43-زەرتتەۋ ماقالاسى
ەحوبا ٶز ۇيىمىن باعىتتاپ كەلەدى
«مۇنىڭ ٴبارى اسكەر قۋاتىمەن دە، كۇشپەن دە ەمەس، مەنىڭ رۋحىممەن جۇزەگە اسادى،— دەيدى اسكەرباسى ەحوبا» (زاك. 4:6).
40-ٵن سەن كىمنىڭ مەنشىگىسىڭ؟
اڭداتپا *
1. شومىلدىرۋ راسىمىنەن وتكەن ٴماسىحشى ٵرى قاراي دا نە ىستەي بەرۋ كەرەك؟
ٴسىز شومىلدىرۋ راسىمىنەن وتكەنسىز بە؟ وتكەن بولساڭىز، ٴسىز ادامداردىڭ الدىندا ەحوباعا سەنەتىنىڭىزدى جانە ونىڭ ۇيىمىمەن قىزمەتتەسۋگە دايىن ەكەنىڭىزدى كورسەتتىڭىز *. ارينە، ەحوباعا دەگەن سەنىمىڭىز ٵرى قاراي دا ٶسۋ كەرەك جانە ەحوبا بۇگىندە ٶزىنىڭ ۇيىمىن قولدانىپ جاتقانىنا دەگەن سەنىمدىلىگىڭىز دە بەكي ٴتۇسۋ قاجەت.
2، 3. بۇگىندە ەحوبانىڭ ٶز ۇيىمىن قالاي باعىتتايتىنىنا قاراپ، نەنى كورۋگە بولادى؟ مىسالدار كەلتىرىڭىز.
2 بۇگىندە ەحوبانىڭ ٶز ۇيىمىن قالاي باعىتتايتىنىنا قاراپ، ونىڭ قانداي قۇداي ەكەنىن، ونىڭ نيەتى مەن نورمالارىنىڭ قانداي ەكەنىن كورۋگە بولادى. قازىر ۇيىمىمىز پاش ەتەتىن ەحوبانىڭ بولمىسىنىڭ ٷش قىرىنا نازار اۋدارايىق.
3 بىرىنشىدەن، «قۇداي ەشكىمدى الالامايدى» (ەل. ٸس. 10:34). سۇيىسپەنشىلىك قاسيەتى ەحوبانى «بۇكىل ادامزات ٷشىن» ٶز ۇلىن قۇربان ەتۋگە تالپىندىردى (ٴتىم. 1-ح. 2:6؛ جوح. 3:16). ەحوبا قۇلاق اسقىسى كەلەتىن ادامداردىڭ بارىنە ىزگى حاباردى جەتكىزۋ ٷشىن ٶزىنىڭ حالقىن قولدانادى. وسىلاي ول تولەمنىڭ يگىلىگىن مەيلىنشە كوپ ادامنىڭ كورۋىنە جاعداي جاساۋدا. ەكىنشىدەن، ەحوبا — ٴتارتىپ پەن تاتۋلىقتىڭ قۇدايى (قور. 1-ح. 14:33، 40). سوندىقتان وعان قىزمەت ەتەتىندەر تارتىپپەن ٵرى تاتۋلىقتا عيبادات ەتەدى دەپ كۇتكەنىمىز ورىندى. ۇشىنشىدەن، ەحوبا — «ۇلى تالىمگەر» (يشايا 30:20، 21). وسى سەبەپتەن دە ونىڭ ۇيىمى قاۋىمدا جانە ۋاعىزدا كيەلى رۋحتىڭ جەتەلەۋىمەن جازىلعان قۇداي ٴسوزى ارقىلى ٴتالىم بەرۋگە ەرەكشە نازار اۋدارادى. ەحوبانىڭ بولمىسىنىڭ وسى ٷش قىرى ەرتەدەگى ماسىحشىلەر قاۋىمىنان قالاي كورىنىس تاپتى؟ ال ٴبىزدىڭ كۇندەرىمىز جايلى نە دەۋگە بولادى؟ بۇگىندە سىزگە ەحوبانىڭ ۇيىمىمەن قىزمەتتەسۋگە كيەلى رۋح قالاي كومەكتەسەدى؟
قۇداي ەشكىمدى الالامايدى
4. ەلشىلەردىڭ ىستەرى 1:8 دە ايتىلعانداي، يسا ٶزىنىڭ ٸزباسارلارىنا قانداي تاپسىرما بەردى جانە ولار قانداي كومەككە يە بولماق ەدى؟
4 ٴبىرىنشى عاسىر. يسا ۋاعىزداعان حابار بۇكىل ادامزاتقا ٷمىت سيلادى (لۇقا 4:43). ول ٸزباسارلارىنا ٶزى باستاعان ٸستى جالعاستىرىپ، «جەردىڭ قيىر شەتىنە دەيىن» كۋالىك بەرۋدى تاپسىردى (ەلشىلەردىڭ ىستەرى 1:8 وقىڭىز). ارينە، ولار بۇل ٸستى ٶز كۇشتەرىمەن اتقارا الماس ەدى. ولار يسا ۋادە ەتكەن «كومەكشىگە»، ياعني كيەلى رۋحقا مۇقتاج ەدى (جوح. 14:26؛ زاك. 4:6).
