1. Éé ní e neǹ Kráìst ea ni diìa múú é kilsĩ́ gè naa ẽ́?

É KỌỌ̀ o beè dììa múú? Beè vó, o náa kọ gbò nen á nyimá kọọ̀ ò dẹlẹ̀ẹ̀ nyíé boo Jìhóvà vaá ò diè kpènà ló gè zọ̀ a bõ̀ònatõ̀ò * siá tóm. Kọ̀láá bé ea dì naa, à bọ́ló kọ zìgà eo íè mm̀ Jìhóvà á kilsĩ́ gè bọọ dọ ló. Vaá à dú bíi kọ ó àgala boo kọọ̀ Jìhóvà dì ea gé tú a bõ̀ònatõ̀ò siimá tóm deè nieí.

2-3. Mósĩ́ deè ní e Jìhóvà gé túlè a bõ̀ònatõ̀ò deè niéi é? Nè nu dòòmà bá.

² Bé e Jìhóvà dì ea gé túlè a bõ̀ònatõ̀ò deè nieí naa tẹ́lẹ bàlà kẽ íb nen e ẹlẹ dú, a tóm̀ bùlà, nè gbò a nòòkúu. Naanii mè é zẹ́ẹ́ bugi togó boo taà kà kpãà Jìhóvà ea dọa bàlà kẽ mm̀ a bõ̀ònatõ̀ò.

³ Túá kà, “tẽ̀ènè íb bá ní e Bàrì túmá kọ̀láá nen é.” (Tóm 10:34) Vulè ní ea beè naa kọọ̀ Jìhóvà á tú a Sã́áná nè boo béè ge “aalá dénè gbò nen” ẽ́. (1 Tím. 2:6; Jọ́ọ̀n 3:16) Jìhóvà ólò tú pá a gbò kọọmá kpẹ̀a nè kọ̀láá gbò e bà gbĩ́ gè ié bélè lọl ló ààaá kọbé bà láá dùùà. Ní ea égè bàà kà, Jìhóvà níì Bàrì laga laga nì, sõò ẹ̀ẹ̀ Bàrì fẹ́ẹ́ fẹẹ̀ ló. (1 Kọ́r. 14:33, 40) Vóà naa, èé ẹbmà dẽe kọọ̀ pá a gyóòlo é fã́e dì belí gbò e bà ólò naa nú boo kúu nè mm̀ fẹ́ẹ́-fẹẹ̀ ló. Ní ea égè taà kà, Jìhóvà dú “Pọ̀b Kà Neǹ Nòòmà Nù.” (Àìz. 30:20, 21) Níà nú ea náa vaá a bõ̀ònatõ̀ò ólò tú agẹbá siimá tóm gè noòmà Kpá Káí gbò e bà di mm̀ bõ̀ònatõ̀ò nè gbẹá ól tóm kọ̀ kpẹ̀a ẹ́. Mósĩ́ deè ní e gbò e ba beè di mm̀ bõ̀ònatõ̀ò mm̀ túá gbò gbááá beè nó taà kà gbò kpãa e Jìhóvà íei é? Mósĩ́ deè ní e gbò níí Jìhóvà gé nó gbò kpãaí mm̀ beélè tṍóí ẽ́? Vaá mósĩ́ deè ní e nyómá káí é láá nvèè bá nè ni tṍó eo gé zọ bõ̀ònatõ̀ò Jìhóvà siá tóm deè niéi é?

4. Dẹ̀ẹ̀a boo nú ea di mm̀ kpá Tóm 1:8, éé ní e Jíízọ̀s beè kọ́ nè pá a gbò nyòòne nvée kọ bàá náa ẽ́, vaá mókà nvèè bá ní e ba beè íe é?

⁴ Mm̀ túá gbò gbááá. Kpẹ̀a e Jíízọ̀s beè kọ̀ beè naa kọọ̀ dénè nen á ié bol dẽe sĩ́. (Lúùk 4:43) A beè kọ́ nè pá a gbò nyòòne nvée kọ bàá kilsĩ́ gè sí tóm e ẹlẹ beè daamàè togóá, ea dú gè sí neǹ ditõ̀ò imá “ke kùbmà bàlà booí.” (Bugi Tóm 1:8.) Kọ̀láá bé ea dì naa, bà náa gé láá sí tómá boo ba lóó. Bàé íe bíi ló nyómá káí, ea dú “Nen Nvèè Bá” e Jíízọ̀s beè zìgà kọ àé neè vaá.—Jọ́ọ̀n 14:26; Zèk. 4:6.

