1. Bichi Abakristu babatizwe bakwanene bagenderere kujira?

WABATIZWE si? Akaba ntyo ku bili, wayerekere abandi oku ogwerhe obwemere mu Yehova, n’oku olonzeze omukolere haguma n’olubaga lwage. * Kweri, bihemere obwemere bwawe mu Yehova bugenderere kukula. Binashubire kukuhema okomeze obwizere bwawe oku Yehova ali akolesa olubaga lwage zene.

2-3. Nka gurhe Yehova ali ayerekeza olubaga lwage zene? Lerha emifano.

² Zene, Yehova ali ayerekeza olubaga lwage omu njira eyerekene oborhere bwage, emihigo yage, n’amakanuni mage. Lekaga rhushambale ku ngeso esharhu za Yehova ali ayerekana kugerera olubaga lwage.

³ Ech’oburhanzi, “Mungu arhajira kabolo.” (Mdo. 10:34) Obuzigire bwashunikaga Yehova ahane Omugala nka “nchungu eju ya boshi.” (1 Ti. 2:6; Yoh. 3:16) Yehova ali arhabala abantu bage bahubiri emyazi minja ku balala boshi bayunviriza, yi barhabala balala boshi balonzeze kuyunguka n’enchungu. Echa kabiri, Yehova ali Mungu ohira ebintu oku mustari, anali wa murhula. (1 Ko. 14:33, 40) Che chirhumire rhukwanene rhulangalire oku abakozi bage bakamuharamya omu chigusho chirhali mu kavulindi, chili mu n’omurhula. Echa kasharhu, Yehova ali “Mwigiriza Mukulu.” (Isa. 30:20, 21) Che chirhumire, olubaga lwage lunachiseza omu kuyigiriza Echinwa chage omu chibaga n’omu kasi k’okuhubiri. Nka gurhe ezola ngeso esharhu z’oborhere bwa Yehova zalibonekene omu chibaga ch’Abakristu ba burhanzi? Nka gurhe zili zabonekana mu manola mango? Na nka gurhe eroho lichesibwa lyakakurhabala amango oli wakola haguma n’olubaga lwa Yehova zene?

4. Nk’oku olwandiko lwa Matendo 1:8 luyerekene, rhegeko lihe Yesu alihere abanafunzi bage, na burhabale buhe bakapatire?

⁴ Omu mango m’Abakristu ba burhanzi. Oburhumwa Yesu aliri ahubiri, bwalihere abantu ba buli lubero obulangalire. (Lu. 4:43) Alihere abanafunzi bage erhegeko bagenderere kukola akasi arhonderaga, k’okuderha, kuhana obuhamirizi “kugera oku mibebero ya hale bwenene y’egulu.” (Osome Matendo 1:8.) Kweri, barhakagalire kukola akola kasi oku misi yabo bonyine. Byalihemere bagwarhe eroho lichesibwa; k’okuderha “omugwasi” Yesu abalaganyaga.​—Yoh. 14:26; Zek. 4:6.

5-6. Nka gurhe eroho lichesibwa lyalirhabere abanafunzi ba Yesu?

⁵ Abanafunzi ba Yesu balipatire eroho lichesibwa oku Pentekoste y’omu mwaka gwa 33 N.K.Y. Kugerera oburhabale bw’elyola roho lichesibwa, barhondera okuhubiri aho han’ahola, na mu bihe bigeke, ebihumbi by’abntu byayemera emyazi minja. (Mdo. 2:41; 4:4) Amango abantu bahwanza kubalibuza, abanafunzi barhayubahaga n’okuleka okuhubiri. S’aliko, bahema Mungu oburhabale. Basalira ntya: “Orhabale abaja bawe bagenderere kuderha echinwa chawe n’obushiru boshi.” Bayunjulirana eroho lichesibwa, banagenderera “kuderha echinwa cha Mungu n’obushiru.”​—Mdo. 4:18-20, 29, 31.

⁶ Abanafunzi ba Yesu balishubire kuhurana ebindi bibazo. Omufano, ekopi z’Amandiko zaliri zigeke. Nta bindi bitabu byaliriho by’okufasiriya amandiko me Biblia nk’oku bili zene. Kandi abanafunzi ba Yesu balikwanene bahubiri abantu baliri baganira ezindi-zindi ndimi. Chiro akaba oku balihurene ebyola bibazo byoshi, abola banafunzi b’obushiru, balijirire ebintu byalibonekene nka birhakahashikene; mu myaka 30 ntya, bahubiri emyazi minja “omu bilemwa byoshi bili hanola shishi w’embingu.”​—Kol. 1:6, 23.

7. Mu myaka erhalukire 100 yamagera, nka gurhe abakozi ba Yehova balimenyere ebi Mungu alibahemere bajire, na bichi balijirire?

