1. Bakristu yina me bakaka mbotika fwete landa kusala nki?

KETI nge me bakaka mbotika? Kana ee, nge me monisaka na meso ya bantu nde nge ke kwikilaka na Yehowa mpi nge ke zola kusadila yandi na luzolo yonso ti dibundu na yandi. * Ya kieleka, lukwikilu na nge na Yehowa fwete landa kukuma ngolo. Nge fwete landa kukwikila nde Yehowa ke sadila dibundu na yandi bubu yai.

2-3. Inki mutindu Yehowa ke twadisa dibundu na yandi bubu yai? Inki ke monisa yo?

² Beto ke mona bikalulu ya mbote ya Yehowa na lukanu na yandi, na bansiku na yandi mpi na mutindu yandi ke twadisa dibundu na yandi bubu yai. Beto tala bikalulu tatu ya Yehowa yina beto ke mona na dibundu na yandi.

³ Ya ntete, “Nzambi ke pona-ponaka ve.” (Bis. 10:34) Zola pusaka Yehowa na kupesa Mwana na yandi bonso ‘nkudulu sambu na bantu yonso.’ (1 Tim. 2:6; Yoa. 3:16) Yehowa ke sadilaka bantu na yandi sambu na kulonga nsangu ya mbote na bantu yonso yina ke zola kuwa yo, yandi ke sadisaka mpi bantu mingi na kubaka mambote na kimenga ya Yezu. Ya zole, Yehowa kele Nzambi ya ndonga mpi ya ngemba. (1 Bak. 14:33, 40) Yo yina, bansadi na yandi fwete sala mambu na ndonga mpi na ngemba. Ya tatu, Yehowa kele “Longi ya Nene.” (Yez. 30:20, 21) Yo yina, bansadi na yandi ke salaka yonso sambu na kulonga malongi yina kele na Biblia, yo vanda na dibundu to na kisalu ya kusamuna.  Inki mutindu bikalulu yai tatu ya Yehowa monanaka pwelele na Bakristu ya mvu-nkama ya ntete? Inki mutindu yo ke monana bubu yai? Mpi nki mutindu mpeve santu lenda sadisa nge ntangu nge ke sadila Yehowa na dibundu na yandi bubu yai?

4. Mutindu Bisalu 1:8 ke monisa yo, nki Yezu songaka balongoki na yandi na kusala mpi nki mutindu yandi sadisaka bo?

⁴ Na mvu-nkama ya ntete. Nsangu yina Yezu longaka pesaka bantu yonso kivuvu. (Luka 4:43) Yandi songaka balongoki na yandi na kulanda kusala kisalu yina yandi yantikaka, disongidila bo ta kimbangi “tii na kisika ya kuluta ntama ya ntoto.” (Tanga Bisalu 1:8.) Ya kieleka, bo ta kuka ve kusala kisalu yina na ngolo na bo mosi. Bo vandaka ti mfunu ya mpeve santu disongidila “nsadisi” yina Yezu silaka bo.—Yoa. 14:26; Zek. 4:6.

5-6. Inki mutindu mpeve santu sadisaka balongoki ya Yezu?

⁵ Balongoki ya Yezu bakaka mpeve santu na Pantekoti ya mvu 33 ya ntangu na beto. Na nsadisa ya mpeve santu, bo yantikaka mbala mosi kusamuna mpi mwa ntangu fioti, bantu mingi ndimaka nsangu ya mbote. (Bis. 2:41; 4:4) Ntangu bo yantikaka kubangika bo, balongoki waka ve boma mpi bo yambulaka ve kusamuna kansi bo lombaka Yehowa na kusadisa bo. Bo sambaka nde: “Pesa bampika na nge kikesa yonso sambu bo landa kutuba ndinga na nge.” Na nima, bo fulukaka ti mpeve santu mpi bo landaka “kutuba ndinga ya Nzambi ti kikesa.”—Bis. 4:18-20, 29, 31.

⁶ Balongoki ya Yezu kutanaka mpi ti bampasi ya nkaka. Mu mbandu, bakopi ya Masonuku vandaka ve mingi. Bo vandaka mpi ve ti mikanda yina ke tendulaka Biblia bonso beto bubu yai. Yo lombaka nde bo samuna na bantu yina vandaka kutuba ndinga ya nkaka. Ata balongoki yai ya kikesa kutanaka ti bampasi yai yonso, bo salaka diambu mosi ya kuyituka kibeni. Kaka na bamvula fioti, bo longaka nsangu ya mbote “na lugangu ya mvimba yina kele na nsi ya zulu.”—Bakol. 1:6, 23.

