1. N’nga Makristau obadiziwa anofwanela dhowanganave iran’ni?

N’NGA nyo mutobadiziwa? Akala ti-eno, mwatoonga vochena ira munomroromela Yohova vambo-i na gulu lee. * Mwaimbarimbari iroromelo inyu na Yohova inodhowanave kala yolimba. Thitho munofwanela dhowanave kaana inyindelo yoi Yohova uno-indi-edhela basa gulu lee malambo ano.

2-3. N’nga Yohova unosogolela a-vi gulu lee malamboano? Velelani ifwanafwani-o.

² Malambo ano, Yohova unosogolela gulu lee dhela mooneela va umutwee, ifunelo yee, makalelwee, vyothuulela vyee, na wa makaathedho o-ochinjeya. Dhoweni nitapanyeni vyongo viraru vya Yohova vyevyo vinothonyi-edha gulu lee.

³ Yoroma, “Nlungu kan’nasakulo.” (Mayir. 10:34) Udhivela watom’mwiri-a Yohova ira amvelela Mwanee kala “yoombolana atu othene.”(1 Timo. 2:6; Juwau 3:16) Yohova ato-indi-edha basa atwee ira talaleele milanyu yapama waatu othene anofuna ivwela, taira e-no takami-e atu anjinji ira taganyali na yoombolana ira tadhavulumuwe. Yanambili, Yohova Nlungu ngoira vyongo molongomana thitho mwarendele. (1 Akor. 14:33, 40) Yaneraru, Yohova “Ngunamafunji-a Nlukulu.” (Esaya 30:20, 21) Ngumwasiwa gulu lee linolimbi-edha funji-a madhwee ovudheleliwa, atu othene pingoni anolaba basa laurumiwi. N’nga vikundu viraru vyaumutu wa Yohova vyaoneile a-vi pingoni wama Kristau oroma? N’nga unooneela a-vi malamboano? N’nga zimu wa Yohova unaukami-eni a-vi vanolaba nyo vambo-i na gulu la Yohova malamboano?

4. Movwelana na lemba la Mayirelo 1:8, n’nga Yesu aawandenlen’ni anama-arelee ira taire, thitho tafuna tawachele yokami-a yoi a-vi?

⁴ Hora yaarumiwi. Milanyu yalaleela Yesu yatova-a idedi-edho atu othene. (Luka 4:43) Atoawandela anama-arelee ira tadhowenave basa laromi-idhe liye loirela umboni “fiedhela mamari-edho ailambo yothene yavathi.” (Muleri Mayirelo 1:8.) Imbarimbari, basali kataode lilaba na nguru dhiwa. Tafuneela zimu ochena—“namakami-a” wenuo Yesu waawandenle liye.—Juwau 14:26; Zakar. 4:6.

5-6. N’nga zimu ochena waakami-idhe a-vi anama-arela a Yesu?

⁵ Anama-arela a Yesu tatowachela zimu ochena va Petekoste mu yawa ya 33 C.E. Mokami-iwa na zimuo hora yenio tatoroma laleela, thitho vahora yoyeva, mamiliyau aatu tatorumela milanyu yapama. (Mayir. 2:41; 4:4) Zuzumi-iwa wangafiile, aliwa kataovile mbwenye tatomvepa Nlungu ira aakami-e. Tatovepa ira: Va-ani adhaarinyu taonge madhwinyu no limba rima wethene.” Thitho tatodhaleliwa na zimu ochena thitho “tatoonga madhu a Nlungu molimba rima.”—Mayir. 4:18-20, 29, 31.

⁶ Anamafunjedha a Yesu tatogumanana vyorucha vinango. Mofwanafwani-a, katana malemba okwakwanela malemba anaaliwa ali oyeva. Kavali vyokami-ana vyofunji-ana ninga vina i-yo malamboano. Thitho anama-arelao tafwanela laleela atu othene muviongelo vyo-iyana-iyana. Masiki angalive ira vyali vyorucha, anamafunjedha athindhale tatoira vyongo vyaoneya ninga vyo-oodeya—vangavirile vyawa vyoyeva, tatolaleya milanyu yapama “va yopanduchiwa iliyothene yavailambo yavathi.”—Akol. 1:6, 23.

