1. O Jikidistá a abatizala kyá atokala kusuluka ni kubhanga ihi?

EYE akubatizala kyá? Se kyene, kyoso kyakubatizala walondekesa ku athu kwila, waxikana kwa Jihova ni kwila wamesena kumusidivila kumoxi ni kilunga kyê. * Kindala o kixikanu kyê kyadibandekesa dingi. Kyenyiki, eye watokala kusuluka ni kudyelela kwila, o kilunga kya Jihova kyamubhanga o kikalakalu kyamesena mwene.

2-3. Idifwa yebhi idimonekena mu ukexilu wa Jihova kwendesa o mudnu wê lelu? Bhana phangu

² Lelu, Jihova wamukwendesa o kilunga kyê mu ukexilu ulondekesa o idifwa yê, o vondadi yê, ni ijila yê. Twandadilonga idifwa itatu ya Jihova, itutena kumona mukilunga kyê.

³ Kyadyanga, “Nzambi kene ni kathombo.” (Ika. 10:34) O henda yabhangesa Jihova kubhana Mon’ê phala “kutukula etwenyoso.” (1 Tim. 2:6; Nzwá 3:16) Jihova watumina o mundu wê kuboka phala athu oso atene kwívwa o njimbu yambote. Mwene wabhange kiki, phala kukwatekesa athu avulu kukatula mbote musata yakukula. Kyakayadi, Jihova Nzambi yakuyuka ni kutululuka. (1 Kol. 14:33, 40) Kyenyiki o abhezyê ejikala kibuka kyadisokejeka kyambote, kyala ni kutululuka. Kyakatatu, Jihova ‘Mulongexi wadikotelele.’ (Iza. 30:20, 21) Kiki kyene kibhangesa o kilunga kyê kusuluka ni kulonga o Makamê, kikale mukilunga, ni mu ukunji. Kyebhi o kilunga kya Jikidistá muhama yadyanga kyalondekesa o idifwa itatu yiyi ya Jihova? Kyebhi o mundu wa Jihova kyamulondekesa o idifwa yiyi lelu? Ni  kyebhi o nzumbi ikôla itena ku kukwatekesa kusidivila kumoxi ni kilunga kya Jihova lelu?

4. Kala kya kijimbulula mu divulu dya Ikalakalu 1:8, kikalakalu kyahi kyabhana Jezú kumaxibulumê? Kikwatekesu kyahi kyeji tambula?

⁴ Kuhama yadyanga. O njimbu yaboko Jezú, yabhekela kidyelelu ku athu oso. (Luka 4:43) Mwene watumina o maxibulumê phala kusuluka ni kikalakalu kyamatekene, o kubhana o umbangi “kate ni ku maxokololo ma jixi.” (Tanga Ikalakalu 1:8.) Ene keji tena kubhanga o kikalakalu kiki mu nguzu yâ. Ene eji bhindamena o kikwatekesu kya nzumbi ikôla. O nzumbi ikôla yene “o mukwatekexi” wa akanene Jezú.—Nzwá 14:26; Zak. 4:6.

5-6. O nzumbi ikôla yakwatekesa o akayedi a Jezú mumawukexilu ebhi?

⁵ Mu Pendekoxi ya muvu wa 33 K.K., o akayedi a Jezú atambula o nzumbi ikôla. Ni kikwatekesu kiki, ene amateka kuboka ni nguzu yoso. Mukithangana kyofele, mazunda a athu axikina o njimbu yambote. (Ika. 2:41; 4:4) Kyoso o athu kyamateka kuzukutisa o maxibulu, ene kazoza mukuboka mukonda dya wôma. Muveji dyakiki, abhingi o kikwatekesu kwa Nzambi. Ene asambe, exi: “O jiselevende jé u abhane kubhwa wôma mukutanga o makamê.” Kyenyiki, ene ezalele ni nzumbi ikôla, ya amateka “kutanga o maka ma Ngana ni kúbhwa o wôma.”—Ika. 4:18-20, 29, 31.

⁶ O maxibulu a Jezú adibhana we ni ibhidi yamukwâ. Mukifika, o madivulu a Mikanda Ikôla atolele. O maxibulu kexile ni madivulu amukwâ akwatekesa kutendela o Bibidya, kala etu lelu. O maxibulu atokalele kubokela athu azwela madimi avulu, kadifu. Né mwene ni ibhidi yiyi, o maxibulu yá abhange kima kyakatunda. Mumivu yofele, ene atena kuboka o njimbu yambote “mungôngo yoso.”—Kol. 1:6, 23.

