1. Yɛɛ Kilisiɔŋaa sɔla yiŋɔɔ wa nɔ yɛ ma hiou lachi a tosaa?

BAA a sɔla niŋ pa yiŋɔɔ? Te lende i cho ni, mɛɛ ŋ sɔla yiŋɔɔ, ma chɔm waŋnda o hɔl kpendekele maa a nɔ tiindaŋndo o Chɛhowa niŋ nduyɛ maa a yeema ma piɛi ndu o kɔɔna * ndɔɔ niŋ. Kɛ o wa bɛɛ lende, a nɔ ma hiou lachi a tiindaŋ kalaa nɔɔ o Chɛhowa niŋ. Nduyɛ, ma hiou vɛlɛ lachi a laalaŋndo kɛsɛ maa Chɛhowa cho hau kɔɔna ndɔɔ nɛiyo chɔmndo ni.

2-3. Chɔmndɔ taamaseliiyo le sinaa mɛɛ naŋ cha suliŋnda Chɛhowalaŋ o kɔɔna ndɔɔ niŋ yɛ.

² Hau, mɛɛ Chɛhowa cho kɔɔna ndɔɔ nɛiyo chɔmndo yɛ mala naa le sinaa wana suu o cho wo, sɔɔŋ o tuu le tosaa woŋ, a sawala ndɔlaŋ. Ŋ chuaŋnuŋ ndɔ suliŋnda Chɛhowalaŋ la yaa miŋ yaasiaa mɛɛ naŋ cho laŋ hau chɔɔ o kɔɔna ndɔɔ niŋ yɛ.

³ O tasoo, “Mɛlɛka hɛli ŋwaŋnda chiee le.” (Walta. 10:​34) Kaalaa nyindu Chɛhowa ni mbo yɔŋ Po ndɔɔ le mbo huŋ “baŋa ŋwaŋnda chiee kpou.” (1 Timo. 2:​6; Chɔŋ 3:​16) Chɛhowa cho hau wanaa nduaa soliŋndo kpeku le waŋnda kpou yooŋgu kɛndɔɔ dimullo. O cho wallo hoo soliŋndo kpeku le wanaa bɔɔbɔɔ nɔ yeemɛiya malaa le ma huŋ sɔla tɔnɔɔ o sala soliaŋ Chiisoo niŋ. O diiŋ ndɔɔ, Mɛlɛka kɔl nyuloo Chɛhowa cho ni. Nduyɛ, o tosa sɔɔŋ laasi laasi le. (1 Kɔliŋ. 14:​33, 40) Lelaŋ, wanaa cho ndu piɛiyo wa nɔ ma wa a kɔɔnaa, nduyɛ mi kɔl nyuloo wa nda tɛɛŋ. O yaa ndɔɔ, Chɛhowa cho ‘wana naa pɛɛkaa bɛndoo’ ni. (Aisaya 30:​20, 21) Le hei, wali kɔɔna ndɔɔ kɛsi kɔllo choo kpeekpeiyo cho waŋnda Baabuiyo pɛɛkoo ni. Miŋ sɔla pɛɛkoo o bɔŋaŋndaŋ, nduyɛ ŋ nɔ nyɔɔŋ tau le waŋnda pɛɛkoo o wali pollo niŋ. Vɛɛ Kilisiɔŋnda o wɔsiŋ kɛmɛ tasoŋ niŋ tollɛ suliŋnda yaala Chɛhowalaŋ ndaŋ kɔɔli? Vɛɛ naŋ cho  yɛ laŋ hau chɔɔ o kɔɔna Chɛhowaa niŋ? Nduyɛ te a wa pɛ o kɔɔna Chɛhowaa niŋ, vɛɛ nyina diandaa mala yɛ num ma hiou lachi a ndu piɛiyo?

4. A mɛɛ Walta Wanaa Chiisuaa 1:​8 dimi yɛ, wali yɛɛ Chiisu ndoo ke yɛ buɛiyaa nduaa, nduyɛ mala kuɛɛ ndoo dimi yɛ maa o cho nda ke?

