1. Bena Kilishitu babatizhiwa bafwainwa kutwajijila kuba ka?

NANCHI mwabatizhiwa nyi? Inge byo byo mwauba, ko kuba’mba mwamwesha patoka’mba mwaitabila mwi Yehoba kabiji amba mwipana kwingijila pamo na jibumba janji. * Nangwa byonkabyo, lwitabilo lwenu mwi Yehoba lwafwainwa kutwajijila kukosa. Kabiji mwafwainwa kutwajijila kuketekela’mba Yehoba ubena kwingijisha jibumba janji lelo jino.

2-3. Yehoba ubena kutangijila byepi jibumba janji lelo jino? Ambaipo mashinda amo.

² Lelo jino, Yehoba utangijila jibumba janji mu jishinda jitulengela kumuyuka byo aji, byo akeba kuba ne kuyuka mafunde anji. Twayai twisambe pa byubilo byanji bisatu byo tumona mu jibumba janji.

³ Kitanshi, “Lesa kechi uji na misalululo ne.” (Byu. 10:34) Butemwe bo bwalengejile Yehoba kupana Mwananji kwikala “bukuzhi . . . bwa kukuula bonse.” (1 Timo. 2:6; Yoa. 3:16) Yehoba wingijisha bantu banji kusapwila mambo awama ku bonse bateleka, ne kukwasha bantu bavula kumwenamo mu bukuzhi. Kya bubiji, Yehoba ye Lesa wa mutende kechi wa bimvulañanya ne. (1 Ko. 14:33, 40) Onkao mambo, twakonsha kuketekela bapopweshi banji kumwingijila mutende kwa kubula bimvulañanya. Kya busatu, ‘Yehoba ye Mufunjishi wetu Wakila.’ (Isa. 30:20, 21) Onkao mambo, jibumba janji jata bingi muchima pa kufunjisha biji mu Mambo anji, mu kipwilo ne mu mwingilo wa kusapwila. Nga bajinga mu bipwilo bya bena Kilishitu batanshi balondejilenga byepi bino byubilo  bisatu bya kwa Yehoba? Nga bantu ba Yehoba babena kulondela byepi byubilo byanji lelo jino? Kabiji mupashi wazhila wakonsha kwimukwasha byepi byo mubena kwingijila pamo na jibumba ja Yehoba lelo jino?

4. Kwesakana na byaamba Byubilo 1:8, Yesu wakambizhe baana banji ba bwanga kuba ka, kabiji ñanyi nkwasho ye ebalaile?

⁴ Mu Kimye kya bena Kilishitu batanshi. Byambo byasapwilanga Yesu byapananga luketekelo ku bantu bonse. (Luka 4:43) Wakambizhe baana banji ba bwanga kutwajijila kwingila mwingilo ye atendekele ne kusapwila “monse mwapela ntanda.” (Tangai Byubilo 1:8.) Ibyo kuba’mba kechi bakonsheshe kwingila uno mwingilo na bulume bwabo ne. Bakebewenga mupashi wazhila “nkwasho” wibalayile Yesu.—Yoa. 14:26; Zeka. 4:6.

5-6. Mu ñanyi mashinda mupashi wazhila mo akwashishe baana ba bwanga ba kwa Yesu?

⁵ Baana ba bwanga ba kwa Yesu batambwijile mupashi wazhila pa Pentekosita 33 C.E. Na bukwasho bwa mupashi wazhila, ponkapotu batendekele kusapwila kabiji mu kimyetu kicheche bantu bavula batambwijile mambo awama. (Byu. 2:41; 4:4) Bantu byo batendekele kwibamanyika, baana ba bwanga kechi bachiine ne, pa kuba balombele Yehoba kwibakwasha. Balombele amba: “Kwashai bakalume benu kwambanga mambo enu na kuchinchika.” Bayujile na mupashi wazhila kabiji batwajijile “kwamba mambo a Lesa na kuchinchika.”—Byu. 4:18-20, 29, 31.

⁶ Baana ba bwanga ba kwa Yesu bapichile mu makatazho akwabo. Kechi bajinga na mivungilo ya binembelo yavula nangwa mabuku alumbulula Baibolo byonka byo kiji lelo jino ne. Kabiji baana ba bwanga basapwijilenga ku bantu baambanga milaka yapusana-pusana. Nangwa kya kuba bapichilenga mu ano makatazho, bano baana ba bwanga baingijile mwingilo wamwekelenga kukatazha. Mu myaka ichechetu, basapwijile mambo awama “ku bilengwa byonse biji pano panshi.”—Kolo. 1:6, 23.

