1. Ni byahi ebyo Bakristayo ababatizibirwe batholere ibalholha embere erikolha?

WUNA batizibirwe? Kyamabya ikwa kiri kithya, wabirikangania erikirirya lyawu omu Yehova kandi ku wunayitheghekire erikolha haghuma n’ekithunga kiwe. * Neryo kwesi, erikirirya lyawu omu Yehova litholere iryalholha embere erighuma. Kandi wutholere iwabya iwunemughumya eriyikethera lyawu ngoku Yehova anemukolesya ekithunga kiwe munabwire.

2-3. Munabwire Yehova akasondolha ekithunga kiwe omwa nziraki? Iha eby’erileberyako.

² Munabwire, Yehova akasondolha ekithunga kiwe omwa nzira eyikakanganaya emibere yiwe, ekighendererwa kiwe, n’ebihano biwe. Thulebaye emibere isathu y’okwa mibere ya Yehova eyikalhangirika omwa kithunga kiwe.

³ Ow’erimbere, Nyamuhanga syawithe kasolholho. (Emib. 10:34) Olhwanzo mulhwaleka Yehova iniahayo Mughalha wiwe busana “n’erithongolya abandu bosi.” (1 Tim. 2:6; Yn. 3:16) Yehova akakolesaya abandu biwe erithulhughania engulhu yuwene okwa bosi abakahulikirira, ni bugha ambu eriwathikya abandu bangyi ngoku bangathoka nuku baghasirawe omwa ndongolya. Owakabiri, Yehova ni Nyamuhanga w’obuyithondeke kandi ow’obuholho. (1 Kor. 14:33, 40) Kwesi, abaramya biwe batholere ibamukolera omwa buyithondeke n’omwa buholho. Owakasathu, Yehova ni ‘Mukangirirya’ Mukulhu. (Isa. 30:20, 21) Busana n’ekyo, ekithunga kiwe kikahira omuwatho okw’ikangirirya Ekinywe kiwe omwa kithunga n’omw’ithulira. Emibere isathu eyi ey’okwa mibere ya Yehova muyalhangirika yithi omwa kithunga  ky’Ekikristayo kera? Yinemukanganibwa yithi munabwire? Kandi omulimu abuyirire anga kuwathikya athi wukakolha haghuma n’ekithunga kya Yehova munabwire?

4. Ngoku kiri omwa Emibiri 1:8, Yesu mwalhaghira abakamukwama athi bakoleki, kandi ni buwathikya bwahi obo bangabwene?

⁴ Omwa kighana ky’erimbere. Omwatsi ogho Yesu athulhughanaya mwaha abandu bosi b’amaha. (Lk. 4:43) Mwalhaghira abakamukwama athi balholhaye omubiiri agho abiritsukisya w’embere, eriha obwema “okwa nduli-nduli sy’ekihugho.” (Soma Emibiri 1:8.) Nomwabine, sibanga kolire omubiiri oyu omwa kaghalha kabu. Banga yithaghire omulimu abuyirire​—“omuwathikya” ogho Yesu abalhaghanisaya.​—Yn. 14:26; Zek. 4:6.

5-6. Omulimu abuyirire mwawathikya athi abakakwama Yesu?

⁵ Abigha ba Yesu mubabana omulimu abuyirire okwa Pentekote 33 E.K. Busana n’obuwathikya bw’omulimu oyo, mubalhuaho ibatsuka erithulira, kandi omwa buthuku buke, esyongumi sy’abandu mubaligha engulhu yuwene. (Emib. 2:41; 4:4) Habere hakabya erihakanisibwa, abigha mubathakwa obuba aliwe mubasaba Nyamuhanga y’obuwathikya. Mubasaba bathi: “Wuleke abaghombe bawu babughe ekinywe kyawu n’erithendiubaha lyosi.” Neryo mubusulha n’omulimu abuyirire n’erilholha embere ‘eribugha ekinywe kya Nyamuhanga omo buthubaha.’​—Emib. 4:18-20, 29, 31.

⁶ Abigha ba Yesu kandi mubabana ebindi bitsibu. Ng’eky’erileberyako, esyokopi sy’Amasako syabya sike. Sihabya ebitabu ebiri ng’ebya thuwithe munabwire. Kandi abigha babya b’erithulira abandu abakabugha emibughe mingyi muthina-muthina. Nomuhanabya ebitsibu byosi ebyo, abigha ab’omuhwa abo mubakolha ekyabya nga sikyanga thokekana​—omo myaka mike buyira, babya ibamabirithulhughania engulhu yuwene “oko bandu bosi muna-kihugho.”​—Kol. 1:6, 23.