⁴ O wɔsiŋ kɛmɛ tasoŋ niŋ. Mi yooŋgu Chiisu wa keiyo dimioo wo ke waŋchieeya kpou tiindaŋndo. (Luku 4:​43) Mbo dimul buɛiyaa nduaa le ma hiou lachi a wali o kandu hoo wo tosaa “ba o ba fee o chieeŋndo choo.” (Nuawɔ Walta Wanaa Chiisuaa 1:​8.) Kɛ o kpeekpei niŋ, ndaa tiuba ma tosa wallo hoo a ba nda le. Mɛɛ mi nyina diandaa Mɛlɛkaa ndoo mala nda malaŋ ndaa tiu ndu ba. Nyina diandaa hoo cho “wana malaa” Chiisu ndoo dimi maa o cho nda yɔŋ ndo ni.—Chɔŋ 14:​26; Sɛka. 4:​6.

5-6. O nɛila kuɛɛ niŋ nyina diandaa mala yɛ buɛiyaa Chiisuaa?

⁵ O faŋaŋ Chiisu wo kɔɔli, mi buɛiyaa nduaa sɔla nyina diandaa Mɛlɛkaa o paale Pɛŋtikɔɔsileŋ choo wɔsi 33 ve. Mɛɛ nda sɔla ndu dɔɔ, ma kandu bɛɛ yooŋgu kɛndɔɔ dimioo paaleleŋ. Nduyɛ nyɔɔ viu bɛɛ le, mi waŋnda sɔla yiŋɔɔ o waalaŋ niŋ. (Walta. 2:​41; 4:​4) Mi hei tosa mi waŋnda kandu buɛiyaa Chiisuaa nyɛpalaa tusioo choo. Siooŋii bii nda ma mal wali nda kandu tosaa wo le. Kɛ, ma muliŋ o Mɛlɛka lo le malaa. Ma piɛi aa: “Lelaŋ Masanɔɔ Mɛlɛka, . . . tosa mi buɛiyaa numnda dimi suɛi numnde kpendekele siooŋii bɛɛ i ve nda le.” Mi Mɛlɛka muli piɛile ndaleŋ okoŋ, mi nyina diandaa tosa “ma kandu suɛi Mɛlɛkɛi dimioo kpendekele, siooŋii ve nda le.”—Walta. 4:​18-20, 29, 31.

⁶ Buɛiyaa Chiisuaa ndaa nɔ vɛlɛ simulta cheleŋ. Le taamaseliiyo, yaula Baabuiyo la ve la bɔɔ o teleŋ koŋ niŋ te. Nduyɛ, yaula cheleŋ la ve vɛlɛ le nda malaa ma bii Baabuiyo bila mɛɛ naŋ nɔ laŋ hau yɛ le. Wanaa ndaa dimi sɔɔŋ maŋgalaŋ yɛ yiɔɔŋ nda wa tau o teleŋ koŋ niŋ. Nduyɛ, buɛiyaa Chiisuaa ndaa nɔ ma dimul nda kpou yooŋgu kɛndɔɔ. A simulta ndaa nɔ laŋ ndaŋ kpou, ma duau sɛmbɔɔ tau le wali dimiaa yooŋgu kɛndɔɔ tosaa. Mɛɛ suɛi wɔsila 30 hiou, Baabuiyo dimi maa ndaa dimi niŋ “yooŋgu kɛndɔɔ o ŋwaŋnda chiee lo kpou o chieeŋndo niŋ.”—Kolo. 1:​6, 23.

