1. Ki lika mañi zebaswanela kuzwelapili kueza Bakreste babakolobelizwe?

KANA mukolobelizwe? Haiba ki cwalo, uzibe mubonisize fapilaa nyangela kuli munani tumelo ku Jehova mi mwatabela kuswalisana ni kopano yahae. * Nihakulicwalo, muswanela kuzwelapili kutiisa tumelo yamina ku Jehova. Mi muswanela kuzwelapili kulumela kuli Jehova uitusisa kopano yahae kacenu.

2-3. Jehova uetelela cwañi kopano yahae kacenu? Mufe mitala.

² Kacenu, Jehova uetelela kopano yahae ka nzila yelutusa kuziba mwainezi, kuziba mulelo wahae, ni likuka zahae. Halunyakisiseñi lika zetaalu zebonisa mwainezi Jehova, ili zeluiponela mwa kopano yahae.

³ Sapili, “Mulimu haketululi.” (Lik. 10:34) Jehova naafile Mwanaa hae sina “tiululo yelikanelela ya batu kaufela” kabakala kuli walulata. (1 Tim. 2:6; Joa. 3:16) Jehova uitusisa batanga bahae kuli bashaele taba yende kwa batu kaufela, ilikuli batu babañata batusiwe ki tiululo yeo. Sabubeli, Jehova ki Mulimu wa kozo ni yaeza lika ka swanelo. (1 Makor. 14:33, 40) Ki lona libaka batanga bahae habanani kozo ni habaswalisani. Sabulaalu, Jehova ki “Muluti Yapahami.” (Isa. 30:20, 21) Ki lona libaka kopano yahae haieza moikonela kaufela kuluta babañwi Linzwi lahae leliñozwi ka kususumezwa ki moya, ibe mwa puteho kamba mwa bukombwa. Mizwale ni likaizeli ba mwa puteho ya mwa linako za baapositola nebabonisize cwañi lika zetaalu zeo ka kulikanyisa mwainezi Jehova? Batanga ba Jehova kacenu baeza cwañi cwalo? Mi  moya okenile ukona kumitusa cwañi hamunze musebeleza Jehova ka kuswalisana ni kopano yahae kacenu?

4. Ka kuya ka liñolo la Likezo 1:8, Jesu naalaezi balutiwa bahae kuezañi, mi ki tuso mañi yene bakafiwa?

⁴ Mwa linako za kwa makalelo a Bukreste. Jesu naakutalize lushango lone lutusize batu kaufela kuba ni sepo ya za kwapili. (Luka 4:43) Naalaezi balutiwa bahae kueza musebezi wanaakalisize, ili kushaela taba yende “kuyo fita kwa libaka za kwahule hahulu za lifasi.” (Mubale Likezo 1:8.) Nihakulicwalo, nebasike bakona kueza musebezi wo ka maata abona. Nebaka tokwa kutusiwa ki moya okenile, yena “mutusi” yene basepisizwe ki Jesu.—Joa. 14:26; Zak. 4:6.

5-6. Moya okenile neutusize cwañi balutiwa ba Jesu?

⁵ Balutiwa ba Jesu nebaamuhezi moya okenile fa lizazi la Pentekota ya 33 C.E. Ka kutusiwa ki moya wo, Bakreste bao bakala kukutaza honafo feela, mi mwa nako yekuswani, nebatusize batu babañata-ñata kuutwa taba yende. (Lik. 2:41; 4:4) Balutiwa hane balwanisizwe, nebasika saba kono nebakupile Mulimu kuli abatuse. Nebalapezi kuli: “Utuse batanga bahao kuzwelapili kubulela linzwi lahao ka bundume.” Hamulaho wa kulapela, batala moya okenile, mi bakala ‘kubulela linzwi la Mulimu ka bundume.’—Lik. 4:18-20, 29, 31.

⁶ Balutiwa ba Jesu nebakopani ni butata bobuñwi hape. Ka mutala, nebanani feela litaba lisikai za mwa Mañolo. Nebasina lihatiso zenetomile fa Bibele zelunani zona kacenu. Mi balutiwa nebatokwa kukutaza kwa batu bane babulela lipuo zeshutana-shutana. Kusina taba ni miinelo yeo kaufela, balutiwa bane banani tukufalelo bao, nebaezize nto yekomokisa hahulu—nebakutalize taba yende “mwa pupo kaufela ye mwatasaa lihalimu” mwa nako yekuswani feela.—Makolo. 1:6, 23.

7. Lilimo zefitelela 100 kwamulaho, batanga ba Jehova nebazibile cwañi zanaatokwa Mulimu kuli baeze, mi nebaezize cwañi hase bazibile zateñi?

