1. ¿Ni ja ngökanina ñöte yekwe dre nuaindre jankunu?

MÄKWE ja ngökanina ñöte ngwane, mätä tödeke Jehovai aune mätä juto biare sribikäre juta kwe yebe ye mäkwe bämikanina nitre kwati ye okwäbiti. * Akwa, nikwe tödekadre jankunu niarai ye ütiäte krubäte aune niarata juta kwe yebiti ja töi mike nemen bare yei nikwe tö ngwandre jankunu.

2, 3. ¿Jehovata juta kwe jie ngwen ye tä kukwe ketamä meden mike gare nie niarabätä?

² Jehovata juta kwe jie ngwen ño kä nengwane, yebiti niarata ja ngwen ño, töita dre nuainbätä aune kukwe ükateta ño kwe ye bämikata kwe. Juta Jehovakwe tä kukwe ketamä mike gare niarabätä ye ani mike gare jai.

³ Kena, “Ngöbö ye ni kitete ñakare” (Hech. 10:34). Ja tare ye käkwe Jehová töi mikani Monso kwe juen ni jökrä kökatarikäre (Juan 3:16; 1 Tim. 2:6). Ni kökanintari ye köböire kukwe kwin rabadre nitre kwati yekwe yekäre, Jehovata juta kwe yebiti kukwe kwin mike gare nitre tö kukwe nuai yei. Ketebukäre, Jehovata kukwe ükete kwin jatäri aune niara ye abokän jäme (1 Cor. 14:33, 40). Aisete juta kwe ie kukwe tädre ükaninte kwin jatäri sribikäre kräke aune nuaindre töi jämebiti kwetre ribeta kwe ietre. Ketamäkäre, Jehová ye ni “Tötikaka Bäri Kri” (Is. 30:20, 21). Yebätä, juta kwe tä niara kukwei driere gätäte aune kukwe drieta ngwane. ¿Konkrekasion siklo kena yebiti kukwe ketamä ye Jehovakwe bämikani ño? ¿Juta kä nengwane yebiti bämikata ño kwe? ¿Üai deme Ngöbökwe ye tä ni dimike ño sribire juta Ngöbökwe yebe kä nengwane?

4. Hechos 1:8 tä niere erere, ¿sribi meden mikani Jesukwe nitre ja tötikaka kwe ye kisete aune dre käkwe niaratre dimikai?

⁴ Siklo kena ye ngwane. Kukwe driebare Jesukwe ye käkwe nitre mikani tö ngwen kukwe kwin ie (Luc. 4:43). Sribi kömikani kwe ye driedre jankunu niebare kwe nitre ja tötikaka kwe ie aune driedre kä ñäre tibien kwetre niebare kwe ietre (ñäkädre Hechos 1:8 yebätä). Akwa, ye ñaka rabai bare ietre ja di jeñebiti, ñakare aune üai deme käbämikani Jesukwe ye rabai niaratre dimikaka sribi ye nuainkäre (Juan 14:26; Zac. 4:6).

5, 6. ¿Üai deme ye käkwe nitre ja tötikaka Jesukwe dimikani sribi nuainne ño?

⁵ Pentecostés kä 33 ye ngwane üai deme namani nitre ja tötikaka Jesukwe yebiti. Üai deme ye köböire, namanintre kukwe driere bengwairebe aune kä nikani braibe ta yete nitre kwati krubäte kukwe kwin Ngöbökwe ye kani ngäbiti (Hech. 2:41; 4:4). Aune niaratre rüe nakaninkä ngwane, ñan namanintre nekwetekä, ñakare aune ja di käräbare kwe Ngöböi aune orabare krörö kwetre: “Makwe ja di bian nun sribikä makwe neye, kä jürä ñan rabadre jire chi nunbtä blitakäre ma kukweibtä”. Meden kisete, üai deme namani täte bätätre aune “kä jürä namani ñakare btätre Ngöbö Kukwei kädriere” jankunu (Hech. 4:18-20, 29, 31).

⁶ Akwa nitre kristiano ne käkwe ja tuani kukwe mada ben. Ñodre, Ngöbö kukwei täräi ñan nämäne krubäte kwetre aune täräkwata ja tötikakäre ñaka nämäne kwetre tärä ni näire ye erere. Aune kukwe driedre kwetre nitre blitaka kukwe bätäkä ngwarbebiti yei. Akwa yebiti ta, kä nikani 30 ta yete nitre ja tötikaka Jesukwe kukwe driebare kä jökräbiti tibien, kukwe ye ñaka nuain bä akwa namani bare ietre üai deme ye köböire (Col. 1:6, 23).

