1. Ɛbɛ pɩwɛɛ se Krɩstʋ ñɩma mba pamɩyɩsɩ-wɛ lɩm yɔ powolo pɩ-yɔɔ nɛ palakɩ?

PƐTƐMƖ-Ŋ mɩyɩsʋʋ lɩm na? Ye ɛɛɛ yɔ, pɩwɩlɩɣ se ŋwɩlɩ lalaa ɛsɩndaa se ŋwɛnɩ tisuu Yehowa yɔɔ nɛ ŋwɩlɩ se ŋsɔɔlɩ faaa se ña nɛ ɛ-ɛgbɛyɛ ɩla tʋmɩyɛ. * Toovenim taa lɛ, pɩwɛɛ se tisuu mbʋ ŋwɛnɩ Yehowa yɔɔ yɔ, pɩwɛɛ nɛ pɩpaɣlɩɣ. Nɛ pɩwɛɛ se ŋwolo pɩ-yɔɔ nɛ ŋkpazɩɣ ɖoŋ tisuu mbʋ ŋwɛna se Yehowa wɛɛ nɛ ɛtɩŋɩɣnɩ ɛ-ɛgbɛyɛ yɔɔ nɛ ɛlakɩ tʋmɩyɛ nɖɩ ɛsɔɔlaa se pala sɔnɔ yɔ.

2-3. Wɛtʋ naadozo ndʋ papɩzɩɣ nɛ pana Yehowa ɛgbɛyɛ taa sɔnɔ? Ha kɩɖaŋ nɩɩyɩ.

² Sɔnɔ, Yehowa wɛɛ nɛ eɖiyiɣ ɛ-ɛgbɛyɛ, nɛ ɛzɩma eɖiyiɣ-ɖɩ yɔ pɩwɩlɩɣ ɛyʋ weyi ɛkɛnaa yɔ, mbʋ ɛsɔɔlaa se ɛla yɔ nɛ mbʋ ɛ-paɣtʋ kila kɛnaa yɔ. Iyele nɛ ɖɩyɔɔdɩ Yehowa wɛtʋ naadozo tɔm; pɩnaɣ-tʋ ɖɔɖɔ ɛ-ɛgbɛyɛ taa.

³ Kajalaɣ lɛ, “Ɛsɔ ɛɛtʋkʋʋ ɛyaa taa.” (Tʋma 10:34) Sɔɔlɩm seɣti Yehowa nɛ ɛcɛlɩ ɛ-Pɩyalʋ se ɛkɛ “kɩhɛyʋʋ pʋ-ñʋʋ taa . . . ɛyaa tɩŋa yɔɔ.” (1 Tim. 2:6; Yoh. 3:16) Yehowa ɖʋ ɛ-samaɣ tʋmɩyɛ se kosusi tɔm kɩbandʋ mba payɩ pɔsɔɔlaa se pewelisi yɔ. Ɛtɩŋɩɣnɩ pɩ-yɔɔ nɛ ɛsɩɣnɩ ɛyaa sakɩyɛ se kɩhɛyʋʋ pʋ-ñʋʋ taa ɛwazɩ-wɛ. Nabʋlɛ lɛ, Yehowa kɛ Ɛsɔ weyi ɛcɔlʋʋ wondu camɩyɛ yɔ nɛ laŋhɛzɩyɛ tɛ Ɛsɔ. (1 Kɔr. 14:33, 40) Pʋyɔɔ pɩpɔzaa se ɛ-sɛyaa ɛcɔlʋʋ wondu camɩyɛ nɛ pɛkɛ ɛgbɛyɛ nɖɩ ɖɩ-taa laŋhɛzɩyɛ wɛɛ yɔ. Nabudozo lɛ, Yehowa kɛ ‘Wɩlɩyʋ Sɔsɔ.’ (Iza. 30:20, 21) Pʋyɔɔ ɛ-ɛgbɛyɛ ñakɩ pana siŋŋ se ɖɩwɩlɩ ɛyaa ɛ-Tɔm ɛgbɛyɛ taa nɛ tɔm susuu taa. Ɛzɩma kajalaɣ Krɩstʋ ɛgbɛyɛ taa mba maɣzɩnɩ Yehowa wɛtʋ naadozo ndʋ? Ɛzɩma Yehowa ɛgbɛyɛ maɣzɩɣnɩ  wɛtʋ ndʋ ɖa-alɩwaatʋ taa? Nɛ ɛzɩma fezuu kiɖeɖeu pɩzɩɣ nɛ kɩsɩnɩ-ŋ nɛ ña nɛ Yehowa ɛgbɛyɛ ɩla tʋmɩyɛ sɔnɔ?

