1. AmaKhristu abhabhathiziweyo kumele aqhubeke esenzani?

NGESIKHATHI ubhabhathizwa watshengisa abanye ukuthi ulokholo kuJehova lokuthi ufuna ukumkhonza. * Kodwa ukholo lwakho kumele luqhubeke luqina. Kanti njalo kumele uqhubeke uqiniseka ukuthi inhlanganiso kaJehova yenza lokho akufunayo.

2-3. Yiziphi izinto ezintathu esizifunda ngoJehova ezikhanya enhlanganisweni yakhe?

² Indlela uJehova akhokhela ngayo inhlanganiso yakhe lamuhla iveza ubuntu bakhe, inhloso yakhe lendlela afuna siziphathe ngayo. Kasixoxeni ngezinto ezintathu esizifunda ngoJehova ezikhanya enhlanganisweni yakhe.

³ Okokuqala, “uNkulunkulu kakhethi.” (ImiSeb. 10:34) UJehova wanikela ngeNdodana yakhe yaba ‘yinhlawulo yabantu bonke’ ngenxa yokuthi uyasithanda. (1 Tim. 2:6; Joh. 3:16) Usebenzisa abantu bakhe ukuthi batshumayele izindaba ezinhle kubo bonke abafuna ukulalela. Lokhu kunika abantu abanengi ithuba lokuthi bancedwe yinhlawulo. Okwesibili, uJehova nguNkulunkulu ohlelekileyo futhi owokuthula. (1 Khor. 14:33, 40) Yikho sikhangelele ukuthi izinceku zakhe zimkhonze zihlelekile futhi zilokuthula. Okwesithathu, uJehova ‘nguMfundisi Omkhulu.’ (Isaya. 30:20, 21, NWT) Yikho inhlanganiso yakhe iqakathekisa kakhulu ukufundisa abanye iLizwi lakhe ebandleni lasekutshumayeleni. AmaKhristu akuqala amlingisela njani uJehova ezintweni lezi ezintathu? Awalamuhla wona amlingisela njani? Umoya ongcwele ungakunceda njani ukuthi ukhonze uJehova usenhlanganisweni yakhe?

4. Ngokwalokho okutshiwo kumiSebenzi 1:8, uJesu wabatshelani abalandeli bakhe futhi kuyini okwakuzabasiza?

⁴ Ngesikhathi samaKhristu akuqala. UJesu wayetshumayela umlayezo owawunika bonke abantu ithemba. (Luk. 4:43) Watshela abalandeli bakhe ukuthi baqhubeke ngomsebenzi ayewuqalisile, bafakaze “kuze kuyefika emaphethelweni omhlaba.” (Bala imiSebenzi 1:8.) Kodwa babengeke bawenze ngamandla abo umsebenzi lo. UJesu wayebathembise ukuthi uzabanika “umsizi,” okutsho umoya ongcwele.—Joh. 14:26; Zek. 4:6.

5-6. Umoya ongcwele wabancedisa njani abalandeli bakaJesu?

⁵ Abalandeli bakaJesu bemukela umoya ongcwele ngePhentekhosti ka-33 C.E. * Umoya lo wabancedisa ukuthi bahle batshumayele futhi kungakayi ngaphi izinkulungwane zasezilalele izindaba ezinhle. (ImiSeb. 2:41; 4:4) Bathi sebehlukuluzwa kabazange bayekele ukutshumayela kodwa bacela uJehova ukuthi abancedise. Bathandaza bathi: ‘Nika izinceku zakho amandla okuthi ziqhubeke zikhuluma ilizwi lakho ngesibindi esikhulu.’ Bathe sebethandazile bagcwala umoya ongcwele baqhubeka ‘bekhuluma ilizwi likaNkulunkulu ngesibindi.’—ImiSeb. 4:18-20, 29, 31.

⁶ Abafundi bakaJesu baba lezinye inhlupho. Ngokwesibonelo, babelencwadimgoqwa ezilutshwana futhi babengelamabhuku okubancedisa ukuthi bazwisise iMibhalo njengalawo esilawo lamuhla. Kanti njalo kwakumele batshumayeze abantu abakhuluma indimi ezitshiyeneyo. Kungelani lobunzima lobo, abafundi laba abatshisekayo benza umsebenzi omkhulu ngoba ngeminyaka engaba ngu-30 basebetshumayele izindaba ezinhle “kukho konke okudaliweyo okungaphansi kwezulu.”—Kol. 1:6, 23.

