LARTIK LETID 43
Zeova Pe Diriz So Lorganizasion
“‘Ni par lafors enn larme ni par pwisans bann zom, me par mo lespri,’ Zeova Sef bann larme dir.”—ZAKA. 4:6.
KANTIK 40 Pou Kisannla Nou Ete?
REZIME *
1. Ki kitsoz bann Kretien ki batize bizin kontign fer?
ESKI to’nn pran batem? Si wi, kan to finn pran batem, to finn montre devan lezot ki to ena lafwa an Zeova ek ki to anvi servi Li ansam avek so lorganizasion. * Biensir, to lafwa an Zeova bizin kontign grandi. Ek to bizin kontign ena konfians ki lorganizasion Zeova pe fer travay ki Zeova anvi li fer azordi.
2-3. Dan ki fason Zeova pe diriz so lorganizasion azordi? Donn bann lexanp.
2 Azordi, nou trouv personalite Zeova, so lobzektif, ek so bann prinsip moral dan fason ki Li diriz so lorganizasion. Atraver lorganizasion Zeova, nou trouv osi bann kalite ki Zeova ena. Anou examinn trwa parmi zot.
3 Premierman, “Bondie tret tou dimounn parey.” (Zist. 10:34) Lamour inn pous Zeova pou donn So Garson kouma enn “ranson . . . pou sov tou dimounn.” (1 Tim. 2:6, NW; Zan 3:16) Anplis, Zeova pe servi so pep pou pres bonn nouvel ar tou bann dimounn ki pou ekoute. Dan sa fason-la, Li pe ed tou dimounn pou gagn bann bienfe gras-a laranson. Deziemman, Zeova Li enn Bondie lord ek lape. (1 Kor. 14:33, 40, NW) Alor, nou kapav atann ki so bann serviter servi Li dan lord ek dan lape. Trwaziemman, Zeova Li nou “Gran Instrikter.” (Iza. 30:20, 21) Se pou sa rezon-la ki so lorganizasion fer boukou zefor pou ansegn bann dimounn so Parol, Labib, ki li dan lasanble ouswa dan predikasion. Kouma bann lasanble Kretien dan premie siek ti imit sa trwa kalite ki Zeova ena la? Kouma pep Zeova pe imit sa bann kalite-la dan nou lepok? Ek kouma lespri sin kapav ed twa pou servi ansam avek lorganizasion Zeova azordi?
BONDIE TRET TOU DIMOUNN PAREY
4. Dapre Zistwar Bann Apot 1:8, ki Zezi ti demann so bann disip pou fer, ek ki led zot ti gagne?
4 Dan premie siek. Mesaz ki Zezi ti prese ti donn lespwar tou bann dimounn. (Lik 4:43) Li ti donn so bann disip lord pou kontign travay ki li ti koumanse. Zot ti pou bizin al prese “partou lor later.” (Lir Zistwar Bann Apot 1:8.) Biensir, zot pa ti pou kapav fer sa travay-la par zot prop lafors. Zot ti pou bizin lespri sin, setadir “lasistan” ki Zezi ti promet pou donn zot.—Zan 14:26, NW; Zaka. 4:6.
5-6. Kouma lespri sin ti ed bann disip Zezi?
5 Lapantkot lane 33 Nou Lepok, bann disip Zezi ti gagn lespri sin. Avek led lespri sin, deswit zot ti koumans prese, ek dan bien tigit letan, bann milye dimounn ti aksepte bonn nouvel. (Zist. 2:41; 4:4) Kan bann dimounn ti koumans persekit zot, bann disip pa ti per ek aret prese. Okontrer, zot ti demann Bondie pou ed zot. Zot ti priye: “Donn to bann serviter boukou kouraz pou anons to parol.” Lerla, zot ti gagn lespri sin ek zot ti kontign “anons laparol Bondie avek lasirans.”—Zist. 4:18-20, 29, 31.
6 Bann disip Zezi ti gagn lezot difikilte osi. Par exanp, ti ena bien tigit kopi bann Lekritir. Bann disip pa ti ena bann liv ki ti explik Labib kouma nou ena azordi. Ek zot ti bizin pres ar bann dimounn ki koz diferan lang. Me malgre tou sa bann difikilte-la, zot ti fer enn kitsoz ki ti paret inposib. Dan apepre 30 an, zot ti pres bonn nouvel “ar tou kreatir anba lesiel.”—Kol. 1:6, 23.