4. (a) Ɛzɩ pɔyɔɔdʋʋ Tʋma Labʋ 1:8 taa yɔ, tʋmɩyɛ nɖɩ Yesu ɖʋ ɛ-wayɩ tɩŋɩyaa paɣtʋ se pala? (b) Nɛ ɛbɛ kaɣ-wɛ sɩnʋʋ nɛ palabɩ-ɖɩ?

⁴ Kajalaɣ pɩnzɩ mɩnʋʋ taa. Tɔm ndʋ Yesu kaasusaa yɔ, tɩɩha ɛyaa kpeekpe lidaʋ. (Luka 4:43) Ɛɛɖʋ ɛ-wayɩ tɩŋɩyaa paɣtʋ se powolo pɩ-yɔɔ nɛ pala tʋmɩyɛ nɖɩ ɛpaɣzaa yɔ, se palɩzɩ aseɣɖe “nɛ piwolo pɩtalɩ tɛtʋ kamaɣ yɔɔ.” (Kalɩ Tʋma Labʋ 1:8.) Toovenim taa lɛ, paapɩzɩɣ nɛ pala tʋmɩyɛ nɖɩ pa-maɣmaɣ po-ɖoŋ taa. Pɩkaɣ-wɛ pɔzʋʋ fezuu kiɖeɖeu, pʋ-tɔbʋʋ se “sɩnɩyʋ” weyi Yesu labɩ-wɛ tamaɣ se etiyiɣni-wɛ yɔ.—Yoh. 14:26; Zek. 4:6.

5-6. Hɔɔlɩŋ weyi taa fezuu kiɖeɖeu sɩnɩ Yesu wayɩ tɩŋɩyaa?

⁵ Yesu wayɩ tɩŋɩyaa mʋ fezuu kiɖeɖeu pɩnaɣ 33 tɛ Pantekooti wiye. Fezuu kiɖeɖeu ŋgʋ kɩsɩnɩ-wɛ nɛ papaɣzɩ tɔm susuu kpaagbaa, nɛ pitileɖi lɛ ɛyaa kudokiŋ sakɩyɛ tisi nɛ pamʋ tɔm kɩbandʋ. (Tʋma 2:41; 4:4) Alɩwaatʋ ndʋ ɛyaa paɣzɩ nazʋʋ tɔmkpɛlɩkɩyaa yɔ, sɔɔndʋ tɩkpa-wɛ nɛ peyele tɔm susuu. Ɛlɛ, pɔpɔzɩ Ɛsɔ se ɛsɩnɩ-wɛ. Patɩmaa se: “[Yele] nɛ ño-yomaa wolo ñɔ-tɔm susuu yɔɔ nɛ abalɩtʋ.” Nɛ fezuu kiɖeɖeu su pa-taa ɖo nɛ “posusuu Ɛsɔ tɔm kaalɛyɩtʋ.”—Tʋma 4:18-20, 29, 31.

⁶ Yesu tɔmkpɛlɩkɩyaa katɩ kalaa lɛɛna ɖɔɖɔ. A-taa naayɛ yɔ: Pataawɛɛnɩ Ɛsɔtɔm takayɩsɩ sakɩyɛ. Pataawɛɛnɩ takayɩsɩ nzɩ sɩtazɩɣ Bibl taa ɛzɩ pɩwɛʋ sɔnɔ yɔ. Pɩɩwɛɛ ɖɔɖɔ se posusi tɔm ɛyaa mba pɔyɔɔdʋʋ kʋnʋmɩŋ ndɩ ndɩ sakɩyɛ yɔ. Paa mbʋ yɔ, mbʋ pɩɩwɛ ɛzɩ paapɩzɩɣ nɛ palabɩ-pʋ yɔ, tɔmkpɛlɩkɩyaa kpekpeka tɩnaa mba palabɩ-pʋ. Pɩlakaɣ pɩnzɩ 30 mbʋ yɔ pʋwayɩ lɛ, posusi tɔm kɩbandʋ “wondu kɩlɩzɩtʋ tɩŋa ɛjaɖɛ kpeekpe yɔɔ.”—Kol. 1:6, 23.

7. (a) Pɩcɛzɩɣ pɩnzɩ 100 yɔ, ɛbɛ kaasɩnɩ Yehowa sɛyaa nɛ patɩlɩ tʋmɩyɛ nɖɩ Ɛsɔ kaasɔɔlaa se pala yɔ? (b) Nɛ panɩ pɩ-taa mbʋ lɛ, ɛzɩma palaba?

