1. Bõe la kiris-ned sẽn deeg lisg segd n ket n maandẽ?

YÃMB deega lisg bɩ? Sã n yaa rẽ, yãmb wilga zãma wã taoor tɩ y tẽeda a Zeova, la tɩ y tʋllame n zĩnd a siglgã * pʋgẽ, n maand a raabã. Y segd n modgame tɩ y tẽebã pãng paasdẽ. Y segdame me n kell n kɩs sɩd t’a Zeova siglgã tʋmda tʋʋmd ning a sẽn dat t’a tʋm rũndã-rũndã wã.

2-3. D sã n ges a Zeova sẽn wilgd a siglgã sor to-to wã, d nee bõe? Rɩk-y makre.

² Rũndã-rũndã, d sã n ges a Zeova sẽn wilgd a siglgã sor to-to wã, d nee a sẽn yaa Wẽnnaam ning buudã, a raabã, la a noyã. Bɩ d gom a Zeova yel-manesem a tãab sẽn pukd vẽeneg a siglgã pʋgẽ yelle.

³ Pipi, “Wẽnnaam pa tũusd ned” ye. (Tʋʋ. 10:34) Yaa nonglem yĩng la a Zeova rɩk a Biigã n kõ t’a yɩ “yaood ning sẽn da segd n yao n fãag ninsaalbã fãa” wã. (1 Tɩm. 2:6; Zã 3:16) A Zeova kɩtame t’a nin-buiidã moond koe-noogã neb nins fãa sẽn dat n kelgã, tɩ rẽ kɩt tɩ b tõogd n sõngd neb wʋsg sẽn na yɩl tɩ b wa paam vɩɩm sẽn kõn sa. Yiibu, a Zeova pa zũnd-zãnd Wẽnnaam ye. A yaa laafɩ Wẽnnaam. (1 Kor. 14:33, 40) Woto wã, a nin-buiidã sẽn tũud-a to-to wã me pa segd n yɩ ne zũnd-zãnd ye. Segd n yɩɩ ne laafɩ. Tãabo, a Zeova n yaa Karen-saam-kãsengã.  (Eza. 30:20, 21) Rẽ n so t’a siglgã maand a sẽn tõe fãa n zãmsd nebã Biiblã tigingã pʋgẽ, la koɛɛgã mooneg sasa. Wãn to la a Zeova yel-manesem a tãab kãensã ra pukd vẽeneg pipi kiris-nebã tiging pʋgẽ? Wãn  to la b pukd rũndã-rũndã me? Y sẽn be a Zeova siglgã pʋgẽ rũndã-rũndã n maand a raabã, wãn to la vʋʋsem sõngã tõe n sõng yãmba?

4. Wa b sẽn togs Tʋʋm 1:8 pʋgẽ wã, bõe la a Zeezi kõ a karen-biisã noor tɩ b maane, la bõe n da na n sõng-ba?

⁴ Pipi kiris-nebã wakatẽ: Koɛɛg ning a Zeezi sẽn moonã kɩtame tɩ ãdem-biisã tẽ tɩ manegr n wate. (Luk 4:43) A kõo a karen-biisã noor tɩ b kell n tʋm tʋʋmd ning a sẽn sɩngã, n moon koɛɛgã “hal n tãag dũniyã zĩig ning sẽn zãr n yɩɩdã.” (Karm-y Tʋʋm 1:8.) La b ra pa tõe n tʋm tʋʋmdã ne b meng pãng ye. Ra yaa tɩlɛ tɩ b paam vʋʋsem sõngã sõngre, rat n yeel tɩ “sõangd” ning a Zeezi sẽn pʋlem-bã.—Zã 14:26; Zaka. 4:6.

5-6. Wãn to la vʋʋsem sõngã sõng a Zeezi karen-biisã?

⁵ Yɩɩ yʋʋmd 33 Pãntekotã daar la a Zeezi karen-biisã paam vʋʋsem sõngã. Ne vʋʋsem sõngã sõngre, tao-tao bala b sɩnga koɛɛgã moonego, la pa yã n kaoos la neb tusa sak koe-noogã ye. (Tʋʋ. 2:41; 4:4) La nebã sẽn wa n yik n namsd karen-biisã, b pa zoe rabeem n bas koɛɛgã mooneg ye. B pʋʋsa a Zeova n yeel yaa: “Sõng-y y yembsã tɩ b kell n moon yãmb gomdã ne raoodo.” Rẽ poore, b paama vʋʋsem sõngã n da ket n “togsd Wẽnnaam gomdã ne raoodo.”—Tʋʋ. 4:18-20, 29, 31.