7. Myaka kukila pa 100 yapitapo, bakalume ba Yehoba bayukile amba Lesa wakebelenga’mba bobenga ka, kabiji baubile byepi?

⁷ Mu ano moba. Yehoba watwajijila kutangijila bantu banji ne kwibapa bulume bwa kwingila. Javula utangijila bantu banji kupichila mu Baibolo wanembelwe na lutangijilo lwa mupashi wanji wazhila. Mu Baibolo tutangamo mashimikila aamba pa mwingilo wa kwa Yesu ne mukambizho ye akambizhe baana banji ba bwanga wa kutwajijila kwingila mwingilo ye atendekele. (Mat. 28:19, 20) Mu July 1881, Kyamba kya Usopa kyaambile amba: “Yehoba kechi witusajile nangwa kwitushinga mupashi wanji kuba’mba bantu betunemekenga nangwa kuba’mba tunonke ne, bino witusajile kuba’mba tusapwilenga mambo awama.” Kabuku kanembelwe mu 1919 ka kuba’mba Bo Bapa Mwingilo (To Whom the Work Is Entrusted) kaambile’mba: “Uno mwingilo wabaya bingi, bino byo aji wa Nkambo, tukamwingila mu bulume bwanji. Bonse mwafwainwa kwingilako uno mwingilo.” Byonka byaubile bena Kilishitu batanshi, ne bano balongo bachinchikile ne kwingila na ngovu mambo baketekejile kuba’mba mupashi wazhila ukebakwasha kusapwila ku bantu bonse. Ne atweba twaketekela kuba’mba mupashi wazhila uketukwasha.

8-9. Ñanyi mashinda jibumba ja Yehoba o ja ingijisha pa kusampanya mambo awama a bufumu?

⁸ Jibumba ja Yehoba jaingijisha bingijisho byapusana-pusana pa kusapwila mambo awama. Bino bingijisho byavwangamo mabuku o bapulinta, “Mashikopo wa Bilengwa na Lesa,” bijimba bya malekodi, myotoka yajinga na bya kwambilamo, mawaileshi, kabiji mu ano moba, babena kwingijisha makompyuta ne Intaneti. Jibumba ja Lesa jibena kutuntulula mabuku mu milaka yavula bingi kukila kala. Mambo ka? Pa kuba’mba bantu ba mitundu yonse bomvwe mambo awama mu milaka yabo. Yehoba kechi uji na misalululo ne; waambijile jimo kuba’mba  mambo awama akasapwilwa “ku mikoka yonse ku ba njimi yonse ne ku mitundu yonse ya bantu.” (Lum. 14:6, 7) Ukeba kuba’mba bantu bonse bomvwe mambo a Bufumu.

⁹ Twakonsha kusapwila byepi bantu bo twakonsha kukankalwa kufika pa mazubo abo, kampe na mambo a kuba’mba bekala mu mapunzha azhikijilwa? Yehoba wakwashishe jibumba janji kutendeka kwingijisha mashinda apusana-pusana a kusapwilamo ku mapunzha kutanwa bantu bavula. Mu 2001, Jibumba Jitangijila jaswishishe balongo ne banyenga mu France kutendeka kwingijisha twakutanchikapo mabuku. Mukuya kwa kimye, balongo mu mapunzha akwabo nabo batendekele kwingijisha jino jishinda. Mwafumine bintu byawama bingi. Mu 2011, mu United States batendekele kwingijisha jishinda ja katataka pa kusapwila mu mapunzha mutanwa bantu bavula bingi mu muzhi wa New York. Mu mwakatu mutanshi, basampenye mabuku 102,129 ne magazini 68,911. Kabiji bantu 4,701 balombele kufunda Baibolo. Kino kimweshatu patoka kuba’mba mupashi wazhila watangijilenga uno mwingilo. Onkao mambo, Jibumba Jitangijila jaswishishe balongo ne banyenga mwaya ntanda yonse kwingijisha jino jishinda.

10. Twakonsha kuba byepi pa kuba’mba twingilenga bulongo mwingilo wa kusapwila?

¹⁰ Byo mwakonsha kuba. Pa kupwila kwetu kwa bwina Kilishitu, Yehoba witufunjisha bya kusapwila. Mwafwainwa kwingijishanga byo mufunda. Ingilainga kimye kyonse mwingilo wa kusapwila pamo na jibumba jenu ja mwingilo. Balongo ne banyenga mu jibumba jenu ja mwingilo bakonsha kwimukwasha kuwamishako busendwe bwenu bwa kusapwila ne kufunjisha. Kabiji mwakonsha kufunjilako byavula ku byo bengila. Twajijilai kusapwila nangwatu inge mubena kupita mu makatazho. Byonka byaamba kinembelo paimena uno mutwe, kechi tuba kyaswa muchima wa Lesa mu bulume bwetu ne, bino tuba bino na bulume bupana mupashi wazhila. (Zeka. 4:6) Twakonsha kushiinwa’mba Lesa uketupa bulume, mambo tubena kwingila mwingilo wanji.

