1. Wetin Kristian dɛn we dɔn baptayz fɔ kɔntinyu fɔ du?

YU DƆN baptayz? If na so i bi, dat min se yu dɔn sho ɔlman se yu gɛt fet pan Jiova, ɛn yu rɛdi fɔ sav am insay in ɔganayzeshɔn. * Bɔt yu fɔ kɔntinyu fɔ gɛt mɔ fet pan Jiova. Ɛn yu nid fɔ kɔntinyu fɔ biliv gud gud wan se dis ɔganayzeshɔn de du wetin Jiova want.

2-3. Us tri we dɛn Jiova de dayrɛkt in ɔganayzeshɔn tide? Gi ɛgzampul dɛn.

² Di we aw Jiova de dayrɛkt in ɔganayzeshɔn tide de sho di kayn Pɔsin we i bi, wetin i want fɔ du, ɛn wetin i want wi fɔ du. Lɛ wi tɔk bɔt tri pan Jiova in kwaliti dɛn we wi de si na in ɔganayzeshɔn.

³ Fɔs, “Gɔd nɔ de tek wan pɔsin bɛtɛ pas ɔda pɔsin.” (Akt 10:​34) Lɔv bin mek Jiova gi in Pikin as di “prayz fɔ fri ɔlman.” (1 Tim. 2:​6; Jɔn 3:​16) Jiova de yuz in pipul dɛn fɔ prich di gud nyuz to ɔlman we gri fɔ lisin. Ɛn we i du dat, i de gi pipul dɛn chans fɔ bɛnifit frɔm in Pikin in day. Sɛkɔn, Jiova na Gɔd we ɔganayz, ɛn we gɛt pis. (1 Kɔr. 14:​33, 40) So wi fɔ ɛkspɛkt se di wan dɛn we de wɔship am fɔ ɔganayz ɛn gɛt pis. Tɔd, Jiova na di Bɛst “Ticha.” (Ayz. 30:​20, 21) So in ɔganayzeshɔn de tray tranga wan fɔ tich ɔda pipul dɛn bɔt wetin de insay in Wɔd, ɛn dɛn kin du dat na di kɔngrigeshɔn ɛn we dɛn de prich. Aw di fɔstɛm Kristian kɔngrigeshɔn bin falamakata dɛn tri kwaliti dɛn ya we Jiova gɛt? Aw Jiova in pipul dɛn de falamakata dɛn kwaliti dɛn de insay wi yon tɛm? Ɛn aw oli spirit go ɛp yu we yu de sav Jiova insay in ɔganayzeshɔn tide?

4. Akɔdin to Akt 1:​8, wetin Jizɔs bin kɔmand in disaypul dɛn fɔ du? Wetin i bin se go ɛp dɛn?

⁴ Insay di fɔstɛm Kristian dɛn tɛm. Di mɛsej we Jizɔs bin de prich bin de mek pipul dɛn gɛt op. (Lyuk 4:​43) I bin kɔmand in disaypul dɛn fɔ kɔntinyu di wok we i bin dɔn bigin, dat na fɔ prich “na di say we fa pas ɔl na di wɔl.” (Rid Akt 1:​8.) Bɔt dɛn nɔ go ebul fɔ du dis wok bay dɛnsɛf. Dɛn go nid oli spirit we Jizɔs bin dɔn prɔmis se go “ɛp” dɛn.—Jɔn 14:​26; Zɛk. 4:​6.

5-6. Aw oli spirit bin ɛp Jizɔs in disaypul dɛn?

⁵ Oli spirit bin kam pan Jizɔs in disaypul dɛn di de fɔ Pɛntikɔst insay di ia 33. Di spirit bin ɛp dɛn fɔ mek dɛn bigin prich wantɛm wantɛm, ɛn insay shɔt tɛm bɔku bɔku pipul dɛn bin jɔyn dɛn. (Akt 2:​41; 4:​4) We pipul dɛn bigin fɔ mek di disaypul dɛn sɔfa, dɛn nɔ bin fred. Bifo dat, dɛn bin beg Gɔd fɔ ɛp dɛn. Dɛn bin pre se: “Mek yu slev dɛn kɔntinyu fɔ gɛt maynd fɔ tɔk bɔt yu wɔd.” Oli spirit bin kam pan dɛn ɛn dɛn kɔntinyu fɔ “tɔk bɔt Gɔd in wɔd wit maynd.”—Akt 4:​18-20, 29, 31.

