1. Was mise ti kriste woo ketaaft sin wayter mache?

PIST tuu xon ketaaft? Wëns yaa, tuu host xon foer ti anere ketsaycht tas tuu aan Yeehoowa klaapst un tas tuu wilst tëm tiine mit sayn orkanisatsyoon. * Awer sicher, tayn klaape aan Yeehoowa mus sich wayter ferkreese. Un tuu prauchst tayn fertraung ferkreese tas Yeehoowa is sayn orkanisatsyoon hayt am penutse.

2-3. Was fer tray kwaliteete fon Yeehoowa sin taytlich kesiin in te aat wii eyer sayn orkanisatsyoon hayt fiirt?

² Hayt, ti aat wii Yeehoowa sayn orkanisatsyoon fiirt tsaycht was fer sort persoon tee is, was sayn propoos is un was eyer xtelt richtich is. Wole mer noo kuke tray fon Yeehoowa sayn kwaliteete woo mer khene taytlich in sayn orkanisatsyoon siin.

³ Eyerst, ‘Kot macht khee unerxiit tswixich ti layt’. (Atos 10:34) Weeche liip, Yeehoowa hot sayn Soon kep wii ‘een fray khaaf opfer fer al’. (1 Tim. 2:6; João 3:16) Yeehoowa penutst sayn folek fer ti kuute oter preetiche fer al woo heere wole. In tiise aat, tee heleft al woo wole, nutse fon tëm fray khaaf opfer kriin, es wil saan, keret wëre. Tsweet, Yeehoowa is een Kot fon ortnung un friit. (1 Cor. 14:33, 40) Tes weeche, khan ma waarte tas sayn aanpeeter, wii een krup, tuun tëm mit ortnung un friit tiine. Trit, Yeehoowa is te ‘Kroose Leerer’. (Isa. 30:20, 21) Tes weeche, sayn orkanisatsyoon tuut sich soo fiil miie fer Kot sayn Wort fer ti anere in lërne, in te kemaynt un in tëm preetich. Wii waare tiise tray kwaliteete fon Yeehoowa taytlich kesiin in te friirix kristlich kemaynt? Wii sin se taytlich kesiin in unser taache? Un wii khan te hayliche kayst tich helfe soo lang wiis tuu mit Yeehoowa sayn orkanisatsyoon hayt tiinst?

4. Tëm noo Atos 1:8, was hot Yeesus sayn tisipele kexikt se mache, un was fer hilef teete se kriin?

⁴ In tëm eyerste yoer hunert. Ti pexeet woo Yeesus kepreeticht hot, hot hofnung fer ti kans mënxheet kep. (Luc. 4:43) Un tee hot sayn tisipele kexikt wayter tiise aarwayt nëme, fer tsaye pis ‘tsum letste ek fon te eyert kepe’. (Lees Atos 1:8.) * Sicher, tii khonte net tiise aarwayt aleen mache. Tii teete hayliche kayst prayche — “te helfer” woo Yeesus tëne ferxproch hat. (João 14:26; Zac. 4:6)

5-6. In was fer aate hot te hayliche kayst Yeesus sayn nookeener keholef?

⁵ Yeesus sayn nookeener hon te hayliche kayst kriit in te Pingste Taach fon 33 N.K. Mit te hilef fon tiise kayst, tii hon klaych aan kefang se preetiche, un in een khorts tsayt, tausente hon ti kuute notisye aan kenom. (Atos 2:41; 4:4) Wën ti yachtung aan kefang hot, ti tisipele hon net pang kriit un noo kelos preetiche. Xtats tas, tii hon Kot sayn hilef ferlangt. Tii hon kepeet: “Mach tas tayn sklaawe tuun tayn wort mit kans koraaj wayter xpreche.” Tan, tii sin fol mit hayliche kayst kep un hon wayter ‘Kot sayn wort mit koraaj aus kexprooch’. (Atos 4:18-20, 29, 31)

⁶ Yeesus sayn tisipele hon aach anere kefoere mit kemacht. Tsum payxpiil, es waare net fiile kopiie fon te Xrifte kewees. Ti tisipele hate aach net piicher woo hon ti Piipel aus keleet, wii mer hayt hon. Un ti tisipele praychte preetiche fer fiile layt woo hon unerxiitliche xprooche kexprooch. Soo wii soo, tiise flaysiche tisipele hon kemacht was unmeechlich aus kesiin hot — in unkefeer 30 yoore, tii hon ti kuute notisye kepreeticht ‘in te kans kriatsyoon unichm himel’. (Col. 1:6, 23)

7. Xon mee wii 100 yoer tsurik, wii hon Yeehoowa sayn tiiner ketsaycht tas se wuste was Yeehoowa tëne ferlangt hot? Un wii hon se sich aan kextelt?

