1. Kisa nou divèt kontinyé fè apré nou batizé ?

ÈS TO batizé ? Si a sa, lò to batizé to montré douvan tout moun ki to lafwa, a annan Jéova i fika é ki to lé adoré l’ ansanm ké so òrganizasyon *. A pou to lafwa annan Jéova kontinyé divini pi fò é to divèt toujou gen plis konfyans ki Jéova ka itilizé so òrganizasyon.

2-3. Ki bèl kalité Jéova nou ka wè annan fason i ka dirijé so òrganizasyon ? Bay plizyèr èkzanp.

² Lò nou ka gadé fason Jéova ka dirijé so òrganizasyon jòdla, nou ka wè ki kalité moun i sa, sa i lé fè, é kouman i ka wè sa ki bon ké sa ki pa bon. Annou wè trwa kalité Jéova gen é ki nou pouvé wè annan so òrganizasyon.

³ Prémyèrman, « Jéova pa ka fè préférans » (Actes 10:34). A lanmou ki fè Jéova bay so Pitit ‘pou ranson pou tout kalité moun’ (1 Tim. 2:6 ; Jean 3:16). Jéova ka sèrvi so pèp pou préché bon nouvèl-a pou tout moun, konsa i ka pèrmèt tout moun ki lé, profité di ranson-an, sa lé di sové yé lavi. Dézyèmman, Jéova kontan lò tout bagaj byen òrganizé é fèt annan lapè (1 Cor. 14:33, 40). A pou sa, sa nòrmal ki sa-ya ki ka adoré Jéova byen òrganizé é ka adoré l’ annan lapè. Trwazyèmman, Jéova sa « Gran Ansényan-an » (Is. 30:20, 21). A pou sa, so òrganizasyon ka travay rèd pou anprann moun-yan so Paròl Labib-a, ki annan asanblé-a ki annan prédikasyon-an. Kouman asanblé krétyen-an annan 1^é syèk-a, imité sa  trwa kalité-ya ? Kouman pèp Jéova jòdla ka imité sa kalité-ya ? É kouman lèspri sen-an pouvé idé to travay ansanm ké òrganizasyon Jéova-a ?

4. Dapré Actes 1:8, ki lòrd Jézi bay so disip é kisa ki té ké idé yé ?

⁴ Annan lépòk prémyé krétyen-yan. Mésaj Jézi préché bay tout moun èspwar (Luc 4:43). A pou sa i di so disip-ya kontinyé fè sa travay i té koumansé-a ; yé té divèt préché « jik annan koté ki pi lwen asou latè-a » (li Actes 1:8). Asiré pa pitèt, yé pa té ké pouvé fè sa travay-a ké yé pròp fòrs. Yé té ké bézwen lèspri sen, sa lé di « asistan-an » Jézi té promèt yé (Jean 14:26 ; Zach. 4:6).

5-6. Kouman lèspri sen idé disip Jézi-ya ?

⁵ Pannan Lapannkot 33 di nou lépòk, disip-ya rousouvwè lèspri sen. Gras a lèspri sen, yé koumansé préché lanmenm é annan roun ti-moman roun patché moun asèpté bon nouvèl-a (Actes 2:41 ; 4:4). Lò moun-yan koumansé éséyé baré yé chimen, pasé yé pran pè, yé sipliyé Bondjé idé yé. Yé doumandé l’ : « Pèrmèt to èsklav-ya kontinyé di to paròl san nou pa pè menm. » Apré sa Bondjé bay yé lèspri sen-an é yé kontinyé ‘di Paròl Bondjé-a san yé pa té pè’ (Actes 4:18-20, 29, 31).

⁶ Mé yé té gen ròt problèm ankò. Parèkzanp, i pa té gen bokou roulo di Ékritir-ya, é i pa té gen pyès liv ki té ka èspliké Labib-a kou nou gen jòdla. Anplis di sa, disip-ya té divèt préché pou moun ki té ka palé tout kalité lang. Magré tousa problèm-yan, yé fè sa ki té pouvé parèt enposib pou fè : apré trant lannen rounso, yé té préché bon nouvèl-a « toupatou anba syèl-a » (Col. 1:6, 23).

