1. Ino Mwineklistu wakabombekwa alyeelete kutolelela kucita nshi?

SA mwakabombekwa? Na mwakabombekwa, nkokwaamba ayi mwakatondesha patuba kwaamba ayi mulicite lushomo muli Yehova alimwi mulisuni kumusebensela mulibunga lyakwe. * Alimwi mulyeelete kutolelela kuyumya lushomo lwanu. Mulyeelete kutolelela kushoma cakutatoonsha kwaamba ayi Yehova atosebensesha libunga lyakwe munshiku shino.

2-3. Ino njimibo ili njetubona mulibunga lyakwe Yehova munshiku shino?

² Munshiku shino, Yehova alatanjilila libunga lyakwe munshila itotondesha mibo yakwe, luyaando, alimwi anjiisho shakwe. Amuleke tubandike mibo yotatwe yakwe Yehova njetubona mulibunga lyakwe.

³ Wakutaanguna, “Lesa taasalululi.” (Milimo 10:34) Lusuno ndolwakapa kwaamba ayi Yehova aabe Mwanaakwe mbuli “cilubula cabantu boonse.” (1 Timo. 2:6; Joni 3:16) Yehova alasebensesha bantu bakwe kushimikila makani abotu kubaabo boonse basuni kukutika. Aboobo ici cilacafwa muntu uli woonse usuni kufubilaamo mucilubula. Cabili, Yehova taasuni kunyonyongana, sombi ulisuni luumuno. (1 Koli. 14:33, 40) Aboobo, bantu bakwe balyeelete kumusebensela mulucatano alimwi amuluumuno. Catatu, Yehova ngu “Mufundishi Munene.” (Isa. 30:20, 21) Nceceeco libunga lyakwe lilasebensa cankusu kwiisha bamwi Maswi akwe, mulibungano alimwi amuncito yakushimikila. Ino Beneklistu bakutaanguna bakaikonkela buyani mibo yotatwe iyi? Ino bantu bakwe Lesa munshiku shino balaikonkela buyani? Alimwi ino mushimu usalashi inga wamucafwa buyani ndyemutoosebensela pomwi alibunga lyakwe Yehova munshiku shino?

4. Kweelana a Milimo 1:8, ino Yesu wakabapa ncito nshi bashikwiiya bakwe, alimwi nducafwo nshi ndobakalinga kusa mukutambula?

⁴ Muciindi ca Beneklistu bakutaanguna. Makani Yesu ngaakalinga kushimikila akacafwa bantu kuba abulindilishi. (Luka 4:43) Wakalwiita bashikwiiya bakwe kutolelela anciito njaakatalika, kuba bakamboni “kushikila kumisena yakulaale abuumbi kwacishi capanshi.” (Amubelenge Milimo 1:8.) Nacibi boobo, bakalinga kuyandika lucafwo kwaamba ayi bacikoonshe. Bakalinga kuyandika mushimu usalashi, nkokwaamba ayi “mucafwi” Yesu ngwakabashomesha.​—Joni 14:26; Seka. 4:6.

5-6. Ino mushimu usalashi wakabacafwa buyani bashikwiiya bakwe Yesu?

⁵ Bashikwiiya bakwe Yesu bakatambula mushimu usalashi pabushiku bwa Pentekositi mu 33 C.E. Aboobo kwiinda mulucafwo lwa mushimu, bakatalika kushimikila peenkapo, alimwi paciindi ciniinibo bantu baanji bakatambula makani abotu. (Milimo 2:41; 4:4) Kupikishikwa ndyekwakatalika, bashikwiiya tabakwe kuloonda akucileka kushimikila. Sombi bakatolelela akusenga Lesa kwaamba ayi abacaafwe. Bakapaila ayi: “Amutupe nkusu swebo sobasebenshi banu ayi tushimikile maswi anu cakubula boowa.” Bakacatwa amushimu usalashi aboobo bakatolelela “kushimikila maswi akwe Lesa cakubula boowa.”​—Milimo 4:18-20, 29, 31.

