1. Bapatiso Keristani taudia be dahaka idia karaia noho be namo?

BAPATISO oi abia vadaeni, a? Bema oibe, oi ese taunimanima vairanai emu abidadama Iehova dekenai oi hamomokania, bona oi hahedinaraia oi ura ena orea * oi badinaia. To, emu abidadama Iehova dekenai oi hagoadaia noho be namo. Bona namona be oi abia dae momokani, Iehova be hari ena orea ia hakaua noho.

2-3. Edena dala ai Iehova ese ena orea ia hakaua noho? Haheitalai gwauraia.

² Hari, Iehova be ena orea ia hakaua dalana amo iena kara, ura bona ena taravatu ia hahedinaraia. Iehova ena orea amo ena kara badadia toi ia hahedinaraia daladia mani ita herevalaia.

³ Ginigunana, “Dirava be taunimanima edia toana ia laloa lasi.” (Kara 10:34) Lalokau dainai Iehova ese ena Natuna ia henia “taunimanima ibounai edia mauri davana” totona. (1 Tim. 2:6; Ioa. 3:16) Iehova be ena taunimanima ia gaukaralaia kamonai taudia dekenai sivarai namona idia harorolaia totona, unai amo momo be mauri davana amo namo idia davaria. Iharuana, Iehova be maino bona gau ibounai ia karaia namonamo Diravana. (1 Kor. 14:33, 40) Namona be dala maorona bona maino ai ia idia tomadiho henia be namo. Ihatoina, Iehova be “Hadibaia Tauna” Badana. (Isa. 30:20, 21) Unai dainai iena orea ia gaukaralaia  kongrigeisen ai bona haroro gaukara ai Baibel ia hadibaia totona. Edena dala ai unai idaunegai Keristani kongrigeisen taudia ese Iehova ena kara badadia toi idia tohotohoa? Edena dala ai hari inai negai, Iehova ena taunimanima ese idia badinaia noho? Bona Iehova ena orea ai hesiai gaukara oi karaia noho lalonai edena dala ai lauma helaga ese hari oi ia durua?

4. Kara 1:8 ena hereva bamona, Iesu ese ena hahediba taudia dekenai dahaka ia gwau, bona dahaka heduru idia abia?

⁴ Keristani taudia ginigunadia edia negai. Iesu ia harorolaia sivaraina ese taunimanima dekenai helaro ia henia. (Luka 4:43) Iena murinai idia raka taudia ia hamaoroa, ia hamatamaia gaukara idia karaia noho, anina be “tanobada ena daudau momokani gabudia dekenai” idia haroro be namo. (Kara 1:8 duahia.) Momokani, sibona edia goada dekenai unai gaukara idia karaia diba lasi. Iesu ese ia gwauhamatalaia lauma helaga, eiava “durua tauna” amo heduru idia abia be namo.​—Ioa. 14:26; Sek. 4:6.

5-6. Edena dala ai lauma helaga ese Iesu ena murinai idia raka taudia ia durua?

⁵ Iesu ena murinai idia raka taudia be Pentekoste 33 C.E. ai, lauma helaga idia abia. Lauma helaga ena heduru amo, maoromaoro idia haroro, bona nega kwadogi lalonai, taunimanima tausen momo be sivarai namona idia abia dae. (Kara 2:41; 4:4) Hahediba taudia be dagedage idia davaria neganai idia gari lasi, to heduru totona Dirava dekenai idia tabekau. Bona idia guriguri neganai, idia gwau: “Emu igui hesiai taudia oi durua, mai gari lasi ida emu hereva do idia gwauraia noho totona.” Bena lauma helaga ese ia durudia bona “mai gari lasi ida Dirava ena hereva idia gwauraia noho.”​—Kara 4:18-20, 29, 31.

⁶ Iesu ena hahediba taudia ese edia hesiai gaukara idia karaia totona be mai ena hekwarahi. Hegeregere, unai negai Toretore Helagadia edia kopi be momo lasi. Danu, idia dekenai Baibel ia herevalaia buka eiava magasin be lasi. Bona hahediba taudia be gado idauidau taudia idia haroro henia. Herevana dahaka hekwakwanai idia vara, to unai haroro goadagoada taudia be gau idau hereana ta idia karaia. Lagani 30 bamona lalonai, idia ese sivarai namona be “tanobada hegegemadai idia harorolaia.”​—Kol. 1:6, 23.