5-6. Mókà gbò sĩ́deè ní e nyómá káí beè nvèè bá nè gbò nyòòne nvéè Jíízọ̀s e?

⁵ Gbò nyòòne nvéè Jíízọ̀s beè ié nyómá káíá kà lèlà deè Péntikọ̀st 33 C.E. Tení dú ló nvèè bá ea aa bá nyómá káíá, ba beè gbẹá boo dààmà togó gè kọ́ kpẹ̀a, vaá pọ́ì ńkem̀ tṍó aa ló tṍóá, gã́bug gbò nen beè dã́ lé kpẹ̀aá. (Tóm 2:41; 4:4) Tṍó e bà náa uú vá boo, gbò nyòòne nvéè Kráìsta náa beè siiá pọ̀, tãa vó ba beè bàn nvèè bá lọl bá Bàrì. Ba beè bàn Bàrì kọọ̀: “Vaá ò néi taaà ló gè naa kọ é ló o mon bel.” Nyómá káí Bàrì beè gbóó bã̀ vá m vaá bà gbóó dààmà togó gè “ié taaà ló gè ló mon bel Bàrì.”—Tóm 4:18-20, 29, 31.

⁶ Gbò nyòòne nvéè Jíízọ̀s beè kpee nagé sĩ́ ló dõòna kà gbò nu ànà-ànà. Dì belí nu dòòmà bá, bà náa beè ié gã́bug kpoò Kpá Káí. Bà náa beè ié nágé dõòna kà gbò kpá ea baatẽ́ Kpá Káí dì belí bé e beele íè naá deè nieí. Vaá gbò nyòòne nvéeá géè kọ́ kpẹ̀a nè gbò e bà ólò ló kele-kele dém bel. Kè bá dénè gbò ànà-ànàa, gbò nyòòne nvée e bà íe bẹ̀à sã́ bùlàa beè sí tóm ea beè tõó vá ló belí kọ náa é válíá. Mm̀ bé ea é láá dú 30 gbáá, ba beè naa kọọ̀ lé kpẹ̀aí á “zaala dénè ke tõ̀ò boo sãa bàlà booí.”—Kọ́l. 1:6, 23.

7. Nú ea sígá ló 100 gbáá ea kil nvéeá, mósĩ́ deè ní e gbò gyóòlo Jìhóvà beè nyimá ló nú e Bàrì gbĩ́ kọ bàá naa ẽ́, vaá éé ní e ba beè naa ẽ́?

⁷ Mm̀ beélè deeí. Jìhóvà dì ea gé kilsĩ́ gè tulè vaá siè kpóó ló pá a gbò deè nieí. Kọ̀láá bé ea dì naa, è ólò bọọgẹ̀ ié tùleí lọl mm̀ Kpá Káí e ba beè emí kè bá tùle a nyómá káí. Mm̀ Kpá Káí ní e bugì nú ea kil ló sìtóm Jíízọ̀s nè log ea beè nè pá a gbò nyòòne nvée kọ bàá kilsĩ́ gè kọ́ kpẹ̀a e ẹlẹ beè dààmà togóá ẹ́. (Máát. 28:19, 20) Màgàzíìn e ba beè emí tã́gíní July 1881 na kọ́ọ̀: “Bà náa beè kolíi, àbèè ge tṍi nóo ból kọbé gbò nen nveèi ka ló àbèè boo béè ge ié gã́bug gyọ́, sõò boo béè ge kọ é tú kọ̀láá kà nú e íè vèèmà lé kpẹ̀aí.” Ene kà ńkem̀ kpoò kpá e ba beè emí mm̀ gbáá 1919 ea kọlà, To Whom the Work Is Entrusted beè kọọ̀: “Tómí beè sẹlẹ ló belí kọ à agà, sõò à dú tóm Bàrì, vaá àé néi kpóó gè siimá.” Mm̀ kà kà, dì belí gbò níí Kráìst e ba beè di mm̀ túá gbò gbááá, pá vígàí beè tú agẹ ló siimá tómá vaá dẹlẹ nyíé boo kọọ̀ nyómá káí Bàrì é nveenìè bá neè va kọ bàá láá kọẹ̀ kpẹ̀a neè dénè nen. Beele dẹlẹ̀ nàgé nyíé boo kọọ̀ á nyómá káí é nveè bá nè beele deè nieí.