7. Vyawa vyokwaranya 100 vivirile, n’nga arumiwi a Yohova taidhin’ni va vyongo vyaafunana Nlungu, n’nga aliwa tairilen’ni?

⁷ Malamboano. Yohova unave dhowana sogolela no va-a nguru atwee. Sogolela, dhela mwa madhu ovudheleliwa na zimu-ochena wa Nlungu. Thitho ninofwanya limbili la urumiwi wa Yesu na lamulo lee ira anama-arelee ira tadhowenave laba basa laromile liye. (Mat. 28:19, 20) Romela ndulimu fiedha mu Julho wa yawa ya 1881, magazine yatooda onga ira: “Kanaitaniwile venango zoziwa ira nilemeziwe venango dhiunjikela fuma, mbwenye ira ninonge na nongeliwa vyi-u, no laleela milanyu yapama.” Wa atu anova-iwa basa leli ixibukhu yaingeleji yakumi-iwile yawa ya 1919 yamuru oi Unomlabela i-yo ngororomeeya yaongile ira: “Basali linooneya ninga lorucha mbwenye tambwiye thitho nanguru dhee ninolilaba.” Ee, ninga Makristau oroma, abalala tatolimba rima i-nda basali tangana inyindelo yoi zimu ochena unoakami-a laleela atu othene. I-yo thitho ninodhowanave m’nyindela malamboano.

8-9. N’nga gulu la Yohova likanle li-indi-edhanga basan’ni naifunelo yofuna dhowi-a vasogolo basa lolaleela?

⁸ Gulu la Yohova lino-indi-edha basa mafarameto o-iyana-iyana volaleya milanyu yapama. Mafarameto enala vinango ti mabukhu okumi-iwa, “Viruthiruthi-Madrama a vidiyo” na makarinya o-indi-edheliwa basa volaleela, madhu a varadioni, thitho va chineneeva anothapulela viongelo vinjinji. Gulu la Yohova linolaba basa lilukulu vinjinji lothapulela va vyoireya vyilivyothene! Mwasiwa ngwan’ni? Ira atu othene tavwe milanyu yapama muiyongelo yiwa. Yohova kanasakulo, liye atoonga ira milanyu yapama inodha laleeliwa wa atu amaziza othene “tundu othene, viwongelo vyothene na waatu othene.”  (Apok. 14:6, 7) Liye unofuna ira milanyu ya Umwene ifwanyeye waatu othene.

⁹ N’nga waatu ale ali valimburo lorucha fiedheliwa namwasa okala wari mwapanda venango nyumba dha dhulu? Namwasa ofuna laleela atu anjinji gulu la Yohova linothapulela viongelo vyo-iyana-iyana moirela umboni vochena. Mofwanafwani-a, yawa ya 2001, Gulu Lotonga latorumeli-a ira ta-indi-edhenga basa makaxa a mabukhu na vyongo vinango ilambo ya Frasa thitho vandulivee na mamburo enango. Vyo-arela vyee vyali vyapama. Mu 2011, maporogarama owendi-a ndeka tatoromi-iwa ilambo ya Estados Unidos tatamoni unokala atu opingeya na vyongo vinjinji sidade ya ilambo ya Nova York. Yawa yoroma, mabukhwi-u okwakwana 102.129 na magazini okwakwana 68.911. Tatogaweliwa thitho atu okwakwana 4.701 tatovepa funjedha Bibilya! Vyevi vinooi-a ira zimu ochena wanokami-a basalo. Ngumwasiwa Gulu Lotonga latorumeli-a indi-edha basa gawela mabukhu vailambo yothene yavathi.

10. N’nga ninaire a-vi ira urumiwi-u nuuire pama?

¹⁰ Mwemo munaire nyo. I-ndi-edhani basa pama mwemo mafunji-edho aYohova munaveleliwa aliwa ninga vamigumanoni ya Ukristau. Labani basa vambo-i nagulu laurumiwi lolaleela mo-ojomba. Vevo munooda kami-iwa va vyongo vinofuneela nyo, thitho munooda limbi-iwa na vifwanafwani-o vyapama vya enango. Vilela muurumiwini. Muru wen’na untonithuucha ira ninooda kwakwaneli-edha vyofuna vya Nlungu, akala nan guru dhi-u, mbwenye na zimu ochena. (Zakar. 4:6) Kumi-avo vyothene eevi, ninolaba basa la Nlungu.

