1. I vyani vino Aina Klistu abatiziwe yalinzile ukutwalilila ukucita?

UZYE mwabatiziwa? Ndi cakuti mwabatiziwa, ale mwalangilile apaswe ukuti mwaya nu utailo muli Yeova nupya mukulonda ukumuombela pamwi ni iuvi lyakwe. * Kuya kwene, utailo winu muli Yeova ulinzile ukulakulilako. Mulinzile ukutaila ukuti Yeova akutungulula iuvi lyakwe ndakai.

2-3. U mu nzila ci muno Yeova akatungulwila iuvi lyakwe ndakai? Langililini

² Ndakai, vino Yeova akatungulula iuvi lyakwe vikalanga imiyele ino wakwata, vino akalonda ukucita na vino masunde yakwe yaya. Katulande lyene pa miyele yakwe Yeova itatu iikalolekela umwi uvi lyakwe.

³ Ca kutandikilapo, “Leza ataya na kasoozi.” (Mili. 10:34) Kutemwa kwakwe Yeova kwalenzile apeele umwanakwe “kuti akulule antu onsi.” (1 Tim. 2:6; Yoa. 3:16) Yeova akaomvya antu yakwe ukusimikila ilandwe lisuma uku antu yonsi anguvwa, pakuti yazwe antu aingi ukuipakizya ivisuma ivyafuma umu mfwa yakwe Yesu. Cakwe ciili, Yeova a Leza wa mutende nupya asi wa cimvulunganya. (1 Kol. 14:33, 40) Fwandi tulinzile ukwenekela ukuti ya kapepa yakwe yatalinzile ukuya ni cimvulunganya. Cakwe citatu, Yeova a kasambilizya wa papelapela. (Eza. 30:20, 21) Ali mulandu kwene uno iuvi lyakwe likaezya na maka ukusambilizya antu Izwi lyakwe, Baibo umu cilongano nu mu mulimo wa kusimikila. Uzye Aina Klistu aali mu cilongano ca kutandikilapo yakolinye uli imiyele ii itatu yakwe Yeova? Uzye antu yakwe Yeova ndakai yakakolanya uli imiyele ii? Uzye umupasi  wa muzilo ungamwazwa uli lino mukuombela pamwi ni iuvi lyakwe Yeova ndakai?

4. Wakwe vino Milimo 1:8 ikalanda, u mulimo ci uno Yesu wanenyile alondezi yakwe ukuomba, nupya u kwazwa ci kuno yali nu kupokelela?

⁴ Mu nsita ya ina Klistu ya kutandikilapo. Ilandwe lino Yesu wasimikilanga lyalenganga antu yonsi yaya nu upalilo. (Luka 4:43) Wanenyile alondezi yakwe ukutwalilila ukuomba umulimo uno watandike, kusimikila “kufika na kuno insi yapela.” (Welengini Milimo 1:8.) Ukuya kwene, yataali nu kuomba umulimo uu ku maka yao. Yalondekwanga umupasi wa muzilo kuli kuti “kaazwa” wino Yesu wayalavile ukuyapeela.—Yoa. 14:26; Zaka. 4:6.

5-6. U mu nzila ci muno umupasi wa muzilo wazwile alondezi yakwe Yesu?

⁵ Alondezi yakwe Yesu yapokelile umupasi wa muzilo pa Pentekositi, umu 33 C.E. Pa mulandu wakuti umupasi wa muzilo wayazwile, lilyo kwene sile yatandike ukusimikila, nupya pa nsita sile inono antu aingi yazumile ilandwe lisuma. (Mili. 2:41; 4:4) Asambi yatuvwile intete lino antu yatandike ukuyacuzya, lelo yapefile kuli Leza pakuti ayazwe. Yapefile iyati: “Utuzumilizye swe aomvi yako, kuti tukosole ilandwe lyako nu kuposya konsi.” Lilyo kwene sile yazuziwe nu mupasi wa muzilo nu kutandika “kukosola ilandwe lyakwe Leza nu kuposya.”—Mili. 4:18-20, 29, 31.

⁶ Asambi yakwe Yesu yakwatanga intazi na zyuze. Pa nsita iya yataakweti mabuku ya malembelo aingi. Yataakweti na mabuku aakalanda pali Baibo wakwe vino twakwata ndakai. Nupya yali nu kusimikila ku antu aalandanga indimi zyuze izipusanepusane. Asi mulandu ni ntazi zii, asambi aali acincile yaomvile sana umulimo uwalolekanga kwati yatanga yakwanisye umu myaka sile inono, yasimikile ilandwe lisuma “ku antu yonsi pano nsi.”—Kolo. 1:6, 23.