8-9. Mókà gbò sĩ́deè ní e bõ̀ònatõ̀ò Jìhóvà gé kọ́ọ́má kpẹ̀a deè nieí é?

⁸ Bõ̀ònatõ̀ò Jìhóvà a tú kà lé nuù tóm ea tõo lọ̀l vaá à lee e bà íe kọọmá kpẹ̀a. Gbò nuù tómí bãàa mm̀ gbò kpá e bà émí, “Photo-Drama of Creation,” phonograph, faà e bà nveè kpẹ́ boo, nè radio broadcast, vaá deè nieí bà gé tú kòmpútà nè íntanèt kọọmá kpẹ̀aí. Kátogóí, bõ̀ònatõ̀ò Bàrì a tabgi kpá nvee mm̀ kele-kele dém bel èlmà bé ea beè olòó dì naa! Boo béè éé? Kọbéè kọ̀láá nen dã́ lé kpẹ̀aí mm̀ ba dém bel. Tẽ̀ènè íb bá ní e Jìhóvà ólò tuumá kọ̀láá nen ẽ́; a beè kọ́ gbẹẹ́ kẽ kọọ̀ bàé vee lé kpẹ̀aí “nè dénè nen e a di bàlà boo, e a dú gbò e bà íe kele kele mèà, vaá aa kele kele  gã, vaá ló kele kele dém bel, vaá dú kele kele kpá dó.” (Kùùà 14:6, 7) À gbĩ́ kọọ̀ lé kpẹ̀aí á iná ló kọ̀láá nen.

⁹ Èé kọ́ vàẹ kilma ló gbò e bè née é láá kọ́ kpẹ̀a nè va gbẹá ba be, be à sẹlẹ boo béè kọọ̀ bà di mm̀ be kiẽ́e e neǹ kùdẽe ló dì àbèè kọọ̀ bà íílá naa ní e bè née é láá bã̀ ẽ? Kọbé è láá kọ́ kpẹ̀a nè gbòí, Jìhóvà beè nvèè bá nè a bõ̀ònatõ̀ò kọ bàá noo dõòna bá gè kọọmá kpẹ̀a. Dì belí nu dòòmà bá, mm̀ gbáá 2001, Gbò Ge Tulè Tóm beè tenmá kọ bàá tú nuù ge lẹ́ kpá boo bií ló dõòna kà bá gè nèèmà bẹẹ gbò kpá kọọmá kpẹ̀a gbẹá France. Vaá tṍó e tṍó téní, ba beè dààmà togó gè tú kọọmá nágé kpẹ̀a gbẹá dõòna kà gbò dó. Kà lé nu beè sìlà aa m. Ba beè dààmà togó ãa nòònù gbẹá United State, mm̀ gbáá 2011, gbẹá enè ketõ̀ò ea di New York City e gbò nen ólò di ḿ-má. Túá gbáá, ba beè dõo 102,129 kpoò kpá vaá nè 68,911 màgàzíìn. Vaá 4,701 nen beè bĩiná kọ bàá noòmàè va Kpá Káí! Mm̀ kà kà, nyómá káí di nvéè tómí. Gbò Ge Tulè Tóm beè tenmá kọọ̀ pá vígà á tú nu gè lẹ́ kpá booá kọọmá kpẹ̀a gbẹá kọ̀láá ketõ̀ò ea di bàlà booí.

10. Éé ní eé láá naa kọbé è láá kpáá palàge kọ́ kpẹ̀a vaá noòmà nu ẽ́?

¹⁰ Nú e olo é láá naa. Gbẹá bẹẹ gbò nònù, Jìhóvà ólò bumái kọ é láá kọ́ kpẹ̀a. Tú gbò búmá eo ni íéá siimá tóm. Olòó gbaá dẽè pá bọọ bõ̀ònatõ̀ò e ba beè dõo kọ ó olòó zọ̀ kọ́ kpẹ̀a. Bàé láá nvèè bá nè ni kọ ó láá palàge kọ́ kpẹ̀a vaá noòmà nu, nè ge siè ni kpóó ló tení dú ló ba lé nu dòòmà bá. Kilsĩ́ gè kọ́ kpẹ̀a bã̀àna tṍó eo di kè bá tàvàlà dìtõ̀ò. Dì belí bé e dọ̀ Kpá Káí e togó belí dẹ̀ẹ̀a boo kẽeí nyíé naa, kọbé è láá naa bùlà Bàrì, née é dẹẹ̀a boo beélè kpóó, sõò èé dẹẹ̀a boo nyómá káí Bàrì. (Zèk. 4:6) È agàla boo kọọ̀ Bàrì é néi kói gè siimá a tóm.

