1. Ngano Bakristo ba batusu nti bafweti tatamana mu sa?

NGANO wa batusu wena? Tala ti ni bo, ha meso ma bantu wayizi zabikisa timinu tiaku mu Yehova, mpe wayizi songela luzolo lwaku lwa sala tintwari na organizasio’andi. * Diangana, timinu tiaku mu Yehova tifweti tatamana mu kula. Mpe fweti tatamana mu yika ngolo lukwikulu lwaku ti Yehova organizasio’andi kata sarila lumbu ti.

2-3. Mu ntia mpila Yehova kata twarisila organizasio’andi lumbu ti? Hana bifwani.

² Lumbu ti, Yehova organizasio’andi kata twarisa mu mpila yimonekesaka timuntu tiandi, kani diandi na mitieno miandi. Bwawu bu, tataluzuleno, bima bitatu bi tulendi mona mu organizasio’andi.

³ Musamu wa ntete, ‘Nzambi kena na [tihambula] ko.’ (Bis. 10:34) Luzolo lwatuma Yehova kahana Mwana’andi ‘mu futa mfuka [nkûlulu] ya bantu babansoni.’ (1 Tim. 2:6; Za 3:16) Yehova mbo kata sarila kanda diandi mu samuna nsangu za mbote kwe bô babansoni bazololo mu wâ zo, ngatu kabakisa bantu babingi mu bakila nkûlulu ndandu. Musamu wa nzole, Yehova Nzambi ya bunkete yena mpe ya tidzunu. (1 Kor. 14:33, 40) Wuzololo tâ ti, bisari biandi mpe bifweti bâ na bunkete mpe na tidzunu. Musamu wa ntatu, Yehova “Mulongi wa Wunene” wena (Iza. 30:20, 21) Ntiangu, organizasio’andi yisarilaka ngolo mu longesa bantu bakaka misamu mitariri Zu diandi Bibila, mu bimvuka na mu tisalu tia samuna. Bwe bima bio bia bitatu biamonekena mu  timvuka tia Bakristo ba ntete? Bwe bita monekena mu kanda dia Yehova dia ntangu yi? Mpe bwe mpeve santu yilendi ku bakisila bu ta kwe sari tintwari na organizasio ya Yehova?

4. Mu Bisalu 1:8, Yezu nti katuma kwe milongoki miandi, mpe ntia lubakusu baketi baka?

⁴ Mu ntangu ya Bakristo ba ntete. Nsangu zeri kwe samuni Yezu mbo zeri hanaka tivuvu kwe bantu ba nza ya mukaka. (Like 4:43) Walomba kwe milongoki miandi miatatamana mu sala tisalu ti kabatika, mu hana timbangi ‘na tii kwa sukina mutoto-nsi.’ (Tanga Bisalu 1:8.) Wa matieleka, ka baketi’â lenda ko mu sala tisalu tio mu ngolo za bawu beni. Mbo baketi bâ na nsatu ya mpeve santu, ye “tibakisi” tia ba kanisina Yezu.​—Za 14:26; Zka. 4:6.

5-6. Mu ntia mpila mpeve santu yabakisila milongoki mia Yezu?

⁵ Milongoki mia Yezu miabaka mpeve santu mu ntangu ya Pentekote ya muvu 33 M.B. Na lubakusu lwa mpeve yo, babatika mu samuna, mpe mu ntangu fioti kwa, mafunda ma bantu mayizi tambula nsangu za mbote. (Bis. 2:41; 4:4) Mu ntangu bantu yi babatika mu ba telamana, milongoki ka mieri’â na bunkuta ko, mpe ka miabika mu samuna ko. Kâ mialomba lubakusu kwe Nzambi. Basambila mu mpila eyi: “Hana kwe bisari biaku lenda dia tatamana mu samuna na butindi bwa zonzela bwabwansoni.” Bafuluka mu mpeve santu mpe batatamana mu “tâ Zu dia Nzambi na butindi bwa zonzela bwabwansoni.”​—Bis. 4:18-20, 29, 31 NWT.

⁶ Milongoki mia Yezu misamu miakaka mpe mieri nawu. Mu tifwani, mikanda mia matsonoko ka mieri’â miamingi ko. Ka beri’â na mabuku mabangulaka Bibila ko ntiana bu twe na mo lumbu ti. Mpe milongoki miafweti samuna kwe bantu beri zonzaka mazu mamingi ma swaswana. Ntono misamu mio miamiansoni, milongoki mio mieri na luhemo, mbo mieri salaka tisalu tieri monekaka ntiana tisalu ti balendi lembo sala. Mvula kampe 30, basamuna nsangu za mbote ‘kwe biabiansoni biayiluku, bie ku nsi’a zulu’​—Kol. 1:6, 23.

