1. Anni paga i mawag nga kuan na bawtisadu ira nga Cristiano?

BAWTISADU ka ngana kari? Nu wan, nepasingammu ngana ta publiko i pangurug mu kani Jehova anna i pakkaraga mu nga masserbi kavulu i organisasionna. * Ngem mawag tu mas malladda i pangurug mu kani Jehova. Mas makkomfiansa ka nakuan gapa nga usu-usan ni Jehova i organisasionna tapenu metuppal i gakkagna sangawe.

2-3. Kunnasi nga igigiya ni Jehova i organisasionna ta maddaggun? Mangiyawa tu angngarigan.

² Ta maddaggun, masingan ta pangigiya ni Jehova ta organisasionna i personalidad, gakkag, anna estandartena ira. Gigiammuattam i tallu nga kualidad ni Jehova nga masingi-singan ta organisasionna.

³ Ollu, ari nga mangireruma i Dios. (King. 10:34) Aya i namaguyu kani Jehova tapenu iyawa si Jesus nga “panavvu ta ngamin nga totolay.” (1 Tim. 2:6; Juan 3:16) Usu-usan ni Jehova i totolena tapenu ilayyagayya i mapia nga dumug ta ngamin nga maya nga magginna tapenu moffunanna ira nga mabbenefisio ta tavvu. Mekadua, si Jehova ay Dios na unnug anna imammo. (1 Cor. 14:33, 40) Nu kunnari, ekspektattam nga organisadu anna memammo danuri maddayarayaw nisa. Mekatallu, si Jehova i “Katannangan nga Instruktor.” (Isa. 30:20, 21) Yatutta nakafokus i organisasionna ta panuddu tu Biblia ta unag na kongregasion anna ta ministerio. Kunnasi nga nipasingan na ollu-siglo nga kongregasion Cristiano danatun nga tallu nga kualidad ni Jehova? Kunnasi gapa nga ipasa-pasingan na totolay na Dios danatun nga kualidad ta tiempo tam? Kunnasi naka moffunan na masanto nga espiritu durante  nga masserbi ka kani Jehova kavulu i organisasionna sangawe?

4. Ta Kingngua 1:8, anni i nibilin ni Jesus ta disipulosna, anna anni nga uffun i malawada?

⁴ Ta ollu nga siglo. Nangiyawa tu iddanama ta ngamin nga totolay i mensahe nga nilayyagayya ni Jesus. (Luc. 4:43) Nibilinna ta disipulosna nga ituloyda i pinegafuananna nga trabahu, i pallayyagayya “adde ta ngamin nga tuppu-tuppag na davvun.” (Bibbigan i Kingngua 1:8.) Kakuruganna, ariadda nga makua yaw nga ira-ira laman. Mawagda i masanto nga espiritu nga nipromesa ni Jesus nga “manguffun” nira.—Juan 14:26; Zac. 4:6.

5-6. Kunnasi nga inuffunan na masanto nga espiritu i disipulos ni Jesus?

⁵ Ta Pentecostes 33 C.E., nalawa na disipulos ni Jesus i masanto nga espiritu. Ta uffun natun, insigida ira nga nallayyagayya. Ta ababba laman nga tiempo, rinivu i nangalawa ta mapia nga dumug. (King. 2:41; 4:4) Turi ta egga i nangigamma ta trabahu na disipulo ira, ari ira nga naganassing anna ari yaw i nangifugag nira, nu ari, nappoffun ira kani Jehova. Nipakimalloda: “Kiddawam-mi nikaw tu iddan nakami tu gutu nga mangilayya-gayya ta uvovug mu.” Megafu tatun, napannuan ira tu masanto nga espiritu anna “awan vuluvuga tu assing da nga nangilayya-gayya ta uvovug na Dios.”​—King. 4:18-20, 29, 31.

⁶ Egga paga i problema nga inarubang na disipulos ni Jesus. Balabaddi laman i kopia na Katurakan. Awan gapa tu tanakuan ira nga rimienta ta paggigiammuda nga gittana egga nittam sangawe. Tapus mawag nga layyagayyadda i totolay nga nadduruma i paguvovugda. Maski nu kunnatun, netuppal danatun nga matalikarag nga disipulo i gittana imposible nga makua. Ta unag laman na 30 nga dagun, nelayyagayyada i mapia nga dumug “ta ngamin nga totolay ta utun na davvun.”​—Col. 1:6, 23.