7. Izinceku zikaJehova ezaphila eminyakeni engaphezu kwengu-100 eyadlulayo zatshengisa njani ukuthi ziyakwazi lokho afuna zikwenze?

⁷ Ngesikhathi sethu. UJehova ulokhu ekhokhela abantu bakhe futhi ebanika amandla okuthi benze intando yakhe. Akusebenzisa kakhulu liLizwi lakhe eliphefumulelweyo. Kulo sifunda ngenkonzo kaJesu langomlayo awunika abalandeli bakhe wokuthi baqhubeke ngomsebenzi awuqalisayo. (Mat. 28:19, 20) INqabayokulinda kaJuly 1881 yathi: “UJehova kasikhethanga ukuthi sihlonitshwe ngabantu kumbe ukuthi sinothe kodwa wasikhethela ukuthi sisebenzise konke esilakho ukutshumayela izindaba ezinhle.” Ibhukwana elithi To Whom the Work Is Entrusted elaphrintwa ngo-1919 lathi: “Umsebenzi ukhanya umkhulu kakhulu, kodwa ngoweNkosi yikho izasinika amandla okuthi siwenze.” Abafowethu laba balingisela amaKhristu akuqala ngokuba lesibindi langokusebenza nzima ngoba babeqiniseka ukuthi umoya ongcwele uzabancedisa batshumayeze abantu bonke. Lathi lamuhla kasithandabuzi ukuthi umoya ongcwele uzasincedisa.

8-9. Inhlanganiso kaJehova isebenzise ziphi izindlela ukuthi isakaze izindaba ezinhle?

⁸ Inhlanganiso kaJehova isebenzise indlela ezingcono kulazo zonke ukuthi isakaze izindaba ezinhle. Ngokwesibonelo, yasebenzisa amabhuku, ibhayisikopo okuthiwa yi-Photo-Drama of Creation, amagramafoni, irediyo lezimota ezilezipikha. Ezinsukwini zalamuhla isebenzisa amakhompiyutha le-inthanethi. Kanti njalo ihumutsha izinto ezitshiyeneyo ngezindimi ezinengi ukwedlula loba nini! Lokhu ikwenzela ukuthi bonke abantu bezwe izindaba ezinhle ngolimi lwabo. UJehova kakhethi. Wathi izindaba ezinhle zazizatshunyayelwa “kuzo zonke izizwe, lezizwana, lezindimi kanye labantu.” (Isam. 14:6, 7) Ufuna abantu bonke bazwe umlayezo woMbuso.

 ⁹ Kuthiwani ngalabo okunzima ukubatshumayeza mhlawumbe ngenxa yokuthi bahlala endaweni ezilindwayo kumbe ezingangeneki lula? Inhlanganiso kaJehova yaqalisa ukusebenzisa indlela ezitshiyeneyo zokutshumayela obala ukuze incede abantu laba. Ngokwesibonelo, ngo-2001 iQula Elibusayo lanika abafowethu labodadewethu beFrance imvumo yokuthi baqalise ukusebenzisa izinqola lezinye indlela zokubukisa amabhuku ethu. Ngokuhamba kwesikhathi indlela lezi zaqalisa ukusetshenziswa lakwezinye izindawo futhi zaphumelela. Ngo-2011 kwaqalisa uhlelo olutsha eMelika lokutshumayela kwenye yezindawo eziphithizelayo eNew York City. Ngomnyaka wokuqala kwahanjiswa amabhuku angu-102 129 labomagazini abangu-68 911 futhi abantu abangu-4 701 bacela ukufundiswa iBhayibhili. Kuyazicacela ukuthi uJehova wayesebenzisa umoya wakhe ongcwele ukuthi asekele umsebenzi lo. Ngakho iQula Elibusayo lanika abafowethu labodadewethu emhlabeni wonke imvumo yokuthi basebenzise izinqola lezinye indlela zokubukisa amabhuku ethu.

10. Singenzani ukuze sithuthukise indlela esitshumayela lesifundisa ngayo?

¹⁰ Ongakwenza. Emihlanganweni yebandla uJehova uyasifundisa indlela zokutshumayela. Kusebenzise okufunda kuyo. Hlala utshumayela leqembu okulo. Ungenza njalo, abafowethu labodadewethu abaseqenjini lakho bazakuncedisa ukuthi uthuthukise indlela otshumayela lofundisa ngayo futhi isibonelo sabo esihle sizakukhuthaza. Qhubeka utshumayela lanxa usehlelwa yibunzima. Umbhalo okusekelwe kuwo isihloko sethu usikhumbuza ukuthi umoya ongcwele yiwo osinika amandla okwenza intando kaNkulunkulu hatshi amandla ethu. (Zek. 4:6) Kasithandabuzi ukuthi uNkulunkulu uzasinika umoya ongcwele esiwudingayo ngoba senza umsebenzi wakhe.