⁶ Bashikwiiya bakwe Yesu abalo bakeenda mumapensho. Kucakubonenaako, tabakalinga kucitewo Malembo aanji. Tabakalinga kucite mabuku akubacafwa kwiiya mbuli mbotucite munshiku shino. Alimwi bakalinga kweelete kushimikila bantu bakalinga kwaamba mishobo ipusenepusene. Nabi kwaamba ayi bakalinga kucite mapensho oonse aya, paciindi ciniinibo bashikwiiya bakacikonsha kukumanisha ncito yakalinga kuboneka anga inga taikonsheki. Mu myaaka ishika kuma 30 bakacikonsha kushimikila makani abotu ‘kubantu boonse bamucishi capanshi.’​—Kolo. 1:6, 23.

7. Ino nciinshi cakacafwa basebenshi bakwe Yehova kushiba kuyanda kwakwe myaaka 100 akwiindaawo yainda, alimwi ino bakacita buyani?

⁷ Munshiku shino. Yehova watolelela kutanjilila akupa nkusu bantu bakwe kwaamba ayi bakumanishe kuyanda kwakwe. Liinji alacita boobo kwiinda mu Maswi akwe akatanjililwa amushimu usalashi. Mu Maswi akwe Lesa tulacana makani aamba Yesu mbwaakacita ncito yakwe alimwi a mulawo ngwakapa bashikwiiya bakwe wakwaamba ayi balyeelete kutolelela kusebensa ncito njaakatalika. (Mate. 28:19, 20) Kale kale abuumbi mu July 1881, magazini ya Njashi Yamulindilishi yakaamba ayi: “Yehova taakwe kutusala, na kutunanika kwaamba ayi tunoolemekwa abantu na kuba babile, sombi kwaamba ayi tusebenseshe shili shoonse nshetucite muncito yakushimikila makani abotu.” Libuku lyakaswa mu 1919 lyakalinga kucite mutwi wakalinga kwaamba ayi To Whom the Work Is Entrusted, lyakaamba ayi: “Nabi kwaamba ayi incito itoboneka ayi njinene abuumbi, nja Mwaami, aboobo tulaakucikonsha munkusu shakwe.” Bweenka mbuli Beneklistu bakutaanguna, bamakwesu aba tabakwe kuloonda alimwi bakasebensa cankusu mukwiinga bakalinga kushomete cakutatoonsha kwaamba ayi mushimu usalashi ulaakubacafwa kushimikila kubantu bamishobo yoonse. Aswebo munshiku shino tulashoma ayi mushimu usalashi ulaakutucafwa.

8-9. Ino libunga lyakwe Yehova lyasebensesha nshila nshi kwaamba ayi incito yakushimikila iye panembo?

⁸ Libunga lyakwe Yehova lilashimikila makani abotu kwiinda mukusebensesha shisebensesho shibotu kwiindaawo. Shisebensesho ishi shakalinga kwiilikaawo mabuku akapulintwa, cisekano cakalinga kwiitwa ayi “Photo-Drama of Creation,” malekodi puleya, myotoka icite shakwaambilaamo, bulodikasiti yapaledyo alimwi munshiku sha conoono, makompyuta a intaneti. Alimwi libunga lyakwe Lesa lilasansulula makani mumishobo iinji abuumbi kwiinda kale kale! Ino nceebonshi? Kwaamba ayi bantu bamishobo yoonse banyumfwe makani abotu mumushobo winemishaabo. Yehova taasalululi; wakaambila limwi ayi makani abotu alaakwaambilishikwa “kushishi shoonse  alimwi akumishobo yoonse, kumilaka yoonse alimwi akubantu boonse.” (Ciyu. 14:6, 7) Alisuni kwaamba ayi muntu uli woonse akanyumfwe makani a Bwaami.