11. N’nga gulu lotonga la zana loroma la-indile a-vi basa movwelana ira vakale rendele vari vaatu a Nlungu?

¹¹ Hora ya arumiwi. Gulu lotonga Yerusalemu la-inda basa movwelana ira vakale rendele vari vaatu a Nlungu. (Mayir. 2:42) Mofwanafwani-a, mwasa oineliwa wangafiile mu 49 C.E. Gulu lotonga, mosogoleliwa na zimu  ochena, mipingo yatogaaneya vamwasa wen’na basa loleela lanoimwananeya masiki ira Ayuda mbalimbi-a vyevi, arumiwi na andimuwa katalandeile na vilemeelo vya Ayuda. Malo moira ee-no taing’ana vinoonga madhu a Nlungu na zimwee ochena ira waasogolele. (Mayir. 15:1, 2, 5-20, 28) N’nga vyo-arela vyee alin’ni? Yohova atoraeli-a yosakula yiwa, rendele na vwelana vyatokalavove, thitho basa lolaleela latodhowanave dhowa vasogolo.—Mayir. 15:30, 31; 16:4, 5.

12. Mwasiwa ngwan’ni vinooni-a ira rendele unooneya mu gulu la Yohova malamboano?

¹² Malamboano. Gulu la Yohova linolaba vofuna kaathei-a rendele vari vaatu a Yohova. Romela ndulimu fiedha mu 1895, Nsanja ya Olonda ya Zioni yoonga kalavo wa Kristu ya Novembro 15 yatokaana muru okumela va lemba la 1 Akoritiyo 14:40. Mwasuo unoonga ira: “Arumiwi tatokaana vyongo vinjinji ira tawandele pingo oroma vyovwelana naupama . . . Kavali yorucha iliyothene vodhowanave a-rela mwapolepole ‘vyongo vilembiwile ira vinilange.’” (Aroma 15:4) Mwaimbarimbari, funeya wa mwasa ovwelana na rendele kuweo waromi-idhe Makristau oroma oneelangave mu gulu la Yohova malamboano. Mofwanafwani-a: Aakale ira munaamafunjedha Nsanja ya Namaing’anela pingo—unango venango muilambo inango—mooidhiwa wafuna ireela funjedhao thitho na namwasa wafuna dhaongiwa. Va hora yenio munokala othathuwa! Kavali yongo inango mbwenye zimu wa Nlungu baa-i ngunofuna iri-a ira vakale ivwelano ya pereso yavadhulu!—Zef. 3:9, onani madhu a chindo.

13. Movwelana na lemba la Tiyago 3:17 mathuuleloni mwi-u, ninofwanela vifuka vyofuka viivi?

¹³ Vinofwanela nyo ira. Yohova unofuna ira atwee takale “ovwelana movwelana na zimu ochena na rendele ovwelania.” (Aef. 4:1-3) Vifukeni ira: ‘N’nga ndinolimbi-a ivwelano na rendele pingoni? N’nga ndinovwela anondisogolela? N’nga atu enango anondinyindela ira nditokaana izo pingoni? N’nga ndinolokota hora na kami-a thitho ndinofunechecha lambela?’ (Muleri Tiyago 3:17.) Akala munoona ira vatokala vyongo vinango  vyofwanela chinja vepani dhela mu lobelo ira muva-iwe zimu ochena. Mwarumela ira zimu uuombeni umutwinyu no chinja vyoira vinyu abali na arongola anodha udhiveliwanani vinjinji ninga m’mbo-i wa pingoni.