7. Bamvula kuluta 100 me luta, nki mutindu bansadi ya Yehowa zabaka kisalu yina yandi me pesaka bo mpi nki mutindu bo salaka yo?

⁷ Na bilumbu na beto. Yehowa ke landa kutwadisa bansadi na yandi mpi yandi ke pesa bo ngolo. Yandi ke twadisa bo mingi na nzila ya Ndinga na yandi. Biblia ke sadisaka beto na kuzaba mutindu Yezu samunaka mpi nsiku yina yandi pesaka balongoki na yandi ya kulanda kusala kisalu yina yandi yantikaka. (Mat. 28:19, 20) Nzozulu ya Nkengi ya Kingelesi ya Yuli 1881 tubaka nde: “Bo bingaka beto ve mpi bo tulaka beto ve mafuta sambu beto baka lukumu to kimvwama mingi kansi sambu beto kudipesa mingi kibeni na kisalu ya kusamuna nsangu ya mbote.” Na 1919, kamukanda mosi (À qui l’œuvre est confiée) tubaka nde: “Beto kele ti kisalu mingi ya kusala mpi sambu yo kele kisalu ya Mfumu yandi ta pesa beto ngolo ya kusala yo.” Ya kieleka, bonso Bakristu ya mvu-nkama ya ntete, bampangi yai kudipesaka na kikesa yonso na kisalu yai mpi bo vandaka ti kivuvu nde mpeve santu ta sadisa bo na kulonga bantu ya mitindu yonso. Beto mpi ke ndima nde mpeve santu ta sadisa beto.

8-9. Inki mayele dibundu ya Yehowa me sadilaka sambu na kumwanga nsangu ya mbote?

⁸ Dibundu ya Yehowa ke sadilaka bisadilu ya mbote sambu na kumwanga nsangu ya mbote. Bisadilu yango kele mikanda, “Photo-Drame de la Création,” bafono, bakamio yina vandaka ti ba-oparlere, baradio mpi bubu yai baordinatere mpi Internet. Dibundu ya Yehowa ke balula mikanda na bandinga mingi na mutindu yina me salamaka ntete ve. Sambu na nki? Sambu nde bantu ya mitindu yonso kuwa nsangu  ya mbote na ndinga na bo. Yehowa ke pona-ponaka ve yo yina yandi tubaka nde bo fwete longa nsangu ya mbote “na makanda yonso, na mabuta yonso, na bandinga yonso, mpi na bansi yonso.” (Kus. 14:6, 7) Yandi ke zola nde bantu yonso kuwa nsangu ya Kimfumu.

⁹ Ebuna nki beto ta tuba sambu na bantu yina ke zingaka bisika yina kele mpasi na kukota? Dibundu ya Yehowa sadilaka mitindu mingi ya kuta kimbangi na kisika ya bantu mingi, sambu na kulonga bantu yai. Mu mbandu, na 2001 Nto-Kimvuka ndimaka nde bo sadila bamesa ya mikanda mpi mitindu ya nkaka ya kutanda mikanda na France mpi na nima na bansi ya nkaka. Yo butaka mbuma ya mbote. Na 2011, bo sadilaka mutindu mosi ya mpa sambu na kuta kimbangi na États-Unis, na mbanza New York na kisika yina bantu ke lutaka mingi. Na mvula ya ntete bo kabulaka mikanda 102 129 mpi bazulunalu 68 911. Bantu 4 701 ndimaka kulonguka Biblia. Ya kieleka, mpeve santu sadisaka beto na kusala kisalu yai. Yo yina, Nto-Kimvuka ndimaka nde beto sadila mitindu yai ya kuta kimbangi na ntoto ya mvimba.

10. Inki beto fwete sala sambu na kukuma kusamuna diaka mbote?

¹⁰ Mambu yina nge fwete sala. Sadila mambu yina Yehowa ke longaka beto na balukutakanu. Samuna mbala na mbala ti bampangi ya kimvuka na beno ya kusamuna. Bo lenda sadisa nge na kisika yina nge kele ti mfunu ya lusadisu mpi nge lenda baka kikesa na mbandu ya mbote ya bampangi ya nkaka. Landa kusamuna ata nge ke kutana ti bampasi. Mutindu verse ya ntu-diambu ya disolo yai ke monisa yo, beto ke salaka luzolo ya Yehowa na ngolo na beto mosi ve kansi na ngolo ya mpeve santu. (Zek. 4:6) Beto ke ndima nde Yehowa ta pesa beto ngolo ya kusala kisalu na yandi.

