1. ǁĀǁnâsa Xristeǁîna tae-e nî dī ǀgara?

ǁĀǁNÂHE du hâ? ǁĀǁnâhe du ge tsēs ai du ge ǂgui khoen ais ai ge ǁgau, ǂgomsa du Jehovab tsî ǁîb ǀapeǂhomis ǃnâ ūhâsa tsî du ǁîba ra ǃoaba ǂgao ǃkhaisa. * Xawe sadu ǂgoms Jehovab ǃnâ du ūhâs ge nî kai. Tsî du ge Jehovab ǀapeǂhomis nētsē ǁîb ǂâisa ra dīsa nî ǂgomǃgâ.

2-3. Mâ ǀgaugu ǃnâb Jehovaba ǁîb ǀapeǂhomisa nētsē ra daoǁgau? Aiǁgauna mā re.

² Jehovab ge nētsē ǁîb ǀapeǂhomisa ra daoǁgau ǁîb di ǀgaugu, ǂâibasens tsî ǁkhāsib ǃoa. Hā re îda ǃnona xūn, Jehovab di ǀgaun hîna da a mû ǁkhāga, ǁîb ǀapeǂhomis ǃnâ ǃhoaǃgao.

³ ǂGurose, ‘Elob ge khoen’ ǁaegu ǀgorasa ūhâ tama. (ǃNǃkh. 10:34) ǀNammi ge Jehovaba ge ǁgari îb ǁîb Ôaba “hoan ǃaroma xoremarib ase” mā. (1Tim. 2:6; Jhn. 3:16) Jehovab ge khoena ra sîsen-ū, în ǃgâiǂhôasa ǁnān hîna ra ǃgâna aoǁnâba. Nēs ǃnâb ge mâ khoe-i hoa-i hîna xoremarib ǃgâiba ra hō ǂgao-e ra hui. ǀGamǁîse, Jehova Elob ge ǃkhaerasib di Elo tamaba, xaweb ge a ǂkhîb di Eloba. (1Kor. 14:33, 40) ǁNā-amaga da ge nî ǃâubasen ǁîb di ǃoaba-aon ǁîba ǃamkuse ǂkhîb ǃnâ nî ǃoaba ǃkhaisa. ǃNonaǁîse, Jehovab ge kai ‘ǁkhāǁkhā-aoba.’ (Jes. 30:20, 21) ǁNā-amagas ge ǁÎb di ǀapeǂhomisa ǃgarise ra sîsen, îs nau khoena Elobmîsa ǁkhāǁkhā. Nēs ge ǀhaohâb tsî aoǁnâ sîsenni ǃnâ-ū ra dīhe. Mati î ge ǂgurokam ǁaeb Xristeǁîna nē ǃnona ǀgaugu Jehovab diga gere ǁgae?  Jehovab di khoena nētsā ǁnā ǀgauga mati ra ǁgae? Tsî ǃanu gagaba nētsē mati ra hui du Jehovab ǀapeǂhomis ǃnâ du ra ǃoaba hîna?

4. ǃNaeǃkhaidi 1:8 ǃoagub ge Jesuba, ǁîb di ǁkhāǁkhāsabega tae-e mîmâ tsî tae-i huiba gu ge hō?

⁴ ǂGurokam Xristeǁîn ǁaeb, ǃnâ i ge Jesub gere aoǁnâ haisi-amsa khoena ǃâubasensa gere mā. (Luk. 4:43) ǁÎb sao-aogab ge ge mîmā i gu ǁîb ge tsoatsoa sîsen-e “ǃhūbaib di ǀams kōse.” (Khomai re ǃNaeǃkhaidi 1:8.) Ama i ge, nē sîsen-e gu ge ǁîgu di ǀgaib ǀkha dīho tite. ǁÎb di ǃanu gagaba gu ge ǂhâ hâ. ǁNā hui ǃnâ ra ‘ǃanu gagabab’ ge Jesuba ge mîmâiba gu.—Jhn. 14:26; Sax. 4:6.

