1. Bapatiso murinai Kristen taudia ese dahaka bae kara hanaihainai be namo?

OI BE o bapatiso, a? Bema oibe, una negai oi ese taunimanima vairadiai o hahedinaraia oi na Iehova o abidadama heniamu bona o uramu ia bona ena orea isiaidia ba lao heni. * To, namona na Iehova bavabidadama henia hanainanai. Bona bavabia dae hari ina negai ina orea na Iehova ena ura ḡaukarana e karaiamu.

2-3. Edena dalai ta dibamu Iehova ese ena orea e hakauamu? Haheitalai haida ba gwaurai.

² Hari ina negai, Iehova ese ena orea e hakauamu dalana amo e hahedinaraiamu ia be daika, ia be e uramu dahaka baine haḡuḡurua, bona iena taravatu be dahaka. Mani aita itaia ina orea ese Iehova ena kara toi be ede e hahedinaraia tomamu.

³ Ginigunana: “Dirava ese taunimanima oromadia se lalomu.” (Apos. 10:34) Lalokau dainai Iehova ese Natuna e heni, “taunimanima iboudiai idavalaidia.” (1 Tim. 2:6; Ioa. 3:16) Iehova ese ena taunimanima amo sivarai namona na kamonai taudia ediai e harorolaiamu, unu amo momo na boubou ḡauna amo namo bae abia. Iharuana: Iehova na dia heiri-heiri Diravana, a maino Diravana. (1 Kor. 14:33, 40) Una dainai, namona na Dirava e tomadiho heniamu taudia na basie heiriheiri, a maino ai bae noho. Ihatoina: Iehova na “Hahediba Tauna.” (Isa. 30:20, 21) Una dainai, Dirava ena orea taudia na e uramu kongrigeisin ai bona haroro ḡaukara ai Baibul bae ḡaukaralaia. Kristen taudia ginigunadia ese Iehova ena kara toi be ede e hahedinaraidia toma? Hari ina negai unu kara be ede baita hahedinaraidia toma? Bona  edena dala ai lauma helaḡa ese oi baine durumu Iehova ena orea ba hesiai henia totona?

4. Aposetolo Edia Kara 1:8 ai tame duahia, Iesu ese hahediba taudia e haḡanidia dahaka bae kara? Bona idia be dahaka heduru e abi?

⁴ Aposetolo edia negai. Iesu ese ena haroro herevana amo taunimanima e hamoaledia. (Luka 4:43) Ia ese ena hahediba taudia e haḡanidia ia ese e hamatamaia ḡaukarana basie hadokoa, to bae haroro “ela bona tanobada heḡeḡe-madai.” (Aposetolo Edia Kara 1:8 ba duahia.) To, sibodia edia goada ai una ḡaukara asie karaia. Lauma helaḡa bae abia be namo​—Iesu e gwauhamata ia ese “hekaha tauna” ta na idia baine henidia.​—Ioa. 14:26; Sek. 4:6.

5-6. Ededia dalai lauma helaḡa ese Iesu ena hahediba taudia e durudia?

⁵ Pentekoste 33 C.E. ai, Iesu ena hahediba taudia ese lauma helaḡa e abia. Bena idia ese haroro ḡaukara e hamatamaia haraḡa, bona una nega kwadoḡina ai hutuma ese sivarai namona e abia dae. (Apos. 2:41; 4:4) Daḡedaḡe negana ai, hahediba na asie gari bona Dirava e noia baine durudia. Idia na e ḡuriḡuri: “Emu hesiai taumai goada bame henimai, emu hereva baia gwaurai mai goadamai ida.” Bena lauma helaḡa amo e honu neganai, “idia ese Dirava ena hereva e harorolaia mai goadadia ida.”​—Apos. 4:18-20, 29, 31.

⁶ Iesu ena hahediba ese hekwakwanai ma haida e davari danu. Heḡereḡere, Toretore Helaḡadia edia kopi na dia momo. Eiava stadi bukadia na lasi. Eiava hahediba taudia na gado idauidau ai taunimanima e haroro henidiava. Herevana dahaka, to idia ese haroro ḡaukara na e karaia​—oibe, laḡani 30 lalodiai, idia ese sivarai namona na “taunimanima iboudiai guba henunai vada e harorolai henidia.”​—Kol. 1:6, 23.

