1. Nama patut terus digaga tiap iku orang Kristian ke udah dibaptisa?

KATI nuan udah dibaptisa? Enti ya, nuan udah ngayanka pengarap nuan ke Jehovah ba mua orang mayuh sereta pengeran nuan deka sama bekereja enggau gerempung Iya. * Pengarap nuan ba Jehovah patut majak nambah. Pia mega, nuan patut majak pechaya Jehovah ngena gerempung Iya bejalaika pengawa Iya.

2-3. Baka ni Jehovah ngiring gerempung Iya kemayaharitu? Terangka.

² Kemayaharitu, Jehovah ngiring gerempung Iya enggau chara ti mandangka kualiti, tuju, sereta standard moral Iya. Aram kitai berandauka tiga iti kualiti Jehovah ke ulih dipeda ari gerempung Iya.

³ Kesatu, ‘Petara enda bepilih mata.’ (SKR. 10:34) Ketegal pengerindu, Jehovah meri Anak Iya nyadika “penebus semua mensia.” (1 Tim. 2:6; Jhn. 3:16) Jehovah ngena nembiak Iya nginjil berita manah ngagai orang ke deka ninga. Enggau nya, mayuh orang bulih penguntung ari tebus lalu diselamatka. Kedua, Jehovah rindu utai ke digaga enggau teratur sereta pemaik. (1 Kor. 14:33, 40) Nya alai, kitai nemu nembiak Iya nyembah Iya enggau teratur sereta pemaik. Ketiga, Jehovah rindu ngajar. (Isa. 30:20, 21) Nya kebuah gerempung Iya bebendar ngajar orang pasal Bup Kudus, enda ngira ba eklisia tauka ba pengawa nginjil. Baka ni tiga  iti kualiti tu ulih dipeda ba eklisia Kristian kurun keterubah? Baka ni tiga iti kualiti tu ulih dipeda ba eklisia Kristian kemayaharitu? Lalu baka ni roh kudus ulih nulung nuan sama bekereja enggau gerempung Jehovah kemayaharitu?

4. Nitihka Kereja Rasul 1:8, nama pesan ke diberi Jesus ngagai bala murid iya, lalu nama tulung ke deka diterima sida?

⁴ Ba kurun keterubah. Pesan ke ditusui Jesus meri pengadang ngagai mensia. (Luk. 4:43) Iya ngasuh bala murid neruska pengawa nginjil “ngagai ujung dunya.” (Bacha Kereja Rasul 1:8.) Endang amat, sida enda ulih ngereja nya kediri empu. Sida begunaka roh kudus, iya nya “Penyaup” ke disemaya Jesus ngagai sida.—Jhn. 14:26; Sek. 4:6.

5-6. Baka ni roh kudus nulung bala murid Jesus?

⁵ Bala murid Jesus nerima roh kudus kena Pentikos taun 33 Masihi. Pengudah nerima roh kudus, sida berengkah nginjil. Enda lama udah nya, beribu iku orang nerima pemendar. (SKR. 2:41; 4:4) Lebuh bala murid diperinsa, sida enda takut lalu enda ngetu nginjil. Sida minta saup ari Petara nengah sampi. Ku sida: ‘Beri pemerani ngagai nembiak Nuan kena [kami] nusui pesan Nuan.’ Udah nya, sida dipenuhka enggau roh kudus lalu mengkang ‘berani nusui pesan Petara.’—SKR. 4:18-20, 29, 31.

⁶ Murid Jesus mega napi penanggul bukai. Ambika chunto, maya nya salin gulung surat Jaku Petara enda mayuh. Lalu sida nadai litaricha baka kitai ti nerangka utai ba Bup Kudus. Sida mega patut nginjil ngagai orang ngena mayuh bansa jaku. Taja pan sida napi semua penanggul tu, sida mujur ngereja utai ke dikumbai orang enda ulih. Dalam kandang 30 taun, sida nginjil berita manah “ngagai semua orang di baruh langit.”—Kol. 1:6, 23.