⁷ In unser taache. Yeehoowa tuut sayn folek wayter lënke un kraft kepe. Sicher, tiise lënkung, im haupst, khomt torich sayn Wort, ti Piipel, woo waar torich hayliche kayst inspiriirt. Tat trin, leese mer iwer Yeesus sayn preetich un sayn kepoot tas sayn nookeener solte ti aarwayt woo eyer aan kefang hot, wayter nëme. (Mat. 28:19, 20) Xon in Yuuli fom yoerkang 1881, tiise piichelche hot kesaat: ‘Yeehoowa hot uns net raus kesuucht fer eere fon te mënxe kriin orer fer raych wëre, awer fer ales was mer hon penutse fer ti kuute oter preetiche.’ Tas piichelche A Quem se Confia a Obra, woo waar im yoerkang 1919 in Ënglix puplitsiirt, hot kesaat: ‘Es kept fiil aarwayt fer se mache, awer tas is te Hër sayn aarwayt, un eyer tuut uns kraft kepe fer es mache.’ Wii ti eyerste kriste, tiise priiter waare koraajich un hon xtram kexaft. Tii hon ketraut tas te hayliche kayst teet tëne helfe preetiche fer ale sorte layt. Un meyer hon tiise selwich fertraung hayt.

8-9. In was fer aate tuut Yeehoowa sayn orkanisatsyoon preetiche fer mee layt aan trefe?

⁸ Yeehoowa sayn orkanisatsyoon tuut imer ti peste feramente woos kept penutse fer ti kuute oter aus prayte. Tepay in tiise feramente sin ti puplikatsyoone im papiir, te “Fotodrama da Criação”, ti fonógrafos — een aparat fer krawatsyoone ap xpiile —, musik khare — woo hon aach krawatsyoone ap kexpiilt —, ratio prokrame un khërtse, ti komputatoore un ti internet. Kot sayn orkanisatsyoon tuut aach xafe in te kreeste iwersetsung aarwayt fom mënxliche kexicht. Warom? Tas ale sorte layt ti kuute notisye in sayn aychne xprooch heere khene. Yeehoowa macht khee unerxiit tswixich ti layt; tee hot xon foer heyer kesaat tas ti  kuute oter teete kepreeticht wëre ‘fer yeete natsyoon, xtam, xprooch un folek’. (Apo. 14:6, 7) Tee wil hon tas ti pexeet fom Raych ale treft.

⁹ Un, iwer ti layt woo mer khene net im haus preetiche keen, fiilaycht wayl se leepe in een apartament woo mer khene net hin keen, wayl es kept een wachter orer een apkexlistne tooer? Fer mee fon tiise layt trefe, Yeehoowa sayn orkanisatsyoon hot aan kefang unerxiitliche aate fon puuplix tsaye penutse. Tsum payxpiil, im yoerkang 2001, ti Rechiirente Khërperxaft hot tsuxtimung kep fer se aan fange puplikatsyoone khareche un anere displays penutse in Frankraych. Noo heyer, ti priiter in anere pletse hon aan kefang aach soo preetiche. Ti resultaate waare iwer kuut kewees. Im yoer 2011, een naye prokram waar in te Fereenichte Xtaate fon Amërika in kesetst, in eene fon te pletse fon Nay York woo mee layt sin torich kang. Torich tas eyerste yoer, 102.129 piicher un 68.911 piichelche waare ketuun. Un 4.701 layt hon een Piipel xtuutyum ferlangt! Es is taytlich tas te hayliche kayst waar tiise aarwayt am xtitse. Tan, hot ti Rechiirente Khërperxaft ti tsuxtimung kep fer ti puplikatsyoone khareche un displays uf te kans welt penutse.

10. Was khene mer mache fer peser preetiche un in lërne?

¹⁰ Was khanst tuu mache. In te fersamlunge, Yeehoowa iipt uns fer se preetiche. Tuu tiise iipung kuut penutse. Tuu ofts xafe mit tayn preetich aarwayt krup. Ti priiter un xwestere fon tayn krup khene tich helfe peser preetiche un in lërne, un khene tich aach uf muute torich sayn kuute payxpiil. Tuu wayter in tëm preetich aus hale. Wii te haupste tekst fon tiise xtuutyum saat, meyer khene Kot sayn wile mache, net torich unser kraft, awer torich te hayliche kayst. (Zac. 4:6) Am ën, tas is Kot sayn aarwayt woo meyer am mache sin.