7. Ukucila pa myaka 100 iyapitapo, uzye aomvi yakwe Yeova yamanyile uli vino Leza walondanga ukuti yacita, nupya ivyani vino yacisile?

⁷ Ndakai. Yeova watwalilila ukutungulula nu kwazwa antu yakwe. Ilingi akatungulula antu yakwe ukuomvya Baibo ino umupasi wa muzilo wazwilizye antu kulemba. Muli Baibo amuno tukabelenga vino Yesu waomvile umulimo wa kusimikila na vino wanenyile alondezi yakwe ukutwalilila ukuomba umulimo uno watandike. (Mate. 28:19, 20) Mpiti sana umu Julai 1881, magazini witu walanzile ukuti: “Yeova ataatusoolola nanti ukutupaka pakuti antu yatucindika nanti pakuti tukwate ivyuma, lelo a pakuti twasimikila ilandwe lisuma ukuomvya vino twakwata.” Akabuku akafumile umu 1919, akakweti umutwe wakuti: To Whom the Work Is Entrusted kalanzile ukuti: “Umulimo uu walolekanga ukome lelo wali u mulimo wa Mwene nupya wali nu kutupeela amaka akuomba.” Wakwe Aina Klistu ya kutandikilapo, aina yaa yasifile nu kuipelesya ukuomba umulimo, pano yamanyile ukuti umupasi wa muzilo wali nu kuyazwa ukusimikila uku yantu ya misango yonsi. Naswe kwene twataila ukuti umupasi wa muzilo wakulatwazwa na ndakai kwene.

8-9. I nzila ci zino iuvi lyakwe Yeova lyaomvyapo uku kusimikila ilandwe lisuma?

⁸ Iuvi lyakwe Yeova lyaomvyapo iviombelo ivisuma pa yakusimikila ilandwe lisuma. Pa viombelo vii paya ni mpapulo izipulintwe, “Photo-Drama of Creation,” fonogalafu, ya motoka akwata ivilimba, imilawasa, alino na vyuze ivyayako ndakai ya kompyuta na intaneti. Nupya iuvi lyakwe Leza likasenula ni mpapulo umu ndimi izingi ukucila vino cali mpiti. U mulandu ci? A pa mulandu wakuti antu yonsi yanguvwa ilandwe lisuma umu lulimi lwao. Yeova ataya na kasoozi; wasoowile ukuti ilandwe lisuma lyali nu kusimikilwa  “ku antu amuno nsi amisango yonsi, mitundu, ni ndimi ni nko zyonsi.” (Umbw. 14:6, 7) Akalonda ukuti umuntu wensi auvwe ilandwe lya Wene.

⁹ Nga antu yano cingatutalila ukusimikila pa mulandu wakuti mang’anda yao yacingililwa sana? Pakuti twasimikila sana ku antu yayo, Yeova wavwile iuvi lyakwe ukutandika ukuomvya inzila izipusanepusane pakuti twasimikila konsi ukuli antu. Wakwe umu 2001, Iumba Ilikatungulula lyazumilizye aina na ya nkazi aku France ukulaomvya tumasitandi twa mpapulo ni nzila zyuze izya kusimikililamo ku antu aingi. Lino papisile insita, aina umu mpanga zyuze nayo kwene yatandike ukuomvya inzila kwene ii. Ivyafumilemo vyali ivisuma. Umu 2011, inzila na yuze ipya iyamisimikilile yatandike ukuomba uku United States uku ncende ukwaya sana antu apamviwe mu musumba wa New York. Mu mwaka wa kutandikilapo, aina na ya nkazi yapeezile antu mabuku 102,129 na ya magazini 68,911. Nupya antu 4,701 yalenzile ukuti yayasambilizya Baibo! Tungalola vino Yeova waomvizye umupasi wakwe uwa muzilo ukutungilila umulimo uu. Nupya cii calenzile Iumba Ilikatungulula ukuzumilizya aina na ya nkazi umu nsi yonsi ukulaomvya tumasitandi twa mpapulo ni nzila zyuze pa kusimikila.

10. I vyani vino tungacita pakuti twasimikila nu kusambilizya ningo?

¹⁰ Vino mungacita. Mwaomvya vino Yeova akatusambilizya pa kulongana lino mukusimikila. Lyonsi mwaombela pamwi na ina na ya nkazi yano mwaya nayo ukwi umba lya mulimo. Aina na ya nkazi yano mwaya nayo umwi umba yangwamwazwa ukulasimikila nu kusambilizya ningo nupya mungasambililako kuli vino yakacita. Mwatwalilila ukusimikila asi mulandu ni ntazi. Wakwe vino ilembelo apafumile umutwe uu likulanda, tukacita ukulonda kwakwe Leza, asi pa mulandu na maka itu, lelo a pa mulandu nu mupasi wa muzilo. (Zaka. 4:6) Tungataila ukuti Yeova alatupeela amaka yano tukalondekwa pa mulandu wakuti tukaomba umulimo wakwe.

