1. Vika va na pande ku tualelelaho ku linga Vakua Kilistu va ku mbatiza?

VA MI mbatiza ni? Nga mukemuo, mua litavelele ku meso a mbunga ngecize, mua tsiliela muli Yehova kaha mua tava ku pangela hamo lika na lukungulukilo lueni. * Vunoni lutsilielo lueni muli Yehova, lua pande ku tualelelaho ku kola, kaha mua pande ku tualelelaho ku kaniamesa lutsilielo luenu ngecize, Yehova ali na ku tuamenena lukungulukilo lueni matangua ano.

2-3. Mu njila ika Yehova ali na ku tuamenena lukungulukilo lueni matangua ano? Hanenu vimueso.

² Lelo lino, Yehova ali na ku tuamenena lukungulukilo lueni, mu njila ya muesa vuntu vueni, vutumbe vueni kaha na vitume vieni. Hiluleni vifua vitatu via Yehova, vi tue ku mona mu lukungulukilo lueni.

³ Ha katete, ‘Njambi ka kele na kahangu.’ (Vili. 10:34) Cilemo ca lingisile Yehova, a hane muaneni ngue “ndando ya ku tu kula etu vose.” (1 Tim. 2:6; Yoa. 3:16) Yehova ue ku pangesa vangamba veni, mu ku ambulula muzimbu ua cili ku vantu vose, eci ce ku asiuisa vose va tonda ku ka uana vukuasi ku cikombelo ca Yesu. Ca mu civali, Yehova ka puile Njambi ua liuayanga vunoni ua ciyulo. (1 Kol. 14:33, 40) Ngeci mukemuo vangamba veni ve ku mu lemesa mu vutongue kaha mu ciyulo. Ca mu citatu, Yehova ua pua ‘Mulongisi ua ku Hiana.’ (Isaya 30:20, 21) Ngeci mukemuo, lukungulukilo lueni lue ku tuala cikuma mana ku ku longesa Lizi lieni Mbimbiliya, kati lika mu cikungulukilo, vunoni na mu cipanga ca ku ambulula. Vati evi vifua vitatu, via vuntu vua Yehova, via lisoluele  ha toma mu lukungulukilo ku sekulu ya ku livanga? Vati vie ku lisolola ku matangua ano? Kaha vati sipilitu santu i hasa ku mi kuasa omo mu pangela hamo na lukungulukilo lua Yehova matangua ano?

4. Ngue mu ya muesa Vilinga 1:8, vika Yesu ua tumine vandongesi veni ku linga, kaha vukuasi vuka ve ku tambuile?

⁴ Ku sekulu ya ku livanga. Muzimbu ua ambuluile Yesu ua hele lulavelelo ku vantu vose. (Luka 4:43) Ngeci ua sikile vandongesi veni va tualeleleho cipanga ca putukile ca ku hana vukaleho “na ku mutamba uze ha lenga mavu.” (Tandenu Vilinga 1:8.) Mua vusunga, nga ka va hasele ku linga eci cipanga ku ndzili yavo lika. Vunoni ve ku tondekele mukuasi, ni nguetu sipilitu santu ize ya va kulahesele Yesu.—Yoa. 14:26; Zak. 4:6.

5-6. Mu vinjila vika sipilitu santu ya kuasele vandongesi va Yesu?

⁵ Vandongesi va Yesu va tambuile sipilitu santu mu pentekosta ya 33 T.K.N. Na vukuasi vua sipilitu yaco, vandongesi va putukile ku ambulula ha ntsimbu ize vene, kaha mu ntsimbu ize vene makulukazi na makulukazi a vantu va tavele muzimbu ua cili. (Vili. 2:41; 4:4) Mu va putukile ku va luisa, vandongesi ka va vuile liova, vunoni va vundilile vukuasi vua Njambi. Va vundilile nguavo: “U fungile vangamba vove ku handeka lizi liove na ku si-mpa cose.” Mu nima yaco, “va sulile na Sipilitu Santu, kaha va handekele lizi lia Njambi na ku simpa.”—Vili. 4:18-20, 29, 31.

