1. Yinki bakristo yina kuzwá deja bateme zolá kontinye kusala?

NGE me zwá deja bateme? Si ya ke faso yina, ntangu nge kuzwá bateme, nge lakisá na meso ya bantu nyonso ti nge ke na kiminu na Yehova, mpe nge zola kusadila yandi na kati ya organizasion ya yandi. * Ntembe ve, kiminu ya nge na Yehova zolá kontinye kukula. Mpe nge zolá kontinye kuvanda na konfianse ti, organizasion ya Yehova ke na salá kisalu yina Yehova zola ti ya sala bubu yayi.

2-3. Wa’ faso Yehova ke na twadisa organizasion ya yandi bubu yayi? Pesa ba-ekzample.

² Bubu yayi, Yehova ke na twadisá organizasion na faso yina ke na lakisá nani yandi kele, dikanisi ya yandi samu na bantu mpe ntoto, mpe misiku ya yandi. Beto zonzila bifu tatu ya Yehova yina beto lenda tala na organizasion yandi.

³ Ya ntete, “Nzambi ke talá bantu nyonso faso mosi.” (Bis. 10:34) Luzolo natá Yehova na kupesa mwana ya yandi faso “sakrifise samu na bantu nyonso.” (1 Tim. 2:6; Yoa. 3:16) Yehova ke na sadilá bisadi ya yandi samu na kupreche nsangu ya mbote na bantu nyonso yina ke na zolá kuwa yawu. Na faso yina, yandi ke na sadisá muntu nyonso yina zola kuzwa bambote ya sakrifise ya mwana ya yandi, na kusala mambu yina lendá vuukisa yandi. Ya zole, Yehova ke ve Nzambi ya muvusu kasi ya kizunu. (1 Ko. 14:33, 40) Na yawu, beto lenda tala ti na kati ya bisadi ya yandi muvusu ke ve mpe ba ke sadilak’ yandi na kizunu mpe bumosi. Ya tatu, Yehova ke “profeser ya nene.” (Iza. 30:20, 21) Ni na yawu organizasion ya yandi ke salá bangolo samu na kulonga bantu mambu  ya Biblia, ya vanda na kati kimvuka, na banzila, to na bayinzo ya bantu. Wa’ faso bakristo ya siekle ya ntete landá bifu ya Yehova tatu yayi? Wa’ faso bisadi ya Yehova ke na landá bifu yayi na ntangu ya beto? Mpe wa’ faso mpeve ya santu ke na sadisá nge, ntangu nge ke na sadilá Yehova na kati ya organizasion ya yandi?

4. Na Bisalu 1:8, yinki Yesu zonzá na badisiple ya yandi na kusala, mpe wa’ faso yandi sadisá bawu?

⁴ Na siekle ya ntete. Malongi yina Yesu precheke, pesá kivuvu na bantu nyonso. (Luke 4:43) Yandi zonzá na badisiple ya yandi na kukontinye na kusala kisalu yina yandi bandá, kupreche “tii na kisika yina me lutila ntama na ntoto.” (Tanga Bisalu 1:8, nwt-MK.) Ya vrai, ba zolá lenda ve kusala kisalu yayi na ngolo ya bawu mosi. Ba vandá na nsatu ya mpeve ya santu yina Yesu pesá promese ti, ya ke sadisa bawu.—Yoa. 14:26; Zak. 4:6.

5-6. Na wapi bafaso mpeve ya santu sadisá badisiple ya Yesu?

⁵ Badisiple ya Yesu kuzwá mpeve ya santu na Pentecote 33 N.B. Samu mpeve ya santu sadisá bawu, ba vingilá ve na kubanda kupreche. Mpe na mwa ntangu fioti bantu kuluta 5000 ndimá nsangu ya mbote. (Bis. 2:41; 4:4) Ntangu bantu bandá kukwamisa bawu, badisiple kumá ve na boma mpe ba biká ve kupreche. Kasi ba lombá na Nzambi sadisa bawu. Ba sambilá: “Pesa bisadi ya nge ngolo samu ba [kontinye] na kuzonzila mambu ya nge na tiya nyonso.” Na yawu, ba fuluká na mpeve ya santu mpe ba kontinyeke “kuzonzila mambu ya Nzambi na tiya nyonso.”—Bis. 4:18-20, 29, 31, nwt-MK.