⁷ Ða-alɩwaatʋ taa. Yehowa wɛɛ ewoki pɩ-yɔɔ nɛ eɖiyiɣ ɛ-samaɣ nɛ ɛhaɣ-kɛ ɖoŋ se kala ɛ-sɔɔlɩm. Ɛtɩŋɩɣnɩ Bibl yɔɔ nɛ eɖiyiɣ ɛ-samaɣ, nɛ e-fezuu kiɖeɖeu sɩnɩna nɛ pama-kʋ. Ðɩkalɩɣ Yesu tɔm susuu tɔm Bibl taa. Ðɩnaɣ kɩ-taa ɖɔɖɔ paɣtʋ ndʋ ɛɖʋ ɛ-wayɩ tɩŋɩyaa se powolo pɩ-yɔɔ nɛ palakɩ tʋmɩyɛ nɖɩ ɛɛpaɣzaa yɔ. (Mat. 28:19, 20) Juillet 1881 tɛ Feŋuu Tilimiye yɔɔdaa se: “Yehowa tɩtaa-ɖʋ num se ɛyaa ɩɖʋ-ɖʋ hɩɖɛ yaa se ɖɩpɩsɩ ñɩm tɩnaa, ɛlɛ ɛta-ɖʋ num se ɖɩkpaɣ mbʋ payɩ ɖɩwɛna yɔ nɛ ɖisusuni tɔm kɩbandʋ.” Hatʋ cabɩ takayaɣ ŋga palɩzɩ pɩnaɣ 1919 taa (aŋglɛɛ taa) nɛ payaɣ-kɛ se Anɩ pɛcɛlɩ tʋmɩyɛ nɖɩ yɔ, kɔyɔɔdaa se: “Tʋmɩyɛ nɖɩ pɩwɛɛ se pala yɔ ɖɩɖɔ siŋŋ, ɛlɛ pɩkɛ Kɩbaɣlʋ tʋmɩyɛ nɛ ɛkaɣ-ɖʋ haʋ ɖoŋ nɛ ɖɩlabɩ-ɖɩ.” Ɛɛɛ, ɛzɩ kajalaɣ Krɩstʋ ñɩma yɔ, koobiya panɛ palabɩ tʋmɩyɛ nɖɩ nɛ abalɩtʋ nɛ pataa fezuu kiɖeɖeu liu se kɩkaɣ-wɛ sɩnʋʋ nɛ posusi tɔm ɛyaa kpeekpe. Ða ɖɔɖɔ ɖɩtaɣ liu sɔnɔ se fezuu kiɖeɖeu kaɣ-ɖʋ sɩnʋʋ.

8-9. Nʋmɔŋ weyi yɔɔ Yehowa ɛgbɛyɛ tɩŋnaa se ɖisusi tɔm kɩbandʋ?

⁸ Yehowa ɛgbɛyɛ lakɩnɩ tʋmɩyɛ wondu kɩbandʋ nɛ ɖisusuuni tɔm kɩbandʋ. Wondu ndʋ tɩ-taa natʋyʋ yɔ: Takayɩsɩ, “Photo-Drame de la création,” menziiniwaa mba pamakɩnɩ tatasɩ yɔ, lɔɔɖa wena paɖʋ a-ñʋŋ taa haut-parleur waa sɔsaa yɔ, raadiyoowaa yɔɔ tɔm yɔɔdʋʋ, nɛ pitileɖi yɔ pɛwɛɛ nɛ palakɩnɩ tʋmɩyɛ Ordinatɛɛrɩwaa nɛ intɛrnɛɛtɩ. Yehowa ɛgbɛyɛ wɛɛ nɛ ɖɩñakɩ pana ɖɔɖɔ nɛ ɖɩɖɛzɩɣ tɔm kʋnʋmɩŋ sakɩyɛ taa nɛ pɩkɩlɩ ɖooo lɛ! Ɛbɛ yɔɔ? Ðɩlakɩ mbʋ se ɛyaa kpeekpe ɩpɩzɩ nɛ panɩɩ tɔm kɩbandʋ pa-maɣmaɣ pa-kʋnʋŋ taa. Yehowa ɛɛtʋkʋʋ ɛyaa taa; ɛɛyɔɔdaa se pakaɣ susuu tɔm kɩbandʋ “ajɛɛ kpeekpe nɛ cejewe kpeekpe nɛ kʋnʋmɩŋ kpeekpe nɛ samasɩ kpeekpe.” (Natʋ 14:6, 7) Ɛsɔɔlaa se paa anɩ ɛnɩɩ Kewiyaɣ tɔm.

