1. Ovikeṋa Ovakriste mba papitisiwa mbi mave sokukayenda komurungu okutjita?

HAPO ove wa papitisiwa? Tji pe ri nao, indu tji wa papitisiwa ove wa raisa komurungu wovandu kutja u nongamburiro mu Jehova nu u vanga okumukarera. * Otjingaperi kutja ongamburiro yoye mu Jehova mai sokukurira ko. Nu wina mo sokukayenda komurungu okukurisa ongamburiro yoye yokutja Jehova u hongorera po otjira tje ndino.

2-3. Omomuano uṋe Jehova me hongorera po otjira tje ndino? Yandja ovihorera.

² Ndino, omuano Jehova me hongorera po otjira tje ku raisa ovikaṋena vye, ondando nomirari vye vyousemba. Ngatu tare kovikaṋena vya Jehova vitatu mbi matu yenene okumuna okupitira motjira tje.

³ Otjitenga, “Ndjambi u vara ovandu avehe pu pe ṱeki pamwe.” (Oviung. 10:34) Mena rorusuvero, Jehova wa yandja Omuna we “okukutura ovandu avehe.” (1 Tim. 2:6; Joh. 3:16) Jehova u ungurisa ovakarere ve okuzuvarisa ombuze ombwa kovandu avehe mbu mave vanga okupuratena, kokutja ovandu ovengi ve yamwe mena rotjisuta tjonguturiro. Otjitjavari, Jehova u tjaterwa indu oviṋa tji mavi kayendiswa momuhingo omuwa nu wohange. (1 Kor. 14:33, 40) Kunao, tu undjira ko kutja ovakarere ve ve rikotamene ku ye momuano omuhirona nu wohange. Otjitjatatu, Jehova ongu ri ‘Omuhonge’ Omunenenene. (Jes. 30:20, 21) Mena ranao, otjira tje tji ungura nomasa okuhonga ovandu Ombeibela mombongo na motjiungura tjokuzuvarisa. Omomuano uṋe Ovakriste veserewondo etenga mu va horera kovikaṋena vitatu vya Jehova mbyo? Ovakarere va Jehova ve horera vi kovikaṋena mbyo ndino? Nu ombepo ondjapuke mai ku vatere  vi otja tji mo karere Jehova motjira tje ndino?

4. Otja kOviungura 1:8, Jesus wa rakiza ovemukongorere okutjita tjike, nu wa tja mave munu ombatero yaye?

⁴ Meserewondo etenga. Ombuze Jesus ndja zuvarisa aai yandja omaundjiro kovandu avehe. (Luk. 4:43) Jesus wa rakiza ovemukongorere okukayenda komurungu okuungura otjiungura eye tja uta, kutja ve zuvarise “nga komaandero wehi.” (Lesa Oviungura 1:8.) Otjingaperi kutja owo kaave yenene okuungura otjiungura hi nomasa wawo oveni. Owo aave hepa ombepo ondjapuke ndji ri “omuvyonge” poo omuvatere, Jesus ndje ve kwizikira okuvepa.—Joh. 14:26; Sak. 4:6.

5-6. Omomiano viṋe ombepo ondjapuke mu ya vatera ovakongorere va Jesus?

⁵ Mombura ndji 33 O.Z mu Pentekoste, ovakongorere va Jesus va muna ombepo ondjapuke. Nombatero yombepo ndjo, owo tjimanga va uta okuzuvarisa, nu moruveze orusupi, ovandu omayovi omengi va yakura ombuze ombwa. (Oviung. 2:41; 4:4) Indu ovemukongorere tjaave pirukirwa, owo kaave tira nu va kayenda komurungu okuzuvarisa. Owo va ningira ombatero okuza ku Jehova. Mongumbiro va tja: ‘Yandja ku eṱe, ovakarere voye, okuhungira omambo woye nouvanḓe auhe.’ Owo ve urisiwa nombepo ondjapuke nu va kayenda komurungu ‘okuzuvarisa embo ra Ndjambi nouvanḓe.’—Oviung. 4:18-20, 29, 31.

⁶ Ovahongewa va Jesus va ri nomauzeu warwe wina. Otjotjihorera, owo kava ri noviherengururwa vyOmatjangwa ovingi. Nu kava ri nomambo ngaa ye kahurura Ombeibela tjimuna inga ngu tu nayo ndino. Owo wina aave sokuzuvarisa kovandu mbaave hungire omaraka omengi pekepeke. Nandarire kutja va ri kehi yomauzeu nga, oure wozombura ape 30 ovahongewa ovapyuke mba va zuvarisa ombuze ombwa ‘kovandu avehe kombanda yehi.’—Kol. 1:6, 23.