⁶ A Zeezi karen-biisã paama zu-loees a taab me. Wala makre, b ra pa tar Gʋls-sõamyã sɛb wʋsg ye. B leb n da pa tar sɛb sẽn bilgd Biiblã goam võor wa tõnd sẽn tar rũndã-rũndã wã ye. Sẽn paase, karen-biisã ra segd n moona neb sẽn gomd buud-goam toɛy-toɛya. Baa ne zu-loe-kãensã fãa, karen-bi-kãensã sẽn da tar yẽesmã tʋma tʋʋm-kãngã sẽn da wõnd pa tol n tõe wã. Bala sẽn zems yʋʋm 30 pʋgẽ bal tɩ b moona koe-noogã “dũniyã gill zugu.”—Kol. 1:6, 23.

7. Sẽn yɩɩd yʋʋm koabg masã, a Zeova nin-buiidã maana wãn n bãng a sẽn dat tɩ b maan bũmb ningã, la b manesem yɩɩ wãna?

⁷ Rũndã-rũndã: A Zeova ket n wilgda a nin-buiidã sore, la a kõt-b pãng tɩ b maand a raabã. Sẽn yɩɩd fãa, a wilgda a nin-buiidã sor ne Biiblã a vʋʋsem sõngã sẽn vẽneg tɩ b gʋlsã maasem. Biiblã pʋgẽ, b gomda a Zeezi koe-moonegã yelle, la noor ning a sẽn kõ a karen-biisã tɩ b kell n tʋm tʋʋmd ning a sẽn sɩngã. (Mat. 28:19, 20) Hal yʋʋmd 1881 sẽoog kiuugã, Gũusg Gasgã yeelame: “B pa bool tõnd bɩ n zae tõnd ne vʋʋsem sõngã ziir yĩnga, bɩ arzɛk baoob yĩng ye. La yaa sẽn na yɩl tɩ d tũnug ne d sẽn tarã fãa, la d mong d mens n moon koe-noogã.” Yʋʋmd 1919 wã, b yiisa sebr t’a gom-zugã yaa: “ Ãnda la bobl tʋʋmdã?” Sebrã yetame: “Tʋʋmdã yɩɩda d nugu, la sẽn yaa Zu-soabã tʋʋmdã, a na n kõ-d-la pãng tɩ d tõoge.” Wa pipi kiris-nebã, saam-bi-kãensã tʋma ne yẽesem, bala b ra kɩsa sɩd tɩ vʋʋsem sõngã na n sõng-b lame tɩ b taas neb buud fãa koɛɛgã. Rũndã-rũndã, tõnd me kɩsa sɩd tɩ vʋʋsem sõngã na n sõng-d lame.

8-9. Manesem-bʋs la a Zeova nin-buiidã tũnug ne n moond koɛɛgã?

⁸ A Zeova siglgã tũnugda ne tʋʋm-teed sẽn yaa sõma wʋsg n moond koe-noogã. Wala makre, b tũnuga ne “Photo-Drame de la Création” wã, fõnograf-rãmba, mobill sẽn tar alo-alo, la radio-rãmba. Yʋʋma noorã, b tũnugda ne ordinatɛɛr-dãmb ne ẽntɛrnetã. A Zeova siglgã leb n lebgda sɛb ne buud-goam wʋsg hal t’a buud zɩ n zĩnd ye. Bõe yĩnga? Yaa sẽn na yɩl tɩ ned buud fãa tõe n wʋm koe-noogã a mengã  buud-gomd pʋgẽ. A Zeova pa tũusd neb ye. A pĩnd n togsame tɩ b na n moona koe-noogã “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.” (Vẽn. 14:6, 7) Dẽnd a ratame tɩ ned buud fãa wʋm Rĩungã koɛɛgã.