7. Kenyau ari 100 taun suba, baka ni nembiak Jehovah nemu peneka Iya, lalu nama digaga sida?

⁷ Ba jeman diatu. Jehovah terus ngiring sereta ngeringka nembiak Iya kena ngereja peneka Iya. Iya ngiring sida ngena Bup Kudus, ke ditulis enggau tulung roh kudus. Ba dia, kitai ulih macha pasal pengawa nginjil Jesus sereta pesan iya ngagai bala murid kena neruska pengawa nginjil. (Mat. 28:19, 20) Kenyau ari Julai 1881, majalah tu madahka: “Jehovah enda milih kitai ngambika dipebasa mensia tauka nyadi kaya, tang ngambika kitai ulih ngena semua utai ti dikemisi kena nginjil berita manah.” Siti bup mit ke betajuk To Whom the Work Is Entrusted, ti dikeluarka ba taun 1919 kena meri iring pasal pengawa nginjil madahka: “Kitai bisi mayuh pengawa, tang tu pengawa Tuan, lalu iya deka meri kitai pengering ngereja nya.” Au, baka orang Kristian ba kurun keterubah, bala menyadi tu ngayanka pemerani sereta bebendar gawa ketegal sida pechaya roh kudus deka nulung sida nginjil ngagai semua orang. Kitai mega pechaya roh kudus nulung kitai kemayaharitu.

8-9. Baka ni gerempung Jehovah ngerembaika berita manah?

⁸ Gerempung Jehovah udah ngena perengka ti pemadu manah kena ngerembaika berita manah. Perengka tu nyengkaum litaricha ke dichelak, “Photo-Drama of Creation,” peti rikut, kerita bunyi, radio, sereta baru-baru tu ngena komputer enggau internet. Gerempung Jehovah mega nyalin ngagai pemadu mayuh bansa jaku! Nama kebuah? Ngambika semua orang ulih ninga berita manah dalam jaku diri empu. Jehovah enda bepilih mata. Iya udah madahka berita manah deka  ditusui “ngagai semua bansa, raban bansa, jaku enggau menua.” (Pem. 14:6, 7) Jehovah deka semua orang ninga pasal pesan Perintah Petara.

⁹ Baka ni enggau orang ke tusah ditemu, engka ketegal sida diau ba endur ke dijaga enggau terit? Ngambika ulih nginjil ngagai mayuh orang ke baka tu, gerempung Jehovah berengkah nginjil ba mua orang mayuh. Ambika chunto, ba taun 2001, Raban ti Ngiring ngemendarka bala menyadi ba Perancis ngena kart litaricha tauka perengka bukai kena mandangka litaricha kitai. Udah nya, bala menyadi ba endur bukai mega berengkah nginjil enggau chara tu. Asil iya amat manah. Ba taun 2011, siti chara baru diuji ba endur ti pemadu mayuh orang di New York City, Amerika Serikat. Ba taun keterubah, 102,129 bup enggau 68,911 majalah disadung. Lalu 4,701 iku orang minta belajarka Bup Kudus! Endang terang, roh kudus nulung ba pengawa tu. Nya alai, Raban ti Ngiring ngemendarka bala menyadi di serata dunya ngena kart litaricha lebuh nginjil.

10. Baka ni kitai ulih ngemanahka agi chara kitai nginjil sereta ngajar?

¹⁰ Nama ulih digaga nuan? Jehovah ngajar kitai chara nginjil ba gempuru Kristian. Kena meh utai ti udah dipelajarka nuan. Seruran begulai nginjil enggau raban nginjil. Bala menyadi ba raban nginjil nuan ulih nulung nuan ngemanahka agi chara nginjil sereta ngajar. Lalu nuan mega ulih diperansang ari teladan sida ti manah. Terus meh nginjil taja pan napi penanggul. Ayat tema ba artikel tu ngingatka kitai, kitai ulih ngereja peneka Petara ukai ketegal pengering diri empu, tang ari saup roh kudus. (Sek. 4:6) Jehovah tentu meri pengering ngagai kitai laban ngereja pengawa Iya.