7. A wɔsi 1881, wali yɛɛ buɛiyaa Chɛhowaa ndaa sina yɛ maa a nɔ ma tosa, nduyɛ yɛɛ ndaa tosa yɛ?

⁷ O teleŋ naa hoo niŋ. Chɛhowa cho hiouwɔɔ lachi a wanaa nduaa nɛi chɔmaa kioo. Nduyɛ, ndu cho vɛlɛ nda yoomuaŋ lueiyo ni le wali ndɔɔ tosaa. Baabuiyo o cho hau soliŋndo kpeku tau ni le naa nɛiyo chɔmndo. Nyina ndɔ diandaa tosa ni ma poonyiaa yau sɔviɔɔ hoo. O yauwo hoo niŋ, ŋ nɔla miŋ saaluŋ konalaŋ a wali Chiisu wo okɔɔ vɛlɛ, a naa o dimul buɛiyaa nduaa le ma hiou lachi a wali o kandu wo tosaa wa. (Maa. 28:​19, 20) Nyɔɔ bandu niŋ chɔŋ a teleŋ Bandu Mɛŋgɛlaa kandu suɛi a wali dimiaa yooŋgu kɛndɔɔ okɔɔ wo. A Suɛɛsɔɔ wɔsi 1881, mbo dimi aa: “Chɛhowa veelu naa o kɔɔna ndɔɔ niŋ le tɔɔ sɔlaa ɔɔ le nyɛm kiɔɔŋ nuuviaa le. Kɛ le miŋ soliŋ nyɛm naŋ nɔ woŋ kpou kpeku le yooŋgu kɛndɔɔ dimioo.” Mi yau pɔmbɔ pilɛ nda soli a wɔsi 1919 bɛɛ dimi aa: “Wali Masanɔɔ ke naa hoo wo o cho tau le tosaa. Kɛ o kpaaya ndɔɔ niŋ, ŋ tiuba miŋ tosa ndu.” Maa Kilisiɔŋnda o wɔsiŋ kɛmɛ tasoŋ niŋ, mi puaapiliaa haa chɔm kɔl simulaa ma tosa wallo kalaŋ. Kanifuule, ndaa nɔ tiindaŋndo maa nyina diandaa Mɛlɛkaa cho nda mala ma dimul waŋnda suu o suu yooŋgu kɛndɔɔ. Tiindaŋ waa lende naa bɛɛ nɔ hau ni.

8-9. Nɛila kuɛɛ kɔɔna Chɛhowaa soliŋ yɛ niŋ kpeku le wali dimiaa yooŋgu kɛndɔɔ hivioo lachi?

⁸ Kɔɔna Chɛhowaa cho kɔlaŋ a nyɛm mapuuluŋ sɔvɛ cho fulaa woŋ soliŋndo kpeku le yooŋgu kɛndɔɔ pɛŋgɛlaa. Nyɔɔŋ muŋ ŋpum cho muŋ ni. Yaulaŋ, “Photo-Drama of Creation,” ŋgalamafueiyo, mɔmbil ndaa yonda wo, a suɛi o alaadioo choo. Nduyɛ o palɛi nɛi hei niŋ, ŋ cho vɛlɛ kɔmpitɛilaŋ a intanɛtiiyo soliŋndo kpeku. Kɔɔna Chɛhowaa cho vɛlɛ hau yaulaŋ hivioo o sɔɔŋ maŋgalaŋ niŋ mbo hiau maa paandu. Le yɛɛ? Le waŋnda suu o suu malaa ma tuei yooŋgu kɛndɔɔ o sɔɔŋ ndaŋ maŋgalaŋ niŋ. Chɛhowa hɛli ŋwaŋnda chiee le. Sindɛ niŋ pa o dimi ni maa yooŋgu kɛndɔɔ hoo nɔ mbo komal “waŋnda lelɛŋ o lelɛŋ,  a lekaa o lekaa, a isɔɔ o isɔɔ maŋgalaa, a waŋnda suu o suu.” (Sɔɔŋ. 14:​6, 7) Lelaŋ, o yeema mi wana o wana tuei yooŋgu kɛndɔɔ a Masale Mɛlɛkaleŋ okɔɔ.