 ⁹ Nɛ ɛyaa mba pɛwɛ ɖɩsɩ nzɩ paɖaŋɩɣ sɩ-yɔɔ, yaa nzɩ pakaɖɩ sɩ-nɔnɔsɩ yɔ sɩ-taa, nɛ ɖɩɩpɩzɩɣ se ɖisusi-wɛ tɔm yɔ, ɛzɩma tɔm kɩbandʋ talɩɣ-wɛ? Pɩsa nɛ posusi ɛyaa mba pa-taa sakɩyɛ tɔm lɛ, Yehowa sɩnɩ ɛ-ɛgbɛyɛ nɛ ɖɩpaɣzɩ labɩnʋʋ samaɣ taa tɔm susuu nʋmɔŋ ndɩ ndɩ tʋmɩyɛ. Kɩɖaʋ nakʋyʋ yɔ: Pɩnaɣ 2001 taa, Nɔɔɖɛyaa Ɛgbɛyɛ ha nʋmɔʋ Fransɩ koobiya se palabɩnɩ tʋmɩyɛ présentoir waa nɛ nʋmɔŋ lɛɛŋ nɛ pawɩlɩ ɛyaa takayɩsɩ. Pʋwayɩ lɛ, lona lɛɛna taa koobiya ɖɔɖɔ paɣzɩ tɩŋnʋʋ nʋmɔʋ ŋgʋ kɩ-yɔɔ nɛ posusuu tɔm. Pɩlʋlɩ pee kɩbana. Pɩnaɣ 2011 taa papaɣzɩ ɖʋtʋ kɩfatʋ natʋyʋ Etaazuunii ɛjaɖɛ taa tɛtʋ ndʋ payaɣ se Niyuu Yɔrɩkɩ yɔ, tɩ-hɔɔlɩŋ weyi ɩ-taa ɛyaa kɩlɩɣ ɖɔm yɔ ɩ-taa nakʋyʋ taa. Pɩnaɣ ŋga ka-taa pacalɩ labʋ mbʋ yɔ, patayɩ takayɩsɩ 102129 nɛ fenaɣ fenaɣ takayɩsɩ 68911. Nɛ ɛyaa 4701 pɔzaa se pɛkpɛlɩkɩnɩ-wɛ Bibl! Pɩwɩlɩɣ kpayɩ kpayɩ se Yehowa wɛɛ nɛ ɛtɩŋɩɣnɩ e-fezuu kiɖeɖeu yɔɔ nɛ ɛɖʋʋ nesi tɔm susuu tʋmɩyɛ. Piyeba nɛ Nɔɔɖɛyaa Ɛgbɛyɛ ha nʋmɔʋ se palabɩnɩ tʋmɩyɛ présentoir waa tɔm susuu taa ɛjaɖɛ kpeekpe yɔɔ.

10. Ɛbɛ ɖɩpɩzɩɣ ɖɩla nɛ ɖɩwɛɛ niye tɔm susuu nɛ tɔm wɩlʋʋ taa nɛ pɩkɩlɩ?

¹⁰ Mbʋ ŋpɩzɩɣ nɛ ŋla yɔ. Yehowa falɩsɩɣ-ɖʋ kediɣzisi taa se ɖɩpɩzɩ nɛ ɖisusi tɔm. Labɩnɩ tʋmɩyɛ mbʋ ŋkpɛlɩkɩɣ sɩ-taa yɔ. Susuu tɔm ɖoŋ ɖoŋ ñɔ-tɔm susuu ɛgbɛyɛ taa. Ñɔ-tɔm susuu ɛgbɛyɛ taa koobiya pɩzɩɣ pasɩnɩ-ŋ nɛ ŋpɩsɩ tɔm susuyu nɛ tɔm wɩlɩyʋ weyi ɛwɛ niye yɔ. Papɩzɩɣ ɖɔɖɔ nɛ patɩŋnɩ pa-kɩɖaŋ kɩbaŋ yɔɔ nɛ pakpazɩ-ŋ ɖoŋ. Wolo pɩ-yɔɔ nɛ ŋsusuu tɔm paa ŋkatɩɣ kala yɔ. Ɛzɩ ɖɔ-tɔm ñʋʋ mayaɣ yɔɔdʋʋ yɔ, pɩtɩkɛ ɖa-maɣmaɣ ɖo-ɖoŋ taa ɖɩpɩzɩɣ nɛ ɖɩlakɩ Ɛsɔ sɔɔlɩm; ɛlɛ ɖɩpɩzɩɣ nɛ ɖɩlakɩ-pʋ mbʋ pʋyɔɔ yɔ fezuu kiɖeɖeu sɩɣnɩ-ɖʋ. (Zek. 4:6) Ða-taa pɩzɩɣ nɛ pɩtɛ se Yehowa kaɣ-ɖʋ haʋ ɖoŋ weyi pɩpɔzʋʋ-ɖʋ yɔ, mbʋ pʋyɔɔ yɔ ɛ-tʋmɩyɛ ɖɩwɛɛ nɛ ɖɩlakɩ.