⁷ Mu manola mango. Yehova agenderere kuyerekeza n’okukomeza abantu bage. Aliko ahanene, Mungu anayerekeza abantu bage kugerera Ebiblia, yayandikwaga oku burhabale bw’eroho lichesibwa. Rhunasoma omu Biblia oku biyerekere akasi ka Yesu k’okuhubiri, n’eju y’erhegeko lyage abanafunzi bage bagenderere kukenga omu kukola akasi ahwanzisaga. (Mt. 28:19, 20) Mira, eyila gazeti y’Omwezi gwa 7, 1881, yaliderhere ntya: “Yehova arharhuhamagalaga, arhanarhushigaga mavurha yi rhuhabwa olukengo n’abantu changwa mpu yi rhuba bachire, s’aliko yi rhukolesa buli chintu rhugwerhe omu kuhubiri emyazi minja.” Akatabu [À qui l’œuvre est confiée] kachapiswaga omu mwaka gwa 1919, kaliderhere ntya: “Akala kasi kalugire bwenene, s’aliko kali kasi ka Waliha, arhuha n’emisi y’okukakola.” Kweri, kuguma n’Abakristu ba burhanzi, abola bene-berhu bagwerhe obushiru balichihanire bowe bonyine omu kasi, bachizerere oku eroho lichesibwa lyakabarhabere bahubiri abantu ba ngasi lubero. Zene, rhugenderere kugwarha obwizere buli nk’obola.

8-9. Njira zichi olubaga lwa Yehova lwakoleseze omu kuhubiri emyazi minja?

⁸ Olubaga lwa Yehova lwakoleseze ebikoleso bibonekene omu kuhubiri emyazi minja. Mw’ebyola bikoleso, hali ebitabu by’amakaratasi, “Efoto-Drama y’Obulemi,” amafono, emitugari egwerhe ebintu by’okuyongera omulenge, ebipindi by’oku radiyo, harhanaza kulegama luhwanzize kukolesa eteknoloji ya buno; k’okuderha Enternete n’amaordinatere. Olubaga lwa Mungu luli lwashuba kukola akasi k’otafsiri emyazi mu ndimi zinene nk’oku birhaliri mira! Bulagurhe? Bulala omu kujira ntyo, abantu ba buli lubero bakayunva emyazi minja omu lulimi lwabo lw’akaburhano. Yehova arhajira kabolo; alibere amenyesa oku emyazi yakahubirirwe “ku buli shanja, buli buko, buli lulimi na  buli lubaga.” (Ufu. 14:6, 7) Alonzeze oburhumwa b’Obwami buyunvikane bwinja oku bantu boshi.

⁹ Gurhe si oku bilolere abantu rhurhakagala kuhubiri ahamwababo, nkabaga bulala balamire omu maju rhurhakagala kugeramo bulala zilangirwe n’abalanzi changwa n’empango zikomere? Yi bigalikana kuhubiri bantu banene mw’abola, Yehova arhabere olubaga lwage luhwanze kukolesa njira zinene z’okuhubiri oku mugarogaro. Omufano, omu mwaka gwa 2 001, Ebaraza Lirhambwire lyayemera oku rhuhwanze kukolesa eprezantware z’okuheba kw’ebitabu, na bene-berhu na bali-berhu b’omu France bahwanza kuzikolesa; n’eyola programe yaluha yagera omu zindi eneo. Eyola njira y’okuhubiri yalerhere amalehe menja. Omu mwaka gwa 2 011 eyola programe mpyahya yarhondera omu États-Unis mu eneo nguma omu zinabonekana mw’abantu banene omu Vile ye New York. Omu mwaka g’oburhanzi, bitabu 102,129 na magezeti 68,911 byahanwa; na bantu 4,701 bahema efunzo lye Biblia! Okuderha okuli, rhuli rhwabona gurhe Yehova ali akolesa eroho lichesibwa omu kurhabala mw’akala kasi. Ebaraza Lirhambwire lyava lyayemera oku bene-berhu na bali-berhu omu gulu lyoshi bakolese eprezantware n’ebindi bikoleso byoshi by’okuheba kw’ebitabu.

10. Bichi rhwakajira yi rhuhubiri n’okuyigiriza bwinja?

¹⁰ Ebi wakajira. Oku mbuganano ze Chikristu, Yehova anarhuyigiriza gurhe rhwakahubiri. Okolese eby’onayiga kw’ezola mbuganano. Ohubiri oku kahunda haguma n’echigusho chawe ch’amahubiri. Bene-berhu na bali-berhu b’omu chigusho chawe bakurhabala obe muhubiri na mwalimu mwinja, n’okukuheba omurhima kugerera omufano gwabo gwinja. Ogenderere kuhubiri chiro akaba wahurana n’ebibazo. Nk’oku olwandiko gunola mwazi guyumangireko lurhuyibwise, rhuli rhwajira obulonza bwa Mungu, arhali mp’oku misi yerhu, s’aliko kugerera eroho lichesibwa. (Zek. 4:6) Rhwakachizera oku Mungu arhuha emisi rhukenere, bulala rhuli rhwakola akasi kage.