⁹ Kɛ mbo wa lepum ikala le waŋnda apum komallo a yooŋgu kɛndɔɔ. Le taamaseliiyo, o chiɛɛlaŋ lapum, ma kɛsi wanaa mɛŋgɛlaa o dio. Nduyɛ, a chɛl ko mi wana luɛi le. Vɛɛ yooŋgu kɛndɔɔ cho yɛ niko waŋnda haa komal? Kɔɔna Chɛhowaa nuuviaa niŋ nɛilaŋ le yooŋgu kɛndɔɔ dimioo o luŋ kpendekele le halikpeŋ mi nda bɛɛ tuei. Le taamaseliiyo, a wɔsi 2001, mi Dialii Kuumbaŋ Choo Ve chɛl le mi puaapiliaa a ndepiliaa cho Filaŋsi wa kandu pɛŋgɛi mapuuluei a nyɛm cheleŋ soliŋndo kpeku le yaula naalaŋ chɔmndo o luŋ. Mɛɛ nyɔɔ viou tiŋ, mi puaapiliaa naa o fondaŋnda cheleŋ bɛɛ kandu yooŋgu kɛndɔɔ dimioo o nɛiyo hoo choo. Mi fulamakɔɔli kɛndɔɔ sɔlaŋ tau. A wɔsi 2011, mi nɛi cheleŋ sɔlaŋ Amɛlika le yooŋgu kɛndɔɔ dimioo o luŋ kpendekele. Ma hɛli fondaŋnda waŋnda hiau tau laŋ o chiee bɛndoo Niu Yɔk niŋ le yooŋgu kɛndɔɔ dimioo a pɛŋgɔŋ. O wɔsi nda kandu wo niŋ, ma yɔŋgu bukuiilaŋ 102,129. Nduyɛ ma yɔŋgu vɛlɛ yau Bandu Mɛŋgɛlaa a “Tiondoo!” 68,911. Waŋnda 4,701 yɔŋguŋ le Baabuiyo pɛɛkoo ni. Hei chɔm kpendekele maa nyina Mɛlɛkaa wa wallo hoo kɔɔli. Mɛɛ Dialii Kuumbaŋ Choo Ve che lende, ma chɛl niko le mi puaapiliaa a ndepiliaa soliŋ pɛŋgɔŋ mapuuloŋ kpeku chieeŋndo balɔɔ silɔ le yooŋgu kɛndɔɔ dimioo.

10. Yɛɛ naŋ nɔ yɛ miŋ tosa le hiouwɔɔ lachioo tosaa o wali pollo niŋ?

¹⁰ Nyɛ num bɛɛ nɔ ma tosa wo. O bɔŋaŋnda naalaŋ, mi Chɛhowa pɛɛku naa le yooŋgu kɛndɔɔ dimioo. Dɔu nyɛ o cho naa pɛɛkoo wo o wali niŋ te a kuɛ pɛ o wali pollo niŋ. Wa fulaa lɔɔlɔɔ a kunda ŋ dimi yooŋgu kɛndɔɔ wo. Te a tosa lende pɛ, puaapiliaa a ndepiliaa cho num mala ma tosa hiouwɔɔ lachioo nduyɛ mi taamasi nda kɛndɔɔ dɛɛniaa num vɛlɛ tau. Hiou lachi a yooŋgu kɛndɔɔ dimioo o yɔŋ bɛɛ mi simultaŋ la wa. A mɛɛ bolle Baabuile buŋgɛi hei tɔlnuŋ chooleŋ le dimi yɛ, o cho o kpaaya naa niŋ te naŋ nɔla miŋ tosa hɛnaŋ Mɛlɛkaa le. Kɛ nyina Mɛlɛkaa mala naa ni le ndu tosaa. (Sɛka. 4:​6) Ŋ nɔ tiindaŋndo maa Mɛlɛka cho naa nyina ndɔ diandaa ke kanifuule, wali ndɔɔ naŋ cho tosaa ni.

11. O wɔsiŋ kɛmɛ tasoŋ niŋ, vɛɛ dialii kuumbaŋ choo ve ndii mala yɛ wanaa Mɛlɛkaa le ma lo o diom pilɔɔ niŋ?

¹¹ O wɔsiŋ kɛmɛ tasoŋ niŋ. Chulusɛlɛm dialii kuumbaŋ choo ve wa o teleŋ koŋ niŋ ni. Mi puaapiliaa wa chilaŋ chuaa wa tosa wallo diompilɛ, le  mi wanaa Chɛhowaa wa a kɔɔnaa, nduyɛ mi kɔl nyuloo wa nda tɛɛŋ. (Walta. 2:​42) Le taamaseliiyo, o faŋaŋ Chiisu wo kɔɔli, mi suɛi hivi chiɛi kɔɔlioo huŋ a sɛɛŋgiaŋndo puaapiliaa tɛɛŋ o wɔsi 49 niŋ. Mɛɛ hei yɔŋnuŋ, mi dialii kuumbaŋ choo ve tual nɛi chɔmaa nyina diandaa Mɛlɛkaa kɔɔli le bahawɛiyo hoo solioo. Te bahawɛi koŋ ndoo fula le, kɔl nyulu ve wa o kundaa niŋ te. Nduyɛ, hei wa paaliaŋ wali dimiaa yooŋgu kɛndɔɔ. Wanaa Chiisu vem hɔlte ndɔ wa a laŋgbaa kalaa wa o dialii kuumbaŋ choo ve choo wa kpou Chuuwa nda wa ni. Kɛ a tul naamu nda maChuuwo kɔɔli ma kɛɛ le tonyaa dimioo o suɛi hei niŋ te. Nduyɛ a sim vɛlɛ chaaŋaa ndaa Chuuwa kɔɔli le. Ma tiindaŋ Diom Mɛlɛkaa a nyina ndɔ diandaa le nɛi chɔmaa. (Walta. 15:​1, 2, 5-20, 28) Yɛɛ wa yɛ fulamakɔɔlioo? Mi Chɛhowa duau kɛɛsiaa nda tosa wo sala. Mi kɔl nyuloo miiŋgu o kundaa niŋ nduyɛ ma hiau lachi a waa o diompilɔɔ niŋ. Okoŋ, mi wali dimiaa yooŋgu kɛndɔɔ bɛɛ kua a pɛŋgɛlaŋndo.—Walta. 15:​30, 31; 16:​4, 5.