7. Kä nikanina 100 ta yete, ¿Jehová nämäne dre ribere ja mräkätre ie ye nükani gare ño ietre aune dre nuainbare kwetre?

⁷ Kä nengwane. Jehová tä juta kwe jie ngwen aune mike dite. Akwa, metrere nuainta kwe kukwe kwe yebiti. Yete Jesukwe kukwe driebare ño mikata gare aune kukwe drie kömikani kwe ye nitre ja tötikaka kwe nuaindre jankunu niebare kwe ietre mikata gare yete arato (Mat. 28:19, 20). Julio kä 1881 ye kräke, täräkwata inglere ne käkwe mikani gare: “Ni ñan käräbare ni käi kitadrekä yekäre ñakare aune sribidre klabore ni mada kräke yekäre, ni ñan dianinkä jondron ükakrökäre krubäte jai, ñakare aune jondron tärä nikwe yebiti nikwe ja di ngwandre kukwe driekäre jondron yebiti yekäre”. Täräkwata inglere sribebare kä 1919 kädekani Sribi Ngöbökwe mikani nire kisete (To Whom the Work Is Entrusted) käkwe niebare: “Sribi tä krubäte nuainkäre, akwa sribi ye ni Dänkienkwe aune niarakwe ja di biain nie sribi ye nuainkäre”. Jän, ja mräkätre kä ye näire käkwe ja ngwani nitre kristiano siklo kena ye erere, ñan kä jürä ngwani kwetre jabätä kukwe driekäre aune üai deme käkwe niaratre dimikai kukwe driere ni jökrä ie yei tö ngwani kwetre. Ye erere nita tö ngwen kä nengwane.

8, 9. ¿Dre drebiti juta Jehovakwe kukwe kwin driebarera kukwe driekäre bäri?

⁸ Dre drebiti kukwe driedre yebiti juta Jehovakwe kukwe driebarera aune tä kukwe driere kukwe driekäre bäri kä nengwane. Ñodre, täräkwata imprimita, “Foto-Drama de la Creación”, gramófono, bosina kri mikani karote, programa radiote, aune bitinkä tecnología digital yebiti. Ne madakäre, juta Ngöbökwe käkwe täräkwata kwitanina kukwe jene jenebiti, nitre mada ñaka nuainne jire ye erere. ¿Ñobätä juta Ngöbökwe tä ye nuainne? Ne kwe kukwe kwin Ngöbökwe ye kukwe nuadre nitre bätäkä ngwarbe yekwe ja kukwei jeñebiti ye kräke. Jehová ñaka ni kitete jire aune kukwe kwin ye driedi “ni kä jökräbti temen amne ni bätäkä ngwarbe amne ni kukwe bätäkä ngwarbe amne ni nünanka juta kwatirekwatire te” ie niebare kwe (Apoc. 14:6, 7). Kukwe kwin Gobran Ngöbökwe yebätä rabadre gare ni jökrä ie, ie niara tö.

 ⁹ ¿Aune nitre ie ni ñaka raba kukwe driere gwirete ne ñan ñobätä aune tä nüne yekänti guardia tärä o jukwe tä dikani yebätä ni raba dre niere? Kukwe driekäre nitre yei, Jehovakwe juta kwe yebiti kukwe keta kabre nuainbare kukwe driekäre nitre yei. Ñodre, kä 2001 yete, kukwe driedre karito aune exhibidor yebiti juta Francia yekänti aune biti juta mada mada känti ye ükaninte Nitre Braibe Konkrekasion Jökrä Ngübabitikä yekwe. Ye köböire kukwe kwin namani bare. Aune kä 2011 yete, juta Nueva York (Estados Unidos) yekänti nitre kwati tä näin ye ie kukwe driedre, yekäre kukwe mrä ükaninte kukwe driekäre. ¿Kä nikani kwati ta ye ngwane dre namani bare? Tärä 102,129 aune täräkwata 68,911 nitre nikani ngwena jai aune nitre 4,701 käkwe ja tötika Bibliabätä käräbare. Erametre üai deme ye köböire kukwe kwin ye namani bare. Ye medenbätä, Nitre Braibe Konkrekasion Jökrä Ngübabitikä käkwe kukwe ükaninte kukwe driekäre exhibidor yebiti kä jökräbiti tibien.

10. ¿Nikwe dre nuaindre kukwe driekäre bäri kwin?

¹⁰ Nikwe ne nuaindre. Jehovata ni kite gätäte ye nikwe kadre ngäbiti kwin. Grupo nikwe kukwe driekäre yebe nikwe kukwe driedre käre. Kukwe tärä nie kukwe driekäre bäri kwin ngwane, ja mräkätre grupo nikwe te raba ni dimike aune ni mike dite kukwe drieta kwin kwetre yebiti. Kukwe taretare yebiti ta nikwe kukwe driedre jankunu. Texto dianinkä kukwe ja tötikara ne kräke tä niere erere, nita Ngöbö töi nuainne üai deme ye köböire, ñan ja die ye köböire (Zac. 4:6). Ñobätä ñan aune sribi ne Ngöbökwe.