⁹ Ino mbuyani bantu mbweenga tatucikoonshi kushimikila pamaandaabo, mpashi ceebo cakwaamba ayi balekala mumaanda mobatasuminishi kunjila? Kwaamba ayi tucikoonshe kushimikila bantu aba, Yehova wakacafwa libunga lyakwe kwiinda mukusebensesha nshila shipusenepusene shakushimikila mumisena mucanika bantu baanji. Kucakubonenaako, mu 2001, Bamulikoto Litanjilila bakasuminisha kwaamba ayi bamakwesu abenankashi ku France inga batalika kusebensesha tukoci twa mabuku alimwi atumwi twakubikaawo mabuku ndyebatooshimikila. Shakaswamo shakalinga shibotu abuumbi. Mukuya kwaciindi bubaambo ubu bwakasuminishikwa amushishi shimwi. Mu 2011 bubaambo bupya bwakatalika ku America mumisena mucanika bantu abuumbi mutauni ya New York. Mu mwaaka wakutaanguna, mabuku 102,129 alimwi amagazini 68,911 akaabilwa. Alimwi bantu bashika 4,701 bakasenga kwiiya Baibo! Ici cilatondesha patuba kwaamba ayi Yehova wakatucafwa muncito iyi kwiinda mumushimu wakwe. Aboobo bamu Likoto Litanjilila bakasuminisha kwaamba ayi bamakwesu abenankashi nsengwe yoonse batalike kusebensesha tukoci twamabuku alimwi ashakubikawo mabuku shimwi.

10. Ino inga twacita buyani kwaamba ayi twiiye bwakushimikila akwiisha kabotu?

¹⁰ Nsheenga mwaciita. Kumabungano, Yehova alatwiisha mbweenga twashimikila. Aboobo amukonkele nshetwiiya kumabungano. Alimwi lyoonse amusebense pomwi abaabo mbomuli abo mukakoto kakushimikila. Bamakwesu abenankashi mukakoto kanu inga bamucafwa kwiiya bwakushimikila akwiisha kabotu alimwi inga bamuyuminisha kwiinda mucakubonenaako cabo cibotu. Amutolelele kushimikila nabi ndyemutokwiinda mumapensho. Bweenka mbuli lilembo paswa mutwi mbolyatwiibalusha, tulakumanisha kuyanda kwakwe Lesa kwiinda mukucafwikwa amushimu usalashi kuteshi nkusu shesu. (Seka. 4:6) Inga twashoma kwaamba ayi Yehova alaakutupa nkusu nshetuyandika, mukwiinga tutoocita ncito yakwe.

11. Ino likoto litanjilila lyakacita buyani kwaamba ayi bantu bakwe Lesa batolelele kuba bacatene muciindi ca Beneklistu bakutaanguna?

¹¹ Muciindi ca Beneklistu bakutaanguna. Likoto litanjilila ku Jelusalemu lyakasebensela pomwi  mulucatano kwaamba ayi lucatano aluumuno shitolelele pakati kabantu bakwe Lesa. (Milimo 2:42) Kucakubonenaako, cakuma 49 C.E, Beneklistu baanji bakalinga kucite miyeeyo ipusene pamakani akwaamba ayi muntu alyeelete kupalulwa kwaamba ayi eelele kusebensela Yehova. Aboobo kwiinda mukutanjililwa amushimu usalashi likoto litanjilila lyakabandika makani aya. Naakwiinga libungano lyakatolelela kutacatana pamakani aya, naakwiinga bakaalilwa kukumanisha kabotu incito yakushimikila. Nabi kwaamba ayi batumwi alimwi abamanene bakalinga ba Juda, tabakwe kuyungwa amilawo yaba Juda nabi kuyungwa abaabo bakalinga kwiyuminisha bunene. Sombi bakakonkela butanjilishi bwamu Maswi akwe Lesa akusenga ayi mushimu usalashi ubacaafwe kusala kabotu. (Milimo 15:1, 2, 5-20, 28) Ino nshiinshi shakaswaamo? Yehova wakapa shoolwe kusala kwabo, libungano lyakatolelela kuba muluumuno alimwi alucatano, aboobo bakatolelela kushimikila makani abotu.​—Milimo 15:30, 31; 16:4, 5.

