1. En ang’o ma Jakristo ma osebatisi nyaka dhi nyime timo?

BE OSEBATISI? Ka en kamano, to kare isenyiso e lela ni iyie kuom Jehova kendo ni iyie tiyo kanyachiel gi riwruok mar ogandane. * Adiera en ni pod onego idhi nyime gero yie ma in-go kuom Jehova. Bende, onego idhi nyime tego yieni mondo isik ka in gadier chuth ni Jehova tiyo gi riwruok mar ogandane e kindegi.

2-3. En yo mane ma Jehova tayogo ogandane e kindegi? Chiw ane ranyisi.

² E kindegi, Jehova tayo riwruok mar ogandane e yo ma winjore gi kite, dwache, kod chikene. We wanon ane kido adek ma wanyalo puonjore e yo ma Jehova tayogo riwruok mar ogandane.

³ Mokwongo, “Nyasaye ok buon ng’ato ang’ata.” (Tich 10:34) Hera nomiyo Jehova ochiwo Wuode kaka misango ma “waro ji duto.” (1 Tim. 2:6; Joh. 3:16) Jehova tiyo gi joge mondo oland wach maber ne ji duto moyie winjo, to mano konyo ji mang’eny kaka nyalore mondo oyud gueth mag misango mar rawar. Mar ariyo, Jehova en Nyasaye mochanore kendo mohero kue. (1 Kor. 14:33, 40) Omiyo, onego wagen ni joma lame be lame e yo mochanore kendo gi kue. Mar adek, Jehova en ‘Japuonj Maduong’.’ (Isa. 30:20, 21) Mano e momiyo riwruok mar ogandane jiwo ahinya puonjo ji Wachne, obed e kanyakla kata e tij lendo. Ere kaka kido adekgo nonenore ayanga e yo ma Jehova notayogo kanyakla mar Jokristo mokwongo? Ere kaka kidogo nenore e kindegi? Kendo ere kaka roho maler nyalo konyi sama itiyo kanyachiel gi riwruok mar oganda Jehova?

4. Ka luwore gi Tich Joote 1:8, en ang’o ma Yesu nochiko jolupne mondo otim, to ang’o ma ne dhi konyogi timo kamano?

⁴ E kinde Jokristo mokwongo. Weche ma Yesu ne lando ne miyo ji duto geno. (Luka 4:43) Nochiko jolupne mondo odhi nyime gi tich ma nosechakono, mondo obed ranyisi ne ji “nyaka kuonde maboyo mogik e tung’ piny.” (Som Tich Joote 1:8.) En adier ni ne ok ginyal tiyo tijno gi tekogi giwegi. Ne gidwaro ‘jakony,’ tiende ni roho maler ma Yesu nosingonegi.​—Joh. 14:26; Zek. 4:6.

5-6. Gin yore mage ma roho maler nokonyogo jopuonjre Yesu?

⁵ Jolup Yesu noyudo roho maler chieng’ Pentekost ma higa 33. Ka ikonyogi gi roho maler, ne gichako yalo wach maber ma ok odeko, kendo matin nono, ji alufe gi alufe norwako wach. (Tich 2:41; 4:4) Ka ne ochak kwedgi, jopuonjrego ne ok obedo maluor, to ne gigeno kuom Nyasaye mondo okonygi. Ne gilemo kama: ‘Mi jotichni nyalo mar dhi nyime hulo wachni gi chir duto.’ Bang’ mano, ne opong’gi gi roho maler kendo ne gidhi nyime ‘hulo wach Nyasaye gi chir.’​—Tich 4:18-20, 29, 31.

⁶ Jopuonjre Yesu ne oromo gi pek mamoko bende. Kuom ranyisi, ne gin-gi kopi manok mag Ndiko Maler ma ne ok nyal romogi giduto. Ne gionge bende gi buge mamoko ma ne nyalo konyogi nono Ndiko kaka ma wan-go e kindegi. Kae to jopuonjrego ne onego olend ne ji ma ne wacho dhok mopogore opogore. Kata obedo ni ne giromo gi pek kaka mago, jopuonjre ma jokindago ne otimo gima ne nenore ni ne ok dhi nyalore. Mana kuom higni manok kende, ne giseyalo wach maber ne “chuech duto manie bwo polo.”​—Kol. 1:6, 23.