7. Emyaka eyilhabire omu 100 eyihwere, abaghombe ba Yehova mubaminya bathi ebyo Nyamuhanga akabayithaghako, kandi mubakolhaki?

⁷ Munabwire. Yehova anemulholha embere erisondolha n’eriha abandu biwe b’akaghalha k’erikolha erisonda liwe. Kutsibu-tsibu ekyo akakikolha erilhabira omwa Kinywe Kiwe ekya sondolibawa n’omulimu abuyirire. Omwa Biblia thukabanamu ebihambire okw’ithulira lya Yesu n’ekihano kiwe ekyo aha abakamukwama athi balholhaye omubiiri ogho abiritsukisya w’embere. (Mt. 28:19, 20) Kera omo Kwomusanju 1881, egazeti y’Akaleberyo muyabugha yithi: “Muthuthabirikirwa, kutse erihakabibwa habw’erihebwa olhukengerwa n’eribya baghuda aliwe thwabirikirawa erikolesya ekyosi-kyosi ekyo thuwithe erithulha engulhu yuwene.” Akatabu To Whom the Work Is Entrusted, akahulhukibawa omwa 1919, mukabugha kathi: “Omubiiri ni munene kutsibu, aliwe ni w’Omukama, kandi thukendi kolhagho omo maaka wiwe.” Ng’Abakristayo abakera, buthubaha balikyethu aba mubayitsungira omwa mubiiri, ibanayikethere ngoku omulimu abuyirire akendi bawathikya erithulira abandu b’emisindo yosi. Nethu namunabwire thuwithe eriyikethera ng’eryo.

8-9. Ni nzira syahi esyo ekithunga kya Yehova kyabirikolesya erilholya omubiiri w’erithulira w’embere?

⁸ Ekithunga kya Yehova kyabirikolesya ebindu ebyuwene kutsibu erithulhughania engulhu yuwene. Ebindu ebi mwabiribya imwamuli ebitabu, e “Photo-Drama of Creation,” esyoturunu, ematoka eyiri kw’emizindalo, emikania okwa radio, kandi n’ebya lino-lino, n’eby’etekinologia. Kandi kinemuhindulha emyatsi omwa mibughe mingyi kwilhaba kera! Busana naki? Nuku abandu b’emisindo yosi bang’owa engulhu yuwene omwa mubughe wabu. Yehova syawithe akasolholho; mwabugha athi engulhu  yuwene yikendisya thulhughanibwa okwa “buli kithunga ky’abandu, n’obuli kihanda, n’obuli mubughe, n’oko bandu.” (Erib. 14:6, 7) Anzire abosi ibowa omwatsi w’Obwami.

⁹ Kandi ibbwa abo thuthethwanga hikako, obundi busana n’eribya ib’ikere omo manyumba aw’aliko obutheya obukalire? Erithoka eribahikako, ekithunga kya Yehova kyabirihiraho esyonzira muthina-muthina sy’erithulira ahakabya bandu bangyi. Ng’eky’erileberyako, omwa 2001, Akathunga Akakasondolha mukalighira balikyethu e France erikolesya ehiggali n’esindi nzira sy’erikanganiryamo ebitabu n’enyuma waho kamalighira n’ebindi bihugho. Mumwalhwiririra ebibuya. Omwa 2011 eyindi ndegheka muyatsuka e Amerika omwa kighuma ky’okwa bitsweka ebikabyamo bandu banene kutsibu omwa New York City. Omo mwaka ow’atsukira mw’endegheka eyi, ebitabu 102,129 n’esyogazeti 68,911 mubyaghabwa. N’abandu 4,701 mubasaba erigha e Biblia! Ahathe erithika-thika, Yehova mwakolesya omulimu abuyirire erisighika omubiiri oyu. Neryo Akathunga Akakasondolha mukalighira ekihugho kyosi erikolesya enzira eyi.

10. Thwanga kolhaki eryuwania omubiiri wethu w’erithulira?

¹⁰ Ekyo wangakolha. Kolesaya ndeke erithendeka eryo Yehova akathuha okwa mihindano y’Ekikristayo. Mughulhu wosi, sangira omw’ithulira n’egurupu yenyu y’omubiiri. Balikyethu ab’omwa gurupu yawu bangana kuwathikya eribya muthuliri mubuya kandi ibakuhimba omwa ky’erileberyako kyabu. Yiyinaye omw’ithulira. Ngoku erisako erihirikirire omwatsi wethu likathubwira, thukathoka erikolha erisonda lya Nyamuhanga busana n’omulimu abuyirire, butsira omwa kaghalha kethu. (Zek. 4:6) Nibya omubiiri owathukakolha ni wa Nyamuhanga.