7. Plis ki 100 an avan, kouma bann serviter Zeova ti kone seki Bondie ti atann zot fer, ek ki zot ti fer?
7 Dan nou lepok. Zeova pe kontign diriz so pep ek Li donn zot lafors pou fer so volonte. Li diriz so pep sirtou gras-a Labib, ki so lespri sin finn ede pou ekrir. Dan Labib, nou aprann lor minister Zezi ek lor komannman ki li ti donn so bann disip pou kontign travay ki li ti koumanse. (Mat. 28:19, 20) Latour Degard Ziliet 1881, an angle, ti dir: “Zeova pa finn swazir nou pou ki nou gagn loner ouswa vinn ris, me pou ki nou servi tou seki nou ena pou pres bonn nouvel.” Brosir Ar Kisannla sa Travay-la Finn Konfie, ki ti pibliye an 1919 an angle, ti dir: “Ena boukou travay pou fer, me se travay Lesegner, ek Li pou donn nou lafors pou fer sa.” Parey kouma bann Kretien dan premie siek, avek kouraz sa bann frer-la ti travay bien dir parski zot ti ena konfians ki lespri sin ti pou ed zot pou pres ar tou sort kalite dimounn. Nou osi, nou kapav ena konfians ki lespri sin pou ed nou azordi.
Lorganizasion Zeova finn servi bann meyer zouti ki ena pou partaz bonn nouvel (Get paragraf 8-9)
8-9. Ki bann metod lorganizasion Zeova finn servi pou partaz bonn nouvel?
8 Lorganizasion Zeova inn servi bann meyer zouti ki ena pou partaz bonn nouvel. Parmi sa bann zouti-la, ena bann piblikasion inprime, « Photo-Drame de la Création », bann fonograf, bann loto-oparler, bann program lor radio, ek depi pa tro lontan pe servi bann computer ek Internet. Lorganizasion Zeova pe fer pli gran travay tradiksion ki ena! Kifer? Pou ki tou sort kalite dimounn kapav tann bonn nouvel dan zot prop lang. Zeova pa fer preferans. Li ti predir ki bonn nouvel ti pou anonse ar “tou bann nasion, tribi, langaz ek pep.” (Rev. 14:6, 7) Li anvi ki tou dimounn tann mesaz lor so Rwayom.
9 Ki nou kapav dir lor bann dimounn ki nou pa kapav zwenn kot zot, kitfwa parski zot res dan bann lapartman kot nou pa kapav rantre parski ena enn gardien ouswa enn laport sekirite? Pou ki nou reisi zwenn sa bann dimounn-la, lorganizasion Zeova finn organiz diferan fason pou prese an piblik. Par exanp, an 2001, Komite Santral ti donn bann frer dan Lafrans lotorizasion pou koumans servi bann prezantwar ek bann lezot fason pou prezant bann piblikasion. Plitar, bann frer ek ser dan lezot landrwa osi ti koumans pres dan sa fason-la. Zot ti gagn bann bon rezilta. An 2011, dan Letazini, bann frer ti teste enn nouvo fason pou prese an piblik dan enn parmi bann landrwa kot ena pli boukou dimounn dan lavil New York. Pandan premie lane, zot ti distribie 102,129 liv ek 68,911 magazinn. Ek 4,701 dimounn ti demann enn letid Labib. Li kler ki lespri sin ti pe soutenir sa travay-la! Alor, Komite Santral ti donn bann frer ek ser dan lemond antie lotorizasion pou servi bann prezantwar ek bann lezot fason pou prezant bann piblikasion.
10. Ki nou kapav fer pou amelior nou minister?
10 Seki to kapav fer. Tir maximum profi ar formasion ki Zeova donn nou dan bann renion. Pres regilierman avek to group predikasion. Bann frer ek ser dan to group pou kapav ed twa pou prese ek ansegne dan enn pli bon fason, ek zot bon lexanp kapav ankouraz twa. Kontign prese malgre bann difikilte. Parey kouma nou text prinsipal pou sa lartik-la rapel nou, nou pe akonpli volonte Zeova, pa parski nou for, me parski nou gagn lafors gras-a so lespri sin. (Zaka. 4:6) Nou kapav sir ki Bondie pou donn nou lafors ki nou bizin parski nou pe fer so travay.