5-6. ǃAnu gagaba mati Jesub di ǁkhāǁkhāsabega gere hui?

⁵ Jesub di sao-aogu ge pinkstertsēs ai 33ǁî kuri, ǃanu gagaba ge hō. ǃAnu gagab huib ǀkha gu ge ge aoǁnâ tsoatsoa tsî i ge ǃnubu ǁaeb ǃnâ ǂgui khoena nē ǃgâiǂhoâsa ge ūǃoa. (ǃNǃkh. 2:41; 4:4) Mâǃoa-e gu gere xawe gu ge ǁkhāǁkhāsabega ǃao tsî ge aoǁnâ ǀû tama hâ-i. ǁÎgu ge Elob ai huiba gere oâ. Nēti gu ge ge ǀgore: ‘Sa ǃgāga mā, i gu ǂhauǃnâsib hoab ǀkha sa mîsa ǃhoa.’ “On ge hoana ǃAnu Gagab xa ǀoa, tsî Elob mîsa ǁkhoaǂgaosib ǀkha gere ǃhoa.”—ǃNǃkh. 4:18-20, 29, 31.

⁶ Jesub ǁkhāǁkhāsabegu ge nau ǃgomsin tsîna gere hōǃâ. Aiǁgause, i ge ǂgui Elobmîde ge ǀkhai-i. ǁÎgu ge nētsē da sida ūhâ ǂgui ǂkhanin Elobmîsa ra ǁguiǃāna ge ūhâ tama hâ-i. Tsî gu ge ǂgui khoen, ǃkharagu gowaga ra ǃoana gere aoǁnâba. Nē ǃgomsina gu gere hōǃā, xawe gu ge nē ǂgomǂgomsa ǁkhāǁkhāsabega ǂgomhe ǁoasa sîsen-e ge dī. ǀOro kurigu ǃnâ gu ge ǃgâiǂhôasa ‘khoen ǀhommi ǃnaga hân hoana gere aoǁnâba.’—Kol. 1:6, 23.

7. Honderd kurina ǃkharu hâse i ge Jehovab di ǃoaba-aona mati ǂan i, Jehovab ǁîna xu taena ra ǂgaoǀkhasa, tsî matin ge dī?

⁷ Sada ǁaeb ǃnâ. Jehovab ge noxopa ǁîb khoena ra daoǁgau tsî ǁîna ǂhân hâ ǀgaiba ra mā, în ǁîb di ǂâisa dī. ǁÎb khoenab ge ǃnāsase Elobmîs ǃnâ-ū ra daoǁgau. Elobmîs ǃnâ da ge Jesub di aoǁnâ sîsenni tsî ǁîb di mîmās ǁkhāǁkhāsabegab ge mîmās, i gu ǁîb ge tsoatsoa sîsen-e ǀams gose dīs xa ra khomai. (Mat. 28:19, 20) Nē ǂkhanib ge Julib 1881ǁî kurib ǃnâ gere mî: “Jehovab ge sida ge ǁhûi tama hâ-i i da khoen xa ǃgôasiba ǁgauhe tsî ǃkhū xawe ū-da hâ xūna sîsen-ū tsî aoǁnâ sîsen-e dī.” 1919ǁÎ kurib To Whom the Work Is Entrusted di ǀon hâ ǂkhanib ǃnâ i ge ra mî: “Kaise i ge ǂgui sîsen-e hâ dīhe nî-e. Xawe Elob sîsenni ge tsî ǁÎb ge sida ǀgaiba nî mā îda ǁnā sîsen-e dī.” ǂGurokam Xristeǁîn khamin ge nē ǃgâsan tsîna ǁkhoaǂgaosib ǀkha ǃgarise gere sîsen. ǁÎn ge ge ǂan i ǃanu gagab ǁîna nî huisa în hoa khoena aoǁnâba. Sida tsîn ge ǁkhā ǂgomǃgâsiba ūhâ nētsē.

8-9. Mâ ǃkharagagu ǀgaugas ge Jehovab di ǀapeǂhomisa sîsen-ū, i i aoǁnâ sîsen-e dīhe?