12. Ino nciinshi citondesha ayi mulibunga lyakwe Yehova muli lucatano aluumuno amunshiku shino?

¹² Munshiku shino. Libunga lyakwe Yehova lyacafwa bantu bakwe kutolelela kuba bacatene alimwi muluumuno. Magazini yamu 1895 yakalinga kwiitwa ayi, Zion’s Watch Tower and Herald of Christ’s Presence ya November 15 yakalinga kucite mutwi wakalinga kwaamba ayi “Decently and in Order,” kuswa palilembo lya 1 Bene Kolinto 14:40. Yakaamba ayi: “Batumwi bakalemba makani aanji kulibunga lyakutaanguna pamakani akubamba kabotu shintu . . . Ncintu ciyandika abuumbi kutolelela kukonkela cakubikila maano ‘shintu shoonse shakalembwa kale kale isho shakalembelwa kutwiisha.’” (Loma. 15:4) Libunga lyakwe Yehova munshiku shino lilasebensa cankusu kwaamba ayi mulibunga lya Bwineklistu mutolelele kuba lucatano alimwi aluumuno bweenka mbuli muciindi ca Beneklistu bakutaanguna. Kucakubonenaako, na twaya kulibungano limwi nabi kucishi kumwi tulaba katucishi kale Ciiyo ca Njashi Yamulindilishi mbweshi cicitwe alimwi amutwi weshi ubandikwe. Lyalo peenkapo tulashiba ayi tatuna kusoweka! Mushimu wakwe Lesa weenkabo ngweenga wapa kwaamba ayi ishi shikonsheke!​—Sefa. 3:9.

13. Ino lilembo lyakwe Jemusi 3:17 inga lyatupa kuliipusha miipusho nshi?

¹³ Nsheenga mwaciita. Yehova alisuni kwaamba ayi bantu bakwe “batolelele kulama lucatano lwakaswa kumushimu muluumuno lucatanya.” (Efe. 4:1-3) Aboobo amuliipushe ayi: ‘Sa  ndayuminisha lucatano aluumuno mulibungano? Sa ndanyumfwila baabo batotanjilila? Sa bamwi inga banshoma, bunene bunene na ndicite mikuli mulibungano? Sa ndashika muciindi? Sa ndicite mushimu wakucafwa, akuba ulibambite kusebensa?’ (Amubelenge Jemusi 3:17.) Na mwabona ayi kuli pamwi mpomutatoocita kabotu, amusenge lucafwo lwa mushimu usalashi. Na mwasuminisha mushimu kumucafwa kubotesha mibo yanu akumucafwa mushintu nshemucita, bamakwesu abenankashi balaakumusuna akumubona ayi mulayandika abuumbi.

14. Kweelana a Bene Kolose 1:9, 10, ino Yehova wakabacafwa buyani Beneklistu bakutaanguna?

¹⁴ Muciindi ca Beneklistu bakutaanguna. Yehova alakondwa kwiisha bantu bakwe. (Kulu. 32:8) Alisuni kwaamba ayi bamushiibe, bamusuune, alimwi akukala buumi butamaani mbuli bana bakwe mbwaasuni. Ishi shoonse inga tashikonsheki kwakubula kwiishikwa anguwe. (Joni 17:3) Yehova wakaiisha bantu bakwe kwiinda mulibungano lya Beneklistu bakutaanguna. (Amubelenge Bene Kolose 1:9, 10.) Mushimu usalashi​—na “mucafwi” Yesu ngwaakashomesha​—wakabacafwa abuumbi bashikwiiya bakwe. (Joni 14:16) Wakabacafwa kunyumfwishisha Maswi akwe Lesa akwiibaluka shintu shoonse Yesu nshaakaamba akucita, isho shakesa mukulembwa mumabuku a Makani Abotu. Kushiba makani aya kwakalengesha Beneklistu bakutaanguna kuyuma mulushomo alusuno lwabo pali Lesa, Mwanaakwe, alimwi apa bashominyinaabo.

