1. Aakriste mboka ya ninginithwa oye na okutsikila okuninga shike?

MBELA owa ninginithwa? Ngele osho, sho wa ninginithwa, owe shi ulika montaneho kutya owu na eitaalo muJehova nowa hala oku mu longela pamwe nehangano lye. * Odhoshili kutya owa pumbwa okutsikila okukokeka eitaalo lyoye muJehova. Owa pumbwa wo okutsikila okukala wi itaala lela kutya Jehova ota longitha ehangano lye kunena.

2-3. Omomukalo guni Jehova ha wilike ehangano lye? Gandja iiholelwa.

² Jehova ota wilike ehangano lye kunena momukalo ngoka tagu ulike uukwatya we, elalakano lye nomithikampango dhe. Natu ka taleni komaukwatya gaJehova gatatu, ngoka gi iwetikile mehangano lye.

³ Uukwatya wotango, “Kalunga aantu ayehe ohe ya tala ye thike pamwe.” (Iil. 10:34) Ohole oyo yi inyengitha Jehova a gandje Omwana a ninge “iikulila yaantu ayehe.” (1 Tim. 2:6; Joh. 3:16) Jehova oha longitha aapiya ye yu uvithe onkundana ombwanawa kwaayehe mboka ya hala okupulakena, mokukwathela oyendji ngaashi ta vulu, opo ya mone uuwanawa mekulilo. Momukalo ngoka oha kwathele kehe ngoka a hala okuhupithwa. Uukwatya uutiyali, Jehova oKalunga kelandulathano nokombili. (1 Kor. 14:33, 40) Onkee ano, aalongeli ye, oye na oku mu longela momukalo gu unganekwa nawa noye na ombili. Uukwatya uutitatu, Jehova “Omulongi Omunenenene.” (NW) (Jes. 30:20, 21) Onkee ano, ehangano lye ohali gandja eitulomo kokulonga aantu Oohapu dhe dha nwethwa mo, megongalo nosho wo muukalele. Aakriste yomegongalo lyopetameko, oya li ya holele ngiini omaukwatya gaJehova ngoka gatatu? Kunena aapiya yaJehova ohaya holele ngiini omaukwatya ngoka? Ombepo ondjapuki otayi vulu oku ku kwathela ngiini  sho to longele kumwe nehangano lyaJehova kunena?

4. Ngaashi sha popiwa mIilonga 1:8, Jesus okwa li a lombwele aalanduli ye ya ninge shike, nekwatho lini ya li taya ka pewa?

⁴ Methelemumvo lyotango. Etumwalaka ndyoka lya li lyu uvithwa kuJesus olya li lya pe aantu ayehe etegameno. (Luk. 4:43) Okwa lombwele aalanduli ye ya tsikile niilonga mbyoka a tameka, ano ya gandje uunzapo kombinga ye ‘miilongo ayihe yokombanda yevi.’ (Lesha Iilonga 1:8.) Odhoshili kutya kaya li taya ka vula okulonga iilonga mbyoka koonkondo dhawo yene. Oya li taya ka pumbwa ombepo ondjapuki, ano “Omupopili” ngoka Jesus e yu uvanekela. — Joh. 14:26; Sak. 4:6.

5-6. Omomikalo dhini ombepo ondjapuki ya li ya kwathele aalanduli yaJesus?

⁵ Aalanduli yaJesus oya li ya tililwa ombepo ondjapuki pOpentekoste yomo 33 E.N. Kekwatho lyombepo ndjoka, mbalambala oya tameke okuuvitha, nomuule wethimbo efupi, aantu omayuvi oya taamba ko onkundana ombwanawa. (Iil. 2:41; 4:4) Sho aantu ya tameke oku ya pataneka, aalongwa kaya li ya tila, yo inaye etha po okuuvitha. Pehala lyaashono, oya pula Kalunga ekwatho. Oya li ya galikana ya ti: “[Pa] aamati yoye oohapu dhoye, tu popye nuulaadhi auhe twaa na uumbanda.” Opo nduno oya tililwa ombepo ondjapuki “noya popi nuulaadhi oohapu dhaKalunga.” — Iil. 4:18-20, 29, 31.