⁸ Jehovab ǀapeǂhomis ge aoǁnâ sîsenni ǃnâ ra sîsen-ūhe ǃgâi xūna ūhâ. Nē xūn ge ǁgâihe ra ǂkhanin, “Photo-Drama of Creation,” fonografan, audodi hîna ǀō-e ra ǀhurudi, radiodi, komputerdi tsî internets tsîna ǃkhōǂgā hâ. Jehovab ǀapeǂhomis ge ǂgui gowagu ǃnâ ǂnûiǃkhuni sîsen-e ra dī. Tae-i ǃaroma? I-i ǂgui khoena ǃgâiǂhôasa ǁîn gowab ǃnâ ǁnâu. Jehovab ge ǀgora-e ūhâ tama. ǁÎb ge ge mî ǃgâiǂhôas ge ‘ǃhaoǃnās hoas, tsî ǃhaos hoas, tsî gowab hoab, tsî ǁaes hoas’ ǃnâ nî aoǁnâhe ti. (J.ǂHa. 14:6, 7) ǁÎb ge ǂhâba hâ i i mâ ǀguiǀguibe khoe-i hoa-e Gaosib ǃgâiǂhôasa ǁnâu.

 ⁹ O ǁnā khoen hîna da ǃgomse ra ǀhao-ūn? ǀNîsin ǁîna kai mirga ūhâ tamas ka io slosa daode ūhâ ǃkhais ǃaroma. Nē ǃkharagaǃnâgu khoena aoǁnâbas ǃaroma i ge Jehovab di ǀapeǂhomisa ǃkharagaǃnâgu ǀgauga ge ǂgâxa-ū aoǁnâ sîsenni nî dīhe ga. Aiǁgause i ge 2001ǁî kuri Frans ǃhūb ǃnâ ǂGaeǂguira sorosa ge mā-am, i i sida di ǃgâsana trolidi tsî sida di ǂkhanina ra ǁgau ǀkhara ǀgaugu tsîna sîsen-ū. Tsî ega i ge ǃgâsana nau ǃhūgu ǃnâ nē ǀgaub ǃnâ ge aoǁnâ tsoatsoa. 2001ǁÎ kuri i ge ǀasa ǀgauga ge sîsen-ūhe tsoatsoa Amerikab ǃnâ, khoen ǃnāsase ra hâ mâ ǃkhaigu ǃnâ. ǂGuro kurib ǃnâ i ge 102 129 ǂkhanidi tsî 68 911 ǂkhanigu tsîna ge māǂuihe. Tsî i ge 4 701 khoena Elobmîs ǁkhāǁkhāde ge tsoatsoa. ǃAmkuse da ge ra mû Jehovab ǁîb ǃanu gagaba sîsen-ū tsî ǁîb sîsen-e gere ǂkhâǃnâ ǃkhaisa. ǁNā-amaga i ge ǂGaeǂguira sorosa ge mā-am i i ǃgâsana ǃhūbaib ǂhawase trolidi tsî ǂkhanina ra ǁgau ǀkhara ǀgaugu tsîna sîsen-ū tsoatsoa.

10. Tae-e da dī ǁkhā î da sida di aoǁnâ sîsenni ǃnâ ǃgâise dī?

¹⁰ Tae-e du a dī ǁkhā? ǀHaodi tawab ge Jehovaba ra ǁkhāǁkhāda mati da nî aoǁnâsa. ǁNapa du ra ǁkhāǁkhāsen xūna sîsen-ū re. Sadu aoǁnâ sîsenni di groeps ǀkha hoaǁae sîsen re. Sadu groeps ǃnâ hâ ǃgâsan ge nî huidu, îdu aoǁnâ sîsenni ǃnâ ǃgâisa dī. Tsî ǁîn di ǃgâi aiǁgaudi ge sado nî ǂkhâǃnâ. ǃGomsina du ga hō xawe aoǁnâ ǀgara re. Dana xoas ra ǂgoaxa-ūse da ge Jehovab di ǂâisa dī ǁkhā. Sida di ǀgaiba xus ose xawe ǁîb ǃanu gagab ǀgaiba ra māda amaga. (Sax. 4:6) ǂAn de ge a Jehovab ǂhâ da hâ ǀgaiba nî mādasa ǁîb sîsen-e da ra dī amaga.