11. Nka gurhe ebaraza lirhambwire ly’amango m’entumwa lyalikolere omu buguma y’ebintu bigenderera kuba oku mustari ahakagarhi k’abantu ba Mungu?

¹¹ Omu mango m’Abakristu ba burhanzi. Ebaraza lirhambwire ly’omu Yerusalemu lyaliri lyakola omu buguma, yi liheba ebintu oku mustari  n’okulerha omurhula omu bantu ba Mungu. (Mdo. 2:42) Omufano, amango echibazo ch’okuchibwa chirhengerera omu Bakristu omu mwaka gwa 49 N.K.Y., ebaraza lirhambwire, liyerekezwe n’eroho lichesibwa, lyaganira kw’echola chibazo. Nk’echibaga chagendereraga kuba mw’akalaba eju y’echola chibazo, ntako bakagalire kuhubiri bwinja. Chiro akaba oku baliri Bayahudi, entumwa n’abashamuka barhayemeraga bashumikwa n’emigenzo y’Abayahudi changwa na balala baliyisimire bwenene n’okushumika abandi bayikenge. Aliko bagerereza Echinwa cha Mungu, banahema eroho lichesibwa libarhabale barhole omuhigo gwinja. (Mdo. 15:1, 2, 5-20, 28) Byaba gurhe? Yehova agisha omuhigo gwabo, habonekana omurhula n’obuguma omu chibaga, n’akasi k’okuhubiri kagenderera kukolwa.​—Mdo. 15:30, 31; 16:4, 5.

12. Bichi biyerekene oku ebintu bili oku mustari, n’oku omurhula guli omu lubaga lwa Yehova zene?

¹² Mu manola mango. Olubaga lwa Yehova luli lwarhabala abantu bage bagenderere kuheba ebintu oku mustari n’okulama omu murhula. Mira, egazeti eyirikirwe Le Phare de la Tour de Sion — Messager de la Présence de Christ y’omu Siku 15 Mwezi gwa 11, 1 895, yaliri m’omwazi guherhe erhwe liderhere ntya: “Avec bienséance et ordre,” gwaliyumangire oku lwandiko lwa 1 Wakorinto 14:40. Ogola mwazi gwaliderhere ntya: “Entumwa zaliyandikire echibaga cha burhanzi bintu binene oku bilolere okuheba ebintu oku mustari . . . Rhukwanene rhugenderere kukulikira bwinja ‘ebintu byandikwaga mira eju y’okurhuyigiriza.’” (Ro. 15:4) Kweri, zene olubaga lwa Yehova luli lwachihangana y’ebibaga bye Chikristu bigenderera kuheba ebintu oku mustari n’okulama omu murhula, nk’oku byanaliri omu mango m’Abakristu ba burhanzi. Omufano: Nk’ojire oku nyigirizo y’Omunara g’Omulanzi omu chindi-chindi chibaga, chibe ch’omu chihugo chawe changwa ch’omu chindi-chindi chihugo, waba ey’omenyere gurhe bayigiriza na mwazi guhe baganirira. Han’ahola, wanava wachiyunva nk’onali omu chibaga chawe! Eroho lya Mungu lyonyine lyelyakarhabala y’obuguma buli nk’obola bubaho.​—Sef. 3:9, amahugulo m’eshishi.

13. Nk’oku olwandiko lwa Yakobo 3:17 lurhuyibwise, bibazo bihe rhukwanene rhuchibaze?

¹³ Ebi wakajira. Yehova alonzeze abantu bage “bagendereze obuguma bw’eroho omu chinya-buguma chikorene ch’omurhula.” (Efe. 4:1-3)  Bobo ochibaze ntya: ‘Ka nanchihangana okulerha omurhula n’obuguma omu chibaga? Inankenga balala bayimangire si? K’abandi bakananihira, ahanene nka hali ebi nyumangire omu chibaga? Intacherehwa, imba wa kurhabala, inamba tayari kukolera abandi si?’ (Osome Yakobo 3:17.) Akaba obwene oku hali enjira okwanene okolemo bwinja, oheme eroho lichesibwa omu sala. Oku oli wayemera lihindamule oborhere n’ebijiro byawe, ku na bene-berhu na bali-berhu bakuzigira bwenene, n’okuyunva basimisizwe nawe.