11. Jibumba jatangijilanga kimye kya bena Kilishitu batanshi jaingijile byepi pa kuba’mba bantu ba Lesa batwajijile kukwatankana?

¹¹ Kimye kya bena Kilishitu batanshi. Jibumba jatangijilanga jajinga mu Yelusalema jakwatankene  kukwasha bantu ba Lesa kwikala mu mutende. (Byu. 2:42) Kimye kyo kwabuukile mambo a mukanda mu mwaka wa 49 C.E., jibumba jatangijilanga jisambilepo pa ano mambo na lutangijilo lwa mupashi wazhila. Inge kya kuba kipwilo kyatwajijile kwabenamo na mambo a luno lukatazho, mwingilo wa kusapwila inge kechi waendele bulongo ne. Nangwa kya kuba batumwa ne bakulumpe mu kipwilo bajinga Bayudea, bino kechi balondelanga kino kisho kya Bayudea nangwa kwikala ku lubaji lwa boba batundaikilenga kino kisho ne. Pakuba bakebele lutangijilo lwa Mambo a Lesa ne mupashi wazhila. (Byu. 15:1, 2, 5-20, 28) Ki ka kyafuminemo? Yehoba wapesheshe byo bafuukwilepo, mambo kipwilo kyatwajijile kwikala mu mutende ne kukwatankana, kabiji mwingilo wa kusapwila watwajijile kuyilako palutwe.—Byu. 15:30, 31; 16:4, 5.

12. Ki ka kimwesha’mba bantu mu jibumba ja Yehoba bakwatankana kabiji bekala mutende?

¹² Mu ano moba. Jibumba ja Yehoba jibena kukwasha bantu ba Yehoba kutwajijila kukwatankana ne kwikala mu mutende. Mu mwaka wa 1895, magazini wa Zion’s Watch Tower and Herald of Christ’s Presence wa November 15, mwajinga mutwe wa kuba’mba “Byubiwe na Mushingi ne mo Byalondankena,” kufuma pa 1 Kolinda 14:40. Kino kibaaba kyaambile’mba: “Batumwa banembele bintu byavula bingi ku kipwilo kitanshi pa kuba bintu mo byalondankena . . . Kyawama bingi kulondela ‘bintu byonse byanembelwe kala kuba’mba tufunjileko.’” (Loma 15:4) Kya kine, byonkatu byakwatankene bena Kilishitu batanshi ne kwikala mu mutende, ne jibumba ja Yehoba lelo jino byo byo jibena kuba. Langulukai pa kino: Inge mwatanwa ku Lufunjisho lwa Kyamba kya Usopa mu kipwilo kikwabo, nangwatu mu kyalo kingi, muyuka byo basakutangijila lufunjisho ne mutwe ye musakufunda. Mufikenatu kukasuluka. Kwa kubula nangwa kuzhinaukatu ne, mupashi wa Lesa ye walengela’mba kwikale luno lukwatankano.—Zefwa. 3:9, tubyambo twa munshi.

13. Kwesekana na byaamba Yakoba 3:17, ñanyi mepuzho o twakonsha kwishikisha?

¹³ Byo mwakonsha kuba. Yehoba ukeba bantu banji “kulama buumo bwa mupashi mu mutende ulengela kukwatankana.” (Efi. 4:1-3) Onkao mambo, ishikishai anweba bene amba: ‘Nanchi ntundaika mutende ne lukwatankano mu kipwilo  nyi? Nkookela betutangijila nyi? Nanchi nkwasha bakwetu, kikatakata inge nemukulumpe mu kipwilo nyi? Abya mfika bukiji ne kwipana kwingila mingilo pa kipwilo nyi?’ (Tangai Yakoba 3:17.) Inge mwamona’mba kuji mumo mo mubula kuba bulongo, lombai mupashi wazhila emukwashe. Umvwe ke mulondele lutangijilo lwa mupashi wazhila mu bwikalo bwenu, balongo ne banyenga bakemutemwa ne kwimunemeka.

