1. ¿Kasa ayatüinjatka waaʼinrüin süchikijee woutiisain waya?

WOUTIISALE waya, weeʼiyatüinjaʼa namüin na waneinnua sünain kanoulain waya nünain Jeʼwaa otta waʼyataweein nümüin sümaa tü nupueulosekat. * Wakooʼomüinrüinjatpejeʼe wanoula nünain Jeʼwaa otta weʼitaainjatü waaʼin sünain nuʼunirüin Jeʼwaa sukuwaʼipa tü nupueulosekat maaʼulu yaa.

2, 3. Püküja süchiki tü naaʼinrakat Jeʼwaa süpüla nuʼunirüin sukuwaʼipa tü nupueulosekat maaʼulu yaa.

² Nuʼunirüin Jeʼwaa sukuwaʼipa tü nupueulosekat maaʼulu yaa. Wayaawatüinjeseʼe saaʼu jamüin maʼin nukuwaʼipa, tü keeʼireekat naaʼin otta tü kasa wulekat noʼuluʼu. Sünain ekirajaayakat tüü, wekirajaajeerü anain apünüinsü kasa süshataka nupueulose Jeʼwaa nünainjee.

³ Tü palajatkat kasa shia nnojoluin koʼuin nukuwaʼipa sümüin wayuu (Aluw. 10:34). Süka aishaatain waya nüpüla Jeʼwaa, naapüin nikii chi Nüchonkai süpüla outajachin nia (1 Tim. 2:6; Juan 3:16). Nüküjirüin Jeʼwaa tü pütchi anasükat namüin na wayuu aapajeekana shia süpüla neʼrüin tü kasa anasü eekat sünainjee naapajiraain nikii Jesuu. Naaʼinrüin tia sükajee tü nupueulosekat. Tü wane, lotusü sukuwaʼipa süpüshuaʼa tü naaʼinrakat Jeʼwaa (1 Cor. 14:33, 40). Müsüjeseʼe lotuin sukuwaʼipa tü kasa naaʼinrakat na aʼyataashiikana nümüin. Tü chiiruaajatkat, nikirajüin waya Jeʼwaa (Is. 30:20, 21). Shia naaʼinmaaka na aʼyataashiikana nümüin Jeʼwaa nekirajüin wayuu sünain tü sümakat tü Wiwüliakat. Naaʼinrüin tia suluʼu tü outkajaaleekat jee naküjapa pütchi. ¿Kasa naaʼinraka na anoujashii namaiwajanakana süpüla nashatüin tia apünüinsükat  kasa naaʼinraka Jeʼwaa? ¿Kasa naaʼinraka na anoujashiikana maaʼulu süpüla nashatüin tia nukuwaʼipakat? ¿Kasa naaʼinraka Maleiwa nükajee chi naaʼinkai süpüla nükaalinjain waya sünain aʼyatawaa nümüin maaʼulu?

4. (1) Saashin Aluwataaushikana 1:8, ¿kasa nuluwataaka anain Jesuu na nikirajüinkana? (2) ¿Jara akaalinjeenaka naya sünain aaʼinraa tia aʼyatawaakat?

⁴ Nakalioʼu na anoujashii namaiwajanakana. Aʼatapüsü wayuu kasa anasü sünainjee tü pütchi nüküjakalü achiki Jesuu (Luc. 4:43). Nuluwataain Jesuu na nikirajüinkana süpüla ayatüin naaʼinrüin tü aʼyatawaa niʼitaakalü ekii napüleerua, naküjainjatü tü pütchikat «suluʼupünaa süpüshuaʼa mma wattapünaa» (paashajeʼera Aluwataaushikana 1:8). Nnojotpejeʼe nounteerüin tia sükajee naaʼin namüiwaʼa, choʼujaasü namüin nakaalinjünüin nutuma chi naaʼinkai Maleiwa, chi akaalinjai nüküjakai achiki Jesuu (Juan 14:26; Zac. 4:6).

5, 6. ¿Kasa nountaka na nikirajüinkana Jesuu nükajee chi naaʼinkai Maleiwa?