7. Gunaguna, tadikaka ese Iehova ena ura be ede e dibaia toma, bena idia be dahaka e kara?

⁷ Hari ina negai. Iehova ese ena taunimanima na doini goada e henidiamu. Oibe, Dirava ese ena Buka Helaḡa amo ena taunimanima e hakaudiamu. Baibul ai ta duahimu, Iesu ese haroro ḡaukara e karaia bona ia ese ena hahediba e haḡanidia ia e hamatamaia ḡaukarana bae karaia. (Mat. 28:19, 20) July 1881 ai, The Watchtower eto: “Iehova ese ai e abimai hidi o e horomai na dia taunimanima ese ai bae hanamomai o taḡa taudia ai baiala totona, lasi, to ḡau iboudiai baia ḡaukaralai sivarai namona baia harorolaia totona.” Buklet ta ladana, To Whom the Work Is Entrusted, 1919 ḡauna, eto: “Ḡaukara na bada herea, to ina na Lohiabada ena ḡaukara dainai, ia ese goada be henidamu baita karaia totona.” Oibe, ini tadikaka na e ḡaukara goada, badina dibadia lauma helaḡa ese baine durudia taunimanima iboudiai bae haroro henidia totona. Hari, namona na baita abia dae lauma helaḡa ese ita na e durudamu danu.

8-9. Iehova ena orea be ededia dala ai haroro ḡaukara e habadaiamu?

⁸ Iehova ena orea na tulu namodia idauidau amo sivarai namona e halasiamu. Idia haida bini: “Photo-Drama of Creation,” phonographs, sound motukadia, radio broadcast bona hari be kompiuta o intanet. Danu, Dirava ena orea ese eda pablikeisin na gado idauidau ai e halasimu! Dahaka dainai? Unu amo taunimanima iboudiai ese sivarai namona na edia gado korikori ai bae kamonaia diba. Iehova ese taunimanima oromadia na se lalomu; ia e peroveta eto, sivarai namona na “bese iboudiai, iduhu iboudiai,  gado iboudiai, tano iboudiai [bae] harorolai henidia.” (Apok. 14:6, 7) Ia na e uramu taunimanima ibounai ese Basileia sivaraina bae kamonaia.

⁹ To bema taunimanima haida edia gabu ai baita haroro na auka badina sekiriti ese be luludamu o geiti e lokaiamu be ede heto? Idia baita haroro henidia totona, Iehova ena orea ese e hagoadadamu pablik haroro na dala idauidau ai baita karaia. Heḡereḡere, 2001 ai, Gavanin Bodi ese gwaumaoro e heni French bona gabu haida ai tadikaka bona taihu ese eda pablikeisin na literature cart o unu bamona ḡaudia ai bae hahedinaraidia totona. Bena dahaka e vara? 2011 ai, United States ena New York City ai program matamatana ta e hamatamaia. Laḡani ginigunana ai, tadikaka ese buka iboudiai 102,129 bona magasin iboudiai 68,911 e hariharilaidia. Bona taunimanima 4,701 na Baibul stadi e noia! Momokani, lauma helaḡa ese ina ḡaukara e duruamu. Badina Gavanin Bodi ese gwaumaoro e heni tanobada heḡeḡemadai ai tadikaka bona taihu ese una dala matamata bae ḡaukaralaia danu.

10. Dahaka baita kara eda hesiai ḡaukara baita hanamoa totona?

¹⁰ Oi be dahaka ba kara? Kongrigeisin heboudia ai Iehova ese haroro daladia na ita e hadibalaidamu. Nega iboudiai emu haroro grup ida ba ḡaukara hebou. Badina emu grup taudia edia haheitalai ese be durumumu edena dalai haroro ḡaukara bona hahediba ḡaukara ba karaia namonamo diba. Haroro ḡaukara lalonai ba haheauka. Ina stadi ena siri badana ese e hadibadamu, dia goada amo o dia siahu amo, a lauma helaḡa amo Dirava ena ura baita haḡuḡuruamu. (Sek. 4:6) Baita laloatao: Ita na Dirava ena ḡaukara ta karaiamu.