14. Kwesekana na byaamba Kolose 1:9, 10, Yehoba wafunjishe byepi bantu banji mu myaka kitota kitanshi?

¹⁴ Kimye kya bena Kilishitu batanshi. Yehoba watemwa kufunjisha bantu banji. (Sala. 32:8) Byo baji baana banji bo atemwa, ukeba’mba bamuyuke, kumutemwa, ne kwikala myaka ne myaka. Kwa kubula kwitufunjisha, abino byonse kechi byakonsha kubiwa ne. (Yoa. 17:3) Yehoba waingijishe kipwilo kya bena Kilishitu batanshi kufunjisha bantu banji. (Tangai Kolose 1:9, 10.) “Nkwasho” walayile Yesu, ko kuba’mba mupashi wazhila, wakwashishe bingi baana ba bwanga. (Yoa. 14:16) Mupashi wakwashishe baana ba bwanga kumvwisha Mambo a Lesa, kabiji wibavulwilemo bintu byavula byaambile Yesu ne byo aubile, kabiji kulutwe byanembelwe mu mabuku a Mambo Awama. Kuyuka bino bintu kwakoseshe lwitabilo lwa bena Kilishitu batanshi ne butemwe bo batemenwe Lesa, Mwana Lesa, ne byo betemenwe abo bene na bene.

15. Mu ñanyi mashinda mo mwamwena Yehoba na kufikizha mulaye uji pa Isaya 2:2, 3?

¹⁵ Mu ano moba. Yehoba waambijile jimo amba “ku mpelo,” bantu ba mu bisaka byonse bakakonkena ku mutumba wa kifwanyikizho kuba’mba bebafunjishe mashinda anji. (Tangai Isaya 2:2, 3.) Tubena kwimwena kufika kwa buno bungauzhi. Bupopweshi bwa kine bebusuntula kukila bupopweshi bwa bubela bonse. Kabiji Yehoba ubena kupa bantu banji kajo ka ku mupashi kavula bingi. (Isa. 25:6) Kwingijisha “kalume wa kishinka kabiji wa maana,” Lesa ubena kwitupa kajo ka ku mupashi kavula kapusana-pusana,  ko kuba’mba bibaaba ne majashi, mavidyo a baana ne mavidyo akwabotu. (Mat. 24:45) Tumvwatu byonka byaumvwinenga mulunda wa kwa Yoba aye Elihu, waambile’mba: “Ñanyi mufunjishi wakonsha kwesakana pamo ne [Lesa]?”—Yoba 36:22.

16. Mwakonsha kuba byepi pa kuba’mba mumwenengamo mu bitufunjisha Yehoba?

¹⁶ Byo mwakonsha kuba. Mupashi wa Lesa ukemukwasha kwingijisha byo mutanga ne kufunda mu Mambo a Lesa. Lombainga byonka byalombele nyimbi wa masalamo amba: “Anweba Yehoba, mfunjishai jishinda jenu. Nkendanga mu bukine bwenu. Nkwashai ngikale na muchima umo kuba’mba ngakamwenga jizhina jenu.” (Sala. 86:11) Onkao mambo, twajijilai kutanga ne kufunda Baibolo ne mabuku akwabo anengezha jibumba ja Yehoba. Pano bino, kechi mwafwainwa kuba bino kuba’mba muyuketu bintu ne. Mwafwainwa kuba bino pa kuba’mba mushiinwe na bukine ne kwibwingijisha mu bwikalo bwenu. Mupashi wa Yehoba ukemukwasha kuba bino. Kabiji mwafwainwa kutundaikanga balongo ne banyenga mu kipwilo. (Hebe. 10:24, 25) Mambo ka? Mambo ke kisemi kyenu kya ku mupashi. Lombai mupashi wa Lesa kwimukwasha kwamba mikumbu ifuma panshi ya muchima pa kupwila kwa bwina Kilishitu ne kwamba bulongo inge bemupa jashi. Inge mwauba bino, mumwesha Yehoba ne Mwananji kuba’mba mwatemwa “mikooko” yabo yanema.—Yoa. 21:15-17.

17. Mu ñanyi mashinda mo mwakonsha kumweshesha’mba mubena kutundaika jibumba ja Yehoba mu bukishinka?

¹⁷ Katatakatu pano pa ntanda ponse pakashaletu jibumba jimo jitangijilwa na mupashi wa Lesa. Onkao mambo, kwatankanai na jibumba ja Yehoba. Mweshainga’mba mwatemwa bantu bonse byonka biji Lesa kupichila mu kusapwila mambo awama ku bonse bo mutaana. Londelainga Lesa kupichila mu kutundaika lukwatankano mu kipwilo pa kuba’mba mwikale mutende. Kabiji telekainga ku Mufunjishi Wakila kupichila mu kufunda byonse byo abena kunengezha. Kabiji ntanda ya kwa Satana byo ibena kunangijila ku mpelo, kechi mukakamwa ne. Pakuba mukachinchika ne kwikala pamo na bantu babena kwingijila pamo na jibumba ja Yehoba mu bukishinka.