⁶ Aalongwa yaJesus oya li wo ya taalele omashongo galwe. Pashiholelwa, oondhingambo dhOmanyolo kadha li odhindji. Kaya li ye na iileshomwa yokukonakona Ombiimbeli ngaashi tu yi na kunena. Shimwe ishewe, aalongwa oya li ye na okuuvithila aantu mboka ya li haya popi omalaka ogendji ga yoolokathana. Nonando aalongwa aadhiginini mbaka oya li ya taalele omashongo agehe ngoka, oya ningi shoka sha li tashi monika itaashi wapa okuningwa. Muule owala womimvo 30, oya li yu uvithile “aantu ayehe yomuuyuni” onkundana ombwanawa. — Kol. 1:6, 23.

7. Uule womimvo 100 dha ka pita, aapiya yaJehova oya kala ye shi ngiini shoka Jehova a tegelela ya ninge, noya ningi po shike?

⁷ Pethimbo lyongashingeyi. Jehova ota tsikile okuwilika nokukwathela oshigwana she. Oha wilike unene aapiya ye okupitila mOohapu dhe dha nwethwa mo, Ombiimbeli. MOmbiimbeli omo tatu adha ondjokonona yuukalele waJesus nelombwelo ndyoka a pa aalanduli ye, ano ya tsikile niilonga mbyoka a li a tameke. (Mat. 28:19, 20) MOshungolangelo yaJuli 1881, omwa li mu na oohapu tadhi ti: “Jehova ine tu gwayeka, opo ando tu simanekwe kaantu nenge tu ninge aayamba, ihe otu longithe kehe shoka tu na, tu uvithe onkundana ombwanawa.” Okambo To Whom the Work Is Entrusted, ka nyanyangidhwa mo 1919, oka tile: “Iilonga oyindji noonkondo, ihe oyOmuwa, note ke tu pa oonkondo tu yi longe.” Ngaashi owala Aakriste yopetameko, aamwatate mboka oya li aalaadhi noya li ya longo nuudhiginini, oshoka oya li ye shi kutya ombepo ondjapuki otayi ke ya kwathela yu uvithile aantu ayehe. Natse wo kunena otu na eitaalo kutya ombepo ondjapuki otayi ke tu kwathela miilonga yetu.

8-9. Ehangano lyaJehova ohali longitha omikalo dhini mokuuvitha onkundana ombwanawa?

⁸ Ehangano lyaJehova olya kala nokulongitha iilongitho ya dhenga mbanda mokuuvitha onkundana ombwanawa. Iilongitho mbyoka oya kwatela mo iileshomwa ya pilintwa, oshinyandwa “Photo-Drama of Creation,” oongalamathona, oohauto dhomambako, oopolohalama dhokoradio nosho wo ointaneta pethimbo lyetu. Ehangano lyaJehova ohali toloka wo uuyelele momalaka ogendji inaashi monika nando onale. Omolwashike hali shi ningile? Opo aantu ayehe yu uve onkundana ombwanawa momalaka gawo. Jehova ke na okatongo; oku uvaneka kutya onkundana ombwanawa otayi ku uvithilwa “omihoko adhihe, omaludhi agehe, omalaka agehe niigwana ayihe.” (Eh. 14:6, 7) Okwa hala aantu ayehe yu uve ko etumwalaka lyUukwaniilwa.

