lɛ eyaŋ nɔ. Eyɛ mli akɛ bɔfoi lɛ kɛ onukpai lɛ fɛɛ lɛ, Yudafoi ji amɛ moŋ, shi amɛhãaa Yudafoi lɛ akusum, loo mɛi ni miima nɔ mi veveeve akɛ aye kusumii nɛɛ anɔ lɛ aná amɛnɔ hewalɛ. Moŋ lɛ, amɛhã Nyɔŋmɔ Wiemɔ lɛ kɛ emumɔ lɛ kudɔ amɛ. (Bɔf. 15:1, 2, 5-20, 28) Mɛni jɛ mli kɛba? Yehowa jɔɔ yiŋ ni amɛkpɛ lɛ nɔ, nyɛmimɛi lɛ fee ekome kɛhi shi yɛ toiŋjɔlɛ mli, ni shiɛmɔ nitsumɔ lɛ shwere.​—Bɔf. 15:30, 31; 16:4, 5.

12. Mɛni hãa wɔnaa akɛ ato Yehowa webii ni yɔɔ ŋmɛnɛ lɛ ahe gbɛjianɔ jogbaŋŋ ni toiŋjɔlɛ yɛ amɛteŋ?

¹² Yɛ wɔbei nɛɛ amli. Yehowa etsɔ esafo lɛ nɔ eto ewebii lɛ ahe gbɛjianɔ jogbaŋŋ koni toiŋjɔlɛ ahi amɛteŋ. Akɛ nɔkwɛmɔnɔ lɛ, sane ko je kpo yɛ November 15, 1895 Buu-Mɔɔ lɛ mli ni yitso ji, “Bɔ Ni Yɔɔ Fɛo Kɛ Gbɛjianɔtoo Naa.” Sane nɛɛ damɔ 1 Korintobii 14:40 lɛ nɔ, ni awie yɛ mli akɛ: “Bɔfoi lɛ wie nibii pii ni hã blema Kristofoi lɛ na akɛ esa akɛ ato nibii ahe gbɛjianɔ jogbaŋŋ . . . ni ehe miihia waa ni wɔya nɔ wɔbo ‘nibii nɛɛ ni aŋma ato momo lɛ’ toi.” (Rom. 15:4) Bɔ ni ato blema Kristofoi lɛ ahe gbɛjianɔ jogbaŋŋ koni toiŋjɔlɛ ahi amɛteŋ lɛ, nakai nɔŋŋ wɔnaa ŋmɛnɛ yɛ Yehowa asafo lɛ mli. Akɛ nɔkwɛmɔnɔ lɛ, kɛ́ otee asafo kroko mli, yɛ maŋ kroko nɔ po ni ayaakase Buu-Mɔɔ lɛ, ehe ehiaaa ni mɔ ko tsɔɔ bo bɔ ni nikasemɔ lɛ baaya lɛ ahã kɛ nikasemɔ pɔtɛɛ ni abaakase, ejaakɛ ole momo! Mɛni ekoŋŋ baanyɛ ahã wɔfee ekome nɛkɛ, kɛ́ jeee Nyɔŋmɔ mumɔ lɛ ni?​—Zef. 3:9.

13. Yɛ nɔ ni awie yɛ Yakobo 3:17 lɛ naa lɛ, mɛɛ saji esa akɛ wɔteŋ mɔ fɛɛ mɔ abi ehe?

¹³ Nɔ ni obaanyɛ ofee. Yehowa miisumɔ ni ewebii lɛ ‘ahiɛ ekomefeemɔ ni amɛtsɔ mumɔ lɛ nɔ amɛná lɛ mli, yɛ toiŋjɔlɛ ni tamɔ kpãa ni fiɔ amɛ efeɔ amɛ ekome lɛ mli.’ (Efe. 4:1-3) No hewɔ lɛ, bi ohe akɛ: ‘Ani mifeɔ nibii ni baahã ekomefeemɔ kɛ toiŋjɔlɛ ahi asafo lɛ mli? Ani miboɔ mɛi ni nyiɛ hiɛ lɛ toi? Kɛ́ atu sɔ̃i awo  midɛŋ yɛ Kristofoi asafo lɛ mli lɛ, ani miitsu amɛhe nii jogbaŋŋ bɔ ni mɛi baanyɛ amɛkɛ amɛhiɛ afɔ̃ minɔ? Ani miyeɔ mibe nɔ, miyeɔ mibuaa mɛi, ni miyɛ he miishɛɛ akɛ masɔmɔ mɛi?’ (Kanemɔ Yakobo 3:17.) Kɛ́ ona akɛ tsakemɔi komɛi yɛ ni esa akɛ ofee lɛ, sɔlemɔ obi Yehowa ni ekɛ mumɔ krɔŋkrɔŋ lɛ aye abua bo. Kɛ́ ohã mumɔ krɔŋkrɔŋ lɛ kudɔ bo lɛ, ebaasa ojeŋba kɛ bɔ ni ofeɔ onii ohãa lɛ he, ni no baahã onyɛmimɛi lɛ asumɔ bo waa ni amɛhiɛ asɔ bo.

