1. Akristu oopatisiwa tiheeni anaphwanelaaya otitelela opaka?

APWANNE moopatisiwa? Waakhanle wi tihiiha, mohooniherya vanlakani nroromelo nanyu mwa Yehova, nave wi munnachuna omurumeela vamoha ni marehereryo awe. * Mweeparipari nroromelo nanyu mwa Yehova nnaphwanela otitelela wunnuwa. Nyuwo munaphwanela otitelela ororomela wi chiryene Yehova onnapharihela marehereryo awe olelo.

2-3. Makhalelo taani mararu Yehova onooniheryeiye vaavaa onahooleleiye marehereryo awe olelo? Mvahe sootakiherya.

² Olelo, Yehova onnahoolela marehereryo awe, mmukhalelo yoowo onooniherya mikhalelo sawe, yoolakelela, ni malamulo awe. Hankooni nthokororye makhalelo mararu a Yehova yaawo onooniheryeiye mmarehereryo awe.

³ Yoopacerya, “Muluku haanono nthalu.” (Saw. 10:34) Osivela woomuceenyerya Yehova omvaha mwanawe ntoko “yoolivela yoowopolano achu oothene.” (1 Tim. 2:6; Yoh. 3:16) Yehova onnaapharihela achu awe wi elaleerye michaka saphaama wa achu oothene yaawo anahaala owiriyana navetho wi yaakhaviherye achu ancipale ophiyerya anaweryelaayavo, wi ephure orweela wa mukucho wa woopola. Yanaawiili, Yehova, Muluku ooreheryeya ni a murecele. (1 Kor. 14:33, 40) Mwawiihiiha, nnawehererya wi alapeli awe anaphwanela omurumeelaka ntoko nikhuuru nooreheryeya ni namurecele. Yaneeraru, Yehova “muhusiha” mutokotoko. (Isa. 30:20, 21) Mwawiihiiha, marehereryo anatikitheryeya mu ohusiha Masu awe ooveereliwa mmulokoni ni mmuteko woolaleerya. Yehova oonihenrye  hai makhalelo yaala mararu mmuloko Weekristu woopacerya? Achu a Yehova anooniherya hai makhalelo yaala mararu mmahiku ahu? Nave munepa waweela oni wookhaviheryeeni hai vaavaa munamurumeelaanyu Yehova vamoha ni marehereryo awe olelo?

4. Ntoko elociwaaya mu Saweriwa T’arummwa 1:8, tiheeni Yesu aalamulenleiye oomuchara awe opaka nave nikhaviheryo taani yaahaalaaya waakhela?

⁴ Mu nsana noopacerya. Muchaka yoowo Yesu aalalenryeiye, waahivaha ewehereryo wa achu a maloko oothene. (Luka 4:43) Owo aahaalamulela oomuchara awe wi etitelele ni muteko yoowo aapaceryinheiye, wi ovahe onamoona wa achu oothene “ophiyerya weiwo elapo ekontaayawo.” (Mwaalakhanye Saweriwa T’arummwa 1:8.) Mweeparipari oomuchara a Yesu hiyaahaala opaka muteko yoola mukhataaya. Awo yaahaala ochuna nikhaviheryo na munepa waweela yoowo Yesu aaroromelinheiye.—Yoh. 14:26; Zak. 4:6.

5-6. Mmikhalelo taani munepa waweela waakhavihenryaaya oomuchara a Yesu?

⁵ Oomuchara a Yesu yaahaakhela munepa waweela mu Pentekoste a 33 E.K. Nnikhaviheryo na munepa waweela, mwawaakuveya yaahipacerya olaleerya, nave mu elukuluku vakhaani macikhwi a achu yaaheemererya michaka saphaama. (Saw. 2:41; 4:4) Vaavaa waakhumelenlaaya wiica, oohuserya hiyomve, ohiya yeeyo awo yaahimveka Muluku wi aakhaviherye. Awo yaahivekela eriki: “Vahani wa anamuteko anyu [olipa murima] oloca masu anyu mu ohoovelela.” Voocharela awo yaasareya munepa waweela “enalaleya masu a Muluku mu ohoovelela.”—Saw. 4:18-20, 29, 31.

