1. Baptisma chang tawh Kristiante chuan eng nge an tih zawm zêl ang?

BAPTISMA i chang tawh em? I chang tawh a nih chuan, Jehova i rinna leh a inawpna pâwl * ruala rawngbâwl i duhzia vântlâng hmaah i lantir tawh a ni. Jehova i rinna chu a nghet telh telh tûr a ni a. Chu bâkah, tûn laiah Jehova’n a inawpna pâwl a hmang tih i rinna chu i tihngheh tlat a ngai a ni.

2-3. Eng kawngin nge tûn laiah Jehova’n a inawpna pâwl chu a kaihhruai? Entîrnate pe rawh.

² Tûn laiah, Jehova chuan a inawpna pâwl chu a mizia te, a thiltum te, leh a tehnate târ lang zâwngin a kaihruai a. Jehova’n a inawpna pâwl hmanga a târ lan a mizia pathumte chu i lo sawiho vang u.

³ Pakhatna, “Pathianin mi duhsak bîk a nei lo.” (Tirh. 10:34) Hmangaihnain Jehova chu “mi zawng zawng tlan nâna” a Fapa pe tûrin a chêttîr a. (1 Tim. 2:6; Joh. 3:16) Ani chuan mi a tam thei ang berin tlanna an hlâwkpui theih nân, a ngaithla duhtute hnêna chanchin ṭha hril tûrin a mite chu a hmang a ni. Pahnihna, Jehova chu remruattu fel leh remna Pathian a ni. (1 Kor. 14:33, 40) Chuvângin, amah betute chuan ruahmanna fel tak leh inrem takin a rawng an bâwl ang tih kan beisei thei a ni. Pathumna, Jehova chu “Zirtîrtu Ropui Ber” a ni. (Is. 30:20, 21, NW) Chuvângin, a inawpna pâwl chuan kohhranah leh vântlâng rawngbâwlnaah a Thu, Bible zirtîr chu a tum tlat a ni. Engtin nge Kristian kohhran hmasate chuan chûng Jehova miziate chu an entawn? Engtin nge tûn laia Jehova mite pawhin chûng miziate chu an entawn? Tûn laia Jehova inawpna  pâwl ruala rawng i bâwlnaah engtin nge thlarau thianghlimin a ṭanpui theih che?

4. Tirhkohte 1:8-a târ lan angin, Isua’n a hnungzuitute chu eng ti tûrin nge thu a pêk a, eng ṭanpuina nge an dawn ang?

⁴ Kum zabi khatnaah. Isua hrilh thuchah chuan mi zawng zawng tân beiseina a pe a. (Lk. 4:43) A hnungzuitute hnênah chuan a lo ṭan tawh hna chu thawk zawm a, ‘kâwlkil thleng pawha’ thu hril tûrin thu a pe a ni. (Tirhkohte 1:8 chhiar rawh.) Ni e, chu hna chu mahni chakna mai chuan an thawk thei lo ngei ang. Anni chuan Isua’n an hnêna a tiam “ṭanpuitu,” thlarau thianghlim chu an mamawh dâwn a ni.—Joh. 14:26, Baptist Mid-Missions’ Translation; Zak. 4:6.

5-6. Eng kawngtein nge thlarau thianghlim chuan Isua hnungzuitute chu a ṭanpui?

⁵ Isua hnungzuitute chuan C.E. 33 Pentikost nîah thlarau thianghlim an dawng a. Chu thlarau thianghlim ṭanpuinain thu an hril nghâl a, hun rei lo te chhûngin, mi sâng tam takin chanchin ṭha chu an pawm a ni. (Tirh. 2:41; 4:4) Dodâlna a lo awm hunah, zirtîrte chuan hlauh avânga thu hrilh bânsan mai lovin, Pathian hnênah ṭanpuina an dîl a. Anni chuan: “I bâwihte hi huai takin i thu hriltîr la,” tiin an dîl a. Tichuan, thlarau thianghlima lo khatin, “huai takin Pathian thu an hril” zawm zêl a ni.—Tirh. 4:18-20, 29, 31.

⁶ Isua zirtîrte chuan harsatna dang pawh an hmachhawn a. Entîr nân, an hun lai chuan Bible bu tam tak an nei lo va. Tûn laia kan neih ang inzirna hmanruate pawh an nei hek lo. Chu bâkah, zirtîrte chuan ṭawng hrang hrang hmang mite hnêna thu an hrilh a ngai a. Chûng harsatnate kârah pawh, zirtîr ṭhahnemngai takte chuan kum sâwmbi rei lo te chhûngin chanchin ṭha chu “vân hnuaia thil siam zawng zawngte zînga” tlângaupuiin, tih theih loh anga lang chu an ti thei a ni.—Kol. 1:6, 7, 23.