14. Yɛ nɔ ni awie yɛ Kolosebii 1:9, 10 lɛ naa lɛ, mɛni ehe bahia ni blema Kristofoi lɛ aná? Ni mɛɛ gbɛ nɔ Yehowa tsɔ ekɛdro amɛ?

¹⁴ Yɛ blema Kristofoi lɛ abeiaŋ. Yehowa yɛ he miishɛɛ waa akɛ ebaatsɔɔ ewebii lɛ nii. (Lala 32:8) Eesumɔ ni amɛle lɛ, amɛsumɔ lɛ, ni amɛhi shi kɛya naanɔ akɛ ebii ni esumɔɔ. Shi kɛ́ Yehowa etsɔɔɔ wɔ nii lɛ, enɛɛmɛi fɛɛ nyɛŋ aba mli kɔkɔɔkɔ. (Yoh. 17:3) Yehowa tsɔ blema Kristofoi asafo lɛ nɔ etsɔɔ ewebii lɛ nii. (Kanemɔ Kolosebii 1:9, 10.) Mumɔ krɔŋkrɔŋ lɛ, ni ji “yelikɛbualɔ” ni Yesu wo ekaselɔi lɛ shi akɛ ekɛbaahã amɛ lɛ hu ye ebua amɛ. (Yoh. 14:16) Ehã amɛnu Nyɔŋmɔ Wiemɔ lɛ shishi jogbaŋŋ, ni ehã amɛkai nibii ni Yesu wie kɛ nibii ni efee lɛ, ni sɛɛ mli lɛ, aŋmala ashwie shi yɛ Sanekpakpai lɛ amli. Nibii ni mumɔ krɔŋkrɔŋ lɛ ye ebua blema Kristofoi lɛ ni amɛbale lɛ hã amɛhemɔkɛyeli lɛ mli wa, ni ehã amɛbasumɔ Nyɔŋmɔ, e-Bi lɛ, kɛ amɛnyɛmimɛi Kristofoi lɛ waa.

15. Mɛni Yehowa efee ni hãa onaa akɛ eeye eshiwoo ni yɔɔ Yesaia 2:2, 3 lɛ nɔ?

¹⁵ Yɛ wɔbei nɛɛ amli. Yehowa gba akɛ, “yɛ gbii lɛ anaagbee lɛ mli lɛ,” jeŋmaji lɛ fɛɛ baaho kɛya efonirifeemɔŋ gɔŋ lɛ he koni etsɔɔ amɛ egbɛi lɛ ahe nii. (Kanemɔ Yesaia 2:2, 3.) Gbalɛ nɛɛ miiba mli ŋmɛnɛ. Yehowa ewó anɔkwa jamɔ nɔ gojoo, ni ehã esoro lɛ kwraa yɛ amale jamɔi fɛɛ ahe. Kwɛmɔ mumɔŋ niyenii pii ni  Yehowa tsɔɔ “nyɔŋ anɔkwafo kɛ hiɛshikalɔ lɛ” nɔ ehãa wɔ! (Yes. 25:6; Mat. 24:45) Ni jeee akɛ niyenii nɛɛ fa kɛkɛ, shi moŋ eyɛ lɛ srɔtoisrɔtoi hu. Afeɔ ekomɛi woji, ni afeɔ ekomɛi hu vidioi, dani ayɛ maŋshiɛmɔi, kɛ katuun, kɛ ekrokomɛi ni fata he. Bɔ ni Hiob naanyo Elihu nu he ehã yɛ Nyɔŋmɔ he be ni ebi akɛ, “Mɛɛ tsɔɔlɔ yɔɔ ni tamɔ lɛ?” lɛ, nakai nɔŋŋ wɔ hu wɔnuɔ he.​—Hiob 36:22.