5، 6. يسانىڭ ٸزباسارلارىنا كيەلى رۋح قالاي كومەكتەستى؟
5 يسانىڭ ٸزباسارلارى ب.ز. 33-جىلى ەلۋىنشى كۇن مەيرامىندا كيەلى رۋحقا كەنەلدى. كيەلى رۋحتىڭ كومەگىمەن ولار بىردەن ۋاعىزداي باستادى، ناتيجەسىندە قىسقا ۋاقىتتىڭ ىشىندە ىزگى حابارعا مىڭداعان ادام قۇلاق استى (ەل. ٸس. 2:41؛ 4:4). قارسىلىقتار ۇدەي تۇسكەندە، شاكىرتتەر قورقىنىشقا بوي الدىرمادى، قايتا، ولار قۇدايدان كومەك سۇرادى. ولار: «قۇلدارىڭا ٴسوزىڭدى باتىل جاريالاي بەرۋگە كۇش دارىتا كور»،— دەپ دۇعا ەتتى. كەيىن ولار كيەلى رۋحقا كەنەلىپ، «قۇداي ٴسوزىن باتىلدىقپەن جاريالاي» بەردى (ەل. ٸس. 4:18—20، 29، 31).
6 يسانىڭ شاكىرتتەرىنىڭ باسقا دا قيىندىقتارى بولدى. مىسالى، ول كەزدە جازبالاردىڭ كوشىرمەسى ساناۋلى عانا بولعان. ولاردىڭ بىزدىكىندەي زەرتتەۋگە ارنالعان قۇرالدارى دا بولماعان. ونىڭ ۇستىنە، شاكىرتتەر ٵرتۇرلى تىلدەردە سويلەيتىن ادامدارعا ۋاعىزداعان. وسى قيىندىقتاردىڭ ەشقايسىسىنا قاراماستان، بۇل قۇلشىنىستى شاكىرتتەر مۇمكىن ەمەستەي كورىنگەن نارسەنى ىستەدى. ولار شامامەن وتىز-اق جىلدىڭ ىشىندە ىزگى حاباردى «بارلىق جەردە» ۋاعىزداپ شىقتى (قول. 1:6، 23).