11. Wii hot ti Rechiirente Khërperxaft mitsamer kexaft fer ti ortnung tswixich Kot sayn folek hale, in tëm eyerste yoer hunert?

¹¹ In tëm eyerste yoer hunert. Ti Rechiirente Khërperxaft in Yeruusalem hot eenich kexaft fer ti ortnung un friit tswixich Kot sayn folek hale. (Atos 2:42) Tsum payxpiil, unkefeer im  yoer 49 N.K., ti kriste hon net kextimt iwer ti apxnaytung — welche hon kemënt tas es neetich weyer fer Yeehoowa tiine, un anere net. Tan, ti Rechiirente Khërperxaft, unich te lënkung fom hayliche kayst, hot te sache noo kekukt. Wën ti kemaynt hët keteelt weeche tiise sache keplip, ti preetich aarwayt teet um kehal wëre. Opwool ti aphostele un ti elteste yiitich waare, tii waare net influëntsiirt fon ti yiitich tratitsyoone orer fon tëne woo tiise tratitsyoone in kelërnt hon. Xtats tas, tii hon Kot sayn Wort un sayn kayst kesuucht fer ti richtich ëntxlus mache. (Atos 15:1, 2, 5-20, 28) Was fer waar te resultaat? Yeehoowa hot tëne sayn ëntxlus keseechent, ti kemaynt is wayter in friit un eenichkheet keplip un ti preetich aarwayt is forem kang. (Atos 15:30, 31; 16:4, 5)

12. Was tsaycht tas es friit un ortnung in Yeehoowa sayn orkanisatsyoon hayt kept?

¹² In unser taache. Yeehoowa sayn orkanisatsyoon tuut imer xafe fer te friit un ti ortnung tswixich Kot sayn folek hale. Xon im yoerkang 1895, tas piichelche Torre de Vigia de Sião e Arauto da Presença de Cristo fon 15^te Nofemper, hat eene artikel mim theema ‘Kexayt un in ortnung’, woo hot sich in 1 Coríntios 14:40 traan kehal. Te artikel hot kesaat: ‘Ti aphostele hon fiil fer ti friirixe kemaynt kexrip iwer ortnung. Es is wichtich ‘ale ti tinge woo foer heyer kexrip kep sin fer unser instrutsyoon’ wayter mit acht aan heere.’ (Rom. 15:4) Yawool, Yeehoowa sayn orkanisatsyoon hayt hot te selwiche wunx wii ti eyerste kriste: friit un ortnung hon. Tsum payxpiil, wëns tuu in een Wachthorm Xtuutyum in een aner kemaynt keest — soo kaar in een aner lant — tuu weest xon wii tas xtuutyum kefiirt wërt, un was fer artikel wërt noo kekukt. Tuu tuust tich klaych tehëm fine! Ploos Kot sayn kayst khan soo een eenichkheet meechlich mache! (Sof. 3:9, noote)

13. Tëm noo Tiago 3:17, was fer frooche sole mer uns mache?

¹³ Was khanst tuu mache. Yeehoowa wil tas sayn folek ‘ti eenichkheet fom kayst halt, torich ti ferpiinung fom friit’. (Efé. 4:1-3) Tan, froo tich: ‘Tuun ich ti eenichkheet un te friit in te kemaynt suuche? Tuun ich aan heere tii woo ti kemaynt fiire? Khene ti anere uf mich traue, hauptseechlich wën ich flichte in  te kemaynt hon? Sin ich phinktlich un wilich fer ti anere helfe?’ (Lees Tiago 3:17.) * Wëns tuu mërkst tas tuu khanst tich ferpesere, ferlang hayliche kayst im kepeet. Woo mee tas tuu lost te hayliche kayst tayn persoonlichkheet un tayn aanxtelung mustere, woo mee tuun ti priiter tich liipe un weyert xetse.