11. Ngesikhathi samaKhristu akuqala, iqula elibusayo lasebenza njani limanyene ukuze kuhlale kulokuhleleka phakathi kwabantu bakaNkulunkulu?

¹¹ Ngesikhathi samaKhristu akuqala. Iqula elibusayo eJerusalema lasebenza limanyene  ukuze kuhlale kulokuthula lokuhleleka phakathi kwabantu bakaNkulunkulu. (ImiSeb. 2:42) Ngokwesibonelo, kwathi sekuvuke indaba yokusoka ngabo-49 C.E., iqula elibusayo layihluza likhokhelwa ngumoya ongcwele. Aluba amaKhristu aqhubeka elemibono etshiyeneyo ngendaba le, ayengasoze aphumelele emsebenzini wokutshumayela. Lanxa abaphostoli lamadoda amadala ayengamaJuda, kabazange balandele isiko lamaJuda kumbe labo ababelitshisekela. Bahlola iLizwi likaNkulunkulu futhi bathandaza becela umoya ongcwele ukuthi ubancedise benze isinqumo esiqondileyo. (ImiSeb. 15:1, 2, 5-20, 28) UJehova wasibusisa isinqumo sabo futhi amabandla aqhubeka elokuthula njalo emanyene, lomsebenzi wokutshumayela wawulokhu usiyaphambili.—ImiSeb. 15:30, 31; 16:4, 5.

12. Kuyini okutshengisa ukuthi kulokuthula lokuhleleka enhlanganisweni kaJehova?

¹² Ngesikhathi sethu. Inhlanganiso kaJehova yenze kwahlala kulokuthula lokuhleleka phakathi kwabantu bakaJehova. I-Zion’s Watch Tower and Herald of Christ’s Presence kaNovember 15 1895 yayilesihloko esithi “Ngendlela Efaneleyo Lehlelwe Kuhle,” esisekelwe ku-1 Khorinte 14:40. Isihloko lesi sathi: “Abaphostoli babhalela amabandla akuqala izinto ezinengi ezimayelana lokuhleleka . . . Kuqakathekile ukuthi siqhubeke silalela ‘izinto ezabhalwa kudala zibhalelwa ukuthi kufundiswe thina.’” (Rom. 15:4) Lalamuhla inhlanganiso kaJehova isebenza nzima ukuze kuhlale kulokuthula lokuhleleka emabandleni. Ngokwesibonelo, ungaya kwelinye ibandla, kungaba selizweni lakho kumbe kwelinye ilizwe uyabe ukwazi ukuthi yisiphi isihloko se-Nqabayokulinda esifundwayo lokuthi sizafundwa njani. Uyahle uzizwe ususekhaya! Ngumoya ongcwele kuphela owenza kube lokumanyana okunje.—Zef. 3:9.

13. Ukucabangisisa ngokutshiwo kuJakhobe 3:17 kwenza sizibuze yiphi imibuzo?

¹³ Ongakwenza. UJehova ufuna abantu bakhe ‘bahlale bemanyene emoyeni belokuthula okwenza babambane babe munye.’ (Efe. 4:1-3) Zibuze: ‘Ngenza kuhlale kulokuthula lokumanyana yini ebandleni? Ngiyabalalela yini abakhokhelayo? Abanye bangangithemba yini,  ikakhulu nxa ngilemisebenzi engiyenzayo ebandleni? Ngiyaphangisa yini ukufika emihlanganweni? Ngizimisele yini ukuncedisa abanye?’ (Bala uJakhobe 3:17.) Nxa ubona angani kukhona lapho okumele uthuthukise khona, thandaza ucele umoya ongcwele ukuthi ukuncedise. Nxa ungawuvumela ukuthi utshintshe ubuntu bakho lezenzo zakho, abafowenu labodadewenu bazakuthanda kakhulu futhi bakuqakathekise.

14. (UKholose 1:9, 10) UJehova wabanceda njani abantu bakhe ngesikhathi samaKhristu akuqala ukuthi bathole ‘ulwazi oluqondileyo lwentando yakhe’?