7. Kum 100 aia tam kalta khân, engtin nge Jehova chhiahhlawhte chuan an laka Pathian thil phût chu an hriat a, engtin nge an chhân lêt?

⁷ Tûn lai hunah. Jehova chuan a mite chu a kaihruaiin, a tichak zawm zêl a. Chu kaihhruaina chu a bîk takin, Pathian thlarauva thâwk khum a Thu, Bible hmangin kan dawng a. Chutah chuan, Isua rawngbâwlna leh a hnungzuitute hnêna a lo ṭan tawh hna thawk zawm tûra a thupêk chu kan hmu a ni. (Mt. 28:19, 20) July 1881 aṭang tawhin, Vênnainsâng magazine chuan: “Mihringte chawimawina dawng tûr leh hausa tûra koh emaw, hriak thih emaw kan ni lo, kan thil neihte chu chanchin ṭha hrilh nâna hmang tûr leh hmang zawm zêl tûra koh kan ni,” tiin a lo sawi tawh a ni. Kum 1919-a tihchhuah To Whom the Work Is Entrusted, tih lehkhabu tê chuan: “He hna hi a lian tham hle a; mahse, Lalpa hna a ni a, a chakna hmangin kan thawk ang,” tiin a sawi. Ni e, Kristian hmasate angin, chûng unaute chuan chu hna thawk tûrin huai takin mahni an inpe a, mi zawng zawng hnêna thu hril thei tûrin thlarau thianghlimin a ṭanpui ang tih an ring tlat a. Tûn laiah pawh, chutiang rinna chu kan nei a ni.

8-9. Jehova inawpna pâwlin thu hrilh rawngbâwlna zauh belh nân eng tih dânte nge a hman?

⁸ Jehova inawpna pâwl chuan chanchin ṭha theh darh nân hmanraw ṭha ber berte a hmang a. Chûng hmanruaahte chuan thu leh hla chhuah te, “Photo-Drama of Creation,” tih film te, thingremzaithei te, aurinna invuah motor te, radio station te, leh tûn hnaiahte chuan Internet-te a tel a ni. Pathian inawpna pâwl chuan mihring chanchina ṭawng lehlinna nasa ber chu a kaihruai bawk! Engvângin nge? Hnam tina mite’n mahni ṭawng ngeia chanchin ṭha an hriat theih nân a ni. Jehova chuan mi duhsak bîk a nei lo; ani chuan chanchin ṭha chu “hnam tinrêng te, chi tinrêng te, ṭawng  tinrêng te, mi tinrêng te hnêna” hrilh a nih tûr thu a sawi lâwk a. (Thup. 14:6, 7) Lalram thuchah chu mi zawng zawngin an hriat a duh a ni.

⁹ A nih leh, vênghimtu ṭha tak awmna in lian taka chêngte ang chi kan va tlawhpawh theih loh mite chungchâng hi eng nge ni ve? Chûng mite kan tlawhpawh theih lehzual dân tûr ngaihtuahin, Jehova inawpna pâwl chuan vântlâng thu hrilh rawngbâwlna chi hrang hrang a ngaihtuah a. Entîr nân, kum 2001 khân, Governing Body chuan France ramah nawrlirh hmanga thu leh hla pho chhuahna leh tih dân dangte hman chu a remti a, a hnuah, hmun danga unaute pawhin chutiang chuan thu an hril ṭan a ni. Chu chuan rah ṭha tak a chhuah a. Kum 2011 khân, United States, New York Khawpuia mi veivâk tamna ber hmun pakhatah ruahmanna thar neih ṭan a ni a. Kum khat chhûngin, lehkhabu 1,02,129 leh magazine 68,911 sem chhuah a ni a. Chu bâkah, mi 4,701 aia tamin Bible zirna neihpui tûrin an dîl a ni. He hna hi thlarau thianghlimin a ṭanpui tih a chiang hle. Chuvângin, Governing Body chuan thu leh hla pho chhuahna hmanga thu hrilh chu khawvêl pumpuia hman a remti ta a ni.

10. Kan rawngbâwlna tihmasâwn tûrin eng nge kan tih theih?

¹⁰ I tih theihte. Kristian inkhâwmna hmanga Jehova min pêk zirtîrnate chu hmang ṭangkai la. I awmna service group rualin thu hril ziah ang che. Chutah chuan i mamawh mai theih ṭanpuinate chu mi mal takin i dawng thei a, unaute entawn tûr ṭha siam aṭangin chakna pawh i hmu ang. Chhel takin rawngbâwlnaah tel zawm zêl ang che. Kan thupui Bible chângin min hriat nawntîr angin, Pathian duh zâwng chu kan chakna ni lovin, a thlarau thianghlim ṭanpuinain kan hlen thei a ni. (Zak. 4:6) Dik tak chuan, Pathian hnathawk kan ni.