⁶ Jizɔs in disaypul dɛn bin gɛt ɔda prɔblɛm dɛn. Fɔ ɛgzampul, di say dɛn we dɛn bin kɔpi di Skripchɔ dɛn nɔ bin bɔku. Dɛn nɔ bin gɛt buk dɛn we de ɛksplen di Baybul lɛk aw wi gɛt dɛn tide. Ɛn di disaypul dɛn bin gɛt fɔ prich to pipul dɛn we de tɔk difrɛn langwej dɛn. Pan ɔl we di disaypul dɛn bin gɛt ɔl dɛn prɔblɛm dɛn ya, dɛn bin gɛt zil ɛn insay lɛk 30 ia, dɛn bin prich di gud nyuz “ɔlsay na di wɔl.”—Kol. 1:​6, 23.

7. Frɔm trade trade, aw Jiova in savant dɛn no wetin i want dɛn fɔ du? Wetin dɛn bin du?

⁷ Insay wi yon tɛm. Jiova de kɔntinyu fɔ dayrɛkt in pipul dɛn ɛn gi dɛn trɛnk fɔ du wetin i want. I de du dat mɔ wit di Baybul we di oli spirit bin ɛp pipul dɛn fɔ rayt. Insay di Baybul, wi de lan bɔt Jizɔs in prichin wok ɛn di kɔmand we i bin gi in disaypul dɛn fɔ kɔntinyu di wok we i bin dɔn stat. (Mat. 28:​19, 20) Insay Julay 1881, dɛn bin rayt insay Di Wachtawa se: “Jiova nɔ kɔl, ɔ anɔynt wi fɔ gɛt ɔnɔ ɛn fɔ gɛda jɛntri, bɔt na fɔ mek wi gi ɔltin ɛn ivin gi wisɛf, ɛn prich di gud nyuz.” Insay 1919, dɛn bin mek wan smɔl buk we nem, To Whom the Work Is Entrusted. Insay da buk de, dɛn bin rayt se: “Bɔku wok de fɔ du, bɔt na di Masta in wok, ɛn i go gi wi di trɛnk we wi nid fɔ du am.” Lɛk di fɔstɛm Kristian dɛn, dɛn brɔda dɛn ya bin gɛt maynd ɛn dɛn wok tranga wan bikɔs dɛn biliv se di oli spirit go ɛp dɛn fɔ prich to ɔlkayn pipul dɛn. Wisɛf biliv se di oli spirit go ɛp wi tide.

8-9. Us difrɛn we dɛn Jiova in ɔganayzeshɔn dɔn yuz fɔ prich di gud nyuz?

⁸ Jiova in ɔganayzeshɔn dɔn yuz di bɛst tul dɛn we de fɔ prich di gud nyuz. Sɔm pan dɛn tul dɛn ya na buk ɛn magazin dɛn we dɛn print, “Photo-Drama of Creation,” fonograf dɛn, motoka dɛn we gɛt pawaful sawnd sistɛm, redio program dɛn, ɛn dis biɛn tɛm, kɔmpyuta, ɛn Intanɛt. Gɔd in ɔganayzeshɔn de translet tin dɛn insay bɔku langwej pas aw i dɔn ɛva bi na di wɔl! Wetin mek dɛn de du dat? Na fɔ mek ɔlkayn pipul dɛn yɛri di gud nyuz insay dɛn yon langwej. Jiova nɔ de tek wan pɔsin bɛtɛ pas ɔda pɔsin. I bin dɔn tɔk se dɛn go prich di gud nyuz to “ɔl di neshɔn  dɛn, pipul dɛn, trayb dɛn, ɛn pipul dɛn we de tɔk difrɛn difrɛn langwej dɛn.” (Rɛv. 14:​6, 7) I want mek ɔlman yɛri di Kiŋdɔm mɛsej.