7. 100 جىلدان اسا ۋاقىت بۇرىن ەحوبانىڭ قىزمەتشىلەرى قۇداي ولاردان نە تالاپ ەتەتىنىن قايدان بىلگەن جانە ولار نە ىستەگەن؟
7 ٴبىزدىڭ كۇندەرىمىز. ەحوبا ٵلى دە ٶزىنىڭ حالقىن جەتەلەپ، ولارعا كۇش دارىتىپ كەلەدى. ارينە، ول ٶزىنىڭ باعىت-باعدارىن ٴبىرىنشى كەزەكتە كيەلى رۋحتىڭ جەتەلەۋىمەن جازىلعان ٴسوزى ارقىلى بەرەدى. كيەلى كىتاپتان ٴبىز يسانىڭ قىزمەتى جايلى جانە باستاعان ٸسىن ٸزباسارلارىنا تاپسىرعانى جايلى وقيمىز (مات. 28:19، 20). سوناۋ 1881-جىلعى «كۇزەت مۇناراسىنىڭ» شىلدە ايىنداعى سانىندا بىلاي دەلىندى: «ەحوبا ٴبىزدى داڭققا بولەۋ ٷشىن نە بايلىققا كەنەلتۋ ٷشىن ەمەس، بارىمىزدى سالىپ ىزگى حاباردى ۋاعىزداۋ ٷشىن تاڭدادى». 1919-جىلى جارىق كورگەن «بۇل ٸس كىمدەرگە سەنىپ تاپسىرىلعان؟» دەگەن كىتاپشادا: «بۇل ٸس تىم اۋقىمدى كورىنەر، ٴبىراق بۇل يەمىزدىڭ ٸسى بولعاندىقتان، ونىڭ ٶزى بىزگە وسى ٸستى اتقارۋعا كۇش بەرەدى»،— دەلىندى. ٴيا، I عاسىرداعى ماسىحشىلەر سياقتى، بۇل باۋىرلاستار دا باتىلدىق تانىتىپ، وزدەرىن وسى ىسكە تولىقتاي ارنادى. سەبەبى ولار ىزگى حاباردى ٵرتۇرلى ادامدارعا ۋاعىزداۋعا كيەلى رۋح كومەكتەسەتىنىنە سەنىمدى بولدى. بۇگىندە بىزدە دە ٴدال سونداي سەنىمدىلىك بار.
تاريح بويى ەحوبانىڭ ۇيىمى ىزگى حاباردى تاراتۋ ٷشىن ەڭ ۇزدىك قۇرالداردى قولدانىپ كەلەدى (8، 9-ابزاستى قاراڭىز)
8، 9. ەحوبانىڭ ۇيىمى ىزگى حاباردى تاراتۋ ٷشىن قانداي ادىستەر قولدانىپ كەلەدى؟
8 ەحوبانىڭ ۇيىمى ىزگى حاباردى تاراتۋ ٷشىن تاريح بويى ەڭ ۇزدىك قۇرالداردى قولدانىپ كەلەدى. بۇل قۇرالدارعا باسپا جۇزىندەگى ادەبيەتتەر، «جاراتىلىس فوتودراماسى»، فونوگرافتار، داۋىسزورايتقىش ورناتىلعان كولىكتەر، راديوباعدارلامالار جانە سوڭعى كەزدەرى قولدانىلىپ جاتقان كومپيۋتەر مەن ينتەرنەت كىرەدى. سونداي-اق قۇدايدىڭ ۇيىمى بۇرىن-سوڭدى بولماعانداي اۋقىمدى اۋدارما ٸسىن جۇرگىزۋدە. نە ٷشىن؟ ٵربىر ادام ىزگى حاباردى ٶز انا تىلىندە ەستۋ ٷشىن. ەشكىمدى الالامايتىن ەحوبا ىزگى حابار «ٵربىر ۇلت، رۋ، ٴتىل جانە حالىققا جاريالاناتىنىن» الدىن الا ايتقان (ايان 14:6، 7). ول پاتشالىق جايلى حابار بارلىق ادامعا قولجەتىمدى بولعانىن قالايدى.
9 كەيبىر ادامداردىڭ ۇيلەرى مىقتى كۇزەتپەن قورعالادى. وسى سياقتى سەبەپتەردەن ىزگى حاباردى ەستي المايتىن ادامدار جايلى نە دەۋگە بولادى؟ سونداي ادامدارعا ۋاعىزداۋ ٷشىن، ەحوبانىڭ ۇيىمى كوپشىلىك ورىندارىندا ۋاعىزداۋدىڭ ٵرتۇرلى جولدارىن قاراستىردى. مىسالى، 2001-جىلى باسقارۋشى كەڭەس ادەبيەت اربالارى مەن باسقا دا ستەندىلەردى فرانسيادا، كەيىنىرەك باسقا دا جەرلەردە قولدانۋعا رۇقسات ەتتى. بۇل جاقسى ناتيجە اكەلدى. ال 2011-جىلى قۇراما شتاتتارداعى نيۋ-يورك قالاسىنىڭ ەڭ ىعى-جىعى جەرلەرىندە سىناما باعدارلاما جۇرگىزىلە باستادى. العاشقى جىلى 102129 كىتاپ، 68911 جۋرنال تاراتىلدى جانە 4701 ادام كيەلى كىتاپتى زەرتتەۋگە كەلىستى. بۇل ٸستىڭ كيەلى رۋحتىڭ قولداۋىمەن اتقارىلىپ جاتقانى انىق كورىندى. ٴسۇيتىپ، باسقارۋشى كەڭەس ادەبيەت اربالارى مەن ستەندىلەردى دۇنيەجۇزى بويىنشا قولدانۋدى ماقۇلدادى.