⁶ Vunoni vandongesi va Yesu va pindile na visoti vikuavo. Ca ku muenako, ka vakele na Mazengununo a ku lela a ku puamo. Kaha naua ka vakele na mikanda yeka ya lombolola Mbimbiliya ngue i tua kala nayo lelo. Cikuavo naua va pandele ku ambuluila ku vantu va kele na ku handeka malimi a engi a ku liseza-seza. Vutuhu va hitile mu visoti viose evi, vaze vandongisi vantuima va puisilemo viuma via solokele ngue ku citava ku vi puisamo. Mu miaka ya indende lika, va hasele ku ambulula muzimbu ua cili “hose ha va na tangele viuma muintsi ya lilu.”—Kolo. 1:6, 23.

7. Vati vangamba va Yehova va tantekeyele via tondele Njambi kuli vakevo? Kaha vika va lingile?

⁷ Ku matangua ano. Yehova ali na ku tualelelaho ku tuamenena vantu veni na ku va kaniamesa. Kaha Yehova ue ku tu tuamenena cikuma-kuma ku hitila mu Mbimbiliya, i va sonekele na vukuasi vua sipilitu santu. Mu livulu liaco mukemuo mua kala mizimbu ya Yesu kaha na lisiko lia hele ku vandongisi veni, lia ku tualelelaho cipanga ca putukile. (Mat. 28:19, 20) Mu Julho ya 1881, uno mukanda ua handekele nguao: Yehova ka tu sanene ni ku tu vuavesa linga va tu singimike ku vantu, ni linga tu pue vampite houe, vunoni linga tu pangese viose vi tuli navio mu ku ambulula muzimbu ua cili. Limo livulu lietu lia tuhukile mu 1919 lia mutue Vaze va va Kundika Cipanga (To Whom the Work Is Entrusted), lia handekele ngualio: Tuli na cipanga ca kama ha mavoko etu, vunoni cipanga caco ca Muangana kati cetu, kaha tu ka hasa ku ci puisamo ku ngolo yeni. Cili vene, ngeci mua Vakua Kilistu va ku livanga, vaze vamuanetu va ku simpa va lihanene na ndzili yavo yose mu ku panga cipanga, oku va na kulahela ngecize sipilitu santu i ka va kuasa ku ambuluila vantu va vifua viose. Netu lelo lino, tua kulahela ngecize, sipilitu santu i ka tu kuasa.

8-9. Vinjila vika lue ku pangesa lukungulukilo, mu ku sanduola muzimbu ua cili?

⁸ Lukungulukilo lua Yehova, lua pua limane-mane ku ku sanduola muzimbu ua cili. Lue ku pangesa vikuata ngeci mua, “Foto-Drama ya ku Tanga ca Viuma,” viFonografo, makalu a vikumo, visandzi, kaha ku matangua ano co vikoputador na internet. Lukungulukilo lua Yehova, lue ku langulula naua mikanda mu malimi a engi ku tuvakana nkala ku langulula ceka ca kalako! Omo lia vika? Linga vantu va vifua viose va hase ku ivua muzimbu ua cili mu malimi avo a cisemua. Yehova ka kale na kahangu, ua polofetele laza ngecize, muzimbu ua cili va ka u ambulula  kuli vakua “vifuti viose, na miyati yose, na malimi ose, na vantu vose.” (Ku-So. 14:6, 7) Ua tonda muzimbu ua Vuangana u hete mu matuitui a vantu vose.