11. Akathunga Akakasondolha ak’omwa kighana ky’erimbere mukakolha kathi omwa bughuma nuku abandu ba Nyamuhanga babye ibane omwa buyithondeke?

¹¹ Omwa kighana ky’erimbere. Akathunga Akakasondolha e Yerusalemu mukakolha omwa bughuma nuku abandu ba Nyamuhanga babye ibane omwa buyithondeke n’omwa buholho. (Emib. 2:42) Ng’eky’erileberyako, habere hakabya erithendi lighirana oko mwatsi w’eribanibwa  ng’omwa 49 E.K., akathunga akakasondolha, omwa busondoli bw’omulimu abuyirire mukakania oko mwatsi oyu. Ekithunga ku kyalholha embere ikinaghabene oko mwatsi oyu, omubiiri w’erithulira ang’imene. Nomwakine indi abakwenda n’abakulhu babya Bayuda, mubathaghendera oko mitse y’Ekiyuda kutse oko by’abandu abakakulha-kulhanayayo. Aliwe, mubasondya obusondoli omwa Kinywe kya Nyamuhanga n’obw’omulimu abuyirire. (Emib. 15:1, 2, 5-20, 28) Mumwalhwiririraki? Yehova mwatsumulha erithwamu lyabu, muhabya obuholho n’obughuma, n’omubiiri w’erithulira amalholha embere.​—Emib. 15:30, 31; 16:4, 5.

12. Ni kyahi ekikakanganaya ngoku obuyithondeke n’obuholho bine omwa kithunga kya Yehova munabwire?

¹² Munabwire. Ekithunga kya Yehova kyabirikolha kutsibu nuku abandu ba Yehova babye ibane omwa buyithondeke n’omwa buholho. Kera omwa 1895, e Zion’s Watch Tower na Herald of Christ’s Presence eby’Okwerikuminakughuma 15 mwabya omwatsi ow’awithe omuthwe “Omw’Itheghekania Kandi Omwa Buyithondeke,” owabya aseghemere okwa 1 Abanya Korinto 14:40. Omwatsi oyo mwabugha athi: “Abakwenda mubahandikira ebithunga bya kera emyatsi mingyi eyihambire okwa buyithondeke . . . Ni kikulhu erilholha embere erighendera oko ‘byasakawa busana n’erithukangirirya.’” (Abar. 15:4) Eriyisunza iryan’eryo ery’obuyithondeke n’obuholho eryanabya omwa Bakristayo abakera linemulhangirika ndeke omwa kithunga kya Yehova munabwire. Ng’eky’erileberyako: Wamabya w’erihindana okw’igha ly’Akaleberyo omwa kindi kithunga​—nibya omwa kindi kihugho—​iwukendibya iwunasi erigha eryo nga likendibya lithi n’omwatsi ow’akendi kanibwako. Wukalhuaho iwayowa buholho! Omulimu wa Nyamuhanga musa wangana leka obughuma ng’obu ibwathokekana!​—Zef. 3:9.

13. Ngoku kiri omu Yakobo 3:17, ni bibulyo byahi ebyo thutholere ithwayibulya?

¹³ Ekyo wangakolha. Yehova anzire abandu biwe ibabya ‘n’obughuma obukalhua oko mulimu abuyirire, kandi ibabya n’obuholho obukabamathanaya haghuma.’ (Efe. 4:1-3) Neryo yibulhaye: ‘Nganahira omwa kithunga mw’obughuma n’obuholho? Nganemughondera abakasondolha? Abandi bangana nyiyikethera, kutsibu-tsibu ngamabya ingawithe  esyongwamirwa omwa kithunga? Nganatheghaya obuthuku, ingawathikya, kandi ngana yitheghekire erikolera abandi?’ (Soma Yakobo 3:17.) Wamalhangira aho wang’uwania, saba omulimu abuyirire. Wukendibya wukongera erilighiragho eryuwania emibere yawu n’emikolere yawu, n’abalikyethu ku banemwendiongera bathya erikwanza n’erikulhangira mwa w’obughuli.