11. Aposetolo edia negai gavanin bodi be ede e ḡaukara hebou toma dainai, Dirava ena taunimanima bogaraḡidiai maino e vara?

¹¹ Aposetolo edia negai. Ierusalem ai, gavanin bodi na e ḡaukara hebouva badina asie urava Dirava ena taunimanima na bae heiriheiri, lasi, to maino ai bae noho. (Apos. 2:42) Heḡereḡere, 49 C.E. ai, peritome hepapahuahuna e vara neganai,  gavanin bodi ese una hekwakwanai e herevalaia. Bema una ese kongrigeisin be hapararaiamu, idia ese haroro ḡaukara basie karaiamu. Herevana aposetolo bona heitatao taudia na Iuda taudia, to idia na asie ura edia kastom o hahediba gunadia ese bae biagudia. Oibe, idia ese Dirava ena Hereva bona lauma helaḡa ena hahekau dalana e badinaia. (Apos. 15:1, 2, 5-20, 28) Bena dahaka e vara? Edia disisin na Iehova ese e hanamoa, maino bona lalotamona e vara, bona haroro ḡaukara na se doko.​—Apos. 15:30, 31; 16:4, 5.

12. Ede o diba tomamu hari Iehova ena taunimanima na lalotamona bona maino ai e nohomu?

¹² Hari ina negai. Iehova ena orea na e hekwarahimu dainai, Iehova ena taunimanima na bae heiriheiri, to maino ai e nohomu. 1895 ai, Zion’s Watch Tower and Herald of Christ’s Presence, November 15 ena atikol ta e halasia bona ladana be, “Decently and in Order,” ena hereva na 1 Korinto 14:40 amo e abia. Atikol eto: “Aposetolo edia hereva momo ese Dubu taudia ginigunadia e hagoadadia basie heiriheri . . . Namona na baita badinadia badina ‘e tore guna ḡaudia na ita ihadibalaida totona e tore.’” (Roma 15:4) Hari ina negai danu, Iehova ena orea na e hekwarahimu badina asie uramu kongrigeisin taudia na bae heiriheiri, lasi, to maino ai bae noho. Mani ina haheitalai a laloa: Ena be kongrigeisin matamatana​—reana tano matamatana ai​—ena Gima Kohorona Stadi lalonai bo helai vareaimu, to oi na mai dibamu stadi be ede e hakaua tomamu bona edena stadi atikol be stadilaiamu. Una na basio daradaralaiamu, ani? Oibe, Dirava ena lauma helaḡa ese lalotamona baine havaraia diba.​—Sef. 3:9.

13. Iakobo 3:17 ai tame duahia, ededia henanadai baita lalo be namo?

¹³ Oi be dahaka ba kara? Iehova na e uramu ena taunimanima na lauma helaḡa ena lalotamona bae badinaia, bona maino ese baine hatamonadia. (Efe. 4:1-3) Oi sibomu ba henanadai: ‘Kongrigeisin lalonai lau ese lalotamona bona maino na havaraiamu, a? Lau ese e hakaugumu taudia na kamonai henidiamu o na matauraidiamu, a? Ma haida be egu ai heduru e tahumu badina kongrigeisin ai lau na maduna  na huamu tadikakana ta, a? Lau be na uramu egu hesiai ḡaukara ai baina heduru o basina leiti, a?’ (Iakobo 3:17 ba duahia.) Lauma helaḡa totona ba ḡuriḡuri bona senisi maorodia ba kara. Bena lauma helaḡa ena heduru dainai emu kara bo haidauamu, tadikaka taihu ese oi be lalokau henimumu bona be matauraimumu.