12. Yɛɛ chɔm yɛ maa sɔɔŋ cho hau kɔlaŋ kpɛ kpɛ o kɔɔna Chɛhowaa niŋ, nduyɛ mi kɔl nyuloo wa?

¹² O teleŋ naa hoo niŋ. Kɔɔna Chɛhowaa cho wallo kalaŋ le mi sɔɔŋ kuɛ kpɛ kpɛ nduyɛ mi kɔl nyuloo wa wanaa Mɛlɛkaa tɛɛŋ. A wɔsi 1895, Bandu Mɛŋgɛlaa le Bɛŋgufɔnɔɔ 15, ndoo nɔ buŋgɛi a suɛi lebolle aa, “La Tosa Nyɛ o Nyɛ o Nɛi Bɛnda Wo Choo Nyɛkɛndɛ Sanaa.” O Kɔliŋtiaŋ Tasoo 14:​40 choo buŋgɛi hei ndii tɔlnuŋ ni. Mii dimi aa: “Mi wanaa Chiisu vem hɔlte ndɔ wa sila Kilisiɔŋaa tasiaa tau maa a nɔ ma wa sɔɔŋ tosaa laasi laasi le. Sila nda yɔŋgu koŋ sindɛ wo cho wɔ hau ‘le naa.’ Lelaŋ naa bɛɛ nɔ miŋ dɔu ndu o wali niŋ.” (Luomaŋ. 15:​4) Mɛɛ sɔɔŋ wa o wɔsiŋ kɛmɛ tasoŋ niŋ yɛ koni ŋ cho hau ni. Kɔɔna Chɛhowaa cho hau wallo tosaa kalaŋ le mi kunda leKilisiɔŋndo wa o kɔɔnaa nduyɛ mi kɔl nyuloo wa. Le taamaseliiyo, te a wa pɛ kɔlaŋ le pɛɛku Bandu Mɛŋgɛlaa o kunda cheleŋ niŋ, mi wana dimul num bɛɛ le, ma sina buŋgɛi nya cho lakɔ pɛɛku ve vɛlɛ a mɛɛ nya cho ndi pɛɛku yɛ. Lelaŋ te a fuuluu dɔɔ pɛ, a yɔŋnuŋ bɛɛ fɛɛsɛŋ. Nyina Mɛlɛkaa kinɛi tosa ni mi diompilɛ waa naa wa wanaa Mɛlɛkaa tɛɛŋ.—Sɛfa. 3:​9.