14. Tëm noo Colossenses 1:9, 10, wii hot Yeehoowa tëm sayn folek im eyerste yoer hunert in kelërnt?

¹⁴ In tëm eyerste yoer hunert. Yeehoowa tuut iwer kërn sayn folek in lërne. (Sal. 32:8) Tee wil tas se tëm khëne, tëm liipe, un tas se fer imer wii keliipte khiner leepe. Awer, tas weyer unmeechlich oone ti inlërnung woo eyer kept. (João 17:3) Yeehoowa hot ti friirix kristlich kemaynt penutst fer sayn folek in lërne. (Lees Colossenses 1:9, 10.) * Te hayliche kayst — te “helfer” woo Yeesus ferxproch hat — hat een wichtich teel too tepay. (João 14:16) Tee hot ti tisipele keholef peser Kot sayn Wort ferxteen, un hot tëne erinert fon te fiile tinge woo Yeesus kemacht un kesaat hat. Fiile fon tiise tinge waare noo heyer in te Ewankeelye kexrip. Tiise khëntnis hot te klaape fon te eyerste kriste ferxtërkt, un hot aach ferkreest sayn liip tsu Kot, fer sayn Soon, un eene fer te aner.

15. In was fer aate siist tuu tas Yeehoowa is am sayn ferxpreche erfiile, woo in Isaías 2:2, 3 xteet?

¹⁵ In unser taache. Yeehoowa hot xon foer heyer kesaat tas “am ën fon te taache” layt fon ale natsyoone teete tsu sayn simpoolix përich khome fer iwer tëm sayn weeche lërne. (Lees  Isaías 2:2, 3.) * Meyer siin tiise profetsii am sich hayt erfiile. Ti woer aanpeetung is fiil heecher wii yeete sort falx aanpeetung woos kept! Un Yeehoowa kept fer sayn folek iwer fiil informatsyoone iwer ti Piipel. (Isa. 25:6) Tee penutst “te troy un ferninftiche sklaaw” fer al tiise informatsyoone pesoriche, woo in unerxiitliche aate khome. Tsum payxpiil, meyer khene artikele leese, reete heere un aach desenhos un wiiteos kuke. (Mat. 24:45) Meyer fine uns soo wii Yoop sayn froynt, Eliuu, woo hot mit recht kesaat: ‘Was fer leerer is soo wii Kot?’ (Jó 36:22)

16. Was khanst tuu mache fer kaystlich wakse?

¹⁶ Was khanst tuu mache. Kot sayn kayst tuut tich helfe aan wëne was tuu leest un lërnst in Kot sayn Wort. Peet soo wii te salmist: “Tuu mich in lërne, oo Yeehoowa, in tayn weech. Ich tuun in tayn woerheet keen. Fereenich mayn hërts fer tiife respëkt tsu tayn naame hon.” (Sal. 86:11) Tuu wayter tas kaystlich esmitel in nëme, woo Yeehoowa torich sayn Wort un sayn orkanisatsyoon pesoricht. Sicher, tayn tsiil is net ploos khëntnis kriin. Tuu wilst tich sicher fon te woerheet sin un tas in tayn leepe in fiire. Yeehoowa sayn kayst khan tich helfe tas mache. Tuu aach net ferkese fon tayn priiter un xwestere uf muute. (Heb. 10:24, 25) Weeche was? Wayl tii sin tayn familye. Peet tas Kot sayn kayst tich heleft hërtsliche antworte in te fersamlunge kepe, un tas tee tich heleft tayn pestes mache wëns tuu een teel in te fersamlung host. Soo, tuust tuu Yeehoowa un sayn Soon tsayche tas tuu tëne sayn “xeefche” liipst — woo soo fiil weyert hon. (João 21:15-17)

17. In was fer aate khanst tuu tsayche tas tuu tuust Yeehoowa sayn orkanisatsyoon troy xtitse?

¹⁷ Palt, ti eensich orkanisatsyoon woo tuut uf te eyert plaype wërt tii woo fon Kot sayn kayst kefiirt is. Tan, tuu flaysich mit Yeehoowa sayn orkanisatsyoon xafe. Soo wii Yeehoowa, tuu al ti layt liipe — fertseel iwer ti kuute notisye mit al woos tuu trefst. Tuu Yeehoowa sayn liip tsu te ortnung un friit noo mache — suuch ti eenichkheet fon te kemaynt hale. Un heer tayn Kroose Leerer — tuu tich saat ese fon tëm kans kaystlich esmitel woo eyer pesoricht. Tan, wii Satanaas sayn welt sayn ën kriit, tuust tuu net pang hon. Xtats tas, tuust tuu koraajich sin, un pay xteen tswixich tëne woo mit Yeehoowa sayn orkanisatsyoon troy tiine.