1. ¿Tlen moneki ma tikchijtokan akinmej yotimoapolaktijkej?

TLA yotimoapolaktijkej, kijtosneki yotikteititijkej titlaneltokaj itech Jehová uan tiknekij tiktekichiuiliskej itech ialtepe. * Pero moneki okachi tikneltokaskej ialtepe Jehová kichijtok tlen ye kineki.

2, 3. ¿Ken kiteititia Jehová iyelis ijkuak kiyekana ialtepe?

² Jehová kiteititia ken iyelis ijkuak kiyekana ialtepe, kiteititia tlen kineki kichiuas uan tlen tlanauatia. Ma tikitakan eyi tlamantli tlen Jehová kiteititia ijkuak kiyekana ialtepe.

³ Se, “Dios amo kintlasojtla san sikimeh, iwa oksikimeh amó” (Hech. 10:34). Jehová tinochtin techtlasojtla, ik non, okiualtitlanki iKone ma techmakixtiki (1 Tim. 2:6; Juan 3:16). Jehová nochtin kineki kinmakixtis, ik non, kintekitiltia itekipanojkauan para ma kintlapouikan nochtin akinmej kinekij kikakiskej tlen ye kichiuas. Ome, Jehová nochi kipaktia kichiuas ken moneki uan ika yolseuilistli (1 Cor. 14:33, TNM, 40). Ik non, itekipanojkauan moneki kitekichiuiliskej ken moneki uan ika yolseuilistli. Eyi, Jehová ye akin tlamachtia (Is. 30:20, 21). Ik non, ialtepe mochijchikaua kinmachtis oksekimej tlen kijtouaj iTlajtol ijkuak monechikouaj uan ijkuak tetlapouiaj. ¿Ken okichijkej ken Jehová tokniuan itech achto siglo? ¿Ken mochijchikaua ialtepe Jehová kichiuas ken ye? ¿Ken kinpaleuia espíritu santo akinmej kitekichiuiliaj Jehová?

4. Ijkon ken kijtoua Hech. 1:8, ¿tlen okinmilui Jesús ma kichiuakan imachtijkauan uan tlen kinpaleuiskia?

⁴ Itech achto siglo. Tlen Jesús otetlapoui miakej okinyolchika (Luc. 4:43). Okinmilui imachtijkauan ma tetlapouikan “itech nochi n tlaltíkpaktli” (xiktlajtolti Hechos 1:8). Pero non amo uelis kichiuaskiaj inselti. Omonekiaya ma kinpaleui iespíritu santo Jehová ijkon ken Jesús okijto (Juan 14:26; Zac. 4:6).

5, 6. ¿Ken okinpaleui iespíritu santo Jehová imachtijkauan Jesús?

⁵ Imachtijkauan Jesús okiselijkej iespíritu santo Jehová itech Pentecostés xiuitl 33. Ik non, san niman opejkej tetlapouiaj uan miakej okinkakej (Hech. 2:41; 4:4). Uan amo omomojtijkej ijkuak okintlajyouiltijkej. Okiluijkej Jehová: “Xikchiwa matimoyolchikawakah para matitetlapowikah de motlajtol iwa amitla matechmojti”. Ijkuakon “nochteh okiselijkeh n Espíritu Santo, iwa ika yolchikawálistli otetlapowijtinenkeh de itlajtol Totajtsi Dios” (Hech. 4:18-20, 29, 31).

⁶ Pero noijki okinpanok okseki tlamantli. Amo nochtin okipiayaj copias itech iTlajtol toTajtsin Dios nion amatlajkuilolmej ken axkan tikpiaj. Noijki omonekiaya miakej kintlapouiskej tlen tlatlamantli intlajtol. Pero non amo okintsakuili uan amo ouejkajkej otetlapouijkej “itech nochi n tlaltíkpaktli” (Col. 1:6, 23).