7. Lagani 100 mai kahana gunanai, Iehova ena hesiai taudia ese iena ura idia totona be edena dala ai idia dibaia, bona dahaka idia karaia?

⁷ Iseda nega ai. Iehova be ena taunimanima dekenai goada ia henia noho. Momokani, ia ese Baibel amo taunimanima ia hakaua noho badina unai be lauma helaga ena heduru amo idia torea. Baibel ai, Iesu ena haroro gaukara sivarai bona ena murinai idia raka taudia ia hadibaia ia hamatamaia gaukara do idia karaia noho ena hahegani idia noho. (Mat. 28:19, 20) July 1881 ai, inai magasin ia gwau: “Iehova ese ai ia horoa unai amo taunimanima ese ai do idia hanamoa eiava taga taudia ai do ai lao totona lasi, to emai ura ai dadaraia bona sivarai namona ai harorolaia.” Lagani 1919 ai idia halasia buklet ta ladana, To Whom the Work Is Entrusted ia gwau: “Unai be gaukara bada hereana, to ia be Lohiabada ena gaukara, bona iena goada amo do ita karaia.” Oibe, Keristani taudia ginigunadia bamona, unai tadikaka be idia gaukara goada bona idia abia dae momokani, lauma helaga ese do ia durudia taunimanima idauidau idia haroro henia totona. Hari, ita abia dae danu lauma helaga ese ita do ia durua.

8-9. Iehova ena orea be haroro gaukara habadaia totona dahaka dala idauidau ia gaukaralaia?

⁸ Iehova ena orea be tulu namodia idauidau ia gaukaralaia tanobada hegegemadai sivarai namona ia halasia totona. Unai tulu haida be, idia printaia pablikeisen idauidau, “Photo-Drama of Creation,” phonographs, saun motuka, radio broadcast bona vanegai sibona idia halasia orea ena websait. Danu, Dirava ena orea be gado momo dekenai pablikeisen idauidau idia hahanaia noho! Dahaka dainai? Unai amo taunimanima idauidau ese sivarai namona be edia gado korikori dekenai idia kamonai. Iehova be taunimanima edia toana ia laloa lasi;  ia peroveta, sivarai namona be “bese ibounai bona iduhu ibounai, gado idauidau, bona kopi idauidau taudia ibounai” dekenai do idia gwauraia. (Apok. 14:6, 7) Ia ura taunimanima ibounai ese Basileia ena sivarai idia kamonai henia.

⁹ To, bema haida edia ruma be mai edia sekuriti eiava hanaihanai idia lokaia be edena bamona? Unai bamona taudia haroro henia totona, Iehova ena orea be pablik haroro dala idauidau ia gaukaralaia noho. Hegeregere, lagani 2001 ai, Hakaua Oreana ese gwaumaoro ia henia French dekenai pablikeisen troli idia gaukaralaia totona, unai murinai tano ma haida dekenai idia gaukaralaia danu. Unai gaukara ese anina namona ia havaraia. Lagani 2011 ai, United States ena bisi gabuna ta, New York Siti ai pablikeisen troli idia gaukaralaia matamaia. Lagani ginigunana ai, buka 102,129 bona magasin 68,911 idia hariharilaia. Bona taunimanima 4,701 be idia ura Baibel idia stadilaia! Ia hedinarai goevagoeva, Iehova ese ena lauma helaga amo unai gaukara ia durua noho. Unai dainai Hakaua Oreana ese gwaumaoro idia henia tanobada hegegemadai iseda tadikaka taihu ese pablikeisen troli idia gaukaralaia totona.

10. Dahaka ita karaia diba haroro bona hahediba taudia halaoa gaukarana ita karaia namonamo totona?

¹⁰ Oi karaia diba gauna. Kongrigeisen heboudia ai, Iehova ese ita dekenai haroro daladia ia hadibaia. Unuseniai ai oi dibaia gaudia oi badinaia be namo. Hanaihanai emu haroro grup ida oi gaukara hebou be namo. Emu grup ai idia noho tadikaka taihu ese oi idia durua haroro bona hahediba tauna namona ai oi lao totona, bona edia haheitalai namona amo oi do idia hagoadaia. Herevana hahetoho eiava hekwakwanai oi davaria, to haroro gaukara oi goadalaia noho. Inai atikol ena siri badana ena hereva bamona, iseda goada dekena amo lasi, to lauma helaga ena heduru amo Dirava ena ura ita hagugurua diba. (Sek. 4:6) Momokani, ita diba inai be Dirava ena gaukara.