11. ¿Siklo kena ye ngwane nitre konkrekasion ngübabitikä käkwe dre nuainbare juta Ngöbökwe tädre keteitibe yekäre?

¹¹ Siklo kena ye ngwane. Nitre konkrekasion ngübabitikä siklo kena yete nämäne Jerusalén, nämäne sribire gwairebe ne kwe juta Ngöbökwe yete kukwe tädre ükaninte kwin aune jäme (Hech. 2:42, TNM). Ñodre, kä 49 ye kenta Ngöbö mikakäre täte nitre rabadre ja tarei kwata tikekä, yebätä nitre kristiano nämäne töbike jene jene, ye ngwane nitre konkrekasion ngübabitikä käkwe töbikabare kwin kukwe yebätä aune ja jie ngwananbare kwetre üai deme yei. Kukwe ye tuanemetre jerekäbe kore ngwane, kukwe ñaka driedre kwin. Nitre apóstol aune nitre ji ngwanka  ye abokän judío, akwa niaratre ngübabare ño aune nitre nämäne kukwe ye driere yei ñaka ja töi kwitamana kwetre, ñakare aune kukwe Ngöbökwe aune üai deme yei ja jie ngwamana kwetre (Hech. 15:1, 2, 5-20, 28). Niaratre kukwe kwin diani nuaindre jai yebätä Jehovakwe kukwe kwin mikani nemen bare. Konkrekasion namani jäme aune keteitibe jankunu aune kukwe driebare jankunu kwetre (Hech. 15:30, 31; 16:4, 5).

12. ¿Kä nengwane juta Jehovakwe te käta jäme aune kukweta ükaninte kwin ye ñobätä ni raba niere?

¹² Kä nengwane. Juta Jehovakwe tä ja di ngwen ne kwe juta Ngöbökwe te kukwe tädre ükaninte kwin aune jäme. Kä 1895 ye ngwane, täräkwata ne sribebare inglere 15 noviembre yebätä kukwe keteiti nämäne tikani dianinkä 1 Corintios 14:40 yebätä kädekani “Kukwe tädre ükaninte kwin jatäri”. Yete nie nämäne: “Nitre apóstol kukwe keta kabre tikabare konkrekasion siklo kena yei kukwe ükadrete kwin yekäre [...]. Kukwe tikabare ja jie ngwankäre nie ye mikadre täte ye ütiäte krubäte” (Rom. 15:4). Kä nengwane, juta Jehovakwe tä ja di ngwen krubäte ne kwe konkrekasion tädre ükaninte kwin aune jäme namani bare siklo kena ye erere. Ñodre, ni rikadre gätäbätä konkrekasion madate, juta nikwe känti o juta madate ngwane ja tötika täräkwata Ni Mikaka Mokre yebätä ye jie ngwanta ja erebe aune kukwe arabebätä ja tötikata rabai gare metre nie. Bengwairebe ja rabai ruin ja täte nie. Nita keteitibe ye abokän üai deme Ngöbökwe ye aibe köböire (Sof. 3:9).

13. Santiago 3:17 tä kukwe ütiäte niere, ¿ye medenbätä ni rabadre kukwe meden meden ngwentari jai?

¹³ Nikwe ne nuaindre. Ni tädre keteitibe aune jäme jabe kwärikwäri ie Jehová tö (Efes. 4:1-3). Yebätä, nikwe kukwe ne ngwandretari jai: “¿Tita konkrekasion ye töi mike nüne jäme jabe aune keteitibe? ¿Ja mräkätre tä ji ngwen konkrekasionte ye kukwei mikata täte tikwe? ¿Nitre mada raba tö ngwen tie aune sribi tärä ti kisete konkrekasionte ngwane bärira jire tö ngwan raba tie? ¿Ti ñaka tä nüke kä rairebiti, tita juto biare sribikäre aune nitre mada dimikakäre?” (ñäkädre Santiago 3:17 yebätä). Kukwe tärä nie ja ngwankäre bäri kwin kukwe nebätä rabadre ruin nie ngwane, nikwe üai deme kärädre Jehovai. Nikwe üai deme ye tuainmetre ja töi ükete bäri kwin aune kukwe kwin nuainne ngwane, ja mräkätre rabai ni tarere aune ni mike bäri ütiäte jai.

14. Colosenses 1:9, 10 tä niere erere, ¿drebiti Jehovakwe nitre kristiano siklo kena dimikani kukwe metre ye mike nüke gare jai?