7. Yikipia kanaj cien xiuitl, ¿ken okimatiayaj itekipanojkauan Jehová tlen okinekiaya ma kichiuakan uan tlen okichijkej?

⁷ Axkan. Jehová ok kinyekantok uan kinpaleuijtok itekipanojkauan. Kinyekana ika iTlajtol tlen ye otlanauati ma kijkuilokan. Ompa kijtoua ken otetlapoui Jesús uan okinmilui imachtijkauan ma tetlapouikan ijkon ken ye okichi (Mat. 28:19, 20). Itech julio 1881 nin revista okijto: “Amo otechnotskej nion otechpejpenkej para techueyichiuaskej nion para tikpiaskej miak tomin, otechnotskej para tiktekitiltiskej nochi tlen tikpiaj uan para titetlapouiskej tlen toTajtsin Dios kichiuas”. Amatlajkuilol To Whom the Work Is Entrusted (Akinmej okinmakakej tekitl), tlen okichijchijkej itech 1919 okijto: “Mota amo uelis tikchiuaskej tekitl pero iaxka toTeko uan ye techpaleuis ma tikchiuakan”. Ijkon ken tokniuan tlen okatkaj itech achto siglo, yejuan omoyolchikajkej porque okilnamiktokaj iespíritu santo Jehová kinpaleuiskia nochtin ma kintlapouikan. Tejuan noijki ijkon tikneltokaj.

8, 9. ¿Tlen okichi ialtepe Jehová?

⁸ Ialtepe Jehová kitekitiltia nochi tlen onka para uelis titetlapouiskej. Achto tokniuan okitekitiltiayaj amatlajkuilolmej, “Foto-Drama de la Creación”, gramófonos, carros tlen inpan okintlaliayaj uejueyij bocinas, radio uan axkan kitekitiltiaj Internet uan computadoras. Noijki san ialtepe Jehová kintlajtolkopa amatlajkuilolmej ika miakej tlajtolmej. Ijkon tikchiuaj porque tiknekij nochtin ika itlajtol ma kikakikan tlen kichiuas toTajtsin Dios. Ye nochtin kintlasojtla, ik non, okijto nochi tlen kichiuas kinmatiltiskia “nochteh paísmeh, innawak nochteh non tlatlamantli tlachixtokeh, innawak nochteh akimeh tlatlamantli tlajtoah, iwa itech nochteh n altepemeh” (Apoc. 14:6, 7). Ye kineki nochtin ma kimatikan tlen kichiuas iTekiuajkayo.

 ⁹ ¿Pero ken kintlapouiskiaj akinmej chantij kanin amo kitekauiliaj ma panokan? Jehová okinpaleui itekipanojkauan para uelis tetlapouiskiaj itech ojtli. Itech 2001 tokniuan tlen pouij itech Cuerpo Gobernante okijtojkej ma kintekitiltikan carritos uan okseki tlamantli ompa Francia uan satepan itech okseki altepemej. Otlapaleui ken otetlapouijkej tokniuan. Itech 2011 noijki ijkon opejki tetlapouiaj ompa Nueva York, Estados Unidos. Itech non xiuitl okintemakakej 102.129 (ciento dos mil ciento ventinueve) amochmej, 68.911 revistas uan 4.701 okitlajtlankej ma kinmachtikan ika Biblia. Tokniuan okimatiayaj Jehová okinpaleui ika iespíritu santo. Ik non, tokniuan tlen pouij itech Cuerpo Gobernante okijtojkej nochtin tokniuan uelis tetlapouiskiaj ika mesas uan carritos.

10. ¿Tlen techpaleuis okachi kuali ma titetlapouikan uan ma titlamachtikan?

¹⁰ Tlen uelis tikchiuaskej. Ma tikchiuakan tlen Jehová techmachtia itech nechikolmej. Nochipa ma titetlapouikan iuan tokniuan tlen pouij itech togrupo. Yejuan uelis techpaleuiskej okachi kuali ma titetlapouikan. Noijki uelis techppaleuis ken tetlapouiaj yejuan. Ma titetlapouikan maski tikpiaj ouijkayotl. Ken kijtoua texto tlen ika peua nin tlamachtil, tikchiuaj tlen kineki toTajtsin Dios porque techpaleuia ika espíritu santo uan amo ika tochikaualis (Zac. 4:6). Kuali tikmatij toTajtsin Dios techpaleuia porque tikchijtokej tlen ye kineki.