⁹ Ongiini kombinga yaamboka ihaaya monika nuupu tashi vulika molwaashoka haya zi  momatungo ngoka ihaamu vulu okuyiwa nuupu? Opo aantu ya tya ngawo nayo yu uvithilwe, ehangano lyaJehova olya tameke okulongitha omikalo dhontumba dhokuuvitha montaneho. Pashiholelwa, mo 2001, Olutuwiliki olwa li lwa gandja epitikilo kaamwatate moFulaanisa ya tameke okukala haya longitha uutemba nosho wo omikalo dhilwe dhokugandja uunzapo. Lwanima, aamwatate yokiilongo yilwe oya tameke wo okulongitha omikalo ndhoka. Omukalo ngoka ogwa li gwe eta iizemo iiwanawa lela. Mo 2011 opwa li pwa tamekwa omukalo omupe gwokugandja uunzapo moshitopolwa shoka hashi kala shi ipyakidhila unene, moNew York City, shaAmerika. Momumvo ngoka, aamwatate oya li ya gandja omambo 102 129 nosho wo iifo 68 911. Shimwe ishewe, aantu 4 701 oya li ya pula ya konakone Ombiimbeli. Oshi iwetikile kutya ombepo ondjapuki oyo ya li ya kwathele aamwatate naamwameme mboka, ya pondole. Onkee ano, Olutuwiliki olwa li lwa gandja epitikilo aamwatate naamwameme ayehe muuyuni ya tameke okulongitha uutemba nosho wo omikalo dhilwe dhokugandja uunzapo.

10. Oshike tatu vulu okuninga tu hwepopaleke omukalo gwetu gwokuuvitha nogwokulonga aantu?

¹⁰ Shoka to vulu okuninga. Pokugongala kwopaKriste, Jehova ohe tu dheula nkene tu na okuuvitha. Kala ho tula miilonga shoka ho ilongo po. Kala ho uvitha pamwe nongundu yeni yiilonga yomomapya pandjigilile. Aamwatate naamwameme yomongundu yeni otaya vulu oku ku kwathela wu hwepopaleke omukalo gwoye gwokuuvitha nogwokulonga aantu, notaya vulu wo oku ku tsa omukumo okupitila moshiholelwa shawo. Kala ho idhidhimike muukalele. Ngaashi oshipalanyolo shoshitopolwa shetu tashi tu dhimbulukitha, ihatu gwanitha po ehalo lyaKalunga koonkondo dhetu yene, ihe okekwatho lyombepo ondjapuki. (Sak. 4:6) Otatu vulu okukala tu na uushili kutya Kalunga ote ke tu pa oonkondo ndhoka twa pumbwa, molwaashoka otatu longo ehalo lye.

11. Methelemimvo lyotango, Olutuwiliki olwa li lwa longele kumwe ngiini lu kaleke po elandulathano mokati koshigwana shaKalunga?

¹¹ Methelemumvo lyotango. Olutuwiliki muJerusalem olwa li lwa longele kumwe lwa hangana li kaleke po elandulathano nombili mokati koshigwana shaKalunga. (Iil. 2:42) Pashiholelwa, mo 49 E.N., Aakriste oyendji kaya li taya tsu kumwe kombinga yokupita etanda. Onkee Olutuwiliki  olwa li lwa nwethwa mo kombepo ondjapuki lu kundathane oshinima shoka. Ando egongalo olya kalele lya topoka kombinga yoshinima shoka, andola otashi vulika iilonga yokuuvitha ya yiwa moshipala. Nonando aayapostoli naakuluntu oya li Aajuda, kaya li ya nwethwa mo komuthigululwakalo gwOshijuda nokwaamboka ya li taye gu humitha komeho. Pehala lyaashono, oya li ya tala kutya Oohapu dhaKalunga otadhi ti shike, e taya pula Jehova e ya pe ombepo ondjapuki ya ninge etokolo lyomondjila. (Iil 15:1, 2, 5-20, 28) Oshizemo osha li shini? Jehova okwa li a yambeke etokolo lyawo, negongalo olya tsikile okukala li na ombili nolya hangana noya tsikile okuuvitha onkundana ombwanawa. — Iil. 15:30, 31; 16:4, 5.