11. Ɛzɩma kajalaɣ pɩnzɩ mɩnʋʋ taa nɔɔɖɛyaa ɛgbɛyɛ taa ñɩma labɩ tʋmɩyɛ nɔɔ kʋɖʋmaɣ taa se pɩtɩŋa pɩcɔlɩ camɩyɛ nɛ laŋhɛzɩyɛ wɛɛ Ɛsɔ samaɣ taa?

¹¹ Kajalaɣ pɩnzɩ mɩnʋʋ taa. Nɔɔɖɛyaa ɛgbɛyɛ kaawɛ Yeruzalɛm, nɛ ɖɩ-taa ñɩma kaalabɩ  tʋmɩyɛ nɔɔ kʋɖʋmaɣ taa se pɩtɩŋa pɩcɔlɩ camɩyɛ nɛ laŋhɛzɩyɛ wɛɛ Ɛsɔ samaɣ taa. (Tʋma 2:42) Kɩɖaʋ nakʋyʋ yɔ: Alɩwaatʋ ndʋ pɛlɩtʋ tɔm kɔnɩ nɔɔhɔnɖɛ pɩnaɣ 49 taa mbʋ yɔ yɔ, fezuu kiɖeɖeu sɩnɩ nɔɔɖɛyaa ɛgbɛyɛ taa ñɩma nɛ pɔcɔnɩ tɔm ndʋ ti-ɖeɖe. Ye pɛlɩtʋ tɔm eeyeba nɛ ɛgbɛyɛ tayɩ yɔ, tɔm susuu taaɖɛɛnɩ ɛsɩndaa. Paa apostoloowaa nɛ abalaa mba pasʋtʋyaa yɔ paakɛ Yuuda ñɩma yɔ, patiyele nɛ Yuuda ñɩma sɔnzɩ yaa mba palʋkaɣ sɔnzɩ nzɩ sɩ-yɔɔ siŋŋ yɔ, pɛwɛɛnɩ ɖoŋ pɔ-yɔɔ. Ɛlɛ, peyeba nɛ Ɛsɔtɔm nɛ Ɛsɔ fezuu peɖiyi-wɛ. (Tʋma 15:1, 2, 5-20, 28) Ɛbɛ kaalɩ pɩ-taa? Yehowa wazɩ lɩmaɣzɩyɛ nɖɩ pakpaɣaa yɔ ɖɩ-yɔɔ; piyeba nɛ laŋhɛzɩyɛ nɛ nɔɔ kʋɖʋmaɣ wɛɛ ɛgbɛyɛ taa nɛ tɔm kɩbandʋ susuu tʋmɩyɛ ɖɛɛnɩ ɛsɩndaa.—Tʋma 15:30, 31; 16:4, 5.

12. Ɛbɛ wɩlɩɣ se pɩtɩŋa pɩtʋʋzɩ cɔlɩɩɩ nɛ laŋhɛzɩyɛ wɛ Yehowa ɛgbɛyɛ taa sɔnɔ?