11. Inki mutindu na mvu-nkama ya ntete nto-kimvuka salaka na bumosi sambu na kutula ndonga na kati ya bansadi ya Nzambi?

¹¹ Na mvu-nkama ya ntete. Nto-kimvuka na Yeruzalemi salaka na bumosi sambu na kutula ngemba mpi bumosi na kati ya bansadi ya Nzambi. (Bis. 2:42) Mu mbandu, ntangu diambu ya luyotisu basisaka mavwanga na mvu 49 ya  ntangu na beto, nto-kimvuka lombaka lusadisu ya mpeve santu sambu na kutadila diambu yango. Kana bampangi na dibundu kabwanaka sambu na diambu yango, kisalu ya kusamuna zolaka kusalama mbote ve. Ata bantumwa mpi bankuluntu vandaka Bayuda, bo landaka ve bansiku ya Bayuda to ya bantu yina vandaka kulonga yo. Bo bikaka nde Ndinga ya Nzambi mpi mpeve santu kutwadisa bo. (Bis. 15:1, 2, 5-20, 28) Inki salamaka? Yehowa sakumunaka lukanu na bo, yo yina bampangi zingaka na ngemba mpi na bumosi mpi bo landaka kusamuna mingi nsangu ya mbote.—Bis. 15:30, 31; 16:4, 5.

12. Inki ke monisa nde dibundu ya Yehowa kele na ndonga mpi na ngemba bubu yai?

¹² Na bilumbu na beto. Dibundu ya Yehowa ke salaka ngolo sambu na kutula ndonga mpi ngemba na kati ya bansadi ya Nzambi. Na 1895, Nzozulu ya Nkengi ya Kingelesi ya 15 Novembri vandaka ti disolo mosi yina vandaka ti ntu-diambu: “Sala Mambu Mbote mpi na Ndonga” yina katukaka na 1 Bakorinto 14:40. Yo tubaka nde: “Bantumwa sonikilaka mabundu ya mvu-nkama ya ntete mikanda sambu na yina me tala ndonga . . . Yo kele mfunu na kulanda kulemfuka na mambu yina ‘bo sonikaka sambu na kulonga beto.’” (Bar. 15:4) Bubu yai, dibundu ya Yehowa ke sala ngolo sambu mabundu kuvanda na ndonga mpi na ngemba mutindu yo vandaka na mabundu ya mvu-nkama ya ntete. Mu mbandu, kana nge ke landa Kulonguka ya Nzozulu ya Nkengi na dibundu ya nkaka to nsi ya nkaka, nge ta mona nde bo ke sala yo mutindu mosi mpi bo ke longuka kaka disolo mosi na ntoto ya mvimba, nge ta kudimona ve munzenza. Yehowa ke sadilaka mpeve na yandi sambu na kusadisa bansadi na yandi na kuvanda na bumosi.—Sef. 3:9, noti na nsi ya lutiti.

13. Mambu yina kele na Yakobo 3:17, ke pusa beto na kudiyula nki bangiufula?

¹³ Mambu yina nge fwete sala. Yehowa ke zola nde beto bantu na yandi “kutanina bumosi ya mpeve na ngemba yina ke vukisaka beto.” (Baef. 4:1-3) Yo yina, kudiyula nde: ‘Keti mono ke salaka na bumosi ti bampangi mpi ke salaka na bumosi na kati ya dibundu?’ Keti mono ke zitisaka bampangi yina ke twadisaka na dibundu? Keti bampangi lenda tudila mono ntima mingi-mingi kana mono kele ti mikumba na  dibundu? Keti mono ke vandaka pene mpi ti mpusa ya kusadisa bampangi? (Tanga Yakobo 3:17.) Kana nge me mona kisika yina nge lenda yidika, samba Yehowa sambu yandi pesa nge mpeve santu na yandi. Yo ta sadisa nge na kusoba kimuntu na nge mpi yo ta sadisa nge na mambu ya nge ke sala, bampangi ta zola nge mingi mpi ta sepela ti mambu yina nge ke sala.