10. قىزمەتىمىزدى مەيلىنشە جاقسى اتقارۋ ٷشىن نە ىستەي الامىز؟
10 ۇيرەنەرىڭىز. ەحوبانىڭ ماسىحشىلەر قاۋىمى ارقىلى بەرىپ جاتقان تالىمدەرىن تولىعىمەن قولدانىڭىز. ۋاعىزداۋ توبىڭىزبەن جۇيەلى تۇردە قىزمەتتەسىڭىز. توبىڭىزداعى باۋىرلاستار سىزگە ۋاعىزداۋ مەن ٴتالىم بەرۋ جاعىنان جاقسارۋعا كومەكتەسەدى. سونداي-اق ولاردىڭ جاقسى ۇلگىسىنە قاراپ، جىگەرلەنىپ قالاسىز. قىزمەتتە تاباندى بولىڭىز. وسى ماقالانىڭ نەگىزگى تارماعىندا ايتىلعانداي، ٴبىز قۇدايدىڭ ەركىن ٶزىمىزدىڭ كۇشىمىزبەن ەمەس، كيەلى رۋحتىڭ كۇشىمەن اتقارامىز (زاك. 4:6). قانشا دەگەنمەن، اتقارىپ جاتقان ٸسىمىز — قۇدايدىڭ ٸسى.
ەحوبا — ٴتارتىپ پەن تاتۋلىقتىڭ قۇدايى
11. ٴبىرىنشى عاسىرداعى باسقارۋشى كەڭەس قۇداي حالقىنىڭ اراسىنداعى بىرلىكتى ساقتاۋ ٷشىن قالاي بىرلەسە ارەكەت ەتتى؟
11 ٴبىرىنشى عاسىر. يەرۋساليمدەگى باسقارۋشى كەڭەس قۇداي حالقىنىڭ اراسىنداعى بىرلىك پەن تاتۋلىقتى ساقتاۋ ٷشىن بىرلەسە ارەكەت ەتتى (ەل. ٸس. 2:42). مىسالى، شامامەن ب.ز. 49-جىلى سۇندەتكە وتىرعىزۋ ماسەلەسى ۋشىعىپ كەتكەن كەزدە، باسقارۋشى كەڭەس كيەلى رۋحتىڭ جەتەلەۋىمەن وسى ماسەلەنى قاراستىردى. ەگەر قاۋىم وسى ماسەلەگە بولا جىككە ٴبولىنۋىن قويماسا، بۇل ولارعا ىزگى حاباردى ۋاعىزداۋعا كەدەرگى بولماق ەدى. وزدەرى ياھۋدي بولسا دا، ەلشىلەر مەن اقساقالدار ياھۋدي ٴداستۇرىنىڭ جانە سونى بارىنشا ناسيحاتتاعان ادامداردىڭ ىقپالىنا بەرىلمەدى. قايتا، ولار قۇداي ٴسوزى مەن كيەلى رۋحتىڭ باسشىلىعىنا جۇگىندى (ەل. ٸس. 15:1، 2، 5—20، 28). ناتيجەسىندە نە بولدى؟ ەحوبا ولاردىڭ شەشىمىنە باتاسىن بەرىپ، قاۋىمدا تاتۋلىق پەن بىرلىك ورنادى جانە ۋاعىز ٸسى العا جىلجىدى (ەل. ٸس. 15:30، 31؛ 16:4، 5).