7. Higni 100 gi wiye mosekalo, ere kaka jotich Jehova nong’eyo gima ne dwarore ni gitim, to ne girwako wachno nade?

⁷ E kindewagi. Jehova pod dhi nyime tayo joge kendo tegogi. To wang’eyo ni yo maduong’ie moloyo motiyogo e tayo joge en kokalo kuom Wachne mokudh gi roho maler. Kanyo wayudoe weche ma nondik e wi tij yalo ma ne Yesu timo kod chik ma nomiyo jopuonjrene ni gidhi nyime gi tich ma nosechakono. (Mat. 28:19, 20) Mano e momiyo ka wadok chien higni moko mosekalo, Ohinga mar Jarito moro ma Julai 1881 (mar Kisungu) nowacho kama: “Ok noluongwa mondo wayud duong’ wan wawegi kendo wabed momewo, to noluongwa mondo wati gi mwanduwa e yalo wach maber.” Buk moro miluongo ni To Whom the Work Is Entrusted ma nogo gi Joneno mag Jehova e higa mar 1919, bende nowacho kama: “Tijni nenore ka tich ma ok dwanyal, kata kamano, wabiro time kuom teko mar Ruodhwa.” Kuom mano, mana kaka Jokristo mokwongo, owete ma kindego nochiwore gi chunygi ne tijno, ka gin gi adier ni roho maler ne dhi konyogi yalo wach maber ne ji ma wuok e ogendni mopogore opogore. Pod wan gi adiera ma kamano kata e kindegi bende.

8-9. Gin yore mage ma riwruok mar oganda Jehova osetiyogo mondo gilend ne ji mang’eny moloyo?

⁸ Riwruok mar oganda Jehova osebedo ka tiyo gi gik mabeyo mogik e lando wach maber. Magi oriwo buge, “Photo-Drama of Creation,” thumbe san (phonographs), mtokni ma nigi spikini e wigi, redio, kod mamoko ma nyasani mag dijitol. Riwruok mar oganda Nyasaye bende osetimo kinda e tij loko dhok e okang’ malach! Nikech ang’o? Mondo ji duto ma wacho dhok mopogore opogore owinj wach maber e dhoggi giwegi. Jehova ok  buon ng’ato ang’ata, to mano e ma omiyo nowacho chon ni wach maber ne idhi land “ne ogendni duto, gi dhoudi duto, gi dhok duto, kod pinje duto.” (Fwe. 14:6, 7) Odwaro ni ji duto oyud wach maber mar Pinyruoth.

⁹ To nade joma chopo irgi nyalo bedo matek nikech gidak kuonde ma nitie arita mager? Mondo gichop ne joma kamago, riwruok mar oganda Jehova nochako chenro mamoko mag lendo e lela. Kuom ranyisi, e higa mar 2001 Bura Matayo nopwodho tij lendo kitiyo gi troli kod mesa e piny France, kae to bang’e e pinje ma moko bende. Chenrono osebedo gi nyak maber. Kuom ranyisi, e piny Amerka, e higa mar 2011 nochak ti gi chenrono e taon mar New York kuonde ma ji mang’eny yudoree. Higa achiel bang’ chako tiyo gi chenrono, ji nokawo buge 102,129 kod gasede 68,911. Kendo ji 4,701 nokwayo mondo opuonjgi Muma! Nenore maler ni roho maler ne konyo kama duong’ e chenro manyienno. To mano nomiyo Bura Matayo opwodho yor lendono e piny duto.

10. Ang’o ma wanyalo timo mondo wamed lony marwa e tij yalo kod puonjo?

¹⁰ Gima inyalo timo. Ti maber gi tiegruok ma Jehova miyowa e chokruogewa mag Jokristo. Makri gi grubi mar lendo. Timo kamano biro konyi medo lony mari e tij lendo, kendo ibiro yudo jip kokalo kuom ranyisi mag jo mamoko. Tim kinda e tij lendo. Mana kaka ndiko ma tayo sulani wacho, wanyalo chopo dwach Jehova kokalo kuom teko mar roho maler, to ok gi tekowa wawegi. (Zek. 4:6) Kae to bende, tich ma watimoni en mar Jehova.