¹² Ða-alɩwaatʋ taa. Yehowa ɛgbɛyɛ sɩnɩ Yehowa samaɣ nɛ pɩtɩŋa pɩtʋʋzɩ cɔlɩɩɩ nɛ laŋhɛzɩyɛ wɛɛ ka-taa. 15 novembre 1895 tɛ le Phare de la Tour de Sion et Messager de la Présence de Christ takayaɣ (Aŋglɛɛ) taa, tɔm ñʋʋ nakʋyʋ wɛɛ nɛ kɩtɔŋ se: “Pɩɖɔ camɩyɛ nɛ pʋtʋʋzɩ cɔlɩɩɩ.” Paalɩzɩ tɔm ñʋʋ ŋgʋ nɛ 1 Kɔrɛntɩ mba 14:40 taa. Tɔm ñʋʋ ŋgʋ kɩyɔɔdaa se: “Apostoloowaa ma tɔm sakɩyɛ, tɩyɔɔdʋʋ kajalaɣ ɛgbɛyɛ tɔm, nɛ tɔm ndʋ titukaɣni ɛzɩma pɩwɛɛ se wondu ɩtʋʋzɩ cɔlɩɩɩ yɔ . . . Pɩcɛyaa se ɖiwolo pɩ-yɔɔ nɛ ɖɩɖɔŋ tɔm ndʋ ‘paama ɖooo lɔndaa se pawɩlɩ-ɖʋ lɔŋ yɔ’ tɩ-yɔɔ camɩyɛ.” (Roma 15:4) Sɔnɔ, Yehowa ɛgbɛyɛ ñakɩ pana siŋŋ se ɖiyele nɛ pɩtɩŋa pɩtʋʋzɩ cɔlɩɩɩ nɛ laŋhɛzɩyɛ wɛɛ Krɩstʋ ñɩma agbaa taa ɛzɩ pɩɩwɛʋ kajalaɣ Krɩstʋ ñɩma alɩwaatʋ taa yɔ. Kɩɖaʋ nakʋyʋ yɔ: Ye ŋcaɣ wobu ɛgbɛyɛ lɛɛɖɛ taa Feŋuu Tilimiye Kpɛlɩkʋʋ alɩwaatʋ taa, paa pɩkɛ ñɛ-ɛjaɖɛ taa yaa ɛjaɖɛ lɛɛɖɛ taa yɔ, ŋsɩm ɛzɩma kpɛlɩkʋʋ kaɣ ɖɔm yɔ, nɛ tɔm ñʋʋ ŋgʋ pakaɣ kpɛlɩkʋʋ yɔ. Ŋkaɣ naʋ kpaagbaa se ŋtɩkɛ ɛgɔm! Ɛsɔ fezuu ɖeke pɩzɩɣna nɛ kiyele nɛ nɔɔ kʋɖʋmaɣ ŋga kɛwɛɛ.—Sof. 3:9.

13. Tɔm ndʋ Yakubu 3:17 yeki se ɖɩpɔzɩ ɖa-tɩ?

¹³ Mbʋ ŋpɩzɩɣ nɛ ŋla yɔ. Yehowa sɔɔlaa se ɛ-samaɣ taa ñɩma iyele nɛ ‘nɔɔ kʋɖʋmaɣ ŋga fezuu yeba nɛ pɛwɛɛna yɔ, kɛwɛɛ mbʋ tam laŋhɛzɩyɛ tomiye nɖɩ ɖɩhɔkɩ-wɛ nɛ ɖama yɔ  ɖɩ-taa.’ (Efɛz. 4:1-3) Ye mbʋ, pɔzɩ ña-tɩ se: ‘Mañakɩ pana se meyele nɛ nɔɔ kʋɖʋmaɣ nɛ laŋhɛzɩyɛ wɛɛ ɛgbɛyɛ taa? Mañaŋ mba pɛɖɛɣ nɔɔ ɛgbɛyɛ taa yɔ? Lalaa pɩzɩɣ nɛ pata-m liu, kɔzɩ kɔzɩ ye mɛwɛnɩ wala ɛgbɛyɛ taa yɔ? Mɔnɖɔŋ alɩwaatʋ yɔɔ, nɛ mɔnsɔɔlʋʋ faaa se manɖʋ lalaa nesi na?’ (Kalɩ Yakubu 3:17.) Ye ŋnawa se pɩpɔzʋʋ se ŋñaɣ pana hɔɔlɩŋ nɩɩyɩ taa yɔ, tɩmɩ nɛ ŋpɔzɩ fezuu kiɖeɖeu. Ye ŋyeki se kɩwɛɛnɩ ɖoŋ ñɛ-ɛyʋtʋ nɛ ña-lakasɩ yɔɔ nɛ pɩkpaɖɩ yɔ, ño-koobiya kaɣ-ŋ sɔɔlʋʋ nɛ ŋmʋʋ ñɩm pɛ-ɛsɩndaa nɛ pɩkpaɖɩ.

14. Ɛzɩ Koloosi mba 1:9, 10 yɔɔdʋʋ yɔ, ɛzɩma Yehowa kaawɩlɩ ɛ-samaɣ tɔm kajalaɣ pɩnzɩ mɩnʋʋ taa?