11. ¿Tlen okichi cuerpo gobernante itech achto siglo para tokniuan san sekan kitekichiuiliskiaj Jehová?

¹¹ Itech achto siglo. Tokniuan tlen opouiayaj itech cuerpo gobernante tlen okatkaj Jerusalén, san sekan okitekichiuiliayaj Jehová uan ijkon nochtin okatkaj ika yolseuilistli (Hech. 2:42). Ma tikitakan tlen opanok itech xiuitl 49. Tokniuan tlen opouiayaj itech cuerpo  gobernante okitlatlaujtijkej Jehová ma kinyekana para kimatiskiaj kox kichiuaskiaj circuncisión. Tla tokniuan moxeloskiaj, ayakmo tetlapouiskiaj. Maski tlatitlanilmej uan tlayekankej okatkaj judíos amo okichijkej tlen okineltokayaj noso tlen okinmachtijkej judíos. Okikauilijkej iTlajtol toTajtsin Dios uan iespíritu ma kinyekana para kimatiskiaj tlen kichiuaskiaj (Hech. 15:1, 2, 5-20, 28). ¿Tlen opanok? Jehová okiteochi tlen okichijkej, tokniuan okatkaj ika yolseuilistli uan san sekan okitekichiuilijkej Jehová (Hech. 15:30, 31; 16:4, 5).

12. ¿Ken kiteititia ialtepe Jehová kitekichiuilia ken moneki uan kajki ika yolseuilistli?

¹² Axkan. Ialtepe Jehová mochijchikaua para tinochtin ma tiyetokan ika yolseuilistli uan ma tiktekichiuilikan ken moneki. Itech 1895 okiski nin revista ika inglés 15 de noviembre, okipiaya se tlamachtil tlen okiyekijtouaya 1 Corintios 14:40. Tlamachtil omotokayoti: “Nochi xikyekchiuakan ika kuali uan ken moneki”. Ompa okijtouaya: “Tlatitlanilmej okinnojnotskej akinmej achto opejki kichiuaj ken Cristo ma kichiuakan inteki ken moneki [...]. Moneki ma tikchiuakan tlen yiuejkika omoijkuilo porque non techpaleuis” (Rom. 15:4). Tokniuan itech achto siglo okitekichiuiliayaj Jehová ken moneki uan okatkaj ika yolseuilistli, axkan ialtepe Jehová noijki ijkon kichiua. Ijkon tikijtouaj porque tla tiaskej itech se nechikol itech okse altepetl tikmatiskej tlen momachtiskej tokniuan ika revista Akin Tetlapouijtok. ¡Kuali timomachiliskej! Tinochtin san se tlamantli timomachtiaj porque iespíritu santo toTajtsin Dios techyekana (Sof. 3:9).

13. Ijkon ken kiteititia Santiago 3:17, ¿tlen moneki timotlajtlaniskej?

¹³ Tlen uelis tikchiuaskej. Jehová kineki san sekan ma tiktekichiuilikan uan ma tiyetokan ika yolseuilistli (Efes. 4:1-3, TNM). Ik non, ma timotlajtlanikan: “¿Nitlapaleuia para san sekan ma tiktekichiuilikan Jehová uan ma tikpiakan  yolseuilistli itech tlanechikol? ¿Nikintlakamati tokniuan tlen tlayekanaj? Tla ne nitlayekanki noso siervo ministerial, ¿kinekiskej tokniuan ma nikinpaleui? ¿Amo nitlajkajtilia uan nechpaktia nikinpaleuis tokniuan?” (xiktlajtolti Santiago 3:17). Tla tiknekij itlaj okachi kuali tikchiuaskej, ma tiktlajtlanilikan Jehová iespíritu santo. Tla tikkauiliaj iespíritu Jehová ma techyekana, tokniuan okachi techtlasojtlaskej.