7. Yalungu ni vondadi ya Nzambi, ihi yejidile o jiselevende ja Jihova m’ukulu? Ihi yabhangele ene?

⁷ Mu izuwa yalelu. Jihova wamusuluka ni kwendesa ni kubhana o nguzu ku mundu wê. Muveji javulu, Jihova utwendesa bhukaxi ka Makamê obhuse bhukaxi ka nzumbi ikôla. Mu Bibidya tusangamu o maka alungu ni ukunji wa Jezú, ni kitumu kyabhana ku maxibulumê, phala kusuluka ni kikalakalu kyamatekene. (Mat. 28:19, 20) Mumbeji ya Kavwa ka 1881, O Mulangidi wambele: “Jihova katusolo mba ku tu unda phala o athu kutuxila mba kukala tujimvwama, maji watu undu phala tubhange yoso itutena musidivisu yakuboka.” Sayi kamukanda kosoneke kumuvu wa 1919, kexile ni dyambu: “O Kikalakalu kiki Akibhana Kwa Nanyi?” Kene kambele kiki: “O kikalakalu kyavulu, maji kikalakalu kya Ngana. Mwene wandakutubhana o nguzu, phala kukizubha.” Kyene mwene. Kala o Jikidistá kuhama yadyanga, o jiphange jiji, adibhakula ni nguzu yoso musidivisu yakuboka, adyelele kwila, o nzumbi ikôla yeji kwakwatekesa kubokela athu oso. Etu we twadyelela kwila, o nzumbi ikôla yandakutukwatekesa.

8-9. O kilunga kya Jihova kyene kusanzumuna o njimbu yambote bhukaxi ka jindunge jebhi?

⁸ O kilunga kya Jihova kyene mukalakala ni jifalamenda jabeta dingi kota phala kumwanga o njimbu yambote. Bhukaxi ka jifalamenda jiji, mwala o madivulu, o vidyu “Fotodrama da Criação,” mitelembe yakuxika, makalu axika, mutelembe, mu izuwa yalelu o internete. O kilunga kya Jihova kyamubhanga we o kikalakalu kyakulungulula o madivulu mumadimi avulu! Mukonda dyahi? Phala athu oso atene kwivwa o njimbu yambote mudimi dyâ dya uvwalukilu. Jihova kimukwa kathombo, mwene wakanena kwila, o njimbu yambote eji ku iboka “ku ifuxi yoso, ni miji yoso, ni madimi ni madyembu.” (Dij. 14:6, 7) Mwene wamesena kwila, o athu evwa o njimbu ya Utuminu.

 ⁹ Ihi itwamba yalungu ni athu atungu mu ididi yabhonzo kwabokela, kala yo atungu mujisabhalalu mba jikondominyu mwala alangidi? Phala kubokela o athu enya, o kilunga kyasange jindunge javulu jakubokela mu ididi mubhita athu avulu. Mukifika, kumuvu wa 2001, o Kibuka kya Utuminu kyaxikina kwila, o jiphange mu ixi ya França amateka kuboka bhukaxi ka tumakalu twakuboka, ni jundunge jamukwa phala kulondekesa o madivulu metu. Mukusuluka, o ndunge yiyi amateka ku ikayela we mu ididi yengi. O jiphange aditundu kyambote. Kumuvu wa 2011 kwamateka ukexilu wengi wakuboka mu ididi mubhita athu avulu, kumbanza ya Nova Yorque, ku Estados Unidos. Kumuvu wadyanga, abhana 102.129 amadivulu ni 68.911 atumadivulu. 4.701 a athu abhingi phala kwalonga o Bibidya! Tutena kumona kwila, bhukaxi ka nzumbi yê ikôla, Jihova wexile mukwatekesa o kikalalu kiki. Kyenyiki, o Kibuka kya Utuminu kyaxikina kwila, o jiphange ku mundu woso atena kuboka we bhukaxi ka tumakalu twamadivulu.

10. Ihi itutena o kubhanga phala kubandekesa o uhete wetu wakuboka ni kulonga?

¹⁰ Ihi i utena kubhanga? Katula mbote mumilongi ibhana Jihova bhukaxi kayônge yetu. Kalakala kumoxi ni kibuka kyê kya sidivisu yakuboka. O jiphange mukibuka kyê atena kukukwatekesa kubandekesa o uhete wé wakuboka ni kulonga ni kukuswinisa bhukaxi ka phangu yâ. Suluka ni kukuboka, né mwene ni ibhidi. Kala kilondekesa o velusu yamilongi yiyi, etu tusuluka mukubhanga o vondadi ya Nzambi, kana munguzu yetu maji mukonda twala ni kutena kutunda ku nzumbi ikôla. (Zak. 4:6) Tutena kudyelela kwila Nzambi wandatubhana o nguzu itwabhindamena mukonda twamubhanga o sidivisu yê.