11. Ang’o ma bura matayo e kinde Jokristo mokwongo notimo mondo kue kod winjruok obed e kanyakla?

¹¹ E kinde Jokristo mokwongo. Bura matayo ma ne ni Jerusalem notiyo kanyachiel mondo gik moko otimre e yo mochanore kendo gi kue e kanyakla mar Nyasaye. (Tich 2:42) Kuom ranyisi, ka wach tero ji nyangu nokelo ywaruok e kanyakla e higa mar 49, bura matayo nonono wachno kitayogi gi roho maler. Ka kanyakla  ne ok nyal bedo gi paro achiel e wi wachno, mano ne dhi thiro tij lendo. Kata obedo ni joote kod jodongo ma ne nono wachno ne gin Jo-Yahudi, ne ok giyie mondo chike ogandagi kata joma ne jiwo puonjno omi ging’ad wach marach. Kar mano, ne giluwo kaka Wach Nyasaye kod roho maler notayogi. (Tich 15:1, 2, 5-20, 28) Weche nobedo nade? Jehova noguedho paro ma ne ging’ado, kendo mano nomiyo kanyakla obedo gi kue kendo tiyo kanyachiel, to mano nomiyo tij yalo odhi nyime maber.​—Tich 15:30, 31; 16:4, 5.

12. Ang’o ma nyiso ni riwruok mar oganda Jehova ma kindegi timo gik moko e yo mochanore kendo gi kue?

¹² E kindewagi. Riwruok mar oganda Jehova timo kinda mondo gine ni gik moko otim e yo mochanore kendo gi kue e kanyakla. Ka wadok chien e higa mar 1895, gaset mar Zion’s Watch Tower and Herald of Christ’s Presence ma Novemba 15 ne nigi sula moro ma wacho ni, “Decently and in Order,” tiende ni “Riwruok Mobidhore Kendo Mochanore,” ma notudore gi 1 Jo-Korintho 14:40. Sulano nowacho kama: “Joote nowacho ne kanyakla mar Jokristo mokwongo gik mang’eny e wach timo gik moko e yo mochanore . . . En gima dwarore ni wadhi nyime luwo ‘weche duto ma ne ondik chon, mondo opuonjwa.’” (Rumi 15:4) Ee, mana kaka e kanyakla mar Jokristo mokwongo, riwruok mar oganda Jehova e kindegi timo matek mondo gine ni kanyakla osiko ka nigi kue kendo ochanore maber. Kuom ranyisi, ka po ni ichano limo kanyakla moro e pinyu kata e piny machielo to Puonjruok mar Ohinga mar Jarito dhi yudi kuno, inyalo bedo gadier ni idhi yudo ka itayo puonjruok e yo ming’eyo kendo isomo sula ming’eyo. Ok ibi bedo gi luoro moro amora ni ikia gima onego itim. En ang’o ma nyalo miyo winjruok ma kamano obedie ma ok mana roho maler mar Nyasaye?​—Zef. 3:9.

13. Ka waparo matut kuom weche ma ni e Jakobo 3:17, gin penjo mage monego wapenjre?

¹³ Gima inyalo timo. Jehova dwaro ni joge ‘orit winjruok achiel ma roho miyogi e kue ma tueyogi kanyachiel.’ (Efe. 4:1-3) Omiyo, penjri kama: ‘Be akonyo e  miyo kue gi winjruok obed e kanyakla? Be aluwo kaka joma tayowa chikowa? Be jomamoko nyalo gena, to ahinya-ahinya ka an gi migepe mag tayo gik moko e kanyakla? Be atimoga gik moko e wang’ sa, akonyo ji, kendo aikora timo gik ma kelo ne jomamoko ber?’ (Som Jakobo 3:17.) Ka ifwenyo ni onego itim lokruok moko, kwa Jehova rohone maler mondo okonyi. Kaka imedo yie mondo roho otayi kendo olok kiti, e kaka Jokristo weteni bende biro medo heri kendo geni.