⁵ Soʼu tü Pentecostés eejatkat soʼu juyakat 33, antüshi chi naaʼinkai Maleiwa naaʼu na anoujashiikana. Akaalinjünüshii naya nutuma chi naaʼinkai Maleiwa, oʼttamaatüshii naya sünain aküjaa pütchi otta awainmalaamaatüshii na wayuu aapaakana sümaa tia pütchikat (Aluw. 2:41; 4:4). Wanaa sümaa süpülajünüin aküjaa pütchi noulia na anoujashiikana nünain Jesuu, nnojoishii naya eimmolojooin, achuntushii naya kaalinwaa nümüin Maleiwa. Anuu nanüiki: «Paapa wamüin wayakana püchepchiakana wane meimolüinyüü sünain aküjaa tü pünüikikat». Katchinkalaka maʼin chi naaʼinkai Maleiwa naaʼu. «Naküjakalaka nünüiki Maleiwakai sünain nnojoluin suʼttüin mmoluu nanain» (Aluw. 4:18-20, 29, 31).

⁶ Eetaasü wanee kasa alataka namüin na nikirajüinkana Jesuu. Palirü tü karaloʼuta nünüikimaajatkat Maleiwa eejatkat soʼu tia, nnojotsü eejatüin namaʼana tü karaloʼuta eekalü wamaʼana maaʼulu yaa, tü wayaawatakalü akajee tü sümakat tü Wiwüliakat. Jee müsia, aküjainjana naya pütchi namüin wayuu aashajaakana wanee naata anüikii. Kapüleepuʼusü maʼin tia namüin paala, shiasaʼa maʼaka saaʼin soʼu apünüin shikii juya, aküjashii naya pütchi «sümüin wayuu sainküin mmakat süpüshua» (Col. 1:6, 23).

7. (1) ¿Jamüsü süpüla nayaawatüin saaʼu na aʼyataashiikana nümüin Maleiwa naaʼinmaainjatüin tü naʼyataainkat nümüin? (2) ¿Kasa naaʼinraka süpüla nountuin tia?

⁷ Wakalioʼu. Ayatayülia nuʼunirüin Jeʼwaa sukuwaʼipa tü nupueulosekat otta nükatchinrüin naaʼin süpüla nekeraajüin tü naʼyataainkat nümüin. Naaʼinrüin tia sükajee tü Wiwüliakat. Aküjünüsü suluʼu tü Wiwüliakat süchiki tü niʼyataainkat Jesuu jee süchiki tü nuluwataakalü anain na nikirajüinkana süpüla ayatüinjanain naya sünain tü aʼyatawaa niʼitaakat najapuluʼu (Mat. 28:19, 20). Anuu tü ashajünakat suluʼu Aapiria Wayuu ojuʼitaka juulioʼu soʼu 1881: «Nnojoishii waya aneekuushin süpüla kojutuinjanain waya sutuma wayuu otta süpüla washirüinjanain waya. Aneekuushii waya süpüla waʼyataainjanain nümüin Maleiwa jee waküjainjanain maʼin tü pütchi anasükat». Anuu tü aküjünakat suluʼu tü karaloʼutakat To Whom the Work Is Entrusted (Na eʼitaanakana ajapuluʼu tü aʼyatawaakat), ojuʼitaka soʼu tü juyakat 1919: «Aʼyatawaa maʼin tia. Nukatchireetpejeʼe waaʼin chi Senyotkai nükajee chi naaʼinkai Maleiwa süpüla wountuin tia aʼyatawaakat». Naaʼinmaasü tü aküjaakat pütchi wawalayuukana naainnua maʼaka naaʼinrüin shia na anoujashii namaiwajanakana otta neʼitaain naaʼin sünain nakaalinjüneenain nutuma Maleiwa nükajee chi naaʼinkai süpüla naküjainjanain pütchi sümüin wayuu maʼleekalia. Akaʼaya wayakana maaʼulu, weʼitaain waaʼin sünain nükaalinjeenain waya Maleiwa nükajee chi naaʼinkai.

8, 9. ¿Kasa süküjaka aka pütchi tü nupueulosekat Jeʼwaa?

⁸ Anasü maʼin tü kasa süküjakalü akajee pütchi tü nupueulosekat Jeʼwaa. Aküjasü shia pütchi  sükajee karaloʼuta, sükajee tü kanüliakat «Foto-Drama de la Creación», gramófonos, kemion kaaʼuka ajaʼapüjia pütchi jee suluʼupünaa raawia. Otta maaʼutpünaa, aküjünüsü pütchi suluʼupünaa computador jee Internet. Wainmaitpa karaloʼuta ashajünaka suluʼu wainma anüikii sutuma tü nupueulosekat Jeʼwaa. ¿Jamüsü saaʼinraka tia? Shia süpüla saapüinjatüin wayuu maʼleekalia tü pütchi anasükat suluʼu sünüiki. Nnojotsü koʼuin nukuwaʼipa Jeʼwaa sümüin wayuu, nüküjainjeseʼe süküjünüinjatüin tü pütchi anasükat «sümüin eʼirukuukat süpüshua sainküin mmakat süpüshua» (Alat. Map. 14:6, 7). Nücheka achikit Maleiwa saapüinjatüin wayuu maʼleekalia süchiki tü Nuluwataayakat.