11. Kum zabi khatnaa governing body chuan Pathian mite zînga ruahmanna fel a awm reng theih nân engtin nge inlungrual taka hna a thawh?

¹¹ Kum zabi khatnaah. Jerusalem-a awm governing body chuan Pathian mite zînga ruahmanna fel leh remna a awm reng theih nân inlungrual takin hna a thawk a. (Tirh. 2:42) Entîr nân, C.E. 49-ah serhtan chungchânga thu buai a lo chhuah khân, governing body  chuan thlarau thianghlim kaihhruaina hnuaiah chumi chungchâng chu a ngaihtuah a ni. Kohhran chu chumi thua inlungrual lova an awm reng chuan an thu hrilhnaah an hlawhtling thei lo vang. Tirhkohte leh upate chu Juda mite ni mah se, Juda hnam dânte emaw, chûng hnam dân chawilârtute emaw thununin an awm lo. Chu aiin, anni chuan Pathian Thu leh a thlarau thianghlim chu kaihruaitu atân an rinchhan tlat zâwk a ni. (Tirh. 15:1, 2, 5-20, 28) Eng nge a rah chhuah? Jehova’n an thu tlûkna siam chu mal a sâwm avângin, remna leh inlungrualna a awm a, thu hrilh rawngbâwlnah hma an sâwn zêl a ni.—Tirh. 15:30, 31; 16:4, 5.

12. Tûn laia Jehova inawpna pâwlah ruahmanna fel leh remna a awm tih engin nge târ lang?

¹² Tûn lai hunah. Jehova inawpna pâwl chuan a mite zînga ruahmanna fel leh remna a awm zêl theih nân a thawk rim hle a. Kum 1895 aṭang tawh khân, November 15 chhuak Zion’s Watch Tower and Herald of Christ’s Presence tih magazine-ah chuan 1 Korinth 14:40 ṭanchhanin, “Mawi Tak leh Fel Takin,” tih thuziak a chuang a. Thuziak chuan: “Tirhkohte chuan unaute hnênah ruahmanna fel tak neia thiltih dân chungchângah . . . sawi tûr tam tak an nei a. ‘Hmân laia ziak apiangte chu keimahni min zirtîrna tura’ ziak a nih avângin, chûng thute ngun taka kan ngaihven zawm zêl chu a him ber a ni,” tiin a târ lang. (Rom 15:4) Ni e, tûn laia Jehova inawpna pâwl chuan Kristian hmasate neih ruahmanna fel leh remna ang nei tûrin theih tâwp a chhuah a ni. Entîr nân: Kohhran dangah, a nih loh leh ram dangah pawh ni se, Vênnainsâng Zirnaa tel i tum a nih chuan, zirna kaihhruai dân leh sawiho tûr thuziak chu i hre sa ngei ang a. Chuvângin, thlamuang takin i awm thei nghâl ang! Pathian thlarau thianghlim tih loh, eng dangin nge chutiang inlungrualna hlu tak chu awmtîr thei ang?—Zep. 3:9.

13. Jakoba 3:17 chu rilrua dahin, eng zawhnate nge kan inzawh ang?

¹³ I tih theihte. Jehova chuan a mite chu “remna phuarnaah chuan thlarau inpumkhatna chu vawng tûra bei” tûrin a duh a. (Eph. 4:1-3) Chuvângin, heti hian inzâwt rawh: ‘Kohhranah inpumkhatna leh remna a awm theih nân hma ka la em? Kohhrana hruaitute thu chu ka zâwm em? Kohhrana mawhphurhna nei  ka nih chuan, mi dangte rinchhan tlâk ka ni ang em? Hun vawng dik tak, unaute ṭanpuitu ṭha tak, leh rawngbâwlnaa ṭhahnemngai tak ka ni em?’ (Jakoba 3:17 chhiar rawh.) Hmasâwnna tûr nei nia i inhriat chuan, thlarau thianghlim dîlin ṭawngṭai ang che. I miziaahte leh i thiltihahte thlarau thianghlim i inthununtîr poh leh uanute’n an hmangaih lehzual chein, an ngaihlu lehzual ang che.