⁹ Bɔt aw wi go ebul fɔ prich to pipul dɛn we at fɔ si bikɔs dɛn de na say dɛn we gɛt tayt sikyɔriti? Fɔ mek wi go ebul fɔ prich to dɛn kayn pipul dɛn de, Jiova ɛp in ɔganayzeshɔn fɔ bigin yuz difrɛn we dɛn fɔ du pɔblik prichin. Fɔ ɛgzampul, insay 2001, di Gɔvnin Bɔdi bin gri fɔ mek di brɔda dɛn na Frans bigin yuz kat ɛn ɔda tin dɛn fɔ put wi buk ɛn magazin dɛn fɔ prich. Leta, brɔda ɛn sista dɛn we de na ɔda ples dɛn bin bigin fɔ prich dis kayn we, ɛn gud tin dɛn bin apin. Insay 2011, dɛn bin stat wan nyu program na say we pipul dɛn rili bizi na Amɛrika. Insay di fɔs ia, dɛn bin gi 102,129 buk dɛn ɛn 68,911 magazin dɛn. Ɛn 4,701 pipul dɛn bin aks fɔ Baybul stɔdi! Dis sho klia wan se di oli spirit bin de sɔpɔt dis wok. So di Gɔvnin Bɔdi bin gri fɔ mek brɔda ɛn sista dɛn we de difrɛn say dɛn na di wɔl bigin fɔ yuz kat ɛn ɔda tin dɛn fɔ prich.

10. Wetin yu go du fɔ mek yu du mɔ we yu de prich ɛn tich?

¹⁰ Wetin yu go du? Yuz di trenin we Jiova de gi wi na mitin. Go de prich wit yu fil savis grup. We yu du dat, di brɔda ɛn sista dɛn na yu grup go ɛp yu fɔ du mɔ we yu de prich ɛn tich, ɛn dɛn gud ɛgzampul sɛf go ɛnkɔrej yu. Kɔntinyu fɔ prich ilɛk tin nɔ izi. Di tim skripchɔ fɔ dis atikul de mek wi mɛmba se nɔto bay wisɛf wi de ebul fɔ du wetin Gɔd want, bɔt wi de ebul fɔ du am bikɔs in oli spirit de ɛp wi. (Zɛk. 4:​6) Wi shɔ se Gɔd go gi wi di trɛnk we wi nid bikɔs na in wok wi de du.

11. Aw di gɔvnin bɔdi we bin de trade bin wok togɛda fɔ mek Gɔd in pipul dɛn kɔntinyu fɔ ɔganayz ɛn gɛt pis?

¹¹ Insay di fɔstɛm Kristian dɛn tɛm. Di gɔvnin bɔdi we bin de na Jerusɛlɛm bin de wok togɛda fɔ mek Gɔd in pipul dɛn  kɔntinyu fɔ ɔganayz ɛn gɛt pis. (Akt 2:​42) Fɔ ɛgzampul, arawnd di ia 49 afta Krays, bɔku Kristian dɛn bin de tink difrɛn we bɔt fɔ sakɔmsayz ɔ nɔ fɔ sakɔmsayz, bɔt di oli spirit bin ɛp di gɔvnin bɔdi fɔ ɛp di brɔda dɛn. If di kɔngrigeshɔn fɔ bin dɔn skata bikɔs ɔf dis, di prichin wok nɔ fɔ dɔn go bifo. Pan ɔl we di apɔsul ɛn ɛlda dɛn na bin Ju dɛn, dɛn nɔ bin alaw dɛn tradishɔn ɔ di pipul dɛn we bin de fala dɛn tradishɔn dɛn de fɔ afɛkt wetin dɛn go disayd fɔ du. Bifo dat, dɛn bin luk to Gɔd in Wɔd ɛn alaw in oli spirit fɔ gayd dɛn. (Akt 15:​1, 2, 5-20, 28) Wetin bin apin we dɛn du dat? Jiova bin blɛs wetin dɛn disayd fɔ du, pis ɛn wanwɔd bin de, ɛn di prichin wok bin go bifo.—Akt 15:​30, 31; 16:​4, 5.