⁹ Amba co vaze vantu ka tue ku hasa ku ambuluila omo lia ku yoyela ku vihela via ku niunga cikuma? Linga tu hase ku ambuluila cingi ca ava vantu, lukungulukilo lua Yehova lue ku setazieka vifua via ku liseza-seza via ku ambuluila ku mbunga. Ca ku muenako, mu 2001 Civunga ca Vantuamena, ca tavesele vamuanetu na vandumbuetu ku Françã, vapue na ku ambulula na tuntsandia tua ku sindumuna kaha na vifua vikuavo via ku lekesa mikanda yetu ku mbunga. Mu nima yaco va tavesele naua vifuti vieka ku lingamo. Ku ambulula caco ca putukile ku kuasa vavengi. Mu 2011, Civunga ca Vantuamena ca tavesele naua imo njila ya ihia ya ku ambuluilamo ku vihela kue ku soloka cikuma vantu mu mbonge ya Nova York ku Estados Unidos. Ngeci mu muaka ua katete, vamuanetu vahasele ku tepela ku mbunga mavulu a ku pua 102.129 na mikanda 68.911 kaha vantu va ku pua 4.701 va vundilile ku lilongesa Mbimbiliya! Mua vusunga, sipilitu santu ya kuasele cipanga caco. Ngeci mukemuo, Civunga ca Vantuamena ca tavesele ngecize, ku ambulula ca tuntsandia va ci pangese mu mavu ose.

10. Vika tu hasa ku linga, mangana tu vueze ku vutongue vuetu mu cipanga ca ku ambulula?

¹⁰ Vi mu hasa ku linga. Ku hitila mu viuano vietu, Yehova ue ku tu longesa mua ku ambuluila. Ngeci mukemuo, puenu na ku pangesa vukovelelo vuaco. Ku sua kumo, puenu na ku ambulula na vukua ku ambulula va ku civunga cenu ca mu lihia. Kaha vamuanetu va ku civunga cenu ca mu lihia, va ka mi kuasa ku kala na vutongue mu ku ambulula na ku longesa, kaha na ku mi kaniamesa na lungano luavo lua cili. Tualelenuho ku ambulula ambe mu ntsimbu ya visoti. Kaha ngue mu u na tu vuluisa mukanda ua mutue ua cilongesa cino, tue ku puisamo cizango ca Njambi, kati ku ngolo yetu vunoni ku hitila mu sipilitu santu. (Zak. 4:6) Muomu na laza, cipanga caco capua ca Njambi.

11. Vati vakua civunga ca vantuamena ca ku sekulu ya ku livanga, va pangelele hamo, linga ha kati ka Vakua Kilistu kati ha kale liuayanga?

¹¹ Ku sekulu ya ku livanga. Civunga ca vantuamena mu Yelusalema, ca pangelele hamo lika,  mu ku niunga ciyulo na ku likata ca Vakua Kilistu. (Vili. 2:42) Ca ku muenako, mu kua katukile cimpande ca kulovoka mu 49 T.K.N., civunga ca vantuamena ca hiluile cimpande caco na ku tuamenena ca sipilitu santu. Nga lukungulukilo lua litepele omo lieci cimpande, na cipanga ca ku ambulula nga ca hilukilile mu nima. Vutuhu va puile vaYundeya, vapostolo na vakuluntu mu Yelusalema ka va tangukile na cize cisemua ca vaYundeya, ni ku kava visinganieka via vaze va kele na ku sambeya cilongesa caco, vunoni va hanguile ku tuamenena ca Lizi lia Njambi na sipilitu santu. (Vili. 15:1, 2, 5-20, 28) Vika viezilemo? Yehova ua vezikisile cihangula cavo, kaha vikungulukilo via tualeleleho ku kala mu ciyulo na ku likuata kumo. Na cipanga ca ku ambulula ca tualeleleho ku ya ku lutue.—Vili. 15:30, 31; 16:4, 5.