14. Kolose 1:9, 10 ai tame duahia, gunaguna Iehova ena taunimanima be ede e hadibadia toma?

¹⁴ Aposetolo edia negai. Iehova na mai moalena ida ena taunimanima e hadibadiamu. (Sal. 32:8) Ia na e uramu idia na ia bae diba, bae lalokau henia, bae mauri hanaihanai, bona ia natuna lalokauna ai baela. Unu na Iehova ena edukeisen dalana amo bae abi. (Ioa. 17:3) Kongrigeisin amo Iehova ese ena taunimanima e hadibadiava. (Kolose 1:9, 10 ba duahia.) Lauma helaḡa be ḡaukara badana e karaia. (Ioa. 14:16) Ia dainai hahediba taudia ese Dirava ena Hereva e lalopararalaia, bona idia ese Iesu ena hereva o kara​—Evanelia bukadia ai e tore ḡaudia​—e lalodia lou. Una diba ese Kristen ginigunadia edia abidadama e hagoadaia, bona e durudia idia ese Dirava, Iesu, bona taunimanima iboudiai bae lalokau henidia totona.

15. Isaia 2:2, 3 ai tame duahia gwauhamatana be Iehova ese ededia dalai e haḡuḡurua?

¹⁵ Hari ina negai. Iehova e peroveta, “dina gabedia ai,” ena ororo na bese iboudiai ese bae aru henia, ia ese ena dala na idia baine hadibalaidia. (Isaia 2:2, 3 ba duahi.) Una peroveta herevana anina e ḡuḡurumu na hari vada ta itaiamu. Ita ese tomadiho momokani bona tomadiho koikoi edia idau vada ta itaia dibamu. Bona Iehova ese lauma aniani bada herea e halasiamu! (Isa. 25:6) Dirava ese “hesiai tauna mai ena kamonai bona mai ena kara maoromaoro” amo unu lauma aniani na tok, atikol idauidau, katun, bona vidio amo e halasimu. (Mat. 24:45) Iobu turana, Elihu,  ena hemami ta abiamu, etomu: “Dirava . . . hahediba tauna ia heḡereḡerena be daika?”​—Iobu 36:22.

16. Oi be dahaka ba kara lauma dalana ai ba tubu totona?

¹⁶ Oi be dahaka ba kara? Dirava ena lauma helaḡa ese baine durumu Baibul ai o duahimu bona o stadilaimu ḡaudia ba badinadia totona. Salamo e torea tauna ena ḡuriḡuri ba gwauraia, eto: “Iehova e, emu dala ba hadibagu, emu momokani ai baina raka helaoreana; lau lalogu ba haheboua tamona, oi ladamu imatauraina ai.” (Sal. 86:11) Una dainai, nega iboudiai Iehova ese ena Hereva bona orea amo e halasimu lauma aniani na ba moalelai. Ba hekwarahi ela bona diba bavabi. Oi na mai lalomu idoinai ida hereva momokani bavabia dae bona emu mauri lalonai ba badinadia. Iehova ena lauma helaḡa ese baine durumu unu ba kara toma. Danu, oi na o uramu tadikaka bona taihu ba hagoadadia. (Heb. 10:24, 25) Dahaka dainai? Badina idia be emu ruma bese. Ḡuriḡuri amo Dirava ba noia lauma helaḡa amo baine durumu kongrigeisin heboudia ai haere namodia bona tok ba heni totona. Unu dala idauidau amo oi ese Iehova bona Iesu ediai o hahedinaraiamu, oi ese edia “mamoe” na o lalokau henidiamu.​—Ioa. 21:15-17.

17. Ededia dala ai ba hahedinaraia Iehova ena orea o abidadama heniamu bona o duruamu?

¹⁷ Kahirakahira, Dirava ena lauma helaḡa ese e hakauamu oreana sibona mo tanobada ai be nohomu. Una dainai, Iehova ena orea ida ba ḡaukara hebou goadagoada. Sivarai namona na taunimanima iboudiai ba hadibalaidia badina o lalokau henidiamu, Dirava ena kara heḡereḡerena. Iena lalokau ba tohotohoa dalana ta be, kongrigeisin ai dia heiri-heiri ba havaraia, a maino ba havaraia. Bona oi e hadibamumu Diravana ba kamonai henia, anina na ia ese e halasimu lauma aniani iboudiai na ba moalelaidia. Bena Dirava ese Satana ena tanobada baine hadikaia neganai, oi na basio garimu. To, mai goadamu ida Iehova ena orea ba badinaia bona ba hesiai henia hanaihanai.