¹⁴ Siklo kena ye ngwane. Kätä juto Jehovabätä juta kwe tötikakäre (Sal. 32:8). Monsotre kwe käkwe niara mikadre gare jai, taredre aune nünandre kärekäre ie niara tö. Kukwe ye jökrä tä nemen bare niarata ni tötike ye aibe köböire (Juan 17:3, TNM). Siklo kena ye ngwane, konkrekasion kristiano yebiti juta kwe tötikani kwe (ñäkädre Colosenses 1:9, 10 yebätä). Aune metrere üai deme käbämikani Jesukwe yebiti niaratre dimikani (Juan 14:16). Üai deme ye käkwe niaratre dimikani Kukwe Ngöbökwe ye mike nüke gare jai aune kukwe niebare aune nuainbare Jesukwe ye ngwaninta törö kwe ietre, biti kukwe ye tikani kwetre Evangelio yebätä. Kukwe namani gare ietre ye käkwe tödeka kwetre ye mikani bäri dite aune Ngöbö tarere, Monso kwe tarere aune ja mräkätre tarere arato.

15. ¿Profecía niebare Jehovakwe Isaías 2:2, 3 yete ye namanina bare ño mä okwäbiti?

¹⁵ Kä nengwane. “Kä krütadre rabaira krüte ngwane”, nitre kwati näin ngutuä Jehovakwe yebiti kwin ne kwe Jehovakwe tötikadre mikani gare kwe (ñäkädre Isaías 2:2, 3 yebätä). * Profecía ne tä nemen bare kä nengwane. Kukwe metre mikata täte ye tä ükaninte bäri mente kwin iglesia mada mada ye kräke. Aune Jehovata mrö ja üaire ere krubäte bien juta kwe ie (Is. 25:6). “Nitre klabore ie tö ngwan raba bätä töbätä” yebiti Jehovata mrö bätäkä ngwarbe bien nie, ñodre, täräkwata, kukwe kädrieta, video monsotre kia kräke aune video mada mada (Mat. 24:45, TNM). Elihú ja ketamuko Job yekwe ye erere ja raba nemen ruin nie, niarakwe kukwe ne niebare  Ngöböbätä: “¿Ni tötikaka meden Jehová erere?” (Job 36:22).

16. ¿Jehovata ni tötike ririakäre kukwe ja üairebiti ye nikwe kadre ngäbiti ño kwin?

¹⁶ Nikwe ne nuaindre. Drebätä ñäkätä nikwe aune drebätä ja tötikata Bibliabätä ye üai deme käkwe ni dimikai mike täte. Salmista erere nikwe kukwe ne ribedre Jehovai: “Jehová, ji mäkwe ye driere tie. Tikwe nändi kukwe metre mäkwe yebiti. Ti brukwä ükete kwatibe mä kä ye jürä ngwankäre jabätä” (Sal. 86:11). Aisete Jehovata dre driere nie Bibliabiti aune juta kwe yebiti nikwe kadre ngäbiti kwin. Ni ñaka tö kukwe mikabätä gare jerekäbe jai, ñakare aune nikwe kukwe ye ketadrete ja brukwäte aune nikwe mikadre täte. Aune üai deme käkwe ni dimikai ye nuainne. Nikwe ja mräkätre dimikadre ye erere nuainne ñobätä ñan aune niaratre ye ni mräkätre kukwe ja üairebiti (Heb. 10:24, 25). Nikwe oradre ne kwe üai deme ye käkwe ni dimikadre blitakäre ja brukwä ngöibiti gätäte aune kukwe bämikakäre o kukwe kädriekäre bäri kwin. Nikwe ye erere nuaindi ngwane, nita oveja Jehovakwe aune Jesukwe ye tarere nikwe bämikai ietre (Juan 21:15-17, TNM).

17. ¿Nita ja ngwen metre juta Ngöbökwe yei ye ni raba bämike ño?

¹⁷ Ja känenkäre, juta Ngöbökwe jie ngwanta üai deme yebiti ye aibe rabai kä tibienbätä. Yebätä ani sribire gwaire ben kä jutobiti. Nikwe kukwe driedre jankunu nitre jökrä ie yebiti Jehovata ni jökrä tarere aune ni kitete ñakare ye bämikakäre. Nünandre jäme aune kukwe jökrä tädre ükaninte kwin tuin kwin Ngöböi ye erere, nikwe ja di ngwandre konkrekasion mikakäre keteitibe. Aune Ni ni Tötikaka Bäri Kri tä mrö keta kabre bien nie ye nikwe kadre ngäbiti niara kukwe nuakäre kwin. Nikwe ye erere nuaindi ngwane, nitre gobrainta Satanakwe ye gaite ngwane, kä jürä ñaka rabai nibätä, ñakare aune, nitre tä ja ngwen metre Jehovai juta kwe yete ye ngätäite ni täi siba arato.