⁶ Badisiple ya Yesu kutaná mpe na bamambu ya nkaka ya mpasi. Na kifwani, babuku ya Biblia yina ba vandá na yawu na ntangu yina, vandá lunga ve na bantu nyonso. Badisiple vandá ve na mikanda yina ke sadisá na kuzaba mambu ya Biblia faso beto ke na yawu bubu yayi. Mpe ba zolá preche na bantu ya bandinga mingi. Ata bamambu ya mpasi yayi, samu ba zolá kisalu ya bawu, badisiple salá mambu yina talaná mpasi na kusala. Na kati ya bamvula 30, ba precheke nsangu ya mbote “na ntoto nyonso.”—Kol. 1:6, 23.

7. Bamvula 100 me luta deja, wa’ faso bisadi ya Yehova zabá yina Nzambi zolá ba sala, mpe yinki ba salá?

⁷ Bubu yayi. Yehova ke na kontinye kutwadisa bisadi ya yandi mpe kupesa bawu ngolo ya kusala volonte ya yandi. Yandi ke surtout na twadisá bisadi ya yandi na nzila ya Biblia, buku yina mpeve ya nsatu sadisá na kusonika. Biblia ke zonzilá beto kisalu ya predikasion yina Yesu salá, mpe musiku yina yandi pesá na badisiple ya yandi, ya kukontinye kusala kisalu yango. (Mat. 28:19, 20) Deja na Juillet 1881 Yinzo ya Kengidi (na Anglais) zonzá: “Yehova bokilá to solá ve beto samu beto sosa nkembo ya bantu to beto sosa kuvanda na bimvwama kasi samu beto sadila bima nyonso beto ke na yawu, samu na kumwangisa nsangu ya mbote.” Brochure À qui l’œuvre est confiée, yina basiká na 1919 (na anglais), zonzá: “Kisalu ya kusala ke mingi, kasi ya ke kisalu ya Mfumu, mpe yandi ke pesa beto ngolo ya kusala yawu.” Faso bakristo ya siekle ya ntete, bampangi yayi vandá na kuraje mpe ba salá mingi samu ba zabá ti, mpeve ya santu ke sadisa bawu na kupreche na bantu nyonso. Beto zaba ti, ya ke sadisa beto mpe.

8-9. Wapi bametode organizasion ya Yehova ke sadilá samu na kumwangisa nsangu ya mbote?

⁸ Organizasion ya Yehova sadilá ba-apareye, na bima ya nkaka yina ke basiká samu na kumwangisa nsangu ya mbote. Na kati ya bima yango beto lenda zonzila: Mikanda ya beto, “Photo-Drame de la Création”, bafonografe, bakamion yina vandá na bamegafone, radio. Mpe, ntama mingi ve, ba-ordinatere na internet. Organizasion ya Yehova ke na salá mpe kisalu ya traduction ya mikanda ya beto na bandinga mingi na faso yina nabunu ya salama! Samu na yinki? Samu bantu nyonso kuwa nsangu ya mbote na bandinga ya bawu. Yehova ke talá bantu nyonso faso mosi. Na yawu yandi zonzá ti, ba zolá preche nsangu ya mbote “na babwala nyonso, na makanda nyonso, na  bandinga nyonso, mpe na bantu nyonso.” (Luz. 14:6, 7) Yandi zola ti muntu nyonso kuwa mambu ya Kimfumu ya Nzambi na ndinga ya yandi.