12. Vukaleho vuka vua muesa ngecize, vutongue na ciyulo kasi via kala mu lukungulukilo lua Yehova lelo lino?

¹² Ku matangua ano. Lukungulukilo lua Yehova lue ku linga cose mu ku niunga vutongue na ciyulo ha kati ka vangamba va Yehova. Miaka ya ingi ku nima, mu 1895, mu Vutala vua Kaniungi 15 ya Novembro, mua tuhukile cimpande ca kele na mutue: “Mu vu Tantuluke na mu Vutongue,” cemanene ha 1 Kolintu 14:40. Cimpande caco nguaco: “Vapostolo va tumine mikanda ya ingi mu vikungulukilo, ku tuala ha ku liniunga ku liuayanga. Netu lelo lino ca pua ca seho ku tualelelaho ku niunga na civando viose vi va sonekele laza mu ku tu longesa.” (Loma 15:4) Mua vusunga na lelo lino, tue ku limuena ha toma ngecize, lukungulukilo lua Yehova lua tonda tu kavangeye vutongue na ciyulo via kele ku sekulu ya ku livanga. Ca ku muenako, nga mu ka kunguluka ku cilongesa ca Vutala, mu cikungulukilo ceka, ni vene mu cifuti ceka, mu na tantekeya laza cilongea cika va ka lilongesa kaha na vati ci kenda. Ku tantekeya evi ci ka mi vuisa ku zituka. Sipilitu santu ikeyo lika i hasa ku puisamo eci ku likata.—Zef. 3:9.

13. Ku singanieka ha Tiango 3:17, ci hasa ku tu lingisa ku singanieka ku linga vika?

¹³ Vi mu hasa ku linga. Yehova ua tonda vangamba veni va linge cose mu ku niunga “vumo vua sipilitu ha lizitiko lia ciyulo.” (Efe. 4:1-3) Ngeci mukemuo lihulenu nguenu: Vuno nje ku sambeya ku likata na ciyulo mu cikungulukilo ni? Vuno nje ku ononoka vaze ve ku tu tuamenena ni? Vuno citava ku nji kulahela ku vakuetu cikuma-kuma nga nja kala na viteli mu cikungulukilo ni? Vuno nje ku niunga ntsimbu, ku kuasa vakuetu  na ku lihana mu nkala cipanga ni? (Tandenu Tiango 3:17.) Nga mu muona ngecize ku li hamo ha mua pande ku pangela, vundilenu sipilitu santu. Nga mu vundila sipilitu santu i sungamese vuntu vuenu na vilinga vienu, vamuanetu mu cikungulukilo va ka mi lema cikuma na ku mi haka seho.

14. Kuliya na Kolose 1:9, 10, vati Yehova ua longesele vangamba veni ku sekulu ya ku livanga?

¹⁴ Ku sekulu ya ku livanga. Yehova ua lema cikuma ku longesa vangamba veni. (Visa. 32:8) Ua tonda va mu tantekeye, va mu leme, kaha va ka yoye miaka yose mu ku pua vana veni va a lema. Citava lika ku puisamo viose evi, ku hitila mu vilongesa viose vie ku tu hana ikeye. (Yoa. 17:3) Yehova ua pangesele lukungulukilo lueni lua ku sekulu ya ku livanga, mu ku longesa vantu veni. (Tandenu Kolose 1:9, 10.) Uze mukuasi ua sikile Yesu ni nguetu sipilitu santu, nayo ya kuasele cikuma mu ku puisamo evi. (Yoa. 14:16) Sipilitu santu ya va kuasele ku ivuisisa Lizi lia Njambi na ku va vuluisa cingi ca viuma via lingile na ku longesa Yesu, vize vi va sonekele mu nima ya ntsimbu mu mikanda ya muzimbu ua cili. Ku tantekeya evi, ca kaniamesele lutsilielo lua Vakua Kilistu na ku va kuasa ku kolesa cilemo cavo muli Njambi, kuli Muaneni kaha na kuli umo na mukuavo.