11. Uzye iumba ilikatungula ilyaliko umu manda ya ina Klistu ya kutandikilapo lyaombiile uli pamwi pa kulenga antu yakwe Leza ukutwalilila ukuya alemane?

¹¹ Mu nsita ya ina Klistu ya kutandikilapo. Iumba ilikatungulula ilyaliko umu Yelusalemu  lyaombisye sana pakuti antu yakwe Leza yataya ni cimvulunganya lelo yatwalilile ukuya nu mutende. (Mili. 2:42) Wakwe lino kwakatwike umulandu wa kusilamulwa umu 49 C.E., iumba ilikatungulula lyatungulwilwe nu mupasi wa muzilo pa kupingula umulandu uu. Ndi cakuti umulandu uu iutwalilila vivi kwene, umulimo wa kusimikila nga utaomvilwe ningo. Nanti icakuti yali Ayuda, atumwa na ikolo yataatungulwilwe ni ntambi zya Ayuda nanti antu atungililanga sana intambi zizyo. Lelo yalesile Izwi Lyakwe Leza nu mupasi wa muzilo kuyazwa ukupingulapo ningo. (Mili. 15:1, 2, 5-20, 28) I vyani ivyacitike? Yeova wapaazile vino yapingwilepo, umutende nu kulemana vyatwalilile ukuya umu cilongano nupya yatwalilile nu kusimikila ilandwe lisuma.—Mili. 15:30, 31; 16:4, 5.

12. I vyani vikalanga ukuti umwi iuvi lyakwe Yeova twalemana nupya twaya nu mutende?

¹² Ndakai. Iuvi lyakwe Yeova lyazwa antu yakwe Yeova ukutwalilila ukuya alemane nupya amutende. Mpiti sana umu 1895 muli magazini ino yamanga ukuti Zion’s Watch Tower and Herald of Christ’s Presence yakwe Novemba 15 mwali icipande icatangi “Umu Nzila Isuma Nupya Itantikwe,” icafumile pa mazwi aaya pali 1 Kolinto 14:40. Cipande cii calanzile ukuti: “Atumwa yalemvile ivyeo ivingi ku cilongano ca Ina Klistu ya kutandikilapo pali vino ivintu vyali. . . Cacindama sana ukuvwila ‘ivyalemvilwe uku kutusambilizya.’” (Loma 15:4) Na ndakai kwene, iuvi lyakwe Yeova likaombesya ukwazwa aina umu vilongano ukuya alemane nupya amutende wakwe vino cali mu nsita ya ina Klistu ya kutandikilako. Tuti limwi mwaya umu kulongana ku kulongana kwa pa mpela ya mulungu ku cilongano cuze mu mpanga inu nanti uku mpanga yuze, mungamanya vino Isambililo lya Lupungu limatungululwa ni cipande cino mumasambilila. Lilyo kwene sile, mumauvwa ningo! Umupasi wakwe Leza sile uungalenga kuye ukulemana kuu.—Zefa. 3:9.

13. Lino tukwelenganya api lembelo lyakwe Yakobo 3:17, a mauzyo ci yano tulinzile ukuyuzya sweineco?

¹³ Vino mungacita. Yeova akalonda antu yakwe ukuya alemane nu kwikala umutende. (Efes. 4:1-3) Fwandi muyuze mweineco muti:  ‘Uzye vino nkacita vikalenga umu cilongano muye umutende nu kulemana? Uzye nkauvwila yayo aakatungulula? Uzye antu yangantaila, sana sana ndi cakuti nakwata imilimo mu cilongano? Uzye nkakonka insita, ukwazwa yauze nu kulondesya ukuomba?’ (Welengini Yakobo 3:17.) Ndi cakuti mwalola mumwi muno mukulondekwa ukuzifya, mulinzile ukulenga umupasi wa muzilo. Nga mwaleka umupasi wa muzilo ukutungulula imiyele inu na vino mukacita, aina na ya nkazi yalamutemwa nupya yalamucindika.