⁹ Yinki beto lenda zonza samu na bantu yina beto lenda preche ve na bayinzo ya bawu samu ba ke vandá na balupangu yina beto lenda kota ve samu ya ke na gardien to samu porte ke vandá kaka ya kukangama? Na kupreche bawu, Yehova ke sadisá organizasion ya yandi na kusadila bafaso ya nkaka ya kupreche. Na kifwani, na 2001, Kimvuka ya batwadisi ya batemwe ya Yehova pesá nzila na bampangi ya France na kusadila baprezentwar samu na kukabula mikanda ya beto. Na manima, bampangi ya babwala ya nkaka mpe bandá kusadila yawu. Ba kuzwá bambuma ya mbote. Samu na kusadila dyaka baprezentwar na faso ya kulutila, na 2011 programe mosi salamá na Etat-Unis na bakartiye yina bantu ke lutá mingi na New York. Na mvula yina, ba pesá babuku 102129 mpe bajurnal 68911. Mpe bantu 4701 lombá ba longoka Biblia na bawu! Ya talaná ti Yehova sadilá mpeve ya yandi samu kisalu yayi kwenda na mantwala. Na yawu, Kimvuka ya batwadisi ya batemwe ya Yehova ndimá ba sadila baprezentwar na babwala nyonso.

10. Yinki beto lenda sala samu na kubongisa faso ya beto ya kulonga?

¹⁰ Yina nge lenda sala. Na balukutakanu ya beto, Yehova ke pesá beto formasion na kisalu ya predikasion. Sadila yina nge ke longoká kuna. Vanda na kifu ya kuprecheke na grupe ya nge ya predikasion. Bampangi ya kento na bakala ya grupe ya nge, lenda sadisa nge na kubongisa faso ya nge ya kupreche mpe ya kulonga. Mpe ba-ekzample ya bawu ya mbote lenda pesa nge kuraje. Kontinye kupreche ata bampasi. Faso teme ya artikle yayi me zonzila yawu, beto ke lungisá volonte ya Nzambi na ngolo ya beto mosi ve, kasi na ngolo yina ke pesá beto mpeve ya santu. (Zak. 4:6) Beto lenda ndima ti Nzambi ke pesa beto ngolo yina beto ke na yawu nsatu, samu beto ke salá kisalu ya yandi.

11. Wa’ faso Kimvuka ya batwadisi ya siekle ya ntete salá na bumosi samu muvusu kota ve na kati ya bakristo?

¹¹ Na siekle ya ntete. Kimvuka ya batwadisi na Jerusalem salá na bumosi samu muvusu kota ve na kati ya bisadi ya Nzambi. (Bis 2:42) Na kifwani, pene-pene na mvula 49 N.B., bakristo kuzwá  mindondo na mambu ya kuzenga kibakala, samu ti ba ya nkaka vandá kanisa ti samu muntu sadila Yehova, ya me bonga bazenga yandi kibakala. Na yawu, Kimvuka ya batwadisi sambilá samu mpeve ya Yehova sadisa bawu na kuyidika mambu yango. Si mambu yina lendá na kukabula bakristo, kisalu ya predikasion zolá salama dyaka ve na faso ya mbote. Ata ba vandá bajwif, ba-apotre na bakuluntu biká ve misiku ya bajwif mpe ba yina vandá nata mambu yango na ngolo, kupuse bawu na kubaka desizion ya yimbi. Kasi, ba talá yinki vandá ya kusonika na mambu ya Nzambi, mpe ba lombá na Yehova mpeve ya yandi samu ba baka desizion ya mbote. (Bis. 15:1, 2, 5-20, 28) Yinki ya pesá? Yehova salá ti desizion ya bawu simba. Kizunu mpe bumosi vandá na kati ya kimvuka, mpe ba kontinye kupreche nsangu ya mbote.—Bis. 15:30, 31; 16:4, 5.