⁹ ¿Jamüsü sukuwaʼipa süpüla süküjünüin pütchi namüin na wayuu kepiakana suluʼu edificio eere nnojoluin süpüla sülatüin wayuu? Süpüla süküjünajatüin pütchi namüin wayuukana naainnua, nükaalinjain Jeʼwaa tü nupueulosekat süpüla süküjünüin pütchi eere jouluin wayuu. Jamüsüjaʼa soʼu tü juyakat 2001, «anasü süküjünüle pütchi süka kareetachon otta süka meesa chaa Francia otta suluʼu waneirua mma», müshii na Laülaashii Jülüjakana Aaʼin na Aküjaliikana Pütchi, anakuwaʼipatsü tia. Ooʼulakünüsü tia soʼu 2011 chaa Nueva York (Estados Unidos). Soʼu tü palajatkat juya, aapünüsü sümüin wayuu 102.129 karaloʼuta otta 68.911 rewiisüta. Eeshii 4.701 wayuu achuntakana ekirajawaa sünain tü Wiwüliakat. Wayaawatüin sükajee tia, nuʼunirüin Jeʼwaa sukuwaʼipa tia aʼyatawaakat nükajee chi naaʼinkai. Naneekaka na Laülaashii Jülüjakana Aaʼin na Aküjaliikana Pütchi, süküjünüinjatüin pütchi sükajee kareetachon jee sükajee meesa sainküin tü mmakat.

10. ¿Kasa waaʼinrajatka süpüla watüjain maʼin aküjaa pütchi otta ekirajaa wayuu?

¹⁰ Tü anakat süpüla waaʼinrüin. Wajayata nikirajüin waya Jeʼwaa sünain tü outkajawaakat süpüla watüjainjanain aküjaa pütchi. Wojuʼitawai sünain aküjaa pütchi namaa na wawalayuu waküjakana amaa pütchi. Eere wanee kasa wanoutajatka, nakaalinjeena waya na wawalayuukana süpüla watüjainjanain aküjaa pütchi jee wekirajüin wayuu, natütüleʼereerü waaʼin sükajee tü nakuwaʼipakat. Ayataʼaya waküjain pütchi mayaainjeʼe kapüleein shia wamüin. Maʼaka süküjünüin suʼttiajee pütchikat tüü, nnojoleerü wekeraajüin tü waʼyataainkat nümüin Jeʼwaa sükajee watchin wamüiwaʼa, wekeraajeerü shia sükajee wakaalinjünüin nutuma nükajee chi naaʼinkai  (Zac. 4:6). Nükatchinreerü waaʼin Jeʼwaa süka waʼyataain nümüin.

11. ¿Kasa naaʼinraka na laülaashii jülüjakana aaʼin na anoujashii namaiwajanakana süpüla paaʼinwainjanain na aʼyataashiikana nümüin Jeʼwaa?

¹¹ Nakalioʼu na anoujashii namaiwajanakana. Na laülaashii jülüjakana aaʼin na anoujashii namaiwajanakana, aʼyataashii maʼin naya süpüla paaʼinwainjanain na anoujashiikana nünain Maleiwa (Aluw. 2:42). Jamüsüjaʼa soʼu tü juyakat 49, naapa achikit na laülaashii jülüjakana aaʼin na anoujashii namaiwajanakana mojujiraain na anoujashiikana saaʼujee choʼujaain süchoteʼennüin nata. Nuʼunirüin Maleiwa nakuwaʼipa na aluwataaushikana nükajee chi naaʼinkai süpüla naashajiraainjanain sooʼopünaa tia. Müleka nnojorüle paaʼinwajiraain na anoujashiikana, nnojoishiijeʼe ayatüin naya sünain aküjaa pütchi. Mayaainjeʼe judíoin na aluwataaushikana jee na laülaashiikana chaʼayaa, nnojotsü noʼunirüin nakuwaʼipa sükajee nakuwaʼipapala na judíokana jee nnojotsü noʼunirüin nakuwaʼipa sükajee tü namakat na ichekana süchiirua tia akuwaʼipaakat. Shia noʼuniraka akajee nakuwaʼipa tü Nünüikikat Maleiwa otta nükajee chi naaʼinkai (Aluw. 15:1, 2, 5-20, 28). ¿Kasakaʼa neʼrüin sünainjee tia? Anakuwaʼipatsü tü kasa naneekakat nutuma Jeʼwaa, anajiraashii jee paaʼinwashii na anoujashiikana otta ayatüshiʼiya naya sünain aküjaa pütchi (Aluw. 15:30, 31; 16:4, 5).