14. Ukulingana na Kolose 1:9, 10, uzye Yeova wasambilizye uli aina Klistu ya kutandikilako?

¹⁴ Mu nsita ya Ina Klistu ya kutandikilapo. Yeova watemwa ukusambilizya antu yakwe. (Masa. 32:8) Akalonda yamumanye, kumutemwa nu kwikala manda pe wa ana yakwe yano watemwa. Vyonsi vii vitanga vicitike ndi cakuti Yeova asikutusambilizya. (Yoa. 17:3) Yeova waomvizye Aina Klistu ya mu cilongano ca kutandikilapo ukusambilizya antu yakwe. (Welengini Kolose 1:9, 10.) Umupasi wa muzilo, “kaazwa” uno Yesu walavile, wazwilizye asambi yakwe. (Yoa. 14:16) Umupasi wa muzilo wazwilizye asambi ukuvwikisya Izwi Lyakwe Leza nu kwiusya vintu vyonsi vino Yesu walanzile na vino wacisile, vino izile iyalemba nu mu mabuku ya Malandwe. Vino Aina Klistu yakutandikilako ya sambilile vyalenzile ukuti utailo wao ukomeleko, ukutemelwako Yeova nu mwanakwe alino nu kutemwana.

15. U mu nzila ci muno mwalola ukuti Yeova wafikilizya ulayo wakwe uwaya pali Ezaya 2:2, 3

¹⁵ Ndakai. Yeova wasoowile ukuti “umu manda akusyalikizya” antu amu nko zyonsi yaliza uku mwamba wa unkolanya kuli kuti ukupepa kwa cumi pakuti yasambiliziwe vino akalonda. (Welengini Ezaya 2:2, 3.) Tukulola vino usesemo uu ukufikiliziwa. Ukupepa kwa cumi kwaluta imipepele ya ufi yonsi. Nupya Yeova  akupeela antu yakwe ivyeo ivingi ivya muli Baibo! (Eza. 25:6) Akaomvya “muomvi mutailwe uwa mano” ukutupeela ivyeo vii vyonsi umu nzila izipusanepusane, tungabelenga ivipande, ukukutika uku malyasi nu kutamba mavidyo. (Mate. 24:45) Naswe kwene tukayuvwa wakwe vino cuza wakwe Yobo Eliu wayuvwile, uwalanzile ukuti: Ucindami apa mulandu wa maka yakwe Leza.—Yobo 36:22.

16. I vyani vino mungacita pakuti mwaipakizya vino Yeova akatusambilizya?

¹⁶ Vino mungacita. Umupasi wakwe Leza ungamwazwa ukuomvya vino mwabelenga na vino mwasambilila umwi Izwi Lyakwe Leza. Mwapepa wakwe vino kalemba wa masamu wapefile ukuti: “Unsambilizye ukucita vino ukalonda pakuti nakutontelela mu mipitile yane na pakuti naoopa izina lyako.” (Masa. 86:11) Fwandi, twalililini ukubelenga nu kusambilila Baibo alino ni mpapulo zyuze zino iuvi likatupekanyizizya. Ukuya kwene, uyo winu usi wa kusambilila sile. Mulinzile ukuzumila icumi nu kulacita vino mukusambilila. Umupasi wakwe Yeova ungamwazwa ukucita vivyo. Nupya mulinzile ukukomelezya aina na ya nkazi. (Ayeb. 10:24, 25) U mulandu ci? Apa mulandu wakuti aalupwa inu. Mwalenga umupasi wakwe Leza pakuti wamwazwa ukwasukapo lino muli umu kulongana nu kuomba ningo lino imukwata ilyasi. Nga mukucita vivyo mulalanga Yeova nu mwanakwe ukuti mwatemwa “mfwele” zyao zicindame sana.—Yoa. 21:15-17.

17. U mu nzila ci muno mungalangila ukuti mukatungilila iuvi lyakwe Yeova na ucisinka?

¹⁷ Likwene sile, iuvi ilikatungululwa nu mupasi wakwe Leza i lilasyala sile pano nsi. Fwandi mwaombesya lino mukuombela pamwi ni iuvi lyakwe Yeova. Mwalanga ukuti mwatemwa antu yonsi wakwe vino Leza waya lino mu kusimikila ku yantu apusanepusane. Mwakolanya Yeova vino ataya ni cimvulunganya nupya waya nu mutende lino mukucita ivingalenga umu cilongano mwaya ukulemana. Nupya mwakutika kuli Kasambilizya wa Papelapela lino mu kuomvya vino akatusambilizya. Lyene lino insi yakwe Satana ikuya ikusila, mutalaya ni ntete. Lelo mulatwalilila ukuya asiipe pamwi na yonsi aya ni cisinka akaombela pamwi ni iuvi lyakwe Yeova.