15. Ino lilembo lya Isaya 2:2, 3 litookumanishikwa buyani?

¹⁵ Munshiku shino. Yehova wakaambila limwi ayi “munshiku shamamanino,” bantu kuswa mumishobo yoonse balaakusa mubupailishi bwancine kwaamba ayi baiishikwe nshila shakwe. (Amubelenge Isaya 2:2, 3.) Tutoobubona bushinshimi ubu mbobutookumanishikwa. Cilibweneketebo patuba kwaamba ayi bupailishi bwancine buliinditeewo pabupailishi buli boonse. Alimwi Yehova atokwaabila bantu bakwe shakulya shakumushimu shiinji abuumbi! (Isa. 25:6) Kwiinda mu “musebenshi  ushomeka alimwi ucite maano,” Yehova alatupa shakulya shiinji shipusenepusene. Kucakubonenaako, tulicite makani ngeenga twabelenga, amwi ngeenga twakutika, alimwi amavidyo akweebela. (Mate. 24:45) Tulalinyumfwa bweenka mbuli shicibusa wakwe Jobo Eliyu mbwaakalinyumfwa ndyaakaamba ayi: “Anu ngani weenga weelana a [Lesa] mukwiisha?”​—Jobo 36:22.

16. Ino inga mwacita buyani kwaamba ayi muye panembo lwakumushimu?

¹⁶ Nsheenga mwaciita. Mushimu usalashi ulaakumucafwa kukonkela nshemubelenga akwiiya kuswa mu Maswi akwe Lesa. Amupaile bweenka mbuli bwa kapaila shikulumbaisha ayi: “Njiishe nshila shako, O Yehova. Ndanookweenda mucancine cako. Umpe kuba amoyo womwi kwaamba ayi noloonda liina lyako.” (Kulu. 86:11, NWT) Aboobo amutolelele kubelenga akwiiya Baibo alimwi amabuku amwi Yehova ngaatupa kwiinda mulibunga lyakwe. Nacibi boobo, luyaando lwakucitila boobo teshi kubabo alushibo. Sombi mulisuni kwaamba ayi muyumye lushomo lwanu mucancine akukonkela nshomweeya. Mushimu wakwe Yehova inga wamucafwa kucita boobo. Alimwi mulisuni kuyuminisha bamakwesu abenankashi. (Ebu. 10:24, 25) Ino nceebonshi? Mukwiinga ngomukwashi wanu wakumushimu. Amupaile kwaamba ayi mushimu usalashi umucaafwe kwaamba shikumbulo shiswa panshi lya moyo ndyemuli kumabungano alimwi akumucafwa kucita kabotu ndyemwapekwa lubasu. Kucita boobo kulatondesha Yehova a Mwanaakwe kwaamba ayi mulisuni “mbelele” shabo shiyandika abuumbi.​—Joni 21:15-17.

17. Ino inga mwatondesha buyani ayi muli kulubasu lwa libunga lyakwe Yehova?

¹⁷ Conoonobo, pacishi capanshi palaakucalabo libunga lyomwi litanjililwa amushimu wakwe Lesa. Aboobo amusebense cankusu kwaamba ayi mube bacatene alibunga lyakwe Yehova. Amutondeshe kwaamba ayi bweenka mbuli Lesa amwebo tamusalululi kwiinda mukwaambilisha makani abotu kumuntu uli woonse ngomwacana. Amusune lucatano aluumuno kwiinda mukuyuminisha lucatano mulibungano. Alimwi amukutike ku Mufundishi wanu Munene kwiinda mukwiiya makani oonse ngaatupa. Lyalo cishi cakwe Satana ndyecitooya kumamanino, teshi mukaloonde. Sombi mulaakwimikana cakutaloonda pakati kabaabo batoosebensa cakushomeka pomwi alibunga lyakwe Yehova.