14. Kolossa 1:9-12-a sawi angin, engtin nge Jehova’n kum zabi khatnaa a mite chu a zirtîr?

¹⁴ Kum zabi khatnaah. Jehova chuan a mite zirtîr chu nuam a ti hle a. (Sâm 32:8) A hmangaih tak a fate anga Amah hre chiang tûr te, hmangaih tûr te, leh chatuana nung tûrtein a mite chu a duh a ni. Chûng zawng zawng chu a zirtîrna tel lo chuan kan nei thei lo vang. (Joh. 17:3) Jehova chuan a mite zirtîr tûrin kum zabi khatnaa Kristian kohhran chu a hmang a. (Kolossa 1:9-12 chhiar rawh.) Isua tiam “ṭanpuitu,” thlarau thianghlim chuan zirtîrte chu a ṭanpui bawk. (Joh. 14:16, Baptist Mid-Mission’ Translation) Chu chuan zirtîrte chu Pathian Thu hre thiam lehzual tûr leh a hnua Chanchin Ṭha bua chhinchhiah Isua thusawi leh thiltih tam takte hre chhuak tûrin a ṭanpui a. Chu hriatna chuan Kristian hmasate chu Pathian, Isua leh an unaute chunga an rinna leh hmangaihna chu a tipung lehzual a ni.

15. Jehova’n Isaia 2:2, 3-a chhinchhiah a thutiamte a thlen famkimtîr dân eng kawngte nge i hmuh tawh?

¹⁵ Tûn lai hunah. Jehova chuan “ni hnuhnûngahte chuan” hnam tina mite chu a kawngte zir tûrin entîr nei a tlângah an kal khâwm ang tih a sawi lâwk a. (Isaia 2:2, 3 chhiar rawh.) Chu hrilh lâwkna thleng famkim mêk chu kan hmu a ni. Biakna dik chu biakna dik lo zawng zawng chungah chawisânin a awm a. Chu bâkah, Jehova chuan thalrau lam chaw min va pe nasa tak êm! (Is. 25:6) “Bâwih rinawm, fing tak” hmangin, ani chuan thlarau lam chaw tam tak min pe mai ni lovin,  thuziakte, ngaihthlâk tûr thusawite, leh en theih cartoon te chenin chi hrang hrangin min pe a ni. (Mt. 24:45) ‘Tu nge kan Pathian ang zirtîrtu awm?’ tia sawitu Joba ṭhian Elihua rilru put hmang ang chu kan nei a ni.—Job. 36:22.

16. Thlarau lama hmasâwn tûrin eng nge i tih theih?

¹⁶ I tih theihte. Pathian thlarau thianghlim chuan Bible-a i thu chhiarte leh zirte nunpui tûrin a ṭanpui ang che. Fakna hla phuahtu angin: “Aw LALPA, i kawng chu mi entîr ang che; i thutakah ka awm ang: I hming ṭih tûrin thinlung sakhat mi puttîr ang che,” tiin ṭawngṭai rawh. (Sâm 86:11) Chuvângin, Jehova’n a Thu, Bible leh a inawpna pâwl hmanga a pêk thlarau lam chaw chu ei chhunzawm zêl ang che. Ni e, i thiltum chu hriatna neih mai hi a ni lo. Thutak chu mahni ta nihtîr a, nunpui i duh a ni. Jehova thlarau thianghlim chuan chutianga ti tûrin a ṭanpui thei che a. Chu bâkah, i unaute fuih pawh i duh ngei ang. (Heb. 10:24, 25) Engvângin nge? Anni chu i thlarau lam chhûngkua an ni si a. Kristian inkhâwmahte thinlung taka chhânna pe thei tûrin leh i chanvote chu a ṭha thei ang bera hlen thei tûrin Pathian thlarau thianghlim dîlin ṭawngṭai ang che. Chutianga i tih chuan, Jehova leh a Fapa hnênah an ‘berâm’ hlu takte i hmangaihzia i lantîr a ni ang.—Joh. 21:15-17.

17. Rinawm takin Jehova inawpna pâwl i thlâwp tih eng kawngtein nge i lantîr theih?

¹⁷ Nakin lawkah chuan, leia inawpna pâwl awmchhun chu Pathian thlarau thianghlima kaihhruai pâwl chauh a ni ang. Chuvângin, Jehova inawpna pâwl chu ṭhahnemngai takin thawhpui la. I hmuh apiangte hnênah chanchin ṭha hrilin, Pathianin duhsak bîk nei lova mite a hmangaihna chu entawn ang che. Kohhrana inpumkhatna awmtîrna hmangin Jehova’n ruahmanna fel leh remna a ngainatna chu entawn bawk rawh. Thlarau lam chaw hnianghnâr taka kan dawn chu hlâwkpui pumhlûmin, Zirtîrtu Ropui Ber thusawi chu ngaithla ang che. Chutianga i tih chuan, Setana khawvêl tâwpna a lo thlen hunah hlauhna i nei lo vang. Chu aiin, Jehova inawpna pâwl ruala rinawm taka rawngbâwltute zîngah nghet takin i ding thei ang.