7. Mvula yôka 100, bwe bisari bia Nzambi biazabila misamu mi keri ba kekoloko, mpe nti biasa?

⁷ Mu ntangu ya beto. Yehova tatamana kata tatamana mu twarisa na mu hana ngolo kwe kanda diandi ngatu diasarila luzolo lwandi. Wa matieleka, mu nzila ya Bibila, diatsonoko mu ngolo za mpeve santu, kata twarisila kanda diandi. Mu Bibila mbo tutangaka tisalu tia sala Yezu na ntumunu yi kahana kwe milongoki miandi ya tatamana mu sala tisalu ti kabatika. (Mat. 28:19, 20) Mu juillet 1881, mukanda wumosi watâ ti: “Yehova ka tu têle’â mbila ko peleko ka tu tumbiri’â ko mu baka mukembo na bimvwama, kâ ngatu tasarila bima biabiansoni bie neto mu samuna nsangu za mbote.” Buku dimosi diaduka mu 1919 die nkumbu À qui l’œuvre est confiée, diatâ ti: “Tisalu tia sala tiatingi tie kô, kâ tisalu tia Mfumu tiena, mpe mbo katuhana ngolo za sala tisalu tiango.” Ntiana Bakristo, mpangi zo butindi bweri nawu, mpe zasala tisalu tia ngolo mu bungu ti lukwikulu lweri nawu ti mpeve santu mbo yaketi ba bakisa mu samuna kwe bantu babansoni. Lukwikulu lwe neto mpe ti mpeve santu mbo yitubakisa mu ntangu yi.

8-9. Organizasio ya Yehova nti yeri sarilaka mu tomo sala tisalu tia samuna?

⁸ Organizasio ya Yehova yasarila bisalulu biyôkele bubote mu yangasa nsangu za mbote. Mo bisalulu bio mwe na mikanda, “Photo-Drame de la création,” fonografe, kaminio yeri na megafone, programe mu radio, mpe bwawu bu, appareil na Internet. Organizasio ya Nzambi mbo yibangulaka mpe nsangu mu mazu mamingi mu mpila yalembo toko salama  mu ntama! Mu bungu dia nti? Ngatu bantu babansoni babâ na lenda dia wâ nsangu za mbote mu mazu mawu. Yehova kena na tihambula ko; watibikurila ti nsangu za mbote mbo baketi za samuna ‘ku nsi zazansoni, na kwe mawa mamansoni, na kwe mazu mamansoni, na kwe makanda mamansoni.’ (Nza. 14:6, 7) Yehova zololo ti bantu babansoni babâ na lenda dia wâ nsangu za Timfumu.

⁹ Bwe tulendi tâ mu bungu dia bantu ba tulendi lembo lenda mu samuna, kampe mu bungu ti ku nzo zi batomo kengerelaka babêlaka? Ngatu balenda mu samuna kwe bantu babingi, Yehova wabakisa organizasio’andi mu batika mu sarila mpila za samunina za swaswana. Mu tifwani, mu 2001, Timvuka titwarisaka tiatambula ti mpangi za ku France zabatika mu sarila prezentware na bima biakaka. Ha manima, mpangi za mu nsi zakaka zabatika mpe mu sarila mpila yo ya samunina. Ndandu za mbote babaka. Mu 2011 programe ya môna babatika ku États-Unis mu tizunga timosi tivulu bâka bantu babingi ku New York. Mu muvu wa ntete, mabuku 102 129, mpe mazurnale 68 911 bakaba. Mpe bantu 4 701 balomba ndongokolo ya Bibila! Wa matieleka, Yehova mpeve santu’andi keri sarilaka mu twarisa tisalu tio. Ntiangu Timvuka titwarisaka tiatambula basarilaka prezentware mu nza ya mukaka.

10. Nti tulendi sa mu tomesa mpila’eto ya samuna na ya longesa?

¹⁰ Nti lendi sa. Ku tukutakanu twa Bakristo, Yehova mbo katukubikaka mu samuna. Sarila misamu mi longokaka ku tukutakanu to. Vulu samunaka na mpangi za tikunku tiaku tia bisamuni. Mpangi zo zi lwe tikunku timosi zilendi ku bakisa mu tomesa mpila’aku ya samuna na ya longesa, mpe bifwani biawu bia mbote bilendi ku tindisa. Tatamana mu samuna ntono mpasi. Ntiana bu ta wa tu bambula verse’eto ya muvu, ka mu ngolo za beto beni’â ko tusarilaka luzolo lwa Nzambi, kâ mu ngolo za mpeve santu. (Zka. 4:6) Tulendi bâ na lukwikulu ti Nzambi mbo katuhana ngolo ze neto nsatu mu sala tisalu tiandi.