13. Te ŋ yiyaŋ pɛ a nyɛ Chemisi 3:​17 dimi wo, nyunala kuɛɛ naŋ nɔ yɛ miŋ nyunaŋ?

¹³ Nyɛ num bɛɛ nɔ ma tosa wo. Chɛhowa yeema mi wanaa nduaa ‘hiou lachi a diompilɔɔ nɔɔ sanaa a kɔl nyulu mɔɔsa nda naapilɛ wo.’ (Ɛfi. 4:​1-3) Lelaŋ nyunaŋ ndɔ aa: ‘O kunda nuu niŋ, I cho pa tosaa sɔɔŋ huŋ a kɔl nyuloo a diompilɔɔ woŋ? I cho pa diikɔŋndo wanaa cho chilaŋ chuaa  wa? Te a ke ya pɛ kalaŋndaŋ o kundaa niŋ, waŋnda nɔla pa ma tiindaŋ ya? Baa I ke pa teleŋndo bɛɛleŋ? Baa mi mala pa waŋnda? Mi yɔŋguŋ pa le waltaŋ tosaa o kundaa niŋ?’ (Nuawɔ Chemisi 3:​17.) Te a nyuuniaŋ pɛ naa ma che naa ŋ nɔ le hiouwɔɔ lachioo tosaa wa, piɛi le mi nyina diandaa Mɛlɛkaa mala num ma tosa ndu. Te a chɛl pɛ le mi nyina Mɛlɛkaa chɔu num, a cho simnɔŋ mɔɔsɔlɔɔ. Keŋ tosa mi puaapiliaa a ndepiliaa numnda kaala num nduyɛ ma che num wana sɔvɛ.

14. A mɛɛ Kolosiaŋnda 1:​9, 10, dimi yɛ, vɛɛ Chɛhowa ndoo pɛɛku yɛ wanaa nduaa o wɔsiŋ kɛmɛ tasoŋ niŋ?

¹⁴ O wɔsiŋ kɛmɛ tasoŋ niŋ. Chɛhowa kaala bɔɔ wanaa nduaa pɛɛkoo. (Sam 32:​8) Chuauwaa nduaa kaalaa nda cho ni. Le hei, o yeema nda ma sina ndu, ma kaala ndu nduyɛ ma huŋ wa achal lefafɛɛŋ. Te ndoo ve wanaa nduaa pɛɛkoo le, sɔɔŋ muŋ kpou ve yɔŋnɔŋ te. (Chɔŋ 17:​3) O wɔsiŋ kɛmɛ tasoŋ niŋ, mi Chɛhowa soliŋ kunda leKilisiɔŋ tasoo kpeku le wanaa nduaa pɛɛkoo. (Nuawɔ Kolosiaŋnda 1:​9, 10.) Mi nyina diandaa ɔɔ “wana malaa” Chiisu dimi le yɔŋndo wo mala buɛiyaa nduaa tau. (Chɔŋ 14:​16) Mbo mala nda ma chɔɔlu Diom Mɛlɛkaa biyɔɔ bila. Mbo tosa vɛlɛ ma loonuŋ sɔɔŋ Chiisu tosa nduyɛ mbo pɛɛku waŋnda woŋ. Okoŋ ma poonyiaa muŋ o Baabuiyo niŋ. Kɔl kalu Kilisiɔŋaa tasiaa ndaa nɔ hoo a Diom Mɛlɛkaa okɔɔ wo mala nda ni mi tiindaŋ ndaa kiandu poŋ. Mbo tosa ma kaala Mɛlɛka nda Po ndɔɔ, nduyɛ ma kaaliaŋ vellaa velle.

15. Vɛɛ num cho yɛ hau chɔɔ nyɛ Chɛhowa dimi o Aisaya 2:​2, 3 niŋndo o peelɔŋndo?

¹⁵ O teleŋ naa hoo niŋ. Mi Chɛhowa dimi maa te “palɛi mɛɛlɛi le chieeŋndo hoo i fuuluu pɛ,” waŋnda cho fula lelɛŋ o lelɛŋ ma hiŋ o pembii nduɛi le mbo pɛɛku nda. Pembii keŋ cho piɛile tonyaleŋ ni. (Nuawɔ Aisaya 2:​2, 3.) Ŋ cho hau chɔɔ nyɛ dimiŋ hoo wo kɔlaŋ a peelɔŋndo. Piɛile tonyaleŋ le choŋnuŋ teŋgeŋ a piɛiyii lachoowɛi. Chɛhowa cho hau wanaa nduaa nyɛm yeelɛiyoŋ kioo tau le pɛɛkoo a ndu okɔɔ. (Aisaya 25:​6) O cho “buɛi cho sakpo mbo wa buɛi kɔl kalu wo” soliŋndo  kpeku le naa nyɔɔŋ muŋ kioo ŋ hɔbɛi a suulaŋ yɛ yɛ. Ŋ nɔ yaulaŋ, sɔɔŋ nda handu o tɛɛŋgei choo woŋ, a vidueila yɛ yɛ laŋ. (Maa. 24:​45) Te ŋ yiyaŋ pɛ a pɛɛku Chɛhowa cho naa hau kioo wo okɔɔ, miŋ chɛl kɛsɛ maa nyɛ Ɛlihu, chaaŋ o Choobu dimi wo cho tonya. Mbo dimi aa: “Wana o wana cho mbo pɛɛku wana maa [Mɛlɛka] le.”—Choobu 36:​22.