7. Maturu tu 100 dagun ngana i nappasa, kunnasi nammuan na aripan ira ni Jehova nu anni i ikikkiddona nira? Anni i kingnguada?

⁷ Ta moderno nga tiempo. Igigiya anna pasa-pasikannan ni Jehova i totolena ta maddaggun. Siempre, Biblia i primeru nga usanna tapenu igiya i totolena. Netura yatun ta uffun na masanto nga espiritu. Mabibbig tam tatun i ministerio ni Jesus anna i bilinna ta disipulosna nga itulu-tuloyda i trabahu nga pinegafuananna. (Mat. 28:19, 20) Tagga paga ta Hulio 1881, nakagi ngana naw nga magazina: “Nagalan onu nazelugan ittam tapenu usan i ngamin nga egga nittam ta pangilayyagayya ta mapia nga dumug, ari tu tapenu idayaw na totolay onu magunnug tu kinariku.” Kunnaw i kagian na bukleta nga To Whom the Work Is Entrusted nga nepublisa turi ta 1919: “Daka-dakal i mawag nga makua, ngem trabahu yaw na Yafu, anna iddanna ittam tu sikan tapenu makua yatun.” Kagitta na ollu-siglo ira nga Cristiano, magutu anna matalikarag danaw nga brother megafu ta makkomfiansa ira nga uffunan ira na masanto nga espiritu tapenu malayyagayyadda i ngamin nga klase na totolay. Makkomfiansa ittam gapa nga uuffunan ittam sangawe na masanto nga espiritu.

8-9. Anni ira nga metodo i inusa na organisasion ni Jehova tapenu ilayyagayya i mapia nga dumug?

⁸ Usu-usan na organisasion ni Jehova i kapianan ira nga rimienta tapenu ilayyagayya i mapia nga dumug. Nelagum tatun i neyimprenta ira nga publikasion, i “Photo-Drama of Creation,” phonograph, sound car, programa ira ta radio, anna ta nikanni laman, maski i computer anna Internet. Mattattransleyt gapa i organisasion na Dios tu informasion ta mas aru paga lengguahe sangawe anne ta maski anni nga nakuada ta nappasa. Ngatta? Tapenu maginna na ngamin nga klase na totolay i mapia  nga dumug ta mismu nga lengguaheda. Ari nga mangireruma si Jehova. Niprofesiyana nga melayyagayya i mapia nga dumug ta “totolay na madduma-ruma i rasa, tribu, paguvovug, anna nasion.” (Nep. 14:6, 7) Kayàna nga mammuan na ngamin i mensahe na Pappatulan.

⁹ Kunnasi gapa danuri ariattam malayyagayyan megafu ta maddian ira ta apartment nga agga-guardia anna nakaserra i trangkada? Tapenu madde ira, inuffunan ni Jehova i organisasionna tapenu mangusa tu nadduruma nga klase na pallayyagayya ta publiko. Angngariganna, turi ta 2001, inapruban na Manangngal nga Baggi nga usan na wawwaragi ta France i literature cart ira anna tanakuan paga nga metodo na pangidispley ta literatura tam. Ari nabbayag, kunnatun gapa i kingngua na wawwaragi tam ta tanakuan ira nga lugar. Kakkasta ira i resulta natun. Turi ta 2011, napegafuanan ta United States i bagu nga programa ta New York City nu sitaw pinaka-aru i totolay. Ta ollu nga dagun natun, 102,129 nga libru anna 68,911 nga magazina i nepalima, tapus 4,701 gapa i nar-request tu Bible study! Manawag nga usu-usan ni Jehova i masanto nga espirituna tapenu suportan yaw nga trabahu. Megafu tatun, inapruban na Manangngal nga Baggi i pangusa tu literature cart anna tanakuan paga nga metodo na pangidispley tu literatura ta interu mundo.

10. Kunnasi tam paga mabbalin tu mas malalaki ta pallayyagayya anna panuddu?

¹⁰ Nu anni i makuam. Approbetsammu i passanay nga iyayawa ni Jehova gukaban na study ira. Kanayukka nga makipallawan nu sitaw nga grupo ka nga neyasayn. Moffunaddaka na kagrupom ira nga mabbalin tu mas malalaki nga mallayyagayya anna manuddu anna mapasikadda i pangurug mu gukaban na makasta nga ehemploda. Kammu magimmang nga mallayyagayya maski nu egga ira i problema. Gittana nipanono nittam na tema nga teksto tam, makua tam i uray na Dios ari tu megafu ta sikattam, nu ari, gukaban na masanto nga espiritu. (Zac. 4:6) Siguradu yatun megafu ta trabahu na Dios i kukukuattam.