¹⁴ Ngesikhathi samaKhristu akuqala. UJehova uyakuthanda ukufundisa abantu bakhe. (Hubo. 32:8) Ufuna babemazi, bamthande futhi baphile phakade njengoba bengabantwabakhe abathandayo. Kodwa konke lokhu ngeke kwenzakale nxa engasifundisi. (Joh. 17:3) Wasebenzisa ibandla lamaKhristu akuqala ukuthi afundise abantu bakhe. (Bala uKholose 1:9, 10.) Umoya ongcwele, okutsho “umsizi” uJesu ayewuthembisile lawo wabanceda abafundi. (Joh. 14:16) Wabancedisa ukuthi bazwisise iLizwi likaNkulunkulu njalo wabakhumbuza izinto ezinengi uJesu ayezitshilo layezenzile ezacina zibhalwe emaVangelini. Ulwazi lolo lwabanceda baqinisa ukholo lwabo, bamthanda kakhulu uNkulunkulu leNdodana yakhe kanye labanye abazalwane.

15. UJehova usigcwalise njani isithembiso sakhe esiku-Isaya 2:2, 3?

¹⁵ Ngesikhathi sethu. UJehova wathi “ngezinsuku zokucina” abantu bezizwe zonke bazakuza entabeni yakhe okutsho ukuthi bazamkhonza ndawonye labantu bakhe, bafunde izindlela zakhe. (Bala u-Isaya 2:2, 3.) Isiphrofetho leso siyagcwaliseka lamuhla ngoba uJehova uqoqela abantu abamthandayo futhi abamesabayo entabeni yakhe engcwele, emela ukukhonza kweqiniso okuphakeme ukwedlula loba yikuphi ukukhonza kwamanga. Kanti njalo uJehova wenzele  abantu bakhe idili lokudla okubaqinisa ukholo. (Isaya. 25:6) Usebenzisa ‘inceku ethembekileyo lehlakaniphileyo’ ukuthi asinike ukudla okunengi okugoqela amabhuku, izinkulumo, opopayi kanye lamavidiyo. (Mat. 24:45) Sizizwa njengo-Elihu umngane kaJobe owathi: “Ngubani ongafundisa [njengoNkulunkulu] na?”—Jobe. 36:22.

16. Ungenzani ukuze uthuthuke ekukhonzeni?

¹⁶ Ongakwenza. Umoya kaNkulunkulu uzakuncedisa ukuthi ukusebenzise lokho okufunda eLizwini lakhe. Thandaza njengomhubi owathi: “Ngifundisa indlela yakho, O Jehova, ukuze ngihambe eqinisweni lakho; ngipha inhliziyo engaxamalazanga, ukuze ngilesabe ibizo lakho.” (Hubo. 86:11) Ngakho qhubeka utaditsha iBhayibhili lamabhuku esiwaphiwa yinhlanganiso kaJehova. Inhloso yakho akumelanga ibe ngeyokuba lolwazi kuphela kodwa lokho okufundayo kumele kuthophele enhliziyweni yakho futhi ukusebenzise. Umoya kaJehova uzakuncedisa ukuthi wenze njalo. Kanti njalo kumele ukhuthaze abafowenu labodadewenu ngoba bangamalunga emuli yakho. (Heb. 10:24, 25) Thandaza ucele ukuthi umoya kaNkulunkulu ukuncedise unike impendulo ezizakhuthaza abanye emihlanganweni yebandla futhi ulungiselele okuzwayo nxa ulenkulumo. Nxa ungenza njalo uyabe utshengisa uJehova leNdodana yakhe ukuthi uyazithanda ‘izimvu’ zabo eziligugu.—Joh. 21:15-17.

17. Ungatshengisa njani ukuthi uyayisekela inhlanganiso kaJehova?

¹⁷ Sekuseduze ukuthi emhlabeni kusale inhlanganiso eyodwa ekhokhelwa ngumoya kaNkulunkulu. Yikho bambisana lenhlanganiso kaJehova. Tshengisa ukuthi uyabathanda bonke abantu njengoNkulunkulu ngokubatshela izindaba ezinhle. Yenza kuhlale kulokumanyana ebandleni. Ungenza njalo uyabe ulingisela uNkulunkulu othanda ukuthula lokuhleleka. Lalela uMfundisi Omkhulu ngokudla konke ukudla asilungiselele khona edilini lakhe. Ungenza njalo awusoze wesabe nxa umhlaba kaSathane usuphela kodwa uzakuba lesibindi ume labantu abaqotho abasenhlanganisweni kaJehova.