11. Kuhamama yadyanga kyebhi o Kibuka kya Utuminu kyakalakala kumoxi phala o mundu wa Nzambi ukale ni kutululuka?

¹¹ Kuhama yadyanga. O kibuka kya Utuminu mu Jeluzaleme kyexile mukalakala kumoxi phala o kilunga kya Nzambi kidisokejeka kyambote, kikale ni kutululuka. (Ika. 2:42) Mukifika ku muvu wa 49 K.K., o Jikidistá kexile ni kibanzelu kimoxi kyalungu ni kusaya o athu phala atene kusidivila Jihova. Kyenyiki, o kibuka kya Utuminu kyaxikama phala kubatula  o maka ni kikwatekesu kya nzumbi ikôla. Se o kilunga kyadiwanene mu ibuka iyadi, o kikalakalu kyakuboka keji kibhanga kyambote. Sumbala o jipoxolo exile Jijudé, ene kehela kwafwinyisa ku ijila ya Jijudé mba yó akexile mu ilonga. Muveji dyakiki, ene atokwesa o Mak’â Nzambi abhingi o nzumbi ikôla phala kwakwatekesa kubatula kyambote o maka. (Ika. 15:1, 2, 5-20, 28) Ihi yabhiti? Jihova wabesowala o kima kyasolo. O kilunga kyexile kumoxi ni kutululuka, o kikalakalu kyakuboka kyende kupholo.—Ika. 15:30, 31; 16:4, 5.

12. Ihi ilondekesa kwila o kilunga kya Jihova kyadisokejeka kyambote mwala kutululuka?

¹² Mu izuwa yalelu. O kilunga kya Jihova kyamukalakala phala o mundu wê ukale kumoxi ni kutululuka. Mukadivulu Zion’s Watch Tower and Herald of Christ’s Presence (O Mulangidi wa Ziyone, ni Arauto da Presença de Cristo) ka 15 ya Kamoxi ka 1895, mwakexile milongi ni dyambu: “Ujitu ni Uyukilu,” yokatule mudivulu 1 Kolindu 14:40. O milongi yambe: “O jipoxolo asoneka ima yavulu yalungu ni uyukilu phala o Jikidistá kuhama yadyanga. Kima kyambote kubelesela o milongi yiyi ‘yosoneke mukulu phala etu kudilonga.’” (Loma 15:4) Kyene mwene. Lelu, o kilunga kya Jihova kyamubhanga yoso phala o mundu wa Nzambi ukale kumoxi ni kutululuka kala kyexile o Jikidistá kuhama yadyanga. Mukifika, se uya mukilunga kyengi kudisukilu dyasemana né mwene mu ixi yengi, wandamona kwila o ukexilu wakudilonga o milongi ya Mulangidi wene umoxi, o milongi yasemana yene we imoxi mu ilunga yoso. Eye wandadivwa kala wale mwene mukilunga kyê! Kiki kibhita ngó mukonda dya nzumbi ikôla ya Nzambi.—Zak. 3:9.

13. Mukuxinganeka mu divulu dya Tiyaku 3:17, ibhwidisu yebhi itwatokala kudibhanga?

¹³ Ihi i utena kubhanga? Jihova wamesena kwila o mundu wê ukala ‘mu usoko wakwongama wa abhana o nzumbi ikôla, mudijikita dyê dya paze.’ (Efe. 4:1-3) Kyenyiki dibhwidise: ‘Ngisota kutunga kumoxi ni kutululuka mukilunga? O kwila ngene mubelesela o jiphange ala kupholo? O kwila o jiphange angidyelela, bengebenge se ngala ni mawujitu mukilunga? O kwila ngene mubhanga o ima mukithangana kyatokala, ngawabhela kukwatekesa akwetu, ngala polondo phala kusidivila akwetu?’ (Tanga  Tiyaku 3:17.) Se wamono kwila sayi kima ki wene mukikumbidila kyambote, samba kwa Nzambi mukubhinga o nzumbi yê ikôla. Se twehela o nzumbi ikôla kwendesa o ukexilu ni ibhangelu yetu, o jiphange jetu jandatuzola dingi ni kulondekesa o kisakidilu muyoso itubhanga mukilunga.