11. ǂGurokam ǁaeb di ǂGaeǂguira sorosa mati ǀguiba gere sîsen în Elob di khoen ǁaegu hâ ǂkhîba ǃkhōǀgara?

¹¹ ǂGurokam Xristeǁîn ǁaeb. ǂGaeǂguira soros Jerusalems ǃnâ ge hâ is ge ǀguiba gere sîsen is Elob khoen ǁaegu ǃamkusib tsî ǂkhîb tsîna ǃkhōǀgara. (ǃNǃkh. 2:42) Aiǁgause  i ge 49ǁî kuri ǂgui Xristeǁîna ǃkharagagu ǂâiǀgauga ge ūhâ-i. Hoa khoen nî ǃgaohe ǃkhaisa în Jehovaba ǃoaba. ǁNā-amagas ge ǂGaeǂguira sorosa ǃanu gagab huib ǀkha nēsa ge ǃhoaǃgao. ǀHaohâb ga nēs xa ǃaromahe hâse ǀgora hâ o, o i ge aoǁnâ sîsen-e ga ǂhanihe hâ. Jodeǁî gu ge i xawe gu ge ǁkhāǁkhāsabegu tsî ǀhaohâb ǃûi-aogu tsîga Jodeǁî ǁnaetigu xa ge ǂgaeǂhapuhe tama hâ i. Tamas ka io ǁnān hîna ǁîn di ǁkhāǁkhāde ra māǃoan xa. ǁÎgu ge Jehovab di mîs ǃnâ gere kō tsî ǃanu gagaba gere ǂgan i gu huihe ǃgâi mîǁguiga dīsa. (ǃNǃkh. 15:1, 2, 5-20, 28) Nēsa mati ge ǀam? Jehovab ge ǁîgu di mîǁguib ǂkhîb, tsî ǀguiǃnâxasib tsîna ge ǀkhae tsî i ge aoǁnâ sîsen-e ge aiǃgû.—ǃNǃkh. 15:30, 31; 16:4, 5.

12. Tae-e ra ǁgau ǂkhîb tsî ǀguiǃnâxasib Jehovab di ǀapeǂhomis ǃnâ nētsē hâsa?

¹² Sada ǁaeb ǃnâ. Jehovab di ǀapeǂhomis ge ǁîb khoena ge hui în ǃamkuse tsî ǂkhîb ǃnâ hâ. Novemberi 15, 1895ǁî kurib di Zion’s Watch Tower and Herald of Christ’s Presence ǂkhanib ge, “Decently and in Order,” di hâ ǁkhāǁkhāǃâsa ge ūhâ-i, 1 Korinteǁîn 14:40 ai a ǃgaoǃgaosasa. Nē ǁkhāǁkhāǃâs ge ra mî: “ǁKhāǁkhāsabe gu ge ǂgui xūna ge xoa ǂgurokam ǀhaohâgu xa. ǀNai ge ‘xoahen ge sada ǁkhāǁkhās ǃoa xoahe hâ.’ ǁNā-amaga i ge kaise a ǂhâǂhâsa îda ǁîna ǁnâuǀnam.” (Rom. 15:4) Jehovab di ǀapeǂhomis ge nētsē ǃgarise ra sîsen îs Xristeǁîna ǀhaohâb ǃnâ ǃamku tsî ǂkhîsa ǀgaub ǃnâ ūhâ, ǂgurokam ǁaeb Xristeǁîn khami. Aiǁgause du ga ǃKhē xu ǂgō-ommi ǂkhanib ǀkhara ǀhaohâb ǃnâ a dī o tamas ka io ǀkhara ǃhūb ǃnâ, o du ge a ǂan nē ǁkhāǁkhāǃâs mati nî dīhesa. Tsî mâ ǁkhāǁkhāǃâsan nî ǃhoaǃgaosa. Tsî du ge harase nî tsâ. Jehovab di ǃanu gagab ǀguib ge nēti ī ǀguiǃnâxasiba a īǁkhā kai ǁkhā.—Sef. 3:9.