11. Bwe Timvuka titwarisaka tiasala tintwari mu singasa bukente ha kati dia kanda dia Nzambi?

¹¹ Mu ntangu ya Bakristo ba ntete. Timvuka titwarisaka tieri ku Yerusaleme mbo tieri salaka  mu bumosi mu sikamasa bunkete na tidzunu mu kanda dia Nzambi. (Bis. 2:42) Mu tifwani, mu muvu 49 M.B. Bakristo babingi beri na mabanza ma swaswana mu bungu dia musamu wutariri tesa (circoncision). Timvuka titwarisaka na lutwalusu lwa mpeve santu, tiazonzela musamu wango. Timvuka bu tiaketi tatamana mu bâ tia hambana mu bungu dia musamu wo, tisalu tia samuna ka tiaketi’â tatamana ko. Ni bu sa ti Bayuda beri, tikulu tia Bayuda na bantu beri tia singasaka ka basobesa bantumwa na bambuta ko. Kâ, badinga lutwalusu lwa Zu dia Nzambi na lwa mpeve santu. (Bis. 15:1, 2, 5-20, 28) Ntia ndandu yayizi moneka? Yehova wasakumuna nzengolo’awu, bayizi bâ na bumosi mpe tisalu tia samuna tiatomo kula.​—Bis. 15:30, 31; 16:4, 5.

12. Nti bita songela ti mu organizasio ya Yehova lumbu ti bunkete na tidzunu tie mo?

¹² Mu ntangu ya beto. Organizasio ya Yehova yasala tintwari mu singasa bunkete na tidzunu mu kati dia kanda dia Nzambi. Le Phare de la Tour de Sion et Messager de la Présence de Christ ya 15 novembre 1895, yeri na timoko tieri na mutu-diambu “Avec bienséance et ordre” watûka mu 1 Bisi-Korente 14:40. Timoko tio mbo tieri tâka: “Bantumwa batsoneka misamu miamingi kwe timvuka tia ntete mu musamu weri tarilaka bunkete. [. . .] Nkatika mfunu wena mu tatamana mu tumamana ‘misamu miatsonoko mu bungu dia ndwengosolo’eto.’” (Rom. 15:4 NWT) Organizasio ya Yehova tisalu tia ngolo yita sala lumbu ti ngatu timvuka tia Bakristo tiatatamana mu bâ mu bunkete na mu tidzunu ntiana mu ntangu ya Bakristo ba ntete. Mu tifwani: Tala ti mu timvuka tiakaka wele sila Nzo ya Zangama ya Munkengi, ku nsi’aku peleko mu nsi yakaka, mbo zaba ka ntia timoko bataluzula mpe ka bwe batwarisila tio. Ho nkatika bendo, kubâ na lwaka ko! Mpeve santu ya Nzambi kwa yilendi tûla tidzunu tia mpila yo!​—Sof. 3:9.

13. Tintwari na Zaki 3:17, ntia biyuvu tufweti tiyula?

¹³ Nti lendi sa. Yehova zololo ti kanda diandi ‘diasimbirila bumosi bwa mpeve mu musinga wa tidzunu.’ (Efz. 4:1-3 NWT) Buna tiyula: ‘Ngano mbo nisingasaka bumosi na tidzunu mu timvuka? Ngano mbo nitumamanaka bô batwarisaka? Ngano bantu bakaka balendi kunsikirila, nsungula tala ti madema me nani  mu timvuka? Ngano mu ntangu ya fwanana nitulaka, bantu nibakisaka, mpe nsayi yibâka nani mu bakisa?’ (Tanga Zaki 3:17.) Tala ti mbo ta mona ti lendi vutu sa nsobolo, sambila mu lomba mpeve santu. Diangana, bu kwe biki mpeve santu yasobesa timuntu tiaku na nsalulu zaku, mpangi zaku mbo zitomo ku zolo, mpe mbo batonda mu tisalu ti salaka.