7. Oure wozombura 100 nḓa kapita, omomuano uṋe ovakarere va Jehova maave tjiwa kutja ovikwaye Mukuru mbi ma undjire ko ku wo, nu owo va tjita vi?

⁷ Moruveze rwetu. Jehova u kayenda komurungu okuhongorera po nokuyandja omasa kovakarere ve. Eye tjinene u hongorera po ovakarere ve okupitira mOmbeibela, ndja tjangwa nombatero yombepo ondjapuke. MOmbeibela tu lesa ohunga nomuano Jesus ma zuvarisa, nerakiza re rokutja ovemukongorere mave sokukayenda komurungu noviungura eye mbya uta. (Mat. 28:19, 20) Mombura ndji 1881 mu Juli, okambo kemwe ka tja: “Jehova ke tu twirisire kokutja ovandu ve tupe ondjozikiro poo tu tumbe, nungwari aa vanga kutja tu ungurise oviṋa avihe mbi tu navyo okuzuvarisa ombuze ombwa.” Okambo nga To Whom the Work Is Entrusted, ku ka pitisiwa mombura ndji 1919, ka tja: “Pe noviungura ovingi okuungura, posi yokutja oviungura mbyo ovya Muhona nu eye me tupe omasa okuviyenenisa.” Tjimuna Ovakriste veserewondo etenga, mena rouvanḓe owo va ungura oukukutu nu va ri nongamburiro kutja ombepo ondjapuke mai ve vatere okuzuvarisa kovandu avehe. Nu wina ndino tu nongamburiro kutja ombepo ondjapuke mai tu vatere.

8-9. Omomiano viṋe otjira tja Jehova mu tja yenena okukayenda komurungu okuzuvarisa ombuze ombwa?

⁸ Otjira tja Jehova aa tji ungurisa oviungurisiwa pekepeke okuvasisa ombuze ombwa kovandu. Oviungurisiwa mbi aavi kamburira mo omambo nga prindwa, enyando rOmbeibela ndi “Photo-Drama of Creation,” ozongramafona, ozohauto kukwa tuwa ozombako, omahungi wo-radio nu nai tu ungurisa ozokombiuta norungovi. Otjira tja Mukuru wina tji toraka oviṋa momaraka omengi, mbi hina vya tjitirwe. Omena raye? Kokutja ovandu avehe ve zuve ombuze ombwa momaraka wawo oveni. Jehova ke nombangu nu wa kwizika kutja ombuze ombwa mai zuvarisiwa “komihoko avihe na komaraka aehe na koviwaṋa avihe.” (Omavan. 14:6, 7) Eye  u vanga kutja ovandu avehe ve zuve ombuze yOuhona.

⁹ Hapo tjike na imba mbe kara potuveze pu tu hi nokuvemuna mena rokutja ve kara mozonganda nḓa patwa poo nḓe nomutjevere pomuvero? Kutja tu zuvarise kovandu ovengi otja imbo, otjira tja Jehova tja yenena okuzikamisa omiano pekepeke vyokuzuvarisa momivanda. Otjotjihorera, mombura ndji 2001, Orutu Orunane rwa yandjera ovakambure ovakwetu moFrance okuungurisa outemba nomiano vyarwe vyokuzuvarisa momivanda. Nu kombunda omahi warwe wina yaandjerwa okuzuvarisa momiano mbyo. Ovandu va raisa ongaro ombwa. Mombura ndji 2011 pa utwa oprograma ombe moUnited States motuveze mu mu ryanga ovandu ovengi motjihuro hi New York. Ombura ndjo, pa yandjwa omambo nga 102 129 noumbo mbwi 68 911. Nu ovandu 4 701 va ningira okurihonga Ombeibela. Oukahu kutja, Jehova aa ungurisa ombepo ye ondjapuke okuvatera otjiungura hi. Kunao Orutu Orunane rwa yandjera ovakambure mouye ongondoroka okuungurisa outemba nomiano vyarwe vyokuzuvarisa momivanda.

10. Matu yenene okutjita vi kutja tu rire ovazuvarise ovawa?

¹⁰ Oviṋa mbi mo yenene okutjita. Ungurisa oviṋa mbi mo rihongo pozombongarero zombongo. Zuvarisa aruhe ku notjimbumba tjokuzuvarisa tjombongo yeṋu. Ovakambure motjimbumba tjokuzuvarisa mu u ri mave yenene okukuvatera okurira omuzuvarise nomuhonge omuwa nu ovihorera vyawo oviwa mavi yenene okukutunduuza. Kayende komurungu motjiungura tjokuzuvarisa nandarire kutja mo munu omauzeu. Etjangwa ku kwa zikamene orupa ndwi mari tu zemburukisa kutja, eṱe tu yenena okutjita ombango ya Mukuru, ka mena romasa wetu oveni nungwari tu vaterwa i yombepo ondjapuke. (Sak. 4:6) Tu kara nongamburiro kutja Mukuru me tupe omasa, mena rokutja tu ungura otjiungura tje.