12. Yinki ke na lakisá ti organizasion ya Yehova bubu yayi ke na kizunu kasi muvusu ve?

¹² Bubu yayi. Organizasion ya Yehova ke na sadisá bisadi ya Yehova na kuvanda na kizunu kasi muvusu ve. Deja na 1895, jurnal Le Phare de la Tour de Sion et Messager de la Présence de Christ (bubu yayi Yinzo ya Kengidi) ya 15 Novembre vandá na artikle mosi yina vandá na teme “Na faso ya mbote kasi na muvusu ve” yina ba baká na 1 Bakorinto 14:40. Artikle yango vandá zonza: “Ba-apotre soniká mambu mingi na bakristo ya ntete samu muvusu vanda ve [. . .] Ya ke mbote na kulanda mbote-mbote ‘mambu yina ba soniká ntama samu na kulonga beto.’” (Rom. 15:4) Ya vrai, organizasion ya Yehova bubu yayi ke na salá bangolo samu muvusu vanda ve kasi kizunu vanda na kati ya bimvuka faso na siekle ya ntete. Na kifwani, si nge kwenda longoka Yinzo ya Kengidi na kimvuka ya nkaka na bwala ya nge to na bwala ya nkaka, nge ke zaba deja faso ya ke lutila mpe wapi artikle ba ke longoka. Nge ke vanda aleze! Kaka ni mpeve ya Nzambi lenda sala ti bumosi ya faso yayi salama.—Sof. 3:9.

13. Wapi bakestion Zaki 3:17 ke na natá beto na kuyufula?

¹³ Yina nge lenda sala. Yehova zola ti bisadi ya yandi “bumba bumosi ya mpeve ya kizunu, yina ke vukisá.” (Ef. 4:1-3, nwt-MK) Na yawu nge lenda yufula: ‘Mu ke salá kwandi bangolo samu na kubumba bumosi mpe kizunu na kati ya kimvuka? Mu ke wá kwandi ba yina ke twadisá kimvuka? Mu lenda sadisa kwandi bampangi  surtout si mu ke na baresponsabilite na kati ya kimvuka? Mu ke vandá kwandi na kifu ya kukwizá mpe ya kusala bamambu na heure? mpe mu ke vandá kwandi muntu ya ntete na kusadisa bampangi?’ (Tanga Zaki 3:17.) Si nge tala ti ya ke na bamambu yina nge me lunga kubongisa, sambila samu na kuzwa mpeve ya santu. Ntangu nge ke bika mpeve ya santu bongisa kimuntu mpe ndyatulu ya nge, bampangi ya nge na kati ya kimvuka ke zola nge dyaka ya kulutila mpe ba ke vutula nge matondo samu na nyonso yina nge ke salá na kati ya kimvuka.

14. Faso ke na zonzá Bakolose 1:9, 10, wa’ faso Yehova longá bisadi ya yandi na siekle ya ntete?

¹⁴ Na siekle ya ntete. Yehova ke zolá kulonga bisadi ya yandi. (Nku. 32:8) Yandi zola ti ba zaba yandi, ba zola yandi, mpe ba zinga ntangu nyonso faso bana yina yandi ke zolá. Nyonso yayi lenda salama ve si yandi longa ve beto. (Yoa. 17:3) Yehova sadilá kimvuka ya bakristo ya siekle ya ntete samu na kulonga bisadi ya yandi. (Tanga Bakolose 1:9, 10.) Yesu pesá promese ti mpeve ya santu zolá sadisa badisiple ya yandi. (Yoane 14:16) Mpeve ya santu sadisá badisiple na kuzaba mbote-mbote mambu ya Nzambi mpe na kuzimbana ve mambu yina Yesu zonzá mpe salá. Ni mambu yango ba soniká na kati ya ba-evanjile. Bamambu nyonso yayi, kulisá kiminu ya bakristo ya siekle ya ntete mpe luzolo ya bawu na Nzambi, na Mwana ya yandi mpe na bampangi ya bawu.