13. Jakobub 3:17 sa ǂâis ǃnâ ūhâse mâ dîna da nî dîsen?

¹³ Tae-e du a dī khā? Jehovab ge ǂhâba hâ “î du ǁgū, Gagab di ǀguiǂâixasiba ǃkhōǀgaipesa ǂkhîb di ǃgaeǁaresa xu.” (Efe. 4:1-3) ǁNā-amaga dîsen re: ‘ǂKhîb tsî ǀguiǃnâxasib tsîna ǀhaohâb ǃnâ ūhâsa ǂkhâǃnâ i da ra? ǀHaohâb ǃûi-aoga ǁnâuǀnam i da ra? Nau khoena tida ai huiba ǂan ǁkhā-e,  ǃgōsase ta ga aiǂhanuba ǀhaohâb ǃnâ ūhâ o? ǁAeb ai hâ i ta ra? Mâsen xase ta ra sîsen? (Khomai re Jakobub 3:17.) ǀNî ǀgaugu ǃnâ du ge ǃgâisa a dīǁkhā ti du ga ǂâi o, ǃanu gagaba ǂan re. Nēsa du ga mā-am o i ge sadu ǂūgu tsî tanisen ǀgaub tsîna nî dawa. Tsî i ge sadu di ǃgâsana nî ǀnam du. Tsî sadu ra dī xūna nî ǃgôaǃgâ.

14. Koloseǁîn 1:9, 10 ǃoagub ge Jehovab mati ǂgurokam ǁaeb Xristeǁîna gere ǁkhāǁkhā?

¹⁴ ǂGurokam ǁaeb Xristeǁîn. Jehovab ge ǁîb khoena ǁkhāǁkhāsa a ǀnam. (Psa. 32:8) Jehovab ge ra ǂhâba în ǁîb di khoena ǁîba ǂan tsî ǀnam. Tsî ǀamosib kōse ǁîb di ǀnamǀnamsa ôan ase ûi. Nēn hoan ge ǁîb ra māda ǁkhāǁkhās ose a ī ǁoa. (Jhn. 17:3) Jehovab ge ǂgurokam Xristeǁî ǀhaohâga gere sîsen-ū îb ǁîb khoena ǁkhāǁkhā. (Khomai re Koloseǁîn 1:9, 10.) ǃAnu gagab, ǁîn “ǁkhaeǂgao-aob” Jesub ge a mîmâib ge ǁîb di ǁkhāǁkhāsabega ge hui. (Jhn. 14:16) Nē ǃanu gagab ge ǁîb di ǁkhāǁkhāsabega ge hui îgu Elobmîsa ǁnâuǃā. Tsî Jesub ge mî xūn hoana ǃkhōmâi. Ega gu ge nēsa Elobmîs ǃnâ ge xoa. Nē xūn ge ǂgurokam Xristeǁîn di ǂgomsa ge ǀgaiǀgai. Tsî Elob, ǁîb Ôab tsî ǁîn ūbagu hâ ǀnamma ge ǀgaiǀgai.