14. Mutindu Bakolosai 1:9, 10 ke monisa yo, nki mutindu Yehowa longaka bansadi na yandi na mvu-nkama ya ntete?

¹⁴ Na mvu-nkama ya ntete. Yehowa ke sepelaka kulonga bansadi na yandi. (Nk. 32:8) Yandi ke zolaka nde bo zaba yandi, bo zola yandi mpi bo zinga mvula na mvula sambu bo kele bana yina yandi ke zolaka. Yo yina, yandi ke longaka bo. (Yoa. 17:3) Na mvu-nkama ya ntete, Yehowa longaka bansadi na yandi na nzila ya dibundu na yandi. (Tanga Bakolosai 1:9, 10.) Mpeve santu, disongidila “nsadisi” yina Yezu silaka sadisaka mpi mingi balongoki. (Yoa. 14:16) Yo sadisaka bo na kubakisa Ndinga ya Nzambi mpi na kuyibuka mambu yina Yezu tubaka, salaka, na nima bo sonikaka yo na baevanzile. Mambu yina bo zabaka kumisaka lukwikilu na bo ngolo, yo kumisaka mpi zola na bo ngolo sambu na Nzambi, sambu na Mwana na yandi mpi sambu na bantu ya nkaka.

15. Inki mutindu Yehowa ke lungisa lusilu na yandi yina kele na Yezaya 2:2, 3?

¹⁵ Na bilumbu na beto. Yehowa tubaka nde: “Na kitini ya nsuka ya bilumbu,” bantu ya makanda yonso ta mata na ngumba na yandi ya kifwani sambu yandi longa bo banzila na yandi. (Tanga Yezaya 2:2, 3.) Beto ke mona mutindu mambu yai ke lungana. Beto ke mona mutindu lusambu ya kieleka ke kuma kitoko kuluta mambu yonso ya luvunu. Yehowa ke longa bansadi na yandi malongi mingi ya Biblia. (Yez. 25:6) Na nsadisa ya “mpika ya kwikama mpi ya mayele” yandi ke longa beto malongi mingi mpi ya mutindu na mutindu na mikanda, na badiskure  mpi na bavideo. (Mat. 24:45) Beto lenda tuba bonso Elihu nduku ya Yobi yina tubaka nde: “Inki longi kele bonso [Nzambi]?”—Yobi 36:22.

16. Inki nge fwete sala sambu na kuyela na kimpeve?

¹⁶ Mambu yina nge fwete sala. Mpeve santu ya Yehowa ta sadisa nge na kusadila mambu yina nge ke longuka na Ndinga na yandi. Samba Yehowa mutindu muyimbi-bankunga sambaka nde: “O Yehowa, longa mono banzila na nge. Mono ta tambula na kieleka na nge. Pesa mono ntima ya kukonda kukabwana sambu mono wa zina na nge boma.” (Nk. 86:11) Yo yina, landa kudia madia ya kimpeve yina Yehowa ke pesa na nzila ya Ndinga na yandi mpi ya dibundu na yandi. Lukanu na nge fwete vanda kaka ve ya kuzaba mambu mingi kansi nge fwete ndima nde mambu yina nge ke longuka kele kieleka mpi nge fwete sadila yo na luzingu na nge. Mpeve santu ya Yehowa lenda sadisa nge na kusala yo. Nge fwete siamisa mpi bampangi na dibundu. (Baeb. 10:24, 25) Sambu na nki? Sambu bo kele bampangi na nge ya kimpeve. Samba Yehowa sambu yandi pesa nge mpeve santu na yandi yina ta sadisa nge na kupesa bamvutu ya ke pesa kikesa na balukutakanu mpi na kusala mbote sambu na kusala masolo na balukutakanu. Kana nge sala mutindu yina nge ta monisa Yehowa ti Mwana na yandi nde nge ke zolaka “mameme” na bo yina kele mfunu mingi.—Yoa. 21:15-17.

17. Inki mutindu nge lenda monisa nde nge ke pesaka maboko na kwikama yonso na dibundu ya Yehowa?

¹⁷ Kubika fioti, kaka dibundu ya Yehowa mpamba yina mpeve santu na yandi ke twadisaka ta bikala awa na ntoto. Yo yina, pesa maboko na dibundu ya Yehowa na kikesa yonso. Samuna nsangu ya mbote na bantu yonso sambu na kumonisa nde bonso Yehowa nge mpi ke pona-ponaka ve. Kana nge ke sala ti bampangi na bumosi na dibundu, yo ta monisa nde nge ke landa mbandu ya Yehowa ya zola, ya ndonga mpi ya ngemba. Kana nge dia madia yonso ya kimpeve, yo ta monisa nde nge ke widikila Longi na nge ya Nene. Kana nge sala mpidina nge ta wa ve boma ntangu nsi-ntoto yai ya Satana ta fwa. Nge ta vanda na kiese ti bampangi yina ke sadila Yehowa na kwikama yonso na dibundu na yandi.