14. Movwelana na lemba la Akolose 1:9, 10, n’nga Yohova afunji-idhe a-vi atwee vyawa zana loroma?

¹⁴ Vyawa zana vivirile. Yohova unodhiveliwana vinjinji vofunji-a atwee. (Masal. 32:8) Liye unofuna ira tam’mwidhiwe, tam’dhiveliwena, thitho takaena ingumi yodhowa nodhowa ninga a-imee odhiveliwiwa. Vyothene eevi kavinaodeye vo-okala funjedha (Juwau 17:3) Yohova ato-indi-edhela basa pingo Waikristau oroma vofunji-a atwee. (Muleri Akolose 1:9, 10.) Zimu ochena—“wenuo uli namakami-a” wenuo walanyedhiile Yesu—watoira ikundu yee yofuneya vinjinji. (Juwau 14:16) Madhu a Nlungu tatova-a anamafunjedha dodoliso linjinji thitho latowathuucha vyongo vinjinji vyevyo Yesu vyafunji-idhe liye naviira. Ninga mwemo mwalembiwele aliwa milanyu yapama. Idhiwa vyevi watolimbi-a iroromelo ya Makristau oroma thitho m’dhiveliwana wiwa Nlungu, na mwanee, gumani-avo dhiveliwana unango na fwee.

15. N’nga munoona ira Yohova unanakwakwaneli-edha vyolanyedha vyee vinofwanyeya va lemba la Esaya 2:2, 3?

¹⁵ Malamboano. Yohova atovaela onga ira “m’malambo omari-a,” atu amitundu yothene anodha dhowa mwangoni ira tamafunji-iwe ndhila dhee. (Muleri Esaya 2:2, 3.) Ninoona ira ulosula unaakwakwanela lambela waimbarimbari utogweli-iwa kwaranya mitundu yothene inolambela mo-ofwanelela. Pwando lauzimu lilukulu lelo Yohova linovelela liye! (Esaya 25:6) Dhela mwa “dhaari ororomeleya na wa zelu” liye unoniva-a a-kala vyongo vinjinjive mbwenye thitho unoniva-a vyongo vinango vyodabwi-a ninga  vyolemba na masinema thitho vyongo vinango vyapama gumani-avo mavidiyo. (Mat. 24:45) Ninovivwa ninga Elihu, wenio ali fwee wa Yobu aongile ira: “N’nga [Nlungu] ngunamafunji-a oi a-vi?”—Yobo 36:22.

16. N’nga munofwanela ira a-vi ira muode ulukula muuzimuni?

¹⁶ Vinofwanela nyo ira. Zimu wa Nlungu unoukami-ani i-ndi-edha basa vinoleri nyo m’madhu a Nlungu. Muvepenga ninga mwairele wamasalimo dhela mulobelo ira: “Mudifunji-e nyo Yohova, ndhila dhinyu. Ndiwende muimbarimbari yinyu. I-ndedhani rimanga ira uodenga ova dhina linyu.” (Masal. 86:11) Ngumwasiwa dhowanave udya yodya yeyo Yohova inovelela liye dhela mwa madhwee thitho gulu lee, mwaimbarimbar ifunelo yi-u kai ira nifwanye dodoliso linjinji chofuna kaathei-a imbarimbari rimani mwi-u, no-indi-edhela basa vaingumi yi-u. Zimu wa Yohova unooda nikami-a irana vyevyi ninofwanela thitho limbi-a abali na arongoli-u. (Aeb. 10:24, 25) Mwasiwa ngwan’ni? Mwasiwa tibanja li-u lauzimu. Vepani ira zimu wa Nlungu uukami-eni wakula vamigumanoni ya Ukristau thitho iranga vyongo mwapama vinjinji thitho vinokala vyapama vinjinji mwafwanyeyanga vamigumano yokala ninga yen’na. Mwandhila yen’na munoona ira Yohova na mwanee Yesu anodhiveliwana “mabila” a pereso yavadhulu.—Juwau 21:15-17.

17. N’nga munaoni-e a-vi ira munokami-a gulu la Yohova mororomeleya?

¹⁷ Mwachineneeva, gulu li-adhi vailambo yavathila tilelo linosogoleliwa na zimu wa Nlungu. Ngumwasiwa i-ndani basa mororomeleya mu gulu la Yohova. Thonyi-edhani dhivelo la Nlungu lo-okaana sakulo waatu anoalaleela nyo milanyu yapama uliwethene unaafwanye nyo. Sazi-ani dhivelo lee volimbi-a ivwelano pingoni. Ee-no vwelani namafunji-inyu nlukulu mo-indi-edha basa pwando lauzimu lelo linovelela liye. Mwaira ee-no ilambo ya Satanila yafiyanga komoni nyo kamunodha ova. Malo moova, nyo munodha imela vari vaatu aanamalambela ororomeleya enao anolaba mugulu la Yohova.