14. Tintwari na Bisi-Kolose 1:9, 10, bwe Yehova kalongesela Bakristo ba ntete?

¹⁴ Mu ntangu ya Bakristo ba ntete. Yehova nsayi yayingi yibâka nandi bu kalongesaka kanda diandi. (Mik. 32:8) Zololo ti diamuzaba, diamuzolo, mpe diazinga mankululu ntiana bala bandi ba luzolo. Tala ti Yehova ka tu longesaka ko, miamiansoni mio ka milendi’â miayilama ko. (Za 17:3) Yehova wasarila timvuka tia Bakristo ba ntete mu longesa kanda diandi. (Tanga Bisi-Kolose 1:9, 10.) Mpeve santu​—“tibakisi” tia kanisina Yezu—​yabakisa mpe milongoki. (Za 14:16) Yababakisa mu bakula Zu dia Nzambi, mpe yababambula misamu miamiansoni mia tâ Yezu na mi kayirika, mi bayizi bâ na lenda mu tanga ha manima mu Evanzile. Luzabu lo lwayika timinu tia Bakristo ba ntete ngolo, kâ mpe lwayika ngolo luzolo lwawu mu Nzambi, mu Mwana’andi na mu bampwana’awu.

15. Mu ntia mpila wamweni ti, Yehova kani diandi die mu Izaya 2:2, 3 kata lungisa?

¹⁵ Mu ntangu ya beto. Yehova watâ ti “mu ntangu ya nsuka ya bilumbu,” bantu ba makanda mamansoni baketi kwiza ha “mongo’andi,” mu vukana na bisari biandi bia matieleka ngatu babaka ndongokolo ya nzila zandi. (Tanga Izaya 2:2, 3.) Diangana, mbo tuta mona ti mbikululu yo nkatika lungana yita lungana. Nsambululu ya matieleka ya nkatika ya toma yena yôka nsambululu ya bungungu. Mpe Yehova mbo kata hana madia ma timpeve kwe kanda diandi. (Iza. 25:6) Mu nzila ya “ngamba ya kwikama  na ya ndwenga,” mbo kata tu hana madia mo mamansoni, mu mpila za swaswana. Mu tifwani, tulendi tanga bimoko, tulendi wâ binzonzi, mpe tulendi tala video. (Mat. 24:45) Mbo tubâka na mabanza mamosi na Eliwu weri ndiku ya Yobe watâ ti: “Ntia Mulongi we ntiana [Nzambi]?”​—Yobe 36:22.

16. Ngano nti lendi sa mu kurisa timpeve tiaku?

¹⁶ Nti lendi sa. Mpeve santu ya Nzambi mbo yikubakisa mu sarila misamu mi tangaka na mi longokaka mu Zu dia Nzambi. Sambila ntiana bwa sa titsoniki timosi tia Mikunga: “Kundongesa nzila’aku, ô Yehova mbo nidiatila mu matieleka maku. Sa ti mutima’ani wabâ wa mukaka, ngatu natîna nkumbu’aku.” (Mik. 86:11) Mpe tatamana mu tangaka na mu longokaka Bibila na mikanda miakaka mi tu hanaka organizasio ya Yehova. Diangana, kani diaku ka diena ko kwa mu baka luzabu. Wufwanakane wazakasa matieleka mu mutima’aku, mpe wasarilaka mo mu luzingu lwaku. Mpeve ya Yehova yilendi ku bakisa mu yirika mio. Wufwanakane mpe watindisaka mpangi zaku. (Ebr. 10:24, 25) Mu bungu dia nti? Mu bungu ti kanda diaku dia timpeve diena. Sambila ngatu mpeve ya Nzambi yakubakisa mu hanaka mvutu zitûkaka ku mutima ku tukutakanu twa Bakristo, mpe mu sarilaka ngolo zaku zazansoni bu bâka na devware ku lukutakanu. Mu mpila yo mbo songela kwe Yehova na kwe Mwana’andi ti “bimeme” biandi bia ntalu bia zololo.​—Za 21:15-17.

17. Mu ntia mpila lendi songela ti organizasio ya Yehova singasaka na kwikama kwakwansoni?

¹⁷ Ntamana, organizasio yimosi kwa yisâla, ni yo yibâ mu lwatulusu lwa mpeve santu. Buna, sala tintwari na organizasio ya Yehova na luhemo lwalwansoni. Songela ti bantu ba zololo ntiana bu ba zololo Yehova bu kwe samuni nsangu za mbote kwe bantu babansoni ba bwabanaka na bo. Mpe wirikila Mulongi’aku wa Wunene bu kwe bakiri ndandu mu madia ma timpeve ma katuhanaka. Mu ntangu nza ya Satana yisuka, kubâ na bunkuta ko. Kâ, mbo kwizi bâ na butindi, mpe mbo kwizi bâ ku lweka lwa bantu basalaka tintwari na organizasio ya Yehova na kwikama kwakwansoni.