11. Mósĩ́ deè ní e gbò ge tulè tóm e ba beè di mm̀ túá gbò gbááá beè naa kọọ̀ gbaa ló á di zẹ̀ẹ̀ gbò níí Bàrì e?

¹¹ Mm̀ túá gbò gbááá. Gbò ge tulè tóm e ba beè di Jèrúsalẹ̀m beè gbá olòó siá tóm mm̀ ge mòn kọọ̀ gbaa ló nè fẹ́ẹ́-fẹẹ̀ ló dí zẹ̀ẹ̀ gbò níí Bàrì. (Tóm 2:42) Dì belí nu dòòmà bá, tṍó e bel ge kòòà beè bã kẽ nyòòmà bé  ea é dú mm̀ gbáá 49 C.E., gbò ge tulè tómá beè kpoogè dee ló belá tení dú ló nvèè bá ea aa bá nyómá káí. Be à gá náa vaá bõ̀ònatõ̀òa beè pòòa boo béè belí, à gáẹ̀ beè tãagẽ tóm kọ̀ kpẹ̀a. Náa kal ló béè kọọ̀ ba beè dú pá Júù, gbò tómá nè gbò kànená náa beè zìgà kọọ̀ nàànù pá Júù àbèè níí gbò e bà gé nveè sãa kúm á tãagẽ̀è ba béèlàfùl. Sõò ba beè ẹ̀b mm̀ Kpá Káí vaá bàn nyómá káí Bàrì kọ á nveenìè bá neè va kọ bàá láá neè lé béèlàfùl. (Tóm 15:1, 2, 5-20, 28) Éé ní ea beè sìlà aa m-mé? Jìhóvà beè tãànè dee bá ba béèlafùl, naa ní e fẹ́ẹ́-fẹẹ̀ ló nè gbaa ló beè di mm̀ bõ̀ònatõ̀òa vaá ba beè kilsĩ́ gè kọ́ kpẹ̀a.—Tóm 15:30, 31; 16:4, 5.

12. Éé ní ea zógè kọọ̀ gbaa ló nè fẹ́ẹ́-fẹẹ̀ ló di mm̀ bõ̀ònatõ̀ò Jìhóvà deè nieí é?

¹² Mm̀ beélè deeí. Bõ̀ònatõ̀ò Jìhóvà a tú agẹbá siimá tóm mm̀ ge naa kọọ̀ fẹ́ẹ́-fẹẹ̀ ló nè gbaa ló á di zẹ̀ẹ̀ gbò níí Jìhóvà. Zion’s Watch Tower nè Herald of Christ’s Presence níí November 15 1895, beè faalá ene kà togó bel ea kọ́ọ̀: “Decently and in Order,” ea dẹẹ̀a boo nú ea di mm̀ 1 Kọ́rìnt 14:40. Kpáá beè kọọ̀: “Gbò tómá beè emí gã́bug nu má bõ̀ònatõ̀ò gbò níí Kráìst mm̀ túá gbò gbááá ea kil ló gè naa nú boo bá ea bọ́ló . . . À palàge bọ́ló kọ é gbàn tṍ ló ‘kọ̀láá kà nu e ba è emí m Kpá Káí, . . . m ge dòmà bá nu nè beele.’ ” (Róm̀ 15:4) Mm̀ kà kà, bõ̀ònatõ̀ò Jìhóvà deè nieí ólò si nágé tóm agẹlẹ bá mm̀ ge naa kọọ̀ fẹ́ẹ́-fẹẹ̀ ló nè gbaa ló á di mm̀ bõ̀ònatõ̀ò belí bé ea beè dì nàgé naá mm̀ túá gbò gbááá. Ge baatẽ́: Be à gá náa ò sí nònù Kpá Tọ Kùdẽe Ló níí dõòna kà bõ̀ònatõ̀ò—bã̀àna níí dõòna kà dó—òó nyímá bé e bà ólò sẹlẹ nònùa naa nè togó bel e bàé nó. Tẽ̀ènè tṍóá, lóó ni é dĩìnà belí kọ ò di be! Áá nyómá káí Bàrì ní ea é láá naa kọọ̀ níí á valí é!—Zèf. 3:9.