¹⁴ Kajalaɣ pɩnzɩ mɩnʋʋ taa. Yehowa sɔɔlaa se ɛwɩlɩ ɛ-samaɣ tɔm. (Keɣa 31:8) Ɛ-samaɣ taa ñɩma kɛ e-piya kʋsɔɔlɩsɩ nɛ pʋyɔɔ lɛ, ɛsɔɔlaa se patɩlɩ-ɩ, pɔsɔɔlɩ-ɩ nɛ pacaɣ wezuu tam tam. Ye ɛtaawɩlɩɣ-wɛ tɔm yɔ, pataapɩzɩɣ se patɩlɩ-ɩ, pɔsɔɔlɩ-ɩ nɛ pɛwɛɛnɩ lidaʋ se pacakɩ wezuu tam tam. (Yoh. 17:3) Yehowa tɩŋnɩ kajalaɣ pɩnzɩ mɩnʋʋ taa Krɩstʋ ɛgbɛyɛ yɔɔ nɛ ɛwɩlɩ ɛ-samaɣ tɔm. (Kalɩ Koloosi mba 1:9, 10.) Fezuu kiɖeɖeu, pʋ-tɔbʋʋ se “sɩnɩyʋ” weyi Yesu kaalabɩ tamaɣ se etiyiɣna yɔ, kɩsɩnɩ tɔmkpɛlɩkɩyaa. (Yoh. 14:16) Fezuu kiɖeɖeu sɩnɩ tɔmkpɛlɩkɩyaa nɛ panɩɩ Ɛsɔtɔm taa nɛ pɔtɔzɩ mbʋ payɩ Yesu kaalaba nɛ tɔm ndʋ payɩ ɛɛyɔɔdaa yɔ tɩ-yɔɔ. Pʋwayɩ papɩzaa nɛ pakalɩ pɩ-tɔm Evaŋgilimwaa taa. Lɔŋsɩnɖɛ nɖɩ, ɖiyeba nɛ kajalaɣ Krɩstʋ ñɩma mba, pe-tisuu nɛ sɔɔlɩm mbʋ paawɛnɩ Ɛsɔ yɔɔ, ɛ-Pɩyalʋ yɔɔ nɛ ɖama yɔɔ yɔ, pɩkpa ɖoŋ.

15. Tamaɣ ŋga Yehowa labɩ Izaayii 2:2, 3 taa yɔ, ɛzɩma ŋna keɖiɣni labʋ?

¹⁵ Ða-alɩwaatʋ taa. Yehowa kaayɔɔdaa se “cee wayɩ wɛɛ taa” yaa “kɛdɛzaɣ kɩyakɩŋ taa lɛ,” ajɛɛ kpeekpe taa ɛyaa kaɣ kɔm ɛ-pʋʋ yɔɔ, pʋ-tɔbʋʋ se pakaɣ kpɛndʋʋ ɛ-sɛyaa toovenim ñɩma yɔɔ se ɛwɩlɩ-wɛ ɛ-nʋmɔŋ. (Kalɩ Izaayii 2:2, 3.) Ðɩnaɣ se natʋ tɔm ndʋ tiɖiɣni labʋ. Ðɩnaɣ se  toovenim Ɛsɔ sɛtʋ wɛ ɖeu kpem nɛ pɩkpaɖɩ cɛtɩm Ɛsɔ sɛtʋ kpeekpe. Nɛ Yehowa wɛɛ nɛ ɛwɩlɩɣ ɛ-samaɣ tɔm sakɩyɛ Bibl yɔɔ! (Iza. 25:6) “Yom siɣsiɣ tʋ nɛ lɔŋsɩnɖʋ” yɔɔ ɛtɩŋɩɣna nɛ ɛwɩlɩɣ tɔm ndʋ tɩ-tɩŋa payɩ. Yom ɛnʋ, ɛtɩŋɩɣnɩ nʋmɔŋ ndɩ ndɩ yɔɔ nɛ ɛlakɩ mbʋ. Ðɩpɩzɩɣ nɛ ɖɩkalɩ tɔm ndɩ ndɩ, ɖiwelisi tɔm yɔɔdʋʋ ndɩ ndɩ nɛ ɖɩcɔnɩ videowaa sakɩyɛ. (Mat. 24:45) Pɩlakɩ-ɖʋ ɛzɩ pɩɩlabʋ Yɔɔb taabalʋ Eliihu yɔ. Eliihu kaayɔɔdaa se: “Asɩma ɛzɩ [Ɛsɔ]” yɔ? Nɛ ɛɛwɛnɩ toovenim se ɛyɔɔdɩ mbʋ.—Yɔɔb 36:22.

16. Ɛbɛ ŋpɩzɩɣ ŋla nɛ Yehowa wɩlɩtʋ wazɩ-ŋ?