16. Mɛni kɛ́ ofee lɛ, no baaye abua bo ni oná nibii ni Yehowa tsɔɔ wɔ lɛ ahe sɛɛ jogbaŋŋ?

¹⁶ Nɔ ni obaanyɛ ofee. Yehowa baanyɛ ekɛ emumɔ lɛ aye abua bo ni okɛ nibii ni okaneɔ kɛ nibii ni okaseɔ yɛ Biblia lɛ mli lɛ atsu nii. Kasemɔ mɔ ni fo Lala 86 lɛ, ni bo hu osɔle okɛɛ Yehowa akɛ: “Ao Yehowa, tsɔɔmɔ mi ogbɛ lɛ. Manyiɛ onɔkwale lɛ mli. Feemɔ mitsui ekome koni eshe ogbɛ́i lɛ gbeyei.” (Lala 86:11) Yaa nɔ okase Biblia lɛ kɛ asafo lɛ woji lɛ. Be ni ofeɔ nakai lɛ, hã ehi ojwɛŋmɔ mli akɛ, ookase koni ole, ni ebote otsuiŋ, ni okɛtsu nii hu, ni Yehowa mumɔ lɛ baanyɛ aye abua bo ni ofee nakai. Agbɛnɛ hu, esa akɛ owo onyɛmimɛi Kristofoi lɛ hewalɛ. (Heb. 10:24, 25) Mɛni hewɔ? Ejaakɛ onyɛmimɛi ji amɛ. No hewɔ lɛ, sɔlemɔ obi Yehowa ni ekɛ emumɔ lɛ aye abua bo, koni kɛ́ otee asafoŋ kpeei lɛ, ohã sane hetoo ni mɔɔ shi. Agbɛnɛ hu, bi lɛ ni eye ebua bo ni kɛ́ oyɛ asaimɛnt lɛ, ofee lɛ jogbaŋŋ. Kɛ́ ofee nibii nɛɛ, no baahã Yehowa kɛ e-Bi lɛ ana akɛ osumɔɔ amɛwebii lɛ asane waa.​—Yoh. 21:15-17.

17. Mɛni obaanyɛ ofee kɛtsɔɔ akɛ oyeɔ Yehowa anɔkwa ni ofiɔ esafo lɛ sɛɛ?

¹⁷ Etsɛŋ, abaakpãtã gbɛjianɔtoi krokomɛi fɛɛ ahiɛ ni ebaashwɛ gbɛjianɔtoo koome pɛ ni Yehowa mumɔ lɛ kudɔɔ lɛ, ni ji esafo lɛ. No hewɔ lɛ, jɛɛ otsuiŋ fɛɛ ni okɛ Yehowa asafo lɛ afee ekome kɛtsu nii. Kasemɔ Yehowa, wɔ-Nyɔŋmɔ ni kwɛɛɛ hiɛiaŋ lɛ, ni oshiɛ sane kpakpa lɛ ohã mɛi fɛɛ kɛtsɔɔ akɛ osumɔɔ amɛ. Yehowa sumɔɔ ni ato nibii ahe gbɛjianɔ jogbaŋŋ ni toiŋjɔlɛ ahi asafo lɛ mli. No hewɔ lɛ, kasemɔ lɛ, ni ofee nibii ni baahã ekomefeemɔ ahi asafo lɛ mli. Bo lɛ toi, ni okɛ nibii fɛɛ ni etsɔɔ wɔ lɛ atsu nii, ejaakɛ lɛ ji wɔ-Tsɔɔlɔ Kpele lɛ. Kɛ́ ofee nibii nɛɛ, osheŋ gbeyei kɛ́ aakpãtã Satan je lɛ hiɛ. Moŋ lɛ, obaafee ekãa, okɛ onyɛmimɛi Kristofoi lɛ baaya nɔ asɔmɔ Yehowa, ni nyɛbaaye esafo lɛ anɔkwa.