1. Chumanyi chatela kutwalekahu kwila mukwaKristu wapapatishewa?

KOMANA mwapapatishewa? Neyi mwapapatishewa, mwamwekeshili chikuhwelelu chenu mudi Yehova nawa nenu munakukeña kuzatila hamu nakuloñesha kwindi. * Hela chochu, mwatela kutwalekahu kukolesha chikuhwelelu chenu mudi Yehova. Nawa mwatela cheñi kutwalekahu kukuhwelela nenu Yehova natwalekihu kuzatisha kuloñesha kwindi makonu.

2-3. Munjilanyi Yehova mwalombwelañayi kuloñesha kwindi makonu? Hanenu yakutalilahu.

² Makonu, Yehova nakulombola kuloñesha kwindi munjila yamwekeshaña chekalayi, nkeñelu yindi ninshimbi jindi. Tuhanjekenu hayilwilu yisatu yaYehova yamwekanaña mukuloñesha kwindi.

³ Chatachi, “Nzambi hakweti chaambuku.” (Yilw. 10:34) Muloña wakukeña, Yehova wahanini Mwanindi kwikala “ifutu danyiloña dakukuula nachu antu ejima.” (1 Tim. 2:6; Yow. 3:16) Yehova wazatishaña antu jindi kushimwina nsañu yayiwahi kudi antu ejima anakukeña kutiyilila, wakwashaña ejima kulonda aheteli mwifutu danyiloña. Chamuchiyedi, Yehova hiNzambi wakutela nawa wakuwunda. (1 Kor. 14:33, 40) Dichi, twatela kukuhwelela netu akwakudifukula indi atela kumukalakelaña mukutela nimukuwunda. Chamuchisatu, Yehova ‘hiNtañishi Wabadika.’ (Isa. 30:20, 21) Dichi, kuloñesha kwindi kwasha muchima hakudizisha antu Izu dindi donenewa, muchipompelu nihakushimwina. Indi iyi yilwilu yisatu yaYehova ayimwekesheli ñahi muchipompelu chawakwaKristu akusambila?  Anakuyimwekesha ñahi makonu? Nawa spiritu yajila yinateli kuyikwasha ñahi hampinji yimunakuzatila hamu nakuloñesha kwaYehova makonu?

4. Neyi chinashimuni Yilwilu 1:8, Yesu wayilejeli atumbanji twindi kwiladi, nawa wukwashunyi watambwililiwu?

⁴ Mumafuku awakwaKristu akusambila. Nsañu yashimwinineñayi Yesu yayikwashili antu ejima kwikala nakuchiñeja. (Luka 4:43) Wayilejeli atumbanji twindi kutwalekahu kuzata mudimu watachikiliyi, kuhana wunsahu “kwakumina iseki dejima.” (Tañenu Yilwilu 1:8.) Hela chochu, hiyatwesheli kuzata iwu mudimu muñovu yawuku. Akeñekeleña “nkwashi” dikwila nawu spiritu yajila, yayishiikiliyi Yesu.—Yow. 14:26; Zek. 4:6.

5-6. Spiritu yajila yayikwashili atumbanji twaYesu munjilanyi?

⁵ Atumbanji twaYesu atambwilili spiritu yajila haPentekosta, 33 C.E. Nawukwashu waniyi spiritu, atachikili kushimwina nawa hashimbwili wanyi makombakaji awantu etejeli nsañu yayiwahi. (Yilw. 2:41; 4:4) Chatachikili ikañesha, atumbanji hiyatiyili womaku, ilaña alombeli kudi Nzambi kulonda yayikwashi. Alombeli nawu: “Yikwashi anduñu jeyi kulonda atwalekihu kuhosha izu deyi nakuhamuka.” Enzeli naspiritu yajila nawa atwalekelihu “[kuhosha] mazu aNzambi nakuhamuka.”—Yilw. 4:18-20, 29, 31.

⁶ Atumbanji twaYesu amweni cheñi kukala kukwawu. Chakutalilahu, hiyadiña nanyivuñilu yaNsona yayivuluku. Hiyadiña nanyikanda yakuzatisha hakudizisha yitukweti makonuku. Nawa atumbanji ashimwinineña kudi antu ahosheleña madimi amboka-mboka. Hichikweti muloña naniku kukalaku, awa atumbanji adikita azatili iwu mudimu wamwekeneña neyi wakala hadi yaaka kwakwihi na 30, ashimwinini nsañu yayiwahi “kuyuma yejima yekala mwishina dewulu.”—Kol. 1:6, 23.