11. Edena dala ai idaunegai hakaua oreana ese Dirava ena taunimanima huanai maino idia havaraia?

¹¹ Keristani taudia ginigunadia edia negai. Ierusalema dekenai ia noho hakaua oreana be idia gaukara hebou unai amo Dirava ena taunimanima huanai maino ia noho bona gau  ibounai idia karaia namonamo diba. (Kara 2:42) Hegeregere, lagani 49 C.E. ai, Keristani taudia momo be kopina utua karana idia hepapahuahulaia, unai dainai lauma helaga ena heduru amo hakaua oreana ese unai hekwakwanai idia herevalaia. Bema kongrigeisen be unai hekwakwanai dainai idia parara, haroro gaukara do idia karaia lasi. Herevana idia be Iuda taudia, to aposetolo taudia bona tau badadia be Iuda taudia edia kastom karadia eiava hahediba daladia ese ia biagudia lasi. Idia ese Dirava ena Hereva idia tahua, bona lauma helaga ena hakaua hegeregerena abia hidi idia karaia. (Kara 15:1, 2, 5-20, 28) Dahaka ia vara? Iehova ese edia abia hidi ia hanamoa, kongrigeisen be maino bona lalotamona ai ia noho, bona haroro gaukara idia karaia.​—Kara 15:30, 31; 16:4, 5.

12. Dahaka ese ia hahedinaraia Iehova ena orea lalonai gau ibounai idia karaia namonamo bona maino ai ia noho?

¹² Iseda nega ai. Iehova ena orea ese ena taunimanima ia durua maino ai idia noho totona. Lagani 1895 ai, Zion’s Watch Tower and Herald of Christ’s Presence ena November 15 magasin lalonai, atikol ladana “Decently and in Order” ia noho. Bona unai atikol ena sinado be 1 Korinto 14:40 amo idia abia. Unai atikol ia gwau: “Aposetolo taudia ese kongrigeisen taudia dekenai gaukara karaia namonamo ena sisiba momo idia torea . . . ‘Guna idia torea herevadia ibounai be ita hadibaia totona idia torea’ dainai, ita badinaia be gau badana.” (Roma 15:4) Oibe, Keristani taudia ginigunadia bamona, hari Iehova ena orea be ia gaukara goada Keristani kongrigeisen lalonai maino ia havaraia totona. Mani inai oi laloa: Bema oi be kongrigeisen ma ta eiava tano ma ta ai Gima Kohorona Stadi oi abia, do oi diba edena bamona stadi do idia hakaua bona edena atikol do umui stadilaia. Momokani, do oi mamia lalotamona ia noho! Dirava ena lauma helaga sibona ese unai lalotamona ia havaraia diba.​—Sep. 3:9.

13. Iamesi 3:17 ena hereva dainai, edena henanadai ita laloa be namo?

¹³ Oi karaia diba gauna. Iehova ia ura ena taunimanima be ‘lauma helaga ese ia henia lalotamona karana idia badinaia, bona maino ese idia do ia hatamonaia.’ (Efe. 4:1-3) Sibona oi nanadaia: ‘Kongrigeisen lalonai maino bona lalotamona karana lau hahedinaraia, a?  Kongrigeisen idia hakaua taudia edia hereva lau badinaia, a? Bema kongrigeisen dekenai lau be mai egu maduna, ma haida lau durua diba, a? Nega lau badinaia, heduru lau henia, bona mai ura ida ma haida lau hesiai henia, a?’ (Iamesi 3:17 duahia.) Bema oi itaia gau haida oi hamaoromaoroa be namo, lauma helaga ena heduru totona oi noinoi be namo. Lauma helaga ese emu kara do ia haidaua neganai, tadikaka taihu ese oi do idia lalokau henia bona laloa bada.

14. Kolose 1:9, 10 ena hereva bamona, Keristani taudia ginigunadia edia negai Iehova ese edena dala ai ena taunimanima ia hadibaia?