⁶ Oohuserya a Yesu yaahihoolela tho makacamiho makina. Ntoko yootakiherya, awo hiyaarino iroolo sincipale sa masu a Muluku. Navetho hiyaarino aliivuru ancipale oomuhuseryano Piipiliya hiiha ntoko olelo. Nave oohuserya yaaphwanela olaleerya wa achu yaawo yaaloca ilocelo soohiyanahiyana. Moohipwacha makacamiho oothene yaala, oohuserya yaale amvai yaahipaka echu yeeyo yooneya ntoko yoohiweryeya, mu iyaakha makhumi mararu awo yaahilaleerya michaka saphaama “wa soopatushiwa soothene sa vathi veerimu.”—Kol. 1:6, 23.

7. Mu iyaakha opwaha nsana ivirale, alapeli a Yehova yaasuwenle hai yeeyo yaaweheriwa wa yaawo, nave yaakhulenle hai?

⁷ Mmahiku ahu. Yehova onnatitelela waahoolela achu awe ni waalipiha. Owo onnaahoolela achu awe moorweela wa Masu Awe ooveereliwa ni munepa waweela. Mpiipiliyani ninnaalakhanyamo vooloca sa orummwa wa Yesu, ni nlamulo nenlo aavanheiye oomuchara awe wi etitelele ophara muteko yoowo aapaceryinheiye. (Mat. 28:19, 20) Mmahiku a muculi mu erevista emoha ya Yulyu a 1881 yaahiloca wi: “Hiyaano hiniichaniwe, naari othanliwa wi ncicimihiweke ni achu naari okhala achu ooreela, nyenya wi nipharihele echu vyakala nryaahuno wi nlaleerye michaka saphaama.” Efolyeto ya 1919 yeeyo yaarino muru, Taani Onnyereryiwe Muteko Ola, yaahiloca eriki: “Wookhalavo muteko muncipale onachuneya opakiwa, nyenya ola muteko wa Apwiya nave awo anamunivaha ikuru wi niwerye okhwaaniherya.” Chiryene moolikana ni Akristu a nsana noopacerya, anna ni arokora ale yaahilapa eroromelaka wi munepa waweela waahaala waakhaviherya olaleerya wa achu a maloko oothene. Hiyotho ninnaroromela wi munepa waweela onamunikhaviherya.

8-9. Meerelo taani marehereryo a Yehova anapharihelaaya wi emwaramwaxe michaka saphaama?

⁸ Marehereryo a Yehova annapharihela ikaruma soophwanelela seiho sikhanle wi emwaramwaxe michaka saphaama. Ikaruma seiha saaphitaanyerya soolaleeryiwa sawimpirimiiriwa, “Fotodrama da Criação,” ikhankoonya sooruma, ekaaro ya ikhankoonya sooruma, raatiyu ni ikhankoonya ikina samutano. Marehereryo a Muluku annalapa mwakuru wi etaphulele soolaleeryiwa mu ilocelo sincipale opwaha khalai! Ntakhara heeni? Wi achu a maloko oothene yiiwe michaka saphaama mu elocelo aya. Yehova haanono nthalu owo aahilaiherya wi michaka  saphaama saahaala olaleiwa “wa ilapo, wa mahimo, wa ilocelo, ni wa maloko.” (Wup. 14:6, 7) Owo onachuna wi achu oothene yiiwe michaka sa Omwene.