15. Mu vinjila vika mua mono ku lipuisamo ca cikulaheso ca Yehova ca ku Isaya 2:2, 3?

¹⁵ Ku matangua ano. Yehova ua polofetele ngueni: “Ku matangua a ku kotokela,” vakua vifuti viose, va keza ku Muncinda ueni ua cimueso linga a ku va longese via vinjila vieni. (Tandenu Isaya 2:2, 3.) Tue ku limuena ku lipuisamo covu vupolofeto lelo lino. Ku lemesa ca vusunga, ci na londo helu lia ku lemesa cose ca makuli. Aci singaniekenu ha mukuto ua mu lutsilielo u tua kala nauo, omo lia via ku-lia vie ku tu hana Yehova! (Isaya 25:6) Ku hitila muli Mukuamanda ua Cili, Yehova ue ku tu hana via ku-lia via vingi via mu lutsilielo, kaha via ku liseza-seza ngeci mua, vilongesa,  vimpande, vivideo via vanike na vivideo vikuavo. (Mat. 24:45) Mua vusunga, tue ku livua ngueci mua Elihu, kavusamba ka Yombi, uze ua handele ngueni: ‘Iya mulongisi ngue Njambi?’—Yombi 36:22.

16. Vika mu hasa ku linga mangana mu hase ku kola mu lutsilielo?

¹⁶ Vi mu hasa ku linga. Sipilitu ya Njambi i ka mi kuasa ku pangesa viuma vi mue ku tanda na ku lilongesa mu Lizi lia Njambi. Puenu na ku vundila ngue mua handekele mukua visamo ngueni: “Nji longese njila yove, a Yehova. Nji kenda mu vusunga vuove. Ku mbika mutima uange mu ku vuila lizina liove vuoma.” (Visa. 86:11) Ngeci mukemuo, tualelelenuho ku tambula via ku-lia via mu lutsilielo vie ku tu hana Yehova ku hitila mu Lizi lieni na mu lukungukulukilo lueni. Vutuhu ngoco, ku lilongesa via vingi kati vukevuo lika vua pande ku pua vutumbe vuenu. Vunoni vutumbe vuenu vua pande ku pua ku tavesa vusunga vu kuate ku mutima, kaha na ku vu pangesa mu muono. Sipilitu santu i hasa ku mi kuasa ku lingamo. Kaha mu ka tonda naua ku kaniamesa vamuanoko mu lutsilielo. (VaHe. 10:24, 25) Omo lia vika? Muomu va pua va vusuko vuenu mu lutsilielo. Puenu na ku vundila sipilitu santu, i mi kuase ku hana vikumbululo vie ku kaniamesa, kaha na ku liviukisila vuino nga muli na mutamba ku ciuano. Mu vinjila evi, mu ka muesa kuli Yehova na Muaneni ngecize, mua lema “vampanga” vavo va seho.—Yoa. 21:15-17.

17. Mu vinjila vika mu hasa ku muesa ngecize mue ku kuasa lukungulukilo lua Yehova?

¹⁷ Vuovuno ha mavu ha kala lika lukungulukilo lumo lika, luze lue ku tuamenena sipilitu ya Njambi. Ngeci mukemuo, lihakelenu kapandi ka ku muesa ntuima omo mu pangela hamo na lukungulukilo lua Yehova. Muesenu ngecize mue ku tambuluisa Yehova, mu ku ambuluila vantu vose muzimbu ua cili ca ku hona kahangu. Puenu naua na ku tambuluisa cilemo ca kala naco, ku vutongue na ciyulo, mu ku sambeya ku likata mu cikungulukilo. Kaha puenu na ku halakana, kuli Mulongisi uenu ua ku Hiana mu ku lihakela kapandi ka ku lilongesa via vingi, ku via ku-lia via mu lutsilielo vie ku tu hana. Kaha omo, ano mavu a Satana a ya na ku suena ku ku kotoka cauo, ka mu ka zivi liova. Vunoni na ku simpa cose, mu ka mana ha kati ka vaze ve ku hakuila lukungulukilo lua Yehova na lukakatela.