15. Na wapi bafaso ke na lunganá profesi yina Yehova pesá na Izaya 2:2, 3?

¹⁵ Bubu yayi. Yehova zonzá ti “na kitini ya nsuka ya bilumbu,” bantu ya babwala nyonso ke kwiza na montagne ya yandi to ke vukana na bisadi ya yandi, samu yandi longa bawu banzila ya yandi. (Tanga Izaya 2:2, 3.) Profesi yayi ke na lunganá na meso ya beto. Ya ke na talaná pwelele ti organizasion ya Yehova me lutila mabundu nyonso ya luvunu. Mpe Yehova ke na sadisá bisadi ya yandi na kuzaba bamambu mingi ya Biblia! (Iza. 25:6) Yandi ke na sadilá “muumbu ya mayela  mpe ya kukwikama,” samu na kupesa beto madya ya kimpeve yina beto ke zwá na bafaso mingi. Na kifwani, beto lenda tanga mikanda, kuwa badiskur, kutala badesin anime mpe bavideo ya nkaka. (Mat. 24:45) Beto lenda zonza faso Élihu kamarade ya Yobi zonzak’ yawu: “Wapi profeser ke faso [Nzambi]?”—Yobi 36:22.

16. Yinki nge lenda sala samu na kukula na kimpeve?

¹⁶ Yina nge lenda sala. Mpeve ya Nzambi lenda sadisa nge na kusadila na luzingu ya nge mambu yina nge ke tangá mpe ke longoká na Biblia. Sambila faso mosi ya ba yina soniká Bankunga salak’ yawu: “Longa munu banzila ya nge, O Yehova. Mu zola kutambula na [verite] ya nge. Pesa munu ntima yina ke ve ya kukabuka samu mu vanda na boma ya nkumbu ya nge.” (Nku. 86:11) Dyaka, kontinye na kutanga mpe na kulongoka Biblia na mikanda ya nkaka yina organizasion ya Yehova ke basisá. Ya vrai, dikanisi ya nge zolá vanda ve nkaka ya kuzaba mambu mingi. Nge zolá tula mambu ya Nzambi na ntima ya nge, mpe kusadila yawu na luzingu ya nge. Mpeve ya Yehova lenda sadisa nge na kusala yawu. Nge zolá pesa mpe bampangi ya nge ya kento na ya bakala kuraje. (Ebr. 10:24, 25) Samu na yinki? Samu ti ba ke famiye ya nge ya kimpeve. Sambila samu mpeve ya Yehova sadisa nge na kupesa bakomentere yina ke katuká na ntima. Mpe samu nge vanda na ngolo ya kusala na faso ya bien badevwar mpe badiskur yina ba ke pesá nge. Na faso yina, nge ke lakisa na Yehova na Yesu ti, nge ke zolá “mameme” ya bawu.—Yoa. 21:15-17.

17. Na wapi bafaso nge lenda lakisa ti na ntima mosi nge ke na tulá diboko na bisalu yina organizasion ya Yehova ke na salaka?

¹⁷ Na mwa ntangu fioti, kaka organizasion ya Yehova ke bikana awa na ntoto. Na yawu, sala kisalu ya organizasion ya Yehova na tiya nyonso. Lakisa ti nge ke zolá bantu faso Nzambi. Na yawu, preche nsangu ya mbote na bantu nyonso yina nge ke kutaná. Faso Yehova, yiina muvusu mpe sala ti, kizunu mpe bumosi vanda na kati ya kimvuka. Mpe kuwa Profeser ya nge ya Nene mpe longoka bima nyonso yina yandi ke pesá beto. Beto lenda vanda ve na boma ata yinza yayi ya Satan ke na kwendá na nsuka ya yawu. Na yawu, beto ke vanda na kuraje mpe ke tambula na ba yina ke na sadilá Yehova na ntima mosi na kati ya kimvuka ya yandi.