⁹ Hanka vooloca sa yaale nihinaweryaahu waaphiyerya owannyaya nthowa nawi anakhala mu ipa sa vasulu sookhapeleleya seiho nihinaweryaahu ovolowamo? Ni yoolakelela ya waaphwanya ancipale a achu yaala, Yehova ookhaviherya marehereryo awe wi epacerya opharihela mikhalelo soohiyanahiyana sa onamoona wa vanlakani. Ntoko yootakiherya, mu 2001 Nikhuuru Noolamulela naaheemererya wi iphariheliweke ikarinya sa soolaleeryiwa o Fransa, nave voocharela mu ilapo ikina. Chiryene sookhumelela saari soohakalaliha. Mu 2011 mukhalelo yoola muvyaani wa opharihela ikarinya, waahipacerya ophariheliwa o Estatu Unitu mmuceche mmoha yoowo achu anakhalaaya ooweiwaxa mu epooma yo Nov York. Variyari va eyaakha yoopacerya, yaahikaiwa aliivuru awaakhwana 102.129 ni irevista 68.911. Nave achu awaakhwana 4.701 yaahiveka yoohuserya ya Piipiliya! Moohikhwa minikwa, ti yawooneya wi Yehova onnapharihela munepa awe waweela wi akhaviherye muteko awe. Mwawiihiiha Nikhuuru Noolamulela naaheemererya wi ikarinya sa soolaleeryiwa iphariheliweke mu ilapo soothene.

10. Tiheeni nnaphwanelaahu weera wi ninnuwihe mavyakelo ahu mmuteko woolaleerya?

¹⁰ Echu munaphwanelaanyu weera. Mukumihe mphurelo orweela mu ovyakiha yoowo Yehova onavahereryeiye mmithukumano Seekristu. Mulapeke moohihiyererya nnikhuuru nanyu na mmuteko woolaleerya. Weiwo munanwerya okhaviheryiwa ni alaleeryi akina wunnuwiha mavyakelo anyu naari olipihiwa ni yootakiherya yaphaama ya akina. Mutitelele olaleerya naamwi mukumanaka ni makacamiho. Hiiha ntoko yoorepa ya mwaha ahu enooniheryaaya, ninnakhwaaniherya yookhwela ya Muluku ohiya ni owerya wahu nyenya orweela mwa munepa waweela. (Zak. 4:6) Opwaha soothene, nnaphwanela wuupuwela wi nnapaka muteko wa Muluku.

11. Nikhuuru noolamulela mu nsana noopacerya naalampe hai mwawiiwanana wi muloko wa Muluku otitelela okhala wooreheryeya?

¹¹ Mu nsana noopacerya. Nikhuuru noolamulela o Yerusalemu, naahilapa mwawiiwanana wi nikhapelele oreheryeya ni murecele variyari va achu a Muluku. (Saw. 2:42) Ntoko yootakiherya, vaavaa waakhumelenlaaya moonelo woohiyana vooloca  sa othikiliwa mu eyaakha ya 49 E.K., nikhuuru noolamulela nihooleliwaka ni munepa waweela naahithokororya vamoha mwaha owo. Waakhanle wi muloko wootitelela okhala wookawanyeya nthowa na mwaha wa othikiliwa, hiwaahaala owerya olaleerya moopwahaxa. Naamwi arummwa ni asitokweene akina yaari Ayuta, awo hiyaavoloweliwe ni sookhovelela sa Ayuta naari ovuwiha mahusiheryo aya. Ohiya yeeyo, awo yaahithokororya mwaha mwawiiwanana ni masu a Muluku, nave yaaveka munepa waweela wi waakhaviherye opaka yoolakelela yoophwanelela. (Saw. 15:1, 2, 5-20, 28) Teevi yaari yookhumelela? Yehova aahireeliha yoolakelela aya, murecele ni wiiwanana waahikhalamo mmulokoni, nave muteko woolaleerya waanaya vahoolo moohihiyererya.—Saw. 15:30, 31; 16:4, 5.