14. Kala kilondekesa Kolose 1:9, 10, kyebhi Jihova kyalongo o mundu wê muhama yadyanga?

¹⁴ Kuhama yadyanga. Jihova wawabhela kyavulu kulonga o mundu wê. (Jisá. 32:8) Mwene wamesena kwila, o athu amwijiya, amuzola, akala twana twê katé kuhádya ni hádya. O ima yoso yiyi ibhita ngó mukonda Jihova wene mutulonga. (Nzwá 17:3) Kuhama yadyanga, Jihova walongo o mundu we bhukaxi ka kilunga kya Jikidistá. (Tanga Kolose 1:9, 10.) O nzumbi ikôla, “o mukwatekexi” wa akanene Jezú, “yakwatekesa” o maxibulu. (Nzwá 14:16) Yakwatekesa o maxibulu kutendelela kyambote o Mak’â Nzambi, ni kulembalala o ima yazwela ni yabhange Jezú, kyoso kyasoneka o madivulu a Matesu, Máluku, Luka ni Nzwá. Kwijiya o ima yiyi, kwakolesa o kixikanu ni henda ya Jikidistá jiji kwa Nzambi ni kwa Mon’ê. Kwakolesa we o henda yâ mudyâ.

15. Kyebhi kyene mudikumbidila o kikanenu kya Jihova mu divulu dya Izaya 2:2, 3?

¹⁵ Mi izuwa yalelu. Jihova wakanena kwila, “mwizuwa yakàsukidilaku,” mundu wavulu watokala ku ifuxi yoso, eji kwiza kumulundu, kifwa, eji kwiza kwa Jihova phala kwalonga o ijila yê. (Tanga Izaya 2:2, 3.) Lelu, o kikanenu kiki kyamudikumbidila. Tutena kumona kwila, o ubhezelu wakidi wabeta dingi kota, o wamakutu ndenge. Jihova wenemubhana milongi yavulu ya Bibidya ku mundu we! (Iza. 25:6) Bhukaxi ka “Kimbadi kya Fiyele Kyadimuka,” Jihova wene mutubhana milongi yavulu, mu mawukexile kadifu. Mukifika, tutena kutanga milongi mumadivulu ni Milangidi,  kwivwa madiskulusu ni kutala jividyu. (Mat. 24:45) Etu tudivwa kala kyadivwile Elihu, kamba dya Jobe. Mwene wambe ni kulunga kwoso, wixi: “Nanyi ulonga kala [Nzambi]?”—Job 36:22.

16. Ihi i utena kubhanga phala kukula mu nzumbi?

¹⁶ Ihi i utena kubhanga? O nzumbi ikôla yandakukwatekesa kukumbidila yoso i utanga ni kudilonga mu Mak’â Nzambi. Samba kala o mukwa jisálamu, wambe: “Ngilonge njila yé, u Jihova, ngende jinge mu kidi kyé; endesa o muxima wami, ngi kale jinge ni wôma wa dijina dyê.” (Jisá. 86:11) Suluka we ni kutanga ni kudilonga o Bibdya ni madivulu amukwa ene mutubhana Jihova bhukaxi ka kilunga kyê. Eye kiwandabhanga kiki phala kukala ngó ni kwijiya kwavulu, kana. Eye wamesena kwila, o kidi kikutula kumuxima, wamesena we ku kikumbidila kumwenyu wê. O nzumbi ikôla ya Jihova yandakukwatekesa kubhanga kiki. Eye wamesena we kuswinisa o jiphange jê. (Jihe. 10:24, 25) Mukonda dyahi? Mukonda éne o mwiji wê munzunbi. Kyenyikiphe, bhinga o nzumbi ikôla bhukaxi ka musambu, phala ikukwatekese kubhana itambwijilu yambote muyônge, ni kubhanga o jimbandu jê ni uhete woso. Mukubhanga kiki, wandalondekesa kwa Jihova ni kwa Mon’ê kwila, eye wazolo o “jimbudi” jâ.—Nzwá 21:15-17.

17. Kyebhi ki utena kulondekesa kwila eye wamukwatekesa o kilunga kya Jihova ni ufiyele?

¹⁷ Kwakambe ngó, mungongo yoso mwanda subhuka ngó o kilunga kya Jihova, mukonda amukyendesa kwala o nzumbi ikôla ya Nzambi. Kyenyikiphe, kalakala ni nguzu yoso kumoxi ni kilunga kya Jihova. Londekesa kwila eye wazolo o athu kala Nzambi, mukuboka o njimbu yambote ku athu u usanga mu ukunji. Kayela o phangu ya Jihova, mukukwatekesa o kilunga kukala kumoxi ni kutululuka. Sota kwivwa o Mulongexi we mukukatula mbote mu milongi yoso yakubhana. Kyenyiki, kiwanda kala ni wôma mukumona kwila, o mundu wa Satanaji wamubhixila kudisukilu dyê. Maji, wandakala bhukaxi ka athu amusidivila kumoxi ni kilunga kya Jihova ni ufiyele woso.