⁷ Mwa mazazi aluna. Jehova usazwelapili kuetelela batanga bahae ni kubatusa kueza tato yahae. Uetelela batanga bahae sihulu ka kuitusisa Linzwi lahae leliñozwi ka kususumezwa ki moya okenile. Mwateñi kunani litaba zebulela za bukombwa bwa Jesu ni taelo yanaafile balutiwa bahae ya kuli bazwelepili kueza musebezi wanaakalisize. (Mat. 28:19, 20) Ka silimo sa 1881, mwa kweli ya July, magazini ya Tawala ya Mulibeleli ya Sikuwa neibulezi cwana: “Nelusika ketiwa ka mulelo wa kuli lukone kukutekiwa ki batu kamba kuli luipatele sifumu, kono neluketilwe kuli luitusise zelunani zona kaufela kukutaza taba yende.” Bukanyana ya Sikuwa yenehatisizwe ka silimo sa 1919, ili yenani toho ya taba yeli, Babafilwe Musebezi wa Kukutaza (To Whom the Work Is Entrusted) neibulezi kuli: “Musebezi wa kukutaza ubonahala kuba omutuna, kono ki musebezi wa Mulena, mi ka tuso yaka lufa, lukapeta hande musebezi wo.” Kaniti, sina Bakreste ba kwa makalelo, mizwale bao nebabonisize bundume ka kueza mone bakonela kaufela kukutaza, mi nebasepile kuli moya okenile neuka batusa kukutaza kwa batu ba mufuta kaufela. Ni luna kacenu lunani buikolwiso bwa kuli moya okenile uka lutusa.

8-9. Kopano ya Jehova iitusisize mikutalezo yecwañi kuli ishaele taba yende?

⁸ Kopano ya Jehova iitusisize lisebeliso zeshutana-shutana mwa musebezi wa kuhasanya taba yende. Ka mutala, iitusisize lisebeliso zecwale ka litaba zehatisizwe, vidio yebonisa za pupo (Photo-Drama of Creation), fonogirafu, limota zenani lipangaliko za mulumo, wayalesi, mi cwanoñu fa, isweli kuitusisa likompyuta ni Intaneti. Hape kopano ya Mulimu isweli kueza musebezi omutuna wa kutoloka lihatiso mwa lipuo zeñata-ñata kufita lili kaufela! Kabakalañi? Kuli batu ba mufuta kaufela bautwe taba yende mwa lipuo zabona. Jehova haketululi;  naapolofitile kuli taba yende ya Mubuso neika kutazwa “kwa macaba kaufela ni mishobo ni malimi ni batu.” (Sin. 14:6, 7) Ubata kuli batu kaufela bautwe taba yende ya Mubuso.

⁹ Kono kucwañi haiba halukoni kukutaza kwa batu babañwi bakeñisa kuli bapila mwa mandu akantelwa kamba ainzi mwa lukwakwa, ili molusa koni kukena? Kuli batu babacwalo bakone kuutwa taba yende, kopano ya Jehova ilukisize linzila zeshutana-shutana za kukutaza ka zona kwa nyangela. Ka mutala, ka silimo sa 2001, ba Sitopa Sesietelela nebalumelelize kuli kube ni mukutalezo wa kuitusisa likalani za lihatiso kwa France, mi hasamulaho ni mwa libaka zeñwi. Mukutalezo wo neutusize. Mwa 2011, nekukalisizwe tukiso yenca kwa America mwa libaka zeñwi mone kufumaneha hahulu batu babañata mwa Muleneñi wa New York. Hamulaho wa silimo silisiñwi kuzwa foikalela tukiso yeo, bahasanyi nebakonile kufa libuka ze 102,129 ni limagazini ze 68,911 kwa batu. Mi batu ba 4,701 nebakupile kuituta Bibele! Kusina kukakanya, moya okenile neu batusize kueza musebezi wo. Kabakaleo, ba Sitopa Sesietelela nebalumelelize mukutalezo wa kuitusisa likalani mwa lifasi kaufela.

10. Ki lika mañi zeluswanela kueza kuli luekeze kwa buikoneli bwaluna mwa bukombwa?

¹⁰ Zemukona kueza. Musebelise lituto zalufa Jehova kwa mikopano ya puteho ka za mwakukutaleza. Mukutazange hamoho ni sikwata sa sebelezo ya mwa simu semuswalisana ni sona. Mizwale ni likaizeli babali mwa sikwata semuli ku sona baka mitusa kuekeza kwa buikoneli bwamina mwa bukombwa, mi mukaituta zeñata kwa mutala wabona omunde. Muzwelepili kukutaza, kusina taba ni miinelo yetaata yemukopana ni yona. Liñolo fokutomile toho ya taba yelunyakisisa, lilutusa kulemuha kuli moya okenile ki ona olutusa kueza tato ya Mulimu; haluezi cwalo ka maata aluna. (Zak. 4:6) Lunani buikolwiso bwa kuli Mulimu uka lufa maata alutokwa, kakuli lueza musebezi wahae.