12. Tiheeni enooniherya wi marehereryo a Yehova tooreheryeya ni a murecele olelo?

¹² Mmahiku ahu. Marehereryo a Yehova annatitelela waakhaviherya achu a Yehova, okhala ooreheryeya ni a murecele. Mmahiku a muculi mu 1895 Zion’s Watch Tower and Herald of Christ’s Presence 15 a Novempuru aahikhalano mwaha waarino muru: “Moophwanelela ni Mwaweereryanyeya” waarweela mu 1 Korinto 14:40. Mwaha owo waalonce wi: “Arummwa yaahirepela ichu sincipale mmuloko woopacerya vooloca sa oreheryeya naari weereryanyeya. Ti woochuneya wi nchariheke moopwacha ‘soorempwa soothene sakhalai seiho sirepeliwe wi inihusiheke.’” (Aro. 15:4) Chiryene marehereryo a Yehova annalapa mwakuru wi muloko Weekristu otitelele okhala wooreheryeya ni wa murecele, hiiha ntoko Akristu a nsana noopacerya. Ntoko yootakiherya, waakhanle wi munamuhuserya Mulipeleli mmuloko mukina naari mu elapo ekina, mwaahaala osuwela mukhalelo yoohuserya ya Mulipeleli yaahaalaaya weecihiwa ni mwaha waahaala othokororyiwa. Mwawaakuveya, mwaahaala wiisoona ntoko wi muri mmuloko anyu! Pahiru munepa waweela wa Muluku toneeriha okhala wooweryeya wi okhalevo wiiwanana!—Sof. 3:9.

13. Mwawiiwanana ni Tiyako 3:17 makoho taani nnaphwanelaahu wiipakela?

¹³ Echu munaphwanelaanyu weera. Yehova onachuna wi achu awe “ekhapelele omoha onarweela wa Muluku ni olucelelana wa murecele.” (Éfe. 4:1-3) Mwawiihiiha mwiikohe: ‘Apwanne kinnaaceererya wiiwanana ni murecele mmulokoni? Mano kinnawiiwelela yaale anahoolela? Apwanne achu ananwerya okiroromela, xaxaxa waakhala wi  kookhalano mirici mmulokoni? Apwanne kiri ooreheryeya, kinnakhaviherya, ni wooniherya mvai mu orummwa?’ (Mwaalakhanye Tiyako 3:17.) Wakhala wi mohoona wi munnaphwanela otoroka echu vyakala, mveke nikhaviheryo na munepa waweela. Vaavaa muneemereryaanyu wi munepa waweela ovolowele omuchu anyu ni meerelo anyu, anna ni arokora anahaala woosivelakaani ni woocicimihaani.

14. Mwawiiwanana ni Kolosi 1:9, 10, Yehova aahusinhe hai achu awe mu nsana noopacerya?

¹⁴ Mu nsana noopacerya. Yehova onnasiveliwa vancipale waahusiha achu awe. (Sal. 32:8) Owo onachuna wi achu awe emusuwele, omusivela, ni okhala ni okumi okhala wookhala ntoko anaawe oosiveliwa. Soothene seiha hisaahaala okhala sooweryeya ehirivo mahusiheryo yaawo onanivahereryeiye. (Yoh. 17:3) Yehova aahipharihela muloko Weekristu mu nsana noopacerya wi aahusihe achu awe. (Mwaalakhanye Kolosi 1:9, 10.) Munepa waweela yoowo Yesu aaroromelinheiye, waahaakhaviherya tho oohuserya. (Yoh. 14:16) Munepa waweela waahaakhaviherya oohuserya wiiwexexa Masu a Muluku ni wuupuwelela seiho Yesu aalonceiye ni aapankeiye, seiho ohoolo waya saarempwale mu aliivuru a Michaka. Masuwelelo yaala yaahilipiha nroromelo na Akristu oopacerya, omusivela waya Muluku vamoha ni Mwanawe ni osivela wa mukina ni mukhwaawe.