ZEOVA LI ENN BONDIE LORD EK LAPE
11. Kouma Komite Santral dan premie siek ti travay ansam dan linite pou ki ena lord parmi pep Bondie?
11 Dan premie siek. Komite Santral dan Zerizalem ti travay ansam dan linite pou ki ena lord ek lape parmi pep Bondie. (Zist. 2:42) Par exanp, ver lane 49 Nou Lepok, boukou Kretien ti ena diferan lopinion konsernan sirkonsizion. Alor, avek led lespri sin, Komite Santral ti examinn sa size-la. Si ti kontign ena divizion dan bann lasanble akoz sa size-la, sa ti pou blok travay predikasion. Mem si bann zapot ek bann ansien ti bann Zwif, zot pa ti les zot inflianse par tradision bann Zwif, ouswa par bann ki ti ansegn sa bann tradision-la. Okontrer, pou ki zot kapav pran enn bon desizion, zot ti fer bann resers dan Parol Bondie ek zot ti demann Bondie so lespri sin. (Zist. 15:1, 2, 5-20, 28) Ki rezilta zot finn gagne? Zeova ti beni zot desizion, ti ena lape ek linite dan lasanble, ek zot ti kontign pres bonn nouvel.—Zist. 15:30, 31, NW; 16:4, 5, NW.
12. Ki kitsoz montre ki ena lord ek lape dan lorganizasion Zeova azordi?
12 Dan nou lepok. Lorganizasion Zeova finn fer boukou zefor pou ki ena lord ek lape parmi pep Zeova. An 1895, dan nimero 15 Novam Le Phare de la Tour de Sion et Messager de la Présence de Christ, ti ena enn lartik ki ti ena tem « Avec bienséance et ordre » ki ti baze lor 1 Korintien 14:40. Sa lartik-la ti dir: “Bann zapot ti ekrir lasanble dan premie siek boukou kitsoz konsernan lord . . . Li inportan ki nou kontign obeir ‘touseki ti ekrir dan Lekritir lontan . . . pou nou linstriksion.’” (Rom. 15:4) Parey kouma bann Kretien dan premie siek, azordi osi, lorganizasion Zeova pe fer boukou zefor pou ki ena lord ek lape dan bann lasanble. Par exanp: Si to asiste letid Latour Degard dan enn lot lasanble, ki li dan to pei ouswa dan enn lot pei, to kone kouma sa letid-la pou deroule ek ki lartik pou etidie. Akoz sa, deswit to santi twa alez. Se zis gras-a lespri sin Zeova ki kapav ena sa linite-la!—Sof. 3:9, not.
13. Kan to reflesi lor Zak 3:17, ki bann kestion to kapav poz tomem?
13 Seki to kapav fer. Zeova anvi ki so pep “gard linite Lespri par lape ki tini zot ansam.” (Efe. 4:1-3) Alor, to kapav demann tomem: ‘Eski mo fer zefor pou favoriz lape ek linite dan lasanble? Eski mo obeir bann ki diriz nou? Eski lezot kapav kont lor mwa, sirtou si mo ena bann responsabilite dan lasanble? Eski mo aler, ek mo dispoze pou ed lezot?’ (Lir Zak 3:17.) Si to trouve ki to bizin fer bann sanzman dan sertin domenn, priye pou ki to gagn lespri sin. Plis to les lespri sin inflians to personalite ek to bann aksion, plis to bann frer ek ser pou kontan twa ek pou rekonesan anver twa.
ZEOVA ANSEGN NOU EK DONN NOU BANN ZOUTI KI NOU BIZIN
14. Dapre Kolosien 1:9, 10, kouma Zeova ti ed so pep dan premie siek pou gagn “konesans exakt lor [so] volonte”?
14 Dan premie siek. Zeova kontan ansegn so pep. (Ps. 32:8) Li anvi ki zot aprann konn Li, kontan Li, ek ki zot viv pou touletan. Tousala posib gras-a lansegnman ki Li donn nou. (Zan 17:3) Zeova ti servi lasanble Kretien dan premie siek pou ansegn so pep. (Lir Kolosien 1:9, 10, NW. *) Lespri sin, setadir ‘lasistan’ ki Zezi ti promet, ti osi ed bann disip. (Zan 14:16, NW) Lespri sin ti ed zot pou konpran Parol Bondie, ek pou rapel tou bann kitsoz ki Zezi ti dir ek fer, bann kitsoz ki plitar zot ti pou kapav lir dan bann Levanzil. Sa konesans-la ti fortifie lafwa bann premie Kretien ek ti osi ogmant zot lamour pou Bondie, pou Zezi, ek pou sakenn zot kamarad.
15. Dan ki fason to finn trouv Zeova realiz so promes ki trouv dan Izai 2:2, 3?
15 Dan nou lepok. Zeova ti predir ki “dan peryod final bann zour,” bann dimounn ki sorti dan tou nasion ti pou vinn lor so “montagn,” setadir zot ti pou zwenn ansam ar so bann serviter pou ki Li ansegn zot. (Lir Izai 2:2, 3. *) Azordi, nou pe trouv sa profesi-la realize. Nou kapav trouve ki vre ladorasion li boukou pli bon ki ninport ki fos ladorasion. Zeova pe donn nou enn kantite manze lor plan spiritiel! (Iza. 25:6) Gras-a “lesklav fidel ek saz,” Zeova pa zis donn nou manze an-abondans, me Li osi donn nou enn varyete manze. Par exanp, nou ena bann lartik, bann diskour, bann ti-komik, ek bann video. (Mat. 24:45, NW) Nou ena mem santiman ki Eliou, kamarad Zob, ki ti dir: “Ki instrikter parey kouma [Bondie]?”—Zob 36:22.