7. Hadi yaaka kubadika ha 100 yinahitihu, ambuña aYehova elukili ñahi yuma yakeñeleñayi Nzambi kudi wena, nawa elili ñahi?

⁷ Makonu. Yehova natwalekihu kulombola antu jindi nikuyinka ñovu yakwila nkeñelu yindi. Kakavulu wayilombolaña antu jindi kuhitila Mwizu dindi donenawu naspiritu yajila. Mwizu dindi twawanañamu nsañu yahosha hamudimu waYesu nilushimbi lwayilejeliyi akwakumulondela nindi atwalekihu kuzata mudimu watachikiliyi. (Mat. 28:19, 20) Magazini yimu yamuJuly 1881 yahosheli nawu: “Hiyatutambikili hela kutuwayisha kulonda tutambwileña mpuhu nikwikala namahetaku, ilaña kulonda kuzatisha yuma yejima yitukweti kushimwina nsañu yayiwahi.” Mukanda wumu waEnglish wedishiliwu mu 1919 wahosheleña nawu Enkawu Mudimu, wahosheli nawu: “Mudimu wunakumwekana neyi wunasweji kutoha, ilaña himudimu waMwanta nawa nawukwashu windi tukutwesha kuwuzata.” Eña, kufwana akwaKristu akusambila, awa amanakwetu ahamuka adihanini kuzata iwu mudimu nawa akuhweleli nawu spiritu yajila yikuyikwasha kushimwina kudi antu ejima. Ninetu twakuhwelela netu spiritu yajila yikutukwasha.

8-9. Njilanyi jinazatishi kuloñesha kwaYehova hakutandisha nsañu yayiwahi?

⁸ Kuloñesha kwaYehova kunazatishi yozelu yikukweti hakutandisha nsañu yayiwahi. Iyi yozelu munabombeli nyikanda yakupulinta, vidiyo “yaPhoto-Drama of Creation,” nyotoka yadiña nayihoshelu, nsañu yahachikuzulemba, kushilahu niyuma yikwawu yidiku makonu, chidi neyi makompyuta niintaneti. Kuloñesha kwaYehova kunabalumuni nyikanda mumadimi amavulu kubadika kunyima. Muloñadi? Kulonda antu ejima atiyi nsaña yayiwahi mumadimi awu. Yehova hakweti chaambuku; washimwineñahu dehi nindi nsañu yayiwahi  akayishimwina “akwanyuza yejima, akwanyichidi yejima, akwamadimi ejima niantu ejima.” (Chim. 14:6, 7) Nakukeña antu ejima kutiya nsañu yaWanta.

⁹ Indochu antu ejima itunateli kubula kushimwina hamatala awu, hamwaha muloña wakwila adi mumpwembu hela akweti anhembi hayiisu? Hakwila nawu tuyishimwini awa antu, Yehova wakwashili kuloñesha kwindi kushaku njila jamboka-mboka jakushimwinamu kudi antu amavulu. Chakutalilahu, mu 2001, Izanvu Dalombolaña detejeli kuzatisha jingolofwana nijimesa jakushahu nyikanda muFrance, nkumininaku nimumatuña amakwawu. Mwafumini yuma yayiwahi. Mu 2011 atachikili kuzatisha jingolofwana muUnited States mumaluña mwasweja antu amavulu amuNew York City. Muchaaka chatachikiliwu, ahanini nyikanda 102,129 nimagazini 68,911. Nawa antu 4,701 alombeli kuyidizisha Bayibolu. Chakadi nikujina, Yehova wakwashili iwu mudimu kuzatisha spiritu yajila. Dichi, Izanvu dalombolaña detejeli kuzatisha jingolofwana mumudimu wakushimwina mukaayi kejima.

10. Yumanyi yitwatela kwila hakwila tuwahishiku ntañishilu yetu?

¹⁰ Yuma yimwatela kwila. Zatishenuña yuma yatudizishañayi Yehova hakupompa kwawakwaKristu. Zatenuña mpinji yejima nezanvu denu dakushimwina. Amanakwetu niahela mwizanvu denu akuyikwasha kwikala antañishi amawahi nawa akuyikolesha nayilwilu yawu yayiwahi. Umikenuña kukala kumunakumona mumudimu wakushimwina. Neyi chinashimuni nsona hanashindameni chibaaba, twelaña nkeñelu yaNzambi nawukwashu waspiritu yajila bayi nañovu jetuku. (Zek. 4:6) Muloña tunakuzata mudimu waNzambi.