7. I ja gen pasé 100 lannen, kouman sèrvitèr Bondjé konprann sa Bondjé té lé yé fè, é kisa yé fè ?

⁷ Jòdla. Jéova ka kontinyé dirijé so pèp é bay li fòrs. I ka dirijé l’ èspésyalman gras a so Paròl i fè plizyèr wonm ékri ké so lèspri sen. A la yé ka palé di prédikasyon Jézi é di lòrd i bay so disip : préché bon nouvèl-a (Mat. 28:19, 20). An jwiyé 1881, La Tour de Garde té ja ka di : « Jéova pa chwazi nou pou wonm-yan bay nou lònò ouben pou nou divini rich, mé pou nou itilizé tousa nou gen pou nou préché bon nouvèl-a. » Ti liv À qui l’œuvre est confiée, ki soti an 1919 an anglé, té ka di : « I gen roun patché travay pou fè, mé a travay Sényèr-a é i ké bay nou fòrs pou fè l’. » Kou prémyé krétyen-yan, sa frè-ya ki té gen bokou kouraj, travay rèd annan prédikasyon-an, paské yé té sir ki lèspri sen-an té ké idé yé préché pou tout kalité moun. Nou osi, nou sir ki lèspri sen ké idé nou.

8-9. Ki zouti òrganizasyon Jéova-a sèrvi pou fè tout moun konnèt bon nouvèl-a ?

⁸ Òrganizasyon Jéova-a ka sèrvi pi bon zouti i gen pou fè tout moun konnèt bon nouvèl-a. Parèkzanp, piblikasyon asou papyé, « Foto-Dram Kréyasyon-an », fonograf, loto ké oparlèr, laradyo, épi dipi plizyèr lannen òrdinatèr ké Entèrnèt. Anplis di sa, òrganizasyon Bondjé-a ka tradwi piblikasyon annan bokou lang kou sa pa janmen fèt anvan ! Poukisa ? Pou tout kalité moun tandé mésaj Rwayonm-an annan yépa lang. Jéova pa ka fè préférans ; i té di ki bon nouvèl-a té ké préché « pou tout nasyon, piti kou gran, é pou tout lang é pou tout pèp » (Rév. 14:6, 7). Atò, i lé tout moun tandé l’.

⁹ Mé kouman nou pouvé préché pou sa-ya nou pa pouvé jwenn fasilman, kou  parèkzanp sa-ya ki ka rété annan batiman koté nou pa pouvé antré konsa ? Pou rivé jwenn plis moun nou pa ka rivé wè fasilman, Jéova idé so òrganizasyon pou i trouvé ròt fason pou préché pou moun-yan koté yé fika. Parèkzanp, an 2001, Kolèj santral-a asèpté ki nou frè ké sò Lafrans sèrvi prézantwar ké ròt zouti konsa. Pita frè ké sò annan ròt koté koumansé préché menm fason-an. Sa byen maché menm. An 2011, yé koumansé roun nouvo program Ozétazini ; yé éséyé sa program-an Nouyòrk annan roun koté i té gen bokou moun ki té ka monté désann. Prémyé lannen-an, proklamatèr-ya lésé 102 129 liv ké 68 911 journal. Épi 4 701 moun doumandé roun léson biblik ! Sa té klè kou dlo ròch : Jéova té ka soutni sa prédikasyon-an ké so lèspri sen. A konsa Kolèj santral-a asèpté nou itilizé prézantwar ké ròt bagaj konsa toupatou asou latè-a.

10. Kouman nou pouvé divini pi vayan lò nou ka préché ?

¹⁰ Sa to pouvé fè. Annan nou réinyon krétyen-yan, Jéova ka montré nou kouman pou nou préché. A pou to byen itilizé sa nou ka anprann annan sa réinyon-yan. Préché souvan ké to group prédikasyon. Frè ké sò-ya annan to group pouvé idé to divini pi vayan pou préché ké ansényé, é yé èkzanp pouvé ankourajé to. Kontinyé préché menm si to ka jwenn problèm. Kou nou ka wè annan vèrsé nou pran pou koumansé sa Tourdégard-a, nou pa ka rivé fè volonté Bondjé paské nou fò, mé a gras a so lèspri (Zach. 4:6). Pa bliyé ki a so travay nou ka fè.