14. Ka luwore gi Jo-Kolosai 1:9, 10, ere kaka Jehova nopuonjo joge e kinde Jokristo mokwongo?

¹⁴ E kinde Jokristo mokwongo. Jehova mor ahinya gi puonjo joge. (Zab. 32:8) Doher ni jotichne ong’eye, ohere, kendo odag nyaka chieng’ kaka nyithinde. Mago duto ok di nyalre ka ok opuonjowa. (Joh. 17:3) Jehova notiyo gi kanyakla mar Jokristo mokwongo e puonjo joge kendo tiegogi. (Som Jo-Kolosai 1:9, 10.) Roho maler ma e “jakony” ma Yesu nosingo, nokonyo ahinya e wachno. (Joh. 14:16) Rohono nokonyo jopuonjre winjo tiend weche ma ni e Wach Nyasaye, kendo noparonegi gik mang’eny ma Yesu nopuonjo kendo timo, ma bang’e nondik e buge mag Injili. Mano notego yie mar Jokristo mokwongogo kod hera ma ne giherogo Nyasaye, Wuode, kod Jokristo wetegi.

15. Gin yore mage miseneno ka Jehova chopogo gima nosingo e Isaya 2:2, 3?

¹⁵ E kindewagi. Jehova nosewacho chon ni “e ndalo mag giko,” ji moa e ogendni duto ne dhi dhi e gode maler mondo opuonjgi yorene. (Som Isaya 2:2, 3.) Waneno maler kaka mano timore e kindewagi. Lamo madier sani ni malo moloyo lamo duto mag miriambo. Ee, Jehova loso ne joge nyasi mopong’ gi chiemb chuny ma mit! (Isa. 25:6) Otiyo gi “jatich  mogen kendo mariek” e miyowa chiemb chuny ma nigi ndhadhu mopogore opogore kaka buge, twege miwinjo, vidio mopogore opogore, moriwo nyaka mag katun! (Mat. 24:45) Wamor e chunywa mana kaka Elihu osiep Ayub ma nopenjo niya: “Be nitie japuonj ma dipim [gi Nyasaye]?”​—Ayub 36:22.

16. Ang’o minyalo timo mondo iti maber gi gik ma Jehova puonji?

¹⁶ Gima inyalo timo. Roho mar Nyasaye biro konyi mondo iti maber gi gik misomo kata mipuonjori e Muma. Kwa Jehova kaka jandik-zaburi moro nokwaye niya: “A Jehova, puonja yoreni. Abiro wuotho e adierani. Miya chuny achiel mondo aluor nyingi.” (Zab. 86:11) Kae to dhi nyime chamo chiemb chuny ma Jehova miyowa kokalo kuom Wachne kod riwruok mar ogandane. Dwachi maduong’ sama itimo mano ok en mana ng’eyo weche mang’eny kae to iweyo gi kanyo. Dwarore ni item matek mondo adiera omul chunyi kendo olok kit ngimani. Roho mar Jehova nyalo konyi timo mano. Bende, dwarore ni ijiw Jokristo weteni. (Hib. 10:24, 25) Nikech ang’o? En nikech gin oweteni gi nyimineni. Lem kikwayo Jehova rohone maler mondo okonyi chiwo paro mochwiny e chokruoge, kendo mondo itim maber sama in gi twak kata migawo moro e nyim kanyakla. Mago gin yore minyisogo Jehova gi Wuode ni ihero ‘rombegi.’​—Joh. 21:15-17.

17. Gin yore mage minyalo nyisogo ni itiyo kanyachiel gi riwruok mar oganda Jehova?

¹⁷ Machiegnini, piny ngima biro bedo mana gi riwruok achiel kende, ma en riwruok mitayo gi roho mar Jehova. Omiyo, ti gi kinda kanyachiel gi riwruok mar oganda Jehova. Mana kaka Jehova, kik ibuon ji sama iyalo wach maber. Bed mochanore kendo itim gik ma kelo kue e kanyakla. Bende, winj dwond Japuonjni Maduong’ kuom chamo chiemb chuny modhuro momiyowa. Kitimo kamano, to ok ibi bedo maluor sama piny ma Satan chikoni biro chopo e gikone. Kar mano, ibiro chung’ motegno kendo gi chir e kind joweteni momakore chuth gi riwruok mar oganda Jehova.