15. Mâ ǀgaugu ǃnâ i Jesajab 2:2, 3 ǃnâ du ra mû mîmâisa ra dīǀoaǀoahe?

¹⁵ Sida ǁaeb ǃnâ. Jehovab ge ge mîmâi hoa ǃhaodi khoen ‘ǀuni tsēdi ǃnâ’ nî ǁîb di ǃoabas di ǃâsa tsî ǁîb di ǀgaugu xa nî ǁkhāǁkhāhesa. (Khomai re Jesajab 2:2, 3.) Nētsē da ge ra mû nē xoas ra dīǀoaǀoahe ǃkhaisa. ǃGāsa i ge a ama ǃoabas ǂhomi ǃoaba di xa a ǃgâisa. Tsî Jehovab ge ǁîb khoena ǂgui xūna Elobmîsa xu ra ǁkhāǁkhā. (Jes. 25:6) ǁÎb ge ‘ǂgomǂgomsa tsî gā-ai ǃgāba’ ra sîsen-ūse ra ǁkhāǁkhā da. Nē xūn ge ǃkharagagu ǀgaub ǃnâ ra ǀkhī. Aiǁgause  da ge ǁkhāǁkhāǃâde a khomai ǁkhā, ǃhoade a ǃgâ ǁkhā tsî ǀgôanron vidioga a kō ǁkhā. (Mat. 24:45) Jobi ǀhōsab Elihub khami da ge sida tsîna ra tsâ, mî ge ba: “Tariba [Elob] khami ī ǁkhāǁkhā-aoba?”—Job 36:22.

16. Tae-e du nî dī î du Jehovab ra mā ǁkhāǁkhāsa xu ǃgâiba hō?

¹⁶ Tae-e da a dī ǁkhā? Elob di ǃanu gagab ge nî hui du î du Elobmîs ǃnâ du ra ǁkhāǁkhāsen xūna sadu di ûib ǃnâ ûiǂui. Psalmdi xoa-aob ge ǀgore khami du ǀgore re: “ǁKhāǁkhā te re, ǃKhūtse, sa daoba, tita ge sa amab ǃnâ nîra ǃgû; ǀguiǀgui re ti ǂgaoba, î ta sa ǀonsa ǃao.” (Psa. 86:11) Aiǃgû re Elobmîsa khomai tsî ǁkhāǁkhāsensa. Tsî nau ǂkhanin Jehovab ǁîb ǀapeǂhomis ǃnâ-ū ra mā du na. Ama as ge, ǂan ǂgaos ǀguisa du ge hî tama hâ. Amab a ǃkhaisa du ge ra ǂgom ǂgao tsî sadu di ûib ǃnâ ra sîsenǂui ǂgao. Jehovab di ǃanu gagab ge nî huidu î du ǁnāsa dī. Sadu di ǃgâsana du ge ra ǂkhâǃnâ ǂgao. (Heb. 10:24, 25) Tae-i ǃaroma? Sadu di omaris ǃân a amaga. ǀGore i Jehovab di ǃanu gagaba ǂgan îb huidu, î du ǂâibasensa ūhâ ǃgâi ǃereamde ǀhaodi tawa mā. Î du ǃgâise dī ǀhaodi tawa du ga ǃâ-e ūhâ tamas ka io ǃhoasa ga ra mā o. Nē xūna du ga dī o du ge Jehovab tsî ǁîb Ôab tsîna ra ǁgau, ǁîkha di “gūna” du a ǀnam ǃkhaisa.—Jhn. 21:15-17.

17. Mâ ǀgaugu ǃnâ du nî ǁgau ǂgomǂgomsase du Jehovab ǀapeǂhomisa ra ǂkhâǃnâsa?

¹⁷ ǀAe i ge Elob gagab xa ra ǂgaeǂguihe ǀapeǂhomis ǀguisa ǃhūbaib ai nî ǃgau. ǁNā-amaga Jehovab di ǀapeǂhomis ǀkha sîsenǀhao re. I ǁgau hoa khoena du Jehovab khami a ǀnamsa. ǁÎb di ǀnamma du ǁgae re î du ǂkhîb tsî ǀguiǃnâxasiba ǀhaohâb ǃnâ ūhâ. Sadu kai ǁkhāǁkhā-aoba ǃgâ re î ǁîb ra ǁkhāǁkhā xūna ǃgaoǃgâ. O du ge nē ǃhūbaib ga ǀam o ǃao tide. Tsî du ge ǁkhoaǂgaose ǁnān hîna Jehovab ǀapeǂhomis ǃnāka ra ǃoaban ǀkha nî mâ.