⁹ La b maanda wãn tɩ koɛɛgã tat neb nins sẽn vɩ rot sẽn pag kũma pʋsẽ, tɩ ned pa tõe n kẽ wã? Sẽn na yɩl n paam nin-kãens n taas koɛɛgã n paase, a Zeova siglgã gesame tɩ b na n sigl koe-moonegã zãma zĩisẽ. Wala makre, yʋʋmd 2001 wã, siglgã taoor lʋɩtb sullã kõo sore, tɩ b na n sɩng koɛɛgã mooneg ne perzãntoaar-dãmb Fãrense, la tẽns a taabẽ me rẽ poore. Tʋʋmdã woma biis sõma. Yʋʋmd 2011 wã, b sɩnga koɛɛgã mooneg ne manesem a to Niuyork tẽngã zĩig nebã sẽn waoogẽ n tɩ yɩɩda. Pipi yʋʋmdã, yaa sɛb bãmb 102 109 la b kõ nebã, tɩ Gũusg Gasgã la Réveillez-vous ! wã sõor yɩ bãmb 68 911. Neb 4 701 n kos n na n zãms Biiblã. Yaa vẽeneg tɩ vʋʋsem sõngã ra sõngd-b-la tʋʋmdã pʋgẽ. Rẽ kɩtame tɩ siglgã taoor lʋɩtb sullã kõ sore, tɩ b na n moond koɛɛgã dũniyã gill zug ne perzãntoaar-dãmbã.

10. Bõe la d tõe n maan n paas d koe-moonegã minim?

¹⁰ Y sẽn tõe n maane: Rɩ-y zãmsg ning a Zeova sẽn kõt tõnd ne tigissã maasmã yõodo. Naagd-y y koe-moonegã sullã neb n moond koɛɛgã. B tõe n sõnga yãmb tɩ y paam minim n paas koɛɛgã mooneg la nebã zãmsg wɛɛngẽ. B mak-sõngã me tõe n kenga y raoodo. Kell-y n moon-y koɛɛgã, baa pa nana. Wala vɛrse ning zug sõs-kãngã sẽn tikã sẽn wilgdã, d sẽn tõogd n maand Wẽnnaam daabã pa ne d meng pãng ye. Yaa ne vʋʋsem sõngã pãnga. (Zaka. 4:6) D tõe n kɩsa sɩd tɩ Wẽnnaam na n kõ-d-la pãnga, bala yaa yẽ tʋʋmd la d sẽn tʋmdã.

11. Pipi kiris-nebã wakatẽ, wãn to la siglgã taoor lʋɩtb sull naag taab n tʋm sẽn na yɩl tɩ zũnd-zãnd ra zĩnd Wẽnnaam nin-buiidã sʋka?

¹¹ Pipi kiris-nebã wakatẽ: Pipi kiris-nebã wakatẽ, siglgã taoor lʋɩtb sull sẽn da be Zerizalɛmmã naaga taab n tʋm sẽn  na yɩl tɩ zũnd-zãnd ra zĩndi, la tɩ laafɩ kell n zĩnd Wẽnnaam nin-buiidã sʋka. (Tʋʋ. 2:42) Wala makre, bãongã kõom yellã sẽn wa n yik yʋʋmd 49 wã, ne vʋʋsem sõngã sõngre, siglgã taoor lʋɩtb sull baoo yellã tɩɩm. Yel-kãngã sã n da kell n welg tigingã nebã, koe-moonegã ra tõe n yalsame. Baa ne tʋm-tʋmdbã ne kãsem-dãmbã sẽn da yaa zʋɩf-rãmbã, b pa bas tɩ zʋɩf-rãmbã rog-n-mikã, wall neb nins sẽn da gãd rẽ dem-demã tõog-b ye. B pʋd n baoo Wẽnnaam Gomdã la a vʋʋsem sõngã sõngre. (Tʋʋ. 15:1, 2, 5-20, 28) Baasa wãn to? A Zeova ninga b yam-yãkrã barka, tɩ kɩt tɩ laafɩ kell n zĩndi, tɩ koe-moonegã kẽng taoore.—Tʋʋ. 15:30, 31; 16:4, 5.