11. Annan lépòk prémyé krétyen-yan, kouman Kolèj santral-a rivé travay ansanm pou fè pèp Bondjé-a rété òrganizé ?

¹¹ Annan 1^é syèk-a. Frè Kolèj santral-a ki té Jérizalèm, travay ansanm pou fè pèp Bondjé-a rété òrganizé é kontinyé viv annan lapè (Actes 2:42). Parèkzanp, bò di lannen 49 di nou lépòk, yé réfléchi asou problèm sirkonsizyon-an anba dirèksyon  lèspri sen-an. Si sa problèm-an té kontinyé séparé asanblé-ya, prédikasyon-an té ké ralanti. Menm si yé té jwif, apot ké ansyen ki té Jérizalèm pa apiyé asou tradisyon jwif-ya ni asou sa-ya ki té kontan l’ pou réglé sa problèm-an. Yé pito lésé Paròl Bondjé-a ké lèspri sen-an gidé yé (Actes 15:1, 2, 5-20, 28). Kisa ki fèt ? Jéova béni yé désizyon, asanblé-ya kontinyé travay ansanm annan lapè é yé kontinyé préché bon nouvèl-a (Actes 15:30, 31 ; 16:4, 5).

12. Kisa ka montré ki òrganizasyon Jéova-a byen òrganizé é ka viv annan lapè ?

¹² Jòdla. Òrganizasyon Jéova-a ka idé pèp Bondjé-a pou i rété byen òrganizé é annan lapè. Annan Phare de la Tour de Sion et Messager de la Présence de Christ 15 novanm 1895, i té gen roun artik asou 1 Corinthiens 14:40 é so tit a té : « Avec bienséance et ordre ». Nou té ka li annan sa artik-a : « Apot-ya di prémyé krétyen-yan bokou bagaj asou zafè rété byen òrganizé [...]. Sa enpòrtan pou nou kontinyé byen swiv ‘bagaj ki té marké tan-lontan pou ansényé nou’ » (Rom. 15:4). Òrganizasyon Jéova-a ka travay rèd pou asanblé krétyen-yan rété byen òrganizé é annan lapè kou annan lépòk prémyé krétyen-yan. Parèkzanp si to té ka alé pou étid Tourdégard-a annan rounòt asanblé, ouben annan rounòt péyi, to té ké ja savé kouman frè-a té ké dirijé réinyon-an é ki artik yé té ké étidyé. Lanmenm, to té ké santi kousidiré to té annan to koté. A gras a lèspri sen Bondjé rounso nou pouvé gen sa bèl bagaj-a ! (Soph. 3:9, nòt).

13. Toupannan nou ka sonjé Jacques 3:17, ki késyon nou divèt pozé nou kò ?

¹³ Sa to pouvé fè. Jéova lé ki so sèrvitèr-ya ‘kontinyé rété byen ansanm gras a lèspri sen é ki lapè kontinyé fè yé viv byen ansanm’ (Éph. 4:1-3). Alòr doumandé to kò : « Ès mo ka fè tousa mo pouvé pou nou tout rété byen ansanm annan lapè annan asanblé-a ? Ès mo ka kouté sa-ya ki ka dirijé asanblé-a ? Ès ròt  moun-yan pouvé konté asou mo, èspésyalman si mo gen rèsponsabilité annan asanblé-a ? Ès mo ka rèspèkté lèr yé ka bay mo ? Ès mo toujou paré pou idé ròt-ya ? » (li Jacques 3:17). Si to ka pansé i gen bagaj to pouvé fè pi byen, doumandé Jéova so lèspri sen. Pi to ké lésé so lèspri sen aji asou to é aji asou sa to ka fè, pi to frè ké sò ké kontan to pou tout to bèl kalité-ya.

14. a) Dapré Colossiens 1:9, 10, kisa prémyé krétyen-yan té bézwen ? b) Kouman Jéova bay yé sa yé té bézwen ?