16. Yɛɛ ŋ nɔ yɛ ma tosa le ma sɔla tɔnɔɔ o pɛɛku Chɛhowa cho naa wo niŋ?

¹⁶ Nyɛ num bɛɛ nɔ ma tosa wo. Nyina Mɛlɛkaa cho num mala ma dɔu nyɛ ŋ cho pɛɛkoo o Baabuiyo niŋndo o wali niŋ. Nyuna Mɛlɛka o piɛileŋ niŋ le mbo mala num mɛɛ wana ŋchondu pilɛ piɛi yɛ. Mbo dimi aa: “Mɛlɛka Yaawɛɛ, pɛɛku ya sɔɔŋ num ŋ yeema ya mi tosa woŋ. Koŋ tosa ni mi wa o nɛi num tonyaa choo. Ke ya kɔl ya I sooluu num num pilɛ kpe wo le mi nɔ bɛɛleŋ le diola numndaŋ.” (Sam 86:​11) Lelaŋ, hiou lachi a Baabuiyo pɛɛkoo vɛlɛ a nyɛm kɔɔna Chɛhowaa cho naa kioo woŋ. Kɛ, o cho ko le kɔl kaloo sɔlaa le ŋ nɔ ma chua teleŋndo le nyɔɔŋ muŋ pɛɛkoo le. A nɔ ma pɛɛku muŋ le ma laalaŋ kɛsɛ maa o tonyaa niŋ ŋ cho ni. Nduyɛ ma dɔu nyɛ ŋ cho pɛɛkoo wo o wali niŋ. Nyina diandaa Chɛhowaa cho num mala le hei tosaa. A nɔ vɛlɛ ma wa puaapiliaa a ndepiliaa numnda kɔl dɛɛniaa kioo. (Hibu. 10:​24, 25) Le yɛɛ? Kanifuule, yuŋgu naa nda cho o Mɛlɛka piɛiyo niŋ ni. Piɛi le mi nyina diandaa Mɛlɛkaa mala num ma wa mulila dɛɛniaa nda kɔllo laŋ yɔŋgoo o bɔŋaŋndaŋ. Nduyɛ te a ke num suɛi pɛ, bɛɛndiaŋ nyɛkɛndɛi le ma yɔŋgu ndi mii pilaŋ nda kɔllo. Te a wa pɛ sɔɔŋ muŋ tosaa, mɛɛ a cho chɔm Chɛhowa nda Chiisu maa a kaala “saa” ndaa.—Chɔŋ 21:​15-17.

17. O nɛila kuɛɛ choo ŋ chɔm yɛ maa a cho kɔɔna Chɛhowaa tooloo a kɔllo kpou?

¹⁷ Kɔɔna nyina Mɛlɛkaa cho nɛiyo chɔmndo wo kinɛi cho hunɔɔ wa o chieeŋndo choo ni. Hei cho hunɔɔ suŋ yɔŋnɔŋ. Lelaŋ, wou sɛmbɔɔ le wallo tosaa a kɔɔna Chɛhowaa latulu. Chɔm kaalaa le wana o wana maa Mɛlɛka. A tosa hei te a mal pɛ kaa hɛliaa o wali pollo niŋ. Tol taamasi Chɛhowaa kɔɔli le waa wana kɔl nyulu nduyɛ ma tosa sɔɔŋ kpɛ kpɛ. A tosa hei te a wa pɛ sɔɔŋ huŋ a diompilɔɔ woŋ tosaa o kundaa niŋ. Wa teleŋndo chuaa le nyɛm kɛndɛŋ Wana Num Pɛɛkaa Bɛndoo cho num kioo woŋ pɛɛkoo. O nɛi koŋ choo ŋ chɔm ni maa a yeema ndu mbo pɛɛku num. Okoŋ, te chieeŋ Setana wo huŋ wa pɛ tambei sɔlaa, siooŋii bii num te. Kɛ a cho lasisi yi ma wa o kumbu wanaa cho kɔɔna Chɛhowaa tooloo wa choo.