11. Baka ni raban ti ngiring ba kurun keterubah gawa enggau beserakup ngambika nembiak Petara bisi atur?

¹¹ Ba kurun keterubah. Raban ti ngiring di Jerusalem gawa enggau beserakup ngambika nembiak Petara bisi atur sereta pemaik. (SKR. 2:42) Ambika chunto, ba taun  49 Masihi, mayuh orang Kristian enda sepenemu pasal pengawa betutus. Nya alai, dibaruh iring roh kudus, raban ti ngiring berandauka pekara tu. Enti pekara tu enda diputarka, pengawa nginjil enda ulih dipejalaika enggau manah. Taja pan sida orang bansa Judah, tang bala rasul enggau tuai gempuru enda nitihka adat orang Judah tauka runding orang ke ngetan pengawa betutus. Sida mansik Jaku Petara sereta minta iring ari roh kudus ngambika ulih ngaga pemutus ti betul. (SKR. 15:1, 2, 5-20, 28) Nama asil iya? Jehovah merekatka pemutus sida, eklisia mengkang beserakup sereta bisi pemaik, lalu pengawa nginjil ulih diteruska.—SKR. 15:30, 31; 16:4, 5

12. Nama nunjukka gerempung Jehovah bisi atur sereta pemaik kemayaharitu?

¹² Ba jeman diatu. Gerempung Jehovah udah nulung nembiak Jehovah terus bisi atur sereta pemaik. Kenyau ari taun 1895, Zion’s Watch Tower and Herald of Christ’s Presence kena 15 November, mansutka artikel ke betajuk “Decently and in Order,” ti bepelasarka 1 Korint 14:40. Artikel tu madahka: “Bala rasul nulis mayuh utai ngagai eklisia ba kurun keterubah pasal atur . . . Amat beguna kitai terus nitihka ‘semua utai ti udah ditulis dulu kelia kena ngajar kitai.’” (Rom. 15:4) Baka orang Kristian ba kurun keterubah, gerempung Jehovah kemayaharitu mega bebendar ngetanka atur sereta pemaik. Ambika chunto, enti nuan enggau Gempuru Belajarka Majalah ba eklisia bukai, enda ngira ba menua diri tauka menua bukai, nuan nemu baka ni gempuru nya dipejalaika sereta pelajar ke deka dikena. Tu ngasuh nuan berasai nyamai. Semina roh kudus Petara aja ulih nyerakupka kitai!—Sep. 3:9.

13. Bepelasarka James 3:17, nama tanya ke ulih ditanya diri empu?

¹³ Nama ulih digaga nuan? Jehovah deka nembiak Iya ‘nyaga penyerakup dalam roh ngena pemaik ti nanggam [sida] semua.’ (Eps. 4:1-3) Nya alai tanya diri empu: ‘Kati aku meransang penyerakup sereta pemaik dalam eklisia? Kati aku ngasika menyadi lelaki ke ngiring? Kati bala menyadi ulih  bepanggai ba aku, kelebih agi enti aku bisi tanggung pengawa ba eklisia? Kati aku datai tumu sereta rindu nulung orang bukai?’ (Bacha James 3:17.) Enti nuan ngasaika diri ulih ngaga ubah ba sekeda pekara, besampi meh minta roh kudus. Enti nuan ngemendarka roh kudus ngubah personaliti enggau ulah nuan, bala menyadi Kristian deka sayau agi ke nuan sereta deka ingat utai ke digaga nuan ba eklisia.