12. بۇگىندە ەحوبانىڭ ۇيىمىندا ٴتارتىپ پەن تاتۋلىق بار ەكەنى نەدەن كورىنەدى؟
12 ٴبىزدىڭ كۇندەرىمىز. قۇداي حالقىنىڭ اراسىنداعى بىرلىك پەن تاتۋلىقتى ساقتاۋ ٷشىن، ەحوبانىڭ ۇيىمى كوپ ەڭبەكتەنەدى. سوناۋ 1895-جىلعى «كۇزەت مۇناراسىنىڭ» 15-قاراشاداعى سانىندا قورىنتتىقتارعا 1-حات 14:40 قا نەگىزدەلگەن «لايىقتى ٵرى تارتىپپەن» دەگەن ماقالا جارىق كوردى. وندا مىناداي سوزدەر بولدى: «ەلشىلەر ەرتەدەگى قاۋىمعا تارتىپكە قاتىستى كوپتەگەن نارسەلەر جازعان. بۇرىن بىزگە ٴتالىم بولسىن دەپ جازىلعان وسى سوزدەرگە مويىنسۇنعانىمىز وتە ماڭىزدى» (ريم. 15:4). ٴبىرىنشى عاسىرداعىداي، بۇگىندە ەحوبانىڭ ۇيىمى ماسىحشىلەر قاۋىمىنداعى ٴتارتىپ پەن تاتۋلىقتى ساقتاۋ ٷشىن بارىنشا ەڭبەكتەنۋدە. مىسالى، «كۇزەت مۇناراسىن» زەرتتەۋ ٷشىن جەرگىلىكتى باسقا قاۋىمعا، ٴتىپتى باسقا ەلدەگى قاۋىمعا بارساڭىز، زەرتتەۋدىڭ قالاي وتەتىنىن جانە قانداي ماقالا قاراستىرىلاتىنىن بىلەسىز. ٴسىز ول جەردە ٶزىڭىزدى مۇلدەم بوتەن سەزىنبەيسىز. مۇنداي تاماشا بىرلىك تەك قۇداي رۋحىنىڭ ارقاسىندا عانا مۇمكىن (ساف. 3:9، ٴسىلت.).
13. جاقىپ 3:17 ٴنى ەستە تۇتىپ، ٴبىز قانداي سۇراقتار جايلى ويلانۋىمىز كەرەك؟
13 ۇيرەنەرىڭىز. ەحوبا ٶز حالقىنىڭ كيەلى رۋح ارقىلى يەمدەنگەن بىرلىكتەرىن ساقتاپ قالعانىن قالايدى (ەفەس. 4:1—3). سوندىقتان بىلاي دەپ ويلانىپ كورىڭىز: «قاۋىمىمدا بىرلىك پەن تاتۋلىقتىڭ بولۋىنا ۇلەس قوسامىن با؟ باسشىلىقتى قولعا العاندارعا مويىنسۇنامىن با؟ اسىرەسە قاۋىمدا جاۋاپكەرشىلىكتەرىم بولسا، باسقالار ماعان سەنىم ارتا الا ما؟ ٴبارىن ۋاقتىلى ىستەيمىن بە؟ وزگەلەرگە كومەكتەسۋگە دايىنمىن با؟» (جاقىپ 3:17 وقىڭىز). ەگەر جاقساراتىن تۇستارىڭىزدى بايقاساڭىز، كيەلى رۋح سۇراپ دۇعا ەتىڭىز. كيەلى رۋحقا بولمىسىڭىزدى قالىپتاستىرۋعا جانە ارەكەتتەرىڭىزگە اسەر ەتۋگە جول بەرگەن سايىن، باۋىرلاستارىڭىز ٴسىزدى جاقسى كورىپ، باعالاي تۇسەدى.
ەحوبا بىزگە ٴتالىم بەرىپ، قاجەتىمىزبەن قامدايدى
14. ەحوبا ٴبىرىنشى عاسىرداعى حالقىنا ٶزىنىڭ ەركى جايلى تۋرا بىلىمگە يە بولۋعا قالاي كومەكتەستى؟ (قولوستىقتارعا 1:9، 10).