12. ¿Jamüsü watüjaaka saaʼu paaʼinwain jee lotuin sukuwaʼipa tü naaʼinrakat na anoujashiikana maaʼulu yaa?

¹² Wakalioʼu. Aʼyataasü maʼin tü nupueulosekat Jeʼwaa süpüla paaʼinwainjanain jee lotuinjatüin sukuwaʼipa tü naaʼinrakat na anoujashiikana. Soʼu 1895, aküjünüsü suluʼu Aapiria Wayuu ojuʼitaka suluʼu Inglés soʼujatka nowienpüroʼu 15, tü pütchi kanüliakat «Lotusü sukuwaʼipa süpüshuaʼa tü jaaʼinrakat». Ayuʼluushi tia pütchikat suluʼujee 1 Corinto 14:40, anuu tü sümakat: «Wainma tü karaloʼuta nashajakat na aluwataaushikana namüin na anoujashiikana süpüla lotuinjatüin sukuwaʼipa tü naaʼinrakat [...]. Anashii waapaale sümaa tü pütchi ashajünakat paala süka saamüin maʼin wamüin tia» (Roma 15:4). Maʼaka naaʼin na anoujashii namaiwajanakana, paaʼinwainjana jee lotuinjatü sukuwaʼipa tü naaʼinrakat na anoujashiikana maaʼulu. Jamüshijaʼa puʼunule suluʼumüin wanee mma naata jee puʼunule sünain tü outkajawaakat eere shikirajaanüin anain  Aapiria Wayuu, pütüjaa aaʼu tü sukuwaʼipainjatkat tia ekirajawaakat otta tü pütchi ekirajaanajatkalü anain, nnojoluichipa müin naatakai paaʼin chayaa. Niaʼala neʼe chi naaʼinkai Maleiwa wountakai akajee paaʼinwain waya (Sof. 3:9, noota).

13. ¿Kasa wasakirüinjatka anain waaʼin sünainjee tü sümakat Santiago 3:17?

¹³ Tü anakat süpüla waaʼinrüin. Nücheka achikit Jeʼwaa nnojoluinjanain waʼülüjiraain, nnojoluinjanain watkaajiraain süka eeichipain chi naaʼinkai Maleiwa suluʼu waaʼin, chi akaalinjakai waya süpüla wanaawajiraainjatüin waaʼin (Éf. 4:1-3). Wasakira waaʼin sünain tüü: «¿Tachajaainche sukuwaʼipa süpüla paaʼinwajiraain jee anajiraain taya namaa na tawalayuukana? ¿Jüüjüüshiche taya namüin na wawalayuu laülaakana wapüleerua? Saapünüle aʼyatawaa tamüin suluʼu tü outkajaaleekat, ¿neʼitaajeetche naaʼin na wawalayuukana tanain? ¿Antawaishiche taya maalü sünain wanee kasa? ¿Takaalinjeeinche maʼin na wawalayuukana?» (paashajeʼera Santiago 3:17). Eere wanee kasa wanoutajatka sünain wakuwaʼipa, wachunta chi naaʼinkai Maleiwa nümüin. Woʼunirüle wakuwaʼipa nükajee jee sukuwaʼipa tü kasa waaʼinrakat, aijeena waya napüla na wawalayuukana jee kojuteerü namüin tü waaʼinrakat.

14. Sünainjee tü sümakat Colosas 1:9, 10, ¿kasa naaʼinraka Jeʼwaa süpüla nikirajüin na anoujashii namaiwajanakana?

¹⁴ Nakalioʼu na anoujashii namaiwajanakana. Anasü nümüin Jeʼwaa nikirajüin waya (Sal. 32:8). Nücheka achikit Jeʼwaa weʼraajüinjachin nia, alinjachin nia wapüla otta katüinjatüin woʼu süpüla kaʼikat süpüshuaʼa. Wountuin tia süka nikirajüin waya (Juan 17:3). Nikirajüin tü nupueulosekat sümaiwa paala nakajee na anoujashiikana nükalioʼu Kürisüto (paashajeʼera Colosas 1:9, 10). Nükaalinjain Jeʼwaa na anoujashiikana nükajee chi naaʼinkai maʼaka nüküjain paala shia Jesuu (Juan 14:16). Nayaawatüinjeseʼe saaʼu na anoujashiikana tü sümakat Nünüiki Maleiwa otta sotusü naaʼin tü kasa nümakat jee tü naaʼinrakat Jesuu. Müsüjeseʼe, süshajünüin süchiki tia suluʼu tü karaloʼutakat  Mateo, Marcos, Lucas otta Juan. Akatchinraasü maʼin nanoula naya anoujashiikana sutuma otta akooʼomüinraasü maʼin naalin Jeʼwaa napüla, naalin Jesuu otta aijiraashii maʼin naya.