11. Indi izanvu dalombolaña mumafuku awakwaKristu akusambila dazatili ñahi mukunuñañana kulonda dileti kuwunda hadi antu jaNzambi?

¹¹ Mumafuku awakwaKristu akusambila. Izanvu dalombolaña muYerusalema dazatili mukunuñañana hakwila nawu dileti kuwunda nikutela hadi antu jaNzambi. (Yilw. 2:42) Chakutalilahu, chelili kwikali kukala hansañu yakwalama mu 49 C.E., izanvu dalombolaña  nawukwashu waspiritu yajila datalili haniyi nsañu. Neyi chipompelu chabulili kunuñañana hamuloña waniku kukala, kachi hiyadi kuzata mudimu wakushimwina chiwahiku. Hela chakwila adiña aYudeya, apostolu niakulumpi amakwawu hiyaluwankeni nachisemwa chawaYudeya hela kwiteja antu alondeleleña chisemwa chawaYudeya kuyiluwañeshaku. Ilaña asandujoleleña Mwizu daNzambi nikulomba spiritu yajila kuyikwasha. (Yilw. 15:1, 2, 5-20, 28) Chumanyi chafuminimu? Yehova wakiswilili mwafuukwiliwu, kuwunda nikunuñañana kwatwalekelihu nawa mudimu wakushimwina wayililiku hambidi.—Yilw. 15:30, 31; 16:4, 5.

12. Chumanyi chinakumwekesha nawu mukuloñesha kwaYehova makonu mudi kunuñañana nikuwunda?

¹² Makonu. Kuloñesha kwaYehova kunazati nañovu kukwasha antu jaYehova kutwalekahu kwikala anuñañana nikwikala mukuwunda. Mu 1895 Zion’s Watch Tower niHerald of Christ’s Presence yaNovember 15, mwadiña chibaaba chahosheleña nawu “Mukutelela Nawa Mukuloña,” kushindamena ha 1 Akorinda 14:40. Ichi chibaaba chahosheli nawu: “Apostolu asonekeleli chipompelu chakusambila nsañu yayivulu kutalisha hakutela . . . Chalema kutwalekahu kulondela ‘yuma yejima yasonekeliwu kunyima kulonda etu tudiziliku.’” (Rom. 15:4) Kuloñesha kwaYehova kunakuzata nañovu kulonda yipompelu yitwalekihu kwikala yanuñañana nikwikala mukuwunda neyi chichadiña kudi akwaKristu akusambila. Chakutalilahu, neyi chakwila muya nakupompa Kaposhi Kakutalila muchipompelu chacheñi hela kwiluña dacheñi, mukwilukila chadimu chakulombolawu Kaposhi nichibaaba chimukuhanjekañahu. Mukwikala akasunuka. Spiritu yaNzambi hohu diyi yinateli kuletesha hekali kunuñañana.—Zef. 3:9

13. Kwesekeja naYakoba 3:17, malwihwinyi itwatela kudihula?

¹³ Yuma yimwatela kwila. Yehova nakukeña antu jindi kwikala ‘mukuwunda wumu namukwawu nikuhemba kunuñañana kwekalawu naku kuhitila mudi spiritu yajila.’ (Efwe. 4:1-3) Dihulenu nenu: ‘Komana naletaña kunuñañana nikuwunda muchipompelu? Komana novwahilaña antu anakulombola? Komana  amanakwetu anateli kunshindamena sweje-e neyi nikweti mudimu muchipompelu? Komana nadikita, nakwashaña antu nikufwila kukalakela akwetu?’ (Tañenu Yakoba 3:17.) Neyi mumona nenu hadi himwatela kuzatila, lombenu spiritu yajila yiyikwashi. Neyi mwiteja nenu spiritu yiyikwashi kuhimpa chimwekala niyilwilu yenu, amanakwenu niahela akuyikeña chikupu nawa akuyilemesha.