14. Ijkon ken kijtoua Colosenses 1:9 uan 10, ¿ken okinmachti Jehová itekipanojkauan itech achto siglo?

¹⁴ Itech achto siglo. Jehová kipaktia kimachtis ialtepe (Sal. 32:8). Kineki nochtin ikoneuan ma kixmatikan, ma kitlasojtlakan uan nochipa ma yoltokan. Ijkon uelis tikchiuaskej porque ye techmachtia (Juan 17:3). Itech achto siglo okitekitilti ialtepe para kinmachtis itekipanojkauan (xiktlajtolti Colosenses 1:9, 10). Noijki okinpaleui ika iespíritu santo ijkon ken Jesús okijto (Juan 14:16). Non okinpaleui ma kajsikamatikan iTlajtol toTajtsin Dios, okilnamikej nochi tlen Jesús okijto uan okichi uan okijkuilojkej itech Evangelios. Tlen okajsikamatkej okinpaleui okachi ma kitlasojtlakan Jehová, iKone uan tokniuan.

15. ¿Ken tikita mochijtok tlen kijtoua Isaías 2:2 uan 3?

¹⁵ Axkan. Jehová okijto itlamian tonalmej miakej kinekiskiaj ma kinmachti (xiktlajtolti Isaías 2:2, 3). Axkan tikitaj ken mochijtok tlen okijto Jehová. Tikitaj ialtepe Jehová okachi kuali uan amo ken religión tlen tlakajkayaua. ¡Jehová techmachtia miak tlamantli! (Is. 25:6). Jehová kitekitiltia “tlakeuali yolmelajki uan ixtlamatki” para techmachtis. Techmaka amatlajkuilolmej, tlapoualismej, dibujos  uan videos (Mat. 24:45, TNM). Timomachiliaj ken Elihú, iyolikni Job, ye okijto san ye Jehová okachi kuali tlamachtia (Job 36:22).

16. ¿Tlen uelis tikchiuaskej para techpaleuis tlen Jehová techmachtia?

¹⁶ Tlen uelis tikchiuaskej. Espíritu santo techpaleuia ma tikchiuakan tlen tiktlajtoltiaj uan timomachtiaj tlen kijtoua iTlajtol toTajtsin Dios. Ma tiktlajtlanilikan Jehová ijkon ken okichi salmista, ye okijto: “Jehová techmachti uan techititi moojui. Nikchiuas tlen tikneki. Xikchiua ika nochi noyolo ma niktlakaita motoka” (Sal. 86:11). Ma timomachtikan tlen Jehová techmaka ika iTlajtol uan ika ialtepe. Amo san tiknekij tikmatiskej miak tlamantli. Ma ajsi itech toyolo tlen timomachtiaj uan ma tikchiuakan. Iespíritu Jehová techpaleuis ijkon ma tikchiuakan. Noijki ma tikinyolchikauakan tokniuan porque yejuan tofamilia (Heb. 10:24, 25). Ma tiktlatlaujtikan Jehová ma techmaka iespíritu para ma titlanankilikan ijkuak timonechikouaj uan tla titlamachtiskej, kuali ma tikchiuakan. Tla ijkon tikchiuaj, tikteititiskej tiktlasojtlaj Jehová, iKone uan tokniuan (Juan 21:15-17).

17. ¿Ken uelis tikteititiskej tikpaleuiaj ialtepe Jehová?

¹⁷ Ayakmo miak poliui uan nikan tlaltikpak san yetos ialtepe Jehová tlen kiyekana ika iespíritu santo. Ik non, iuan ma tiktekichiuilikan Jehová. Ma titetlasojtlakan ken Jehová uan nochtin ma tikintlapouikan tlen ye kichiuas. Jehová nochi kichiua ken moneki uan ika yolseuilistli, tejuan noijki ijkon ma tikchiuakan itech tlanechikol para nochtin san sekan ma tiktekichiuilikan. Jehová okachi kuali tlamachtia, ik non, ma tiktekitiltikan nochi tlen ye techmaka para timomachtiskej. Ijkon amo timomojtiskej ijkuak tlamis nochi tlen Satanás kiyekantok. Tiyetoskej tiyolchikauakej uan san sekan tiktekichiuiliskej Jehová iuan ialtepe.