14. Ngoku kiri omu Abanya Kolosai 1:9, 10, Yehova mwakangirirya athi abandu biwe omwa kighana ky’erimbere?

¹⁴ Omwa kighana ky’erimbere. Yehova anzire erikangirirya abandu biwe. (Esy. 32:8) Anzire ibamuminya, ibamwanza, n’eribyaho kera na kera ng’abaana biwe banzwa. Ebyosi ebi sibyanga thokekana amathendi thukangirirya. (Yn. 17:3) Yehova mwakolesya ekithunga ky’Ekikristayo eky’omwa kighana ky’erimbere erikangirirya abandu biwe. (Soma Abanya Kolosai 1:9, 10.) Omulimu abuyirire​—“omuwathikya” ogho Yesu alhaghanisaya​—mwakolha mubiiri munene. (Yn. 14:16) Mwawathikya abigha eryongera eriminya Ekinywe kya Nyamuhanga, n’eryibibukya ebindu bingyi ebyo Yesu abugha n’erikolha, n’enyuma waho byamahandikwa omwa bitabu by’Enjiri. Eriminya eri mulyaghumya erikirirya ly’Abakristayo b’erimbere kuthya n’olhwanzo olhwa bawithire Nyamuhanga, Mughalha wiwe, n’olhw’abawithirene.

15. Ni mwanzira syahi wabiriyilhangirira ngoku Yehova akaberereraya omulhaghe wiwe owali omu Isaya 2:2, 3?

¹⁵ Munabwire. Yehova mwabugha athi “oko biro by’enyuma,” abandu b’ebihanda byosi banga kumukalire okwa kithwe kiwe nuku bakangiriribawe esyonzira siwe. (Soma Isaya 2:2, 3.) Thunemulhangira obuminyereri obo bukabererera. Eriramya ly’okwenene liyisumbire kutsibu kwilhaba eriramya lyosi ery’amabehi. Kandi Yehova anemuthuha ebyalya bingyi eby’obunyakirimu! (Isa. 25:6) Erilhabira omwa “mughombe oyuthereghulha n’ow’amenge,” akathuha ebyosi ebi omwa nzira muthina-muthina,  ng’esyogazeti, emikania, n’esyovidiyo. (Mt. 24:45) Thukayowa ngoku omunywani wa Yobu ya Elihu ayowa, oyuwabugha athi: “Nyamuhanga ni mukangirirya Mukulhu oko bosi.”​—Yobu 36:22.

16. Wangakolhaki erikulha-kulhana bunyakirimu?

¹⁶ Ekyo wangakolha. Omulimu wa Nyamuhanga akendi kuwathikya erighendera okwa bya wukasoma n’erigha omwa Kinywe kiwe. Saba ng’omuhandiki w’esyonyimbo, oyuwabugha athi: “Iwe Yehova, nyikangiriraye oko nzira syawu. Ngendi lendera omo kwenene yawu. Yira omuthima waghe mo muyima ngathoke eryubaha erina lyawu.” (Esy. 86:11, NW) Neryo lholha embere eriyirisya ebyalya by’obunyakirimu ebyo Yehova akaha erilhabira omwa Kinywe kiwe n’ekithunga kiwe. Ekilhubirirwa kyawu siry’erikwama kyaminya buyira. Wanzire ekwenene iyahika oko muthima wawu kandi iwaghendera kuyo omwa ngebe yawu. Omulimu wa Yehova angana kuwathikya erikolha ekyo. Kandi wanzire erihimba balikyethu. (Ebr. 10:24, 25) Busana naki? Kundi n’ihiika lyawu ery’obunyakirimu. Saba omulimu wa Nyamuhanga akuwathikaye erisubirya omwa mihindano erilhua okwa muthima n’erilengaho kutsibu ngoku wangathoka erilhabya ndeke ekitsweka ekya wanga hebwa. Omwa syonzira esi wukakanganaya Yehova na Mughalha wiwe ngoku wanzire “esyombuli” syabu esy’obughuli.​—Yn. 21:15-17.

17. Ni mwa nzira syahi wanga kangania ku wunemusighika ekithunga kya Yehova buthaleghulha?

¹⁷ Okwa buthuku obuthe bwa haali, ekithunga ekikasondolhawa n’omulimu wa Nyamuhanga kisa ky’ekikendi sighalha okwa kihugho. Neryo n’omuhwa kolha n’ekithunga kya Yehova. Kanganaya olhwanzo lhwa Nyamuhanga olhuthe mw’akasolholho omw’ithulhughania engulhu yuwene okwa bandu bosi abo wukabana. Gherereraya omubere wiwe ow’erianza obuyithondeke n’obuholho omw’ihira omwa kithunga mw’obughuma. Kandi hulikirira Omukangirirya wawu Mukulhu omw’iyirisya ebyalya bingyi by’obunyakirimu ebyo akaha. Neryo ekihugho kya Sitani kikendibya kinemuseghera okwa nduli yakyo, siwendiubaha. Omwakanya k’ekyo, iwunasikire, wukendibya omw’abo abanemukolha buthaleghulha n’ekithunga kya Yehova.