11. Kunnasi nga nakka-uffu-uffun i manangngal nga baggi ta ollu nga siglo tapenu mattalupaddian i unnug ta totolay na Dios?

¹¹ Ta ollu nga siglo. Nakka-uffu-uffun i manangngal  nga baggi ta Jerusalem tapenu mapattalupaddiadda i unnug anna imammo ta totolay na Dios. (King. 2:42) Angngariganna, turi ta 49 C.E., nadduruma i opinion na aru nga Cristiano ta isyu na pakkugi. Yatutta pinaguruvovugan yatun na manangngal nga baggi ta pangigiya na masanto nga espiritu. Nu ari ira nga nakkara-anugu, napagimmang nakuan natun i trabahu nga pallayyagayya. Maski paga nu Judio i apostol anna i manakam nga lallaki, ariadda nga nappa-influwensia ta tradision ira na Judio onu danuri mangipoppoddu tatun. Imbes tu kunna, nappegiya ira ta Uvovug na Dios anna ta masanto nga espiritu. (King. 15:1, 2, 5-20, 28) Anni i resulta natun? Binendisionan ni Jehova i desisiodda, nattalupaddian i imammo anna pattaradday ta kongregasion, anna nattulu-tuloy i trabahu nga pallayyagayya.​—King. 15:30, 31; 16:4, 5.

12. Anni i mangipasingan nga organisadu anna memammo i organisasion ni Jehova sangawe?

¹² Ta moderno nga tiempo. Inuffunan na organisasion ni Jehova i totolena tapenu mattalupaddian ira nga organisadu anna memammo. Tagga ta 1895, egga i artikulo ta Nobiembre 15 nga isyu na Zion’s Watch Tower and Herald of Christ’s Presence nga nateman tu “Mepangngo Anna Egga i Unnugna” base ta 1 Corinto 14:40. Mabibbig tatun: “Aru i netura na apostol ira ta ollu nga kongregasion meyannung ta unnug . . . Importante nga kanayuttam nga tuttulan tu mapia danatun nga ‘netura tapenu matudduan ittam.’” (Roma 15:4) Kunnatun gabbalaman i kukukuan na organisasion ni Jehova ta maddaggun tapenu mattalupaddian i unnug anna imammo ta kongregasion ira, gittana kingngua na ollu ira nga Cristiano. Nonopammu: Nu magatende ka ta Paggigiammu tu Passifusifutan ta tanakuan nga kongregasion onu maski paga ta tanakuan nga nasion, siguradu nga ammum lagapa nu kunnasi nga mekondukta i paggigiammu anna nu anni nga artikulo i magigiammu. Magga ari ka nga mappasiran! Mabbalin laman tu posible yatun nga pattaradday megafu ta espiritu na Dios!​—Zef. 3:9, ftn.

13. Segun ta Santiago 3:17, anni ira i iyavu tam ta baggi tam?

¹³ Nu anni i makuam. Kayà ni Jehova nga ‘mannanayun i pia na pattaradday tam nga iyawa na espiritu santo gafu ta imammo nga  mamakatadday nittam.’ (Efe. 4:1-3) Yatutta iyavu mu ta baggim: ‘Ipoppollù kari i pattaradday anna imammo ta kongregasion? Minattuppal ngà kari ta mangiyorollu ira? Makapattalo kari i wawwaragi niakan mas ngana nu egga ira i responsibilidad ku ta kongregasion? Kanayun ngà kari nga egga ta oras, minangnguffun, anna sigga-paran nga masserbi?’ (Bibbigan i Santiago 3:17.) Nu egga paga i mawag tu pakastammu, ipakimallo mu i masanto nga espiritu. Nu mas ipamavulummu nga moldeyan natun i personalidad anna konduktam, mas nga iddukan naka na wawwaragi anna appresiadda i kukukuammu para ta kongregasion.