12. Oshike tashi ulike kutya mehangano lyaJehova kunena omu na elandulathano nombili?

¹² Pethimbo lyetu. Ehangano lyaJehova olya kala nokulonga nuudhiginini lyi kaleke po elandulathano nombili mokati kaapiya yaJehova. Oshifo Zion’s Watch Tower nosho wo Herald of Christ’s Presence sho 15 Novomba 1895, osha li shi na oshitopolwa, shi na oshipalanyolo tashi ti: “Decently and in Order,” (“Palandulathano nopamukalo omwaanawa,” shoka sha li shi ikolelela kAakorinto yotango 14:40. Oshitopolwa shoka osha tile: “Aayapostoli oya li ye na oshindji okulombwela egongalo lyopetameko kombinga yelandulathano. Oshi li pandunge tu tsikile okukala hatu vulika kukehe shoka ‘sha nyolwa shi tu longe.’” (Rom. 15:4) Odhoshili kutya ehangano lyaJehova kunena, otali longo nuudhiginini li kaleke po elandulathano nombili megongalo lyopaKriste ngaashi owala lya li lya ningi pethimbo lyAakriste yopetameko. Pashiholelwa, ngele owa ka gongala kegongalo lilwe, kutya nduno omoshilongo sheni nenge koshilongo shilwe, oho kala wu shi nkene ekonakono lyOshungolangelo tali ka ningwa nosho wo kutya oshitopolwa shini tashi ka konakonwa. Mbalambala oho kala wu uvite wa manguluka! Ombepo ondjapuki yaKalunga oyo owala tayi vulu oku tu kwathela tu kale twa hangana. — Sef. 3:9.

13. Tu na Jakob 3:17 momadhiladhilo, omapulo geni tu na okwiipula?

¹³ Shoka to vulu okuninga. Jehova okwa hala ‘tu koleke uukumwe wetu womombepo ondjapuki omolwombili ndjoka tayi tu mangele kumwe.’ (Ef. 4:1-3) Onkee ano, ipula to ti: ‘Mbela ohandi humitha ngaa komeho uukumwe nombili megongalo? Mbela ohandi vulika ngaa kwaamboka taya kwatele komeho? Mbela ohandi ningi ngaa shoka  nda tegelelwa ndi ninge, unene tuu ngele ondi na iinakugwanithwa megongalo? Mbela ohandi ningi ngaa iinima pethimbo? Mbela ohandi kwathele yalwe noku ya yakula?’ (Lesha Jakob 3:17.) Ngele owa mono kutya owa pumbwa okulongela ko kuyimwe yomiinima mbyoka, galikana wu pewe ombepo ondjapuki. Ngele owe etha ombepo ondjapuki yi nwethe mo uukwatya woye noonkatu dhoye, nena aamwatate naamwameme otaya ka kala ye ku hole notaya ka kala ye ku pandula.

14. Shi ikolelela kAakolossa 1:9, 10, Jehova okwa li a longo ngiini oshigwana she methelemumvo lyotango?

¹⁴ Methelemumvo lyotango. Jehova okuhole okulonga aapiya ye. (Eps. 32:8) Okwa hala ye mu tseye, ya kale ye mu hole, noya ka mone omwenyo gwaaluhe, ye li oyana. Iinima ayihe mbyoka itayi vulu okuningwa kaapu na elongo ndyoka e tu pa. (Joh. 17:3) Jehova okwa longitha egongalo lyopaKriste lyomethelemimvo lyotango a longe aantu ye. (Lesha Aakolossa 1:9, 10.) Aalongwa oya li wo ya kwathelwa kombepo ondjapuki, ano “omupopili” ngoka Jesus a li e yu uvanekela. (Joh. 14:16) Ombepo ondjapuki oya li ya kwathele aalongwa yu uve ko Oohapu dhaKalunga nawa, noye ya kwathele wo ya dhimbulukwe iinima mbyoka Jesus a popi nokwa ningi, mbyoka lwanima ya ka nyolwa mOmavaangeli. Shoka osha li sha kwathele Aakriste yopetameko ya kale ye na eitaalo lya kola, ya kale ye hole Kalunga nOmwana noya kale wo ye holathane.