14 ٴبىرىنشى عاسىر. ەحوبا ٶزىنىڭ حالقىنا ٴتالىم بەرۋدەن قۋانىش الادى (ٴزاب. 32:8). ەحوبا ولاردىڭ ونى تانىپ-بىلگەنىن، ونى جاقسى كورگەنىن جانە ماڭگىلىك ٶمىر سۇرگەنىن قالايدى. مۇنىڭ ٴبارى ول بەرىپ جاتقان ٴتالىمنىڭ ارقاسىندا عانا مۇمكىن (جوح. 17:3). ٴبىرىنشى عاسىردا ەحوبا ٶزىنىڭ حالقىنا ٴتالىم بەرۋ ٷشىن ماسىحشىلەر قاۋىمىن قولداندى (قولوستىقتارعا 1:9، 10 وقىڭىز). سونداي-اق يسا ۋادە ەتكەن «كومەكشى» كيەلى رۋحتىڭ دا ٴرولى ەرەكشە بولدى (جوح. 14:16). كيەلى رۋح شاكىرتتەرگە قۇداي ٴسوزىن تۇسىنۋگە جانە يسانىڭ ايتقان سوزدەرى مەن ىستەگەن ىستەرىن ەستەرىنە تۇسىرۋگە كومەكتەستى. كەيىن وسى جايتتاردىڭ كوبىسى ىنجىلگە جازىلدى. بۇل بىلگەندەرى ەرتەدەگى ماسىحشىلەردىڭ سەنىمدەرىن، سونداي-اق قۇدايعا، ونىڭ ۇلىنا جانە ٴبىر-بىرىنە دەگەن سۇيىسپەنشىلىكتەرىن نىعايتتى.
15. ەحوبا يشايا 2:2، 3 تەگى ۋادەسىن ورىنداپ جاتقانىنا ٴسىز قالاي كۋا بولىپ ٴجۇرسىز؟
15 ٴبىزدىڭ كۇندەرىمىز. ەحوبا «سوڭعى كۇندەردە» ونىڭ جولدارىنا ۇيرەنۋ ٷشىن، بارلىق حالىقتار ونىڭ بەينەلى تاۋىنا اعىلىپ كەلەتىنىن پايعامبارلىق ەتكەن (يشايا 2:2، 3 وقىڭىز). بۇگىندە ٴبىز بۇل پايعامبارلىقتىڭ ورىندالىپ جاتقانىنا كۋامىز. تازا عيبادات بارلىق جالعان عيبادات تۇرلەرىنەن اسقاق تۇر. ەحوبانىڭ جاساپ جاتقان رۋحاني تويىن ايتساڭىزشى! (يشايا 25:6). ول «ادال دا اقىلدى قۇل» ارقىلى رۋحاني اس-سۋدى مولىنان عانا ەمەس، ماقالالار مەن باياندامالاردان باستاپ انيماسيالار مەن ۆيدەولارعا دەيىن ٴتۇرلى-ٴتۇرلى ەتىپ بەرىپ جاتىر (مات. 24:45). ٴبىز دە ٵيۇپتىڭ دوسى ەليحۋ سياقتى: «[قۇدايعا] تەڭ كەلەتىن تالىمگەر بار ما؟!»— دەي الامىز (ٵيۇپ 36:22).
شىندىقتاردى جۇرەگىڭىزگە جەتكىزىپ، ولاردى ومىردە قولدانىڭىز (16-ابزاستى قاراڭىز) *
16. ەحوبانىڭ بەرىپ جاتقان تالىمدەرىنىڭ يگىلىگىن كورۋ ٷشىن نە ىستەي الاسىز؟
16 ۇيرەنەرىڭىز. قۇدايدىڭ كيەلى رۋحى سىزگە قۇداي سوزىنەن وقىپ-بىلگەندەرىڭىزدى ومىردە قولدانۋعا كومەكتەسەدى. ٴسىز دە ٴزابۇر جىرشىسى سياقتى، بىلاي دەپ دۇعا ەتسەڭىز بولادى: «ۋا، ەحوبا، مەنى ٶز جولىڭا باعىتتاشى. شىندىق جولىڭدا جۇرەيىن. جۇرەگىمدى ٴبىرتۇتاس ەتشى، ەسىمىڭدى قاستەرلەيىن» (ٴزاب. 86:11). سونداي-اق ەحوبانىڭ ٶز ٴسوزى جانە ۇيىمى ارقىلى بەرىپ جاتقان رۋحاني اس-سۋىن ٵرى قاراي دا قابىلداي بەرىڭىز. ارينە، ٴسىزدىڭ ماقساتىڭىز جاي عانا ٴبىلىم الۋ ەمەس، ٴسىز شىندىقتاردىڭ جۇرەگىڭىزگە جەتكەنىن جانە ولاردى ومىردە قولدانۋدى قالايسىز. بۇل ورايدا ەحوبانىڭ رۋحى سىزگە كومەكتەسە الادى. سونىمەن قاتار ٴسىز باۋىرلاستارىڭىزدى دا جىگەرلەندىرگىڭىز كەلەدى (ەۆر. 10:24، 25). نەلىكتەن؟ ويتكەنى ولار ٴسىزدىڭ رۋحاني وتباسىڭىز. ەحوبادان كيەلى رۋح سۇراپ، قاۋىم كەزدەسۋلەرىندە شىن جۇرەكتەن تۇسىنىكتەمە بەرۋگە جانە تاپسىرمالارىڭىزدى بارىنشا تىڭعىلىقتى اتقارۋعا كومەكتەسۋىن ٶتىنىڭىز. وسىلايشا ٴسىز ەحوباعا جانە ونىڭ ۇلىنا ولاردىڭ باعالى «قوزىلارىن» جاقسى كورەتىنىڭىزدى كورسەتەسىز (جوح. 21:15—17).