14. Segun ta Colosas 1:9, 10, kunnasi nga sinudduan ni Jehova i totolena ta ollu nga siglo?

¹⁴ Ta ollu nga siglo. Magayayya si Jehova nga tudduan i totolena. (Sal. 32:8) Ikayana nga mammammuda yayya, ayatadda yayya, anna mattolay ira tu mannanayun bilang meddu nga ánana. Imposible nga matuppal ngamin danaw nu arianna ira nga tudduan. (Juan 17:3) Niyusa ni Jehova i ollu-siglo nga kongregasion Cristiano tapenu tudduan i totolena. (Bibbigan i Colosas 1:9, 10.) Daka-dakal i papel na masanto nga espiritu nga nipromesa ni Jesus nga “manguffun” nira. (Juan 14:16) Ta uffun naw, mas nalippawa na disipulo ira i Uvovug na Dios anna neperaddam nira i kinagi anna kingngua ni Jesus nga mabibbigda gabbalaman ta Evanghelio. Yaw nga pakannammu i namatuyag ta pangurug na ollu-siglo ira nga Cristiano kunne na gapa i pangayada ta Dios, ta Anana, anna ta kataggi-tadday.

15. Kunnasim nga masingi-singan nga matuttuppal ngana i nipromesa ni Jehova ta Isaias 2:2, 3?

¹⁵ Ta moderno nga tiempo. Niprofesiya ni Jehova nga “ta ultimu nga parte na aggaggaw,” mattaradday i ngamin nga totolay ta ngamin nga nasion ta simboliko nga vukig tapenu tudduanna ira meyannung ta dala-dalanna. (Bibbigan i Isaias 2:2, 3.) Masingattam  nga matuttuppal ngana yatun nga profesiya. Mas mapia i fustu nga paddayarayaw anne ta maski anni nga falsu nga paddayaw. Talaga abundansia i espiritual nga makan nga iyayawa ni Jehova ta totolena! (Isa. 25:6) Gukaban na “mekatalo anna nannono nga doroban,” nadduruma paga i klase na espiritual nga makan nga iyayawana, kagitta na artikulo ira, palappa, animation, anna video ira. (Mat. 24:45) Matageno tam gapa i natageno na kofun ni Job nga si Elihu nga kunna: ‘Sinni i gumattuddu nga kagitta na Dios?’—Job 36:22.

16. Anni i kuammu tapenu mabbenefisio ka ta panuddu ni Jehova?

¹⁶ Nu anni i makuam. Uffunan naka na masanto nga espiritu na Dios nga iyaplika i mabibbig mu anna magigiammum ta Uvovugna. Parigan i pakimallo na salmista nga: “O Jehova, tudduammà meyannung ta dalammu. Lumakag ngà ta kinakurug mu. Pakataddayammu i futù nga ikassing i ngagammu.” (Sal. 86:11, NW ) Yari tu itulu-tuloy i pabbibbig anna paggigiammu tu Biblia anna tanakuan paga ira nga publikasion nga naggafu ta organisasion ni Jehova. Siempre, ari laman tu pangà tu pakannammu i gakkag mu. Kayà mu nga ipafutu i kinakurug anna iyaplika yatun ta pattolem. Moffunan naka na espiritu ni Jehova nga kuan yatun. Ikaya mu gapa nga pagaramman i kapangngurug mu ira. (Heb. 10:24, 25) Ngatta? Megafu ta parte ira na espiritual nga familiam. Ipakimallo i uffun na espiritu na Dios tapenu makapakkomento ka tu napafutuan ta study ira anna tapenu meyawa mu i kapianan nu egga i partem ta study. Nu kuammu danatun, ipasa-pasingammu kani Jehova anna kani Jesus nga ayatammu i matagibalor nga ‘karneruda.’​—Juan 21:15-17.

17. Kunnasim nga mepasingan nga sigga-matalo nga suportammu i organisasion ni Jehova?

¹⁷ Ari mabbayag, i organisasion laman nga igigiya na espiritu na Dios i mabattang ta davvun. Yatutta matalikarag nga makipattrabahu ta organisasion ni Jehova. Ipasingammu nga ayatammu i ngamin nga totolay gittana pangaya na Dios gukaban na pangilayyagayya tu mapia nga dumug ta ngamin nga masimmuattam. Parigattam i pangayana ta unnug anna imammo gukaban na pangipoppoddu ta pattaradday ta kongregasion. Magginna ittam gapa ta Katannangan nga Instruktor tam gukaban na pangapprobetsa ta abundansia nga espiritual nga makan nga iyayawana. Aranni ngana nga madaral i mundo ni Satanas, ngem ari ittam nga maganassing. Sigga-matalo ittam nga manaddag kavulu danuri matalo ira nga massesserbi ta organisasion ni Jehova.