15. Omomikalo dhini wa mona Jehova ta gwanitha po ehunganeko lye ndyoka tali adhika muJesaja 2:2, 3?

¹⁵ Pethimbo lyetu. Jehova okwa hunganeka kutya “pehulilo lyomasiku,” (NW) aantu yomiigwana ayihe otaya ka matukila kondundu ye yopathaneko, opo ya longwe kombinga yaashoka a hala ya ninge. (Lesha Jesaja 2:2, 3.) Otu wete nkene ehunganeko ndyoka tali gwanithwa po kunena. Oshi iwetikile kutya elongelokalunga lyashili oli vule kokulekule kehe elongelokalunga lyiifundja. Jehova ota shilipaleke wo kutya aapiya ye oye na eloolo lyiikulya yopambepo. (Jes. 25:6) Oha longitha “[omupiya, NW] omudhiginini nomunandunge,”  e tu pe iikulya yopambepo mbyoka hayi kala momaludhi gi ili nogi ili. Pashiholelwa, otatu vulu okulesha iileshomwa, okupulakena kiipopiwa nosho wo okutala uuvidio. (Mat. 24:45) Otu uvite ngaashi kuume kaJob, Elihu, ngoka a tile: “[Kalunga] oye omuputudhi omunene.” — Job 36:22.

16. Oshike wu na okuninga, opo wu kale ho mono uuwanawa momalombwelo gaJehova?

¹⁶ Shoka to vulu okuninga. Ombepo ondjapuki otayi ke ku kwathela wu tule miilonga shoka to ilongo naashoka to konakona mOohapu dhaKalunga. Galikana ngaashi Omupisalomi ngoka a ti: “Omuwa, longa ndje, ndi tseye ehalo lyoye, notandi ka vulika nokukala moshili. Longa ndje, ndi ku simaneke nomwenyo aguhe.” (Eps. 86:11) Onkee ano, tsikila okulesha nokukonakona Ombiimbeli nosho wo iileshomwa yilwe mbyoka Jehova e tu pa okupitila mehangano lye. Odhoshili kutya elalakano lyoye kali shi owala okukala wu na ontseyo. Owa hala okukala wa tompwa koshili, noku yi tula miilonga monkalamwenyo yoye. Ombepo yaJehova otayi vulu oku ku kwathela wu shi ninge. Owa hala wo okukala ho tsu omukumo aamwatate naamwameme. (Heb. 10:24, 25) Omolwashike mbela? Omolwaashoka nayo oye li aakwanezimo lyoye. Galikana wu pewe ombepo ondjapuki, opo wu gandje omatyokosha taga zi komutima pokugongala kwopaKriste nowu ninge wo ngaashi to vulu uuna wu na oshipopiwa pokugongala. Ngele owa kala ho shi ningi, nena otu ulukile Jehova nosho wo Omwana kutya owu hole “oonzi” Dhe dhi na ondilo. — Joh. 21:15-17.

17. Omomikalo dhini to vulu okuulika kutya ngoye omudhiginini kehangano lyaJehova?

¹⁷ Masiku ehangano awike ndyoka tali ka kala kombanda yevi, oondyoka owala hali wilikwa kombepo yaKalunga. Onkee ano, kala omulaadhi mokulongela kumwe nehangano lyaJehova. Ulika kutya owu hole aantu ayehe ngaashi Kalunga, moku yu uvithila onkundana ombwanawa. Ulika kutya owu hole elandulathano nombili ngaashi ye, mokukala ho humitha komeho uukumwe megongalo. Kala wo ho pulakene kOmulongi gwetu Omunenenene, mokukala ho tula miilonga uuyelele awuhe mboka he tu pe. Opo nduno sho uuyuni waSatana tawu ka hanagulwa po, ito ka mbandapalekwa kusha. Pehala lyaashono, oto ku ulika uulaadhi noto ka kala gumwe gwomwaamboka taya longele ehangano lyaJehova nuudhiginini.