¹⁴ Annan 1^é syèk-a. Jéova kontan ansényé so sèrvitèr-ya (Ps. 32:8). I lé yé konnèt li, yé kontan li é i lé yé viv pou tout-tan. Si i pa té ka ansényé yé, anyen di tousa pa té ké posib (Jean 17:3). Annan 1^é syèk-a, i itilizé asanblé-a pou ansényé so pèp (li Colossiens 1:9, 10). Lèspri sen-an, ki sa « asistan » Jézi té promèt-a, idé disip-ya osi. I idé yé konprann Paròl Bondjé-a pi byen é i fè yé sonjé tout bagaj Jézi té fè é té di (Jean 14:16). Yé té pouvé li sa bagaj-ya apré annan Évanjil-ya. Sa konésans-a fè yé lafwa divini pi fò. A gras a sa konésans-a osi ki yé lanmou pou Bondjé, pou so Pitit, ké pou yé konpanyen divini pi fò.

15. Kouman to ka wè promès ki annan Isaïe 2:2, 3 réyalizé ?

¹⁵ Jòdla. Jéova té di ki, annan « dèrnyé jou-ya », soso moun di tout koté té ké vini asou so montangn, yé té ké mété yé kò ansanm ké so sèrvitèr-ya pou i ansényé yé (li Isaïe 2:2, 3). Jòdla nou ka wè sa profési-a réyalizé. Nou ka wè ki vré ladorasyon-an lontan pi bon pasé pyès fo ladorasyon. É Jéova ka bay nou bokou ansèyman asou Labib-a ! (Is. 25:6). I ka sèrvi « èsklav fidèl ké avizé-a » pou bay nou tout sa enfòrmasyon-yan  (Mat. 24:45). Parèkzanp, nou pouvé li artik, nou pouvé kouté diskour, épi gadé désen-animé ké vidéyo. Nou ka santi menm bagaj ki Éliyou, zanmi Jòb, ki di asou Bondjé : « Ès i gen roun ansényan kou li ? » (Job 36:22).

16. Kisa to pouvé fè pou profité di sa Jéova ka anprann to ?

¹⁶ Sa to pouvé fè. Lèspri sen-an ké idé to apliké sa to ka étidyé ké sa to ka li annan Labib-a. Kou moun-an ki ékri Psaume 86:11, fè sa lapriyè-a : « Anprann mo to chimen, o Jéova ! Mo ké maché annan to vérité. Fè mo gen rounsèl tchò pou mo gen lakrent pou to non ». Atò, kontinyé li ké étidyé Labib-a ké ròt piblikasyon òrganizasyon Jéova-a ka bay nou. Mé byen sonjé ki sa to lé, a pa gen konésans rounso. To lé ki vérité-ya ki annan Labib-a touché to tchò é fè to aji. Lèspri Jéova-a pouvé idé to fè sa. To lé osi ankourajé to frè ké sò-ya (Héb. 10:24, 25). Poukisa ? Paské yé sa to fanmi. Doumandé Jéova so lèspri sen pou to pouvé réponn ké to tchò pannan réinyon-yan, é fè tousa to pouvé pou byen fè sa yé ka bay to fè annan réinyon-yan, ki a roun diskour ki a roun sijè. A konsa to ké montré Jéova ké so Pitit ki to kontan so « brébi-ya » (Jean 21:15-17).

17. Kouman to pouvé montré ki to ka soutni òrganizasyon Jéova-a ?

¹⁷ Titalò, sèl òrganizasyon ki ké rété asou latè-a, a sa-la lèspri sen Bondjé ka dirijé. A pou sa, a pou to travay ansanm ké sa òrganizasyon-an ké tout to tchò. Kou Jéova, préché pou tout moun, pou montré ki to kontan yé é ki to pa ka fè préférans. Fè tousa to pouvé pou tout moun annan asanblé-a viv annan lapè, konsa to ké montré to ka imité Bondjé, ki kontan lò tout bagaj byen òrganizé é fèt annan lapè. Épi byen profité di tout ansèyman Jéova ka bay to. A konsa to ké montré to ka kouté to Gran Ansényan. Konsa, toupannan monn Satan-an tou pròch mouri, to pa ké pè. To ké pito kontinyé sèrvi Jéova ké kouraj ansanm ké tout sa ki annan so òrganizasyon.