¹⁶ Mbʋ ŋpɩzɩɣ nɛ ŋla yɔ. Ɛsɔ fezuu kaɣ-ŋ sɩnʋʋ nɛ ŋɖɔ tɔm ndʋ ŋkalɩɣ nɛ ŋkpɛlɩkɩɣ Ɛsɔtɔm taa yɔ tɩ-yɔɔ ñe-wezuu caɣʋ taa. Tɩmɩ ɛzɩ keɣa maɖʋ nɔɔyʋ kaalabʋ yɔ. Ɛtɩmaa nɛ ɛyɔɔdɩ se: “Wɩlɩ-m ña-nʋmɔʋ nɛ mɔnɖɔ siɣsiɣ, ha-m laŋɩyɛ kʋɖʋmɖɩyɛ nɛ maña ña-hɩɖɛ!” (Keɣa 85:11) Ye mbʋ, wolo pɩ-yɔɔ nɛ ŋkalɩɣ nɛ ŋkpɛlɩkɩɣ Bibl nɛ takayɩsɩ lɛɛsɩ nzɩ Yehowa ɛgbɛyɛ lɩzaa yɔ. Toovenim taa lɛ, ña-kaɖʋwa tɩkɛna se ŋwɛɛnɩ lɔŋsɩnɖɛ yem. Ŋsɔɔlaa se ña-taa ɛtɛmnɩ toovenim tɔm nɛ ŋɖɔ tɩ-yɔɔ ñe-wezuu caɣʋ taa. Yehowa fezuu pɩzɩɣ kɩsɩnɩ-ŋ nɛ ŋla mbʋ. Ŋsɔɔlaa ɖɔɖɔ se ŋkpazɩ ɖoŋ ño-koobiya. (Ebr. 10:24, 25) Ɛbɛ yɔɔ? Mbʋ pʋyɔɔ yɔ, pɛkɛ ñɔ-hɔʋ taa ñɩma fezuu taa. Tɩmnɩ Ɛsɔ se ɛha-ŋ e-fezuu kiɖeɖeu nɛ kɩsɩnɩ-ŋ nɛ ŋcosi tɔm ndʋ tɩlɩnɩ ña-laŋɩyɛ taa yɔ kediɣzisi taa, nɛ ŋla ño-ɖoŋ ɖeɖe alɩwaatʋ ndʋ ŋwɛɣnɩ tʋmɩyɛ naɖɩyɛ sɩ-taa yɔ. Ye ŋlakɩ mbʋ yɔ, ŋwɩlɩɣ Yehowa nɛ ɛ-Pɩyalʋ se ŋsɔɔlɩ ‘pe-heŋ.’ Heŋ ɛnɩ ɩmʋ ñɩm pɛ-ɛsɩndaa.—Yoh. 21:15-17.

17. Nʋmɔŋ weyi yɔɔ ŋpɩzɩɣ ŋtɩŋna nɛ ŋwɩlɩ se ŋɖʋʋ Yehowa ɛgbɛyɛ nesi?

¹⁷ Piileɖiɣ lɛ, ɛgbɛyɛ nɖɩ Ɛsɔ fezuu ɖiyiɣ yɔ ɖi-ɖeke pɩkaɣ kazʋʋ tɛtʋ yɔɔ. Pʋyɔɔ lɛ, ɖʋ Yehowa ɛgbɛyɛ nesi nɛ kpekpeka. Susi tɔm kɩbandʋ ɛyaa mba payɩ ŋkatɩɣ yɔ nɛ ŋwɩlɩ se ŋsɔɔlɩ ɛyaa kpeekpe ɛzɩ Ɛsɔ yɔ. Ɛsɔɔlaa se pɩtɩŋa pɩtʋʋzɩ cɔlɩɩɩ nɛ laŋhɛzɩyɛ wɛɛ, pʋyɔɔ lɛ, yele nɛ nɔɔ kʋɖʋmaɣ wɛɛ ɛgbɛyɛ taa nɛ ŋwɩlɩ se ŋmaɣzɩɣnɩ-ɩ. Yele nɛ fezuu taa tɔɔnasɩ nzɩ ɛhaɣ yɔ sɩwazɩ-ŋ camɩyɛ, nɛ pɩwɩlɩ se ŋwelisiɣni ña-Wɩlɩyʋ Sɔsɔ. Ye ŋlakɩ mbʋ yɔ, sɔɔndʋ ɛɛkaɣ-ŋ kpaʋ Sataŋ ɛjaɖɛ tɛm wiye. Ɛlɛ, ŋkaɣ wɛʋ abalɩtʋ nɛ ŋsɩŋ mba pɔɖɔkɩ pe-siɣsiɣ wɛtʋ Yehowa ɛgbɛyɛ taa pɛ-hɛkʋ taa.