17. ەحوبانىڭ ۇيىمىن ادالدىقپەن قولدايتىنىڭىزدى قالاي كورسەتە الاسىز؟
17 جۋىردا جەر بەتىندە قۇداي رۋحىنىڭ كومەگىمەن العا باسىپ جاتقان وسى ۇيىم عانا قالادى. سوندىقتان ەحوبانىڭ ۇيىمىمەن بارىنشا قىزمەتتەسىڭىز. كەزدەستىرگەن ٵربىر ادامعا ىزگى حاباردى ايتۋ ارقىلى ەحوبا سياقتى ەشكىمدى الالاماي، بارلىق ادامدى جاقسى كورەتىنىڭىزدى كورسەتىڭىز. ەحوبا سياقتى ٴتارتىپ پەن تاتۋلىقتى سۇيەتىنىڭىزدى قاۋىمنىڭ بىرلىگىنە ۇلەس قوسۋ ارقىلى كورسەتىڭىز. سونداي-اق ۇلى تالىمگەرىڭىزگە قۇلاق اسىپ، ونىڭ جاساپ جاتقان رۋحاني تويىنان تويىنا ٸشىپ-جەڭىز. سوندا شايتاننىڭ دۇنيەسىنىڭ اقىرى كەلگەندە، ٴسىز ەش قورىقپايسىز. قايتا، ەحوبانىڭ ۇيىمىمەن ادال قىزمەتتەسكەن ادامداردىڭ اراسىندا سەنىمدىلىكپەن نىق تۇراتىن بولاسىز.
3-ٵن سەن بىزگە كۇش بەردىڭ، ٷمىت بەردىڭ
^ 5-ابزاس ٴسىز ەحوبانىڭ بۇگىندە ٶز ۇيىمىن باعىتتاپ جاتقانىنا سەنەسىز بە؟ بۇل ماقالادا ٴبىز ەحوبا ەرتەدەگى ماسىحشىلەر قاۋىمىن قالاي باعىتتاعانىن جانە بۇگىندە ٶز حالقىن قالاي باعىتتاپ جاتقانى جايلى بىلەمىز.
^ 1-ابزاس ٴسوز ٴمانى: ەحوبانىڭ ۇيىمى جەردەگى جانە كوكتەگى بولىكتەن تۇرادى. بۇل ماقالاداعى «ۇيىم» دەگەن ٴسوز ونىڭ جەردەگى بولىگىنە نۇسقايدى.
^ 52-ابزاس سۋرەتتەر سيپاتتاماسى: قاجەتتىلىك بار جەردە قىزمەت ەتىپ جۇرگەن باۋىرلاستار جايلى ۆيدەولار كورگەننەن كەيىن، ٸزاشار قىز باۋىرلاس ولاردىڭ ۇلگىسىنە ەلىكتەپ، قاجەتتىلىك بار جەردە قىزمەت ەتۋدى ماقسات ەتەدى. اقىرىندا، ول ٶز ماقساتىنا جەتەدى.