15. Püküja süchiki tü ekeraajakat piʼrüin suluʼu Isaías 2:2, 3.

¹⁵ Wakalioʼu. Naashin Jeʼwaa sülüʼütpa süpüla sajaʼttüin kasakat süpüshuaʼa, watteena maʼin naalii na wayuu ekeroloko suluʼumüin nupueulose süpüla nikirajüinjanain naya (paashajeʼera Isaías 2:2, 3). Weʼrüin ekeraajüin tia maaʼulu. Alanaʼaleesia maʼin tü nupueulosekat Jeʼwaa suulia tü iküleesia ekirajakat sünain alawaa. Wainma tü kasa naapakat Jeʼwaa wamüin süpüla wayaawatüin maʼin saaʼu tü sümakat tü Wiwüliakat (Is. 25:6). Naapüin wamüin Jeʼwaa tü katchinjatkalü atuma wanoula nükajee «chi achepchiee oonookai otta kekiikai maʼin». Niʼitaain tia wamüin suluʼu pütchin, karaloʼutain, mieekain otta videoin shia (Mat. 24:45). Müsüjeseʼe wanaawain waaʼin nümaa Elihú soʼu nümüin nüchiki Jeʼwaa: «Nnojoishi eein wanee wayuu makai aka naaʼin Maleiwa anakai süpüla ekirajaa waya» (Job 36:22).

16. ¿Kasa waaʼinrajatka süpüla sükooʼomüinraain wanoula?

¹⁶ Tü anakat süpüla waaʼinrüin. Nükaalinjeena waya Jeʼwaa nükajee chi naaʼinkai süpüla waaʼinrüin tü wekirajaakalü anain sünain tü Wiwüliakat. Wachunta nümüin Jeʼwaa maʼaka naaʼinrüin shia chi salmistakai sünain maa: «Jeʼwaa, pikiraja taya sünain tü kasa puluwataakalü anain taya, oʼuneechi taya süchiirua tü shiimainkat. Pansaa taaʼin putuma süpüla taʼwaajüin pünülia» (Sal. 86:11). Ayataʼaya wekirajaain sünain tü Wiwüliakat otta sünain tü karaloʼuta eekat sutuma nupueulose Jeʼwaa. Nnojo kachiiruain waaʼin watüjainjanain maʼin, tü kachiiruainjatkat waaʼin shia wayaawatüin saaʼu tü shiimainkat nüchiki Jeʼwaa otta waaʼinrüin tü nümakat. Wounteerü tia süka nükaalinjeenain waya Jeʼwaa nükajee chi naaʼinkai. Watütüleʼera naaʼin na wawalayuukana jama wapüshin naya (Heb. 10:24, 25). Wachunta nümüin Jeʼwaa chi naaʼinkai süpüla anainjatüin wanüiki wasoutapa shiʼipajee tü asakinnakalü anain otta wekirajapa suluʼu tü outkajaaleekat. Waaʼinrüle tia, niʼreerü Jeʼwaa otta Jesuu alin wapüla na wawalayuukana (Juan 21:15-17).

17. ¿Kasa waaʼinrajatka süpüla waʼyanaajiraain sümaa nupueulose Jeʼwaa?

¹⁷ Soʼu palitchon kaʼi, shiaʼala neʼe nupueulose Jeʼwaa eejeetka saaʼu tü mmakat, müshiijeseʼe waʼyanaajiraainjanain sümaa. Ai wapüla wayuu süpüshuaʼa maʼaka alin shia nüpüla Jeʼwaa, waküjeenakalaka pütchi sümüin. Washata nukuwaʼipa Jeʼwaa, loto sukuwaʼipa tü kasa waaʼinrakat süpüla paaʼinwain na wawalayuukana. Watüja sünainjee süpüshuaʼa tü nikirajakalü anain waya Jeʼwaa. Müle shia watuma, nnojoleerü mmoluin waaʼin sajaʼttapa tü kasa nuluwataakalü aaʼu Satanaa. Naʼakeena waya na wayuu aʼyataakana waneepia nümüin Jeʼwaa.