13. Dẹ̀ẹ̀a boo nú ea di mm̀ kpá Jém̀z 3:17, mókà gbò bíb ní eé bĩ́ìnà bẹẹ bá ẹ́?

¹³ Nú e olo é láá naa. Jìhóvà gbĩ́ kọọ̀ pá a gbò á ié “fẹ́ẹ́ fẹẹ̀ ló e a [bọ́bví va] naamá tẽ̀ènè kà.” (Ẹ́fẹ. 4:1-3) Vóà naa, bĩiná o bá kọọ̀: ‘É kọ nda ólò naa gé kọọ̀ fẹ́ẹ́-fẹẹ̀ ló nè gbaa ló á di mm̀ bõ̀ònatõ̀ò? É kọọ̀ nda ólò gbàn gé tṍ ló gbò e bà gé túlèí mm̀ bõ̀ònatõ̀ò? É kọọ̀ dõòna gbò é láá dẹlẹ́m nyíé boo, èlmà tõ̀ò be m̀ íè dọ̀ tóm gè sí mm̀  bõ̀ònatõ̀ò? É kọ m̀ ólò dú boo tṍó, láá nvèè bá, vaá di kpènà ló gè sí tóm nè dõòna gbò?’ (Bugi Jém̀z 3:17.) Be ò mon gbò kiẽ́e eo é láá kpáá naa leevè, bàn nyómá káí Bàrì kọ á nveenìè bá neè ni. Bé eo sọọ̀ tọ́ deè kọ á nyaaná íb nen eo dúù nè o láb naa, níà bé e pá vígà é vulè ni vaá nvèè ni ka ló naa ẽ́.

14. Dẹ̀ẹ̀a boo nú ea di mm̀ kpá Kọ́lọsì 1:9, 10, mósĩ́ deè ní e Jìhóvà beè bumá pá a gbò mm̀ túá gbò gbááá ẹ́?

¹⁴ Mm̀ túá gbò gbááá. À ólò leemá Jìhóvà ge bumá pá a gbò. (Ps. 32:8) A beè gbĩ́ kọ bàá nyimàèe ló, vulèè e, vaá tõó dùm dọ̀ dè-dè dì belí gbò pá nvín e ẹlẹ vulè. Dénè níí náa gáẹ̀ láá naaá be ẹlẹ náa beè bumá va. (Jọ́ọ̀n 17:3) Jìhóvà beè bumá pá a gbò tení dú ló a bõ̀ònatõ̀ò ea beè di mm̀ túá gbò gbááá. (Bugi Kọ́lọsì 1:9, 10.) Nyómá káí—ea dú “Nen Nvèè Bá” e Jíízọ̀s beè zìgà nè vaá—beè palàge nvèè bá nè va. (Jọ́ọ̀n 14:16) A beè naa kọọ̀ gbò nyòòne nvéeá á kpáá palàge dã́ ból ló Kpá Káí, vaá kẽ̀èa boo dénè nú e Jíízọ̀s beè kọ̀ vaá naa, e tṍó e tṍó téní a beè dú gè bugí mm̀ kpá Máátìù, Máàk, Lúùk, nè Jọ́ọ̀na. Nakà dã̀ ból ló nu beè siè kpóó ló zìgà gbò níí Kráìst mm̀ túá gbò gbááá vaá naa kọ bàá palàge vùlè Bàrì, a Sã́áná, nè ge vùlè ene.