11. Ba Sitopa Sesietelela ba mwa linako za baapositola nebatusize cwañi kuli kube ni kozo ni swalisano mwahalaa batu ba Mulimu?

¹¹ Mwa linako za baapositola. Ba Sitopa Sesietelela mwa Jerusalema nebaezize mone bakonela kaufela kutusa batu ba Mulimu kuli bapilisane  ka kozo ni kuswalisana. (Lik. 2:42) Ka mutala, taba ya mupato hane izuhile ibato ba ka silimo sa 49 C.E., ba Sitopa Sesietelela nebanyakisisize taba yeo ka kuetelelwa ki moya okenile. Taba ye hane isike yatatululwa, puteho neika aluhana, mi musebezi wa kukutaza neusike wazwelapili. Nihaike kuli baapositola ni baana-bahulu neli Majuda, nebasika latelela sizo sa Sijuda kamba lituto za Sijuda hane batalima taba yeo. Kono nebaitingile kwa Linzwi la Mulimu, mi nebakupile moya wahae kubatusa kueza katulo yelukile. (Lik. 15:1, 2, 5-20, 28) Kueza cwalo nekutusize cwañi? Jehova naafuyauzi katulo yabona, kwaba ni kozo ni swalisano mwa puteho, mi musebezi wa kukutaza wazwelapili.—Lik. 15:30, 31; 16:4, 5.

12. Ki lika mañi zebonisa kuli mwa kopano ya Jehova kacenu kunani kozo ni swalisano?

¹² Mwa linako zaluna. Kopano ya Jehova iezize moikonela kaufela kutusa batu bahae kuzwelapili kuswalisana ni kupila ka kozo. Ka mutala, ka silimo sa 1895, mwa Tawala ya Mulibeleli ya Sikuwa ya November 15 (Zion’s Watch Tower and Herald of Christ’s Presence) nekunani taba yenenani toho ya taba yeli, “Ka Swanelo, ni ka Mulao” yenetomile fa liñolo la 1 Makorinte 14:40. Mwa taba yeo nekunani manzwi ali: “Baapositola nebañozi litaba zeñata kwa puteho ya kwa makalelo ka za kueza lika ka mulao . . . Ki kwa butokwa hahulu kuli luzwelepili kulatelela ka tokomelo litaba ‘zeñozwi kale kuli lilulute.’” (Maro. 15:4) Kopano ya Jehova kacenu izwelapili kusebeza ka taata kuli ituse liputeho kuswalisana ni kupila ka kozo sina mone kuinezi mwa linako za baapositola. Ka mutala, hane mukayo potela puteho yeñwi kamba kuya kwa naha yeñwi, nemuka ziba moika zamaisezwa Tuto ya Tawala ya Mulibeleli mi nemuka ziba kuli ki tuto ifi yekanyakisiswa sunda yeo. Mi honafo feela nemuka ikutwa kulukuluha. Ki moya wa Mulimu feela okona kutahisa kuli batu ba Mulimu baswalisane ka nzila yecwalo.—Zef. 3:9.

13. Hamulaho wa kunyakisisa liñolo la Jakobo 3:17, ki lipuzo mañi zeluswanela kuipuza?

¹³ Zemukona kueza. Jehova ubata kuli batanga bahae ‘balike ka taata kubuluka buñwi bwa moya ka kozo yetamahanya.’ (Maef. 4:1-3) Kacwalo, muipuze kuli: ‘Kana natusanga kuli kube ni kozo ni swalisano mwa puteho? Kana nautwa babaetelela? Kana babañwi banisepa, sihulu  haiba ninani buikalabelo mwa puteho? Kana nabulukanga nako, mi kana natabela kutusa babañwi?’ (Mubale Jakobo 3:17.) Haiba mulemuha kuli mutokwa kueza licinceho, mukupe Mulimu kuli amife moya okenile kuli umituse. Haiba mutuhelela moya okenile kumitusa kucinca butu bwamina ni kumitusa mwa lika zemueza, mizwale ni likaizeli bamina baka milata mi bakaitebuha zemueza mwa puteho.

14. Ka kuya ka liñolo la Makolose 1:9, 10, ki lika mañi zene batokwa Bakreste ba kwa makalelo, mi Jehova naabatusize cwañi kufumana lika zeo?