Grav laverite lor to leker ek met li an pratik dan to lavi (Get paragraf 16) *
16. Ki to kapav fer pou tir profi ar lansegnman Zeova?
16 Seki to kapav fer. Lespri sin Bondie pou ed twa pou met an pratik seki to lir ek etidie dan Parol Bondie. Parey kouma enn ekrivin Psom ti dir, demann Zeova: “A Zeova, montre mwa to semin. Mo pou mars dan to laverite. Fer mwa ena enn leker konple pou ki mo ena lakrint pou to nom.” (Ps. 86:11, NW) Anplis, kontign lir ek etidie Labib ek bann lezot piblikasion ki lorganizasion Zeova done. Biensir, to lobzektif se pa zis pou gagn enn konesans. To anvi grav laverite lor to leker ek met li an pratik dan to lavi. Lespri sin Zeova kapav ed twa pou fer sa. To anvi osi ankouraz to bann frer ek ser. (Ebre 10:24, 25) Kifer? Parski se to fami. Priye pou ki lespri sin Zeova ed twa pou donn bann komanter sinser dan bann renion, ek pou ki to kapav donn to maximum kan to ena enn partisipasion. Kan to fer tousala, to pou montre Zeova ek so Garson ki to bien kontan zot “bann ti mouton” ki ena boukou valer.—Zan 21:15-17.
17. Dan ki fason to kapav montre ki to pe soutenir lorganizasion Zeova avek fidelite?
17 Biento, sel lorganizasion ki pou reste lor later se lorganizasion ki dirize par lespri Bondie. Alor, soutenir lorganizasion Zeova. Parey kouma Bondie, montre ki to kontan tou dimounn kan to partaz bonn nouvel ar tou bann ki to zwenn. Imit lamour ki Zeova ena pou lord ek lape kan to favoriz linite dan lasanble. Ek ekout to Gran Instrikter kan to tir maximum profi ar tou bann lansegnman ki Li donn nou. Lerla, amezir ki lemond Satan pe al fini, to pa pou per. Okontrer, to pou ena kouraz ek to pou parmi bann ki pe soutenir lorganizasion Zeova avek fidelite.
KANTIK 3 Nou Lafors, Nou Lespwar, Nou Konfians
^ par. 5 Eski to sir ki Zeova pe diriz so lorganizasion azordi? Dan sa lartik-la, nou pou examine kouma Zeova ti diriz lasanble Kretien dan premie siek, ek kouma Li pe kontign diriz so pep azordi.
^ par. 1 EXPRESION KI’NN EXPLIKE: Zeova ena enn sel lorganizasion. Ena enn parti ki dan lesiel ek enn parti ki lor later. Dan sa lartik-la, mo “lorganizasion” fer referans ar parti lorganizasion Zeova ki lor later.
^ par. 14 Kolosien 1:9, 10: “9 Akoz sa osi, ki depi ki nou finn tann sa, nou pa finn aret priye pou zot ek aret demande ki zot ranpli ar konesans exakt lor volonte Bondie, avek enn gran sazes ek kapasite pou konpran bann kitsoz spiritiel, 10 pou ki zot mars dan enn fason ki Zeova aprouve, pou fer Li bien plezir dan tou kitsoz, alor ki zot kontign raport bann frwi dan tou bann bon travay ek progrese dan konesans exakt lor Bondie.”
^ par. 15 Izai 2:2, 3: “2 Dan peryod final bann zour, montagn lakaz Zeova pou etabli dan enn fason solid lao bann montagn, ek vremem li pou vinn pli ot ki tou bann kolinn, ek tou bann nasion pou mont ver li. 3 Ek boukou pep pou ale ek pou dir: ‘Vini, anou mont lor montagn Zeova, pou al dan lakaz Bondie Zakob. Li pou montre nou ki nou bizin fer, ek nou pou mars lor so semin.’ Parski lalwa pou sorti depi Sion, ek parol Zeova pou sorti depi Zerizalem.”
^ par. 54 DESKRIPSION ZIMAZ: Apre ki li’nn get bann video lor bann ki pe servi kot bizin plis proklamater, enn ser pionie pe anvi swiv zot lexanp. Finalman, li realiz so lobzektif pou al servi kot bizin plis proklamater.