14. Nk’oku olwandiko lwa Wakolosai 1:9, 10 luderhere, nka gurhe Yehova aliyigirize abantu bage b’omu mango m’entumwa?

¹⁴ Omu mango m’Abakristu ba burhanzi. Yehova anasima bwenene kuyigiriza abantu bage. (Zb. 32:8) Alonzeze bamumenye, bamuzigire, banalame esiku n’amango nka bana bage bazigirwa. Ntako ebyola byoshi byakagalikana nk’arhabayigirize. (Yoh. 17:3) Yehova alikoleseze echibaga ch’Abakristu ba burhanzi omu kuyigiriza abantu bage. (Osome Wakolosai 1:9, 10.) Eroho lichesibwa; k’okuderha “omugwasi” Yesu abalaganyaga, lyalibarhabere bwenene. (Yoh. 14:16) Lyalibarhabere bayunve Echinwa cha Mungu bwinja, lyanalibayibwise bintu binene Yesu aderhaga n’okukola, nk’oku byaluhaga byayandikwa omu bitabu by’Eyinjili. Obola bumenyi bwalikomeze obwemere bw’Abakristu ba burhanzi, n’obuzigire bwabo ku Mungu, oku Mugala, na ku bonyine oku bonyine.

15. Mu njira ehe wachibweneremo oku Yehova ali ayeneza echilagane chage chili omu Isaya 2:2, 3?

¹⁵ Mu manola mango. Yehova alilebere oku “omu chihe chizinda ch’esiku,” abantu b’amashanja moshi bakachisheshere oku musozi gwage yi bayigirizwa oku bilolere enjira zage. (Osome Isaya 2:2, 3.) Rhuli rhwabona gurhe obola bulebi buli bwayenera. Emparamyo y’okuli eli enyanya bwenene kulusha emparamyo zoshi z’obubeshi. Yehova anali ahereza abantu bage myazi minene elolere Ebiblia! (Isa. 25:6) Kugerera “omuja mwimana onakengukire,”  Yehova arhali afachakurhulunda ku myazi minene konyine, s’aliko anali arhuhayo omu njira zirhali kuguma. Omufano, rhwakasoma emyazi, rhwakayunviriza amajambo, n’okulola amavideo. (Mt. 24:45) Rhuchiyunvirhe kuguma n’oku Elihu, mwira wa Yubu achiyunvaga waderhaga ntya: “Inde mwigirizaha oli nka [Mungu]?”​—Yob. 36:22.

16. Bichi wakajira y’oba muntu okulire ekiroho?

¹⁶ Ebi wakajira. Eroho lichesibwa lya Mungu lyakurhabala okolese eby’onasoma n’okuyiga omu Biblia. Osalire nk’oku mwandisi muguma we Zaburi asaliraga: “Onyigirize oku bilolere enjira yawe, Yehova we. Nalambagira omu bukweri bwawe. Ohire omurhima gwani haguma yi nyubaha ezino lyawe.” (Zb. 86:11) Bobola ogenderere kusoma n’okuyiga Ebiblia n’ebindi bitabu olubaga lwa Yehova luli lwarhuhereza. Kweri, omuhigo gwawe gurhali gwa kufachakugwarha obumenyi konyine. Olonzeze oseze okuli omu murhima gwawe, n’oku kukolesa omu kalamo kawe. Eroho lya Yehova lyakakurhabala ojire ntyo. Onashubire kulonza ohebe bene-benyu na bali-benyu omurhima. (Ebr. 10:24, 25) Bulagurhe? Bulala bali mulala gwawe gw’ekiroho. Osalire eroho lichesibwa lya Mungu likurhabale opate ebishubizo binja by’okuhana oku mbuganano ze Chikristu, n’okuchirheganya bwinja amango ogwerhe echipindi oku mbuganano. Omu kujira ntyo, wanayereka Yehova n’Omugala oku ozigire “entama” zabo z’akamaro.​—Yoh. 21:15-17.

17. Mu njira zihe wakayerekanamo oku oli warhabala olubaga lwa Yehova oku bwimana?

¹⁷ Hano hofi-hofi, olubaga luguma lonyine nji lwaba luyorhere oku gulu, nji lwaba lulala luyerekezwe n’eroho lya Mungu. Bobola okole n’obushiru haguma n’olubaga lwa Yehova. Oyerekane oku oyigire Mungu omu kurhaba muntu w’akabolo, omu kuhubiri emyazi minja oku bantu boshi wabugana. Oyinge okuntu anaheba ebintu oku mustari n’okujira omurhula, omu kulerha obuguma omu chibaga. Onayunvirize Omwigiriza wawe Mukulu, omu kurhola akasanzi k’okuyiga emyazi yoshi ali arhuha. N’amango egulu lya Shetani nji lyahika oku buzinda, orhakayubaha. Ahubwe, nji waba ogwerhe obwizere, n’okubera ahakagarhi ka balala bali bakola oku bwimana haguma n’olubaga lwa Yehova.