15. Mókà gbò sĩ́deè ní e olo ni mon bé e Jìhóvà ni ḿm̀-mè a zìgànù ea di mm̀ kpá Àìzáíà 2:2, 3 naa ẽ́?

¹⁵ Mm̀ beélè deeí. Jìhóvà beè kọ́ gbẹẹ́ kẽ kọọ̀ “mm̀ gbò dee deè nvéè dee,” gbò nen é konà dú boo a gù, naamá gè gbaá dẽè gbò e bà gé fã́e. (Bugi Àìzáíà 2:2, 3.) È monì kọọ̀ nakà kọ́ọ̀ bùlà Bàrìí gé ḿḿ-má. Èé láá mòn kọọ̀ kà kà fã̀ palàge léè èl kọ̀láá kà kyáà fã̀. Vaá Jìhóvà dì ea gé náa kọọ̀ pá a gbò á dã́tẽ́ ló gã́bug nú ea di mm̀ Kpá Káí! (Àìz. 25:6) Tení dú ló “nen tóm e a nyímá nu vaá bọ́ ló dẹ̀lẹ̀ nyíe boo,” à dì ea gé néi kọ̀láá kà búmá e íè bíi ló mm̀ kele-kele sĩ́deè. Dì belí  nu dòòmà bá, èé láá bugi kpá, pãane tṍ ló lòbèl, vaá ẹ̀bgì vídiò. (Máát. 24:45) Beele íè tẽ̀ènè íb tọa ló e neǹ kọ́ọ̀ bùlà Bàrì Èláíhù beè iéá, tṍó ea beè kọọ̀: “Mée ní ea é láá kpáá noòmà nu belí [Bàrì] e?”—Jóòb 36:22.

16. Éé ní eo é láá naa kọbé ò sim kilsĩ́ mm̀ ge fã̀ Jìhóvà ẹ?

¹⁶ Nú e olo é láá naa. Nyómá káí Bàrì é nveè bá nè ni kọ ó láá tú gbò nú eo ni bugi vaá nó lọl mm̀ Kpá Káí siimá tóm. Tã̀àgã ló Bàrì dì belí neǹ ọ́lì sọ́l ea beè kọọ̀: “Noòmàm o èèlè, e Jìhóvà. Nda é nyoone nvéè o kà kà bel. Nèm tẽ̀ènè ból nyíe naa ní em é láá siiá pọ̀ ló o bée.” (Ps. 86:11) Kilsĩ́ gè bugi vaá ò nó Kpá Káí nè gbò kpá e bõ̀ònatõ̀òí ni émí. Kọ̀láá bé ea dì naa, o nu sẹ̀ẹ̀a sĩ́ níì áá gè ié nyìmànù nì. Ò gbĩ́ì ge palàge àgala boo kà kà belí vaá tú siimá tóm mm̀ o dùm. Nyómá káí Jìhóvà é láá nvèè bá nè ni kọ ó naa vó. Be à sẹlẹ ò gbĩ́ì ge siè nàgé kpóó ló gbò vígà págbálà nè pábia. (Híb. 10:24, 25) Lóó éé? Boo béè kọọ̀ bà dṹùnà pá o tọ eo gé gbái fãi Bàrì. Bàn nyómá káí Bàrì kọ á nvèènìè bá neè ni kọ ó láá olòó neè kà lé ààla bel gbẹá nònù nè ge naa nú eo kpóó sim tùlà tṍó eo íè nu gè naa gbẹá nònù. Mm̀ na gbò sĩ́deèí, ò zógè Jìhóvà nè a Sã́áná kọọ̀ olo vulèè ba “naanà ból” e bà nveè ka lóá.—Jọ́ọ̀n 21:15-17.

17. Mókà gbò sĩ́deè ní e olo é láá zogè kọọ̀ ò gé nveenìè sãa kúm bõ̀ònatõ̀ò Jìhóvà mm̀ bọ́ọ̀ló dẹ̀lẹ̀ nyíé boo é?

¹⁷ Pọ́ì ńkem̀ tṍó àla, áá tẽ̀ènè kà bõ̀ònaló e nyómá káí Bàrì gé túlè ní ea é dí boo kunukẽ̀í ẽ́. Vóà naa, tú bẹ̀à sã́ bùlà zọ̀ọ̀mà bõ̀ònatõ̀ò Jìhóvà siimá tóm. Zogè kọ ò vulèè kọ̀láá nen belí Bàrì tení dú ló gè kọ́ lé kpẹ̀aí nè kọ̀láá nen eo monì. Nó ẹlẹ tení dú ló gè naa kọọ̀ gbaa ló nè fẹ́ẹ́-fẹẹ̀ ló á di mm̀ bõ̀ònatõ̀ò. Pãane tṍ ló o Pọ̀b Kà Neǹ Nòòmà Nù tení dú ló gè ié bélè lọl ló kọ̀láá kà búma ea gé néi. Tṍó e kùbmà é bã́ ló bàlà boò Sétàní, pọ̀ náa é síí ni. Tãa vó, òó gbóó ié agẹló vaá gbaá dẽè gbò e bà di mm̀ bõ̀ònatõ̀ò Jìhóvà e bà gé fã́e mm̀ bọ́ọ̀ló dẹ̀lẹ̀ nyíé boo.