12. Bõe n wilgd tɩ rũndã-rũndã, zũnd-zãnd pa be a Zeova siglgã pʋgẽ, la yaa laafɩ?

¹² Rũndã-rũndã: A Zeova siglgã tʋmda sẽn na yɩl tɩ zũnd-zãnd ra zĩndi, la tɩ laafɩ kell n zĩnd Wẽnnaam nin-buiidã sʋka. Hal yʋʋmd 1895 wã, sɩpaolg kiuug rasem 15 Le Phare de la Tour de Sion et Messager de la Présence de Christ pʋgẽ, sõsg n da be be t’a gom-zugã yaa: “Wa sẽn segde, la pa ne zũnd-zãnd ye.” Ra tika 1 Korẽnt rãmb 14:40. Ad b sẽn yeel sõsgã pʋgẽ: “Tʋm-tʋmdbã gʋlsa bũmb wʋsg n tool tigimsã, n gom zũnd-zãndã yelle. . . Segdame tɩ d kell n sak n tũ ‘bũmb nins fãa b sẽn gʋls pĩnd tõnd zãmsg yĩngã.’” (Rom. 15:4) Rũndã-rũndã me, a Zeova siglgã maooda sẽn na yɩl tɩ zũnd-zãnd ra zĩndi, la tɩ laafɩ kell n zĩnd Wẽnnaam nin-buiidã sʋka, wa sẽn yɩ to-to pipi kiris-nebã wakatẽ wã. Wala makre, f sã n kẽng tiging a to pʋgẽ, baa yaa tẽng a to, f zoe n mii Gũusg Gasgã zãmsg sẽn na n yɩ to-to, la sẽn na n yɩ sõsg ningã. Tao-tao bala f yam gãeeme, bala f neeme tɩ bũmb pa toeem ye. Wẽnnaam vʋʋsem sõngã bal n tõe n kɩt tɩ zems-n-taar a woto zĩndi.—Sof. 3:9.

13. Sẽn zems ne Zak 3:17, sogs-bʋs la d segd n sok d mense?

¹³ Y sẽn tõe n maane: A Zeova ratame t’a nin-buiidã ‘modg tɩ zems-n-taar ning b sẽn paam vʋʋsem sõngã maasem yĩngã kell n zĩnd b sʋka.’ (Efɛ. 4:1-3) Rẽ wã, sok-y y meng yaa: ‘Mam modgdame tɩ zems-n-taar la laafɩ be tigingã pʋgẽ bɩ? Mam sakda  sẽn lʋɩt-b taoorã bɩ? Neb a taabã tõe n teega maam, sẽn yɩɩd fãa m sã n tara tʋʋmd tigingã pʋgẽ bɩ? M nong n wata lɛɛr bɩ? M sõngda nebã, la m tʋll n sõng ne tũudmã tʋʋm bɩ?’ (Karm-y Zak 3:17.) Sã n mik tɩ y segd n modgame n paase, bɩ y pʋʋs n kos vʋʋsem sõngã sõngre. Y sã n sak tɩ vʋʋsem sõngã rems y zʋgã la y tʋʋm-tʋmdɩ wã, y tẽed-n-taasã na n nong-y lame la b nand-y-yã.

14. Sẽn zems ne Kolos rãmbã 1:9, 10, bõe la a Zeova tũnug n zãms a nin-buiidã pipi kiris-nebã wakatẽ?

¹⁴ Pipi kiris-nebã wakatẽ: A Zeova sũur noomame, a sẽn zãmsd a nin-buiidã. (Yɩɩn. 32:8) A ratame tɩ d bãng-a sõma, n nong-a la d wa paam n vɩɩmd wakat sẽn kõn sa. Sã n da pa a Zeova sẽn zãmsd tõndã, d ra pa tõe n bãng woto fãa ye. (Zã 17:3) A Zeova tũnuga ne pipi kiris-nebã tiging n zãms a nin-buiidã. (Karm-y Kolos rãmb 1:9, 10.) Vʋʋsem sõngã, sẽn yaa “sõangd” ning a Zeezi sẽn da pʋlmã sõnga kiris-nebã wʋsgo. (Zã 14:16) Sõnga karen-biisã tɩ b wʋm Wẽnnaam Gomdã võor sõma, la tẽeg-b bũmb wʋsg a Zeezi sẽn yeel la a maane, tɩ b wa gʋls rẽ fãa Evãnzill-dãmbã pʋgẽ wã. Woto fãa paasa pipi kiris-nebã tẽeb pãnga. Kɩtame me tɩ b maneg n nong Wẽnnaam ne a Biigã, la b maneg nong taab me.