15. Mmikhalelo taani munoonaanyu waakhwanela wa yoolaiherya ya Yehova enaphwanyeya mu Isaiya 2:2, 3?

¹⁵ Mmahiku ahu. Yehova aahilaiherya wi “mmahiku ookuchula,” achu a maloko oothene yaahaala oya o mwaako awe woosiphela wi ehusihiweke vooloca sa iphiro sawe. (Mwaalakhanye Isaiya 2:2, 3.) Ninnoona waakhwanela wa yooloherya yeela mmahiku ahu. Ninnawerya woona wi malapelo eeparipari tari oophwanelelaxa opwaha malapelo vyakala atheru. Nave Yehova onnareherya efesta yoomunepani ntakhara achu awe! (Isa. 25:6) Orweela mwa “mulapeli oororomeleya ni amiruku” Yehova onnanivahererya sooleeliherya seiha mmikhalelo mincipale. Ntoko yootakiherya, owo onnanihusiha orweela mmiyaha ni ixilema  soohiyanahiyana ophitaanyerya sa apuneka. (Mat. 24:45) Hiyaano ninnoona hiiha ntoko nthamwene awe Yupu, Elihu, yoowo aakonhe ariki: “Taani onahusiha ntoko [Muluku]?”—Yobi 36:22.

16. Tiheeni munaphwanelaanyu weera wi munnuwe omunepani?

¹⁶ Echu munaphwanelaanyu weera. Munepa waweela onahaala wookhaviheryaani opharihela yeeyo munaalakhanyaanyu ni munahuseryaanyu Mmasu a Muluku. Mvekele hiiha ntoko mulipa masalmo: “Mukihusihe ephiro anyu Apwiya, wi keecekemo moororomeleya. Mukivahe murima wa woovano nsina nanyu.” (Sal. 86:11) Mwawiihiiha mutitelele omwaalakhanya ni omuhuserya Piipiliya vamoha ni soolaleeryiwa ikina seiho Yehova onavahereryeiye mmarehereryo awe. Mweeparipari yoolakelela anyu henaphwanela okhala pahiru okhalano masuwelelo. Nyuwo munachuna olekecheya ni eparipari ni opharihela mookumini mwanyu seiho munahuseryaanyu. Munepa wa Yehova onamookhaviheryaani weerano yeeyo. Nyuwo tho munaphwanela waalipiha anna ni arokora anyu. (Ahe. 10:24, 25) Ntakhara heeni? Nthowa nawi amusi anyu oomunepani. Mveke munepa wa Muluku wi wookhaviheryeeni ovaha maakhulo ookhumela vathi va murima mmithukumano Seekristu ni opaka wiilipiserya wanyu vaavaa munakhalaanyuno makupa mmithukumano seiya. Mweerano hiiha, munahaala omooniherya Yehova vamoha ni Mwanawe, wi munnasivela “ipuchepuche” saya sookhweleya.—Yoh. 21:15-17.

17. Muni mooniherye hai wi munnakhaviherya moororomeleya marehereryo a Yehova?

¹⁷ Voohilekela, marehereryo mamoharu yaawo eni ehale veelaponi, enahaala ohooleliwaka ni munepa wa Muluku. Mwawiihiiha, mulapeke mwamvai ni marehereryo a Yehova. Mooniherye wi munnaasivela achu oothene hiiha ntoko Muluku moorweela wa olaleerya michaka yaphaama wa achu oothene. Mutakiherye osivela ntakhara oreheryeya ni murecele moorweela wa wunnuwiha wiiwanana mmulokoni. Mmwiiwelele muhusiha anyu mutokotoko moorweela wa ohuserya sooleeliherya soothene onanivaheiye. Voocharela vaavaa elapo ya Satana enaphiyaaya omakuchuweloni, hamuni mukhale awoova. Ohiya okhala awoova, munamukhala oolipa murima ni aweemeleleya variyari va achu oororomeleya yaawo anamurumeela Yehova vamoha ni marehereryo awe.