14. Nitihka Kolosi 1:9, 10, baka ni Jehovah nulung nembiak Iya ba kurun keterubah ‘bulih penemu pasal peneka Petara’?

¹⁴ Ba kurun keterubah. Jehovah rindu ngajar nembiak Iya. (Mas. 32:8) Iya deka sida ngelala Iya, rinduka Iya, lalu idup belama iya. Semua utai tu ulih dikereja ketegal ajar ke diberi Iya. (Jhn. 17:3) Jehovah ngena eklisia Kristian ngajar nembiak Iya ba kurun keterubah. (Bacha Kolosi 1:9, 10.) Roh kudus, iya nya “Penyaup” ti disemaya Jesus mega nulung bala murid meretika Jaku Petara, ingatka utai ti disebut sereta ke digaga Jesus, ke bisi ditulis ba bup Injil. (Jhn. 14:16) Penemu tu nulung ngeringka pengarap sida enggau negapka pengerindu ke Petara, Anak Iya, sereta ke pangan diri.

15. Baka ni Jehovah ngamatka semaya Iya ba Isaiah 2:2, 3?

¹⁵ Ba jeman diatu. Jehovah madahka ba “jemah ila,” orang ari semua bansa deka datai ngagai “bukit” Iya. Reti iya, sida deka begulai enggau nembiak Iya ngambika ulih diajar Jehovah. (Bacha Isaiah 2:2, 3.) Kitai meda utai tu nyadi kemayaharitu. Pengarap ti bendar jauh manah agi ari pengarap pelesu. Lalu Jehovah udah nyediaka mayuh penerang pasal Bup Kudus ke nembiak Iya. (Isa. 25:6) Nengah “ulun ke tetap ati sereta bepenemu-dalam,” Jehovah ukai semina  meri mayuh penerang tang mega ngena bemacham chara baka litaricha, cheramah, katun sereta video kena ngajar nembiak Iya. (Mat. 24:45) Baka pangan Jop, Elihu, kitai setuju Jehovah endang “pengajar ti pemadu besai.”—Jop 36:22.

16. Nama ulih digaga nuan ngambika bulih penguntung ari ajar Jehovah?

¹⁶ Nama ulih digaga nuan? Roh kudus ulih nulung nuan ngena utai ke dipelajar ari Bup Kudus ba pengidup. Nuan ulih besampi baka pemasmur ke madah: ‘Ajar aku, O Jehovah, utai ti diasuh Nuan kereja aku, ngambika aku tetap ati ngasika Nuan. Ajar aku betuaika Nuan enggau pengabis pengangkun ati aku.’ (Mas. 86:11) Pia mega, terus macha sereta belajarka Bup Kudus enggau litaricha bukai ti disediaka gerempung Jehovah. Kingatka, juluk ati nuan ukai semina ngulihka penemu. Tang nuan deka andalka utai ke dipelajar nuan endang pemendar sereta ngena nya ba pengidup. Roh kudus Jehovah ulih nulung nuan ngereja nya. Nuan mega deka meransang bala menyadi Kristian. (Heb. 10:24, 25) Nama kebuah? Laban sida nya ruang bilik nuan. Besampi minta roh kudus nulung nuan meri saut ari ati ba gempuru Kristian sereta bebendar ngereja pengawa nuan ba gempuru. Enggau chara tu nuan nunjukka ngagai Jehovah sereta Anak Iya, nuan rinduka “bedus” sida.—Jhn. 21:15-17.

17. Baka ni nuan nunjukka diri nyukung gerempung Jehovah?

¹⁷ Enda lama agi semina gerempung Jehovah aja ke tinggal ba dunya. Nya alai, ransing meh gawa enggau gerempung Iya. Baka Jehovah, nuan mega ulih ngayanka diri enda bepilih mata lebuh nuan nginjil ngagai semua orang. Nuan mega ulih nunda pengerindu Iya ke atur sereta pemaik lebuh nuan ngemansangka penyerakup ba eklisia. Lalu mendingka Jehovah enggau belajarka semua penerang ti udah disediaka Iya. Enti nuan ngereja tu, nuan enda takut lebuh meda dunya Sitan dirusak. Tang nuan deka enggau berani nyukung gerempung Jehovah.