12. Wetin sho se Jiova in ɔganayzeshɔn we de tide ɔganayz ɛn gɛt pis?

¹² Insay wi yon tɛm. Jiova in ɔganayze- shɔn dɔn ɛp in pipul dɛn fɔ kɔntinyu fɔ ɔganayz ɛn gɛt pis. Insay 1895, Zion’s Watch Tower and Herald of Christ’s Presence fɔ Novɛmba 15 bin gɛt wan atikul we gɛt di taytul “Decently and in Order,” we kɔmɔt frɔm 1 Kɔrintians 14:​40. Dɛn bin rayt na di atikul se: “Di apɔsul dɛn bin rayt bɔku tin dɛn to di kɔngrigeshɔn dɛn we bin de trade bɔt aw fɔ ɔganayz . . . I impɔtant fɔ lɛ wi kɔntinyu fɔ fala ‘di tin dɛn we dɛn bin dɔn rayt trade fɔ tich wi.’” (Rom. 15:​4) Tide bak, Jiova in ɔganayzeshɔn de tray tranga wan fɔ mek wi ɔganayz ɛn gɛt pis lɛk di fɔstɛm Kristian dɛn. Fɔ ɛgzampul, if yu atɛnd Wachtawa Stɔdi na ɔda kɔngrigeshɔn, ɔ na ɔda kɔntri, yu go no aw dɛn de kɔndɔkt di stɔdi ɛn us atikul dɛn go du. I nɔ go at fɔ mek yu fil lɛk na yu kɔngrigeshɔn yu de. Na Gɔd in spirit nɔmɔ go mek i pɔsibul fɔ mek wi gɛt dis kayn wanwɔd.—Zɛf. 3:​9.

13. Us kwɛstyɔn dɛn we Jems 3:​17 go mek wi tink bɔt?

¹³ Wetin yu go du? Jiova want fɔ mek in pipul dɛn mek “di wanwɔd we di spirit dɔn mek [dɛn] gɛt kɔntinyu bay we [dɛn] gɛt pis wit [dɛn] kɔmpin dɛn.” (Ɛfi. 4:​1-3) So aks yusɛf: ‘A de du tin we  go ɛp fɔ mek pis de na di kɔngrigeshɔn? A de obe di wan dɛn we de bifo? Ɔda pipul dɛn go abop pan mi, mɔ if a gɛt wok na di kɔngrigeshɔn? Mi na pɔsin we kin kam kwik ɔltɛm, a lɛk fɔ ɛp, ɛn a rɛdi fɔ du tin fɔ ɔda pipul dɛn?’ (Rid Jems 3:​17.) If yu si se yu nid fɔ mek ajɔstmɛnt, na fɔ pre fɔ oli spirit. Di mɔ we yu de alaw di oli spirit fɔ mek yu gɛt fayn kwaliti dɛn ɛn mek yu du gud tin dɛn, na di mɔ yu brɔda ɛn sista dɛn go lɛk ɛn valyu yu.

14. Akɔdin to Koloshians 1:​9, 10, aw Jiova bin de tich in pipul dɛn insay di fɔstɛm Kristian dɛn tɛm?

¹⁴ Insay di fɔstɛm Kristian dɛn tɛm. Jiova lɛk fɔ tich in pipul dɛn. (Sam 32:​8) I want mek dɛn sabi am, mek dɛn lɛk am, ɛn mek dɛn gɛt layf we go de sote go as in pikin dɛn we i lɛk. Ɔl dis nɔ go pɔsibul if i nɔ tich wi. (Jɔn 17:​3) Jiova bin yuz di fɔstɛm Kristian kɔngrigeshɔn fɔ tich in pipul dɛn. (Rid Koloshians 1:​9, 10.) Oli spirit bak bin “ɛp” di disaypul dɛn. (Jɔn 14:​16) I ɛp dɛn fɔ ɔndastand Gɔd in Wɔd ɛn mek dɛn mɛmba ɔl di tin dɛn we Jizɔs bin tɔk ɛn du, ɛn we dɛn rid bɔt na di Gɔspɛl dɛn leta. Dɛn tin dɛn ya we di fɔstɛm Kristian dɛn bin lan bɔt bin mek dɛn gɛt strɔng fet, dɛn lɛk Gɔd, in Pikin, ɛn dɛn kɔmpin dɛn mɔ ɛn mɔ.