15. Kaset-bʋg la yãmb tara, sẽn wilgd t’a Zeova sɩd pidsda gomd ning a sẽn togs tɩ be Ezayi 2:2, 3 pʋgẽ wã?

¹⁵ Rũndã-rũndã: A Zeova pĩnd n togsame tɩ “yaoolem wakatã,” buud toɛy-toɛy neb na n kaoog n waa a tãngã zugu, rat n yeel tɩ tũudum hakɩɩkã pʋgẽ, sẽn na yɩl n zãms a soayã. (Karm-y Ezayi 2:2, 3.) D nee gom-kãngã sẽn pidsd rũndã-rũndã. Tũudum hakɩɩkã pa tõe n dɩk n mak ne tũudum a taabã sẽn yaa ziri wã ye. Sãmbg kae t’a Zeova sɩd kõta a nin-buiidã bũmb  ka tɛka, b tẽebã bɩɩsg yĩnga. (Eza. 25:6) Ne “tʋm-tʋmd sẽn tũud sɩd la sẽn tar yamã” maasem, a Zeova pa kõt tõnd bũmb wʋsg bal ye. Yaa bũmb toor-toore, wala makre, sɛb la sõss buud toor-toore, la video toɛy-toɛya. (Mat. 24:45) Tõnd me tagsda wa a Zoob zoa a Elihu sẽn yeelã. A yeelame: ‘Karen-saamb bʋg n yaa wa Wẽnnaam?’—Zoob 36:22.

16. Bõe la y tõe n maan tɩ y tẽebã pãng paase?

¹⁶ Y sẽn tõe n maane: Vʋʋsem sõngã na n sõng-y lame tɩ y tũ bũmb nins y sẽn zãmsd Wẽnnaam Gomdã pʋgẽ wã. Maan-y wa yɩɩn-gʋlsdã. A pʋʋsa Wẽnnaam n yeel yaa: “Sẽn-Ka-Saabo, zãms-y maam tɩ m maan yãmb daabã! Mam na n kẽna yãmb sɩdã pʋga. Kɩt-y tɩ m paam tagsg a yembr bala, sẽn yaa tɩ m zoe yãmb yʋʋrã.” (Yɩɩn. 86:11) Woto yĩng bɩ y ket n zãmsd Biiblã la y karemd sɛb nins a Zeova siglgã sẽn yiisdã. Pa sẽn na yɩl n paam bãngr bal ye. Yaa sẽn na yɩl tɩ Biiblã sẽn yetã kẽ y sũurã, tɩ y tũud rẽ y vɩɩmã pʋgẽ. A Zeova vʋʋsem sõngã tõe n sõnga yãmb tɩ y maan rẽ. Y leb n segd n kenga y saam-biisã raoodo. (Ebre. 10:24, 25) Bõe yĩnga? Bala bãmb ne tõnd fãa yaa wa zak a ye neba. Pʋʋs-y n kos-y Wẽnnaam vʋʋsem sõngã, tɩ sõng-y tɩ y tõogd n kõt leoor sẽn yit y sũurẽ tigissã sasa, la sõng-y me tɩ y sã n wa tar sõsg bɩ y tõog n wɛgs-a sõma. Y sã n maand woto, y wilgda a Zeova ne a Biigã tɩ y nonga b ‘piisã’, sẽn tar yõod wʋsg b nifẽ wã.—Zã 21:15-17.

17. Bõe ne bõe la y tõe n maan n wilg tɩ y teenda a Zeova siglgã ne y sũur fãa?

¹⁷ Ka la bilfu, yaa siglg ning a Zeova sẽn tũnugd ne a vʋʋsem sõngã n wilgd sorã bal n na n ket tẽngã zugu. Rẽ wã, bɩ y ket n naagd a Zeova siglgã n tʋmd ne yẽesem. Moond-y koe-noogã neb buud fãa, n wilg tɩ wa a Zeova, yãmb me pa tũusd neb ye. Mao-y tɩ zems-n-taar zĩnd tigingã pʋgẽ, n wilg tɩ wa a Zeova, yãmb me nonga laafɩ la y pa nong zũnd-zãnd ye. Rɩ-y bũmb nins fãa a Zeova sẽn kõt tõnd d tẽebã bɩɩsg yĩngã nafa, n wilg tɩ y kelgda y Karen-saam-kãsengã. Rẽ, a Sʋɩtãan dũniyã sã n wa na n sãame, y pa na n zoe rabeem ye. Y pʋd n na n naaga a Zeova siglgã neb sẽn tũud-a ne b sũy fãa wã n kell n tall raoodo.