14. Kwesekeja naAkolosi 1:9, 10, Yehova wayidizishili ñahi antu jindi mumafuku awakwaKristu akusambila?

¹⁴ Mumafuku awakwaKristu akusambila. Yehova wakeña nankashi kudizisha antu jindi. (Mas. 32:8) Nakukeña amwiluki, amukeñi nawa ashakameña haya nyaaka neyi anyanindi akeñayi. Yuma yejimiyi hiyinateli kuzatika chakubula kuyidizishaku. (Yow. 17:3) Yehova wazatishili chipompelu chawakwaKristu akusambila kudizisha antu jindi. (Tañenu Akolosi 1:9, 10.) “Nkwashi” dikwila nawu spiritu yajila, yayishiikiliyi Yesu, yazatili mudimu weneni. (Yow. 14:16) Yayikwashili atumbanji kutiyishisha Izu daNzambi nikwanuka yuma yejima yahosheli Yesu niyuma yeliliyi yenjili nakusonekawu muNyikanda yaNsañu Yayiwahi. Iku kwiluka kwakolesheli chikuhwelelu chawakwaKristu akusambila nawa amukeñeli Nzambi, Mwanindi nikudikeña wumu namukwawu.

15. Munjilanyi munashikijiliyi Yehova chikaninu chindi chidi haIsaya 2:2, 3?

¹⁵ Makonu. Yehova washimwineñahu dehi nindi “kunyaka yakukuminina” antu akunyuza yejima akapompela kumpidi yindi yachifwikija nakuyileja njila jindi. (Tañenu Isaya 2:2, 3.) Tunakumona chinakushikijewa iwu wuprofwetu. Kudifukula kwalala diku kudifukula kwabadika hakudifukula kwejima. Yehova nakukwasha antu jindi kwiluka nsañu yayivulu yamuBayibolu. (Isa. 25:6) Kuhitila mukuzatisha “nduñu wamaana nikashinshi,” Yehova nakutuloñeshela yakuda  yayivulu yakuspiritu yamboka-mboka. Chakutalilahu, yibaaba yitwatañaña, jimpanji nimavidiyo itwatalaña. (Mat. 24:45) Twatiyaña neyi chatiyiliyi ibwambu daYoba Elihu, wahosheli nindi: “Mukwakuleja wadifwana [naNzambi] hinyi?”—Yoba 36:22.

16. Yumanyi yimwatela kwila hakwila nawu mupami kuspiritu?

¹⁶ Yuma yimwatela kwila. Spiritu yaNzambi yinateli kuyikwasha kuzatisha yuma yimwatañaña nikudiza Mwizu daNzambi. Lombenuña neyi chalombeliyi ñimbi yamasamu nindi: “Eyi Yehova, nleji njila yeyi, nukwenda mwaya nsañu yeyi yalala. Bayi niikala nanyichima yiyeduku, chiña wunyinka wumu hohu wakwakama ijina deyi.” (Mas. 86:11) Dichi twalekenuhu kuda yakuda yakuspiritu yinakutuloñeshelayi Yehova kuhitila Mwizu dindi nikuloñesha kwindi. Bayi mukuminaña dakufwila hohu kwiluka chalalaku. Ilaña chihembenuña mumuchima nikuchizatisha muchihandilu chenu. Spiritu yaYehova yinateli kuyikwasha kwila mwenimu. Mwatela cheñi kukoleshaku amanakwenu niahela. (Heb. 10:24, 25) Muloñadi? Muloña hichisaka chenu chakuspiritu. Lombenuña spiritu yaNzambi yiyikwasheña kuhana ñakwilu chakufuma hamuchima kukupompa kwawakwaKristu nikuhana mpanji kwesekeja nahanakumini ñovu jenu. Neyi mwila mwenimu, mukumwekesha kudi Yehova niMwanindi nenu mwakeña “nyikoku” yawu yalema.—Yow. 21:15-17.

17. Munjilanyi mumunateli kumwekeshela nenu munakuzatila hamu nakuloñesha kwaYehova?

¹⁷ Katataka hanu hamaseki hashali hohu kuloñesha kwalombolañawu naspiritu yaNzambi. Dichi, zatilenuña hamu nakuloñesha kwaYehova. Mwekeshenuña nenu mwakeña antu ejima neyi chayikeñawu kudi Nzambi kuhitila mukuyishimwina nsañu yayiwahi. Imbujolenu kukeña kwindi kwakunuñañana kuhitila mukwikala anuñañana muchipompelu. Nawa tiyililenuña kudi Ntañishi yenu Wabadika kuhitila mukudiza yuma yejima yakuspiritu yayiloñeshelañayi. Neyi kaayi kaSatana hiyakukifumishahu, himwakafwa mutentuku. Ilaña mukekala ahamuka nikwimana hamu nawantu azataña nakuloñesha kwaYehova nakashinshi.