11. Omomuano uṋe orutu orunane rweserewondo etanga mu ra vatera kutja pe kare ohange mokati kovakarere va Mukuru?

¹¹ Meserewondo etenga. Orutu Orunane moJerusalem aaru ungura kumwe nawa kutja  oviṋa vi kayendisiwe momuhingo omuwa nu wohange mokati kovakarere va Mukuru. (Oviung. 2:42) Otjotjihorera, mombura ndji ape 49 O.Z., Ovakriste ovengi va ri noumune pekepeke wokutja omundu auhe ngu ma vanga okurikotamena ku Jehova ma sokusukara poo indee. Kunao Orutu Orunane, kehi yombatero yombepo ondjapuke va hungirira kotjiṋa ho. Andakuzu ombongo ndjo ya kayenda komurungu okukara noumune pekepeke ohunga nepu ndo, owo katja ve zuvarisa nawa. Nandarire kutja ovaapostele novarumendu ovanene va ri Ovajuda, owo kaave kongorere ozombazu poo otuzo twawo. Posi yokutja owo va yandjera Embo ra Mukuru nombepo ondjapuke okuvevatera okutoora omukambo omusemba. (Oviung. 15:1, 2, 5-20, 28) Nu pa kayenda ye? Jehova wa sera ondaya komukambo mbo, nu pa kara ohange nombwaneno mombongo, nu otjiungura tjokuzuvarisa tja kayenda komurungu.—Oviung. 15:30, 31; 16:4, 5.

12. Ovikwaye mbi mavi raisa kutja otjira tja Jehova ndino tji kayendisa oviṋa momuhingo omuwa nu wohange?

¹² Moruveze rwetu. Otjira tja Jehova tja kondja kutja oviṋa vi kayendisiwe momuhingo omuwa nu wohange mokati kovakarere ve. Mombura ndji 1895 tji yari 15 ku Novemba, okambo nga Zion’s Watch Tower and Herald of Christ’s Presence ka ri norupa rwepu ndi “Decently and in Order,” okuza 1 Ovakorinte 14:40. Okambo ngo ka tja: “Ovaapostele va tjanga oviṋa ovingi kozombongo zeserewondo etenga ohunga nokukayendisa oviṋa momuhingo omuwa . . . Ma rire nawa okukongorera omuhunga auhe mbu matu pewa mena rokutja ‘omambo aehe nga tjangwa mOmatjangwa ya tjangerwa okutuhonga.’” (Rom. 15:4) Otjira tja Jehova ndino tji kondja okuungura oviṋa momuhingo omuwa nu wohange tjimuna tji pa ri ku nOvakriste veserewondo etenga. Otjotjihorera, indu tji wa kara pOmakonḓononeno wOkambo kOruhungu mombongo yarwe poo kehi rarwe, u tjiwa kutja okambo ngo make kayendisiwa momauno uṋe nu orupa ruṋe ndu maru konḓononwa. Ove u hakahana okumuna kutja oove orupa rweṱunḓu rovakambure mouye. Tjiri ombepo ondjapuke aiyerike ondji mai yenene okutuvatera okukara nombwaneno ndjo.—Sef. 3:9.

13. Jakobus 3:17, mari tu vatere kutja tu ripure omapuriro yeṋe?

¹³ Oviṋa mbi mo yenene okutjita. Jehova u vanga kutja ovakarere ve ve ‘kondje  okuṱakamisa oruwano ndu va pewa i ombepo ya Ndjambi. Nohange ndji za ku Ndjambi i ve waneke kumwe.’ (Ef. 4:1-3) Kunao ripura omuini omapuriro nga: ‘Hapo mbi tjita kutja pe kare ohange nombwaneno mombongo? Hapo mbi nonḓuviro kovanene vombongo? Hapo varwe mave yenene okuṱaṱera kwami, tjinenenene tji mbi nomerizirira mombongo? Hapo mbi kara moruveze nu mbi vatera varwe?’ (Lesa Jakobus 3:17.) Tji mo munu kutja mo hepa okutjita omarundurukiro, ningira ombepo ondjapuke i ku vatere. Otja tji mo yandjere ombepo ondjapuke okurundurura ongaro novitjitwa vyoye, ihi tji tjita kutja ovakambure ve raise orusuvero nondangi koviṋa mbi u tjita.