¹⁴ Mwa linako za baapositola. Jehova walata kuluta batanga bahae. (Samu 32:8) Ubata kuli bana bahae babalatwa bao bamuzibe, kumulata, ni kupila kuya kuile. Taba yeo neisike yakonahala kambe Jehova naasika lutusa kumuziba. (Joa. 17:3) Jehova naaitusisize puteho ya mwa linako za baapositola kuli alute batanga bahae. (Mubale Makolose 1:9, 10.) Moya okenile, yena “mutusi” yanaasepisizwe ki Jesu, ni ona neutusize balutiwa bahae. (Joa. 14:16) Neu batusize kuutwisisa hande Linzwi la Mulimu ni kubahupulisa litaba zeñata zanaabulezi Jesu ni lika zanaaezize, ili zeneñozwi mwa Libuka za Evangeli hasamulaho. Kuziba litaba zeo nekutusize Bakreste ba kwa makalelo bao kutiisa tumelo yabona, kulata Mulimu, Mwanaa hae, ni mizwale ni likaizeli babona.

15. Jehova utalelelize cwañi sepiso yahae ye kwa liñolo la Isaya 2:2, 3?

¹⁵ Mwa linako zaluna. Jehova naabulezi cimo kuli “kwa mafelelezo a mazazi,” batu ba macaba kaufela nebakaya kwa lilundu lahae la swanisezo kuli bayo lutiwa linzila zahae. (Mubale Isaya 2:2, 3.) Lusweli lwaiponela bupolofita bo habutalelezwa kacenu. Bulapeli bwa niti bupahamisizwe fahalimwaa bulapeli bwa buhata kaufela. Jehova usweli kufa batu bahae lico za kwa moya zeñata hahulu! (Isa. 25:6) Uitusisa “mutanga yasepahala yanani kutwisiso” kuli alufe lico zeñata za kwa moya, ili lico zende zeshutana-shutana, zecwale ka litaba za kubala,  lingambolo, mavidio a maswaniso a tudoli, ni mavidio amañwi. (Mat. 24:45) Luikutwa sina mwanaaikutwezi Elihu mulikanaa Jobo, yanaabulezi kuli: “Ki ufi muluti yaswana ni [Mulimu]?”—Jobo 36:22.

16. Ki lika mañi zemuswanela kueza kuli mutiye kwa moya?

¹⁶ Zemukona kueza. Moya wa Mulimu uka mitusa kusebelisa zemubalile ni zemuitutile mwa Linzwi lahae. Mulapele sina mwanaalapelezi muñoli yomuñwi wa samu, yanaaize: “Unilute nzila yahao, wena Jehova. Nikazamaya mwa niti yahao. Unituse kuba ni pilu iliñwi kuli nisabe libizo lahao.” (Samu 86:11) Kacwalo, muzwelepili kuca lico za kwa moya zasweli kulufa Jehova ka kuitusisa Linzwi lahae ni kopano yahae. Hamuswaneli feela kuituta litaba zefumaneha mwa Bibele. Kono litaba zemuituta liswanela kumifita kwa pilu, mi muswanela kulisebelisa mwa bupilo bwamina. Moya wa Jehova wakona kumitusa kueza cwalo. Hape muswanela kususueza mizwale ni likaizeli bamina. (Maheb. 10:24, 25) Kabakalañi? Kabakala kuli mizwale ni likazeli bamina ki lubasi lwamina lwa kwa moya. Mukupe Mulimu kuli amife moya wahae kuli umituse kufa likalabo zezwelela kwa pilu hamuli kwa mikopano ya puteho ni kuli umituse kupeta hande buikalabelo bwamina hamuli kwa mikopano yeo. Hamueza cwalo, mubonisa Jehova ni Mwanaa hae kuli mwalata “lingu” zabona zebaanga kuba za butokwa.—Joa. 21:15-17.

17. Mukona kubonisa cwañi kuli mwaswalisana ni kopano ya Jehova ka busepahali?

¹⁷ Hona cwale-cwale fa, kopano yeetelelwa ki moya wa Mulimu ki yona feela yekaba teñi fa lifasi. Kacwalo, muzwelepili kuswalisana hahulu ni kopano ya Jehova. Mulikanyise lilato lanani lona Mulimu kwa batu kaufela ka kushaela taba yende ku bona. Jehova ki Mulimu wa kozo ni yaeza lika ka swanelo; kacwalo mumulikanyise ka kutusa kuli kube ni kozo mwa puteho. Mi muteeleze ku Muluti wamina yapahami ka kuca lico za kwa moya zasweli kufa batanga bahae. Mi lifasi la Satani halika fela, hamuna kukenelwa ki sabo. Kono mukaba ni bundume mi mukazwelapili kuswalisana ni kopano ya Jehova ka busepahali hamoho ni mizwale ni likaizeli bamina.