¹⁴ Keristani taudia ginigunadia edia negai. Iehova be mai moale ida ena taunimanima ia hadibaia namonamo. (Sal. 32:8) Ia ura ia idia dibaia, idia lalokau henia, bona ena lalokau natuna bamona do idia noho ela bona hanaihanai. Unai ibounai idia karaia diba lasi bema Iehova amo diba idia abia lasi. (Ioa. 17:3) Iehova ese Keristani kongrigeisen ginigunadia ia gaukaralaia ena taunimanima ia hadibaia totona. (Kolose 1:9, 10 duahia.) Lauma helaga​—Iesu ese ia gwauhamatalaia “durua tauna” unai​—ese hahediba taudia ia durua bada. (Ioa. 14:16) Lauma helaga ena heduru dainai hahediba taudia be Dirava ena Hereva idia lalopararalaia diba, bona Iesu ese ia karaia bona ia gwauraia gaudia idia laloatao, bona gabeai Evanelia bukadia dekenai idia torea. Unai gaudia ese Keristani taudia ginigunadia edia abidadama ia hagoadaia bona edia lalokau Dirava, ena Natuna, bona taunimanima ta ta dekenai ia hagoadaia bada.

15. Edena dala ma haida ai oi itaia Iehova ese ena gwauhamata Isaia 2:2, 3 ai, ia hagugurua?

¹⁵ Hari inai negai. Iehova ia peroveta “nega gabeai” eiava dina gabedia ai, bese ibounai be iena “ororo” dekenai do idia lao, anina be iena tomadiho momokani taudia do idia badinaia. (Isaia 2:2, 3 duahia.) Unai peroveta herevana be hari ia guguru noho. Ita itaia tomadiho momokanina ese tomadiho koikoi ibounai ia hereaia. Bona Iehova ese Baibel amo ena taunimanima  ia hadibaia noho! (Isa. 25:6) Iehova ese “igui hesiai tauna mai ena kamonai bona mai ena kara maoromaoro” amo ita ia hadibaia noho, hegeregere atikol idauidau, tok, katun vidio bona vidio ma haida danu. (Mat 24:45) Iseda hemami be Elihu ena hemami bamona, ia gwau: “Hadibaia tauna [Dirava] hegeregerena be daika?​—Iobu 36:22.

16. Dahaka oi karaia diba Iehova ena hadibaia karana amo namo oi davaria totona?

¹⁶ Oi karaia diba gauna. Dirava ena lauma helaga ese oi do ia durua Baibel ai oi duahia bona stadilaia gaudia oi badinaia totona. Salamo torea tauna bamona oi guriguri: “[Iehova] e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” (Sal. 86:11) Unai dainai, namona be Baibel bona Iehova ena orea ese ia halasia pablikeisen ma haida oi duahia bona stadilaia. Momokani, emu tahua gauna be diba oi abia sibona lasi. Oi ura mai emu kudouna ibounai ida hereva momokani oi abia dae bona emu mauri lalonai oi badinaia. Iehova ena lauma helaga ese oi ia durua unai oi karaia totona. Danu oi ura emu tadikaka bona taihu oi hagoadadia. (Heb. 10:24, 25) Dahaka dainai? Badina idia be emu famili. Dirava ena lauma helaga totona oi noinoi oi ia durua Keristani heboudia dekenai haere namodia oi henia, bona oi ia durua hebou dekenai emu asainmen eiava tok oi karaia namonamo totona. Unai dala amo Iehova bona ena Natuna dekenai oi hahedinaraia edia “mamoe” oi lalokau henidia bada.​—Ioa. 21:15-17.

17. Edena dala haida ai oi hahedinaraia Iehova ena orea oi durua noho?

¹⁷ Kahirakahira, Dirava ena lauma helaga ese ia gunalaia oreana sibona be tanobada dekenai do ia noho. Unai dainai Iehova ena orea ida oi gaukara goadagoada be namo. Dirava ese taunimanima ia lalokau henia dalana oi tohotohoa bona taunimanima ibounai dekenai sivarai namona oi harorolaia. Danu, kongrigeisen lalonai maino bona lalotamona karadia oi hahedinaraia. Emu Hadibaia Tauna Badana ena hereva oi kamonai, bona ia amo idia mai sisiba namodia oi abia dae. Bena, Dirava ese Satani ena tanobada ia hadikaia neganai, do oi gari lasi. To, Iehova ena orea idia badinaia abidadama taudia ida do oi gini goada.