14. Otja kOvakolose 1:9, 10, Jehova wa honga vi ovakarere ve veserewondo etenga?

¹⁴ Meserewondo etenga. Jehova wa suvera okuhonga ovakarere ve. (Eps. 32:8) Eye u vanga kutja ve mu tjiwa, ve mu suvere nu ve hupe nga aruhe otjovanatje ve ovasuverwa. Imbyo avihe katja vi yenenisiwa nokuhinomahongero we. (Joh. 17:3) Jehova wa ungurisa ombongo yOvakriste veserewondo etenga okuhonga ovakarere ve. (Lesa Ovakolose 1:9, 10.) Ombepo ondjapuke ndji ri “omuvyonge” Jesus ndja kwizika, wina ya vatera ovahongewa ve. (Joh. 14:16) Ombepo ondjapuke ya vatera ovahongewa okuzuva nawa Embo ra Mukuru nokuzemburuka oviṋa Jesus mbya hungira nokutjita, kombunda mbi va ka lesa mOmaevangeli. Omambo ngo ya vatera Ovakriste veserewondo etenga okukurisa ongamburiro norusuvero rwawo ku Mukuru, kOmuna we na kovakambure ovakwao.

15. Omomiano viṋe mu u muna Jehova ama yenenisa omakwizikiro we nge ri mu Jesaja 2:2, 3?

¹⁵ Moruveze rwetu. Jehova wa kwizika kutja “momayuva ngu maye ya” poo momayuva omasenina ovandu woviwaṋa avihe mave rikotamene ku ye mouatjiri nu ave hongwa ozondjira ze. (Lesa Jesaja 2:2, 3.) Eṱe tu muna omayenenisiro womaprofetero ngo. Omerikotameneno wouatjiri omananḓengu okukapita inga woposyo. Nu tjiri Jehova u tupa ondjivisiro onyingi  ohunga nOmbeibela. (Jes. 25:6) Eye u ungurisa “Omukarere omuṱakame nomunazondunge,” okutupa ondjivisiro onyingi momiano pekepeke. Otjotjihorera, tu yenena okulesa otupa, okupuratena komahungi nokutarera ouvidio. (Mat. 24:45) Eṱe tu kara noumune tjimuna owa Elihu ngwa ri epanga ra Job, ngwa hungira ohunga na Jehova kutja, “Eye ongu ri omuhonge omunenenene pu avehe.”—Job 36:22.

16. Ovikwaye mbi mo yenene okutjita okukurisa oupanga woye kuna Jehova?

¹⁶ Oviṋa mbi mo yenene okutjita. Ombepo ondjapuke ya Jehova mai ku vatere okuṱakamisa imbi mbi mo lese nokukonḓonona mEmbo ra Mukuru. Kumba tjimuna omutjange wepsalme ngwa tja: “Muhona, ndji honga ondjira yoye, mbi ryange mouatjiri woye. Ndji pa omutima mbu ha ivaiva kutja mbi ṱire ena roye.” (Eps. 86:11) Kayende komurungu okukurisa oupanga woye kuna Jehova mokulesa nokukonḓonona Ombeibela noviṋa vyarwe mbya pitisiwa i yotjira tja Jehova. Otjingaperi kutja ondando yoye ka yokukurisa ondjiviro yoye uriri. Nungwari oyokutja ouatjiri u ṱune komutima woye, nokuṱakamisa imbi mbi mo rihongo mehupo roye. Ombepo ondjapuke ya Jehova mai ku vatere okutjita nao. Nu wina ma rire nawa tji wa tunduuza ovakambure ovakweṋu. (Hebr. 10:24, 25) Ongwaye? Mena rokutja owo eṱunḓu roye rovakambure. Ningira ombepo ya Mukuru okukuvatera okuyandja omaziriro okuza komutima pozombongarero zombongo nokukuvatera okuungura nawa indu tjiu nehungi mombongo. Momiano mbyo mo raisire Jehova nOmuna we kutja wa suvera “ozonḓu” zawo.—Joh. 21:15-17.

17. Omomiano viṋe mu mo raisa kutja u yandja oruvara okuura kotjira tja Jehova?

¹⁷ Moruveze rwa tjimanga, otjira tji tji hongorerwa po i yombepo ya Mukuru otji matji sewa po uriri kombanda yehi. Kunao kongorera omuhunga auhe mbu mo munu okuza kotjira tja Jehova. Raisa orusuvero kovandu avehe tjimuna Mukuru mokuzuvarisa ombuze ombwa kovandu avehe mbu mwa hakaene. Kondja okutjita kutja oviṋa vi kayende momuhingo omuwa nu wohange mombongo otja Jehova pe vanga. Nu puratena kOmuhonge Omunenenene mokurihongera kondjivisiro aihe ndje tupa. Indu ouye wa Satan tji we ya komaandero ove ko nokutira. Nungwari mo kara nouvanḓe nu okara mokati ka imbe mbe karera otjira tja Jehova nouṱakame.