15. Us we dɛn we yu dɔn si we Jiova de du wetin i bin dɔn prɔmis na Ayzaya 2:​2, 3?

¹⁵ Insay wi yon tɛm. Jiova bin dɔn tɔk se we di wɔl want fɔ dɔn “di tɛm go kam” we pipul dɛn we kɔmɔt ɔlsay na di wɔl go kam na in mawntin usay i go tich dɛn bɔt wetin i want. (Rid Ayzaya 2:​2, 3.) Wi de si dat de apin naw. Wi de si se tru wɔship bɛtɛ fa fawe pas ɛnikayn lay lay wɔship. Ɛn Jiova de mek in pipul dɛn lan bɔku bɔku tin dɛn bɔt di Baybul. (Ayz. 25:​6) I de yuz “di slev we fetful ɛn gɛt sɛns” fɔ  mek wi lan ɔl dɛn fayn fayn tin dɛn ya. Fɔ ɛgzampul, wi kin rid atikul dɛn, lisin to tɔk dɛn, ɛn wach katun fim dɛn. (Mat. 24:​45) Wi kin fil lɛk Job in padi Ilayu we bin se: “Nɔbɔdi nɔ de we sabi tich pɔsin . . . lɛk [Gɔd].”—Job 36:​22.

16. Wetin yu go du fɔ mek yu bɛnifit frɔm wetin Jiova de tich wi?

¹⁶ Wetin yu go du? Gɔd in spirit go ɛp yu fɔ aplay wetin yu de rid ɛn stɔdi insay in Wɔd. Pre lɛk wan pan di man dɛn we rayt di sam buk we bin se: “PAPA GƆD [“Jiova,” NWT] tich mi wetin yu want mi fɔ du, ɛn a go du am wit ɔl mi at; mek a sav yu wit ɔl mi at, so a go de prez yu nem.” (Sam 86:​11) Dɔn bak, na fɔ kɔntinyu fɔ rid ɛn stɔdi di Baybul, di buk, magazin, ɛn ɔda tin dɛn we Jiova in ɔganayzeshɔn de gi wi. Bɔt nɔ jɔs lan ɔl dɛn tin ya fɔ lan sek. Na fɔ lan dɛn bikɔs yu want fɔ biliv gud gud wan se wetin yu de lan na di tru ɛn yu want fɔ du wetin yu de lan. Jiova in spirit go ɛp yu fɔ du dat. Dɔn bak, na fɔ ɛnkɔrej yu brɔda ɛn sista dɛn. (Ibru. 10:​24, 25) Wetin mek? Bikɔs dɛn na yu famili. Pre mek Gɔd in spirit ɛp yu fɔ gi kɔmɛnt frɔm yu at ɛn fɔ du yu bɛst we yu gɛt pat na mitin. We yu du dɛn tin dɛn ya, yu de sho Jiova ɛn in Pikin se yu lɛk dɛn “ship dɛn” we dɛn valyu.—Jɔn 21:​15-17.

17. Aw yu go sho se yu de sɔpɔt Jiova in ɔganayzeshɔn fetful wan?

¹⁷ I nɔ go te igen, di wangren ɔganayzeshɔn we go lɛf na di wɔl na di wan we Gɔd in spirit de kɔntrol. So kɔntinyu fɔ wok wit Jiova in ɔganayzeshɔn. Sho se yu lɛk pipul dɛn lɛk aw Gɔd lɛk dɛn bay we yu de prich di gud nyuz to ɔlman. Falamakata Jiova fɔ bi pɔsin we ɔganayz ɛn we lɛk pis bay we yu de ɛp fɔ mek pis de na di kɔngrigeshɔn. Ɛn lisin to Jiova we na di Bɛst Ticha bay we yu de lan frɔm ɔl wetin i de tich wi. Dɔn as tɛm de kam fɔ mek Setan in wɔl dɔn, yu nɔ go fred. Bifo dat, yu go gɛt maynd fɔ tinap wit fetful pipul dɛn we de wok wit Jiova in ɔganayzeshɔn.